الجزء 21

تدخل جمانه غرفتها في الاوتيل تلاقي نور مستنياها...

نور:( مشيتي وين ي جمانه قلقتيني عليك)

جمانه تقعد..

جمانه:( مشيت فضحتو قدام اهلو)

نور بخلعه :( كيف?)

جمانه:( كده.. مشيت ليهو قدام ناس امو و اخواتو و مرت اخوهو و حكيت ليهم بالشفتو و شاكلتو قدامهم و رميت ليهو الدبله في وشو)

نور:( لا حول ولا قوه الا بالله...ليه عملتي كده? ليه م سالتيني? اتصرفتي من راسك ليه?)

جمانه:( كده يدوب النار الجواي بردت و حسيت انتقمتا منو)

نور:( قدام اهلو و موضوع ذي ده صعب شديد عليهو)

جمانه:( يستاهل.. عشان امو تعرف ولدا شنو)

نور:( جد م كان تعملي كده.. دي نزوه و بتعدي)

جمانه:( يستاهل اكتر من كده... المهم انا حجزتا بكرا ماشه ل ناس امي.. محتاجه ابعد من هنا)

نور:( بس شغلك ي جمانه)

جمانه:( البنات م بقصرو و انتي امشي ليهم وقت و التاني...انا م قادره اقعد هنا.. حاسه نفسي مخنوقه.. جد مخنوقه)

نور:( لو السفر فيهو راحتك امشي)

جمانه:( ااي ان شاءالله)

قاعدين جمب مااما ليلي انا و يارا.. تلفون ماما ليلي يضرب.. يارا تشيل التلفون..

يارا:( دي خالتو ساميه)

ليلي:( خليها تجي.. قولي لي انا تعبانه)

يارا ترد..

يارا:(الو...ايوا ي خالتو)

ساميه:( كيف ي يارا? م مشيتي الجامعه الليله?)

يارا:( م مشينا.. ماما مصدعه شويه قعدنا معاها)

ساميه بخوف:( مالا ليلي?)

يارا:( ضغطها مرتفع و انا و ميمي قعدنا معاها)

ساميه:( ضغطها ارتفع من شنو?)

يارا:( مراد و جمانه اتشاكلو.. و جوطه كده)

ساميه:(متين بقو علي الشكل يدوب مخطوبين هم... دايره اجيكم.. بس هشام عندو تسمم و تعبان.. لحدي المسا لو بقي كويس بجيكم)

يارا:( سلامتو.. طيب ي خالتو)

ساميه:( الله يسلمك..خلو بالكم من ليلي بضرب ليكم تاني)

يارا:( حاضر)

ساميه:( يلا سلام)

و تقفل...

واقفه في المطبخ شفتا مراد شايل شنطه صغيره و طلع مشي.. كنت مخلوعه في مراد.. هو بحب جمانه و دايره.. بخونا ليه?.. و جمانه عرفت كيف!! و دي منو الكانت معاهو.. وحده بحبها برضو وله لا!! الف سؤال كان في راسي.. م عرفتا ليهم ااي اجابه..

مراد مشي لمصطفي.. بقي بدق في الباب.. و مصطفي نااايم... بعد مسافه صحي بالباب.. مشي فتح ليهو... مراد دخل زعلان و رمي شنطتو في الكرسي و قعد بدون م يقول ولا كلمه.... مصطفي اتخلع من شكل مراد و عيونو كانت حمرا و في جرح في يدو فيهو دم..

مصطفي جا قعد قصاد مراد..

مصطفي:( حصل شنو?)

مراد:( الحقيره.. والله م حاسيبها ولازم اعرف وراها منو? و منو الرسلا لي)

مصطفي:( بعرف ليك عنها ااي شي.. اصبر بس)

مراد يقيف و يبقي ماشي و جاي في الصاله..

مراد:( لازم اعرف ولازم انتقم منها)

مصطفي:( والله حالقاها ليك و حتاخد حقك منها... بس قول لي جمانه م لميت فيها)

مراد يكورك:( اهههه من جمانه و العملتو جمانه)

مصطفي:( عملت شنو?)

مراد:( جات البيت و قالت لي قدام امي و اخواتي و مرت اخوي انها لقتني نايم مع وحده و رمت لي الدبله)

مصطفي يتخلع:( قالت كده??)

مراد:( م عارف ااودي وشي من امي و اخواتي وين? الله يلعن جمانه و الغباء حقها...كده هي انتقمت مني بالجد? اسي انا تاني اعاين في وش امي وله وش اخواتي كيف? وله مرت امجد كيف.. كيف بس?? )

مصطفي:( اهدي ي مراد)

مراد ( كده انا سقطا من نظرهم.. انا طول عمري بعمل ااي شي بس بعيد منهم.. م بعرفو شي.. بس دي اسي ورتهم ااي شي.. الله يلعنك ي جمانه.. الله يلعنك)

مصطفي م قدر يهدي مراد... مراد جاب شراب و سيجاير و بقي بشرب ورا بعض..

جا عمو مختار.. دخل الاوضه ل ماما ليلي..

مختار:( يارا و ميمي اقعدو برا)

طلعنا انا و ميمي..

مختار قعد في الكرسي جمب ماما ليلي.. كانت لسه زعلانه و ابت تاكل و مصدعه و رابطه راسها...

مختار:( ليلي م تزعلي روحك قدر ده.. خلي هو ولد و يتحمل نتائج غلطو.. م ترفعي ضغطك سااي.. هو الكان داير جمانه و قال نمشي نخطبا ليهو و مشينا معاهو.. م قصرنا معاهو..و في ثواني طفشا بسبب تصرفاتو الغلط.. بقي راجل كبير و لسه بتصرف غلط و م بتعظ.. بطريقتو.. اصلو م بتكلم معاهو ولا بسالو و اقول ليهو الحصل شنو وله ليه عملتا كده ..اصلو م بهمني.. انا البهمني انتي اسي.. قومي كده اكلي عشان تبقي كويسه)

ليلي بتبكي:( مراد.. مراد م بعقل...الولد ده حيقتلني)

مختار:( مش راجل خلي يتحمل نتيجه تصرفاتو الغلط م تزعلي روحك لا ااي شي)

ليلي:( ده ولدي ي مختار..ولدي... و جمانه بت كويسه.. يعمل ككده و تجي تفضحو كده قدامنا و قدام البنات)

مختار:( هي لو كويسه م كانت جات اتكلمت كده قدامكم.. هي ذاتها ذيو.. كان علي الاقل تحترمك.. و تتصرف مع مراد براها بعيد منكم...م تجي تتكلم كده قدامك و قدام البنات)

مختار اتكلم كتير مع ليلي و اقنعا تاكل.. جبنا ليها الاكل و اكلت شويه.. بس الزعل م مشي.. و دموعا م وقفت...

قاعدين امجد و ماربا في شقتهم..

ماريا حكت لامجد بالحصل بين جمانه و مراد.. امجد زعل شديد..

امجد:( اصلا مراد تصرفاتو كلها غلط.. اصلو م بعمل حاجه بعقل.. اس

ي هو خطب جمانه و بحبها...ماشي لوحده تانيه ليه?)

ماريا:(مراد لسه طائش.. م وعي م حسي بالمسئوليه)

امجد:( بقي زول كبير و شغال و خاطب داير يعرس.. شنو حركات المراهقين دي)

ماريا:( بس حركه جمانه م عجبتني.. دي فيها عدم احترام ل ماما ليلي و لينا كلنا.. كيف تجي تقيف قدامنا كلنا و تقول الكلام ده.. دي فضحتو)

امجد:( هي اصلا دايره تفضحو بينا عشان كده جات و قالت كده.. ده اسمو انتقام منها ... انتقمت منو بالفضيحه دي)

ماريا:( كنت قايلاها اعقل من كده)

امجد:( هي في حاله زعل شديد و م قدرت تتحكم في روحها)

ماريا:( صح و الشيطان شاطر)

امجد:( صح.. استغفر الله العظيم ي رب... ماشي اصلي العشاء.. )

يقوم..

راقده في غرفتي و ببكي.. زعلانه شديد.. زعلانه من كل شي حصل...من مراد...و العملو..و جمانه و العملتو... و رد فعل مراد...و ساب البيت و مشي.. و حبي ليهو.. و فسخ الخطوبه.. الف شي كان جواي و كلهم مزعليني...

مراد قاعد يشرب ورا بعض من الصباح لمن بقي م واعي و بتكلم ورا بعض يحكي ب جمانه و جيجي و الحصل.. مصطفي حاول يشيل منو الشراب بس هو رفض.. و بقي بكورك..و مصر يشرب.. مصطفي خلاهو و بقي بعاين ليهو ساااي..

اميره مساهره في الفيلا مع الباشا.. هي و جيجي و معاهم كم وحده تانيه.. شراب و اغاني ...

اميره كانت مبسوطه شديد بالحصل و حست انها خلاص انتقمت من مراد..

قاعده امي جمب ليلي..

ساميه:( لا حول ولا قوه الا بالله.. العيال ديل جنو وله شنو?)

ليلي:( شفتي مراد.. شفتي عمايلو)

ساميه:(مراد م داير يعقل? كيف يعمل كده? و جمانه عرفت كيف?)

ليلي:( م عارفه.. بس جات الصباح و قالت كلامها ده و جدعت الدبله و مشت)

ساميه:( اسي مراد وين?)

ليلي:( من امبارح مافيش.. اصلا م عندو عين يقعد معانا)

ساميه:( عين و اصابتهم والله)

ليلي:( ده اسمو غباء منو.. راجل كبير دي شنو التصرفات دي?)

ساميه:( ربنا يهديهو ي رب)

ليلي:( آمين ي رب.. عليك الله ادعي ليهو ي ساميه)

ساميه:( ربنا يهديهو و يصلح حالو)

مرا اسبوع اسبوعين.. و مراد م جا...كل م اصحي الصباح بدعي مراد يكون جا و بقوم اقيف في الشباك اعاين علي الباركن.. اتمني القي عربيه مراد واقفه...بس م بلقاها.. نفسياتي كانت كعبه.. و محبطه شديد.. نفسي الاقي مراد و اتطمن عليهو.. بس كيف... البيت كلو كان زعلان منو و ماف زول فيهم ضرب ليهو وله افتقدو.. بس انا م قدرتا.. جد مقلقه عليهو و نفسي اتطمن عليهو...

مشيت دخلتا غرفتو لقيت ام ايوب نضفتها و لمت الزجاج.. قفلتا الباب و مشيت علي دولابو..شلتا قميص حقو.. شميت ريحتو فيهو بس كانت بسيطه..مشيت علي الكومدينا.. لقيت العطور حقتو قاعده.. بقيت بشم فيها وااحده واحده...لمن لقيت العطر البتريح بيهو طوالي.. رشيتو علي القميص.. و قعدتا في طرف السرير و بقيت بشم في القميص.. و دموعي بللو القميص...قعدتا تقريبا ساعه في غرفتو.. سمعتا صوت يارا بتكورك لي.. قمتا ختيت القميص مكانو و طلعتا ليها.. لقيتها واقفه في الممر و شافتني طلعتا من غرفه مراد...

يارا باستغراب:( بتعملي شنو جوه هنا?)

قلتا ليها:( ساي كنت بتاكد انو ام ايوب نضفت الغرفه عشان احتمال مراد يجي في ااي وقت)

يارا:( زماان نضفتها.. تعالي نقعد تحت.. ماما عملت الشاي)

قلتا ليها:( طيب) و نزلنا مع بعض..

يارا كانت حاسه بالزعل الجواي بس م حاولت تتكلم معاي.. بس بتقيف جمبي و تونسني و تحاول تخفف علي..

يوم صحيت من الصباح متضايقه شديد و بس دايره الاقي مراد.. م عرفتا كيف.. خلصتا محاضراتي سرعه.. و مشيت ل يارا.. لقيتها قاعده مع صحباتها اشرتا ليها.. جاتني..

يارا:( خلصتي محاضرات?)

قلتا ليها:( ااي..و انتي?)

يارا:( لسه عندي محاضره تاني)

قلتا ليها:( خلاص انا ماشه مشوار و بجيك طيب?)

يارا:( ماشه وين?)

قلتا ليها:( قريب هنا)

جا من هناك اسعد.. جا وقف جمبنا...

اسعد:( السلام عليكم)

انا و يارا:( و عليكم السلام)

اسعد:( كيفكم الليله?)

قلتا ليهو:( تمام)

يارا:( ميناس خلصت.. بس انا لسه)

قلتا ليهم:( حامشي و اجي ..يلا عن اذنكم)

اسعد:( شنو يعني انا جيت و انتي ماشه?)

قلتا ليهو:( لا والله ماشه مشوار و جايه راجعه ل يارا.. بكرا بنفطر مع بعض)

اسعد:( اوكي ان شا۽الله.. اخدي راحتك)

يارا:( م تااخري)

قلتا ليها:( حاضر.. يلا باي)

و طلعتا...

نتلاقي❤