الفصل العاشر

طبعا" اول حاجة عملوها الاولاد ديل.. اتصلو في تلفون جدو.. وتلفون جدو كالعادة مغلق.. واحد قال لي اخوهو..

انت عندك تلفون ستو ام جدو؟.. قال ليهو والله مامعاي كان زمان لمن كنا متواصلين جدو من زمان قطعها معانا .. ما جانا الا لمن داير الشغل .. قال ليهو يازول انا مصر.. لازم نصل البيت .. ونكلم امو بالمصيبة دي .. الناس ديل ماجايبين ليها خبر .. لانو كونو زول يدفع قروش .. عشان يفصل زول من شغلو.. عشان يسوفو معاهو.. معناها الحكاية فيها انّ .. قال ليهو.. ونحن مالنا ومال الموضوع؟ .. قال ليهو ياخي يوم من الايام الزول ده .. كان اخونا وصديقنا.. انت لو عايز تتخاذل انا بمشي براي ..

المهم وافق يمشي معاهو.. ومشو الاتنين لي بيت ناس جدو.. المهم في الشارع بتكلمو الولدين مع بعض ..

قال ليهو لو جدو سافر مع الزول ده ..

نحن مانتكلم.. لانو المراة دي بتقلق ساي .. لكن لو موجود لسه نحن حنكلمها ..

وصلو دقو الباب .. طلعت ليهم محاسن .. قالو ليها نحن عايزين خالتو ستو؟ .. قالت ليهو ما بتقابل رجال .. اقول ليها منو؟ وعايز شنو؟

قال ليها انا محمد شريف وده اخوي .. نحن اصحاب جدو .. عندنا معاها موضوع .. طيب جيبي لينا تلفونها .. لانو في موضوع بخص جدو .. عايزين نقولو ليها .. قالت ليهم جدو؟؟ مالو نعل ماحصل ليهو حاجة؟ ..

قال ليهو يعني هو سافر؟ قالت ليهم ايوة سافر .. من امبارح الصباح..

قال ليها خلاص خليها .. قالت ليهو دقيقة بس .. اديني تلفونك .. قبل ماتمشي ..

كتب ليها تلفونو وفات. محاسن لمن دخلت جوة.. لي ستو .. حكت ليها.. ستو طبعا" قللقت شديد .. وافتكرت انو جدو حصل ليهو حادث .. وخلاص قلبها قعد يضرب زي الهبابة ..

شالت منها الرقم .. واتصلت فورا على الولد .. قالت ليهو انت محمد شريف؟؟ صاحب جدو صاح؟

قال ليها ايوة ياخالة.. قالت ليهو احكي لي.. مالكم في شنو؟ جدو حصل ليهو شنو؟ انا والله قلبي اتقلع من مكانو..

طبعا" هنا محمد شريف قال لازم يقول ليها.. بعد كدا خلاص الموضوع باظ .. باظ..

قال ليها والله طبعا.. نحن الكنا شفنا ليهو الشغل بتاع الصالون .. بس جينا سألنا بتاع الصالون امبارح.. قال لينا في راجل جا هنا .. وطلب مني افصلو من الشغل.. وقال عايز يسوقو معاهو لي مناطق الدهب .. وماعايز زول يعرف الحكاية دي ..

ونحن صراحة الحكاية دي خوفتنا على جدو ..

قالت ليهو سجمي.. ده منو كمان؟ وعايز من ولدي شنو؟ .. وليه عمل كدا؟ .. شكلو كيف الزول ده؟

قال ليها قال اسمو صديق سيد .. قالت ليهو قول الصديق السيد؟ قال ليهو بس ياهو تقريبا .. قالو بعرفكم .. قالت ليهو معقول؟ الصديق هدفو شنو؟ يطلع ولدي من شغلو؟ ويسوقو معاهو؟ ..

خلاص يامحمد انت ماقصرت.. ربنا يستر عليك.. الصديق ده معرفة ومن بلدنا ان شاء الله مافي مشكلة ..

لكن ستو بدت تتسأءل وتفكر وتفكر .. ستين فكرة جن في راسها .. وبدت تحلل براها .. ياربي كلو هين .. جدو ليه ماكلمني بي انو ده الصديق؟

احتمال الصديق لقى شغل الصالون مانافع مع جدو.. وداير يسوقو معاهو عشان يستفيد .. وكان خايف انو جدو يرفض مادام شغال .. وقال احسن يخليهو محتار وراسو مقطوع.. عشان مايكون عندو حل غير يسافر معاهو ..

مامشكلة .. انا ولدي ودعتو لي الله .. وهو راجل مافي عليهو خوف.. وربنا حافظ .. اصلا الصديق زول نيتو طيبة.. وقلبو رحيم.. مستحيل انو يفرط في ولدي او يأذيه .. انا واثقة .. غايتو طمنت نفسها شديد بالافكار الايجابية ..

وفي النهاية هدأت وفوضت الامور لله .. حتى محاسن بقت تطمن فيها .. وقالت ليها غايتو انتي ياستو.. اصلك ماتشيلي هم.. الحبة دي مابتجيك .. انتي زولة ضميرك صافي ونيتك بيضاء وبتساعدي الناس .. ربنا بساعدك .. وبحفظ ليك ولدك لامن يرجع بالسلامة اطمني ..

قالت ليها الله يبارك فيك يامحاسن.. الحمد لله وااثقة من ربنا ..

والراجل ده انا بعرفو .. ان شاء الله مايجي منو الا الخير ..

قالت ليها بتعرفيهو من وين؟ .؟ احكي لي متشوقة اسمع منك .. قالت ليها بعدين لمن تنوم ملكة والليل يهدا.. بحكي ليك حكايات وحكايات ؟؟

طبعا زي ما شايفين .في حاجة ملاحظة شديد .. علاقة ستو مع محاسن كل يوم ماشة تقوى .. وبقت تبوح ليها باسرارها ..

وهسي شكلها دايرة تفت ليها الصديق ود السيد ..

اها بالليل كدي .. والواطة هادية.. والملكة ماخدة راحتها في النوم ..

محاسن قالت ليها اها يا ستو.. مادايرة تحكي لي بالراجل الساق جدو ده منو وفهمو شنو؟

قالت ليها بحكي ليك هسي طوالي .. تعالي معاي بي جاي ساقتها مشو الاوضة التانية .. قالت ليها ..

الكلام البقولو ليك ده.. ليهو كم وعشرين سنة .. ماحكيتو لي زول ولا مريتو بلساني.

زمان وانا صغير فتية يمكن عمري 16 سنة .. عندنا زميلتنا بتقرا معانا في المدرسة اسمها حنان عرسوها .. وانا البت كانت صاحبتي شديد.. قلت لي امي انا لازم اقعد مع حنان يومين .. امي قالت لي البقعد معاك منو يومين عند ناس العرس .. قلت ليها ارح انتي وصليني ناس حنان وتعالي .. ناس حنان كانو الحلة البغادي لينا يعني يمكن نص ساعة بالكرعين ..

يعني هي الحلة الجم حلتنا طوالي .. بس نحن في اول حلتنا.. وهم في اخر حلتهم ..

اها غايتو امي لمن كلمت ابوي.. ابوي في الاول .ماكان بكسر لي كلمة.. وبريدني ريدة شديدة .. قال ليها خليها التمشي.. لكن ماتجي راجعة تخليها بوراك .. اقعدي معاها لامن العرس ينتهي ..

وفعلا امي مشت معاي.. وقعدت معانا اليومين حقات العرس ..

في وكتي انا القاعدة في العرس ده.. في ولد كان طوالي عينو علي..

وانا قمت سألت حنان .. قلت ليها ده منو؟؟

قالت لي ده صديق السيد ود خالتي

قلت ليها الزول ده .. من انا جيت هنا .. مانزل عينو مني .. بس يمشي يعاين لي.. ويجي يعاين لي .. وهسي جابلو بسيم .. حنان قالت لي بختك .. يكون معجب بيك .. ده الصديق يابت.. عاجب البنوت كلهن .. حتى انا والله يا ستو .. كنت متمنية يتقدم لي الصديق لكن الله ماجاعل لي حظ ..

الزول ده ياستو كان دارك انتي المحظوظة .. زول صلاي وصوام لا سكر لا خمالة .. وبار بوالديهو .. انتي رايك في شكلو شنو؟ قلت ليها والله ياحنان شكلو مافيهو كلام .. لكن دي حاجة مافي يدي انا.. انتي عارفة ناس ابوي .. ماعندهم حكاية البت تقول انا دايرة فلان دي بقطعو رقبتها ..

قالت ليها بس انتي لو نفع معاك قولي لي .. قلت ليها والله ياحنان النصيحة لله عجبني .. هيبة وسماحة .. بس معاينتو دي مضايقاني ..

حنان قالت لي .. والله انا ذاتي مستغربة.. الولد ده اصلو مابعاين للبنات ..

اها حنان قالت لي امشي نادي لي خالتي سعدية .. سعدية دي امو ..

قلت ليها عايزة بيها شنو يا حنان ؟؟ قالت لي انتي مالك.. دي خالتي وصحبتي ..

مشيت كلمت سعدية .. وجات للعروس حنان في اوضتها

قالت ليها ولدك قاعد يعاين لي صحبتي .. قولي ليهو لو عجبتك .. تعال لينا في بيت ناس الهادي .. بعد الضهر ..

اها يوم العرس .. نحن مشينا فطرنا عندناس الهادي.. جيران ناس حنان.. انا وهي ومعانا بتين صاحباتنا .. قام الولد جانا هناك ..

اول من دق الباب .انا ومعاي بت طلعنا للاوضة التانية ..

حنان قالت ليهو انت بتعرف البت دي؟ .. قال ليها مابعرفها والله لكن من شفتها بقيت ماطبيعي .. انا البت دي عايزها كلميها لي ..

قالت ليهو هي هسي قاعدة معانا هنا .. اناديها ليك تتكلم معاها؟ .. قال ليها ناديها .. انا كنت في الاوضة التانية .. نادوني جيت قعد يتكلم معاي ..

قال لي انا خلاص انا لقيت عروسي .. انا دايرك انتي رايك شنو؟

قلت ليهو انا الكلام ده مو عندي .. قال لي بس انتي قولي نعم ..

الباقي بتمو براي .. قلت ليهو لو امي موافقة.. انا موافقة هه.. قعد يضحك وفهم انو انا موافقة بيهو .. والحقيقة انا من وكتو الكان بعاين لي .. انا اعجبت بيهو شديد.. اها شفتي .. بعد شوية امي جات سألتني.. الكلام ده لسع عندنا العرس ..

امي قالت لي انتي يا ستو شوفتي والولد الاسمو الصديق ده؟ قلت ليها ايوة شوفتو .. قالت لي .. الولد ده امو قالت .. دايرنك.. انتي رايك شنوياستو؟

قلت ليها لو انتي موافقة.. انا موافقة .. قالت لي القفة التقع ليك فوق راسك ده .. عويناتك ديل بقولن دايراهو وميتة فيهو ..

انا دنقرت وقعدت اتخجل من امي .. امي مشت لي امو .. قالت ليها انا وبتي موافقين.. باقي الكلام العند ابوها واعمامها .. اها وكت وصلنا البيت .. انا بقيت سارحة وعيوني تايهة ..

ووقعت في الحب .. وكان الصديق بلاقيني فوق درب المدرسة .. وارتبطت بيهو ارتباط شديد .. كان زول طيب طيبة .. اصلو ما بتتخيليها ..

اها يوم امي اتكلمت مع ابوي .. قالت ليهو ناس اولاد السيد ود فلان ديل.. شافو ستو في العرس.. وقالو دايرنها لي ولدهم الصديق .. قال ليها انتي مشيتي تشاركي في العرس .. ولا مشيتي تعرضي بتك في السوق؟

انا ماعندي بت بعرسها لي ناس السيد .. لاهم اهلي ولامن قبيلتي ..

امي قالت ليهو .. سجم خشمي يايمة.. كمان ناس السيد عندك فيهن كلام؟؟

مالن يايابا.. اضنيهم مقددات .. ولا دلالين عده؟ (طبعا"ودي كلها كلمات تدل على رموز عنصرية مقيتة) ..

قال ليها انا بتي دايرها لي واحد من ولاد يوسف .. يوسف ده صاحبو وحبيب عمرو ابو الخير ده .. لدرجة انو ابوي لو سافر.. يوسف بحرسنا.. وبصرف علينا .. ويوسف لو سافر ابوي بحرس اولادو وبصرف عليهم .. يوسف ببقى لي ابوي لكن بقيان بعيد ..

المهم انا لمن امي كلمتني.. قالت لي الكلام ده زعلت زعل شديد .. لاني كنت دايرة الصديق .. اولاد يوسف ديل اصلو ماني دايراهم .. المهم يوم قام لاقاني الخير ده.. والخير كان اطيب واحد في ولاد يوسف ديل .. وطوالي بهظر معانا في الشارع ..

قال لي اسمعي يا ستو.. انا جاي اخطبك من ابوك .. قلت ليهو والله مادايراك اوعك تجي ..

قال لي بس انا دايرك.. ومابعرس غيرك والله .. وانا قايلاهو بهظر .. طوالي امو جات لامي.. قالت ليها نحن دايرين ستو للخير.. شاوريها لينا .. وامي بدل ماتقول لي انا .. مشت قالت لابوي ..

انا طوالي رسلت واحدة صحبتي مرسال سري.. لي الصديق.. تقول للصديق اهلك يجو يطلبو طوالي .. لانو ناس الخير ديل عندهم نية يجو يطلبوني .. طوالي الصديق تاني يوم جاب ابوهو واخوانو واعمامو وجونا في البيت .. يطلبوني .. ابوي قال ليهم والله البت فيها كلمة.. (يعني زي مخطوبة كدا) ..

وطبعا لافي كلمة ولاشي.. كلام نسوان.. لكن ابوي مافي زول طلب منو.. الا كلام المراة مع امي ..

وناس حلتنا سمعو بالكلام ده .. انو ستو جوها ناس السيد .. وطلبوها للصديق .. وابوها قال فيها كلمة .. قام يوسف ابو الخير سأل ابوي ..

قال ليهو الكلمة الفي ستو من منو يا العمدة؟؟ .. قال ليهو والله مافي كلمة ولاشي .. بس انا بتي ماداير اعرسها لي ناس السيد ..

قال ليهو اها نحن ياخوي طالبنها للخير .. ابوي طوالي قال ليهو مبروك .. اناجيت قلت لابوي انا ماموافقة بي الخير.. ابوي عاين لي كدا بي طرف عينو .. وقال لي هسع في زول طلب رايك؟ .. امشي من قدامي ..

وقعدت ابكي.. امي قالت لي يابتي ..(الصقر ان وقع كترة البتابت عيب) ..

امكن الخير فيهو ليك الخير .. الكلمة دي من امي صبرتني شوية ..

المهم في النهاية .. رضيت ووافقت .. عشان ابوي وامي واخواني وكلمة القبيلة .. والحمد لله لقيت الخير فعلا خير .. وربنا قسم لي معاهو السعادة والراحة .. والله ماشفت منو شين .. ولاحصل يوم فكرت في غيرو .. وبعد ماجبت منو الجنى .. بقى الخير كل حياتي وريدة عمري .اها ده الصديق وقصتو معاي يا محاسن رايك شنو؟

قالت ليها والله يا ستو .. على حسب الوصف الوصفتيهو للراجل ده ..

اطمني ساي على ولدك .. الزول ده في راي.. داير يقدم ليكم جميل ..

واحتمال يكون داير يعيد ريدو القديم .. والله اعلم ..

الى اللقاء ..