الفصل الخامس عشر

اها محاسن قامت من جمبو.. خلتو بتكلم مع وفاء.. ومشت قعدت جم ملكة قالت ليها .. عليك الله رايك شنو في معتصم ده ياملكة؟ .. قالت ليها ده كمان فيهو راي؟.. بس هو وين وانا وين؟ .. كلنا معجبين بيهو ساي .. لانو بالجد زول بتحب ..

قالت ليها والله فعلا زول بتحب.. ربنا يحفظو .. ملكة قالت ليها هسي انتي كنتي بتقولي معاهو في شنو؟ بتتكلمي بيديك ووشك .. قالت ليها لالا ده في موضوع الولد الاسمو نصر داك ..

محاسن ماعايزة تسبق الحوادث.. وتقوم تقول لي ملكة كلام قبل الموضوع ماينجض .. الصدمة ماحلوة .. وكسرت القلب مافي احر منها ..

المهم دخلو التلاتة للدكتور.. وحكو ليهو الحاصل .. وطلب منهم الصور والفحوصات .. ولمن شاف الصور .. قال ليهم مافي شي كل شي تمام التمام .. بس الترسيب عالي شوية.. وكتب ليهم حبوب ..

غايتو اطمنو مافي شي في العظام .. والنخاع والحاجات الحساسة دي

واشترو الحبوب ومشو ..

اها طبعا" ماشين على البيت .. معتصم وضعه وضح اكتر.. في السقوط في هاوية العشق .. بقى واضح عليهو.. انو بالو في البت وشابك فيها ..

الحصل في الشارع وهم راجعين.. بعاين ليها في المرايا .. وبتونس مع محاسن .. بتكلمو في الحاجات الغالية ..

قال ليها والله يا محاسن.. مرات الزول تكون البضاعة السمحة جنبو وماجايب ليها خبر .. ومرات يمشي يفتش للحاجات البعيدة.. ويلقاها غالية و ما أصلية ..

قالت ليهو المفروض الزول.. اول حاجة يا معتصم .. لو احتاج لي حاجة عشان يشتريها .. يشوف الدكاكين القريبة قريبة .. مرات الزول بلقى بضاعه من سماحتها ولابتوقعها ..

قال ليها والله ياهو الحاصل.. غايتو ربنا يوفق عبادو للخير ..

والونسة كلها كانت بالطريقة دي .. وتعريض .. وشي الملكة تفهمو وشي ماتفهمو .. لمن وصلو البيت .. معتصم نزل فتح الباب لي ملكة ودخلت .. محاسن قالت ليها خشي ياملكة.. هسي بجي وراك ..

محاسن قعدت مع معتصم .. بره جمب الباب وقالت ليهو.. اها يامعتصم .. وفاء قالت شنو؟ قال ليها الموضوع انتهى يامحاسن للاسف .. قالت ليهو طيب احكي لي الحصل شنو؟

قال ليها طبعا وفاء لمن ضربت لي.. قالت لي يامعتصم انا شفت حلم ومامريحني .. قلت ليها خير ان شاء الله احكي .. قالت لي شايفة نفسي ماشة عليك .. وماقادرة اصلك واهلي ماسكني من ورا .. عشان ما اصل ليك .. وانا قاومتهم .. وجيت جارية عليك .. لمن وصلتك وانت مسكتني.. قامت فينا نار نحن الاتنين وحرقنا ..

انا قلت ليها معناها يا وفاء .. موضوعنا ده مافيهو خير .. وح يسبب لينا مشاكل وحرايق وفتن ..

وفاء قالت لي ايوة صح .. انا ذاتي قلت كدا.. وده اول تفسير جا في راسي ..

عشان كدا يامعتصم الموضوع ده.. احسن ننساهو ونبقى اخوان واصحاب الى الابد .. ربنا يقسم ليك احسن مني ..

قلت ليها خير ياوفاء .. وانتي ربنا يقسم ليك احسن مني .. وما اتمنى ليك الا كل خير .. لكن والله يامحاسن اتأثرت بالجد من قلبي .. ياخي دي علاقة بتاعة سنتين الاشوية ..

محاسن قالت ليهو يامعتصم.. البت دي كضابة والله.. لاشافت حلم ولاشي .. دي قصة مؤلفاها من راسها .. البت دي شايفه ليها شوفة .. واستغنت منك ..

معتصم قال ليها.. وانا عارف كدا يامحاسن .. بس هي لانها زولة طيبة.. وماعايزة تقول لي ننهي الموضوع بصراحة .. لانها خايفة على مشاعري.. اضطرت انها تألف ليها قصة حلمة بالكضب .. والموضوع واضح ..

انا خلاص يا محاسن.. موضوع وفاء ده بالنسبة لي بقى ماضي.. وتاني مابقبل لي وراء .. بس انتي اصبري لي.. انا اطرح موضوع ملكة طوالي لي ناس البيت حار حار ..

محاسن من جواها قالت .. والله انا اول مرة اتبسط من علاقة تتخرب .. انا زمان لمن اشوف خطيب خلا حطيبتو .. ولا مراة راجلها طلقها .. والله مرات ببكي. .. لكن الليلة مبسوطة بالعلاقة الخربت دي ..

محاسن دخلت جوة .. لقت الملكة بتحكي لامها في طيبة معتصم .. وظرافتو والنكت الحكاها في الشارع .. وامها بتقول ليها طيب الدكتور قال ليكم شنو يا ملكة؟ .. وهي بتقول لي اصبري يا امي بحكي ليك كلام الدكتور .. محاسن جات وقفت تسمع وقعدت تتبسم.. وقالت ليها خليها تكمل كلامها ياستو .. كلام الدكتور بحكيهو ليك انا.. الفرحة الفوق وشها دي.. ماتقطعيها ليها خليها تكمل ..

يلا الملكة شغالة تتكلم .. وقال البضاعة البعيدة غالية ما اصلية .. والاصلية بتكون جمبك وانت ماجايب ليها خبر.. يا امي بكون قاصد شنو؟ انا زي الفهمت انو بلمح لي حاجة.. ستو قالت ليها بري .. شن خبرني كمان؟ .. كلام ماعرفتنو انتي ومحاسن.. انا بعرفو من وين؟

محاسن قالت ليها تعالي يا الملكة جوة.. وانا بقول ليك وافشك .... جاتها..

قالت ليها ياملكة بصراحة.. الكلام العايزة اقولو ليك ده كلام سر وامك ماتعرفو ..

قولي ان شاء الله مسعاي يتم.. انا قاعدة اتكتك ليك في موضوع معاهو .. طبعا ملكة نططت عينيها لمن بقن مدورات .. قالت ليها قلتي شنو؟.. انتي جاااادة ؟؟

قالت ليها انا غايتو رشحتك ليهو.. وقلت ليهو ملكة دي.. انا عرفتها من قريب ..

ملكة قالت ليها لكن كيف يامحاسن؟؟ وهسي يمكن يقول المرسال ده مني انا... ولا يقول نحن متفقين .. قالت ليها اسمعي ياملكة .. انا ماغبية عشان تفوت علي القدر دي ..

قالت ليها اها قال ليك شنو؟ قالت ليها.. بي صراحة الزول ده عايزك.. لكن قدامو مشكلتين ..

واحدة انتهت .. والتانية مامعروفة .. الاولى كان عندو خطيبة .. وخلو بعض .. والتانية اهلو .. مامعروف يقبلو بيك.. وانتي بي حالتك دي .. ولا يرفضو .. انتي لسع ما ملكتي الصحة مية المية ..

قالت ليها عارفة يامحاسن .. بس اهم حاجة رايو هو .. هو لو عايزني .. بحاول المستحيل ..

محاسن قالت ليها يعني انتي ماعندك اي مانع؟؟ .. قالت ليها انا بس شرطي .. ينتظرني لمن ابقى كويسة ..

قالت ليها ده شرط هين يابتي.. ان شاء الله ربنا يعجل ليك بالعافية .. يعني اتكلم مع امك؟.. قالت ليها طوالي يا سونا ..

محاسن اخدت ليه ضحكة .. وقالت ليها شايفاك بقيتي تدلعيني .. قالت ليها نفسي امسكك ابوسك بي هنا وبي هنا .. محاسن مشت منها تتبسم ..

قالت لي ستو الليلة شايفاك فاااضية وهمك رايق.. الصباح قلتي لي تعبانة.. وعندك مشاوير.. قالت ليها والله كنت دايرة امشي لي ناس الدكاكين ديل .. واسألهم من بعض الحاجات .. لكن مشوار ناس السماية ده هدا حيلي ..

قالت ليها ماشة تسألي من شنو؟

قالت ليها والله يا محاسن.. الكسرة دي شكلها مامغطية معانا.. ماشة اسألهم من الطعمية لو بتمشي .. والكيك والحاجات دي .. لانو الكسرة الحريم ضايقني فيها ..

محاسن قالت ليها الحريم قالو كسرتهن كلها بترجع.. مافي كسرة بتتباع قدر كسرتك .. قالت ليها بس يا محاسن انا في الاول.. كنت في السوق براي ..

محاسن قالت ليها طبعا الدكتور.. عمل وعمل .. وقال قال .. لكن الحمد لله ياستو الملكة ماعنده شي بخوف.. والدكتور قاليها تاني ماتلبسي الكولة.. وطمنا شديد .. قالت ليها الحمد لله.. ربنا عالم بي حالنا .. دايما يامحاسن انتي بت حلال .. وخشمك مابجيب الا البشاير .. قالت ليها وانتي ماعارفة البشارة التانية ..

معتصم اتكلم معاي في الملكة .. وقال قال .. المهم حكت ليها كل التفاصيل الحصلت .. ستو سكتت مسافة كدا.. وشكلها مامرتاحة للموضوع .. محاسن قالت ليها مالك ياستو؟؟

زي الكأنو الكلام ماعجبك؟ .. قالت ليها والله يا محاسن.. انتي عارفة راي في الولد .. الولد والله انا بتمناهو من كل قلبي لي بتي.. ولو ربنا قسمو ليها.. يكون ده يوم السعد والسعادة .. لكن انا خايفة من حاجتين.. ولايمكن اقبل بالموضوع .. الا أتاكد منهن الاتنين .. قالت ليها الحاجتين شنو ياستو؟

قالت ليها انا خايفة الولد يكون خلا خطيبتو عشان ملكة .. يا اما عشان ملكة عجبتو وباع ديك .. يا اما عشان شاف ظروفنا.. وشالتو العاطفة والشفقة علي بتي .. وانا لايمكن اقبل ظلم زي ده يقع على بت الناس المسكينة ..

انا يا محاسن احسن لي اموت .. وما اظلم لي زول .. هسي عليك الله اتخيلي روحك.. عندك خطيبك وبتحبيهو .. وبانية عليهو امال .. يجي يقول ليك انا ماعايزك .. عشان يمشي لي واحدة تانية. بتحسي بشنو؟.. قالت ليها بتمنى الموت.. ده لو ما انتحرت بالمغسة ..

قالت ليها الحاجة المابندورها لي روحنا.. المفروض ما ندورها للناس .. ليه يعني؟ عشان مصلحتنا ؟؟ .. دي الانانية ذاتها يا محاسن ..

قالت ليها لكن يا ستو الزول ده قال قال .. براهو قالت هي الخلتو والابتو .. قالت ليها نحن لازم نتأكد من الموضوع بي طريقتنا .. لانو احتمال الولد بكذب .. الدنيا دي يا محاسن .. فيها مفاجأت كتيرة .. الزول مابتووقعها ..

اي الولد كويس .. وماشفنا عليهو الا الخير.. لكن ده مابمنع انو يكون .. ضحى بي حبو .. عشان وضعنا وعشان بتي ..

صح ولا انا غلطانة .. قالت ليها كلامك صح.. لكن انا مامقتنعة .. انتي لو شفتي حالة الولد .. وهو بتكلم مع ملكة.. بتعرفي انك غلطانة ..

قالت ليها بس انا طالباك بي الله .. تتأكدي لي من البت وتلاقيها وتسمعي منها.. قالت ليها اجي؟ كيف لكن الاقيها؟؟ ..

قالت ليها المهم تتصرفي .. عشان انا اكون مطمئنة.. وراضية من نفسي في اي خطوة .. انا يامحاسن لو عرست ليهو بتي وبعدين اكتشفت انو ظلم البت.. النيا دي مابتشلني ..

محاسن سكتت مسافة .. وقالت ليها يازول انا موافقة .. والله اتأكد ليك واجيك بالنجيضة .. والله ما اجيب الحقيقة الا انا. .. اها والمانع التاني شنو ياستو؟ انتي قلتي لي حاجتين ..

قالت ليها الحاجة التانية اهلو .. انتي تتصلي عليهو هسي.. وتقولي ليهو ماتكلم اهلك هسي ..

قولي ليهو انا كلمت الام وبتها.. ووافقو على شرط .. انو بعد البت تبقى كويسة .. يعني مايفتح الموضوع لي اهلو.. واالبت بي حالتها دي ..

لانهم ح يرفضو.. وبعدين حتى لو بقت كويسة .. موافقتهم بتكون صعبة ومسيخة ..

محاسن قالت ليها سبحان الله.. ده نفس راي بتك .. انا لو ماقاعدو معاكم كنت اقول متواصيات ..

ستو قالت ليها هاك يامحاسن التلفون .. سريع اتصلي عليهو.. عشان ما يغلط يفتح ليهم الموضوع هسي ..

قالت ليها حاضر امرك .. شالت منها التلفون.. واتصلت علي معتصم قالت ليهو .. يا معتصم انت فتحت الموضوع ده لزول من ناس البيت؟ قال ليها لالا لسع .. ليه مالك في شنو؟

قالت ليهو مافي اي مشكلة.. الوضع تمام .. والبت وامها موافقين بس عندهم شرط .. انك ماتطرح الموضوع ده لزول من اهلك في الوكت الحالي .. الا هم يدوك خبر تاني ..

معتصم قال ليها انتي جااااادة؟

كلمتيهن؟ قالت ليهو اي والله زي ما اقول .. قال ليها والله انا ماعارف اجازيك كيف .. خلاص خلاص .. اها انا ساكت.. مابقول لاي زول .. الا هم يدوني خبر تمام؟

خلاص كلميهن قولي ليهن.. قال ما ح يفتح خشمو لاي بشر ..

والله معتصم ده فرح فرحة.. رقد على قفاهو.. وبقى يعاين للسقف ويتبسم براهو .. براحة كدا قال .. ما احلى انك تعيش على امل طيب ..

بسيطة يا وفاء بت ميمونة .. ربنا اكرم منكم ..

محاسن بعد قفلت منو التلفون.. قالت لي ستو خلاص ياستو.. كلمتو والوضع تحت السيطرة .. قالت ليها كلام سمح والبسويهو ربنا خير ..

كدي هسع خليها ملكة موضوعها ساهل.. تعالي شوفي حالة امها المعقدة .. ولغزها المابتحل .. قالت ليها قولي انا معاك ..

قالت ليها طبعا جدو اتصل علي.. وقال لي مرسل ليكم قروش.. مع الصديق ود السيد .. والصديق بجي باكر ولا بعد باكر ..

وطبعا جدو ماعارف اي شي عن تاريخ ماضينا .. عشان كدا حبيبي معتبر الزول بس صاحب ابوهو .. ما اكتر ولا اقل ..

ولابد انو يعرف الحاصل .. وماعارفاهو بعد يعرف ردة فعلو بتكون شنو؟

والله انا يا محاسن الزول الاسمو الصديق ده .. خايفاهو يلخبط علي حياتي .. ويبعد مني اولادي .. والله خايفة والخوف قاطع قلبي ..

محاسن قالت ليها .. اول حاجة يا ستو .. انتي ماقاعدة تسوي في غلط.. والغلط حاشاك ..

وبعدين جدو زول فاهم .. وزول واعي.. وماعندو مشكلة .. انتي قايلاهو من الناس المتخلفين؟ .. ستو قالت ليها ده ولدي وانا بعرفو .. والله يسمع بحكاية زي دي..

احتمال يطفش من البلد .. خصوصا لو اكتشف انو الصديق ساقو الدهب عشان بحب امو.. اسكتي اسكتي ماك عارف البحصل ..

وعشان كدا انا هسي قررت انو صديق ده.. لمن يجي هنا..

انا ماح اقابلو ..

قالت ليها لكن انتي ياستو الزول ده والله لسه مسيطرعلى قلبك .. قالت ليها انا مابنكر .. والله زي الكانو كان في زول جواي ميت.. كل السنين دي

وفجأة جأ زول صحاهو.. وقام يصرخ ويكورك .. ودي حاجة والله مابيدي .. وماعارفاها ذاتو حصلت كيف ..

من يومو الجا في بيتنا عشان يعزينا .. انا رجعت لي نفس الحالة القبل كم وعشرين سنة ..

لكن انا امك ياجدو .. والله مابضعف .. بس عشان اولادي .. انا الصديق ماح اقابلو .. وده اخر كلام عندي ..

الى اللقاء ..