الفصل الثامن عشر

، قال ليها يلا ي حجه إتلفت لقاني في وشو ومن غير تردد رفعتهه يدي واديتو كف، قولته ليهو عارف انا اديتك الكف دة ليهه صح م اعتقد محتاج اشرح ليك، ليهه انت حقير كدة؟دي رجولتكك؟علشان قطعهه ارض انت كنت جاري وراي وبتنبح كل دة عشانها؟كان تقول لي كدة من الأخر ياخي إذا جدي المالكها بحق وحقيقهه تحت التراب شن بسوي بيها انا بس الكذب والتمثيل لزومو شنو؟بس انت عارف اصلا دي حالهه الكلاب، زي لما يكونو شايفين ليهم لحمه ونفسهم فيها بعملو كدة علشان ياخدوها انت نفس الشي م فرقته عنهم للأسف، م محتاجه اشرح لي اهلك انت عملته شنو بفضل انت تشرح ليهم، اتحركته من جمبو ومشيت على هيا لمن قامت على حيلها قلته ليها فعلا انا يمكن شكلا م بشبهكم ولا بشرفكم في إجتماعياتكم زي م قولتيها بس على الأقل انا من جواي انضف منك ومن اخوك وابوك القذر داك واقول ليك حاجه يااخي انا الما بشرفني اكون جزؤ منكم وعلشان م اغلط في الباقي عشان م ليهم ذنب انا م بشرفني ابقى مرت اخوك اساسا، اهلي لما ادوهو إفتكرو نفسهم مدين بتهم لي راجل م باطل شغال عبد مأمور لأبوهو، قلتي لي ابوس يدي سماء على ارض علشان متزوجاهو؟عايني في وش ولدي كريم كويس، لو في حور عين رجال في الجنه في الأرض ابوهو حيكون حور عين الارض لو الشغله بالشكل، لكن الشكل دة ي الحبيبه عمرو م كان ولا حيكون مقياس للرجوله طبعا دة عند رجالنا الحمشين المالين جلاليبهم في البلد الواحد اوطى صوت ليهو يسمع حله كامله، والراجل كان شكلو سمح وهو باطل بنطبق عليهو لفظ ذكر م راجل عشان بتفرق فهمتي ي السمحه؟والذكر اخوك دة بنفع مع نوعيهه صحباتكك ديلك ف حلال عليهم ولا اسفا عليهو ودامها دي نظرتك الله لا يكرمك بواحد زيو،

الناس دي وشوشها كلها اتلونت وبقت م بتتفسر وحصلت حاله صمت كدة غريبهه، حبوبه جات قالت لينا في شنو ي ناس مالكم، شهد ي بتي في شنو مالك ي بتي؟قولته ليها ماف حاجه ي حبوبه خلي ولد ولدك يحكي ليك في شنو، عايزة امشي جات امتثال مسكتني قالت لي شهد اوعى تقولي طالعه مخليه ال...قاطعتها قولته ليها اخلي البيت؟لا الحماقهه دي انا م حرتكبها، مشيت على صهيب وطبقتهه ليهو يديني قولته ليهو احلف ليك بشنو كان خليتك انت وابوك تتهنو بيها؟خليتهم واقفين ومشيت خليتهم، طبعا لغايه م وصلته غرفتي م كنت مستوعبه انا عملته شنو وجبته الطاقه والقوة دي كلها من وين والكلام دة طلع مني مرتب وبالطريقهه دي كيف م عارفهه، بس الحاجه الوحيدة العارفاها انو انا تعبته من دور الضحيهه الكل مرة انا بتفرض علي اعيشو دة، تعبته من فكرة اني استسلم للأمر الواقع واتعايش معاهو، خلاص وصلتهه الحد بقى م فيني حيل اني اسكت على كل ظلم انا بتعرض ليهو، على كل إستغباء بعيشوني ليهو كانو اهلي او غيرهم م عندي طاقه اتحمل اكتر من كدة وربي، دخلته غرفتي ورقدتهه جمب ولدي وقعدتهه ابكي، م عارفه انا بكيت ليه بس التصرف وجعني شديد لاني إبتديت اثق فيهو، ابتديت احس انو في امان دخل حياتي وحياة ولدي، حتى اني شبه ابتديت اتقبل واقع حياتي معاهو والحاجه دي م جايه من فراغ هو العمل كل دة علشان يوصلني للمرحلهه دي،

تحت وسط حاله الصمت ديك احمد قال ليهو شايف؟ حرفيا دة المعنى الحقيقي ل"إتقي شر الحليم إذا غضب"البت دي ليها كم شهر معانا م حصل سمعنا نبرة صوتها عاليه في الكلام سااي، انت وابوك الخليتوها تصل للمرحله دي وانا لو مكانها م كنت حأكتفي بي كف واحد ابدا، محمد قال ليهو عليك الله انت ي صهيب انت حتعقل متين؟م خجلان من نفسك وانت مباري ابوك كدة زي المراهق؟احمد قال ليهو المراهق زاتو بتمرد قول زي شافع الروضه، والغريبه انت وابوك الشحمه والنار يعني بتتفقو كيف ووين والمقابل شنو لمن بتوافق على خططو القذرة دي يعني؟

هيا قالت ليهم م تطلعو من دور المثاليه المبتذلهه الانتو داخلين فيها دي؟

احمد قال ليها المثاليهه دي متغمصاها انتي في شاشه التلفزيون البتطلعي فيها دي، نحن بنتكلم عن الواقع العايشنو نحن دة،

صهيب طلع امو بقت ماشه وراهو وتتكلم معاهو صهيب ي ولدي م تطلع، قال ليها ي امي طالع انا عليك الله م تمسكيني، قالت ليهو كل مرة تعمل كدة ي ولدي مرة واحدة بس اسمع كلامي، طلع وم اشتغل بيها بقى ماشي وهي جاريه وراهو، ركب العربيه دقت ليهو القزاز نزلو قال ليها ي امي ادخلي جوة وم تلحقيني، قالت ليهو سمح اعمل حسابك وانت سايق ي ولدي، سوق غلى مهلتك م تحرق قلبي غليك واتصل علي لما تصل، اتحرك مشى وخلاها واقفه دخلت البيت تتكلم براها وتقول استغفر الله العظيم ي رب، استغفر الله العظيم، ي رب تجيب العواقب سليمه، ي ربي تحفظو، ي رب تتلطف فيهو ي رب، حسبي الله ونعمه الوكيل، حسبي الله ونعمه الوكيل، وصلت لقتهم بتناقشو، قالت ليهم كفايهه، كفاايهه الله يرضى عليكم تعبتوني ومحنتوني في دنيتي دي، اريتكم لو كنتو شحم وراح في البطن ساي بدل البتعملو فيني دة، دي م ولادة دي غضب، احمد مسكها قال ليها ي امي اهدي عليك الله روقي وم تزعلي نفسك وترفعي ضغطك سااي يعني ولدك وراجلك جداد عليك؟م ياهو حالهم حياتهم كلها عبارة عن صفقات على حساب حياة الناس، هيا قالت ليهو البتقول عليهو كدة دة ابوك ي احمد ابوك وعمل كل دة عشان يوفر ليك الحياة الانت عايشها اسي دي، قال ليها اي حيااة دي؟قصدكك النحن فيها دي حياة؟انتي عارفه في ناس عايشين في رواكيب وعايشين حياة احسن من حياتنا دي عارفه ليهه؟الحياة الحقيقيه بتكون براحه البال وراحه البال دي نحن فاقدنها، قالت ليهو دامك عايز عيشه الرواكيب دي المقعدك هنا شنو امشي جيب ليك عيدان ووقفهم واعمل ليك راكوبه، حبوبتها قالت ليها هيا، قالت ليها شنو هيا هيا كلامي م صح؟ابوي اولادو جاحدين للنعمه ي حبوبه قدر م يعمل يبخسو فيهو يعني هو مجبور عليهم مثلا؟كفايه جدا انو كبرهم وعلمهم ووصلهم للمراحل دي، محمد قال ليها بما انو عقليتك نفس عقليه ابوك ف النقاش معاك عقيم للأسف، امهم قالت ليهم كفايهه، قولته ليهم كفايه؟مش البيت دة؟ اها انا دة طرفي منو ارتاحو بعد كدة، مشت فوق لبست توبها وشالت شنطتها الصغيرة وطلعت، حبوبه مسكتها قالت ليها ي عواطف، قالت ليها ي عمتي م تمسكيني عليك الله، انا الاولاد دي هدو حيلي على شنو بس انا استحمل دة كلوو يااخي؟محمد جا قال ليها امي، قالت ليهو ولا كلمه ي محمد، قال ليها امي انا محمد ولدك اسمعي كلامي ياخي مافي بيوت م بتحصل فيها نقاشات ومشاكل، قالت ليهم م بالإسلوب دة ولا بالكترة دي، اظن نحن البيت الوحيد اليوم واليوم التاني فيهو مشكله على شنو ياخي؟شال الشنطه من يدها قال ليها امي، جات هيا مسكتها قالت ليها سوري مام انتي بس هدي اعصابك اوعدك انو تاني م حتتكرر، قالت ليها مش في البيت دة؟والله تتكرر في اليوم الف مرة، امتثال جات قالت ليها وبعدين ي عواطف ي اختي الزول بحل مشاكل بيتو ولت بمشي بخايها وراهو؟كان كل زول بعمل كدة م البيوت دي حتتهدم بالمشاكل بس، قالت ليها صبرتهه العمر دة كلو لقيت منهم شنو؟بقيت تبكي وبقو يهدو فيها لغاايه م ساقوها طلعوها غرفتها وجا محمد قال ليها الضغط لقاهو منخفض، قال ليهم محلول ملح وشويه سكر في كبايه سرعهه، مشت هيا تجيبو ليهم، احمد قال ليها عليك الله ي امي عشان ولدك وراجلك ديل م تزعلي نفسك ياخ، امتثال قالت ليهو انت اسكت خلاص اقفل الموضوع دة، جات هيا شربوها المحلول وقعدو معاها شويه لغايه م هدت بعدها طلعو، بعد م طلعو حبوبه قالت ليهم امكم دي الا ترموها بجلطهه حتى ترتاحو عيال الله دة نهائي م اداهم عقل الله لا بارك فيكم ومشت خلتهم

انا في غرفتي نزلتهه من سريري مشيت إتوضيت وجيت صليت لي ركعتين وبكيت بصلي وببكي وفي كل سجدة ببكي بي صوت حتى، اثناء م انا بصلي جات امتثال داخله لقتني بحالتي دي، بعد م خلصتهه قالت لي ربنا لطيف بعبادو وم بضيع حق مظلوم لجأ ليهو ابدا، قولته ليها إن شاءالله، قالت لي صهيب عمل شنو هو وشال منك شنو؟سكتته م رديت عليها، قالت لي عارفه ي شهد والله انا حسيت ومرتين قلت عايزة احزرك بس حسيتك مبسوطهه قلت مافي داعي ياخ، سمير ود خالتي دة انتي م بتعرفيهو ي شهد، م عندو إنسانيهه م اكزب عليك حاجه عايزها دي حيتخابث بأي طريقه لغاايه م يحصل عليها، ياما وياما اتلاعب على خلق بالطريقهه دي

قلته ليها م اختلفنا بس صهيب ليه بس يعمل كدة وعلشان شنو؟علشان قطعهه ارض؟في جبن اكتر من كدة؟ وبعدين انا... سكته وم قدرته اكمل وبقيت ابكي، بكيت بحرقهه لدرجه انها جات حضنتني وبقت تهدي فينا وتقول لي خلاص والله ي شهد الكذب والخداع حار بالذات لما يكون من زول قريب ليك او انت ابتديت تثق فيهو بس الحجات دي بتحصل لينا عشان نتعلم منها م علشان تكسرنا فهمتي!!

طلعت خلتني وانا ببكي، بكيت الليل داك كلو وانا بتحسر على حظي الزفت في كل حاجهه، كل نمط حياتي غلط حتى البتفرض علي وبستسلم لواقعو اول م ابتدي اتعايش معاهو بيدي نتيجهه عكسيهه

عدت اسبوعين وانا في الاسبوعين دي يمكن اكون طلعته 4 مرات بالكتير، حتى ولدي حابساهو عندي ونهائي م بخليهو يطلع، في يوم شالتو مني حبوبه قالت لي حابساهو الوقت كلو خليهو يطلع يحوم في البيت الولد م عندو ذنب كمان وانتي زاتك اطلعي اقعدي مع الناس ي بتي والله نحن ديل ولا شايلين منك ولا زعلانين منك في النهايه الحق دة حق وولدي دة انا اصلي بقيت م بتفاجأ بي اي شي بعملو وفترته والله فترته من كترة الكلام، اتكلمت معي كدا بعدها شالتو وطلعت، قعدته قريب ااساعتين لما حسيت بالملل من التلفزيون وكدة، قلته امشي اجيبو، نزلته لقيت سارة قولته ليها كريم وين؟قالت لي برة مع بابا في الحديقهه، طلعته مستعجلهه وصلته محل قعدة الحديقه اتفاجا بي صهيب وابوهو قاعدين مع بعض وكريم ماسك في صهيب وبلعب معاهو وصهيب بتونس مع ابوهو وابوهو بقول ليهو اوضاع البلد دي شويه صعبه اليومين دي ماف سيولهه زي م شايف، صهيب قال ليهو الحاصل شنو؟قال ليهو والله العمله واقعه الارض وطباعه القروش الجديدة وتعويم الجنيه في البورصه جاطت كل شي وزي م انت شايف صفوف في اي حته عيش، بنزين، زحمه مواصلات اي شي، قال ليهو ياخي الناس بتبيت في صف البنزين انا امس جابو لي غفير العمارة من السوق الأسود، ابوهو قال ليهو ليه؟كان تضرب لي بتصل لبتاع الطرمبه يوصلو ليك لمن يجي، قال ليهو عرباتي الإتنين مبركنات هنا خلي يملوهم لي خلاص، ابوهو قال ليهو انت م تجي تقعد هنا دة ي ولد، صهيب قال ليهو لالا انا قعدة البيت دة م بتنفع معي اخير لي شقتي دي، وقفته على مساافه قريبهه منهم بعدها قولته ليهو كريم تعال هنا، بقو يعاينو لي وهم متفاجئين، قولته ليهو يلا تعال هنا بسرعه، فضلو ساكتين وكل واحد بعاين للتاني، صهيب نزلو قال ليهو يلا امشي لماما، كريم مسك فيهو وقال ليهو بابا، مشيت بدون اي تفاهم دخلته وسططهم وقلعتو قلع منو، كريم بقى يبكي ويقول بابا، بابا، قولته ليهو دة م ابوك فاهم ولا لأ؟يلا اسكت هس، دخلته البيت لاقيت عمتي عواطف قالت لي كرر علي مالو ببكي البكاهو شنو؟قولته ليها ولا اي شي قله ادب منو سااي، دخلته غرفتو وبكى كريم دة غضبني غضب لدرجه انو إتجبرتهه اجلدو، جلدتو لمن نام من البكى، بالرغم من اني زعلته من نفسي لأني عملته كدة بس م عايزاهو يقول للحيوان دة بابا، م عايزاهو يتعلق بيهو ولا اي شي فلازم اعمل كدة عشان ابعدو منو واخليهو بعيد منو تماما

الأربعاء 18/ديسمبر "ركن نقاش في جامعه الخرطوم شارع المين محتواهو

"زي م شايفين ي جماعه كل شي غالي، ياخي ابسط شي كافتريات الجامعه اكلها بقى غالي، الطباعه في المكتبات غاليه يعني بدل م الشيت اشيلو ب 5 جنيه اسي بقينا نشيلو ب 20 جنيه واكتر وهو الواحد فينا مصاريفو كلها م بتكون تامه 30 جنيه فيها مواصلتتو وفطورو وباقي إحتياجاتو، لما يرفعو سعر حاجه في الكافتريا، او المكتبه، او غيرها قبل م تشتري بناء على وضعك فكر في وضع الأقل منك هل هم حيقدرو يشترو؟هل هتكون عندهم الإستطاعه العندك انت؟عشان كدة لو زاد جنيه على كل حاجه مفروض نحن نعترض عشان لو قبلنا وإتقبلنا الحاجه دي الناس دي زياداتهم م هتقيف، عشان كدة نحن كلنا نعتصم ونرفض تماما اي زيادة بتحصل و نحن الشارع دة حنطلعو، الكجر ديل حنواجهم بنخاف منهم نحن كمان؟اكيد لا ي جماعه نحن في المطالبه بحقوقنا ابدا م بنخاف ولا بنتراجع،

وحق اخونا عاصم حنجيبو وحنستمر لغايه م يصدر حكم الإستئناف، كلامنا ليكك اسي دة بس عشان عايزنكم تكونو جاهزين تحت اي لحظهه حننزل الشارع وم حنتراجع ابداا...

اليوم التاني وانا في المطبخ سامعه امتثال بتقول"خالتي تعالي شوفي اهلك الليله قايمين مظاهرات فووق، بعد خلصته الفي يدي طلعته لقيت حبوبه وإمتثال قاعدين وإمتثال بتقول ليها قالو العيشه عملوها ليهم ب 3 جنيه عشان كدة قامو، حبوبه قالت ليها 3 جنيه مرة واحدة؟امتثال قالت ليها والسعر قابل للزيادة في إحتكار للدقيق ي خالتي كان التجار كان جماعه ولدك ديل المهم فعلا الناس دي معاها حق صفوف في اي مكان يااخي البلد بقت كلها واقفه على رجل واحدة الناس دي فترت من الوضع الحاصل دة يااخي

م ركزته معاهم رجعته غرفتي، عدت 11 يوم في يوم جمعه كدة جاتني امتثال في غرفتي قالت لي طبعا البلد مقلوبه وانتي ي يمه تحضري في المسلسلات وم جايبه للدنيا خبر، قولته ليها في شنو؟قالت لي الناس طالعه مظاهرات دقيقه، شالت الريموت وبقت تغير لغايه م جابت قناة اخباريه كدة قالت لي شوفي، طبعا دي قناة هيا الشغاله فيها، بقينا نحضر فيها وفعلا كان في فيديوهات عن الأحداث الحاصله وكذاا، بقت تقول لي واي الناس كتيرة وجادة كمان، قولته ليها ديل هنا؟قالت لي عطبرة، مدني، والخرطوم، والقضارف وفي كذا منطقه تاني طلعت

قولته ليها في ناس ماتو؟قالت لي اي في واحد في عطبرة وفي واحد في القضارف وتقريبا تاني في م متأكدة انا غايتو، قولته ليها واي مات؟ولييه بكلوهم يعني؟قالت لي دي اساليب القمع البلد دي م فيها اي ديموغراطيه للتعبير عن الراي قولته ليها والحكومه موقفها شنو من الكلام دة؟قالت لي اكيد حيلفقو الأكاذيب عشان يفشلو الناس دي زي م حصل في احداث 2013 بكرة حينهوها قولته ليها يعني في النهايه الناس بترجع عادي؟قالت لي اي يوفرو ليهم احتياجاتهم الطالعين عشانها بس بروقو

قولته ليها اهاا، قالت لي م علينا اها بكرة راس السنه دايرة امشي اجيب الالعاب والشموع والزينه للبيت، قولته بيها لشنوو يعني؟قالت لي عشان نحتفل، قولته ليها راس السنه دة شنوو؟قالت لي بكرة داخلين على سنه جديدة فبنقوم نحتفل بي يوم 31 ديسمبر بإعتبارو ليله راس السنهه، المفروض نطلع نحضر حفلهه في صاله إسبارك لكن سمير قال لأ لانو الاوضاع م تمام م شايفه زاد عدد الحراس كيف؟قولته ليها اها، قالت لي غايتو الفترة دي ربنا يعديها على خير

اليوم التاني بالعصر كدة جات حسيت البيت جايط وفي اصوات كتيرة، عرفته انو ديل اهلهم جاين يحتفلو معاهم م طلعته ليهم ابدا، كريم كان معاهم تحت هم بجو يشيلوهو انا طبعا م بقدر اقول ليهم م تشيلو او كذا، بعد المغرب بشويه جاتني إمتثال شايله كريم وببكي، قالت لي شهد امسكي، قولته ليها مالو، م ردت لي وطلعت مستعجلهه، بقيت شايله كريم واهدي فيهو شلتو وفتحته الباب سامعه صوت جوطه وعمتي عواطف بتصرخ وبتقول ليهو الله والله ي سمير، ي عمتي اتكلمي مع ولدك ي عمتي داير يكتل لي ولدي ي عمتي والجوطه كانت كتيرة، نزلته مستعجلهه فجأة اشوف حبوبه وعمتي واخوات ابو صهيب كلهم متلمين فيهو وماسكنو وإمتثال وهيا ماسكين في احمد وبجروهو، وعمي سمير دة بقول ليهم بأعلى صوت عندو م تمسكوني قولته ليكم برصصكم كلكم معاهو، حبوبه وقفت وقالت ليهو سمح اكتلني ي سمير، اكتلني امشي في جنازتي واكتل ولدك بعدي لكن انا حيه كدة م بتكتلو، رصصني يلا م تقيف ابدا اصلك غضب من يومكك، قلعت منو المسدس قالت ليهو زول بكتل جنى بطنو، قال ليها كان زي ولادتي دي اخير اعدمهم واصلبهم كمان، الليله اليوم دة الناس كلها عرفت انو ولد سمير كان متظاهر ومعتقل ضمن الزفاتي السفاء المطاليق ديلك ومرمي في المعتقل ليهو يومين، ناقصك شنو طالع تتظاهر؟قلهه ادب؟بلطجهه وكلام فارغ صح؟خلاص وسائل الترفيه انعدمت طالع لي مع العطالهه ديلك؟اريتو الجلد الإتجلدتو دة يكون جاب راسك، عاجبك العملو ليك في جسمك دة؟انا من زمان لو بضربكم كدة اسي كان بقيتو رجال صاح ي عفن،

عمتو قالت ليهو مالك ومال المشاكل ي ولدي المطلعك تتظاهر شنو الناقصك شنو بس؟اسي شوف جسمك دة، شوف حالتك دي، انت قايل هناك بفرزو ود الوزير من ود الغسال؟

ابوهو قال ليها لالا ي نجوى دواهو عندو، من بكرة يستف شنطو واسي بقطع ليهو تزكرتو يمشي لي عمو محمود في قطر طوالي امو وحبوبتو زاتهم يمشو معاهم قعدة ليهم هنا تاني ماف

احمد قال ليها عشان م بفرزو عشان كدة كنت معاهم قدام وحأكون قدام، وي ابوي يمكن فعلا انا ك ود وزير م عاطل ولا سفيه ولا مطلوق عشان انا ود وزير، لكن انا ك احمد بمثل نفسي بس من غير م تكون انت ابوي ف أنا في البلد دي عاطل، ومقطع، وسفيه، ومطلوق وبتحاكم على اقل مخالفه... وكل شي سيئ بتعاقب علييهو عشان انا م ود وزير ولا ود كوز ولا اي شي، ودي الحاجه الخلتني اطلع واشارك الناس دي في قضيتهم لانها بتمثلني انا ك مواطن قايمه بزاتها م عشان انا ولدك انت، الضرب الانت بتتكلم عنو دة والعلامات الانت شايفهم ديل ي ابوي ممكن انت شايفهم حاجه ممكن ترهبني وتخليني ابطل اطلع زي م مفكرين الأغبياء الانتو مشغلنهم ديل، بس بالنسبه لي انا بالعكس دي حاجه بتزيدني قوة، ، وحتخليني كل يوم انزل الشارع واكون قدام مع الناس وكل م يعتقلوني ويفكوني حيلقوني في الشارع مرة وإتنين، وتلاتهه كمان، خايف على منصبك ولا سمعتك؟طيب انا في المواكب وفي حاله اعتقلوني اسمي احمد بس م احمد سمير، وم هجيب سيرتك لا بالخير ولا بالشر، باخد ايامي وبتجلد جلداتي زي م انت شايف كدة وبجي طالع وتاني برجع الشارع اكمل وانت قايل شنو ي ابوي الجلد دة م اسلوب تخويف بالعكس نحن اتجاوزنا المرحله دي من زمن كنا في المدارس، الجلد الاسي نحن بنتجلدو في المعتقلات دي تحفيزي وزي الغربال بغربل وبطلع الرجال الجدجد، قطر دي سفر ليها مرتك وامك وبتك واسرتك كلها، انا قطر دي يمكن افكر اسافر ليها سياحهه بس بعد شنوو؟بعد م تسقط، وللزمن داك م حيكون في لساني شي غير تسقط بس، عارف ي ابوي انا طالع من المعتقل واكتر هتاف حفظتو وبردد فيهو حتى وانا جوة المعتقل قولتو في وش كلاب الامن حقنكم ديل للدرجه الخلتهم يضربوني كدة شنو؟

والهتاف بتاع حريه سلام وعداله، عشان نحن في البيت دة فاقدين الحاجه دي، وقبل اي شي مفروض يتطبق في بيتنا عشان انت عمرك في البيت دة م بقيت لينا ابو، انت طول عمرك كنت دكتاتور م شفنا منك غير العصبيه والتعامل السيئ والبذيئ، عرفته ليه انا طالع؟عشان الموضوع بالنسبه لي شخصي قبل م يكون وطني، ويا ابوي ابشركك الممطورة م بتبالي من الرش ...

...