الجزء 36

ركبنا ورانيا قبلت علي وطول الطريق كانت بتتونس معاي بي وضعيتا دي .

رانيا : حمزة بيتك اكتمل ولا لسة؟

حمزة : باقي شوية عليه .

رانيا : عايزين نشوفو .

همستا ليها في اضانا : عايني الساعة ماشة لي 9 ماف طريقة امشي معاكم وصولوني وبعداك امشو محل ماتمشو

بس رانيا اصرت وقالت كلها خمسة دقايق نشوفو ونوصلك ، ماكان في امل اقنعها ، وافقت بس بشرط خمسة دقايق بس .

وصلنا بيت ولد عمها ومنظرو من برة خطير ومن جوة دزاينو اخطر كمان .

بيتو ماشاءالله ، دعيت ليو كتير بالرغم اني مابعرفو ظاهر عليهو شاب خلوق وطيب .

اتصلت علي امي بتسألني ليه اتأخرت وريتا ابدا مابعرف ادس عليها حاجة .

طلعنا من بيت ولد عم رانيا واصر لازم ياخد لينا عشاء من مطعم بحب يتعشى هو فيو دايما .

اتذمرت في وش رانيا بعد هو نزل

حنين : ياخ ماممكن معاك انتي و ود عمك دا، دايرة امشي البيت انا ياخ افففف .

رانيا : روقي يامزة وخليني احكي ليك .

حنين بي وش الشمار : احكي .

رانيا : ماتزعلي من ايناس عليك الله هي ماقصدت تخوفك بس عشان انتي اصريتي تشوفيها هي جات .

حنين : انتي كلمتيها؟

رانيا : لا .. هي بتعرف براها .

حنين : كيف الكلام دا .. انتي يارانيا من قبيل كل كلام بتقوليو مبهم ياخ فهميني الكلام البتقوليو .

رانيا : بالصراحة كدا اختي عندها جن سفلي من قبل 4 سنوات .

حنين : شنووووو؟؟؟؟

رانيا : دا الحاصل وعلما السحر وللاسف بقت بتمارس طقوس السحر ، وايناس بقت ما ايناس حتى خلقتا اتغيرت .

حنين : انتي جادة؟ الكلام دا صحي؟

رانيا : اقسم بالله

حنين : طيب ليه ماعالجتوها؟

رانيا : هي ماملبوسة لكن ساحرة بتملك عدد من الجن السفلي ، تتذكري قبيل مش لقيتي الانوار بتاعة البيت اغلبها طافية؟

حنين : صاح

رانيا : دي هي اي لمبة نجيبا بتطلع تكسرا مابتحب الانوار وتصدقي لو قلت ليك الدور التالت ماتمينا بناهو بسببا؟

حنين : معقول؟ وكيف مستحملينها؟

رانيا : بقدرة ربنا ، عارفة الطابق التالت بدينا نبني نبني فيو من ستة شهور بس هي كانت بتشاكلنا وبتقول ازعجتوني وبتتجنن فينا وحلفت ماتخلي العمال يكملو بناء ،ودا الحصل .

رانيا قعدت تبكي شكلها ممغوصة شديد

رانيا : امي مرضت وبقت مامستقرة بسببا وريم اختي طفشت وبقيت انا بس معاها .

حنين : وكيف قادرة تعيشي معاها مابتأذيك؟

رانيا : حاولت تأذيني كم مرة عشان مابطاوعها ، غير كدا بتكون عادية معاي وملازمة غرفتا دي وابدا مابتطلع منها الا بي مزاجا زي قبيل .

حنين : الله يصبرك يا اختي، عايزة اسالك واتمنى تجاوبيني بصراحة عشان ارتاح

حمزة وصل قبل ما اسأل رانيا وقفلنا الموصوع الكان داير بيناتنا .