الجزء 6

بقلم: دينا محمود

الجزء 06

الو ..

دودي كيف ..

فارس وقعدت تبكي .. ويحليلو ماسك نفسو ب العافيه عشان مايبكي معاها ..

اخبارك شنو ..

ماكويسه نهائي لي قفلتا تلفونك ولي ماوريتني ب وفاه ابوك والبركه فيكم وووو قعدت تعاتب ..

معليش جات كده والله .. والبركه في الجميع .. كدي روقي حبه والله مصدع وتلفوني شكلو انسرق اخدتا تلفون اخوي قلتا اكلمك ..

الله يعوضك ي رب .. انت هسي عامل كيف .. والله كان نفسي اكون جنبك عارفاك محتاج لي الايام دي ..

اي والله ي دعاء ماعارفه فقدتك كيف والله انا ماقادر والله ومامصدق لي هسي ب وفاه ابوي الله يرحمو حاسيهو حلم حلم اه ي ابوي وقعد يبكي ..

حبيبي عليك الله ماتبكي ماكتير ع ربو ادعو ليه محتاج دعواتكم والله وكلنا محصلنو بس ماعارفين اليوم متين الله يدي بس حسن الخاتمه ..

وتبكي وهو يبكي معاها .. ما اتحمل قفل منها ..

عدا يومو وهو لسه متاثر ب وفاه ابوه .. وهناك دعاء تشيل وتتصل عليه في رقم اخوه يقول ليه ماترد ولا قول بعيد ماقادر اتكلم ..

فعلا بترد ويعتزر انو هو بعيد .. تاني يوم اخوه اداهو جوالو وجاب ليه شريحه قال ليه شيلم اشتغل بيهم لحده ماترجع لانو دعاء قلقانه عليك وكل شويه بتتصل عايزه تطمن عليك ..

فعلا اخدو ودق لي دعاء ..

الو ..

دودي اصبحتي كيف معليش امس كنت بعيد ..

لا ماكنت بعيد عارفاك كنت بتعتزر لانك ماقادر تتكلم معاي .. وانا والله ماقادره اخليك براك .. عايزه اكون معاك كل ثانيه كل دقيقه ما عايزه افارقك ..

وهو ساكت ..

مالك ساكت ..

ماقادر اتكلم والله عايز اسمع صوتك بس اتكلمي ..

انبسطت شويه وبقت تتكلم معاهو بتحاول تطلعو من الجو الهو فيه .. (فقدان الاب ولا الام صعب والله بس الواحد يعمل شنو سنه الحياه والحياه لازم تمشي )..

مره تضحكو ومره تحب فيه شويه وهو مبسوط ب محاولاتا دي .. عارفا عايزه تطلعو من الحزن الفيه ..ادتو هناء واهلا عزتو .. وقفلت ..

وبقت ع كده كل يوم اتصالات مامفارقاهو نهائي لحده مارجع ليها فارس حقها حبيبا الزمان ..

انتي عارفه ي دودي ..

اها ي روح دودي ..

انا عمري ما انسى ليك وقفتك معاي دي لو وحده غيرك كان خلتني تقول خلي لمن يروق بعدين تكلمني ..

تبقى غبيه ومابتعرف للحب حاجه ..ولا حبتك..

وانتي بتعرفي للحب شنو ؟

انا ياخ ماكنت بعرف اي حاجه ليه والله انت العلمتني الحب وعلمتني كيف احب وعلمتني حاجات كتيره قايلا روحي بعرف للحب شي طلعتا كيشه ساي ..

ههههه حلوه كيشه دي ..

حلوه عنونك .. اها ما اشتقتا لي ما راجع ..

والله اشتقتا ليك بس شويه كده ديل محتاجين لي الايام دي اصبري معاي حبه ..

والله حبيبي صابره معقولا بس وعارفاهم محتاجين ليك بس عشان اشتقتا ليك ..

انا زاتي والله بس ازبط ليهم امورم هنا وبعدين بجي .. عارفه انا هسي ب اعتبار ابوهم بعد ابوي الله يرحمو بما انو انا اخوهم الكبير ..

اي والله عارفه ربنا يقويك ..

امين ي رب ..

كملو ونستم وقفلو ..

ارح للعرسان نسيناهم بعد وفاه ابو فارس ..

هنو ..

عيونا ..

تكبر عيونا .. اسمعيني ..

احكي ..

جاتنا سفره لي ماليزيا اجازه تبع الشركه 3 اسابيع كده رايك شنو ..

حلو طيب والله تنبسط وتغير جو متين ..

اي انا زاتي قلتا كده ..

يعني شهرين كده ..

تمام طيب ..

رايك شنو تمشي معاي ..

امشي معاك وين ..

ماليزيا ..

اتخيل ..

شنو اتخيل مش مرتي ..

اي لاكين لسه ماعملنا العرس ..

هو الا نعمل العرس حتى تبقي مرتي ..

اي ..ومعصبه ..

قعد يضحك حساها عصبت شديد ..

طيب رايك شنو نقرب العرس والاجازه دي تكون شهر عسلنا وكده ..

ماجادي طبعا يعني نعملو هسي بعد شهرين ..

ايون ..

لا طبعا امشي ساي اجازتك وتعال ..

ياخ ماعايز امشي براي واصحابي معظمم سايقين نسوانم ..

براحتم احنا ملنا ومالم .. وبعدين شنو هو بدل الخطوبه داير عقد قلنا طيب .. هسي داير تقدم شهرين للعرس ..

اي ياخ عليك الله ما تعقديها ..

كدي امشي مني هسي ماشه لي دعاء ولمن ارجع بكلمك نتفاهم ..

سمح اوعى تزوغي ..

طيب .. يلا باي ..

ومشت لي دعاء ..

دودي ..ازيك ..

اهلين حبيبه .. تمام وانتي ..

مالك بائسه كده ..

فارس طول ياخ .. وماعايزه ابقى انانيه قال اهلو محتاجينو بس انا زاتي محتاجه ليه ..

اي والله ماتبقي انانيه كلها فتره والعمر كلو ان شاء الله حيكون معاك الايام دي خلي مع اهلو شويه ..

تمام ..اها انتي امورك شنو وعريسنا كيف ..

كويسه وعريسكم كل مره طالع لي بي موضه جديده ..

ههههه كيف الكلام دا ..

اتخيلي اخر شي قال داير يقدم العرس شهرين عشان مدينهم اجازه لي ماليزياء وامشي معاهو ..

ههههههه كان بخيل كان قلتا داير يوفر ع نفسو لاكين مابخيل والله ..

انا زاتي فكرتا في كده ههههه ..

وانتي رايك شنو ..

ماعارفه والله جاط لي راسي ..

كدي استخيري وشاوري ناس البيت بعدين شهرين والله حبه غايتو كان بقيتي عليها حتعبينا تعب لانو ماجهزنا ليك ولا شي ..

اي والله .. كدي لي بعدين بنشوف ..

تمام ..

ارح نطلع المول نشم ه

واء حبه وعايزه اخد لي شويه مكياجات ..

خلاص انا زاتي عايزه اغير جو حبه ..

تمام ..

لبست وركبو تاكسي وطلعو المول ..

انبسطو وغيرو جو واكلو واشترو وجو راجعين ..

يلا انا طالعه البيت و بكره الجامعه طيب ..

اقعدي معاي حبه ..

لا يختي امشي شوفي موضوعك دا مع راجلك واهلك .. والصباح وريني الحصل شنو ..

خلاص تمام يلا باي .. ودخلت ..

دعاء طلعت فوق دخلت سلمت ع ناس البيت ودخلت غرفتا ..

مع دخلتا فارس اتصل ..

براي انا ..

عيوني انا .. امسيتي كيف ..

تمام ..

رجعتي..

اي .. هسي دخلتا انت جيت ..

احساس ياخ ..

ههههه اي عم الحسيس انت ..

كان ما حسيت بيك احس ب منو ..

هههههه .. تمام اها يومك كان كيف ..

تمام اهو ضيوف وبرنامج السودان حلو ياخ ..

اي قالو ..

طبعا انا مستغرب فيك ..

كيف ..

ياخ من ولدوك مامشيتي السودان نهائي ..

لا مشيت عمري 7 سنين كده ..

ههههه وفرحانه 7 سنين دي مامتزكره فيها حاجه ..

اي والله بس يلا جات كده ..

طيب واهلك مابتتواصلي معاهم ماعارفه عنهم شي ..

الا طوالي ب التلفونات وب التانقو وعندنا قروب في الواتس حق الاهل وبعرفم من الصور والمناسبات بجيبو لينا الاشرطه وكده .. بس ما اتلاقينا وش لي وش ..

مبالغه والله وابوك وامك مافكرو ينزلو السودان دا نهائي ..

ابوي لا نهائي بس ماما بتنزل كل سنه سنتين كده .. وبتكون ظروف اول مره عزاء جدي ابوها وتاني مره عزاء حبوبتي امها .. تاني مانزلت ..

عشان كده ماراضيه تعمل عرسنا في السودان وقروك جامعه في السعوديه .. ماعارفه شي للبلد هي ..

هههههه اي بكون..

غايتو المغتربين ديل الله يديهم العافيه ..

امين ي رب .. اها ماقربتا ..

ههههه انتي كل يوم حتساليني السؤال دا ..

يب لحده ما تجي ..

ههههه تمام .. وقعدو يتونسو ..

بهناك هناء ومحمد لسه في موضوع تقديم العرس ..

اها كلمتي ناس امك وابوك ..

لا .

لي ياخ .

عشان كنت بره وجيت انت حضرت سيادتك دقيت ..

خلاص بقفل هسي امشي وريهم شوفي رايم ..

عارفه حيقولو لي الدايراهو ..

اي ما مدلعنك ..

اي وانت زاتك مفروض تدلعني ..

وانا هسي مابدلع فيك ..

اي اي انا زاتي قلتا كده ..

ههههه طيب امشي عليك الله وانتهي لي من البرنامج دا .. ولا اقول ليك شي خليهم بكلمم براي اصلا نهايه الاسبوع دا انا جاي ..

احسن برضو ..

خلاص تمام مش اهم شي انتي موافقه ..

لا لمن استخير ..

مامشكله استخيري لي نهايه الاسبوع ..

فعلا عدا الاسبوع وجاء وكلم اهلا وافقو وقالو راي هناء لانو دا عرسا هي .. وهي قالت اوك بعد ما استخارت . .

محمد انبسط شديد وحددو الموعد حق العرس ..

ب هناك فارس فجاءه امورم جاطت وطلعو ناس من وين مامعروف قالو المرحوم ابوه كان متدين منهم مبلغ كبير وكاتب ايصالات ... واخوه مرض طلع عندو فشل كلوي وكل مره غسيل وبرنامج .. دفع القدامو والوراهو كلو ليهم سدد ديون ابوه وبقى يعالج في اخوه .. ودعاء متابعه دا كلو وتشيل وتواسي وتصبر فيه ..

حبيبي لاكين انا كنت خاتي القروش دي لي عرسنا ..

معليش حبيبي علاج اخوه اهم لمن ترجع الامور بتتصلح ماتشيل هم نهائي وعرسنا بتم انت بس روق ..

كانت بتقول ليه كلام حلو بتصبر بيه شديد.. مع انو كان حاسي انو حتكون زعلانه كده عرسم حيتاجل ..

ودعاء ب العكس ماختت الحاجه دي في بالا .. وكانت جايطه مع هنو والسوق وبرنامج عرسا الجاهم فجاءه كده..

ربنا سهل الامور وجابو الشيله والريحه وشبه خلصت حاجاتا ..

ب هناك دعاء متواصله مع فارس وبتحكي ليه الحاجات الاخدوها اول ب اول .. وبي عفويه ..

انا بعدين عايزه زيها كده ودي تجيب اكتر .. وووو ..

هو بسمع فيها ان شاء الله ربنا يسهل وانا حاجيب ليك اي حاجه انتي عايزاها ..

تاني تتزكر الظروف الهو فيها تحاول تغير الموضوع ..

يوم تشيل وتدق التلفون مقفول اليوم كلو ..

قلق بيها شديد .. بقى بالا مشغول معاهو مافاهمه شي لي هناء ..

يابت مالك ..

ياخ فارس قافل تلفونو من الصباح وماعارفه مالو قلبي ماكلني ..

مافيه شي انتي بطلي قلق بكون بس فصل كهرباء ولا انسرق ك العاده وقعدت تضحك ..

انتي هسي ماوقت خفتك دي ..

هناء تزيد في الضحك ..

شويه تلفونا دق ..

اها دق ليك ..

لا دا ماهو .. دقيقه ارد ..

الو ..

براي انا ..

قامت تنطط .. وتكورك ..

هناء يا بت جنيتي مالك ..

فارس جاء السعوديه .. ولسه بتكورك ..

هو ب هناك يضحك ميت من الضحك ..

ي مجنونه بطلي كواريك كدي قولي حمد الله ع السلامه طيب ..

حتى شالت نفسا حمد الله ع السلامه متين جيت ولي ما كلمتني ..

هناء قلعت التلفون ..

فروس حمد الله ع السلامه ..

اهلين هنويه الله يسلمك .. اخبارك ..

تمام الحمد الله بركه الجيت للمجنونه دي عامله فينا عمايل ب سبتك ..

هههههه اي جيتا خلاص ..

دودي قلعت التلفون .. هاتي اكلمو ياخ امشي شوفي شغلتك .. هنو قعدت تضحك ومشت ..

براي والله وحشتني موووت ..

وانا كمان والله قلتا اعملا ليك مفاجاءه رايك شنو ..

احلى مفاجاءه طبعا .. متين وصلتا ..

هسي البيت زاتو مامشيت

..

تمام خلاص امشي ريح حبه وتعال لي الليله يحلك مني الله ..

هههههه طلباتك اوامر .. بس مالك مستغنيه ..

والله مامستغنيه قلتا بتكون تعبان لاكن اقول ليك شي اقعد بس اها ناس السودان كيف وانت وصحتك وووووو ..

هههههه حيلك حيلك دا كلو طيب اسالي حبه حبه ..

ههههه طيب اول شي اخوك كيف وناس البيت كيف ..

تمام والله الحمد الله الله يرفعو ي رب ..

امين ي رب ..

وتمو ونستم زين ..

ام دعاء عرفت فارس جاء وجاهم في البيت وهي تشيل وتجدع ب الكلام ننو عرست العقبال ليكم نفرح بيكم قريب ..

ودعاء تشيل وتغمز ليها .. امها ماراضيه تفهم نهائي ..

فارس اتحسس شويه استاذن وطلع ..

دا شنو ي امي السويتي هسي دا ..

مالك في شنو قلتا ليه ان شاء الله نفرح بيك قريب بس ..

طيب انتي ماعارفه انو ابوه متوفي ي دوب والظروف اتعكست معاهو يعني عرس هسي ماف داير تاني وقت حتى يقيف ع حيلو تاني ..

وانتي ان شاء الله دايره تستنى دا كلو ..

اي ي امي بستنى لي ما استنى اصلا دا اختبار لي اول مره هو تحصل ليه ظروف مفروض انا اقيف جمبو واساندو ما اتخلى عنو ..من اول موقف ..

طيب اقيفي لمن القطر يفوتك ..

مامشكله هو اصلا قاعد وراجيني ..

كويس ارجي انا نازله لي خالتك الليله دق الريحه .. نازله ..

اي نازله ..

نزلو لي ناس هناء جوطه ولمه وتعالي كسري الصندل يا بت اسحني لي المسك دا وبرنامج ..

دقت دعاء ع فارس تشوفو وصل وتعرف اذا اتضايق من كلام امها ..

قال ليها مافي شي وهو وصل .. بس حست بيه زي البكذب عليها والكلام حرقو ..عدت الايام وشالو فرش العروس وسافرو الشرقيه فرشو ليها بيتا وجهزو ليها امها ودعاء ومحمد .. وجو راجعين ..

عدت الايام ويوم العرس جاء وننو طلعت احلى عروس ب الفستان الابيض والعرس كان رهيب والفنانه عجييبه هججت ب الناس .. وفارس جاء كان واقف جنب دعاء اصلو مافاتا .. وكل شويه يقول ليها عقبالنا تتبسم وتتخجل وتزح منو ..

خلصت الحفله وعملو الجرتق ..

دعاء ي دوب حست ب انو هناء حتفارقا تشيل وتبكي وتمسح في الدموع فارس معاها بواسي فيها ..

خلصو ورجعو البيت عشان تشيل عفشا وتمشي مع راجلا طيارتم بعد ساعتين كانت لي ماليزياء ..

دعاء تشيل وتلملم ليها وتبكي وهي تبكي معاها وامها وابوها الناس كلها بقت تبكي ..

يابت ماتبكي ياخ عليك الله ماتبكي والله اخلي المشيه واقعد معاك ..

دايره تضحك وتبكي وماعارفه ..

اقعدي طيب ..

خلاص بمشي ومابتاخر وقعدت تضحك ..

ههه وثخه وحضنتا والله حاشتاق ليك ..

انا كمان والله .. سلمت عليها ووصتا ع نفسها جات ام هناء بتتكلم مع بتها .. مشت دعاء لي محمد جنس وصايا تختها في عيونك وماتزعلا واهتم بيها وماتخلي حاجه تنقصا وننو حساسه شديد ومرات عنيده بس انت رخي ليها حبه ووووو ..

هو حاضر ماتوصيني ع نفسي ..

اتطمنت عليها وودعوها وطلعت مع راجلا ..

دعاء واهلا طلعو شقتم .. عدتو بكا بس ..

دق فارس تبكي وتتكلم شي يفهمو وشي لا ..

حبيبتي انا كدي روقي هسي حبه كده واشربي مويه ..هسي البكا البتبكي دا لي شنو دايره تخربي لي عنونك البحبهم ديل ..

قعدت تضحك ..

اي ياخ اضحكي حبه اشتقتا لي الضحكه دي انا والله .. وبعدين تعالي هنا قبيل اقول ليك عقبالنا تمشي تخليني ..

هههه انت احرجتني لاكين وبعدين حسيت الناس كلها بتعاين لي والعجب محمد ود خالتي يحدر لي ساي ..

ههههه اي شايفو جاني قال لي شنو ي معلم عملتا واضحه كده عشان خطبتا يعني ابرد حبه ..

هههههه تستاهل لانو الحفله كلها انت جمبي هسي كان زول عجبتو يشوفك يغير رايو ..

عان الرمه دي والله اضبحو البقرب منك كلمتك مليون مره انتي لي انا براي سامعه خلي قال ..

ههههه يخليك لي ي رب ..

امين ولا يحرمني منك .. كملو ونستم وقفلو ..

ننو اول ما وصلت ماليزياء دقت لي دعاء طمنتا والصور اول ب اول بتصلا طبعا كانت مبسوطه شديد ..

مع انو متواصله معاها بس برضو فاقداها الجامعه بتمشي براها كان طالعه حته براها اتعودت ع هناء مع انو عندها صحبات بس ما زي هناء ..

فارس دقت ليه امو قالت ليه اخوه تعب شديد وقالو لازم يسافر مصر عشان يزرعو ليه كليه تاني عايزين قروش ..

قال ليها طيب ..

بقى يقول من وين اجيب هسي ي دوب رجعتا الشغل العندي ما اظن يكفي .. بقى يتدين ودخل في ديون كتيره ..

امورو كل ماليها بتتعكس زياده ودعاء لسه بتطمن وجوها نهائي هي ما مطمنه بس تقلق وتقلقو الاتنين كان قلقو الامور حتخرب ..

وام دعاء طوالي تسال فيها اها متين ..

بعد الامتحانات ي امي بنتفاهم هسي الامتحانات ع الابواب خلاص خليني اركز ..

طيب بنتفاهم بعد الامتحانات ..

طبعا هناء جات من شهر العسل وقعدت في بيتا ودعاء بترسل ليها المحاضرات اول ب اول عشان تزاكر ..

فارس مهموم ومتضايق وبحاول يطلع من الفيه دا بجي يتكلم مع دعاء شويه يشكي ويبكي ويحكي ودعاء يحليلا صابره وظريفه معاهو ..

ايام الامتحانات جات .. وهناء جات ..

فارس كل يوم بتصل ع دعاء يشوفا امتحنت كيف ..

بت ماعاجباني مالك ..

مالي ..

بقيتي تدسي مني ..

لا وا

لله مافي شي .. امتحنتي كيف انتي ..

كويسه ماتغيري لي الموضوع ..مالك فارس مزعلك ..

لا ابدا والله بس .. وقعدت حكت ليها الحصل كلو كيف فارس دخل في ديون عشان علاج اخوه وامها زانه عليها الايام دي وبقت ماعارفه تعمل شنو ..

يحليلك ي دودي دا كلو وماوريتيني لي ..

قلتا ما اشغلك وانتي ي دوب عروس ..

عروس في عينك اتعودنا احنا نخبي عن بعض ..

لا والله بس والله متضايقه شديد ومحتاره ..

يابت ماتشيلي هم واتوكلي ع الله بس ..

ونعم ب الله ..

ان شاء الله كلو بتحلى ..

ان شاء الله ..

اخر يوم في الامتحانات جاء ودعاء ليها مرات الامتحانات ما تخلص نهائي عشان مواعده امها بعد الامتحانات تتكلم معاها ..

دودي اخيرا خلصنا .. ومبسوطه ننو ..

اي ب ابتسامه بسيطه ..

يابت مالك ماقلنا ليك ماتشيلي هم تعالي عندي ليك خبر حلو ..

شنو قولي طولتا من الاخبار الحلوه ..

انا حااامل ..

جد .. مبرووووك .. متين ..

الله يبارك فيك حبيبتي حللتا امس قلتا ادق ليك تاني قلتا اخليك لمن الاقيك في الجامعه .. طبعا لسه محمد ماكلمتو ..

ي حليلك والله ومسكتا حضنتا ..

يلا ارح ننبسط ب مناسبه اخر امتحان وحملك ..

ارح ..

دعاء كانت عايزه تطلع من الهي فيه ب اي طريقه ..

فعلا طلعو وانبسطو اليوم كلو قضو بره وجو راجعين ..

امها من عند الباب مسكتا اها خلصتي ..

اي ي امي ..

وامتحاناتك كيف ..

الحمد الله ان شاء الله درجات حلوه ..

ان شاء الله .. والعرس متين ..

ماعارفه كدي هسي انا تعبانه عايزه انوم بكره بنتفاهم ..

طيب ي دعاء نومي ما قاعدين في بيت واحد احنا تشيلي وتتهربي مني ..

ما اتهربتا بس قلتا ليك تعبانه .. دايره تغير الموضوع ..

ب المناسبه هناء حامل ..

ماشاء الله تبارك الله مبروك والله .. عجبني ليها .. اها شفتي القدرك عرسو وحملو انتي اقعدي ..

ماما تصبحي ع خير ودخلت غرفتا ..

جاء ابوها مالكم بتكوركو ..

بكورك مع بتك السجمانه دي اهندي صحبتا عرست وحملت وهي مستنيه فارس يطلع من الازمه الهو فيها وتشيل وتعلي صوتا عشان دعاء تسمع ..

يا سعاد خلي البت ب راحته مدام هي مرتاحه ..

اصلا مافي شي معند ليها راسا غير دلعك ليها دا ..

بتي الوحيده مالي ما بدلعا ..

طيب دلعا لمن القطر يفوتا وبعدين خليها جنبك واتفرج عليها ..

ب هناك دعاء سامعه الكلام كلو وتبكي .. فارس يدق تقفل ليه ما دايره كلام معاهو .. وامها ب هناك تشيل وتجدع في الكلام ..

وفارس كتر الاتصالات كتير ..

ردت ..

فارس عليك الله الليله اختاني والله ماقادره اتكلم وبتبكي .. وقفلت الخط ..

اول مره كان ترد ع فارس كده وتقفل الخط في وشو ..

لا لا البت دي الليله ما طبيعيه نهائي وراسو بقى يودي ويجيب ويشل ويتصل وهي تفصل ليه .. رسل ليها ..

دودي ردي علي قلقتي بي مالك بتبكي وماطايقه تتكلمي معاي .. والله ماتردي هسي اركب اجيكم اليحصل يحصل ..

قرت الرساله خافت عارفه فارس مجنون وممكن يعملا وكان جاء الليله ما وقتو نهائي يتلاقى مع امها تسمعو 60 الف كلمه فارغه ..ردت ..

نعم ..

كمان نعم ..

معليش ياخ ماتركز معاي في الكلام ..

لا في شنو مالك والببكيك شنو ..

مافي شي ..

قام جاط وقعد يكورك ..

ماتكذبي علي قولي مالك في شنو بتبكي لي حصل ليك شنو ماتخليني متوتر كده ..

وهي مصره ماف شي ضغط عليها قامت كلمتو ب الحصل كلو انو امها ضاغطه عليها وكل مره تسال وهي ماعارفه انت بتمر ب شنو ووووو .. ولا اتفاهم معاها قفل طوالي ..

الدنيا جاطت ولا حاولت تتصل عرفت ماحيرد.. خلتو وقعدت تمت باقي بكاها كويس ..

عدو يومين هي بتتصل هو مابرد ليها ..

ومحمد راجل هناء جاء فجاءه وقال حيسوق هناء معاهو ..

هنو كانت الحاجه الوحيده المصبره دعاء لانو هناء كانت عايشه معاها الماساءه كلها ..

حاولو يكلمو محمد هناء تقعد قال لا ..

هناء سافرت .. وقلبها مقطوع ع صحبتا ..

اسبوع كامل وفارس مابرد اول مره يعملا ..

بقت دعاء تشيل وترسل ليه في الرسائل وتتصل وهو بس بقراء وعايش هو زاتو نفسيات ماعارف يعمل شنو .. يلقاها من ناس بيتم ولا من ام دعاء ولا من ناس الشغل ..

بعد اسبوع .. جاهم البيت ..

طبعا كلهم مستغربين دا مالو جاهم وبدون ما يكلمم زاتو ..

يتبع ...