الجزء 25

مراد راقد في الغرفه في المستشفي و بعملو ليهو في فحوصات.. و مصطفي واقف برا مقلق..

اميره راقده تفكر تعمل شنو و تخلص من الحمل ده كيف.. قالت في نفسها:( الباشا.. هو الحل.. اقول ليهو انا حامل منك.. كده حيفرح و حاطلق من محمود و اعيش في عز معاهو.. اي اي .. بكرا من الصباح حامشي ليهو و حاكلمو لا بنزل الطفل لا ااي شي) اميره فرحت ب الخطه..

الدكتور طلع من مراد...

مصطفي سالو بقلق:( اها ي دكتور طمني)

الدكتور:( عندو كليه تعبانه شديد.. حنعمل ليهو علاجات لو م استجاب لازم ندخلو غسيل فورا)

مصطفي يتخلع:( فشل??)

الدكتور:( ااي للاسف...محتاجين منك توقع علي الاجراءات )

مصطفي:( حاضر.. يلا)

مصطفي يزعل شديد علي مراد ...

اميره مشت للباشا في البيت...لقتو مافيش... اتصلت عليهو قال ليها:(عندي اجتماع ساعه و بجيك استني)

اميره قعدت مستنياهو..

انا اليوم كلو في الجامعه مقلقه و بفكر في اميره و العملتو...حتي يارا ركزت لي سالتني( مالك?)

قلتا ليها:( ماف شي..تعبانه بس)

الباشا و اميره قاعدين علي الصغره بياكلو..

اميره:( وليد.. عندي ليك خبر حلو)

وليد بفرح:( خبر حلو?? قولي)

اميره بفرح:( انا حامل منك.. حاجيب ليك بيبي)

وليد يتخلع و يسكت..

اميره:( مالك?م فرحتا?)

وليد يبتسم:( لالا طبعا مبسوووط جدددا...الف مبروك حبيبتي)

اميره:( الله يبارك فيك)

وليد:( انتي متاكده انو ده ولدي?)

اميره:( طبعا...هو انا بخلي زول يقرب مني غيرك?)

وليد:( ااي طبعا.. عارفك حبيبتي.. يلا تطلبي من راجلك الطلاق عشان نعرس سرعه قبل م بطنك تظهر)

اميره:( بالجد? حنعرس? يعني م انزل الولد?)

وليد:( اوعي.. ده ولدي و انا م بفرض فيهو.. اتخلصي من راجلك بس و تعالي لي)

اميره تبتسم بفرح:( حاضر.. حاخلص منو في دقايق)

مراد م استجاب للعلاجات القبل الغسيل و يضطرو يدخلوهو غسيل طوالي.. مصطفي وافق ليهم علي الغسيل..يدخل يطمن علي مراد...و مراد كان مقلق بس يدخل الغسيل..

يطلع مراد من الغسيل و هو تعبان شديد..مصطفي قاعد جمبو..

مصطفي:( تعبان?)

مراد:( شديد...حاسي روحي حتطلع)

مصطفي:( معليش اتحمل)

مراد:( حاسي نفسي حاموت)

مصطفي بخلعه:( بعد الشر عليك.. اوعي تقول كده)

مراد:( داير اشوف امي.. اضرب ل امجد كلمو..داير اشوف امي و ابوي)

مصطفي:( حاضر.. اسي بضرب ل امجد)

جيت ماره ب غرفه اميره سامعاها بتتكلم بالتلفون و بتكورك..

اميره:( اسمع هنا ي محمود.. انا زهجتا خلاص...م قادره اتحمل وضعنا ده........ لالا م داير ارجع هناك... طلقني ي محمود.. طلقني بس...... لا م بحبك ي محمود ولا دايراك.. .... م تجي هنا ولا دايره اشوفك..... م تجي ي محمود ببس رسل لي ورقتي.. في ظرف يومين دايره ورقتي تكون عندي. ..م دايره معاك كلام كتير)

و تقفل الخط و ترمي التلفون...اتخلعتا في اميره و البتعمل فيهو... نزلتا قعدتا مع يارا و ماما ليلي في الصاله بنحضر في مسلسل..

امجد في الحمام بستحما و تلفونو برا بضرب...

جات ماريا عاينت ل التلفون لقتو رقم غريب..

خلت التلفون و مشت..

اميره بتتكلم مع جيجي في التلفون..

اميره:( انزلو كيف? بقول ليك وليد قال لي م تنزليهو)

جيجي:( انتي متاكده انو ده ولدو?)

اميره:( طبعا.. وليد بقي م بخلي زول يقرب علي غيرو)

جيجي:( م عارفه.. بس م متطمنه.. نزليهو و بعدين اتطلقي ذي م دايره لانو لو حصل ااي شي و ناس بيتكم عرفو انك حامل حتبقي ليك مصيبه)

اميره:( لا اتطمني م حيعرفو.. بس اتطلق و ارتاح من الهم ده)

جيجي:( اميره عايني .. وليد انا بعرفو من سنين.. بس م بثق فيهو ممكن يبيعك في ثانيه..ده اناني و مصلحتو فوق ااي زول)

اميره:(لالا وليد زول كويس شديد و بحبني..انت براك شايفاهو مدلعني كيف.. العربيه و المربيه و القروش.. انتي براك عندك مشكله ثقه في الرجال)

جيجي:( هو القروش م بتفرق معاهو.. و انو يديك قروش ده م دليل حب)

اميره:( لالا دليل.. انا عندي دليل.. انا بثق فيهو)

جيجي حاولت تقنع اميره بس م قدرت عليها.. اميره فكرت انو جيجي غيرانه منها عشان حتعرس وليد و تعيش في عز معاهو..

مصطفي دقي كم مره... في الاخر ماريا مشت دقت ل امجد الباب...

ماريا:( امجد...في رقم غريب بضرب ليك ورا بعض)

امجد:( دقايق طالع)

بعد طلع من الحمام شاف الرقم..

ماريا:( ده منو?)

امجد:( م عارفو والله بس كدي برجع ليهو)

امجد ضررب ل مصطفي..

امجد:( الو...ايوا منو?)

مصطفي:( ايوا ي امجد.. انا مصطفي صاحب مراد)

امجد قلق:( اهلا ي مصطفي كيفك?)

مصطفي:( الحمدلله...اسمعني.. مراد تعبان شويه في المستشفي و داير يشوفكم.. تعالو ليهو)

امجد اتخلع شديد...

امجد:( مالو مراد?? )

مصطفي:( عندي كليه تعبانه شويه.. المهم تعالو)

امجد:( كليه?? ?? انتو في اي مستشفي?? )

قاعدين انا و ماما ليلي و يارا في الصاله يجي جاري امجد في السلم بسرعه و وراهو ماريا من نشوفو نتخلع..

امجد نفسو مقطوع.. و م قادر يتكلم..

احنا وقفنا التلاته مخلوعين...

ليلي بخوف:( في شنو ي امجد?)

امجد:( مراد في المستشفي ت

عبان)

احنا التلاته اتخلعنا و صرخنا:( شنو?? مالو? ليه? حصل شنو?)

ليلي:( اخوك مالو ي امجد قول?)

ماريا:( اهدي ي ماما ليلي ماف شي)

ليلي:( ارح وديني ارح)

طلعنا كلنا من البيت جارين ركبنا مع امجد و مشينا علي المستشفي...

السكه كلها احنا بنبكي.. ماما ليلي و انا و يارا.. ماريا بتحاول تهدي فينا.. امجد ذاتو مقلق بس بقول لينا:( اتطمنو ماف شي..ان شاءالله خير)

انا حسيت قلبي بقي بتقطع.. خوفي علي مراد فات حدو.. مع انو المستشفي كانت قريبه بس حسيتها بعيده شديد...

وصلنا دخلنا نتجاري بنفتش.. لقينا مصطفي كلنا جرينا عليهو..

بقينا بنسالو كلنا مع بعض...( مصطفي..مراد مالو? حصل شنو? عندو شنو?? )

مصطفي:( اهدو ي جماعه.. مراد كويس..تعالو بيجاي)

جرينا علي الغرفه الراقد فيها مراد...

من شافنا ابتسم.. بس م قدر يتحرك...كان في درب في يدو... شكلو كان تعبان شديد... ماما ليلي جرت عليهو حضنتو و بقت بتبكي..

مراد:( انا كويس ي امي.. م تخافي...ماف شي)

ليلي رفعت راسها:( بالجد انت كويس?)

مراد:( ااي الحمدلله)

ليلي:( الدكتور قال شنو?)

مراد:( كليتي تعبانه شويه بس ماف شي بخوف)

ليلي اتخلعت:( كليتك? سجمي? مالا ي ولدي? من شنو?? )

مراد بكل هدوء:( اتطمني ي امي انا كويس اهو)

مصطفي:( اتطمني ي خالتو مراد كويس)

اتقدمت يارا و امجد علي مراد... ليلي زحت ليهم..

حضنهم و سلم عليهو..

امجد:( الف سلامه ليك)

يارا:( سلامتك ي مراد...الف سلامه ليك)

مراد:( الله يسلمكم...اشتقت ليكم والله)

يارا:( و انا كمان اشتقت ليك والله)

جات ماريا سلمت عليهو..

ماريا:( الف سلامه)

مراد:( الله يسلمك)

مراد عاين لي كنت ساكته بعاين ليهم و دموعي نازله...

مراد ابتسم لي:( تعالي ي ميمي)

اتقدمتا ليهو.. يارا و امجد زحو لي.. مديت يدي اسلم عليهو مدا يدو علي كتفي و جراني حضني...ذي م حضن يارا و امجد... انا هنا جد قلبي وقف.. م قدرتا اقول ليهو ااي شي لا سلامتك لا ااي شي بس دموعي نازله..

قال لي :( م تبكي انا كويس والله...بقيت كويس بشوفتكم)

زحيت و قلتا ليهو:( سلامتك)

مراد:( الله يسلمك)

ليلي قعدت جمبو و بقت تتكلم معاهو:( اها الدكتور قال شنو?)

انا قعدتا و بقيت سرحانه في ملامح مراد.. م قدرتا اشيل عيني منو.. بقيت م شايفه الحوليني لا سامعاهم لا اي شي بس مراد...

امجد مشي للدكتور اتطمن علي مراد مشيت معاهو...

قاعدين انا و امجد مع الدكتور..

الدكتور:( مراد كليتو اليمين. فيها فشل للوظائف بمعني عام عندو فشل كلوي و عملنا ليهو غسيل... محتاج يغسل كل يومين)

امجد:( من شنو كليتو اتاذت?)

الدكتور:( في اسباب كتيره.. بس مراد بالذات اتاذت من الشراب... بشرب كتير عشان كده اتاذت.. هو اتاخر... مفروض من بدا الالم معاهو يجي.. بس هو طنش لمن وصل مرحله متاخره)

امجد:( و الحل شنو? بنقدر نزرع ليهو?)

الدكتور:( يكون افضل طبعا.. كدي انا بشوف ليهو متبرع و انتو كمان شوفو)

امجد:( انا مش كليتي ممكن تطابق ليهو?)

الدكتور:( م شرط اعمل تحليل و نشوف النتايج)

امجد:( حاضر)

طلعنا انا و امجد من مكتب الدكتور انا قعدتا علي الارض و بقيت ببكي.. امجد بقي بهدي فيني..

امجد:( ميمي م تعملي كده.. الفشل ده عادي بجي و الناس بعيشو بيهو بالسنين بس بعملو غسيل...و عشان نريحو من الغسيل حنعمل ليهو زرع كليه.. اهدي م تخافي كده)

و انا ببكي م قادره استوعب ااي شي..

قلتا ليهو:( كلو الا مراد...اي شي بتحملو الا مراد م بتحمل فيهو شي.. م قادره اتحمل والله)

امجد:( والله عادي ماف شي.. الغسيل ده الناس بعيشو بيهو عادي.. م صعب...المهم انتي ادعي ليهو هو محتاج لدعوتك)

امجد اليوم ده اتاكد الف في الميه اني بحب مراد.. و انا م كان هاميني زول يعرف.. كل همي مراد بس.. خليهم يعرفو اني بحبو وين المشكله.. بس مراد يبقي كويس...

نتلاقي❤