الفصل السادس عشر

محاسن قالت ليها احسن الزول مايسبق الحوادث .. انتي هسي اصبري مامعروف البحصل بعدين شنو؟ ماتخربي درب الخير على روحك .. خلي امورك علي الله ..

قالت ليها اصلي امور ي على الله.. لكن في حالة زي دي احسن الزول بتحكم في روحو.. ومايطلق ليها المقاد ..

مرت اليومين .. والاحد جاء .. وصديق السيد ماوصل .. وستو خلاص قالت معناها جاي يوم الاتنين .. ويوم الاتنين جاء .. الصباح عاست كسرتها بدري .. وقالت لي محاسن وملكة انا عندي مشوار .. ماشة الفتيحاب. واحتمال اصل سوق امدرمان وجاية .. احتمال اتاخر.. لو الصديق جاب ليكم امانة هنا .. قولي ليهو امنا طلعت .. واستلمو منو الامانة ..

انتظرت الحبشية جات بدري .. وشالن الكسرة الاتنين.. ومشت معاها ..

اصلا ستو عندها فكرة في راسها.. كايسة ليها لي طلعة من قبل كم يوم .. والليلة المرقة من البيت بقت ليها ضرورية .. عشان ماتشوف الراجل ده ولاتلاقيهو ..

بعد ما ستو مرقت بعد ساعتين يمكن .. صديق السيد وصل ودق الباب .. على الموعد المتوقع .. وجات محاسن فتحت ليهو الباب ومن شافتو عرفتو ده صديق .. بس عملت فيها ماعارفاهو .. قال ليها كيف الحال .. ان شاء الله طيبين ..

قالت ليهو نحمد الله.. ماعرفتك .. قال ليها انا الصديق ود السيد ست البيت موجودة؟

قالت ليهو والله مرقت .. قال ليها بتجي متين؟ قالت ليهو على قولا

والله قالت بتجي الساعة 5 المساء .. اي خدمة ..؟

قال ليها الناس ديل اهلي.. ونحن من بلد واحدة ؟.. انتي منو انا ماعرفتك؟؟ قالت ليهو انا جارتها وزي اختها ..

قال ليها اسمك منو؟ قالت اسمي محاسن .. قال ليها ممكن ادخل اسلم على ملكة؟ قالت ليهو اتفضل ..

دخل جوة لاقى ملكة وسلم عليها .. وكفر ليها .. وعزاها في ابوها .. وقال ليها والله كنت داير الاقي امك.. لكن مابقدر انتظر انا عندي مشغوليات كتيرة.. لمن تجي سلمي عليها .. وقولي ليها صديق السيد جاك هنا.. وجاب الامانة دي من يوسف ولدك.. وقال ليك يوسف كويس وشغال كويس .. وبسلم عليكم ..

يلا في امان الله .. محاسن جابت ليهو كوز موية .. وقالت ليهو اشرب الشاي .. واخدلك قعدة .. يمكن ستو تجي.

قال ليها اتصلي عليها شوفيها وين.. عشان لو قريبة بنتظرها .. محاسن قالت ليهو والله ماعندنا تلفون .. طلع تلفونو من جيبو وقال ليها هاك اضربي ليها ..

مسكت منو التلفون.. وقالت لي ملكة عليك الله ياملكة مليني رقم امك ..

اتصلت عليها .. قالت ليها ياستو.. جا زول هنا اسمو الصديق ود السيد ..

قال شغال مع يوسف في مكان الدهب.. وجاب ليهو امانة .. وقال عايز يقابلك .. انتي قريبة ولابعيدة؟؟ ..

ستو قالت ليها اديني ليهو في التلفون ..

مسك منها التلفون .. واول من قال الو .. وهي قالت الو .. سكتو الاتنين.. قريب الدقيقة مافي زول بتكلم .. بعد دقيقة قال ليها الو .. قالت ليهو الو وبرضو سكتو ..

والحاصل في القلوب يعلم بيهو علام الغيوب .. ومحاسن وملكة شايفات الراجل ساكت.. قايلات ستو بتتكلم وهو بسمع .. ماعارفات ستو كابين فوقا موية تلج ..

الراجل اتشجع.. وقال ليهو كيف حالك ياست الجيل .. وان شاء الله البركة فيك.. وفي اولادك .. انا جيت هنا البيت .. ومالقيتك وح اخت ليك الامانة الرسلا يوسف مع ملكة ومحاسن .. كنت داير الاقيك واعزيك انتي بعيدة ولاقريبة؟ .. قالت ليهو انا في الفتيحاب .. وعندي كم مشوار كدي بكيات ما بكيتن .. احتمال اتأخر شوية ..

قال ليها خلاص مافي مشكلة اخدي راحتك .. انا بمشي ونتلاقى في ساعة خير ان شاء الله ..

قفل التلفون وسلمهم القروش وطلع .. بعد ربع ساعة بس.. ستو جات خاشة البيت .. ملكة قالت ليها .. انتي موش قلتي للراجل انا في الفتيحاب؟ يعني بتكذبي عليهو ؟.. انتي الراجل ده مشكلتك معاهو شنو يا امي؟؟ .. قبيل طلعتي على غير عادتك.. وشكلك كنتي مستعجلة عشان تطلعي ماتلاقيهو .. قالت ليها بس ساكت كدي بكرهو ..

قالت ليها والله حرام عليك يا امي .. انتي عارفة انو ده الزول الساق يوسف .. من هنا للدهب وفتح ليهو مجالات الشغل هناك .. والله راجل الطيبة فوق وشو ظاهرة ..

قالت ليها ياملكة عليك الله انا مافاضية ليك .. ومرقت مشت على المطبخ .. محاسن جاتها قالت ليها .. طبعا الليلة انا شفت الحرامي .. قالت ليها ياتو حرامي؟ ..

قالت ليها الحرامي السرق قلب ستو .. قالت ليها عليك الله يامحاسن خليني من حراكات الشفع دي ..

قالت ليها والله ياستو انا ماقايلاهو كدى.. الراجل ماشاء الله هيبة ووقار .. وطيبة وابتسامة .. وكت يبسم كدي تحسي بالدنيا دي كلها بترقص جمايكا ..

عليك الله هسي ده راجل بتعاملو معاهو كدي؟

قالت ليها محاسن.. انا والله هامة من حاجة واحدة .. الزول ده ماكان تتصلو علي من تلفونو .. هسي لو قام حفظ رقمي .. وبقى يتصل علي ..

قالت ليها مالو مايتصل .. داير يجبرك على حاجة انتي ماعايزاها؟ ..

المهم ستو اختصرت محاسن في الكلام ..

لكن الحقيقة الجواها غير الكلام البتقول فيهو بي برة .. واليوم ده كلو فكرها كان شغال في الموضوع ده .. وقدر ماتحاول تتناسى الموضوع يشبك ليها مرة تانيه ..

المهم اليوم ده انتهى .. وبالليل كانو بتونسو في مواضيع مختلفة

ستو قالت ليها .. يامحاسن والله في مشروع لو نجح معانا.. انا وانتي بنرتاح ..

قالت ليها اها احكي .. قالت ليها طبعا انا قبيل مشيت لي علي بتاع البقالة القدام ده .. قلت ليهو انا عايز اعمل ليكم حاجات زيادة .. طعمية .. كيك .. زبادي بالجردل .. رايك شنو؟

قال لي والله انتي اي شي تعمليهو ليهو طعم ومذاق خاص .. هسي كسرتك بس الماشة .. واغلبية الحريم الكانن بجيبن كسرة معاك .. شغلهن وقف .. لكن انا عندي ليك شغل لو بتقدري عليهو.. مافي زول بقدر ينافسك ..

قلت ليهو شنو هو الشغل؟ .. قال لي عندي زول اخوي شديد بتاع مناسبات .. اسمو حسن ممكن تشتغلي شغل المناسبات.. والله فيهو قروش زي التراب .. كانت ماسكاهو ليهو واحدة.. وارتاحت وهسي بقت تسافر دبي ومافاضية ..

رايك شنو اكلمو ليك؟ .. وانا والله ده المشروع الكنت بحلم بيهو في حياتي يامحاسن .. لكن بس محتاج لي عدة .. وماعارفة القروش الرسلا يوسف دي .. تكفي تشتري لينا العدة ولالا .. دايرين حلل كبار وصاجات وكوانين وكدا ..

محاسن قالت ليها كيف الشغل ده؟؟ مافاهماهو .. قالت ليها .. مثلا يكونو ناس العرس دايرين يودو فطور العريس .. يجو يتفقو معاي .. واخد منهم نص المبلغ مثلا .. اظبطو ليهم كل الاصناف الدايرنها و يجو يسلو مني يودوهو.. ناس دايرين غدا كوكتيل .. يوروني عدد الصحانة الدايرنها .. وكدا .. وانا اجهزها ليهم يجو بي عربيتهم يشيلوها مقصطرة .. اها رايك شنو؟

قالت ليها والله لكن ده شغل كبير.. وبراك مابتقدري عليهو .. قالت ليها نحن الاتنين ونجيب معانا واحدة بي حقها ..

يا محاسن نحن اصلا مانستسلم للظروف .. ونقعد مربعين يدينا زي الفاشلين .. الحياة دايرة مكابسة .. ماني مكجنة في حياتي دي غير الكسل والخوف.. وليداتنا محتاجين لينا.. ويوسف ولدي الشغل الشغال فيهو ده شغل حظوظ .. وحاجة مامضمونة .. لازم نحن نستعين بي الله .. ونأمن وضعنا .. عشان مانحتاج لزول .. الدنيا مي معروفة يا محاسن ..

محاسن قالت ليها والله بس .. انا خايفة ليك من الخسارات .. تمشي تشتري العدة بي مبلغ وقدرو .. والشغل بعدين مايغطي معانا .. قالت ليها (الزول البخاف من الخسارة عمرو مابربح) ..

هو الزول لو ماخسر في حياتو.. بضوق طعم الربح كيفن؟ انا اتوكلت علي الله .. قبلت الشغل وباكر بمشي لي حسن القالوهو ده واتفق معاهو .. تصبحي علي خير ..

باكر الصباح في زول دق الباب .. طبعا ستو ما متوقعة ابدا الفي الباب ده منو؟ مشت فتحت الباب.. لقتو ده صديق ود السيد .. لمن شافتو رحبت بيهو كويس.. بالرغم من انها لمن فتحت الباب ماكانت لابسة توبها .. اصلا ماخجلت منو .. ولا استحت ..

سلمت عليهو.. قالت ليهو اتفضل .. ودخل جوة .. وجابت ليهو الاكرم وقعدت معاهو .. هو بتكلم وهي بتعاين ليهو تتبسم .. ومعجبة بيهو جدا ..

قال ليها والله يا ست الجيل.. طبعا انتي عارفة انك انتي خياري الاول قبل مرتي .. وليك الحق في حياتي اكتر منها .. وانا برضو كنت خيارك الاول قبل الخير.. الله يرحمو.. ولي الحق فيك من قبلو لكن القسمة وقفت ضدنا .. رضينا بالمقسوم .. مادام ربنا سبحانه وتعالى .. اختار الخير لجواره .. انا بعتبر انو ربنا ادانا فرصة نعيش حياتنا الكنا بنتمناها .. حتى لو بعد السنين دي كلها .. ياست الجيل الحب مابشيخ ولا بكبر .. الحب زي الروح ..

قالت ليهو لكن يا الصديق.. وليداتي مابقبلو.. وزوجتك مابتقبل .. الضر ما بتقبل .. قال ليها مراتي شاورتها وموافقة .. وكلمت يوسف .. قال لي لو امي وافقت ده.. يوم السعد والسعادة .. يعني انا لمن جيتك جيت واموري كلها واضحة ..

قالت ليهو كان كدي.. انا ذاتي ماعندي مانع والله .. بس اديني فرصة اشاور الملكة .. قال ليها لوالملكة وافقت انا مابسافر الا اعقد عليك ..

وبعد العقد امشي اجيب يوسف واجي اتم العرس .. رايك شنو؟ قالت ليهو والله ده مناي يا الصديق ..

قامت مشت شاورت الملكة.. الملكة قالت ليها والله يا امي طبعا من حقك تعيشي حياتك .. لو يوسف اخوي موافق انا موافقة.. قالت ليها يوسف هو الرسلو .. قالت ليها خلاص يا امي على بركة الله ..

قالت ليهو الملكة وافقت .. قال ليها خلاص باكر العصر رسلي لي اي زول من اهلك .. يكون لك وكيل.. ونجي نعقد في الجامع الجنبكم ده .. باكر الصباح بدري ضربت لي اولاد خالها واقرباها .. وكلمتهم وجو .. كلهم العصر وعقدو ليها على الصديق ..

وفرحت فرحة مابعدها فرحة فرحة.. وصديق سافر .. وستو بقت تحسب في الايام عشان يجيها راجع .. فجأة كدا يوسف جا يوم لا خبر ولا اعلان .. وضرب الباب بي رجله وهايج ويكورك .. وقال لي امو انتي لا امي ولا انا بعرفك .. ابوي اتوفى لاهسي ماتم ليهو اربعة شهور .. تعرسي؟؟ يامراة يا خفيفة يا ماعندك مخ .. انا والله تاني وشي دا ماتشوفيهو .. قالت ليهو بس دقيقة اديني فرصة اوضح ليك..

قال ليها توضحي لي شنو؟ الصديق عقد عليك برضاك ولالا؟ قالت ليهو فعلا.. حصل لكن .. .. اصبر اكمل ليك الكلام ..

قال ليها تاني ماداير منك ولا كلمة .. كفاية الفضيحة العملتيها لي وسط الناس ..

ملكة قالت ليهو انت ماشي وين يا يوسف؟ قال ليها انا والله تاني المراة دي وشي ماتشوفو .. ملكة قالت ليهو .. انا ذاتي دي ما امي دي كذابة ومنافقة .. سوقني معاك .. سوقني معاك يايوسف.. محل ما ماشي .. انا هنا بموت المراة دي بتكتلني ..

يوسف ساق اختو .. ومرقو من اليت .. وستو دايرة تموت من البكا .. فجأة صحت النوم.. لقت نفسها بتبكي .. وترجف والكلام ده كلو كان حلم ..

بقت تقول.. اعوذ بالله من الشيطان الرجيم.. ياربي لاتبلينا ولاتصيبنا ولاتفرقنا يارب.. وتقرا في اية الكرسي ..

وتاني النوم ماجاها نهائي .. لامن صبحت واطات الله .. وبقت تقول الحمد لله اني ماقابلتك يا الصديق ود السيد ..

بس الراجل ده تاني لو ضرب لي تلفون بكلمو عديل اقول ليهو شيلني من راسك.. ولو سمحت امسح رقمي ده من تلفونك .. انا مافاضية لي مشاكل وانا ما المراة البدمر حياتي بي يدي ..

في الحقيقة طبعا الصديق تاني يوم اصلا سافر .. من سلم الامانة رجع جبرة .. والصباح جا شال قروشو .. ووردهن في حسابو وسافر مشى الشمالية ..

لكن وصل هناك .. حكي لي يوسف وقال ليهو صلت ليك الامانة لغاية البيت.. بس مالقيت الوالدة كانت مافي .. لقيت ملكة اختك ماشاء الله

ومعاهم واحدة من الجيران اسمها محاسن .. بي وليداتها .. حارسة لي امك البيت .. واكرمتني والله زي الكانها ست البيت ..

قال ليهو الغريبة انو انا كلمت امي .. قلت ليها عم الصديق بجي الاحد او الاتنين ..

قال ليهو بتكون ظروف يا يوسف .. انت كيف الان؟ والشغل معاك ماشي كيف.. قال ليهو والله ياعم صديق الشغل تمام .. البارح مطلع 30 جرام .. قال ليهو والله ماشي في طريق الغنى يا ود الخير .. قال ليهو والله الحمد لله يا عم صديق الامور ماشة تمام ..

مرت الايام ... يوسف بقى كل اسبوع برسل لي امو قروش ومعتصم بمشي يجيبها ليهم من الحوالة .. وستو اتفقت مع الراجل بتاع المناسبات واشترت العدة .. وبدت الشغل معاها محاسن ومحاسن عندها نسبة في الارباح .. ومعاها مراة تاني والحبشية ..

وملكة كرعيها طلقن.. وبقت تساعد معاهم في الشغل.

والقروش بقت كابة فوق ستو.. من شرق وغرب .. ويوم معتصم جاء ساق ستو.. قال ليها ارح عشان. تكتبي لي توكيل لاستلام دية الوالد .. لامها يادوب طلعت نمشي نستلمها من المحكمة .. قالت ليهو دية شنو كمان ..؟ قال ليها ده حق الاولاد المساكين ديل .. وانا كنت ساكيهو ليكم اربعة شهور محرك القضية .. وهسي الحمد لله .. القروش مرقت من شركة التامين.. وسلموها للمحكمة ..

ستو مشت معاهو لي المحامي بي بطاقتها وقسيمة زواجها ..

وكتبت ليهو التوكيل .. بي كل ثقة وامانة .. ومشى جاب ليها الملايين .. وجاء .. سلمها ليها .. وقال ليها يا ام يوسف انا منتظر .. ملكة هيدي .بقت كويسة .. قالت ليهو شيل الصبر يا نسيبي..

ومحاسن امورها اتصلحت.. وطبعا عندها نسبة من قروش المناسبات زي ما حكينا .. وهي بقت المديرة التنفيذية للشغل .. والامور ماشة زي الساعة وهدوء في الأجواء ..

الى اللقاء