الجزء 4

بقلم: دينا محمود

الجزء 04

هنا نطتت عيونا الحريم دي بباركو لي شنو والشمار حرقا ..

قدمت خطوتين عشان تعرف الحاصل ..

والله ي سعاد مبسوطه بسطه لمن جاني ابو هناء قال لي في واحد متقدم لي ننو وزول كويس ووضعو حلو .. وزعلتا في نفس الوقت حتمشي وتخليني براي والله ماليه لي البيت هي ..

اصلو البنات ضيوف عن اهلم بس نقول شنو غير ربنا يسعدم قعادم حار وبعادم حار ..

اي والله وعقبال نفرح ب دعاء قريب زاتو ..

امين ي رب ..

دعاء هنا وشها بقى يجيب الوان وزعلانه كيف خبر زي داء هناء تدسو غضبت ورجعت غرفتا ..

وتشيل وتشاكل في روحا وقعدت تبكي محروقه لي هناء ماتقول لي مش هي اختي وصحبتي يعني معقولا خبر زي دا ما تقولو لي يعني انا كنت ما حافرح ليها عشان هي انخطبت قبلي وراسا بقى يودي ويجيب في افكار ماحلوه ..

اها انا زاتي ما حاسالا ..

قعده شويه هناء دقت ..

شايله التلفون وبتعاين وزعلانه ارد ولا ما ارد ..

ابت ترد ..

5 مرات ننو بتدق ودودي ما بترد ..

سمعت امها وام هناء بتكلمو عرفت ام هناء ماشه ..

فعلا فتحت الباب لقت هناء في وشها ..

بسم الله انتي ماكنتي نايمه ..

اي صحيت قبل شويه .. دعاء وين ..

طيب سلمي علي اول بعدين اسال من دعاء غايتو بتك دي يا اميمه ..

ههههه يحليلا روحا ونفسا دعاء ماشايفاها اليوم كلو عندكم لمن قربتا ادفعا ليهم .. هههههه ..

ضحكت معاهم ضحكت تمشه ..

دعاء جوه ي خالتي .. هي كويسه مابترد علي ..

اي جوه .. خليتها كويسه امشي شوفيها ..

دعاء من سمعت صوتا عملت نايمه ودخلت تحت البطانيه ..

جات جاريه فتحت الباب لقت الدنيا مظلمه ..

فتحت النور وجات عليها بت دودي قومي ..

ودعاء تبكي يحليلا ومادايره تزح البطانيه من وشها ..

بت دودي قومي ياخ قلقتي بي جيت زي المجنونه افتش عليك لي ما بتردي دا كلو نوم .. ودعاء لسه مصره ما تزح البطانيه ..

عن الدلع قومي وزحت البطانيه ..

تلقى ليك دعاء الدموع 6 و7 ..

اجي يابت مالك ومخلوعه الحاصل عليك شنو بتبكي لي ..

دعاء بتمسح في مدموعا .. ماف شي دخلت لي حاجه في عيني ..

دودي بعرفك الليله ولا امبارح انا ياخ مالك عارفاني مابقدر اشوفك وانتي زعلانه خلي بتبكي وقعدت تبكي معاها ..

حتى شويه دعاء قامت من سريرا وبقت حاضنا هناء عليها ..

ماتبكي ياخ خلاص انتي عويره مافي شي قلتا ليك ..

الا في شي ومادايره توريني .. انا بقيت ماصحبتك بقيتي مابتقولي لي بتدسي مني ..

انا مابدس انتي البتدسي ..

هناء بعد ما كانت حاضنه دعاء زحت منها ..

ادس منك كيف ..

يجيك عريس وما تكلميني لي قايلاني ما حافرح ليك انا ..

يابت عريس شنو قولي بسم الله ..

امك قبيل جات وقالت ورصت ليها الكلام ..

قعدت تضحك ..

هسي دا المبكيك ..

اي شايفاها حاجه عاديه انتي ..

ياخ انا قلتا فيك شي حصل ليك شي عواليق انتي قلبي وجعني معاك .. بعدين والله موضوع العريس دا ي دوب عرفتو منك ..

بلاي ..

والله العظيم امي ما كلمتني وانتي عارفه كان في اي شي انتي اول وحده حتعرفي ثح ولا لا .. وبعدين انتي ماعارفه هسي عندي علاقه مع بكري ..

اي ..

طيب مالك قالبه لي الدنيا كده ..زي ماكلمتك ب بكري كنت حاكلمك ب عريس الغفله دا ..

اي صح .. انا غبيه ياخ بس ما تتخيلي انحرقتا وزعلتا قدر شنو ..

يحليلك والله بعدين افوتك وين انا ..

تفوتيني مفقلقه هههههه قعدو يضحكو ..

لاكن جد والله امي لي ما ورتني ..

مابعرف والله ..

كدي خليها ماتوريها انك عرفتي اكيد حتجي توريك وتشاورك ..

تمام ي ستي ..

هسي يا ننو كان العريس دا طلع كويس ومافيه كلام بتوافقي وتخلي بكري ..

اي ..

بياعه .. لا مابياعه والله بس الجاهز بعرسو ههههه ..

غايتو انتي هههه ..وتمشي وتخليني ..

ماهو شوفي انا اخليك مابقدر خلاص بعرسك ليه نبقى احلى ضرات .. ههههه

صحبه وضره بري هههه وفارس اودي وين بري ما ببيعو بكنوز الدنيا ..

اشي ع الكنوز ..

بعدين تعالي هنا مش احنا متواعين نعرس مع بعض تعرسي وتخليني لي ..

مامشكله يوم العرس اقرصيني في ركبتي عشان تحصليني في جمعتي .. ههههه ..

لا جد حتمشي تخليني ..

ووووب ماتسبقى الاحداث احنا بنتكلم ساي كدي لمن ارجع البيت اشوف امي ..

لا ماتكلميها الا تكلمك ..

تمام ي ستي يلا انا نازله دايره شي ..

اقعدي حبه ..

ياخ وراي حاجات كتيره بس قلقتا عليك جيت اشوفك ..

حبيبتي انا ربنا يخليك لي ولا يحرمني منك .. سلامتك

امين..

يلا باي

من نزلت منها هناء بقت متضايقه وتشيل وتفكر معقولا ننو صحبت عمرا تعرس وتخليها .. تاني تطلع مع منو تتساغل ع منو تفتفض مع منو وتفكر لمن راسا داير ينشل .. شالت التلفون ودقت لي فارس الوحيد الممكن يطلعا من الهي فيه ..بتلجاء ليه لمن تكون مبسوطه عشان يشاركا البسطه والفرحه وبتمشي ليه لمن تكون زعلانه ومهمومه برضو بتشاركو حزنا وهما .. ولمن تكون حاجه غلبتا بتمشي ليه بتستشيرو .. عقلو كان اكبر من عمرو كتيبير ..

اول مارد ..

الو ..

براي انا بحبك ..

انتي شنو .

انا بحبك ..

عيديها تاني ع

ليك الله ..

انا بحبك والله العظيم بحبك ويشهد على ربي ياخ انا بريدك ..

ياخ والله انا البحبك وبريدك واه دقيقه اشيل نفس واختو والله ما مصدق ..

ههههه بطل حركات ياخ ..

يابت حركات شنو انتي عارفه انا مستنى الكلمه دي لي كم تقولي لي حركات وكمان براي انا بحبك .. اتدردك ليك انا ياخ .

هههههه ما للدرجه دي ياخ خلاص بطل عشان انا بخجل عان هسي خدودي حمرت ..

اخجلي براي انا اصلا الخجل خلقوهو ليك ..

يوه فروس خلاص ..

كمان فروس ..

دقيقه دقيقه .. يا امان تعال كدي اقرصني خليني اصدق ..

لا صدق بدون قريص مافي حلم كلو حقيقه ..

جد والله الليله انا اسعد انسان في الكون ..عملتيها كيف ..

اها اقعد شغلا لي كده والله اقفل منك ..

خلاص سكتا طيب ..

براي انا متضايقه والله ..

الله لا جاب ضيق مالك براي ..

هناء جاها عريس واحتمال تعرس ..

طيب خبر حلو دا الضيق وين ..

حتمشي تخليني معناتو ..

وانا مشيت وين ..

انت جوه القلب حبيبي .. بس انت ماعارف ننو دي انا يومي كلو معاها يعني مافكرتا يجي يوم ومانشوف بعض مثلا ..

طيب انت مافكرتي اذا احنا اتزوجنا برضو حتبعدي منها ..

والله دي مافكرتا فيها لانو ختيتا بعيده ..

بس هسي لمن لقيت الموضوع جادي ب الجد اتضايقتا ..اي مفروض انبسط والله مبسوطه ليها بس فكره يوم ما اشوفا صعبه ياخ ..

هي صح صعبه واي حاجه بس دي سنه الحياه وانتي زاتك حيجي يوم وانا اعرسك وهناء ماحتشوفك كل يوم ..

انتي بس مكبره الموضوع حبه ..

ياخ انا كان عرستا حاكون هنا في جده يعني عادي كل يوم بتلب ليها بس هي ماعارفه راجلا بوديها وين ..

طيب نفرض انا نقلوني مكان غير جده ..

وبعدين البت بعد ما تعرس مابتكون زي قبل العرس بكون عندها ملتزمات وحتنشغل ماحتلقى وقت زاتو تحك راسا ..

حبيبي ماتقعدا لي ..

والله مابعقدا ليك بس دايرك تختي الاحتمالات كلها ماتختي حاجه وحده وتمشي عليها هسي كان ما مشت الختيتيها دي حتزعلي وتتضايقي وووو لاكين لو ختيتي كل الاحتمالات بتكون اخف شويه ..

ماعارفه ياخ ..

كدي انتي بطلي تفكير كتير كل شي في وقتو ..

اها طيب هناء وحتعرس .. واحنا ..

احنا شنو ..

شنو الشنو ما دايرين نشوف يوسف ..

انا ماعايزه ولد عايزه بت ..

خلاص نجيبم الاتنين ..

المهم اول البت وحاسميها يارا الولد ب طريقتك سمي اياد .محمد. عبد العزيز براحتك.. خلاص متفقين انا بسمي الولد الاول يوسف والتاني ع ابوي احمد انتي البنات ..

هي هي حيلك حيلك هم كلهم بت وولد بس ..

والعرفك شنو جايه من الله ..

لا بس ولدتين بس وانت حظك ي يجوك الاتنين اولاد ولا الاتنين بنات ..

هي انا كلام كتير معاك ما داير داير املا البيت دا عيال اقل شي 6 ..

6 شنو ي مفتري ارنب انا ..

ههههههه لا انتي حقتي براي ..

جد حقتك براك ..

ايوه ..

ماحقت زول تاني ..

نهائي . انتي لي انا بس .. عندك شك ..

لا ابدا ..

قعدو يحبو في بعض شويه ويتشكلو في اسامي الاولاد شويه وعايشين جوهم لمن دعاء نست موضوع هناء والزعل الكانت زعلانه منها ..

بعد يومين جات هناء ..

بت .

عيونا ..

امي كلمتني ب العريس ومبسوطه وترقص ..

اها وشكلك وافقتي من رقصتك دي ..

مالي ما بوافق الود طلع مز عجيييب رهيييب جنتل مان ع قولم ..

وانتي شفتي وين يختي ..

وروني صوره ..وبعد ما نديهم الموافقه بجي يتعرفو علينا ونحدد يوم الخطوبه والكلام دا ..

ماشاء الله والله انبسطا ليك شديد .. ربنا يتمم ليك ع خير .. وباستا

اللهم امييين ي رب .. بس حاجه وحده المزعلاني ..

شنو ..

انتي لي ماسالتيني اسمو وشغال شنو والكلام دا ..

هي والله طارت من بالي انبسطا ب بسطتك والله .. معليش اها احكي لي عنو ..

طيب بوريك شويه تفاصيل القالوها لي لحده ما اتكلم معاهو في التلفون بعرف ليك الباقي ..

تمام احكي ..

يلا ي ستي اول شي اسمو محمد ابراهيم اهلو هنا مقيمين معانا في جده عمرو 30 سنه شغال مهندس اتصالات ود طويل حليوه اسمر عيونو كبار فنجان بس ماشاء الله وزول مرطب وكده ..

ايوه اهم شي الترطيبه ..

شفتي كيف .. هههههه

تاني محمد ي ننو ..

ههههه اعمل شنو عاد الله رايد لي قسمتي مع واحد اسمو محمد ..

تمام ي ستي ربنا يقدم الفيه الخير استخيري لاكين ..

اي ان شاء الله .. دقيقه مارميت ليك القنبله المزعلاني ..

اها احكي في شنو ..

شغال في الرياض ..

لا لا كذابه والله الرياض مره وحده ماقلتي اهلة هنا وقامت تتمتم واعصابا باظت .. لي يا ننو يخسي عليك الرياض بعيده ي بت هسي كان اشتقتاليك ساي ..

احي ماتقلبي علي المواجع والله من عرفتو في الرياض الدنيا مسخت لي شايله همك وهم امي افارقكم كيف ..

والله صعبه ياخ مابقدر يشتغل هنا ..

مابعرفو والله كدي لمن الاقي واتكلم معاهو انا لسه ما كلمتو مارديت ب الموافقه ماعارفه اي شي ..

كدي ماندق جرس ساي لمن نشوف رايو ..

تمام ي زوله ربنا يسهل ..

واها بكري ..

عارفاهو ماحيتقدم لي انا عشان كده قلتا ليه جايني عريس اوافق ولا حتتقدم لي انت .. قال لي الفيه خير ربنا يقدمو جبا

ن طلع .. قال شنو لمن دقيت جرس قلتا ليه انت بارد قال لي كان قسمتك بعرسك وكان ماقسمتك ماكسر رقبه اتخيلي ..

ههههههه بركه الخليتي ..

عدو 4 ايام وهناء استخارت وخيرتا لقتا ماشه كويس كلمت امها وابوها ودعاء انبسطو شديد .. ابوها ادا ناس العريس الموافقه عشان يجو يتعرفو ويتقدمو ..

قالو خلاص بنجيكم بعد يومين بكون خميس .. محمد ياخد اجازه ويجي طيران من الرياض عشان ب العربيه المسافه بعيده وبصل تعبان .. وافقو ..

بدت التجهيزات دعاء وامها والجارات الفي العماره جو يساعدو ام هناء كانت عامله مرطبات جاتوهات وعصاير وفطائر والكلام دا لانو قالو ليها المغرب بنجيكم ..ودعاء مشت مع هناء الكوفير عملت ميكب خفيف هادي ولبست فستان بسيط برضو لونو تيفاني ..ودعاء اليوم كلو ماسكه التلفون متواصله مع فارس اها مشيتو وصلتو عملتو شنو ووووو .. خلصو ورجعو البيت دخلو الغرفه .. شويه اهل العريس جو دقو الباب ..كان جات امو وخالتو واختو وابوه وعمو ..والعريس طبعا ..

استقبلو الحريم في غرفه الضيوف والرجال في المجلس .. ظريفين طبعا جابو معاهم حاجات كتيره زي الخطوبه ما كانهم دايرين يتعارفو .. (العريس من دخلتو بقولو .. والمطر من رشتو )

والعروس كبكبه شديده ..

دودي شوفي الروج اتمسح صح ..

لا ..

طيب الفستان هنا زي الاتكرفس ..

لا ..

طيب حاسه نفسي عرقتا كدي ظبطي لي البدره ..

طيب .. وشالت وظبطتا ..

طيب .. وقفتا ليك ..

طيب شنو وووب علي ي بت روقي شويه مافي شي ..

ب هناك الناس اخر ونسه وضيفوهم ..

شويه قالو دايرين يشوفو عروسم ..

جات ام دعاء .. بنات يلا اطلعو دايرين يشوفو العروس ..

جات مارقه هناء .. دعاء ثبتتا ..

مالك ..

مستعجله كده اصبري احصنك ..

حبيبتي انتي والله انا نسيت زاتو من اللبشه ..

مامشكله انا في مابنسى مافيني لبشه.. وغمزت ليها..

هههههه اصبري خلي فارس يجي وانا احضر بوريك بتتلبشي ولا لا ..

هههههه طيب نشوف ..

اخدت نفس عميق .. وطلعت لي اهل العريس ..

سلمت عليهم ومعاها دعاء ..

كلهم .. ماشاء الله تبارك الله ربنا يحفظك ..

وقعدت جنب امها وعينا في الارض خجلانه ..ام العريس ..

حلاتا ماشاء الله ربنا يحفظا ويغطيها ي رب .. وهي تتخجل ساي دعاء قعدت جنبها وبقت ماسكه يدها عشان تخفف التوتر العلى هناء .. شويه جاء ابو هناء قال هنا تمشي ليهم ب هناك عشان العريس داير يشوفا ..

امها جات كلمتا .. بقت تطنطن ..

يا امي ما يجي هو هنا ياخ انا براي امشي ب هناك ودقت جرس براحه طبعا عشان الضيوف .. دعاء قالت ليها ارح بره ..

طلعو بره ..

يابت انتي عويره عادي يعني شنو ماتمشي وابوك معاك سلمي عليهم وتعالي بس ماقالو ليك اقعدي ..

امها اي بس سلام وتعالي شاطره ننو حبيبتي .. بعدين يجو كلهم داخلين ع الحريم عشانك انت اخف امشي ليهم ..

طيب بمشي اسلم بس ..

تمام ..

نادو ابوها جاء ساقا ومشى بيها المجلس تسلم ع العريس ..واهلو..

فعلا مشت معاهو رجل قدام ورجل وراء ورجولا يتلخبطن مع بعض لبشه شديده .. صراحه المنظر حقها مبالغه كان والله صعبه لو خلو العريس واهلو هم الاجو داخل يسلمو كان حتحس ب راحه شويه بس نقول شنو ..

دخلت .. سلام عليكم ..

ابو العريس وكلهم .. وعليكم السلام ورحمه الله ..

بقت تسلم عليهم في يدينم ..

وماشافت محمد زاتو عيونا مارفعت ..

قام محمد بصوت عالي ماشاء الله يا حافظ احفظ .. ابتسمت ابتسامه خفيفه وطلعت طوالي ..

ابو العريس ..

هي مشت وين كان تقعد حبه ..

ههههه والله بتي خجوله شويه معليش ..

لا ماشاء الله عليها جد ونعم النسب والتربيه ..

اها نقول خير ونحدد موعد للخطوبه ..

خير ..وفعلا حددو الاسبوع البعدو الخطوبه ..

محمد طلب من نسيبو انو ينادي ليه هناء عايز يتونس معاها شويه ع انفراد حسا بيها خجلانه قبيل وماشافتو وحنك كده ..

ابو هناء وافق وفعلا نادا هناء وكلما ..

وافقت بس قالت هو الاجي ويقعدو في الصاله ..

كلم محمد وجاء قعدو في الصاله .. شويه جاتو هناء ودعاء سلمت وقعدت ..

دعاء سلام عليكم سلمت .. طبعا انا دعاء انتيم هناء واختا شديد .. وحاولت تلطف الجو شويه ننو دي اوعى تزعلا كلمتك من هسي وكان اشتكت لي سجمك وهو يضحك .. شويه شويه حست هناء شويه بدت تفك وتبقى عادي .. استاذنت وطلعت منهم خلتم ياخدو راحتم ..

عاين ليها .. ماشاء الله احلى من الصوره ب كتير ..

شكرا ..ولسه عينا في الارض ..

انتي هسي انا تاني كان جيت ماري حنبك بتعرفبني ..

استغربت من السؤال ..

لي ..

عشان من قبيل عينك في الارض ماشفتيني نهائي ..

ابتسمت ليه .. عاينت ليه شويه ونزلتا تاني بقت تطقطق في اصابعا ..

خلاص اهو شفتك حاعرفك تاني ..

قعد يضحك..

بدو يتكلمو شويه شويه هناء فكت وبقت تعاين ليه وتدي وتاخد معاهو وتضحك..

قالو خلاص يمشو ..

طلب رقم تلفونا عشان يقدر يتواصل معاها ويعرفا اكتر ويشوف عايزه حاجه معينه يوم الخطوبه وكده .. فعلا وافقت وادتو ليه ..

حددو الاسبوع الجاي الخطوبه وطلعو ..

الناس اتفكفكت وهناء مبسوطه شديد طلبت من

ام دعاء دعاء تبيت معاها ..ووافقت ..

هناء بعد الضيوف كلهم طلعو دخلت الغرفه هي ودعاء وتنطط ومبسوطه شديد ..

الاشوفك قبيل متلبشه مايشوفك هسي تغني وترقصي ..

والله انا زاتي مستغربه في نفسي هههه ..ياخ موقف لا احسد عليه ما اتوقعتا نفسي يوم اكون ملبوشه كده ..

ههههههه اهم شي انك مبسوطه ..

والله مبسوووطه شديد كمان ..

كدي تعالي وريني اها اتعاملتي معاهو كيف بعد ما مشيت انا ..

يازوله خجلتا شويه وتاني بقى عادي هو زاتو شكلو لذيذ وكان شفتي زول نكته تقعدي معاهو بس تضحكي عسل ياخ راجلي دا ..

رررر را شنو .. ههههه

هههههه مالك راجلي بعد دا خلاص ..

ههههههه سمح الله يهني يختي ..

امين ي رب ..

وقعدو يتونسو وتشيل وتحكي ليها عنو والحصل لمن كانت معاهو ووووو ..

بعد ساعتين كده اتصل عليها ..

هس هس دا هو ..

ومالو شفقان كده ما ينتظر لي بكره ..

بكون اشتاق لي ههههه كدي هس النرد ..

طيب ..

وردت الو..

معليش اذا ازعجتك ..

لا عادي ولا يهمك ..

تسلمي ي ستي بس حبيت اسمع صوتك ..

سكتت زي الكديسه الاكلت لسانا ..

مالك سكتي مايكون كلامي ضايقك..

لا والله مافي حاجه ..

شكلك انحرجتي ..

قعدت تضحك.. ضحكه بسيطه كده ما ضحكت هناء البنعرفا الجيران يسمعو .. ودعاء فاتحا خشما وبتعاين لي هناء مستغربه في الضحكه ..

المهم قعد يتغزل شويه ويحكي عن نفسو شويه والونسه جرت ..

دعاء لقتا مطوله دقت لي فارس .. ك العاده فصل ليها ورجع هو ..

براي وينك الليله طولتي مني ..

ههههه طولتا شنو قبل شويه كنت بتكلم معاك .. انتي عارفه كان قعدتا ثانيه ما اتكلمتا معاك بقول ليك طولتي خلي ساعه ..

اممممم بحبك وبحب بكشك انا ..

ههههه حبيني انا اي لاكين انا ما ببكش عشان تحبي بكشي ..

طيب حامشيها ليك ..

ههههه اها هناء كيف احساسا مع العريس ..

اسكت ساي من قبيل مبسوطه وتنطط والدنيا ما سايعاها ع قولم ..

يحليلا ربنا يسعدا ي رب ..وعقبالنا احنا قريب نحصلا كمان ..

امين ي رب .. متين ..

والله تقولي بكره انا ماعندي مشكله اصلا انتي الماخرانا شابكاني لمن اخلص الجامعه باقي لي فيها كم شهر ما اهندي صحبتك نست موضوعا وحتعرس ..

لا ما نستا بعد العرس بتجي تمتحن انا برسل ليها المحاضرات وكده تذاكر في بيتا وتجي تمتحن ..

طيب انتي وقت بتفكري اهو ماكان تعملي العمليه دي لي نفسك ..

خلاص براي انا مافرقت خليها كلها كم شهر هسي بتعدي .. بعدين ماينفع نعرس مع بعض .. لازم كل وحده تقيف للتانيه يوم عرسا ..

تمام ابدا اجهز الشقه يعني مدام بعد كم شهر ..

ههههههه مستعجل شديد ..لا شقتي بفرشا انا براي ..

طيب عشان ابدا فيها حبه حبه انتي قولي نفسك في شنو وانا بمشي اجيبو واصورو ليك كان عجبك بشتري عشان لمن نعرس بيتك يكون جاهز .. وانا اشتري العفش كلو في وقت واحد صعب علي ..

اي والله عارفه..

بعدين انا مادايره بيت كبير يعني غرفتين ومجلس وحمامين وصاله صغيره كفايه ..

لي ..

شنو ال لي .. غرفه نوم وغرفه ضيوف والمجلس للرجال بس ..

لا الوساع حلو مالك مضيقا علينا .. انا داير 5 غرف ..

لا حول الله لي دا كلو ..عشان ما بتنظف انت موش ..

هههههه والقال ليك انتي حتنظفي حاجه منو .. شغاله بس ..

اخ قلبي الصغير مدلعني طوالي انت ..

انا كان ما دلعتك ادلع منو ..وبعدين5 غرف عشان ..

غرفه للاولاد وغرفه للبنات ..

ههههه اولاد وبنات قلتا لي ولا ولد وبت ..

اي اتكلمنا في الموضوع دا احنا ..

ههههه طيب لمن يجي وقتو ..

تمام وبعدين امي وابوي واخواني كان جو هنا السعوديه زياره وكده يقعدو وين ..

اممممم خلاص4 غرف ولا تزعل بعدين ان ماشالم البيت ديل اهل حقي براي اشيلم جوه نن العين ..

يا سلام عليك والله عارفك ما بتقصري .. وب المناسبه انا كلمتا امي وانبسطت شديد ووافقت ..ووريتا صورتك كمان وحبتك ..

يحليلا ربنا يديها الصحه ي رب ..

امي زاتا كلمتا بيك وقالت ماعندها مانع بس العرس هنا ..

اي مامشكله برسل لي امي وابوي يجو يحضرو واخواني بحنكم ..

والله انا كان نفسي كلنا نمشي هناك نحضرو بس ماعارفه امي لي مصره يكون هنا ..وبعدين حتكون ميزانيه عليك والله تجيب اهلك وتعرس وتفرش وشهر عسل ووووو ..

معليش براي كلو عشان خاطرك بهون ..

حبيبي انت تسلم لي ..

يلا بعد دا النوم ..

اي نايمه مع هناء ..

امممم معناتو سهره صباحي ..

هههه اي والله بصحيك الصباح للشغل وبعدين برقد انوم ..

لا ما تتعبي نفسك نومي طوالي ..

لا اصحيك واصبح عليك متين ماصبحتا عليك انا ..

يخليك لي انتي ولا يحرمني منك ..

امين ي رب ..

يلا طيب سلمي ع هناء لمن ادق ليها بكره ابارك ليها ..

حاضر ..

تصبح ع خير ..

وانت من اهلو ..

خلي بالك من نفسك ..

حاضر وانت كمان ..

لا اله الا الله ..

محمد رسول الله ..

قفل ..

يتبع ...