الجزء 3

بقلم: دينا محمود

الجزء 03

دعاء وفارس اخدو ع بعض شديد واليوم كلو مكالمات ورسائل واتس ..

دخلو في دور حب ..

لاقتو مره مع ننو اتونس معاها واداها صورتو .. تاني قالت ليه مابقدر الاقيك خايفه زول يشوفنا .. قال ليها حاضر عمري ما حاجيب ليك مشاكل ..

يوم دق ليها زهجان متشاكل مع ناس بيتو في السودان .. وقافله معاهو ..

حست بيه من نبره صوتو ماكويس في حاجه ..

مالك في شنو صوت ماعاجبني ..

مافي شي .. انتي كيف ويومك كان كيف ..

كيف مافي شي قول .. كويسه انا يومي كلو بكون معاك بي التلفون عارفو يعني هسي بس وريني مالك ..

زهجان بس والله قافله معاي ..

في شنو قول طيب ..

ياخ شويه مشاكل مع ناس البيت ماداير اجوطك معاي ..

هنا هي زعلت ..

يعني انا ما دخلني بيك وب مشاكلك صح يعني انا مفروض اتكلم معاك لمن تكون مبسوط بس ولمن تكون متضايق اخليك عشان ما اجوط راسي صح .. كويس كتر خيرك ..

يا دودي ياخ عليك الله ما توجيطا لي زياده وانتي عارفه انا ماكان قصدي كده والله ..

لا قصدك كده كيف يعني ما داير تجوطني .. انت كان ما جطني حتجوط منو مثلا بتتكلم مع منو غيري بتفضفض مع منو غيري وقامت تردح ..

فارس ب هناك مبسوط ب كلام دودي نسى زاتو هو كان متضايق لي ..

حبيبتي انتي لا تفوتي لا تموتي الله يخليك لي ولا يحرمني منك والله ماعارف من غيرك انا كنت حاكون عايش كيف ..

كدي بطل حنكك دا عليك الله مالك عارف مابحب اشوفك كده ..

والله بس ي هو ناس البيت دايرين قروش وانا قبل اسبوع مرسل ليهم وهسي والله ماعندي وماداير اقول ليهم ماعندي وراسي جاط بس والمبلغ الطالبنو زاتو مبالغه بس ..

ي زول خير بتتسهل انت بس ما تشيل هم والمافيه خير لي اهلو مافيه خير للباقين ..

والله لو عندي كان اديتك ..

معقولا ياخ ابقى ماراجل كان شلتا منك ..

انت لي بتفكر كده مش انا وانت بقينا واحد وحقي حقك وحقك حقي .. اي بس في القروش لا معليش .. لاكين بدبرا ان شاء الله ..انتي بس دعواتك ..

ان شاء الله والله في كل صلاه بدعي ليك ربنا يوفقك ويفتحا عليك دنيا واخره ويكفيك شر بنات الحرام واولاد الحرام ..

اللهم اميييين ي رب بس دعوتك دي عندي ب الدنيا .. والله نسيت اي حاجه وبقيت ماشايل هم شي وان شاء الله الامور بتتسهل .. ياخ الماعندو دودي يعمل ليهو دودي ..

قعدت تضحك ..

دودي ممكن اطلب منك طلب ..

اطلب ..

نفسي ياخ اسمع منك كلمه بحبك ..

لا طبعا ما حاقولا ليك هسي خليها تجي مني بتكون احلى واحساسا جميل ..

بعدين لازم اقولا ليك عشان اثبت ليك حبي ..

لا طبعا بس نفسي اسمعا منك ..

طيب استنى بتسمعا ..

طيب نستنى ورانا شنو ..

كملو ونستم ..

يلا بعد دا ارقدي نومي .. بكره ماف جامعه صح ..

ايون ..

تمام اخدي راحتك واول ما تصحي كلميني ..

حاصحيك للشغل ..

حتكوني صاحيه ..

حاظبط المنبه المهم حاصحيك انا اوك ..

حاضر حقي براي ..

حاضر شنووو؟.

مالك مابتسمعي حقي انا براااي .. انتي قايلا نفسك حتكوني لي زول تاني يسمك .. قعدت تضحك .. حلوه حقي براي دي ..

حلوه عيونك تاني لا حبيبتي لا دودي براي بس ..

هههههه كويس يلا ارقد الساعه 8 بصحيك .. تمام يلا باي وخلي بالك من نفسك ولا اله الا الله ..

حاضر وانت كمان .. محمد رسول الله ..

طبعا دي نهايه كل مكالمه ..

قفلت وخاتا صوره فارس وسرحانه فيه مامتخليه يوم تحب ليها واحد حلبي هههه..

خاتا في صدرا ورقدت نامت ..

الصباح قبل ما تصحى جات امها داخله تاخد ليها حاجه وهي مارقه انتبهت لي حاجه واقعه في الارض شالتا لقتا صوره فارس .. طبعا راسا بقى يودي ويجيب و60 الف سؤال دا منو وعرفتو متين وجابت صورتو كيف ووووو .. بس رجعت الصوره في حتتا زي الماحاصل شي وطلعت قالت لمن تصحى بنتفاهم ..

فعلا المنبه دق ع 7 ونص .. وفارس من النوع النومو كعب مابصحى بسهوله لو فجرو جمبو قمبله مابصحى ..

فعلا اخدت التلفون وتدقدق نص ساعه زي ماحسبتا ب الظبط حتى صحى ..

اوف اخيرا ..

هههه صباح الخير براي ..

يسعد صباحك ي رب حلو الاسم الجديد ..

ههههه اهم شي عجبك ..

اي شديد .. يلا قوم عشان ما تتاخر ..

طيب اصحصح واكلمك ..

اوك وقفلت الخط ..

عايزه تقوم هي زاتا تصلي وتفطر انتبهت للصوره في الارض .. نططت عيونا ي ربي في زول شافا ياخ انا يوم حاتنكب الله يستر ..

قامت صلت ومشت المطبخ تعمل حاجه تفطر بيها ..

لقت امها في المطبخ ..

صباح الخير ماما ..

اهلين صباح النور .. مالك الليله بدري جامعه ماعندك ..

ولا شي امس نمتا كويس عشان كده ..

اها اي شكلك مرتاحه في نومت امس ..

حست الكلام فيه انه .. امممم مشت الموضوع عملت فطورا وجات قعدت في الصاله ..

وامها دايره تفتح معاها الموضوع ب اي طريقه وماعارفه تخش ليها ب وين ..

فجاءه دعاء سرحت ..

الواخد عقلك يتهنابو ..

هههه ولا زول غيرك انتي ي السمحه ..

انا زاتي قلتا كده ..

قلتي شنو ..

قلتا غيري انا السمحه الطويله الحلبيه العيوني عسليه ..

عرفت طوالي امها شافت صوره فارس لانو امها عكس المواص

فات القالتا دي ..

هي دي مواصفات فارس سجمي ..

عملت مافاهمه شي ..

ههههه والله انتي يا سوسو عليك حركات متين بقيتي طويله وحلبيه وعيونك عسليه ههههههه ..

من امس يختي اوريك صورتي ..

امممممم بس خلاص هي هنا اتاكدت ..

سكتت وقعدت تكمل في اكلا ..

مارديتي لي ..

ارد ع شنو ي ماما ..

دا منو الود الصورتو عندك دا ..

طبعا مافي طريقه تنكر حاجه ..

امممممم .. خلت الاكل ..

طيب ي ماما انا حاوريك دا منو بس بدون جوطه ممكن ..

اها اتكلمي وقولي الصراحه عشان لو عرفتا انك بتكذبي علي ما حتلومي الا نفسك ..

لا ما حاكذب ..

وقعدت تحكي ليها طبعا ما كل التفاصيل المهم اتلاقو كيف وانو دا فارس صاحب ود خالتي محمد وعايز يتقدم لي رسمي بس انا قلتا اعرفو اول حتى يتقدم لي وبعدين دي اخر سنه لي دايره اخلصا اول .. بس دي كل الحكايه ..

طيب وصورتو دي لقيتيها وين لاقيتي صح ب نهره كده ..

خافت ..

لا لا دي صوره مرسلا لي في التلفون ونزلتا الاستديو تحت طلعتا بس الاقي وين ي امي بعدين يقول علي شنو وهو زول جادي كان عملتا اي حركه يقول البت دي خفيفه ومابتنفع معاي وكده ..

اي خليك شاطره وكويس انك عارفه الكلام دا .. والمكالمات زاتو قليليها اصلو مافي شي بجيب المشاكل غير التلفونات دي ..

حاضر يا ماما ..

يابتي انا لو بنهرك فيك كده واقول ليك ما تعملي كده واجوط فيك والله خايفه ع مصلحتك .. وانا اساسا واثقه فيك وواثقه في تربيتي بس برضو قلب الام والزمن مامعروف بقى صعب .. وانتي عارفه انا صحبتك كيف ..

والله ي ماما عارفه وعارفه بتعملي دا كلو عشان خايفه علي وانا وعد ما حاعمل شي غلط .. ي احلى ماما وصحبه في الدنيا ..

مشت سلمت ليها ع راسا وقعدو كملو قعدتم .. (الام لمن تصاحب بتها احلى حاجه بتكون كده لا بتخليها تدس منها ولا بتخليها تعمل حاجه من وراها )

دخلت غرفتا لقت ننو داقه ..

رجعت ليها ..

بت وين انتي من قبيل بتصل ..

اسكتي ساي الليله صحبت كان حتكون في خبر كان بس الله ستر ..

مالك في شنو ..

قامت حقت ليها ب الحصل ..

يابت احمدي ربك امهاتنا ديل عسل عديل اخير من امهات تانين والله هسي لو وحده تانيه في مكان خالتي كان ورتو ليك اول شي كان التلفون اتكسر في راسك وواطاتك اصبحت ..

اي والله ..

اها فطرتي ..

اي .. وانتي ..

زفتا دي لا قلتا افطر معاك ..

ولا تزعلي تعالي باكل معاك تاني ..

خلاص يلا انا طالعه ..

تمام ..وقفلت ..

دق فارس ..

سوووري اتاخرتا عليك والله صحيت لقيت الوقت اتاخر مشيت الشغل لقيت الشغل زحمه ..

لا عادي ولا يهمك فطرتا ..

لا والله ي دوب داير ارسل يجيبو لي فطور ..

غايتو عيشه العزابه دي ما حلوه هسي كان احنا في بيتنا مش كان فطرتا من يدينك الحلوه دي قبل ما اطلع ..

كاااان وقعدت تضحك ..

اضحكي كويس قربنا ..

تمام يلا امشي افطر وكمل شغلك انا جاياني ننو تفطر معاي ..

براي والله بقيت اغير من ننو دي انا ..

هههه اتلم دي صحبتي واختي وحبيبتي من زمان متربين مع بعض ..

اها شفتي من حبيبتي دي انا ما متفق معاك نهائي ..

هههههه طيب بطل حركات يلا اهندي بتدق شكلها وصلت ..

طيب طمنيني عليك اوك ..

حاضر .. باي

باي ..

قفلت منو ومشت فتحت لي هناء الباب ..

صباح الخير ي جميل ..

اهلين يسعد صباحك ي رب .

اها جهزتي الفطور ..

هو انتي اديتيني مهله اعمل شي ..

ههههه طيب ارح نجهزو سواء ..

تمام ..

مشو المطبخ قعدو يجهزو في الفطور وونسه وضحك جات ام دعاء سلمت على هناء ..

اها ي بنات دايرين شي انا دايره انوم لي ساعتين كده عشان اقوم اعمل الغداء لي ابوكم ..

لا يسلمو امشي نومي ..

تمام ..

اها ناكل هنا ولا نمشي الغرفه ..

ارح الغرفه احسن زاتو نقفل الباب هنا بنزعج خالتو ..

تمام ارح ..

شالو فطورم ودخلو الغرفه ..

بياكلو وبتشمشرو ..

اها ي حلوه امورك ماشه كيف مع فروس ..

حركات بقى اسمو فروس انا مادلعتو ..

انتي ماغبيه اعمل ليك شنو بدلعو ليك انا مش صاحبي ..

ههههه سمح دلعي كويس ..

والله امورنا ماشه كويس شديد وانا حبيتو شديد بقيت متعلقه بيه تعلق ما طبيعي يا ننو مامتخيله حياتي تاني من دونو حتكون كيف .. وفاهمني من غير ما اتكلم زاتو مع انو الفتره بسيطه الاتعرفنا فيها ع بعض بس والله زي البنعرف بعض لينا سنين .. بقى لي امي وابوي واخوي وحبيبي وصاحبي واي حاجه .. ياخ انا عشقتو ادمنتو عديييل ..

لا لا لا انتي وصلتي مرحله ي اختي لا تحسدي عليها هههههه ..

هههههه ..

والله مبسوطه معاهو شديد مهتم بي وخايف علي محسسني ب الامان محتويني ..

الله ع الاحتواء دا هههههه ..

بطلي حركات انتي ياخ .. اها سيبك مني انتي امورك .. ماف كده ولا كده ..

منين ي حسره ما كنتي حتعرفي انتي اول ي غبيه ..

قلتا يمكن عملتي حاجه من وراي كده ولا كده ..

لا اطمني ي حلوه .. اول وحده بتعرفي انتي ..

شويه تلفون دعاء دق .. واكيد عرفتو دا منو ههههه فارس ..

اهلين فارس ..

شنو فارس دي مش قلنا تاني تقولي لي براي ..

هههههه حاضر لسه ما اتعودتا عليها

عشان كده لاكين تاني بقولا ليك ..

تمام بتسوي في شنو ..

بفطر مع هناء ..

تاني هناء ..

اي اي .. اها انت فطرتا ..

اي الحمد الله اكلتا سندوتش وشربتا نسكافي ..

تمام ب العافيه ..

الله يعافيك ..

خلاص ما اشغلكم كملو اكلكم ..

تمام ..

واديني ننو اسلم عليها ..

هاك فارس عايز يسلم عليك ..

فروووس ..

عيون فروس ..

ودعا تقرص فيها يعني بطلي حركات وهي ماشغاله بيها تمد في لسانا ..

علمتك خلاص ع عيونا دي ..

ههههه كان ما علمتني هي الاعلمني منو ..

ههههه قلبي الصغير لا يتحمل ..

وقعدو يهظرو مع بعض حبه وقفلو ..

ياخ والله فارس دا زول ميه ميه ..

اها اديك ليه رايك شنو ..

ههههههه الغيره اشتغلت ههههه ..

غيره في عينك اكلي ..

ههههه والله انا كده ي دوب اتاكده انك بتحبيهو مدام بتغيري عليه مني ..

انتي عويره غيره شنو وكمان منك هبله دي ..

ههههه سمح كملي اكلك ..

جاطو جوطتم شي لعب وشي تلفزيون وبرنامج حسو نفسهم نعسانين رقدو ..

ودعاء تشيل وتفكر في كلام هناء ي ربي انا صحي بغير عليه من هناء ..ياخ ننو دي اختي اغير كيف ..

لا لا دايره ابعد الكلام دا من راسي ..

بقت تشيل وتفكر وتتخيل في فارس وكلامو وصوتو وصورتو ومعاملتو ومبتسمه لمن نامت ..

صحاها فارس اتصل ..

ردت الو ..

نايمه ولا شنو ..

اه ..

كدي عيديها تاني ..

اه ..

ههههه اتساغل عليك طيب ولا اخليك تكملي نومك ..

العايزو..

وصوتا مرخم ونعسان ..

براي ياخ صوتك عجيب وانتي نايمه والله ..

ضحكت ضحكه بسيطه وحلوه ..

اخ من ضحكتك دي ما بتعرفي بتعمل فيني شنو والله بعشقا طبعا ..

فارس والله نعسانه وكان اتكلمتا اكتر من كده النوم حيطير ..

خلاص خلاص ماش ..

يلا كملي نومك نوم العوافي اول ماتصحى طمنيني ..

حاضر ..

وعدت ايام وشهور وهم لسه في حالم دا ووضعهم دا ..وكل يوم حبهم بكبر وكل يوم متعلقين ب ببعض ..

يوم جات ام هناء لي ناس دعاء ..

سلمت عليهم ..

سالتا من هناء قالت ليها نايمه ..

وحست زي الخالتو دايره امها براها .. استاذنت ومرقت ..

دخلت غرفتا ..

نست ماجابت عصيرا معاها ..

راجعت المطبخ تجيبو ..

وغرفه الضيوف جنب المطبخ ..

تسمع ليك جد مبروك الله يتم ليها ع خير ..

يتبع ..