الفصل الثامن

وفجأهه اصمع اصوات رجال برددو لا إله إلا الله، لا إله إلا الله، وصوت خالي التاج كان مستمر ولسسسه بقول بصوت منتحب اطلعي يمهه تعالي شوفي ابووي يمهه، ولدك كتل ابوهو يمهه افتحي الباب، نطيت من السريرة وقولته جديييييي واي سعد قام مخلوعه قال لي شهد في شنووو؟قولته ليهو جدي وقومته جاريه جا لاحقني ومسكني، قولته ليهو جدي ي سعد م سامع الأصوات دي، عمي الطيب قال ليهو في شنو ي سعد؟

إتفكيت من سعد وفتحته الباب وجريت لقيت الحله كلها طلعت وكميه عربات واقفه قدام بيتنا وحبوبه بتقول لا إله إلا الله، الله اجرني في مصيبتي وعماتي بصرخو ونسوان الحله نفس الشي،

مسكته حبوبه قولته ليها حبوبه في شنووو؟عمتي رحمه في شنو؟جريت على خالي سعد قلته ليهو خالي سعد، خالي سعد جدي مالو؟جدي وينو ي خالي سعد؟عمتي هويدة قالت لي جدك مات ي شههد عمي احمد الليله ووووووووووووب وب، وبقت تنفض في توبها فجأهه البيت اتملى خلق كدة بطريقه م طبيعيه،

خالي التاج دة بس قاعد في الارض طرف الحيطه وبقى زي المجنون وعيونو زي الشرار، مشيت إترميت جمبو قولته ليهو جدي امس كان نصيح م عليهو عوجه الجاهو شنو ي خالي التاج الحصل عليهو شنو قول، سعد جا قومني قال لي تعالي ساقني قعدني في سرير كدة وجا راجع لي خالي التاج، قال ليهو التاج شد حيلك ي التاج اخوي قوم على حيلك كدة خلينا نستر ابوك، سعد ساكت ودموعو جاريه، قومو على حيلو قال ليهو شد حيلك، تعال ي سامي امسكو معي، ، فضلنا قاعدين والبيت دة بقى فيهو حشد كدة م طبيعي وكميه عربات م بتتعد وانا الدموع جفت من عيوني بقيت بلقى نفسي موجوعه من جوة وحلقي دة تقول عليهو نار بس ولا قطرة م بتنزل من عيوني،

جدي حمموهو وكفنوهو وصلو بيهو صلاة الجنازة مع صلاة الصبح وبعدها الناس بدت تتحرك، الحله دي كلها كانها كانت بتصرخ بصوت واحد، والرجال ديل في زاحدين وقعو في الأرض بعداك يبكو،

حبوبه كانت صامدة ابدا م اتهزت فيها رمشه وطول الوقت ساكته وتعاين بعيونها لغااايه م جات لحظه طلوع الجنازة بقت تقول للناس البكى بعزبو م تبكو ادعو ليهو ي اخوانا انتو دايرين ليهو العزاب ولا شنو م تبكو البكى بعزبو، انا بس كنت تابعه الناس في صمت كاني داخله في حاله صدمه لغايه م ركبوهو العربيه هنا انا بقيت جاريه وبقول ليها حبوبه ساقو، ساقو جدي ي حبوبه، النسوان مسكوني وفي واحدة منهم لفحتني بتوب

نفس حاله القهر العشناها لما ابوي اتوفى، كانت حالتنا اسوأ منها وبمراحل، جدي دة كان عمود البيت، ساسنا النحن واقفين عليهو، كل حاجه في حياتنا كانت متوقفه عليهو بعدو نحن خلاص ولا شي، م عارفه فجاهه حياتنا اتغيرت 360 درجه وبقينا نتلاشى واحد.ورا التاني، م عارفه هل دي إبتلاءات ولا لعنه نزلت علينا من ربنا بس خلاص انا الفيني كملت بقيت م قادرة اتحمل اي شي

بعد م جو من الدفن، الناس قاعدة فرشو الصيوانات وكل شويه العدد يكتر الناس ماشه تزيد، فجأهه خالي التاج جا داخل سرعه شقه النسوان دخل المطبخ شال سكينو وطلع جاري، جريتو دي النسوان بقن يسالن في شنو في شنو؟فجأهه اسمع صوت الرجال جايطين برة، وخالي التاج بقول ليهم فكوني م بخليهو والله ان م كتلتو م بخليهو انا اصلا حالف م ارفع فراش ابوي دة الا تاكيهو وقاطع رقبتو الباطل دة، جرينا طلعنا لقينا خالي التاج دة ماسكني قريب العشرة رجال وهو بقالع فيهم، وفجأهه عيني وقعت على خالي ياسر،

خالي ياسر قال ليهم خلوهو نشوفو داير يعمل شنو، مش الموت دة هدا ياني جيتك تعال اكتلني بس م بتحرمني من فراش ابوي انت، خالي التاج قال ليهو اسكت ابوك م كتلتو انت وليك عين تتكلم كمان ي باطل وإتفكه من الرجال وجرى عليهو، وانا اول م شوفتو بقيت اصرخ، ، وعماتي يصرخو، وفاطمه اختي بقت تقول واي كتلو كتلو

وإستمر الوضع من مقالعه، لي نقاش لغايه م في لحظه كدة خالي التاج جرى عليهو وعايز يطعنو فجأهه سعد مسكو وبقى يقالع فيهو السكين وبقول ليهو التاج انت جنيت دة اخوك ي التاج، خالي التاج قال ليهو ي سعد ياخ فكني ورفع سكينتو وسعد إتصداها منو والسكينه جات في كتف سعد، الناس هنا بقت تكورك وانا خلاص اول م شوفته الدم جاري من سعد بقيت اصرخ بطريقه هستيريه، الناس مسكت سعد، وسعد بقى يقول ليهم ماف شي ي اخوانا جرح بسيط امسكو المجنون دة، ، لغاايه م جات حبوبه طالعه قالت للرجال زحو لي منهم ومسكت خالي التاج وادتو كف قالت ليهو التاج اخجل ي التاج دة فراش ابوك الليله اخرة عمركم تفرجو عليكم الخلق كدة؟تبقو فرجه ي التاج ابوكم علمكم كدة؟

خالي التاج قال ليها يمه انتي م عارفه ولدك دة عمل شنو ي امي ابوي مات بزبحه قلبيه بسببو عارفه يعني شنو بسببو؟انا حلفته لو م كتلتو يمين بالله ابوي احمد يطلع من التراب والبينا دم ي امي دم وكان اخوي انا رميت لحمو

حبوبه قالت ليهو دة اصلا مغضوووب الله لا بارك فيهو لا دنيا ولا اخرة انت العاقل ي ولدي، اهدأ وروووق م بتتحلى كدة حكم ضميرك خلو ابوكم يرتاح شويه في قبرو، وانت ي ياسر غضب الله عليك ومن اليوم دة م اشوفك هنا يلا امشي من هنا ي كلب وانا م رضيانه عليك دنيا ولا اخرة بشتنتنا في الدنيا دي الله يبشتن عدلك بركه المولى عزة وجلى، امشي من هنا قلته ليك، والله م تتحرك اشيل السكينه دي انا الاجيب اجلك باقي اليوم دة يلا اتحرك من هنا، الرجال بقو يتكلمو معاه وساقوهو الناس دخلت انا جريت على سعد، وسامي كان ماسكو، وخالتو فتحيه بتقول ليهو ي سعد انت البخليك تقيف في النص شنو داير تموت انت، سامي بقول ليها خلاص ي امي حاجه بسيطه، قالت ليهو م تقول لي حاجه بسيطه السكين دي كان جات في بطنو ولا في اي حته في جسمو م كان كتلتو، عمي الطيب قال ليها ي مرة يلا خشي جوة سرعه بلاش كلام فارغ معاك

دخلونا جوة المساء سعد ناداني، قال لي انتي كويسه؟قولته ليهو انا المن قبيل قلبي ماكلني عليك الطعنه إن شاءالله م كبيرة، إيدك واجعاك؟قال لي م شيتا بقولو عليهو حاجه بسيطه انا جاي اتطمن عليك محتاجه حاجه اجيبها ليك؟

قلته ليهو احتاج شنو ي سعد تاني من الدنيا الفانيه والماسخه دي، جدي وامي، وابوي كلهم تحت التراب م فضل لي شي انا م فضل لي شي ي سعد وبقيت ابكي، سعد قال لي انا فتهه وين؟قاعد انا وفاضل ليك العمر كلو، اسي انتي ارجعي اقعدي انا ماش مكان الرجال، قلته ليهو طيب

عدت الأيام والحال من بعضو من اسوا لي اسوا ولغايه م جا الأربعين البيت كان م كان بفضى نهائي اهلنا من وين وين جو، والصيوان دة م اترفع نهائي، سعد كان مخليني الفترة دي كلها مع ناس حبوبها، بعدها جات خالتي فتحيه اتكلمت مع حبوبه م عارفه قالت ليها شنو بس بعدها حبوبه قالت لي ترجعي بيت راجلك بعد كدة 40 يوم دي صابر وم قال ليك صرفا ولا عدلا هملتيهو زيادة عن اللزوم بعد كدة خلاص كفاهو، بالفعل رجعته، سعد من حنين اتحول لي احن، حتى انا وصلته لقناعه انو ربنا على قدر م اخد مني عوضني بسعد، رغم الحزن والكأبه الكنت فيها كان صابر علي، بقول لي لو م عندك مزاج تطبخي م تطبخي، حتى انو احيانا بعد م يستحمى بطلع ملابسو وملابسي وبغسلهم علشان الملابس م تتلمى وانا اغسلهم، وانا الفترة دي مرضى بقى كتير فكان اكتر وقتو بمارضني ولو م قدر يقعد بوصي علي هبه واي شي بوفرو لي

في يوم ونحن قاعدين في بيت ناس حبوبه فجأهه جات هبه قالت لي شهد اللحقي قالو سعد وباقي المزارعيه ناس ود العويض اتشاكلو في الحواشات مع ناس الشركه واسي الحلهه كلها كسرت الناس قالو الا جابو ليهم العسكر، قولته ليهم شنووو؟لبسته التوب وجري على الحواشه وهبه جاريه وراي لغاااايه م وصلنا لقينا الحله كلها كاسرة، دخلته بين الناس لقيت الشرطه واقفه، وفي شاحنه كبيييييرة واقفه وفي رجال واقفين، والعساكر بقولو للناس المعاهم يلا ارفعو الشوالات دي قلنا ليكم،

سعد رفع الطوريه قال ليهم يرفعو شنو؟والله الا كان نحن م رجال بعداك نخليهم يرفعو، تسرقو عرقنا التعبنا وشقينا عليهو نحن؟نحن نزرع ونحش كم شهر عشان تجو تشيلو 60٪من محصولنا؟عبيد عندكم نحن؟هي ال 50% نحن زاتنا عندنا فيها راي والله م تاخدو زيادة منها كان بقيتو شنو، في ضابط قال ليهم انت خليك م تتكلم بلسان الكل انتو ي ناس كلامكم شنو بتدو محاصيلكم ولا لا؟انتو عارفين لو عملتو مشاكل حتكون دي اخر زراعه ليكم على الارض دي م تنسو انو الحكومه مشترياها منكم وبتخليكم تزرعوها تضامنااا معاكم، في ناس قالو بدو، تقريبا معظم الناس قالو بدو وم دايرين يدخلو نفسهم في متاهات، الا سعد ومعاهو نفرين قالو م بدو واليحصل يحصل، الضابط قال ليهو سمح، سعد زعل من موقف اهل الحله قال ليهم جت عليكم راجل فيكم ماف

ورجعنا البيت مع بعض المساء عمي الطيب بتكلم معاهو قال ليهو ي ولدي 50 او 60 م فرقت م تدخل نفسك وتدخلنا في متاهات ساي، سعد قال ليهو فرقت ي ابوي فرقت، لما نحن نتعب وهم يجو يشيلو اكبر حصه يبقى دة إستعباد ونحن احرار من قمنا م رخينا كتفنا لي زول، دة الشي المرجع البلد دي لورا الحكومه اي شي تاخدو مننا نحن بدون مقابل، الفايدة شنو لما انا اشقى وهي يجيها كل شي بدم بارد؟م بديهم وبحددها معاهم

في بيتنا قعدته اتكلم معاهو قلته ليهو سعد خلاص روق من النهار جايط، قال لي مزعلني الخيابه ديل، انا اعترضته م عشان انا اشدة حوجه لا والله شان في اقل مني وضعهم اسوأ وعيشتهم كلها بتعتمد على المحصول دة وبعيشو بيهو سنه كامله، لما الحكومه تشيل منهم 60%من محصولهم هم ياكلو شنو؟

بس ديل عواليق مخلين الحكومه تستعبدعهم الليله الناس دي كلها لو إعترضت بقدرو يشيلو من زول؟ لا طبعا

قلته ليهو انا عارفه والله لكن ي سعد انت قولتها الناس ديل عايشين على المحصول دة وانت سمعته كلامهم قالو شنو، يعني لو اعترضو السنه الجايه يشوفو ليهم حته يزرعو فيها، قال لي المشكله في امخاخهم وعدم تفكيرهم لما قلته ليهم ي اخوانا م تبيعو اراضيكم الحكومه دي فقر وم عليها ضمان م سمعو اها اسي يتحملو نتايج امخاخهم الزنخهه دي...

صباح اليوم التاني صحينا على صوت خالتي فتحيه بتقول في شنو ي ناس مالكم؟وعمي الطيب بقول ليها ي مرة اسكتي، وهي بتقول ليهو اسكت كيفن والعسكر جايني في نص بيتي؟

سامي قال "خير ان شاءالله ي ود بشاش في شنو؟

سعد قام على حيلو وطلع عليهم وانا لبسته توبي ولحقته،

العسكري قال ليهم عندنا امر قبض على سعد،

خالتي فتحيه قالت الليله وووووووووب عمل شنو ولدي قابضنو؟

سعد قال ليها اسكتي ي امي، ابشر ي ود بشاش جدا، خليني استحمه واتسوك واجيك، قلته ليهو سعد في شنو وقابضنك لشنو شان موضوع امس؟

عمي الطيب قال ليهو ي ولدي فهمني براحه ولدي تهمتو شنو قابضنو؟سعد قال ليهم م تكترو معاهم بمشي بعرف الحاصل براي، امي اعملي ليهم شاي لمن اجهز انا الزمن داك

مشيت وراهو قلته ليهو سعد، سعد، قال لي روقي مافي ششي بمشي بشوفهم مالهم وبجي راجع، قلته ليهو لالا ي سعد لالا سوقني معاك انا ماشه، قال لي تمشي وين السمحه انتي مجنونه؟اخر عمري ادخلك محل حكومه؟طلعي لي عراقي وسروال انا ماش استحمه، طلعته ليهو الملابس وانا خلاص القعاد غلبني ودموعي بقت جاريه عشرة عشرة، جا لبس قال لي ها العويرة دي السجن حق الرجال يعني م حاجه تخوف امشي ناس حبوبتك كان انا اتاخرته سمح، قلته ليهو يعني بتتأخر وم دايرني اخاف الليله وب، طلع وطلعته وراهو ومن هناك عمتي فتحيه تبكي، ونحن طالعين جا خالي التاج داخل، قال في شنو ي اخوانا خير سعد في شنو؟قال ليهو م شي خطير موضوع امبارح داك بس، خالي التاج قال ليهو ود بشاش معقوله ياخي يعني انت ود بلد جاي تقبض عليهو زي الحرامي كان استدعيتو م بجي براهو؟

سعد قال ليهو ديل عبيد الحكومه نسو الخوة والأصول زاتها بس يلا ارح، طلعو قلته لي خالي التاج، خالي اللحقو حلفتك طلعو انت مش بتعرف ناس الشركه ديل عليك الله ي خالي طلعو قال لي م بجيهو شي وطلع وراهم ركب عربيتو وإتحرك،

وصلو الحراصه دخلوهو الضابط المسؤل كان جايبنو جديد بقى يتحرى معاهو قال ليهو مشكلتك شنو انت نافخ عضلاتك؟ حله كامله وافقت على قرار الحكومه انت مالك؟

سعد قال ليهو اسمع الحكومه دي تغير قراراتها بمزاجها هي؟عندنا وثيقه مختومه عديل انها سنويا بتاخد 50%من محاصيلنا، وحتى بال 50 دي نحن متضررين تجي تعمل زيادة مرة تانيه؟

الضابط قال ليهو وثيقتك العندك دي تبلها وتشرب مويتها حكومه وغيرت وثيقتها انت معترض مالك؟قال ليهو محصولي انا تعبته وشقيت فيهو عشان ينجح وانا حر فيهو ال 50c/o بتاعتهم مرميه في المخزن عايزين يشيلوها الليجو ياخدوها حبابهم طن، م عايزين الله يعدلها عليهم، قال ليهو ي زووول دة اخر كلام عندك؟قال ليهو وم عندي كلام غيرو،

فجأه خالي التاج جا داخل سلم للضابط، قال ليهو انت منو؟خالي التاج قال ليهو انا ود حاج احمد المسؤل من ضمانات الأراضي دي كلها، الضابط قال ليهو طالما انتو المسؤلين دة غالبكم تخلوه يوافق على قرار الحكومه؟خالي التاج ساق الضابض على جنب وإتكلم معاهو مساااافهه بعدها جو راجعين، الضابط قال ليهو طيب يلا إتفضل امشي، سعد وعاين ليهو بغضب وقال ليهو المرة الجايه م تعملو لينا إزعاح من الصباح في بيوتنا وطلع،

خالي التاج طلع وراهو قال ليهو سعد م تتهور ي اخوي حكم عقلك دي حكومه م اي كلام، سعد قال ليهو التاج نحن اولاد بلد وحقنا دة في النار م بنخليهو، اسي انا اصلي م خايف، حكومه شنو البتخوفنا الا كان بقينا م رجال،

التاج قال ليهو الشغله م رجاله ي سعد ي اخوي، الشغله خباثه الناس ديل انت م بتعرفهم نحن اتعاملنا معاهم من قمنا،

سعد قال ليهو لا بارك الله فيهم والرهيفهه التنقد ي اخوي،

خالي التاج قال ليهو المهم اعمل حسابك انا وصيتك الجماعه ديل م بدورو شي يحدر ليهم شان يقلب عليهم بقيه الناس اسي عشان كدة كانو دايرين يجبروك على انك تتنازل بس لما شافوك متمسك خلوك

رجعو البيت لما شوفته سعد م صدقته، بقيت اسألو اها الحصل شنو وعملو ليك شنو وقالو ليك شنو احكي لي،

قال لي ي زوله سألوني بس وحاوبته وجا سعد اتكلم معاهم وطلعته قولته ليهو الحمدلله الف الحمدلله يااخي والله شعر جسمي غزهه من الخوف، قال لي م قولتلك م بتجيني عوجه تب،

اليوم التاني خالي التاج ناداني في البيت واتكلم معي قال لي قولي لي سعد يعمل حسابو حزريهو شدييد م يخرب وش مع الحكومه دي سمح ي شهد؟قولته ليهو ليه سمح، قال لي داير اقول ليك شي تاني، قولته ليهو اها؟قال لي ابوي الله يرحمو م نساك كتب ليك نص الأراضي حقت المشاريع بإسمك ووصاني عليها انو اسلمك ليها وقت تحتاجيها، اسي سعد لو م داير يخش في كلاشات مع الحكومه خليهو اليزرع الأراضي ديك والله مرغوبه ومعظم الناس عينهم عليها والحكومه م بتقدر تفتح خشمها معاهو لانو سلفا ملك ابوي، الليله اليوم دة لو إتباعت اقل شي ب 7 مليار، قلته ليهو الله يرحمو جدي، قال لي كدة اتكلمي معاهو وشوفيهو بقول شنو، قولته ليهو طيب بشوفو، بالليل وانا قاعدة معاهو قلته ليهو سعد، قال لي اي، قلته ليهو سمح ي سعد انت بدل م تدخل في مشاكل مع الحكومه الأرض الوقعت لي من ورثهه ابوي قاعدة، وجدي برضو خلى لي اراااضي المشروع بتاعتو انت ممكن تستغ...

قبل م اخلص كلامي قاطعني قال لي شهد، شايفاني محتاج انا؟عدمان؟من النوع البشيل ورثه اهل مرتو؟خايب انا ي شهد خايب؟قولته ليهو حاشاك الخيابه م قلته كدة انا والله، قال لي كلامك دة معناهو شنو سمح ي شهد، انا كلمتك انا والله م محتاج ومحصولي دة بقعدني سنتين بدل سنه، ولو عدمته كسره بمويه بعيش هليها، بس انا مشكلتي انو دي حقاااارهه لينا نحن، حكومه تشيل حقنا التعبانين عليهو؟ الحاجه دي انا م بقبلها على نفسي م عشان انا متضرر لالا شان في غيري حيتضررو وممكن يتمادو بسكاتنا وكل شويه يزيدو النسبه لغايه م يخلو للغلابه ديل 10%بس وهم يشيلو ال 90%، انا معترض عشان دة حقي ومن حقي ادافع عنو، فهمتي ي شهد؟قلته ليهو طيب روق، سكت واداني ضهرو، قلته ليهو خلاص سمح معليش والله م قصدي اسي الزعل لزومو شنو؟نام بزعلتو ديك الصباح صحيت لقيتو طلع من غير م يشرب الشاي حتى، وجا راجع نص الليل م اتكلم معي وإستمرة الوضع تلاته يوم على نفس الحال، لما حسيت بالوضع غلبني اول مرة اعرف زعلو كعب كدة، مشيت لعمتو فتحيه كانت بتعوس قعدته جمبها وبقيت ابكي، قالت لي بسم الله ي بتي في شنوو؟حكيت ليها الحاصل، قالت لي اصلا سعد ولدي دة كدة قلبو ابيض واي شي لكن زعلو كعب وانتي ي بتي ي يمه بت الهنا والسرور م قصرتي دايرة تقيفي معاهو زيك زي اي مرة دايرة تقيف مع راجلها وقت الحارة، خليهو علي بعدين لمن يجي انا بقعد اتكلم ليك معاهو كويس؟

بالفعل المساء جا وعمتي فتحيه جات قعدت معاهو، قالت ليهو شوف ي ولدي مرتك دي م غلطت ابدا بالعكس اثبتت إنها اصيله وبت ناس ودايرة تقيف معاك من خوفها عليك، واي واحدة مكانها كان هتعمل كدة، عشان كدة برضاي عليك ي ولدي سامحها م تزعل منها خلاص؟الله يهدي سركم ي اولادي م تدو المشاكل فرقه بينكم، شهد جهزي لراجلك الغداء، قال ليها شبعان انا داير، قلته ليها شايفه ي عمتي هو لسسسه زعلان وليهو كم يوم م بياكل اكلي وحردانو

قالت لي م تبكي انتي عويرة، سعد ي ولد خلاص قلنا م شايف مرتك دي بتبكي كيف؟هديها ورضي عليها واكل اسي دة موضوع سخيف زاتو انا نعسانه ماشه انوم خليكم كملو باقي كلامكم، طلعت مشت جبته الأكل ختيتو قدامو في الصينيه، م اتحرك من محلو، قعدته جمبو وبقيت ابكي، وكل شويه ازيد في البكى وازيد لغايه م قام اكل وهو ساكت، ، بعد م خلص رفعته منو الصينيه وجبته ليهو مويه، رقد في سريرو جريت عنقريبي ولصقتو معاهو ورقدته جمبو، إتلفت بعكس إتجاهي إتحولته بإتجاه وشو وبقيت راقدة جمو ووشي مقاصد وشو، قلته ليهو خلاص قلنا، سكت، قلته ليهو تتزكر لما قلته لي الشينه م بتطلع مني؟قال لي واسي طلعت مني؟قلته ليهو واسي البتعمل فيهو دة شنو؟سكت، قمته عايزة اتحرك من جمبو جراني ورقدني جمبو قال لي خلاص انا م زعلان، قلته ليهو وانا زعلته خلاص، قال لي الزعل لشنو؟ قلته ليهو عشان انت زعلته مني انا زعلته، قعد يضحكك قال لي يعني الزعل بعالجوهو بالزعل؟

قولته ليهو خلاص م زعلانه بس انت زعلك كعب وبقينا نتونس وشلنا الليل كلو ونسه ونقاش عدت الايام وامورنا كانت ماشه تمام والناس كلها بقت تسأل لسسه م بقيتو تلاته مالكم، اصلا ناس حلتنا كانو من النوع العندهم العروس بتحمل من اول شهر، وسامي وهبه برضو نفس الشي، سعد قال لي فاضين للفارغهه الله يجيب اجلهم م تشتغلي بيهم

عدينا كم شهر لغايه م جا موسم الزراعه، والناس بدت تجهز حواشاتها، جاني عمي الطيب في يوم قال لي والله ي بتي في ناس ماشاءالله كويسين وعندهم قروش جد قالو دايرين يشترو اراضي زراعيه وانتي اول زوله خطرتي على بالي عندك اراضي جدك الخلاها ليك واراضي ابوك الطلعت ليك، عمتي فتحيه قالت لي قاعدين فاضين ساي احسن تبيعيهم وتستفيدي من قروشهم، سعد سمعهم بتكلمو معي طلع قال ليهم شهد ي ابوي وامي م محتاجه تبيع اراضيها ولا في شي ناقصها، ابوهو.

قال ليهو م كدة ي ولدي لكن الأراضي مواقعها سمحه و...سعد قال لي شهد انتي محتاجه شي او ناقصك شي من ناحيتي شان تبيعي عشانو ورثه اهلك؟هزيت ليهو راسي بمعنى لا، سعد قال ليهم خلاص الموضوع دة يتقفل لحدي هنا ست الحق م محتاجه شي يمعتو ي امي وابوي؟

سعد بدأ يجهز ارضو زيها زي اي سنه بمشي بنضفها وبحرثها وكدة، وانا احيانا بقيت اصحى اجهز الفطور بدري وامشي معاهو، عمل لينا زي راكوبه كدة في نص الحواشهه بنقعد نقيل فيها ونهايه اليوم بنرجع مع بعض، لغاايه م زرع والمطر جا وزراعتو كان ماشه كويس، قال لي السنه دي إن شاءالله الزراعه كان نجحت بلبسك سلسل دهب وتلاته غوايش، قلته ليهو ها م بدورهم اسي حق حبوبه م قاعدة اللبسو والدبله الجبتها لي م قاعدة اللبسها خاتاهم عند حبوبه، قال لي انا بجيبهم وانتي ختيهم وين المشكله؟وبعدين داير ابني لينا راكبوه زنكي كدة كبيرة واجيب لها 4 سراير نفرشها للضيوف البجو لمن الله يسهل ونبني برندة، قلته ليهو كويس الله يحينا،

بعد شهرين من الكلام دة في يوم جا موسم الحصاد، والسنه دي كان الموضوع غير، الحكومه هي البتحصد للمزارعيه بألالات جايباها هي بدل م هم يأجرو ويخسرو، والمزارعين وافقو وطبعا سعد وسامي عشان كانو ضدهم حواشتهم م كانت داخله في الموضوع دة، سعد بتونس مع سامي قال ليهو اااه بكره تشوف يزيدو ليهم النسبه البشيلوها منهم بالمقابل م بعملو حاجه ساي ديل، سامي قال ليهو والله ي سعد ي اخوي عشنا عمرنا دة كلو بنحصد محصولنا ومحصول غيرنا مساعدة لوجه الله ساي لكن اريتها المساعدة دي لو قدمناها لكلاب سعد قال ليهو والله كان وجع جسم سااي

في صباح كدة انا صحيت وقلبي مقبوض، حتى كان ظاهر على وشي، سعد قال لي مالك الليله ي السمحه وشك م ياهو المزهجك شنو؟قولته ليهو ولا شي، قال لي انا ماشي احلب البقرة وجاي، قلته ليهو سمح اولع النار انا، ولعته النار والجو كان شويه مغبر شلته العنقريب ختيتو تحت ضل الشجرة وفرشتو وجبته كانوني ولعته النار ابت تمسك بقيت اهب فيها وبرضو الهواء كان بطفيها من الضيق قلته عليك الله دي مالها كمان اليه، جا قال لي دي عشان شايفاك زهجانه شان كدة م دايرة تمسك خليني اولعها انا، ولعها وهباها لغايه م مسكت قال لي شايفه دايرة ليها مزاج رايق، قلته ليهو جيب اللبن واقعد، قعد جمبي، قال لي داير امشي مع سامي الليله نشوف الحاصل شنو بعد كدة دايرين نبدا نحصد لكن داير انضف الحواشه اول،

قولته ليهو م تمشي الليله الجو زاتو كعب، قولته ليهو بزبط ليك ملاح روب ابيض بعصيدة للفطور كان م مشيت، قال لي بمشي وبجي باكلها اعمليها، قولته ليهو انت يوم واحد لو م مشيت بحصل شنو؟قال لي ساعه بالكتير وراجع م قاعد زاتي، قلته ليهو سمح م تمشي كان تقطع المسافه دي كلها عشان ساعه واحدة، قال لي هييييي انتي مالك الليله رابطه وشك من الصباح ودايراني م امشي م كل يوم قاعدة امش، قلته ليهو طيب قال لي لكن اسي بجي طله خفيفه بعربيه سامي وبنجي راجعين م بنقعد

عملته ليهو الشاي شرب، قال لي يلا انا مشيت السمحه، قلته ليهو خلاص م تتأخر بجهز ليك العصيدة وملاح الروب الوقت داك، قال لي م تكتري ليهو الملح والويكه زي كل مرة، قلته ليهو قصدك شنو؟ضحك قال لي سمح ابشري اعمليهو وجهزي السمن اهم شي، قولته ليهو خلاث، طلع مشى

سعد وسامي اول م وصلو شافو اله الحصاد في حواشاتهم نزلو وجرو عليها وبقو يكوركو ليهم، السواق قال ليهم في شنو ي شباب؟سعد قال ليهم انتو الدخلكم حواشتنا شنو؟ قالو ليهو نحن م عارفين، سامي قال ليهم اسي انتو شايفيننا لمينا زراعتنا وكومناها لمن داخلين الحواشه؟داخلين لشنو؟المع السواق ليهم ي شباب الأله دي فراملها بتعصلج شان كدة بتمشى ساي احيانا اعذرونا، سعد قال ليهو العفو يلا اتفضلو اطلعو من حواشتنا، بعد م مشو سعد قال ليهو هي حكومه م قادرة تجيب حتى مدقاقه نافعه

سامي قال ليهو ارح نقعد شويه في راكوبتنا، سعد قال ليهو داير الف في الحواشه شويه انت اقعد، وبالفعل دة الحصل، سعد لفهه كدااا بعدها جا راجع وقعد مع سامي في الراكوبه المعموله من 4 قنايات ومقفوله بشوالات خيش من فوق، واله الحصاد كانت لافه في الحواشه الجمبهم على طول وقريبه منهم وصوتها مزعج، سعد قال ليهو صداع سااااي اقسم بالله، سامي قال ليهو فرتقو إضني، انا ماشي اجيب مويه من اب عشرين هناك وجاي، سعد قال ليهو عندك باقه؟سامي قال ليهو في العربيه بشيلها وبمش، سعد قال ليهو م تتأخر شان نمشي نلحق الفطور في البيت، سامي قال ليهو ابشر، إتحرك مشى، وسعد رقد في الأرض وغمض عيونو وشبه جاتو غفوة كدة،

وانا بعمل في الععصيدة كانت معي هبه متحننه سمعنا كواريك وكانت كتيرة شديد، هبه قالت لي بسم الله في شنو في الحله كدة تاوقي بالحيطه، قلته اتم عصيدتي دي وارفع راسي بالحيطه اشوف الحاصل، عوسته العصيدة وفجأهه اسمع صوت ايات اختي بتقول بصوت عالي حبوبه فتحيه الناس قالو المدقاقه طلعت لي سعد ولدك في راسو، عمتي فتحيه قالت ليها هوووي ي بت دة كلام شنو؟ قالت ليها والله والله الحله كلها كسرت الحواشات، نطيت من محلي وجريت على اتجاه بيت ناس عمتي قولته ليها بنهرة القال ليك الكلام دة منو ايات؟عمتي فتحيه قالت لي ها دي كضابه ساي م تسمعي كلامها، ونحن واقفين سامعه صوت صراخ جمب باب بيتنا، هنا انا اتصمغته، جات عمتي رحمه داخله تكورك وخاته التوب في وشها، عمتي فتحيه قالت ليها رحمه في شنو؟عمتي رحمه قالت ليها اجري اللحقي ولدك سعد في الحواشه ي فتحيه اجري، المدقاقه م خلت فيهو شي هرستو هرسه الطماطم، انا لقيت نفسي وانا بسمع الكلام دة جاريه بس من غير توب او نعلات حتى جريت بالرغم من انو المسافه بعيدة وكان في كميه من الناس جارين بنفس إتجاهي، ، م عارفه كميه الإندفاع الكنت جاريه بيها انا بس ابدا م وقفته، لما وصلته الحواشه شايفه كميه من الناس كانو واقفين في حواشاتنا ولغايه اللحظه دي انا مكضبهه السمعتو، انا جاريه الناس كانت بتحاول تمسكني وانا بتقالع معاهم لغاايه م وصلته قريب منهم والناس دي بتصرخ بأعلى صوتعا والشرطه ملت الحواشه وانا لسه جواي بقول كذب كذب كذب اصلا م صح، بقيت اشق في الناس وانا ماشه وبقول ليهم زحو زحو، لغايه م وصلته لقيت قدامي حاجه مغطيهه بي قماش في مكان الراكوبه حقتهم زاتها، وشايفه سامي واقع في الأرض وبصرخ وبفرفر زي الشافع، انا في حاله صدمه لمدة ربع ساعه والعساكر مانعين الناس يقربو، وانا صراخ الناس دة شايفاهو بعيد وعيوني طشاش طشاش، جريت على سامي، بقيتاسال فيهو سامي سعد وينو، سعد وينو ي سامي، سامي زايد في الصريخ وانا بقول ليهو يلا جاوبني سعد وين مش طلعتو سوا مشى وين؟ ماشه بإتجاه الجثه العسكري مسكني لزيتو قولته ليهو م تمسكني وقربته منو، بقيت اقول ليهم دة م سعد، م سعد ي اخوانا ههههههه مستحيل يكون سعد طبعا، سعد بجي اسي، فجأهه اسمع صراخ خالتو فتحيه وهي شي وهي شاقه الناس وبتقول واااااااااااي الليله ي ولدي، واي ي الحرقته حشاااي الليله، قولته ليها عمتي فتحيه دة م سعد، م سعد والله م سعد، لزتني وجرت على الجثه، وقعد جمبو ورفعت القماش وبقت تقول واااااااااااااي وااااااي ي ولدي، والناس دي كلها بقت تصرخ بصوت واحد إتلفته بس عيني وقعت على كتله لحم وقماش ملان دم للحظهه بقيت واقفه مصدومه بعدها صرختهه بأعلى صوتي ووقعتهه في مكاني...

...