الفصل السادس

بعدها م ابديت اي ردة فعل إستسلمته ليهو لاني سلفا مقررة كدة وعارفه دة الحيحصل ف م رفضته الحاجه دي ابدا ولا حاولته ابعدو، الصباح صحيت لقيتو مافي جمبي، وكنت م قادرة احرك طرف من اطرافي بقيت ابكي، فجأهه جا داخل، قال لي صباح الخير، لفيت منو وشي وسكتتهه، جا قعد جمبي قال السمحهه، سكتت، جا بإتجاه وشي وقعد جمبي قال لي اقول ليك قدر شنو انا مبسوط؟ باسني في خدي مسااافهه بعدها قال لي عشان الجو بارد شديد هنا انا دفيت ليك مويه بالحطب في حمام لكن معمول بالقصب وكاشف بجيب ليك الطششت هنا ومويه الحمام كويس معاك؟خليك جاي اسي،

مشى جاب الطشت وجردل الحمام ختاهم لي جمب السرير قال لي انا طالع لو إحتجتي شي كوركي لي طيب؟قبل م يطلع باسني في راسي وطلع، قدر م حاولته اقوم وانزل من السرير م قدرت فبقيت قاعدة وببكي ولافه نفسي بالملايه، بعد نص ساعه كدة جا راجع لقاني في محلي قال لي م استحميتي؟قولته ليهو ودموعي جاريه م قدرتهه انزل

بقى واقف ومتردد، جا قال لي طيب خليني اساعدكك نزلني في الطشت كنت ماسكه في الملايه شديد قال لي خليها فكاها مني وبقى يحمي فيني"متخيلين معي انو هو بحميني؟"بعد م خلص لفاني بالملايه زي الطفله واداني الفرشه والمعجون وإنتظرني خلصتهه، بعدها رقدني في السرير وشال المويه طلعها برة وجاب النار جمب سريري وفتح شنطتي طلع منها جلباب جا لبسني ليهو وغطاني، قال لي الفطور جاهز، قولته ليهو م دايرة انا، قال لي والله ي زوله انا م بعرف احنس لي زول على بطنو لكني عشاني انا قومي اكلي حرررم م باكل لو م قومتي اكلتي معي، قولته ليهو الكلمه دي بطلها، قال لي خلاص بتقرع منها اها اجيب الصينيه ناكل؟هزيت ليهو راسي بمعنى ايوة، جاب الصينيه ختاها فوق السرير كان فيها شيه وشوربه وقراصه بالدمعه وبطاطس وشعيريه، ومكرونه باللحمه وملاح ام رقيقه بكسرة قولته ليهو عملتهم انت؟ضحكك قال لي انا شنو ي زوله جابهم اسامه الصباح بدري، قلته ليهو اها، قال لي يلا سمي، بديت اكل، وهو بياكل قال لي ي الله الحاجه م ناسيه انو انا بحب ملاح ام رقيقه بالكسرة، لاحظ لي اكلي بطيئ، بقى ياكل ويأكلني معاه لغااايه م قلته ليهو انا شبعت اكتر من كدة م بقدر، قال لي طيب انا كمان شبعت بس كنت باكل عشانك، طلع جا راججع قال لي يديك نضيفه لكن هاك المناديل ديل، ضحكت، قال لي مالك؟اي نعم نحن ناس خلا ساي ومربين غنم لكن بنعرف المناديل دي والله لفيت دكاكين الحلهه كلها حتى في الأخير لقيتها

ضحكتهه تاني جاب لي كوز قال لي إشربي، شلتو شربته قولته ليهو عصيير، قال لي عارف لو اديتك في الكبايه م حتشربي عشان كدة جبته ليك بالكوز، قولته ليهو بس انا م عايزة م بدورو، قال لي اشربي بسيط منو ياخي بطلي دلع، قولته ليهو لكن دة م دلع، قال لي اي تصرف بطلع منك مريود ومقبول حتى لو م دلع اها

سكتته وبقيت اشرب، بعدها قال لي تشربي شاي او قهوة؟قولته ليهو لا، جا قعد جمبي ومسك يدي وسكت مسااافهه بعدها قال م داير احس إني مقصر منك في حاجه والله ي شهد، داير اعيشك اي لحظه حسيت إنك تستاهليها لو كان بي يدي كان سافرنا الخرطوم وحجزته ليك في افخم غرفه وقضينا ايامنا وجينا بسس...بعدها سكت، قولته ليها م مشكله اسي هنا انت م قصرته، قال لي حاسه نفسكك مبسوطهه معي؟سكتته م رديت عليهو، قال لي سؤالي جادي انا، قولته ليهو كلها ساعات بس عديناها سوا، قال لي في الساعات دي حسيتي إني زولا م كويس عشان انا داير اعدي معاك العمر كلو بنفس النمط واحسن كمان لو شايفههةفيني شيتا م بتدوريهو كلميني، هزيت ليهو راسي بمعنى لأ

عاين لي يدو مسافه بعدها قال لي عارفه م كنت داير اتحنن لكن قلت ارضي على امي، قولته ليهو ليييه م داير تتحنن وم عملته هيصه زي م بتعملو في اعراس اخوانكم؟قال لي دايراني افرح على وجعك انتي ووجع ناس بيتكم؟

سكتني بكلامو دة بقيت اعاين ليهو صراحه تصرفاتو كلها بتبهرني،

قال لي شهد ممكن اسألك سؤال هو سؤال يمكن تشوفيهو عوير شويه بس م مجبورة تجاوبيهو انتي.

قولته ليهو اها؟

قال لي انتي إتزوجتي وقعدتي مع راجلك الأول زيكم زي اي إتنين متزوجين صح؟بقيت اعاين ليهو

لما شافني إتوترته قال لي خلاص انسي

قولته ليهو كمل في شنوو؟

قال لي انا بس قصدي إنو، ا، إنو

قولته ليهو م قرب مني وم هبشني،

قال لي اي دة قصدي

قولته ليهو فعليا هو م قرب مني لأسباب خاصه بيهو،

قال لي وعشتي معاهو الفترة دي كلها في بيت واحد ساي؟

قلته ليهو م كان بيت كان جحيم،

رقدني في حضنو وقال لي م تفتكري انو هنا حيبقى ليك زي م كان هناك ابدااا ي شهد انا ببساطتي دي الله يقدرني واسعدكك، رقدته في حضنو وانا سرحانه لغايه م نمنا في بعض صحينا بعد صلاة العصر، قال لي بتقدري تنزلي؟قولته ليهو لا، شالني وطلعني برة وانا بقول ليهو حترميني، قال لي شوفي المنظر دة كيف، بصراحه انا اتصدمته المنظر كان يفتح النفس، شكل الزراعه اخداااار والحته كلها بنفس الهيئه والجو مغمم، قولته ليهو دة مشروعكم؟قال لي اي ودة بيت الزول البحرس الزراعه قلته ليهو انا عريس داير احرسو انا وهي

قولته ليهو الله بجد شكل الزراعه تفتح النفس، قال لي لو بتقدري تمشي كان مشينا بس م مشكله كم يوم ونمشي، سكتت، قال لي نرجع ولا نقيف شويه؟قولته ليهو خلي نقعد في العنقريب التحت الشجرة دااك، قال لي يلا مشينا قعدنا قال لي خليك قاعدة هنا مسافه زريبه البقر من هنا م بعيدة ربع ساعه وبجي ماشي اجيب لبن وجاي، قلته ليهو طيب، طلع مشى وانا بعدو دخلت الحمام ورمشيت خطوة خطوة لغايه م ولعته النار في الكانون وشلته جمر منها وعملته البخور في البيت وفضلته قاعدة وانا بقارن بين اول يوم مع عباس، واول يوم مع سعد، وبين تعامل عباس وتعامل سعد، ساعات بس بقيت مطمنهه وانا معاهو بس م حبيت افرح واحس انو دة إنتصار ونقطه تنضاف لي في حياتي لأنو كل حاجه بحس معاها الإحساس دة بتتلاشى حرفيا وفعلياا

جا راجع بعد نص ساعه قال لي إتأخرته مش؟قولته ليهو لا، قال لي لقيتو مافي واللبن م جاهز حلبته البقرة برااي دقيقه اختو في النار،

السمحهه انتي الولعتي النار؟

قولته ليهو ايوة انا

قال لي ي سلااام ياااخ ختاهو في النار قال بستحمى وبجي راجع دقايق بس، شال مويتو استحمى جا طالع قال لي جعانه ناكل؟قولته ليهو انا م جعانه، قال لي ولا انا، وقفته على حيلي قولته ليهو طيب انا داخله البيت جوة، اول م بديت اخطي جا شالني قال لي معقوله ي مرتي السمحهه انا قاعد اخليك تمشي براك كدة اصلا م كنتي تتحركي الحجات دي انا بجي بعملها،

سكتته، دخلنا الغرفه ريحه البخور كانت طاقهه

قال لي ي سلاااام ياااخ اسي الواحد م عارف ينزلك ولا يفضل شايلك كدة في الريحه السمحهه دي، بقيت اعاين ليهو وإبتسمتهه، قال لي اتبسمي إتبسمي يلا على السرير قولته ليهو لا بقيت اقالع فيهو، قال لي قصدي حنزلك في السرير هوي ي ام مخ بمشي بعيد انتي نزلني في السرير وبقى يتمقى قال لي عملتي لي شد عضلي صغيرة وتقيلهه كيف م تعرف

قعدته اضحكك مسااافهه قعد جمبي قال لي حرررم كان اخليك توقفيها الضحكهه دي وباسني في خدودي، قولته ليهو اللبن بكون فار، قال لي خليهو الليحرق ياخ، قولته ليهو خلاص امشي وتعال انا قاعدة م ماشه مكان، قال لي طيب مشى وجا راجع وبعدها حصل زي م حصل امبارح وبعدها عدينا اسبوعين في المكان دة، م فكرنا نرجع الا بعد م جات امو لقتنا قاعدين وانا كنت بغسل في ملابسنا، سلمت علينا وقعدت اتونست معانا كدا، قالت لينا راجعين بكرة ولا متين؟نحن اساسا م كان في نيتنا نرجع، سعد خجل م قدر يرد عليها، انا قلته ليها إن شاءالله، لما قلته ليها كدة قام عاين لي بي تحميرة كدة، قالت لينا خلاص بكرة في إنتظاركم بتجو الساعه كم الصباح ولا المساء؟سعد قال ليها م معروف، قالت ليهو سمح ي ولدي وقت م جيتو تعالو نحن في إنتظاركم ودعتنا وطلعت، بعد طلعت قال لي بي نهرة مش نحن متفقين نقعد فترة هنا ليييه قولتي ليييها بكرة؟قولته ليهو وانت ليييه م قولته ليها الكلام دة لما سألتك؟وليييه بتكورك فيني انا ذنبي شنو امك سألت نطنشها يعني؟قال لي لو سكتي انا كان ممكن اجاوبها واتصرف،

قولته ليهو سمح معليش لاني إتحشرته بينك وبين امك كدة تمام؟قام طلع وانا شلته الملابس شريتها وزعلته زعل من الغضب لقيت نفسي ببكي، جا لقاني قاعدة وبهز في رجلي ومنزله راسي في الأرض، قعد جمبي قال لي انا زعلته لانو كنت داير انا وانتي نقضي اطول فترة ممكنه بعيدين من الناس لاني عارف لما نمشي هناك م بخلونا على راحتنا تاني، لاني شايف الحاجه دي في نسوان اخواني، فهمتي ي حبيبتي السمحهه؟لما م رديت عليهو رفع لي راسي لقى دموعي جاريه قال لي انتي زعلتي حد م بكيتي؟شهد.انتي عارفه انو م بهون علي زعلك ولا دموعك معليش خلاص اعفي لي وبقى يمسح لي في دموعي، قولته ليهو انا ذنبي شنو لمن تكورك فيني؟قال لي م عندك ذنب خلاص امسحي دموعك ها العويرة دي، قولته ليهو انا كمان م نفسي ارجع المكان حلو وهادي واي شي بس نعمل شنوو مصيرنا نرجع م حيخلونا انت عارف!!!قال لي عارف خلاص م تبكي ضماني عليهو قال لي انا لو علي نسكن هنا وماف شي يعكر مزاجنا الا نخلق مشاكل لبعض زي الاسي دي، قولته ليهو ودي الخلقها منو؟ قال لي انتي بدموعك السمحهه دي، قولته ليهو انااااا؟ضحكك قال لي خلاص خلقناها نحن الاتنين، قولته ليهو لا انت بس، قال لي لا نحن، قلته ليهو انت بسسس قلنا

قال لي خلاص المهم المشكله حصلت وإن شاءالله م تنعاد، قولته ليها طيب اها بكره نرجع متين؟سكت مسااافهه بعدها قال لي كدي لمن بااكر يجي، اليوم دة عديناهو ونسه وضحكك هو كان بحكي لي مواقف حصلت معاهو زمان وانا كل م يحكي اقعد اضحكك،

بعد فترة طوييييلهه اول مرهه أحس بالراحه النفسيهه، الإطمئنان، سماحه الدنيا، هم اسبوعين بس عشتها معاهو بس حسسسني كانو بعوضني على كل يوم كئيب عدة علي بحنيتو، وطريقه معاملتو لي

اليوم التاني صحيت بدري لقيتو هو طلع اظنو مشى مع العمال، ولعته النار ختيت الشاي وشلته الملابس من المشر وقعدته اطبق فيهم بعد م خلصتهه شلته المكشاشه وكنسته الحوش زييين وجهزته الشنط، شويه كدة جا داخل شايل كيس خدار، قلته ليهو مشيت وين انت؟قال لي مشيت سوق الحله جبته خدار وجيت، قلته ليهو خدار لشنو مش نحن راجعين اسي؟قال لي مستعجلهه للرجعهه كدة مالك انتي؟

سكتته بقيت اعاين ليهو، قرب مني ومسكني من وشي قال لي مش نحن عرسان؟يلا من حقنا ناخد راحتنا مش؟

قلته ليهو واهلك واهلي م بسألو،

قال لي اهلنا ديل انسيك منهم، الليله ارح اوديك محل م بنسرح بالغنم بعيد لكن موشديد بتمشي بالرجول رايك شنو؟

قولته ليهو ارح طوالي،

قال لي م اسي بعدين العصر اسي انا داير لي جبنه بي رواق كدة اعمليها لي ي السمحهه

المشكله انو كلمه ي السمحه دي بقولها حلوة خلاص ه

جبته العنقريب فرشتو وجبته كانون القهوة وجهزته حجاتها وقعدته اعمل فيها، لما بديت ادق في البن قعد يغني لي غنيه بتقول"بت الناس في وجيها شامة دا حباً سبب لي خصامة

حيييييييييييي انا بريدها زي عيوني لا بخونها لا بتخوني عشانها ناس الحي جفوني فاتو للكبار شكوني..

حيييييييييييي انا بريدك يا الاميرة انا بريدها مافي غيرها حواجبك سودا وغزيرا ... انتي للبنات مديرة سميتك الدايماً خطيرة...

هيجت قلبي وذاد هديرا اصبحت بي الااام كتيرة بين النهود نازلهه المسيرة , ظهرت لي ضربات خطيرة دواية عندك يا الاميرة

حيييييييييييي بت الناس اللي مُنية ديل اهلك احتجو فيا خاصموني غير جنية في الطنبور رافعين قضية لو

منايا يتما لي تاني روحي ما همية , بت الناس في وجيها شامة يا الحبك سبب لي خصاااامة

حيييييييييييي زولي ناير خدو سادة مخير الله علي عبادا جسيمها زي قطن الوسادا ضميرها زي خيط النجادة .."

هو يغني وانا بضحكك وخلاص خجلتهه قلته ليهو اسكت ها دي شنو الغنيه دي قال لي مالك خجلتي؟م عجبتك الغنيه والله عندي ليها شريط بسمعها في الرادي لما الراعي يكون ماف و امشي اسرح بالبهايم بقيت ساكته واتبسم وعامله روحي مشغوله بالجبنه، قعد يضحكك هو زاتو

لما شافني سكتته مسافه حاول يغير الموضوع قال لي الشجر دة ضلها بارد، قلته ليهو الطوطحانيه الفيها دي حقت منو؟الراجل البحرس ليكم الزراعه دي عندو اولاد؟قال لي اي عندو لكن م قاعد يجيبهم اظنو جابهم مرة وربطها ليهم، العصر طلعنا مشينا محل م بسرحو بالغنم المكان كلو شجرر ومويه وارض خضراء جو خراافي بطريقه مبالغ فيها وكان ملان غنم وشكل السخلات الصغاار مع المنظر دة كان خرافي

بقيت اجري ورا اي واحدة فيهم وهو كان بتكلم مع الراعي، قريب للمغرب كدة رجعنا البيت اول م دخلنا كدة حتى م قعدنا سمعنا عربيه سامي وقفت، قال لي ادخلي جوة بسرعه بسرعه، دخلته هو طلع على طول

سامي ي زول إتأخرته والله من الصباح م لاقي جاز اها جاهزين؟

سعد قال ليهو والله شهد دي محمومه شويه عشان كدة قلته افضل م نمشي خلينا قاعدين هنا يومين احسن،

سامي قال ليهو ي زول ها بسم الله الجاها شنو إن شاءالله خير؟سعد قال ليهو والله م عارف شكلو إلتهاب في الجو دة،

سامي قال ليهو خلاص اطلع ارح نرجع نوديها الكشف من هناك ترتاح في البيت احسن وناس ابوي زاتهم الليله قايلنكم جاين من الصباح ضابحين،

سعد قال ليهو لالا هناك م بترتاح انت عارف الضيوف وناس الحله وسلام سلام دي م بتريحها خليها هنا تبقى كويسه يومين كدة بنرجع بإذن الله،

سامي قال ليهو خلاص خلي ادخل اسلم عليها واشوفها، سعد قال ليهو تدخل وين ي زول انت عوير تدخل على مرت اخوك العروس م صح كدة،

سامي حسهه بالإحراج قال ليهو خلاص عديله ي زول هاك امسك تلفوني دة انا بضرب ليك بتلفوني التاتي لما ارجع البيت عشان نطمن عليها التلفون مشحون سمح؟

قال ليهو خلاص ابشر سلم على ناس امي

بعدها جاني داخل لقانا جهزته الشنط قال لي مجهزة الشنط لشنو ي الشليقهه؟قلته ليهو سامي مشى؟قال لي م قولتلك نقعد يومين تلاته هنا؟اها الليله قعدناا القعدة الياها قلته ليهو اها قلته لسامي شنوو؟قال لي م عليك المهم جعانين اسي نحن،

قلته ليهو اعوس قراصه بلبن؟قال لي القراصه موالها طويل انتي سخني اللبن وانا بعمل عصيدة دخن قلته ليهو بتعرف تعوسها؟ قال لي انا مربى غنم ي بت ها شنو المابعرف اعملو قولي ماشاءالله بس قلته ليهو اها طيب ارح معي نجيب القصب من هناك طيب ي مربى الغنم

اليوم التاني الصباح بعد م شربنا الشاي وفطرنا، هو كان بحفر في محل زارع فيهو الراجل الساكن في البيت باميه، وجرجير، وبمي وحجات زي دي، وكان في قش كدة قايم معاهم هو قعد ينضف فيهو، وانا قعدته في الطوطحانيهه وبقيت امشي واجي براي، قال لي اعملي حسابك م تقعي ها قلته ليهو الحبل متين م برميني، بعد م خلص قال لي دقيقه وبقى يلزني بقيت اقول ليهو بقع ياخي، قال لي الوقعه الدايراها دي الليله إلا تقعي بس وهو يضحكك، وانا بقول ليهو سعد خلاص والله الحبل بتقطع، قال لي مش قولتي الحبل متين؟

قلته ليهو راسي لفهه حقع والله بقع، اثناء انا بقول ليهو كدة وبضحكك في لحظهه كدة فجأهه اشوف امو جايه داخلهه البيت ومعاها سامي وهبهه...

...