الجزء 23

امجد:( مراد لو داير برجع براهو م بسمع كلام زول)

قلتا ليهو:( هو من يوم مشي ماف زول فيكم ضرب ليهو لا سالتو منو.. ماما ليلي و عمو مختار زعلانين منو.. لا انت لا يارا.. انا ضربتا ليهو قبل كم يوم و سالتا منو.. و قلتا ليهو ارجع قال لي م عندي وش اقابل بيهو ناس البيت... امجد انت ادخل واسطه بين ماما ليلي و عمو مختار و مراد)

امجد:( والله ي ميناس م عارف)

جات ماريا شايله صينيه الشاي ختتها..

ماريا:( شنو هو الما عارفو?)

قلتا ليها:( قلت ليهو اتكلم مع ناس ماما ليلي عشان مراد يرجع البيت)

ماريا:( صح والله مفروض تحاول تصلح الزعل البينهم انت الكبير و حيسمعو كلامك)

انبسطا من كلام ماريا..

امجد:( طيب بشوف امي و ابوي بعـدين)

ابتسمتا قلتا ليهو:( طيب)

سوسن و عيالا اتعودو علي البيت الجديد شويه شويه.. بس ظروفهم كانت صعبه.. و سوسن بتشتغل ليل و نهار في المكنه.. لمن بقي بجيها وجع ظهر شديد من القعده و بليل م بتقدر تنوم بسبب الالم ..

سوسن راقده في سريرها و بتتالم من ظهرها..

ايه قاعده جمبها...

ايه:( ي امي.. عليك الله ارحمي نفسك من القعده و الخياطه دي.. انا بخلي القرايه و بشتغل و انتي ارتاحي)

سوسن:( شغل شنو ي ايه انتي لسه صغيره لازم تقري)

ايه:( ي امي عايني انتي تعبانه كيف? والله م قادره اتحمل اشوفك بتتالمي كده)

سوسن:( انا كويسه ي ايه.. اسي وجع الظهر بروح.. انتي بس جيبي الكريم و تعالي امسحي لي ظهري.. و اسي بقوم ذي الحصان)

ايه:( طيب اشتغلي حاجه تاني... قعاد المكنه ده متعب شديد والله)

سوسن:( انا لقيت شغل تاني و قلتا لا? خلي الكلام الكتير و تعالي امسحي لي ظهري)

ايه باستسلام:( طيب)

ايه كانت شايله هم امها شديد...و خايفه عليها.. و سوسن دايره تشتغل و توفر ل ايه و احمد ااي شي يحتاجوهو..

جاتني الاء في البيت.. قعدنا انا و هي و يارا و ماريا.. في الحديقه اتونسنا.. الاء حبت ماريا شديد و بقت تتونس معاها.. امجد كان قاعد مع امو و ابوهو جوه بقنعهم ب رجوع مراد.. و انا مقلقه خايفاهم يرفضو..

امجد قاعد مع ماما ليلي و عمو مختار في الصاله..

ليلي كانت لسه زعلانه من مراد...

ليلي:( م دايراهو يجي البيت ده ي امجد.. م دايره اشوفو)

امجد:( ي امي خلاص الموضوع حصل و انتهي.. انسوهو خلاص كانو م حصل)

مختار:( بالسهوله دي? انت م شايف عمايل اخوك.. في زول بعمل كده و يجيب الكلام لنفسو و لينا?)

ليلي:( اصلو م نسال فيهو عشان يتادب...و يعقل و يبقي زول قدر المسئوليه.. و يخلي حركات الشفع دي)

امجد:( لكن ده م حل)

ليلي:( لا حل)

مختار:( ي امجد اخوك ده طوالي بعمل الفي راسو و بنمشيهو.. هو الاختار جمانه دي و مشينا معاهو و طلبناها ليهو يجي يخونا كده و البت تشوفو و تجي البيت تفضحو قدامكم كلكم.. ده كلام شنو ده)

امجد:( ي ابوي انا م قلتا ليكم مراد م غلطان.. بس علي الاقل خلوهو يرجع البيت)

مختار:( احنا م طردناهو هو براهو قرر يمشي)

امجد:( اي صح عشان هو خجلان منكم عشان م قادر يواجهكم.. عشان عارف نفسو غلط)

ليلي:( خلي يرجع انا م بسالو.. بس لا يتكلم معاي لا يقعد في حته انا قاعده فيها)

امجد:( م مشكله بس وافقو و الباقي بتحلا)

مختار:( كلمو خليهو يرجع)

امجد يبتسم:( طيب)

انا جيت داخله و مشيت علي السلم طلعتا فوق بقيت بسمع في كلامهم.. فرحتا لمن وافقو...عارفاهم م حيهون عليهم لانو ولدهم.. و مهما عمل حيفضل ولدهم..

امجد جا علي السلم لقاني واقفه و مبتسمه..

امجد:( وافقو)

الفرح كان باين علي قلتا ليهو:( ااي سمعتا.. يلا اضرب ليهو امشي لاقيهو و لازم يقتنع انو يرجع معاك.. لانو معاي رفض)

امجد:( طيب اسي الوقت اتاخر بكرا بمشي ليهو)

جيجي بتتكلم مع اميره في التلفون..

جيجي:( تعالي الليله الحفله)

اميره راقده في غرفتها كانت عيانه..

اميره:( م بقدر ي جيجي.. حيلي مش شايلني.. تعبانه شديد)

جيجي:( قومي. استحمي و بتنشطي و تعالي)

اميره:( م قادره من الصباح راقده.. م قادره اتحرك ولا قادره اكل)

جيجي:( لدرجه دي? طيب ارتاحي تعوضيها المره الجايه)

اميره:( طيب)

و تقفل التلفون و تتغطي و ترقد تنوم..

يارا جات داخله غرفتي و بتتكلم براها..

ضحكتا قلتا ليها:( مالك?)

يارا:( اميره جايبه مربيه ل عيالها..ماسكه العيال و هي نايمه في غرفتها)

قلتا ليها:( روقت والله.. مربيه عدييل.. شكلها مطوله)

يارا:( ماما قالت عندها مشكله مع راجلها)

قلتا ليها:( ااهاا عشان كده قعدت كتير كده.. هي م بتحكي.. غتيته شديد)

يارا:( اي)

قلتا ليها:( طيب هي جابت القروش دي كلها من وين?)

يارا:( م عارفه والله.. مؤجزه عربيه و تاني مربيه لعيالها و كل يوم غير الطلعه و الدخله و الحاجات البتجيبهم ل عيالها.. ده كلو من وين?)

قلتا ليها:( يمكن محمود برسل ليها? )

يارا:( م عارفه.. احتمال.. بس برسل ليها كل القروش دي?)

قلتا ليها:( م عارفه والله.. عمو مختار ليه م سالها?)

يارا:( بابا م قعد يركز ل الحاجات دي.. بس اصبري بكلم ماما تسالها)

قلتا ليها:( طيب)

يارا:( ي

لا ماشه انوم.. م ح تنومي?)

قلتا ليها:( لا مستنيه امجد يرجع من مراد)

يارا:( طيب.. يلا تصبحي علي خير)

قلتا ليها:( و انتي من اهلو)

طلعت مشت..

امجد قاعد مع مراد في الصاله.. في شقه مصطفي..

امجد:( ي مراد بطل ركوب راس)

مراد:( ياخ م ركوب راس بس انا م عايز ارجع.. م داير اسي.. لمن احس روحي داير ارجع برجع براي ذي م طلعتا براي)

امجد:( امي و ابوي رسلوني ليك قالو ليك تعال راجع كفايا قعاد برا البيت)

مراد:( امجد عليك الله خليني.. م راجع اسي م تصرف معاي عربي كتير)

امجد:( انت شوف شكلك عامل كيف.. بقيت ضعيف و رابي دقنك و شعرك و عيونك واقعه و حالتك كعبه.. ده شنو العاملو في روحك ده?)

مراد:( عاجباني روحي كده بس.. م ليكم دعوه ياخ)

امجد:( ي مراد ياخ انت بقيت زول كبير.. م تعاند كده.. سمي بالرحمن و ارح معاي البيت)

مراد:( بجي.. بس م اسي.. الايام الجايه)

امجد:( متاكد?)

مراد:( ااي متاكد)

امجد:( طيب)

و يقيق و مراد يقيف معاهو.. مراد يمسك جمبتو و يقول:( اههه)

امجد:( مالك?)

مراد:( ماف شي بس جمبتي مسكتني)

امجد:( من شنو?)

مراد:( ماف شي عادي اسي بتروح)

امجد:( طيب.. يلا)

امجد يتقدم علي الباب و مرد وراهو و لسه ماسك جمبتو..

امجد يفتح الباب و يقيف..

امجد:( علي وعدنا?)

مراد:( ان شاءالله)

مراد الالم كان باين عليهو و امجد يلاحظ ليهو..

امجد:( مراد انت متاكد انت كويس?)

مراد:( اتطمن ماف شي)

امجد:( طيب.. يلا سلام)

مراد:( سلام)

و يطلع و يقفل الباب.. يرجع يقعد و هو ماسك جمبتو و الالم باين علي وشو...

واقفه في الشباك مستنيه امجد يجي.. من شفتا عربيتو دخلت البيت جريت علي تحت... لاقيتو في الصاله.. امجد لمن شافني استغرب.. لمن قفل الباب عرفتا مراد م جا معاهو و كشرتا طوالي..

امجد:( انتي لسه مساهره?)

قلتا ليهو:( مراد ليه م جا?)

امجد:( قال بجي براهو الايام الجايه)

قلتا ليهو:( و اسي مالو?)

امجد:( م عارف رفض يجي.. م عارفو.. المهم بجي)

زعلتا شديد و ماسكه روحي عشان امجد م يركز لي ابتسمتا و قلتا ليهو:( طيب م مشكله..المهم في امل انو يجي راجع)

امجد:( ايوا...يلا ارح اطلعي نومي)

مشينا انا و هو علي السلم.. امجد طلع علي بيتهم و انا دخلتا غرفتي.. قعدتا زعلانه و دموعي نازله...

امجد رقد علي السرير و ماريا قعدت جمبو...

ماريا:( يعني م جا?)

امجد:( لا.. قال بجي براهو)

ماريا:( كويس)

امجد:( انا مستغرب علي ميناس.. مالا مع مراد? مصره يرجع.. و اسي لقيتها مساهره مستتياني ارجع.. لمن لقتني جيت براي وشها قلب ميه لون)

ماريا:( ميناس بتحب مراد)

امجد:( بالجد? هي قالت ليك كده?)

ماريا:( م حكت لي بس تصرفاتها ظاهره)

امجد:( معقوله لكن?)

ماريا:( البت في سن مراهقه.. و عادي تتعلق ب واحد فيكم)

امجد:( صح.. بس مصير حبها ده شنو? مراد م اظن يفكر فيها)

ماريا:( الموضوع م صعب.. مع الايام بتنساهو و تحب غيرو)

امجد:( ي ريت لانو مراد صعب.. بتعبها ساي و ميمي دي مسكينه والله)

ماريا:( صح)

يسكتو شويه...

ماريا:( ي امجد لمن كنتو صغار م حصل يوم حبيت ميمي او فكرتا فيها ك مرتك في المستقبل)

امجد يضحك ضحكه بسيطه..

امجد:( لا طبعا.. ابدا.. ميمي من صغيره م بفرقها من يارا هي و يارا عندي واااحد .. بحسها بس اختي.. عمري م فكرتا فيها غير كده.. عشان م عندها اخوان.. بقينا احنا ال 4 اخوان.. ماف حاجه اسمها دي امي و دي امك.. كلنا وااحد.. حتي لاحظتي بتقول ل امي.. ماما ليلي.. لانو هي ربتها ذينا وااحد)

ماريا تبتسم و تقول :( الرب يخليكم لبعض)

امجد:( اللهم آميين.. بوجودك ان شاءالله)

اميره لسه عيانه و راقده في السرير.. شويه تقوم تدخل الحمام تستفرق و شكلها تعبان شديييد.. تطلع من الحمام و تقيف جمب الباب و هي ماسكه بطنها..و تقول في نفسها:( اوعي اكون حامل?? سجمي)

تمشي تشيل قروش من شنطتها و تنزل الصاله.. تلاقي المربيه اسمها امنه قاعده مع عيالها ..

اميره:( امنه.. تعالي ارسلك)

تجيها امنه..

اميره بتتكلم معاها بصوت واطي:( عايني.. امشي الصيدليه جيبي لي جهاز كشف الحمل)

امنه تستغرب ..تقول ليها:( حاضر)

تشيل منها القروش و تطلع...

تقعد اميره مع عيالها تحضنهم عليها.. و هي خايفه شديد.

جينا داخلين انا و يارا من الجامعه.. لقينا اميره قاعده مع عيالها في الصاله..

سلمنا عليها و سالناها ( بقيتي كيف?)

اميره:( احسن الحمدلله)

تجي ام ايوب شايله صينيه شاي..

ام ايوب:( وين امنه?)

اميره:( انا رسلتها الصيدليه)

ام ايوب :( خلاص لمن ترجع بجيب ليها الشاي تاني )

يارا:( جيبيهو انا بشربو)

ام ايوب:(اكلي الاول)

يارا:( بشربو و باكل م مشكله اصلا)

ضحكتا علي يارا.. ام ايوب ادتها الشاي و مشت..

نتلاقي❤