الجزء 18
عبير انهارت علي اقرب مقعد وختت يدها في راسا وبعد مساافه قالت ليه : طيب !! زي م تحب ورقتي ح تطلع بتين ؟ عشان م ازعجك تاني ،،
ناجي : برسلها ليك قريب ان شاء الله ..
طلعت عبير وم شايفه قداما من الغضب وصلت البيت كيف هي نفسها م عارفه .. حاجه مني جات جنبها تهبش فيها وهي ساكته وسألتا : اها ي بتي خير .. جيني مالك بسرعه وموش قلتي عايزه تبيتي ؟ ووين ناجي ؟ ليي م جا معاك ؟ عبير عاينت لقت رزان نازله من السلم وقالت : ناجي خلاص رحل وللابد ورزان طبعا عندها دور كبير عشان العروس حقتو الصديقه المقربه جدا لي رزان ..
حاجه مني : سجمي قصدك منو ؟ صحبات رزان كلهم معرسات !!
عبير : لا انا بقصد عزاز بت خاله امينه البت حقت شهاده عربيه ،، لكن فوضت امري للذي لا يغفل ولا ينام ،، حسبي الله ونعم الوكيل
رزان صاره وشها وقالت : اي مصيبه حاصله ليك وراها انا ؟ لمن تختي ليك زول في راسك بتلبسيهو اي شي كعب يحصل ليك لكن م عندي ليك اي حاجه ومحل م تختي راسك ختي رجليك ،،
حاجه مني : في شنو ي رزان ؟ فهموني ي جماعه الحاصل ! احكي لي رزان ،،
رزان : انا كمان ي ماما مني م فاهمه حاجه لكن من كلام دي حسيت انو ناجي ح يعرس قريب وعزاز صحبني ،،
حاجه مني : لا حول ولا قوه الا بالله ..
عبير دخلت غرفتا وبقت تبكي وتتذكر اياما الحلوه مع ناجي وكيف قدر يتغير بالسرعه وكمان عايز يعرس واحده تاني ،،
وبسرعه طلعت التلفون وضربت لي امجد وطلبت منو يشوف ليها طريقه ينقلها من الفرع البجمعا مع ناجي وامجد سألا وحكت ليه اي شي وزعل شديد وقال ليها : اصلك م تشتغلي بيهو دا واحد حقير ورزان انا عندي معاها تصرف تاني ،،
عبير : اضرب لي ابوي واحكي ليه الحاصل انا م بقدر اكلمو خاصه وابوي م كان موفق بيهو من الاول ،، حلني من الموضوع دا عليك الله ي امجد وانا عندي كورس في القاهره امشي واجي القي الموضوع دا اتحلا وورقتي عند ماما مني ...
امجد ضرب لي رزان وقال ليها : انتي عندك يد في موضوع عبير دا ي رزان ؟
رزان : طبعا الكل متعاطف مع ست الحسن والجمال وانا امكم الغوله الشريره البحب خراب البيوت ،، سكتت مسافه وبعدها واصلت : اسمع صحبتي لو حبت تعرس ناجي انا م بقدر امنعا ،، م بقدر اطلع حب من قلب زول عشان عبير ولا حتي عشانك انت ،، لو سمحت م تفتح معاي الموضوع دا تاني وعزاز لو جات كلمتني م بقدر اقول ليها حاجه غير مبروك ..
🔹
رزان مشت لي لمياء وقالت ليها اديني عنوان الشيخ المغربي الساكن الصافيه عايزاه ضروري .. لمياء قالت ليها : الليله دايراه لي شنو ؟ دا خطير ويدو لاحقه شديد وقروشو كتيره شديد ..
رزان : بوريك م تستعجلي بس اديني العنوان ،،
لمياء : طيب حاضر
💗💗💗💗💗💗
💗💗💗💗💗💗💗💗💗 مرت الايام سريعه وناجي خطب عزاز وسافر قطر والعرس بعد تتم آخر سنه في الجامعه وعبير بقت الشغل البيت وعلاقتا بي رزان عاديه ويوم سألتا : وزنك زاد كتير وحاسه انو بطنك زايده م يكون من شراب الشيشه بقيتي تكتري منها بعدين كوكي دا قاعد جنبك طوالي خايفه يتأثر بيها وانتي عارفه انو الولد شغال بي نص قلب ،،
رزان : اووووف بقيتي بس المره العجوز المخرفه 😏😏😏
حاجه مني : ي بناتي خلو النقار دا الله يهديكم ...
رزان : انا بكره مقيله عند امينه قالو عيانه شديد من ولدت م ضاقت عافيه ... امشي اشوف الحاصل عليها ،،
حاجه مني : الله يشفيها بت طيبه وبت ناس ،، ولدا مسكين م رضع من امو ..
رزان في سرها " باين عليك ي شيخ المغرب يدك لاحقه لكن عشان تتأدبي ي امينه وتاني م تتخلي عني في وقت الحاجه وتعملي لي فيها شريفه شرف الدين ،،كدي نمشي نشوفا واملي نظري فيها ...
💗💗💗💗💗💗💗💗💗💗💗💗
دخلت رزان غرفه امينه ولقت يوسف عيونو متورمه من البكي وبعد شاف رزان جري عليها وبقي يبكي ورزان هبطت من منظر امينه ومنظر يوسف وبقت تبكي في حسره وندم وهي شايفه امينه راقده زي الشبح شعرها اتحتا ولونا بقي زي الفحم وبقت علي الجلد والبيبي ي حراام شايلاهو امها ويبكي وم عايز يشرب بديل لبن الام حق الصيدليات وم عرفو يعملو معاه شنو ؟؟ وامه في عالم تاني م حاسه بي اي شي ولا عارفه حاجه عن الولد
حتي لمن يختو ليها ولدا جنبها عشان ترضعو تصرخ وهو يكورك من صوتا الا يجو يشيلو منها وهكذا ،،،
جات غاده جارتهم وقالت لي ام امينه : البت دي عاملين ليها عمل ولازم تودوها لي شيخ يشوفا بالطريقه دي بتضيع منكم 😰
ام امينه : والله ي غاده ي بتي عندك حق انا كمان قلت كدا ،، الدكتور م خلي ليها حاجه واحتار فيها ونحن الدنيا مسخانه علينا وخايفه بتي تضيع مني