الجزء 69
شيخ حمزة جايينا زي ماطلبت امي ، امي عرفت العملتو ومسحت بي الارض بس برضو وقفت معاي بشدة وكانت خايفة علي لدرجة منعتني اشوف الشارع بي عيني .
اول حاجة عملها شيخ حمزة اداني كف رجعني لي صوابي غير التوبيخ والكلام البلسع السمعتو منو ، لكن اهو برضو استحق اسمع كل دا وماف زول بديك كلام حار الا الزول البريدك .
ابتدا معاي جلسات قرآن عشان يتأكد اني ما اتلبست ، الحمدلله ماحصل شي غير اني كنت ببكي كل مااسمع الاية :
} واتبعو ماتتلو الشياطين على ملك سليمان ' وماكفر سليمان ولكن الشياطين كفرو يعلمون الناس السحر وما انزل على الملكين ببابل هاروت وماروت ومايعلمان من احد حتى يقولا انما نحن فتنة فلا تكفر ' فيتعلمون منهما مايفرقون به بين المرء و زوجه وماهم بضارين به من احد الا بإذن الله ' ويتعلمون مايضرهم ولاينفعهم ولقد علمو لمن اشتراه ماله في الاخرة من خلاق ولبئس ماشرو به انفسهم لو كانو يعلمون {
ويتعلمون مايضرهم ولاينفعهم،
اتضريت انا ما اتنفعتا وكل ساحر ضر نفسو مانفعا وبئس التمن الاشترينا بيهو انفسنا لاحول ولاقوة الا بالله .
ياما بكيت في الاية دي لمن قربت ابكي الدم ، اتذكرت انا كان ممكن ابقى كيف وحالي يبقى كيف يااتجننت يابقيت ساحرة فاجرة .
شيخ حمزة كان يوميا بجي يقرا ويقرا لينا في البيت حتى نطقني الشهادة من اول وجديد ، ياما بكيت حسرة وندم على نفسي واعلنت توبتي من الرجس الجنيت بيهو على نفسي .
شيخ حمزة ماقصر معاي وهو الوحيد القدر يفهمني .
عدت ايامي ولسة انا مازلت بتعاقب ، وكل يوم تحصل لي حاجة تخلي قلبي يقع في الارض .
حياتي بقت كارثة وكتير فكرت انتحر واخلص نفسي من الدنيا ومافيها .
لكن هل الانتحار حل؟
تقريبا بشكل يومي ولمدة شهر كنت بحلم بي رانيا ، اتكلم معاها بس تعاين لي مابتقول اي حاجة .
جات علي الامتحانات وانا في اسوأ حالاتي ومع دا كلو كنت بمتحن وعارفة نفسي ماحأنجح وياما فكرت اخليها واخلي الجامعه زاتا لكن امي وشيخ حمزة كانو بصرو علي امتحن .
خلصت الامتحانات وانا ضايقة بي الوسيعة ، فكرت امشي لي ايناس تخلصني من الأنا فيهو بس للاسف لقيتا ماف وبيتهم مسمكر من برة ، مشيت لي خالها قال حيساعدني وياما وعدني يساعدني وماشفت مساعدة، سألتو عن بت اختو قال اخر مرة شافها قبل وفاة اختها تاني ماظهرت عليو .
جهزنا حاجاتنا للسفر ،فرحت قلت امشي اعمل عمرة واتخلص من الجحيم دا شوية .
____________________
انتي؟ ههههههههه مسافرة؟
قايلة روحك حترتاحي؟ الا اكسر ليك رقبتك حتى ترتاحي !..
دا منو البتكلم معاي .. اااخ ياامي ماقادرة اتنفس وكأنو خاتين لي صخرة على صدري .
فتحت عيوني وياريت مافتحتها من هول المنظر
مرة ولا راجل ماعرفتو لونو رمادي وعجووووز وفي راسو خصل شعرات بس ووشو الى اليوم خايفة من منظرو .
وشو قبيح قبيح جدا وعيونو كلها بالاصفر زي الشرر قاعد لي في صدري وبعاين لي
صراحة لمن فتحت عيوني مااتكلم بس كان بعاين .. حاولت اتحرك لكن كأني مكبلة بي سلاسل ، حاولت اقرا اية الكرسي غلبني لساني كان ممسوك ، ماكان الا اغمض عيوني وانوم والبحصل يحل اهم شي مااعاين للحاجة القاعدة لي في صدري دي .
ملاحظة *: ماحبيت احكي المواقف الحصلت معاي رفقا بأصحاب القلوب الضعيفة، ودا واحد من الاهوال الحصلت لي .*
اذان الفجر كان المنقذ الوحيد لي ، يمكن المخلوق دا قاعد علي اكتر من ساعة لاقادرة اتكلم ولا اتحرك حتى افتكرتها دي نهايتي وما علي الا ابكي وانتظر لحظة موتي ، لكن ربنا رحيم ، اذن الفجر فورا المخلوق دا نزل مني وبقيت متابعاهو مما نزل وكان ابشع مما كان ، قصير جدا وضهرو محني ماشفت ليو كرعين ، فتح باب الغرفة طلع منو .
بعدها اطلقت صرخة مدوية صحت عليها امي ، امي الكانت شاهدة على كل تفاصيل الحاجات البتحصل لي .
بقت امي تردد الايات وانا اردد وراها وجابت المسجل شغلت شريط القرأن .
باقي لي سفرتا يومين والليلة نتيجتي واجب علي احضرا، ماعندي نفس وعارفة نتيجتي حتكون كعبة لكن !....
دخلت الجامعة والكل كان بعاين لي ، هم بعاينو لي ولا انا البتخيل لي؟
يمكن عرفو بالحصل ولا انا هلوست؟
حنين، حنين مالك يابت شكلك كدا عيانة؟
حنين : ظاهر علي؟
ميادة : عيونك واقعة وتحتا اسود وشكلك تعبان، ماقصدي اعقدك لكن بالجد انتي عيانة .
حنين : عارفة .
حتى شكلي اتغير من الرعب وحالات الهلع الدخلت فيني حرمت النوم على نفسي بالليل وبقيت ارقد النهار في الكنبة في الحتة القاعدة فيها امي .
_____________
علقو النتيجة وكنت بسمع الزغاريد والبكاء والصريخ .
المشاعر المختلطة وانا قاعدة بعيد منزوية من البشر، البشر الكانت بتخاف منهم ايناس انا برضو بقيت اخاف منهم .
حنين، ربنا يعوضك ان شاءالله السنة الجاية تعوضيها .
حنين : هههه عارفة نفسي ، والف مبروك ليك .
رهام : الله يبارك فيك ، مالك ضعفانة ياحنين عيانة؟
طلعت من الجامعة وانا مستاءة من مشاعر الشفقة الكانت ظاهرة في وجوه صحباتي وزملائي كلهم حسو بي وافتكروني مريضة .
انا مريضة؟
مافي مرض اكتر من الجبتو لي نفسي بسبب فضولي وجنوني