الجزء 31

مراد جا راجع البيت زعلان.. م داير يتكلم مع اي زول بس قافل باب غرفتو عليهو...كنت دايره اسالو بالجد لو كان عندو حاجه مع اميره بس لمن شفتا حالتو كده سكتا خليتو...

اميره سقطت الولد الفي بطنها.. و قعدت في المستشفي يومين و طلعت رجعت السجن...

امجد وكل محامي ليهم.. هي و جيجي...

عمو مختار رافض ااي كلمه عن اميره و الحاصل ليها.. السكر حقو ارتفع... رقد كم يوم في البيت تعبان حتي شويه شويه بقي كويس و بقي بمشي الشغل..

طبعا محمود رسل ليها ورقه طلاقها...قبل م يسوق العيال و يرجع الامارات...

وليد الباشا سمع اخبار اميره و جيجي و رسلو ليهو كم مره انو يجي يطلعهم بس رفض..

مرت الايام و شويه شويه الكلام عن اميره قلا... عمو مختار و ماما ليلي و كلهم م عرفو ب خبر حمل اميره... امجد بس الكان عارف... و م كلم ااي زول بيهو...

لمن القلق فااض بي بسبب علاقه مراد و اميره.. و لو سالتا مراد حينكر..قررتا امشي ليها زياره .. كان القاضي حكم عليهم ب 5 سنه..

يوم الجلسه حقت الحكم مشينا انا و يارا و امجد و ماما ليلي و مختار... لمن القاضي قال الحكم.. اميره وقعت من طولها.. و جيجي كانت بتبكي شديد و قعدت في الارض.. احنا زعلنا شديد و بكينا عليهم...مهما عملت م هانت علينا...

عمو مختار حاول يستانف الحكم و ينقص مده العقوبه بس م لقي ااي طريقه.. كلنا زعلنا عليها شديد..

انا مشيت ليها بعد اسبوع من اصدار الحكم...

قعدتا مستنياها.. جاتني.. قعدت و مكشره وشها حتي سلام م سلمتو لي...

اميره بتريقه:( اخيرا جيتي? كنت مستنيه زيارتك دي من بدري... اتاخرتي شديد)

طريقه كلامها كانت بايخه شديد معاي... ذي الما بتعرفني ...ذي الما كنا قاعدين في بيت واحد و اكلنا و شربنا مع بعض...و بتعاين لي من فوق ل تحت..

قلتا ليها:( اهو جيت... احكي للي)

اميره:( علاقتي انا و مراد?)

قلتا ليها:( طبعا)

مع اني كنت عامله نفسي م خايفه.. بس من جواي برجف من الخوف و من الكلام الممكن تقولو هي..

اميره:( مراد بحبني.. و انا جيت عشان خاطرو السودان.. و بينا علاقه.. و بمشي ليهو كل يوم بليل غرفتو بعد انتو تنومو..و كنا حنعرس.. بس هو فجاه غير رايو و مشي خطب جمانه... و فضحتو قدام جمانه)

اتخلعتا قلتا ليها:( انتي العملتي كده?)

اميره:( ايوا..و ااي بت تقرب من مراد انا حانتهي منها حتي لو وصل اني اقتلها)

قلتا ليها:( انتي م طبيعيه..ليه بتعملي كده?)

اميره:( اصلا م طبيعيه)

و بقت تضحك...

سكتا بقيت بعاين ليها ساااي..

اميره:( مراد م حبي غيري و لا حيحب غيري)

قلتا ليها:( انتي مجنونه)

اميره:( م طبيعيه و مجنونه و ااي شي...اها و بعد داك? دايره مراد يحبك? مراد م حيحبك.. م تتعبي روحك.. تقعي و تزعلي و تعملي حركاتك دي عشان تلفتي نظرو م تتعبي ساي.. انسي مراد و شوفي غيرو)

قلتا ليها:( م حانساهو...مراد حيحبني انا... انتي انتهيتي بالنسبه ليهو...كفايا الفضايح العرفها عنك...و موضوع حملك لسه م عرفو.. لو عرفي حيبقي موضوع تاني)

اميره بخلعه:( انتي شنو العرفك بحملي? امجد كلمكم?)

قلتا ليها:( لا.. انا عارفه.. شفتو في جهاز فحص الحمل الرسلتي ليهو امنه و فحصتي و رميتيهو في السله لمن انا جيتك عشان اشيل منك الفستان)

اميره اتخلعت شديد.. قربت علي مسكتني من كتفي..

اميره:( انتي بتتجسسي علي? وحده حقيره ذيك تتجسس علي?)

فكيت يدها مني..

قلتا ليها:( ماف زول حقير غيرك هنا...و مراد م حاخليهو و حنجي االاتنين نعزمك لعرسنا)

اميره رفعت يدها ادتني كف..

اتخلعتا شديد..و عاينتا ليها في عيونها مسااافه...

قلتا ليها بزعل و دموعي نازله:( م بوسخ يديني فيك..بس بتردا ليك الكف ده الف واحد ذيو... بتشوفي ميناس عبدالرحمن حتعمل شنو)

و طلعتا مشيت خليتها بتكورك وراي و بتتوعد م حتخليني...

مشيت ركبتا عربيتي و بقيت ببكي... زعلتا من اميره شديد.. كيف تتجرا تتكلم معاي كده و كمان تمد يدها علي... مشيت البيت و انا زعلانه... نزلتا من العربيه داخله.. لاقيت مراد داخل قدامي...م حاولتا ادس زعلي لاني كنت لازم احكي ليهو بالحصل كلو...

مراد وقف عاين لي بخوف:( مالك? كنتي بتبكي?)

قلتا ليهو:( ااي)

مراد :( حصل شنو?)

قلتا ليهو:( م مهم)

دايره امشي مسكني من يدي..

مراد:( تعالي)

و دخلنا طوالي علي الصالون و قفل الباب..

مراد:( احكي حصل شنو? ده شنو الفي وشك ده)

مدت يدو داير يلمس محل كف اميره.. زحيت ليهو يدو.. قلتا ليهو:( م بتعرف اثر الكف?)

مراد اتخلع شديد..

مراد:( ده منو الاداك كف?)

قلتا ليهو:( حبيبتك)

مراد باستغراب:( قصدك منو?)

قلتا ليهو:( عندك كم حبيبه?)

مراد:( مشيتي ل اميره?? ??)

قلتا ليهو:( الحمدلله عرفتها براك....اهو براك اعترفتا انها بالجد حبيبتك)

مراد بزعل:( شنو الوداك ليها?? )

قلتا ليهو ( سالتها من علاقتكم)

مراد قام زعلان و ختا يدينو في راسو..

قلتا ليهو:( مستنيها تطلع من السجن عشان تعرسو? الولد الكانت حامل بيهو ولدك صح?)

مراد:( انتي مجنونه? م عندي معاها شي..و ولد

شنو ده كمان? )

قلتا ليهو و انا بكورك:( م تكذب علي..اميره كانت حامل و سقطت)

مراد:( ميمي...م عندي معاها شي.. كان زمان و انتهي بس م حامل مني ولا شي)

قلتا ليهو:( لا كذاب.. اميره م كذبت.. في علاقه بينكم)

مراد:( ميناس.. م تعصبيني...براي تعبان... موضوع اميره ده م تفتحيهو تاني ..فاهمه?)

قلتا ليهو:( حاضر م حافتحو)

مراد زعل شديد من اني مشيت ل اميره.. و جيت طالعه زعلانه من الصالون..جا جاري لحقني مسكني من يدي...

مراد:( تعالي.. دقيقه)

دخلتا تاني قعدني في الكرسي و قعد قدامي علي رجلينو و دموعو في عيونو..

مراد:( ميمي...انا م بكذب عليك...م بعرف اصلا.. و م داير... عشان كده انتي الوحيده الحاعترف ليها ب علاقتي مع اميره)

انا قلبي خلاص وجعني..

مراد:( ااي صح.. كان في علاقه بينا...اول من جات السودان.. هي و في االامارات كنا بنتكلم شويه و هي قالت بتحبني و حتجي عشاني.. انا زمان كنت بحبها.. بس تاني موضوعها نسيتو.. و هي كانت عارفه كده... فجاه بقت ترسل لي و تتكلم معاي و انا بتكلم و كده.. قالت بتحبني المهم فعلا جات هنا و بقي في بينا حاجه.. هي و جمانه كانو في وقت واحد.. م عارف كنت بحب منو فيهم.. لمن الاقيها بحس روحي بحبها.. و م بحب جمانه... و العكس.. شويه شويه حسيت اني م دايرها و تصرفاتها معاي غريبه و قررتا اخطب جمانه.. اتشاكلت معاي و هددتني.. زعلتا منها شديد و حسيت اني بكرهها.. تاني جات اعتزرت و قالت احنا اولاد عم و دم و لحم ...و سامحتها...و تاني جا موضوع جمانه و كده.. م حسيت ااي احساس انو ممكن تكون دي هي و لا شك 1% انها دي هي العملت كده.. الا لمن شفتها مع جيجي)

قلتا ليهو:( جيجي منو?)

مراد:( البت اللقتني معاها جمانه...دي صحبت اميره و رسلتا لي و رسلت جمانه عشان تلقاني معاها.. بس الباقي عارفاهو... بس بليس.. داير الموضوع ده بكون بيني و بينك م داير ااي زول يعرف)

هزيت راسي ب طيب..

مراد:( ده كلو عشان تعرفي قدرك عندي و اني م داير اكذب عليك... و حقك حاخدو ليك منها ذي م دايراهو انتي)

قلتا ليهو:( م تعمل شي.. م عايزه انتقم منها...انا قلبي م اسود ذيها و كفايا الهي فيهو)

مراد ابتسم لي:( قلبك ابيض و كبير...ده البحبو فيك.. يلا قومي امشي غسلي وشك و تعالي نتغدا انا جيعان)

ابتسمتا و قلتا ليهو:( طيب)

و قمتا طلعتا و انا حاسه اني مرتاحه...مع انو الكلام القالو مراد م بريح بس كفايا عندي انو م كذب علي و قال لي الحقيقه.. معناها عندي مكانه عندو...

مراد كان بمشي الغسيل و بمشي معاهو.. علاقتنا بقي فيها حاجه كده م مفهومه.. بس اتعلقنا ببعض شديد و هو كمان.. بقي بضرب لي اتطمن علي و انا في الجامعه.. و لازم نرجع للغدا و نتغدا كلنا مع بعض في البيت..

يوم صحيت بصوت التلفون.. لقيتو دكتور علي.. عاينتا لساعه لقيتها 9 صباحا... قلقتا و رديت...

علي:( ميناس.. صباح الخير)

قلتا ليهو:( صباح النور ي دكتور)

علي:( م اكون صحيت بس?)

قلتا ليهو:( لا م مشكله.. بس اصلا بصحي انا للجامعه اسي)

علي:( عندي ليك خبر حلو شدييد.. م قدرتا استني للبعدين)

قلتا ليهو:( قول)

علي:( لقينا كليه ل مراد)

انا فرحتا شديييد...

بقيت بقول:( بالجد? بالجد? و متطابقه ليهو/?)

علي:( ايوا...و اسي كلمتا مراد.. و في ظرف يومين بنقدر نعمل ليهو العمليه)

انا جد فرحتا شدييد و شكرتا دكتور علي ...و قفلتا و نزلتا تحت بكورك ل امي و ماما ليلي...

بقول ليهم:( لقينا كليه لمراد... علي لقي كليه ل مراد)

امي و ماما ليلي بقو يزغرتو و فرحو شديد...

مراد كان في الشغل.. ضربنا ليهو باركنا ليهو..

تاني يوم مشينا انا و مراد و امجد المستشفي يعمل الاجراءات حقت العمليه...انا كنت خايفه و مراد كمان بس دكتور علي كان ظريف معانا شديد بهظر و يضحك طلعنا من جو التوتر و الخوف...

يوم صابح العمليه.. كنا كلنا مع مراد في المستشفي.. شويه شويه ماما ليلي و امي و عمو مختار مشو... خلونا انا و يارا و امجد... جا دكتور علي قعد معانا...

علي:( اها الخوف قلا شويه ي مراد?)

مراد:( ااي احسن)

علي:( الحمدلله...م تخاف الموضوع بسيط شديد)

مراد:( نسبه نجاحها كم?)

علي:( بتنجح بس مرات الجسم م بستجيب للكليه.. و اغلب الحالات بستجيب)

مراد:( عادي ممكن جسمي يرفض الكليه?)

علي:( في احتمال...بس احنا املنا في ربنا كبير و ان شاءالله بتنجح.. بس خلي ديل يدعو ليك)

امجد:( اكيد طبعا م محتاج توصيه)

علي:( متاكد انا...بالذات ناس كده.. حاختمو القران الف مره عشان اخوهم)

و ضحك...بقينا نضحك..

قلتا ليهو:( علي.. م تهظر معاي)

علي ضحك...

علي:( غايتو ي مراد انا لو عندي اخت بتخاف علي كده م بكون داير ااي شي من الدنيا تاني)

كشرتا ليهو:( علي..قصدي دكتور علي.. خليك رسمي معاي لو سمحتا)

علي بقي بضحك و انا ضحكتا برضو..

نتلاقي❤