الجزء 26

مسحت ارقام امام وبكيت لمن عيني شالا النوم ..

صبحت كلمت امي بالحصل وكانت بتواسيني دايما وبتقول لي بتلقي الاحسن منو !..

احسن منو؟؟؟

ههههههههه

منو الممكن يكون زي امام تاني؟

كلكم حتقولو لي راقدييين وكتيرين ، بس ابصم ليكم بالعشرة امام مامنو اتنين انا العارفة الحاجة دي وبعرف عن امام اكتر من اقرب زول ليو ، رجاءا مامحتاجة لي مشاعر الشفقة دي من ايا كان حتى انتي ياامي ماحتقدري تحسي بالجواي واكبر دليل بتقولي لي بتلقي الاحسن منو ، هو لعبة؟ ولا حاجة بشتروها من السوق؟

دي مشاعر واحاسيس انا كرستها لي زول واحد واااحد وهو اول حب لي في حياتي ، الله يجازي اختو القاهرة القادرة قدرت تبعدو عني .

نفسيا كدا بقيت ماطايقة اتكلم او اتفاهم مع زول ، كانت صدمة عنيفة بالنسبة لي ومااتوقعت انساها مع الزمن .

امتحاناتي قربت ومافي مجال لشغلة البال انا لازم السنة دي انجح ومااشتغل بي زول .

مر اسبوعين علي الصدمة ، طلعت من المكتبة اخد رست من القراية اصلي اتخنقت وصلت الحد منها ، شلت التلفون عايزة اضرب لي امي لقيت رسالة :

} مهما حصل برضو بحبك وماحتكوني لي غيري {

ههههههههههه شكلك لسة ماصحصحت كويس ياغدار ،ليه انا لعبة في يدك ولاقايلني صغيرة ومابفهم في المشاعر جد عينك قوية ووقح ، كلمة وقح دي قلتها بصوت عالي لمن الولد الكان قاعد في البنش اتخلع قايل ني بشاكل فيو ،زحة من جنبي وقعد يتأسف ، معليش يا أخ ماقاصداك انت .

ماحاولت ارد ليهو بأي رسالة رغم انو كان نفسي ارسل ليو معلقة نبز بس مسكت نفسي عشان افهمو انو ماعاد يسوى شي بالنسبة لي .

ماعاد يسوى شي؟؟؟ !!!

كذابة وستين كذابة وبتغشي في نفسك ، إمام كل شي بالنسبة ليك تستاهلي كل شي بحصل ليك بي سببو ما انتي الخليتيو محور حياتك وعلقتي روحك البسألك ربنا منها بيو، دا الكان بقولو لي عقلي وكأنو هو التاني بعاقب فيني .

لبست فريمي وقعدت في بنش بعيد ابكي وانخج زي المات لي زول ، دا عشان منو؟

اوعى تقولي بتبكي عشان واحد باعك واحتمال كان بلعب عليك .

اااااحيييي انا ببكي علي حظي الكعب زي كل مرة من يومي ماعندي حظ .

حنين؟؟؟ !!! مالك ي بت؟

مافي حاجة ياسارة متضايقة بس ..

جفلت من جنب سارة زي الضاربيني كهرباء ، اصلي بكره جو الشمارات دا .

مشيت اشتريت شيبس وقعد اكل وابكي ، هههه اي عادي مالو الدنيا ماوقفت عليك ياهناي بس ربنا يجبر بخاطري .

شربت موية من الكولر وكانت حارة لكن ما احر من قسوتك ياهناي .

يا اخت يااخت لو سمحتي !..

نعم؟

تلفونتك دا نسيتيو في الكفتيريا ..

اها شكرا ليك ربنا يجزاك خير .

انا انس بقرا طب السنة التالتة وانتي؟

شكرا لخدمتك لي ..

مشيت وحسيت بالذنب عشان ماوريتو اسمي وتصرفي شين بس برضو يستاهل في النهاية ولد وكل الاولاد جزم .

خلصت قراية ورجعت البيت ونمت زي الفطيس من الارهاق