الفصل السابع عشر

اشرف واكرم اولاد الصديق .. علاقتهم طيبة مع جدو .. وبتكيفو لي ونستو شديد.. ومعجبين بانو زول بتاع شغل .. ومابحب الراحات والكسل .. طبعا الزول ده .. اشترى جهازو براهو .. ورجع جهاز الصديق .. وبقى شغال شغل بي ارتياح نفسي .. بس المشكلة انو مواعيد الجامعة راحت والجامعة شغالة ليها اكتر من شهر ...

وكل مرة امو تضرب ليهو.. تقول ليهو تعال خلاص خلي الشغل .. حصل دراستك.. وهو يقول ليها اصبري شوية يا امي.. الامور هنا ماشة معاي كويس ..

يوم اشرف واكرم.. اخدو ليهم اجازة من الشغل.. زي خمسة يوم كدا مشو البيت.. عشان يسلمو على امهم .. بثينة.

واخواتهم التلاته. اسراء ودعاء وبهجه .. وطلبو من جدو يمشي معاهم.. لكن جدو رفض.. وقال ليهم انا محتاج لاي ساعة تمر في اليوم ..

وصلو هنا البيت. وفي اثناء ونستهم جنب امهم كانو بتكلمو عن يوسف .. ويحكو بي قصصو وحاجاتو .. وامهم سمعت قالت ليهم يوسف ده منو؟؟ ..

اشرف قال ليها ده ولد كدا من بلدنا .. ولازم انتي بتكوني تعرفي اهلو .. اسمو يوسف الخير يوسف .. الزول ده ابوي بعزو معزة شديدة خلاص .. لانو ابوي كان صاحب ابوهو شديد .. وابوهو اتوفى قبل فترة .. ابوي اهتمه بيه لدرجة.. انو مشى جابو من الخرطوم.. واداهو جهاز كشف .. ووراهو محل الشغل ..

غايتو ابوي ده الله يديهو العافية اصلو مابقصر .. حتى يوم سافر الخرطوم .. عشان يودي قروش من يوسف لي امه ..

بثينة نططت عيونا.. و قعدت ترجف لمن الكرسي داير يقع بيها ..

هي طبعا قاعدة في كرسي عجلة.. لانها عندها جلطة ليها سنتين عندها شلل نصفي.. ماشة بي كرسي العجلة .. وهسي في اللحظة دي.. اعصابها انتهت .. وبقت تتكلم كلام مامظبوط ..

بتقول خلاص لقاها .. لمه فيها .. خلاص تاني مابشوف قدامو .. خلاص نحن انتهينا .. الله يدمرك ياستو.. كان دايرة تدمري بيتنا ..

اشرف قال ليها في شنو يا امي؟ .. انا مافاهم شي؟..

من البتقولي فيهو ده .. قالت ليهو ابوك يا اشرف.. ابوك خلاص اتبع درب الصبينة .. قال ليها الحاصل شنو احكي لي ..

قالت ليهو اولا.. الخير ود يوسف.. لاصاحب ابوك ولاعندو معاهو اي علاقة .. حصل طول عمرك شفت الخير ده؟ .. قال ليها لا ...

قالت ليهو حصل سمعت ابوك بتكلم عنو؟ قالت ليها لا..

قالت ليهو دي يعني الصحبة البعد الموت .. ولاشنو؟ .. انت ماعندك مخ تفكر بيهو؟؟ ولاحبة بسيطة يا اشرف؟؟

قال ليها والله مافاهم حاجة يا امي.. وضحي الموضوع شوية.. يا امي ..

قالت ليهو الموضوع ياروح امك .. ابوك اصلا ماكان عايزني انا.. ولا كان بحبني .. لكن انا كنت عايزاهو ومعجبة بيهو .. لكن هو كان داير ستو ام يوسف المعاكم ده .. ولمن ابوها رفض.. ابوك ده قرب يجن .. حبوبتك ام ابوك جاتنا في البيت .. وقالت لي امي ولدي بيضيع يا نعمة و يا بثينة .. يانعمة كان جيناك بتدينا بتك بثبنة لي الصديق ولدي؟.. امي قالت ليها يهدي بثينة أساليها وشوفي رايها .. انا قلت ليها .. حتي لو انا وافقت ليك هو بوافق؟.. هو قال ليك دايرني؟

قالت لي انتي بس وافقي يابثينة انا بقنعو ..

قلت ليها امشي اقنعيهو ..

طلعت .. طوالي رسلو لينا بعد يومين.. قالو الصديق واهلو جاينكم لي بثينة .. وانا قبلت والعرس تم .. والفترة الاولى اصلا ستو مامرقت من خشمو وانا صابرة .. لغاية ماربنا بي كرمو نساهو.. وواصل حياتو وجيتو انتو .. وستو بقت بالنسبة ليهو ماضي ..

لانها اتزوجت وجابت الاولاد.. ورحلت ام درمان .. واخبارها انقطعت .. هسي خلاص .. ابوك عرف انو راجلا مات.. وجرى عليها يخسي عليهو الكلب .. وهي كمان ماصدقت .. رسلت معاهو ولدها وبقت تستقبلو في البيت وولدها مافيش .. لاحول ولاقوة الا بالله .. ياجماعة الدنيا دي موديانا على وين؟؟ ..

ان شاء الله يكون داير يعرسها بالحلال.. مايبقى مصاحبها صحوبية .. اشرف قال ليها يا امي ده كلام شنو؟.. والله ان حسيت براسي انشق .. قالت ليهو خليك مصحصح .. ابوك بكذب عليك .. مافي صداقة بينو وبين الخير المرحوم .. الصداقة والريدة كانت بينو وبين ستو ام الولد ..

طبعا اشرف واكرم الاتنين ولعت فيهم نار .. اصلا هم من البداية كانو مستغربين في المعزة والخدمة.. البعمل فيها ابوهم لي جدو .. وماكانو مقتنعين بي انو بس صاحب ابوهو .. لازم في حاجة اكبر من كدا .. والليلة بانت ليهم الحقيقة .. الحقيقة انو في حب قديم عفا عليه الزمن بدأ في النهوض مرة اخرى..

اكرم قال ليهو انت عارف يا اشرف احسن حاجة .. نعمل لينا سبب مع الجنى ده.. ونمسكو ندقو دق العيش .. بالله شوف الخايب ده.. والله دي راجل ود رجال مابعملا .. والله تشوف كلامو وتصرفاتو.. تقول ده ياهو العليهو الرك .. بس (ياما تحت السواهي دواهي) ..

اشرف قال ليهو لالا.. اول حاجة الناس ديل.. لمن عرفو ابوي قروشو كتيرة.. واملاكو مالية الواطه .. اصابهم الطمع. ودايرين يكاوشو عليهو .. المراة ذكية .. رسلت معاهو ولدها .. عشان يكون حبل الود متواصل .. لامن يحصل ليها مرادها .. نحن لازم نعمل مواجهة مع ابوي .. لانو ابوي هو المشى ليهم .. هم ماجو كايسين ليهو ..

والام تسع فيهم .. قالت ليهم الموضوع ده ماداير فوضى.. وكلام كتير

ومضاربه ودق .. الموضوع ده داير ذكاء وخطط. ماتبقو ناس بلدا

.. شوف اكتر حاجة ابوك بكرها هي السرقة وعدم الامانة .. الولد شغال في معاكم في حتة واحدة ..

المفروض تتفقد حاجة منكم.. ومايكون في زول متهم غيرو .. وفي حاجة تانية مهمة .. الولد مافي حاجة ممكن تزعلو غير انو سمعة امو تكون على المحك ..

الولد لازم يعرف انو.. في علاقة مشبوهة بين امو وبين الصديق .. والصديق تاني بقدر عليهو براي .. انتو ابوكم ماتتكلمو معاهو نهائي.. زي الكانكم ماعارفين ..

اشرف قال ليها احتمال الولد يكون عارف العلاقة المشبوهة.. الفائدة شنو نحن نقول ليهو؟؟ .. قالت ليهو حتى لو عارف .. لمن يعرف انكم انتو عارفين الفضيحة.. الحكاية دي بتكسر عينو .. وتاني مابقدر يقعد معاكم ولا دقيقة ..

المهم ياجماعة باختصار .. الولدين اشرف واكرم مع امهم .. عدو الليل داك كلو تخطيط ومكر .. وطبعا المراة دايرة تحافظ على بيتها .. والاولاد عايزين يحافظو على حقهم وحق ابوهم .. لكنهم بنو الافتراضات كلها على ظنون غير يقينية .. وده منشأ الخطا في كل مشكلة بين اتنين .. انو الزول يكون باني افتراضيات علي الظن .. ومافي زول شاف حاجة بي عينو ..

في اليوم ده ذاتو الصديق كان في ابوحمد .. ولقى الشبكة تمام التمام .. والوكت فاضي.. قام دق تلفون لي ستو..

الو ..

قالت ليهو الو مرحبا ..

قال ليها كيف حالك ياست البنات؟ .. وكيف صحتك الملكة .. انا الصديق..

قالت ليهو حباب الصديق .. نحن في خير الحمد لله ..

قال ليها ظروف الحياة والمعيشة عاملة معاكم كيف .. ان شاء الله مراسيل يوسف ديل مكفيات المصروف؟ ..

قالت ليهو الحمد لله.. والله ياصديق نحن في نعمة نحسد عليها .. الحمد لله انا شغالة شغل كويس .. وبكسب الملايين .. ومرسال يوسف دي زيادة خير .. كان جات الحمد لله .. وكان ماجات ما مأثرة كتير ..

قال ليها ربنا يعين.. ان شاء الله ويوفقكم .. ويغنيكم ..

قالت ليهو امين .. وانت ان شاء الله ربنا يجزيك خير.. على موقفك معانا .. في لحظة الحوجة .. ان شاء الله ربنا مايحوجك لي زول ..

الصديق سكت مسافة ..

ستو قالت ليهو.. يلا في امان الله.. تسلم على اتصالك وسؤالك عننا ..

قال ليها مع السلامة ..

وقفل الخط ودي كانت كل المكالمة بالظبط..

بعد المكالمه انتهت ستو سرحت مسافة .. وبقت تتكلم مع روحها ..

قالت الراجل ده انا كنت ناوية اقول ليهو.. امسح رقمي وتاني ماتتصل علي .. لكن غلبني كلو كلو .. لانومكالمتو كلها مافيها شي كدا ولا كدا .. لكن شكلو ح يتصل تاني .. والله اقطعو ليك معاهو طوالي.. زي مابقول جدو..

باكر الصباح الصديق جاء من ابوحمد .. وكلم جدو قال ليهو انا اتصلت علي ناس بيتكم واتكلمت مع امك .. وقالو كويسين وامك شغالة وتربح الملايين ماشاء الله ..

هسي انت اطمئن .. واشتغل بي رواقة وماتتعب روحك.. انا شايفك تعبان شديد بتمرق قبل الشرقة.. مابترجع الا المغرب ..

قال ليهو انت رقم امي لقيتو وين؟.. قال ليهو انا موش قلت ليك لمن مشيت البيت مالاقيتها .. وخوفت ادي القروش المراة الفي البيت.. لاني انا مابعرفها كويس .. قلت ليهم اتصلو عليها.. لو قريبة عشان الاقيها .. واسلمها الامانة .. اتصلو عليها من تلفوني .. وكانت بعيدة .. سلمت القروش لاختك والمراة .. والرقم بقى محفوظ معاي ..

جدو قال ليهو ايوااا .. انا ماعارفكم اتصلتو عليها من البيت ..

المهم لغاية اللحظة دي.. يوسف ماعندو شك.. ولو مثقال ذرة انو في علاقة بين الراجل ده وامه ..

قام في اللحظة دي الصديق قال لي يوسف .. والله يايوسف انا قاعد افكر في حاجة ماعارف. انت طبعا" راجل البيت .. وعندك الكلمة ..

انا داير ملكة لي اشرف ولدي رايك شنو؟

قال ليهو والله يا عمي صديق.. طبعا اشرف راجل.. وزي اخوي .. وانت ابوهو بعتبرك زي ابوي .. انا شخصيا ماعندي مانع .. لكن طبعا انا عندي فهم في امور الزواج دي .. اهم حاجة اتفاق الطرفين المعنيين بالزواج .. يعني لازم اشرف يكون عندو رغبة في ملكة .. وملكة تكون عندها رغبة في اشرف .. عشان بعدين يتحملو نتائج الاختيار ..

قال ليهو والله طول عمرك كلامك كلام كبار .. دي تربية ست الجيل ولا تربية الخير ؟؟ قال ليهو الاتنين مع بعض ..

طبعا ابوي الله يرحمو زول صاحبك .. وانت بتعرفو.. عنو ميزة .. لمن يزعل.. بسكت تاني مابقدر يتكلم ولاكلمة.. ولو زعل شديد .. بدمع ويكرج سنونو ..

لكن امي لو زعلت بتخرب الدنيا .. وبتهيج .. وبتتكلم اي كلام في راسها يعجبها.. بدون ماتحسب اي حساب ..

قال ليهو ايوة بعرف النوعية دي من الناس.. قلوبهم بتكون صافية .. ومابحملو جواهم اي حقد .. قال ليهو لالا .. امي دي ابعد الناس من الحقد.. دايما ضميرها ابيض وبتحب الخير للناس .. بس ياها هيجتها الاولى وتاني بتنسى ..

يازول الصديق وجدو ديل اتونسو ونسة كتيرة خلاص .. في فرصة انو اشرف واكرم مافي ومواعيدهم باكر يجو يجيبو معاهم المشاكل ..

صبحت واطات الله وجدو صلى الصبح حاضر وشرب الشاي وشال جهازو ومرق .. المرة دي مرق مسافة بعيد خلاص .. وبدا يشتغل وحايم بالجهاز ..

في اثناء ماهو شغال الجهاز بتاعو كورك كواريك شديده خلاص .. في احد شغال هناك بعيد منو اسمو حامد .. كورك ليهو قال ليهو ياحامد .. تعال تعال.. شوف لقيت شنو .. شكلها كبيرة القصة دي ..

حامد قال ليهو يازول اصبر بس .. حفرو طلعو ليهم كتلة لكيك بتاع دهب يوسف ده قرب يجن من الفرحة .. وجمبها حجر ناقر .. (مخلوط بالدهب)

وتحتو عرق بتاع دهب جاري وكلما حفرو العرق ماشي ..

حامد قال ليهو اسمع يا يوسف.. وقيف النحجز المكان .. انت يازول ربنا فرجها عليك والله دي بير .. بنك عديل .. بس اجعلي معاك نسبة عشرة في المية .. قال ليهو والله ليك الربع .. عشرة في المية شنو؟ شد حيلك .. معاي بس ..

قال ليهو يايوسف في الفترة دي ماتكلم زول ولا ناس حاج صديق ..

قال ليهو الصديق ده زي ابوي لازم اكلمو ..

قال ليهو والله يايوسف في حسد واعمل حسابك .. قال ليهو الناس دي كلها لو حسدتني.. يوسف واولادو مابحسدوني ..

البتاعة اللقوها دي تقريبا فيها كيلو واربعمية جرام ..

ويادوب الشغل الصحي بدا مع يوسف .. شال القطعة فرحان ومعاهو الجهاز.. وحامد قال ليهو انا بنتظرك في ابوحمد .. قال ليهو جدا انا بمشي ابشر عمي صديق وطوالي اجيك نوديها .. للكليس.. (صائغ امين وطيب .. ومن جناة الثمر ^ – ^) نوديها يفكها فورا" .. ويسلمنا ..

مشى هناك الخيمة ولقى اشرف واكرم وصلو .. وعم صديق مافي ..

الساعة كانت زي حداشر وتلت ..

سلم عليهم بي كل طيبة وفرحة وهم الاتنين صارين وشهم بعاينو ليهو .. وسلمو عليهو سلام اخير منو الدق .. عمل رايح وقال ليهم اليلة ربنا فتحها علي .. ولقيت لي خليه عديل .. باركو لي ..

اشرف قام طلع من الخيمة .. واكرم طلع وراهو .. ولاحتى عينو للدهب الشايلو معاهو .. وجدو مطير عيونو ديل مالهم الناس ديل .. اول مرة اشوفهم بالطريقة دي ..

ياربي في زول جايب ليهم مني كلام؟

الى اللقاء ...