الفصل السادس والعشرون

، قولته ليهم طلبته منك توصلني وقاطعني قال لي بدون نقاش وشال الشنط وطلع، لما هو نزل شلته ولدي وشنطتي الصغيرة ونزلته وراهو لقيتهم كلهم واقفين تحت،

حبوبه قالت لي حلفتك بالله ختيتها ليك في ولدك كان تقولي لي في شنو ي بتي؟

امتثال قالت لي يعني ي شهد م منطق ابدا من الصباح نحن واقفين عشان نفهم منك الحاصل يعني لو انتي متضايقهه من زول فينا قولي لينا !!!، دموعي جات جاريهه قولته ليهم والله ي جماعهه انا م متضايقهه من زول فيكم ولا حاجه وانتو عداكم العيب م قصرتو معاي في شي وم شوفته منكم الا كل خير!!

حبوبه قالت لي سمح مالك ي بتي فجأة؟م مرتاحهه في القعدة معانا؟

عكتي عواطف قالت ليهم ي جماعه خلوها على راحتها زول قاعد مع الناس كويس والناس م مقصرين منو في شي لو طلب لبن العصفور بجيبوهو ليهو براهو غير وشو اها حتعملو ليهو شنو يعني تقعدوهو غصب؟

احمد جراني على طرف قال لي شهد اول م جيتي البيت دة م دخلتي في زول غيري صح؟وانا إعتبرتك زي اختي الصغيرة خليك من ناس البيت احكي لي انا الحاصل شنو زعلانه من صهيب؟غلط عليك في حاجه كدة ولا كدة؟انا متأكد حيكون السبب في كدة صهيب وانتي م عايزة تحكي وانا عارف صهيب اخوي شنو وعارف هو شنو بس الله يخليك ي شهد م تخلي الموضوع يصل لحته انك ترجعي اهلك،

هو بتكلم معي وانا ببكي

فجأة جا صهيب داخل قال لي جاهزة خلاص؟

حبوبه قالت ليهو ي ولدي كدة روق شويه انت كمان،

احمد قال ليهو صهيب...

قال ليهم ي جماعه ماف شي زي م هي قالت ليكم، طبعا بتكلم وصوتو مبحوح إحساس العبرة خانقاهو وكدة،

كمل كلامو ب"انا اصلا واعدها اوديها اهلها لانها طول منهم وكل يوم بقول ليها الليله وبكرة وفهمتها إني حأكلمكم بس نسيت والموضوع طلع من بالي دي كل القصه تمام"وخلاص اقفلو على الموضوع دة طلع غرفتو فوق وخلانا واقين تحت

حبوبه قالت لي ايا ي بتي طولتي من اهلك لكن تكلمينا من بدري نجهز ليك وتمبجد

تمشي كدة لكن ي بتي؟اسي خلي السفر يومين اقعدي اتحنني وإتجيهي ونحن زاتنا نجهز ليك حجات تمشي بيها اهلك م ممكن تمشي ويديك فاضيهه دة عيب في حقنا نحن زاتنا ي بتي،

إمتثال قالت ليها بالزبط ي خالتي والله ي شهد اسمعي الكلام

قولته ليهم لا والله م مشكله اساسا انت اتصلته على اهلي وكلمتهم إني جايهه وهم منتظرني،

عمتي عواطف قالت لي يعني قدرتي ترفعي سماعه التلفون وتتصلي على اهلك هناك وتكلميهم وغلبك تكلمينا نحن القاعدين معاك في بيت واحد؟خلاص ي زولهه تمام الله يسهل عليك خلوها ي جماعهه زول يسالها زول م احترم الناس القاعدين معاهو ولا قدرهم بس قام وقال ماشي اها زي دة يعملو ليهو شنو؟خلوهو على راحتو بس قلهه الذوق م ليها علاج اساسا

صهيب جا نازل قال لي بي نهرة انتي لسهه واقفهه هنا؟خلاص ي جماعهه قلنا النقاش في الموضوع دة انتهى وطلع

مشيت على حبوبه شالت مني صهيب قالت لي حركتك بطالهه بالحيل وانا دي زعلانهه منكك لكن الله يسهل عليك وباست كريم وادتو لي إمتثال ومشت دخلت المطبخ، إمتثال قالت لي طبعا انا م حتكلم معاك ي شهد طلعت وهي شايله كريم ومعاها احمد وصلنا العربيهه فتحته الباب إتلفتهه قولته ليهو احمد، قال لي اسمعي كلامي ي شهد أنا م زي اخوك؟قولته ليهو مع السلامه وركبتهه وإمتثال كانت بتبوس في كريم وضاماهو عليها بعدها ادتو لي احمد، صهيب قال ليهم ي جماعه استعجلو ورانا مشوار نحن، احمد عاين لي صهيب مساافهه واداني ليهو وقفل الباب وفضلو واقفين يعاينو لينا وصهيب إتحرك بأقصى قوتو كانو مفحط، عمي البواب لمن قال ليهو براحه ي ولدي براحهه

اول م طلعنا كريم قال ماشي ليهو قدام وانا ماسكاهو وهو بصارع فيني وبقول لي ماما بابا، لما بقيت ضاغطه عليهو بقى يبكي ويقالع فيني عديل، ضربتو قولته ليهو هس يلا م اسمع صوتك تاني يلا اترزع هنا، فجأه صهيب وقف العربيهه ونزل فتح الباب الورا وشالو مني وقعدو معاهو قدام وإتحرك،

م عاين لي حتى، كريم بقى يتونس معاهو وهو واقف على حيلو وصهيب متجاوب معاهو وكريم يضحكك كل شويه ويمشي على صهيب ويمسكو من لحيتو، وانا مخلياهم وبعاين بالشباك طبعا فضلو على الحاله دي لغايه م في لحظهه كدة عاينته لي صهيب بالمرايه لقيت دموعو جاريهه وهو بضحكك مع كريم، إتلفته قبل م هو ينتبه وغمضتهه عيوني

قبل م نطلع من الخرطوم نزل جاب لينا حجات من سوبر ماركت كدة وبعدها كريم نام رجع ليهو الكرسي لورا وربطو بحزام الأمان وبقى ماشي باقصى سرعه عندو وبشرب في سجاير شرب كميه هايله منها وطول الطريق م شرب غير مويهه بس...

ايوة انا كنت مقتنعه بالبعملو واساسا فكرتي كانت انو اخد منو حقي الشالو مني وبنفس الطريقه الهو إستخدمها واعيشو نفس إحساس الإستفزاز العاطفي العيشني ليهو هو، م حقد مني لا بس علشان يعرف إنو المبادرة بالثقهه ويجي وراها على طول خزلان بيوجع شديد،

عشتهه حياتي على الدوام وانا مكسورة ومستسلمه لواقع اي امر بقع على عاتقي، إستحملته الإتضطهاد دة من وانا طفله، دورة حياتي كلها كانت حوالين رجال انانيين تفكيرهم عقيم نظرتهم للمرة عبارة جسد او قطعه عجين يعملوها هم بالطريقهه العايزنها، إستحملت اشد انواع العذاب والظلم، كنت بشوف بعيني تعامل ابوي الزفت مع امي طول فترة حياتها وهي بالنسبه ليهو كانت خدامه م زوجه واي شي قدامو كان بشوتها بيهو حتى لو كانو ملان نار، حتى لو حله ملاح سخنه، دراسه كان ممكن تنفعني إتحرمته منها، عرسو لي بدون تفكير واحد مريض نفسي وكان ممكن يجيب اخري ودخلني في حاله نفسيهه حتى بسبب اهلو إتصنفتهه مجنونهه، خالي بدون مقدمات عقد لي وفرض علي الزواج فرض لغايه م أستسلمت وقلت خلاص رغم كل شي سعد غير نمط حياتي وخلاني احس بالإستقرار الداخلي بوجودو بعدها حصل شنو؟

فقدتو، بس حتى وانا فاقدة راجلي لسهه حياتي كانت كلها عبارة عن فرضيات وم كدة وبس بقت فرضيات وصفقات انا العضو المحايد فيها والمكاسب لصالح الأطراف التانيهه، لغاايه م فرضو علي حياة زوجيه جديدة وسافرت الخرطوم وبرضو إستسلمت م كانت في جواي افكار عن إنو الإعتراض على الحجات البتازيني حق مشروع لي انا ك مرة، بس بعد موقف صهيب العملو معي خصوصا انو انا ابتديت اثق فيهو، ابتديت اتجاوب معاهو، ابتديت اتقبل نمط الحياة الجديدة الإتفرضت علي، انا بسبب صهيب عدتهه شريط حياتي كلو صراحه م لقيت فيهو شي بفرح، م لقيت شي انا عملتو وكان علشان انا عايزاه كل حاجه عملتها في حياتي كانت عبارة عن فرضيات،

ياخي قبل م اتم ال 20 سنه انا متزوجه 3 رجال في سنتين او تلاتهه سنه بالكتير ليهه؟وعلشان شنو؟انا كمان بني ادمه بحس ومن حقي اعيش صح بالطريقهه الانا عايزاها، ليه دايما انا مقيدة بقرارات الحوالي؟

صهيب كذب، وإتحرمن، وشمت، ولأخر لحظهه كان شايف شهد القدامو عبارة عن حشرة وهو راكنها في ركن من اركان بيتو، وفجأة بكل بساطه إتغير وبرضو انا مطلوب مني انو انا اتقبلو مرة تانيه، إذا فكرته في مشاعرو هو الإتكونت جديدة جواهو تجاهي، طيب والكسرة الكسرني ليها قبل عادي انساها؟عادي اتجاوز كلامو السمعتو وهو بتكلم عني؟انسى كيف هو هبل بي قدام اهلو علشان يرضي ابوهو؟

في الواقع اذا ابوهو كعب ف صهيب اكعب منو بمراحل، وانا كنت متوقعهه إنو صهيب حيعمل كدة وحيرجع لي قطعه الارض لانو بالنسبه لي زول إشترى عربيهه هديه لحبيبتو في عيد ميلادها م بعيدة عليهو إنو يتلعب بعقلو بس الحاجه الما كنت متوقعاها انو يعمل الحاجه دي بالسرعه دي، اتوقعتو ياخد زمن، اتوقعته إني عشان اقنعو محتاجه وقت طويل وكنت متوقعه انو الموضوع حيكلفني اكتر من كدة، انا كنت عارفه نفسي بعمل في شنو بس هو حرفيا فاجأني لاني م حاولته استفزو ولا لمحته ليهو مجرد تلميح في موضوع قطعه الارض دي هو من تلقاء نفسو عمل كدة

كل التراكمات العشتها م خلت لي مجال افكر في إنو ادي فرصه تانيهه لزول غلط في حقي وإستغله عفويتي تجاهو م عندي الإستعداد لحاجه زي دي خلاص بطلته استسلم واتقبل واقع اي شي بجد، نحن النسوان على قدر م روحنا دي طويلهه و عندنا طاقهه تحمل عندنا حد لو وصلناه يبقى السلام على طه

فضلنا ماشين لغايهه العصر حتى دخلنا بلدنا، لما دخلنا انا م كنت مصدقه وملهوفهه عليها بجد بتلفت يمين وشمال، م كنت بتلفت علشان انا مبسوطهه بالبلد على قدر م كنت بشوف اي مكان مشينا عليهو انا وسعد هل هو إتغير ولا زي م هو، الحاجهه الوحيدة الباقيهه فيني حقيقه وجود سعد في حياتي هو الحاجه الوحيدة المحبباني في البلد دي

وقفنا قدام البيت صهيب نزل وشال صهيب، شفع الحله الكانو في الشارع كلهم اتلمو لما انا نزلته بقو يصرخو شهد جات شهد جات واتلمو فيني بقيت اسلم عليهم واحد واحد طبعا الحله بالنسبه لي شبه إتغيرت، بيت ناس سعد إتغير وبقى مبني بطريقه رهيبه، وبيت ناس حبوبه برضو نفس الشي فيهو تغيرات وبيت ابوي برضو، مشيت دقيت باب ناس حبوبه الباب فتح كان خالي التاج صرخته بصوت عالي قولته ليهو خاليي وإترميت في حضنو، بقى يقول لي او بتي اهلا اهلا حبابكك الجيهه كيفكك إن شاءالله طيبهه و...بعدها جات حبوبه وعماتي واخواتي برضو كانو في قلبناهو موال بتاع بكاء، ياخ انا بكييت بكى تقول عندي سنوات م شفتهم وصهيب دة بقو يتشاكلو فيهو كلهم حتى اخواتي الصغار، بعدها دخلونا في غرفه الضيافه، اول م قعدنا كدة جات عمتي فتحيهه كانت ملهوفهه شديد مسكتني وبقت تبكي وتقول لي قلبي مقطوع على جنى ولدي قلبي مقطوع على جنى حشاي الحمدلله إنك جبتيهو لي والله كنت جايه الخرطوم عشانو وشالت كريم من خالي وبقت تبكي بحرقه وتبوس فيهو، كريم مخلوع طبعا حالو حال اي شافع بقى يبكي ويقول بابا، لي صهيب وبقى كانو نافر منها وعايز يمشي لي صهيب وهو بصرخ بكلمه بابا، شالتو غصب وطلعت مشت بيهو...

خالي التاج قال لينا م متعود، قلته ليهو فعلا،

قال ليهو كيف اخبارك ي ولدي إن شاءالله طيب وامورك طيبهه واهلك كيفهم إن شاءالله م عليهم عوجه،

صهيب قال ليهو الحمدلله والله بسلمو عليكم هم زاتهم، فاطمه اختي جابت لينا مويه، وحبوبه وعماتي جو وبقو قاعدين يتونسو معانا و...

حبوبه قالت لي خالي التاج سوقو ي ولدي دخلو غرفه الضيوف خليهو يرتاح شويه ويغير ملابسو والحمام جاهز كان داير يستحمه وي شهد انتي زاتك ي بتي قومي غيري ملابسك وارتاحي شويه

صهيب قال ليهم معليش والله ي جماعه انا دة اعفوني لاني راجع وقدامي طريق طويل

خالي التاج قال ليهو راجع كيف ازول، م بترجع والله كيف الكلام دة، صهيب قال ليهو لا والله لازم ارجع اليوم بكرة وراي شغل مهم شدييد الناس منتظرني اليوم بس انا اجلتو وعندي مواعيد معاهم، حبوبه قالت ليهو ي ولدي الشغل ملحوق والعمر رايح إرتاح الليله دي وارجع بكرة الزمن زاتو إتاخر والشوارع م مضمونهه

خالي التاج قال ليهو حرم م بتمشي الليله ياخ نحن ضابحين عشانكم كيف الكلام دة عيب منك والله، عمتي رحمه قالت ليهو ي ولدي بالغته شهد اتكلمي مع راجلك اصلا اشغال الدنيا دي م بتنتهي، قولته ليهم بالجد ي جماعه الناس المنتظرنو ديل جاينو من خارج السودان وهو الليله إستأذن منهم وإعتزر ليهم عشان يوصلني ويرجع على طول م عندو طريقه لانو رابط لسانو معاهم ولو بكرة برضو إعتذر بتبقى مشكله في الشغل، بقى يعاين لي بإستغراب كدة وم رفع عينو مني نهائي، سكتو مسافه حبوبه قالت لي والله لو م رابط لسانك م كنا خليناك ي ولدي لكن نسوي شنوو، قال ليها اعفو لي ي حبوبه، خالي التاج قال ليهو سمح تتغدى وترتاح شويه بعدين اطلع م اسي، طلعته عماتي وحبوبه وخليناهم قاعدين مشيت الغرفه غيرته ملابسي لبسته لي جلباب ورقدته واديت وشي الحيطه، جات حبوبه قالت لي ي بت انتي عادتك للان م خليتيها لسه بتدي وشك الحيطه، فاطمه جات قالت لي ومالك ي شهد لا محننه لا مدخنهه امور نسوان الخرطوم دي شنو؟حبوبه قالت ليها ايا والله انا زاتي محتارة فيها جايه كأنها م متزوجه دة كلام دة ي بتي؟فاطمه قالت لي من قله الكوفيرات هناك يعني، م قالو في الخرطوم اي حاجه دايراها بقروشك بتجيك لحدي البيت حتى النسوان البحننو، قولته ليهم اي في بس انا م دايرة لانو بقت تعمل لي حساسيه وم بتمسك، حبوبه قالت لي سمح اتدخني لي راجلك دة ساي ي بتي، بعد مسافهه قولته ليها بنرفزة هو م بحب الدخان ي حبوبه، فاطمه قالت ليها ديل رجال الخرطوم ي حبوبهه ها بختكك ي شهد والله لا حنه لا دخان لا وجع راس

إتغطيت بالتوب وخليتهم بس ابدا م نمته كنت مغمضهه عيوني وبفكر الخطوة المفروض اعملها شنو، كيف حاقنع اهلي، حاقول ليهم شنو، وانا سرحته بعيد قريب الساعتين فجأة جات عمتي رحمه صحتني قالت لي شهد، ي بت شهد، قولته ليها ايوة، قالت لي قومي راجلك دة قام ماشي، قولته ليها طيب لبسته توبي وفتحته شنطتي شلته البطاقه وطلعته مشيت على إتجاه الباب لقيتو واقف ومعاهو عمي الطيب وخالي التاج، مشيت سلمته على عمي الطيب طبعا انا حتى هو كنت حاقدة عليهو شديد علشان إسترخص دم سعد بالقروش سلم علي بحرارة وانا قرفانه منو

عمي الطيب كان شايل كريم وكريم عايز يمشي لي صهيب ومادي ليهو يديهو عمي الطيب قال لي صهيب ولدنا خلاص إتعلق بيك ي ولدي ه، صهيب قال ليهو ولدكم بقى ولدي خلاص وشالو منو، عمي الطيب قال ليهو الله يديك العافيه ي ولدي، خالي التاج قال ليهو يلا ي ولدي شان م تتأخر والدنيا لو ضلمت الشوارع م بتنضمن ربنا يسهل عليك إن شاءالله وانا زاتي زواجي احتمال يتم قريب ضروري تجو انت واهلك، صهيب قال ليهو ابششر م عندك مشكلهه بنجي طوالي، عمي الطيب قال ليهو يلا ي ولدي طريق السلامه إن شاءالله كنا نتمنى نقعد فترة اطول من كدة عشان في مشاريع داير اناقشك فيها لكن اديني رقمك، صهيب قال ليهو جدا ي عمي سجل عندك...وبقى يمليهو في الرقم، عمي الطيب قال ليهو خلاص ي ولدي بينا مكالمات إن شاءالله،

مشو بعيد خلونا واقفين انا وهو وكريم، هو م قادر يقول شي ساكت بس بعاين لي وانا لافه منو وشي وبعاين في إتجاه ناس خالي، وكريم بتكلم معاهو وصهيب حاضنو عديل، قولته ليهو جيبو، عايزة اشيلو منو كريم ابى، قولته ليهو كريم يلا، بقى يبكى، قال لي بصوت مبحوح وهو دموعو في حدقات عينو خليهو بالهداوة ي شهد، قولته ليهو لو بالهداوة م بجي انا عارفاهو قلعتو منو ووهو ببكي قولته ليهو إتفضل دي بطاقتك معليش نحن ناس على قدر حالنا وزي م شايف م بتاعين صرف من البنوك وكدة وبعدين انا في غنى عنها وم هحتاج ليها والله كفايهه على جدا قطعهه ارض جدي الرجعت وحالتكك الانت فيها دي...

...