الفصل الثالث والعشرون

جدو شال التلفون ومشى بعيد ..

قال ليهو الحاصل شنو يا حامد ..؟ قال ليهو والله البوكليم سيح مكنة... وقالو العمرة ما اقل من 45 مليون .. قال ليهو سيح مكنة ؟؟ البخلي مكنتو تسيح شنو يا حامد ؟.. قال ليهو والله بس لقينا الزيت مدفق كلو .. والغريبة كل يوم من الصباح .. بنعمل ليهو مراجعة عامة .. بس اليوم ده قلنا مابكون في شي وحركناهو .. وماشفنا الزيت المدفق تحتو .. وبدينا الشغل طوالي .. بس فجأة المكنة عضت.. مشيت جبت المكنيكي.. قال لي المكنة سسيحت .. ونقطة زيت مافيها .. انا عاينت للمحل الكان واقف فيهو البوكلين.. لقيت الحتة لها مترعة بالزيت ..

قال ليهو ياالمنصوري الزيت البدفقو شنو؟ قال ليهو والله الا يكون في زول فك الضبة.. لانها مأمنة .. وانا اخر مرة قفلتها بي يدي وانت حاضر ..

جدو قال ليهو والله فعلا دي مصيبة .. وهسي المشكلة قروش مافي.. انا دفعت القروش لي البيت الحكيت ليك بيهو للوالدة.. كدي خلينا نجي نشوف البحصل شنو.. ربنا يعين غايتو ..

طبعا" مافي زول عرف المكالمة الحاصل فيها شنو.. لكن امو لاحظت لي وشو متغير .. سألته قالت ليهو الحاصل شنو مالك؟ .. التلفون ده فيهو شنو ؟.. قال ليها لالا مافي شي بس في عطل بسيط في الكراكة وبمشي بصلحها ..

قالت ليهو اها بالنسبة لموضوع معتصم .. قال ليها ايوة انا لازم الاقيهو أخليهو يحدد لي المواعيد ..

قالت ليهو انت بتسافر متين؟ قال ليها بعد ما ترحلو انتو ..

قالت ليهو انا ماعندي شي.. لو قلت لي بكرة برحل.. اتصل على الراجل .. قال ليهو خلاص فضو لينا البيت.. عشان الوالدة جاية تنزل فيهو طوالي ..

قال ليهو بكرة المساء تعال استلم المفاتيح ..

على كل حال الحصل باختصار .. ستو رحلت في البيت الجديد وخلو البيت القديم لي محاسن واولادها وراجلها .. يقعدو فيهو لاقرش لاتعريفة.. ولا اتفقو معاهم على شي.. بس اقعدو لامن ربنا يسهلا ..

محاسن قالت ليها ياست الجيل .. اوعك تفتكري انو البتعملي فيهو ده .. ربنا ح يضيعو ليك .. انتي بتعملي في حاجات الرجال مابقدرو عليها..

شوفي ياست الجيل نيتك البيضاء .. وضميرك الصافي .. وعملك البتسوي فيهو .. اول نتيجة ليهو ياهو يوسف القدامك ده ..

ست الجيل قالت ليها وانتي يامحاسن.. انا شايفاك ماسكة نفس الدرب ..

قالت ليها اتعلمت منك ومن ولدك .. بالمناسبة يا ستو .. عوض راجلي ماكان في الدهب .. كان قاعد مع اصحابو .. في عد حسين حق الفطور ماعندو .. وجدو مشى جابو من هناك ودفع ليهو القروش ..

قالت ليها وانتي الكلام ده جبتيهو من وين؟

قالت ليها كلمني عوض بالحاصل كلو .. ومافي راجل في الزمن ده بسوي السواهو يوسف .. الا امو تكون زي ست الجيل بت العمدة ..

وده الحاصل فعلا .. المهم ..

يوسف بعد مارحل امو.. واستقرو في البيت .. وعملو كرامة ودعو الجيران.. وفرحانين شديد بالبيت .. جدو قرر يسافر بكرة.. لانو اخد اسبوع تقريبا.. في ام درمان والشغل واقف ليهو 4 يوم ..

ومافي صالحو الشغل يقيف الفترة دي.. لازم يمشي يتصرف.. عشان يشغل البوكلن ولو بالدين .. عشان يقدر يغطي النفقات بتاعة الاقساط ..

بالمساء ضرب لي جنابو معتصم .. يجي يشرب معاهو الشاي في البيت .. ومعتصم جاهو وبارك ليهم البيت الجديد .. لانو ماحضر الكرامة ..

واتونسو والملكة تدخل وتمرق وتتبسم فرحانة .. زي الحست انو عرسها بكرة ..

المهم في القعدة دي .. معتصم فتح الموضوع .. وقال لي يوسف انا جاهز بس دايركم تحددو لي الزمن البريحكم .. قال ليهو شهرين كويسة معاك؟ .. معتصم قال ليهو والله كتيرة .. خلوها شهر ونص .. جدو قال ليهو على بركة الله.. انا باكر مسافر ان شاء الله ..

باكر من الصباح يوسف المفروض يقوم الدغش.. لكن صحى بي حمى ووجع راس غريب .. ماقدر يقوم من السرير .. وقعد يستفرغ حاجة صفراء ..

امو طوالي بدون مفاهمة.. ختفتو بي رقشة على الدكتور .. وفحوصات وتحاليل.. ظهرت عندو ملاريا .. جاتو ملاريا من التعب والارهاق.. الزول اصلا ما ارتاح .. والدكتور قال ليهو لازم ترتاح اقل شي اسبوع .. حتى تتحرك .. وحامد كل يوم يضرب ليهو.. يقول ليهو العمال دايرين قروش .. والزول بتاع البوكلن جاء للقسط .. ويوسف يقول ليهو اصبرو لي اقوم علي حيلي. يوسف فكر انو يرسل حامد لي الصديق ود السيد .. عشان يشيلو منو قروش .. بس غير رايو .. والحكاية ضاقت شديد ..

لدرجة انو يوسف فكر يسافر بي مرضو.. عشان يتصرف لانو حامد ماعندو اي تصرف .. والحساب مافيهو غير 14 مليون.. ومامعروف يعملة بيها شنو.. لانها دي في الاسبوع ممكن تنتهي مصارف بس ..

بس يومين كدي حامد ماضرب ولا اتصل .. ياربي في شنو؟ حامد ده مالو ماضرب يكون اتصرف عمل حاجة من وراي ..

اتصل عليهو التلفون مقفول .. بعد تلاتة يوم ضرب حامد قال ليهو يايوسف .. والله فرجت فرج اصلك ماتتخيلو .. جانا عمك الصديق ولقى الشغل واقف .. وانا كلمتو قلت ليهو البوكلن سيح ويوسف عيان في الخرطوم .. وقروش ماعندنا ..

مشى جاب البوكلن حقو .. وقال شغلوهو لامن يجي يوسف .. وهسي الليلة جاء رفع البوكلن حقنا.. ومشى يعمل ليهو عمرة ..

يوسف قال ليهو ما اتفق معاك على حاجة؟ قال بي كم ايجارو ..

ماشال منك قروش؟ ماسألك من شي؟

قال ليهو والله بس الزول ده.. طوالي جاب ناسو.. وبدا يعمل في الحاجات دي .. ولا اتكلم معاي ولاكلمة .. غير بقول لي عايزين شاي .. دايرين موية .. والله يايوسف الزول اما مجنون او راجل مكملا..

يوسف قال ليهو مامجنون.. ده راجل مكملا .. لكن انا بكملا معاهو ..

بعد اسبوع يوسف مقلق.. وماعارف الحاصل بي وراهو شنو.. قال لي امو انا الحمد لله بقيت كويس.. وداير اسافر اشوف الحاصل بي وراي شنو؟ قالت ليهو والله ياولدي .. الدنيا ختتك في مسؤلية ومشغولية اكبر من عمرك .. وفعلا ياجماعة .. يوسف الخير اصغر رجل يمتلك بير في قبقبة .. بشهادة الناس هناك ..

يوسف لسع جسمو مرهق واثار الملاريا مازالت من جسمو..

وامو كانت خايفة عليهو من انتكاسة المرض .. بس هو كان مصر انو يمشي ..

اها اخر يوم جوهو محاسن وعوض .. والاولاد عشان يودعوهو .. قال ليهو ياعوض .. عدي ليك اسبوع مع اولادك .. وتعال لي هناك في قبقبة .. وتلفوني معاك .. قال ليهو والله انا داير اسافر معاك.. قال ليهو لالا اصبر .. ماتستعجل اولادك ديل لسع ما شبعو منك ..

المهم يازول باكر الصباح يوسف مسافر خلاص .. وامو كلو مرة تدخل المطبخ تبكي .. وتمسح دموعها وتجي مارقة .. وماقدرت تودعو .. وهو بقول ليها .. ده شنو ياست الجيل بت العمدة .. انا هسي حالي ده بقول امي ارجل من الرجال ..

حتن اشجعت.. وودعتو وسافر في امان الله .. وفي رعاية الله ..

لمن وصل قبقبة. حامد قال ليهو يايوسف. في كلام انا عايز اقولو ليك .. والله البوكلن حقنا ده.. في زول حلا الضبة حقت الزيت .. ودفق الزيت في الواطة.. عشان المكنة تسيح ..

يوسف قال ليهو انت كمان بتحلف؟ .. منو الممكن يعمل عملية زي دي؟ .. انت عارف انو الناس الجايين الخلا ديل.. كلهم جايين للارزاق .. وطالبين من الله .. ونياتهم صافية .. عشان ربنا يرزقهم .. انا مايتخيل لي زول منكن يكون بالحقد ده.. عشان يضر ليهو زول .. يعني بكسب شنو؟ حاجة مامنطقية ..

لكن قول مثلا .. في زول عمل العملية دي حسادة .. نحن نعرفو كيف؟ .. واثباتنا شنو؟ اكعب حاجة تتهم زول .. بي غير دليل ..

حامد قال ليهو انا اصلا كلامك ده متوقعو.. لاني بعرفك.. بعرفك معرفة شديدة .. انت لو اديتني الاذن انا بتحقق .. واعرف العمل العملة دي منو؟ قال ليهو ولا تحقق ولاشي انسى الحصل حصل .. والصقر ان وقع كترت البتابت عيب ..

طبعا يوسف لمن جاء لقى البوكلن الشغال حق عمك صديق ..

والبوكلن حق يوسف لسع ماجا من العمرة ..

قال ليهو ياحامد اها وهسي البابور حقنا .. خبرو شنو قال ليهو صديق قبيل قال بكرة المساء بكون هنا ..

يوسف اول حاجة عملا .. بعد ارتاح شوية .. دفع للعمال القاعدين جزو من مستحقاتهم .. والمغرب طوالي مشى لي عملك صديق في القهوة .. لقاهو قااااعد ..

صديق لمن شافو لامن وقف علي حيلو .. وفرح بي جيتو .. سلام عليهو سلام حار سلام الرجال لرجال .. ازي الحال يا يوسف الضكران .. على الطلاق انا متكيف منك كيف لامن مدفق ..

قال ليهو ياعم الصديق علي الطلاق .. انت بقيت لي ابو واخو وصاحب .. ياخي ربنا يعزك ويخلي ليك اولادك .. قال ليهو قول لي ربنا يعزك .. لكن انا ماعندي اولاد ..

قال ليهو ياخي ماتقول كدي.. طيش الشباب ده كلنا مرينا بيهو .. قال ليهو انت بتتكلم كدي.. زي العمرك اربعين وخمسين .. انت هسي اكبر منهم بي شنو؟.. والله انت طيش شباب لامريت بيهو ولا مرا بيك .. عليك الله سيبني من الكلام ده .. هسي انت خبرك شنو؟ قال ليهو والله كربتني ليك ملاريا.. خلتني فوق طرف الموت .. قال ليهو يازول حمدلا على السلامة ..

قال ليهو ياعم صديق.. انا موش قلت ليك .. انت كل ما انا ادور اقع.. بتلحقني قبل ما اصل الواطا؟ ياخي ربنا يكرمك ..

اخباركم شنو.. انتو ووليداتك وام اشرف؟ .. قال ليهو والله كلهم تمام الحمد لله .. لكن ام اشرف والله اشتد عليها المرض.. وكل يوم عندها مرض جديد .. ارتفاع الكلسترول .. والضغط والسكري .. وطبعا القعدة وعدم الحركة .. بزيد المرض وهي اصلا تقيلة في جسمها وهسي كمان ظهرت ليها الكلى ..

قال ليهو ان شاء الله ربنا يخفف عليها ..

قال ليهو فعلا ربنا يخفف عليها .. لكن انا ياجدو.. هسي لي قريب التلات سنة .. قاعد عزابي زي .. الماعندي مراة .. وصابر عليها

ولا شكيت ولاضجرت .. وقايم عليها بي كل ماتحتاجو من علاج .. وهسي خليت معاها اكرم في البيت.. عشان يقوم بواجبات العلاج..

قال ليهو انت قايل ربنا بضيع ليك شي.. والله كلو تلقاهو خير في اولادك ..

اها يا عم صديق .. انا جيتك اسلم عليك.. واشوف حساباتي معاك ..

قال ليهو ياتو حسابات؟ قال ليهو ايجار البوكلين حقك.. وحق العمرة وتكاليفها ..

قال ليهو انت ولد مطرطش ولاشنو؟ .. هسي انت عندك قروش؟ قال ليهو بتتدبر.. بس اعرف العلي .. قال ليهو لامن تتدبر تعال لي قول لي ادبرت .. ماتمسخ علي القعدة ..

الى اللقاء ..