الفصل التاسع

وقعتي في الأرض دي لما فتحته لقيت نفسي في المستشفى ومركبين لي درب ومعي مريم وفاطمه وببكو، قولته ليهم انا وين سعد وين؟قمته على حيلي مريم مسكتني قالت لي خلي الدرب ينتهي، قولته ليها لالا انا ماشه، سعد، فكوني انا ماشهه قلتهه ليكم،

الدكتور جا قال ليهم في شنو؟فاطمه قالت ليهو قالت الا ماشه، قال لي لسسه عندك مضاعفات عشان كدة في فحوصات لازم تعمليها،

فكيت الدرب من يدي بكل قوتي وقولته ليهم انا ماشه سعد وين، طلعته جاريه بي جلبابي داك وم معاهو اي شي وهم طلعو جارين وراي مسكوني، قولته ليهم انا ماشه لسعد، خلوني امشي لسعد قولته ليكم اسي بكون رجع وداير الفطور، انا ماشه، بقو ماسكني وجارين معي والناس كلها ونحن مارين تعاين لي، وصلنا قريب للبيت فجأهه اشوف الناس متلميهه كميهه قدام البيت، جريت عليهم بقيت اقول ليهم في شنو؟مالكم متلمين هنا؟امشو يلا بيوتكم م تتلمو كدة قدام البيت، بعد مقالعهه دخلوني البيت وكانت اصوات البكى ماليهه البيت وعمتي فتحيهه دي تشيل وتبكي وتشكر في سعد والناس تهدي فيها وانا اصلي م مستوعبه، بقيت اقول لي اي زول ببكي قدام بتبكو لشنو انتو؟سعد م مات، والله م مات يخواني انتو بتبكو على الزول حي؟اسي بجي اصبرو بس صحى من الصباح قال داير ليهو عصيدة بملاح روب وانا عملتها ليهو جاهزة واسي حيجي يفطر، اصلا هو قال م بتأخر، فجأهه احس بي كف في وشي، لما استوعبته لقيتها حبوبه وهي بتقول لي راجلك مات ي بتي مات، قلته ليها م مات قلته، والله م مات، م مات، جريت على إتجاه بيتي وقعدتهه في الأرض وبقيت اكورك زي الطفلهه، واقول ليهم م مات، سعد م مات ي اخوانا سعد م مات، جات شوق اختي وقعت جمبي قالت لي شهد اختي اتصبري ي شهد

ف بقيت اقول ليها

اليلهه وووووووب ي شوق اختي، امشيي وييين انا تاني واقول ي منو تااني، مات ي شوق ماات وحرق حشاي، مات وم فضل لي وراهو شي مات وخلاني لا تالي لا والي، اريتو كان سمع كلامي وم طلع من البيت، والله قام من الصباح حلب لي البقرة حتى داك جردلو الحلب فيهو من حتتو م رفعتو عملته ليهو الشاي قعدنا في العناقريب تحت ضل الشجرهه دي قولته ليهو م تطلع الحواشه الليله الجو زاتو مغبر شديد، م تمشي الخلا الليله انا اصلا قلبي كان قابضني وكنت حاسهه انو حيحصل ليهو شي، قالي لا بمشي بحش القش القايم فيها وبرجع افطر في البيت اريتو كان سمع كلامي اريتو!!!

احييييي ي الله شلته مني اهلي كلهم جدي م تم 6 شهور واسي شلته حيطتي البميل عليها الزول الوحيد اللماني من شتات الدنيا دي شلتو مني م فضلت لي زول في الدنيا دي الله ماكا عادل معي نهااائي ي الله لييييهه ي الله عملته شنو في الدنيا دي غضبان علي كدة بتحرق حشااي على اهلي واحد ورا التاني

شيلي الصبر ي اختي شيلي الصبر

احيييييييي ي شوق اشيل الصبر كيف بس كدة وريني اشيلو كيف وانا...

"اسكتي سككت حسسسكك ان شاءالله بركه المغارب دي الببكيك شنو؟مش كتلتيهو؟دخلتي علينا بالساحق والماحق الله لا وراك خير في الدنيا ولا في الأخرهه، ولدي ولد الهنا والسرور، ولدي لسسسهه صغييير وم شاف للدنيا دي شي، ولدي لسسسهه حنه عرسو من اظاافرو م طلعت، ولدي مات عرييس لا شاف جنا ولا لحق ياخد رضااي كتلتيهو ي ام سعد شيين، من يوم م دخلتي عليهو وهو المصايب واقعه في راسو، محل م تمشي تختي رجلكك تجري وراك المشاكل، اريتو كان سمع كلامي وكلام ابوهو واهلو كلهم وم عرسكك، اريتو كان سمع كلامنا بس، وكمان بتبكي عليهو؟ الباكيالو شنو يبكو عليك بركه الله اسكتي ي المابتشبهي النسوان، قومي من ارضكك دي الرضى الماتلقيهو من الله

جا سامي قال ليها بنهرة امي دة شنو البتقولي فيهو دة انتي، سعد تحت التراب النقاشات لزومها شنو خليها تعمل العايزاهو م شغلتك بيها، قالت لينا انا امو وجعتي عليهو اكبر، قال ليها كان وجعتك عليهو اكبر احترمي ميتو دي وم تخلقي ليك مشكله من ماف تعالي يلا، ساقها وطلع،

طول اليوم انا قاعدة في ارضي ومتكيه في الحيطه والناس قدر م حاولت تقومني م قدرو، جا عمي الطيب ومعاهو خالي التاج، عمي الطيب قال لي ي بتي قعدتك هنا طول اليوم دي م بتفيدو بي شي، قولته ليهو وينو سعد ي عمي؟ مشى وين؟قال لي سعد تحت التراب ي بتي ادعي ليهو ربنا يثبتو عند السؤال، خالي التاج عايز يقومني قولته ليهو خالي التاج انا دايرة سعد امشي جيبو لي، وهم بتكلمو معي وببكو، قولته ليهو هو قال لي انا ماشي وجاي راجع افطر هنا حتى طلع هو وسامي سوا وينو سامي نادوهو اسألوهو منو خلاهو وين؟ خالي التاج م قدر يقيف مشى وهو ببكي، عمي الطيب قال ليهم قوموها من هنا دخلوها وغيرو ليها ملابسها دي وبعدها مشى

اخواتي قوموني دخلوني جوة البيت، قلته ليهم رقدوني في سريرو دة، رقدته ومسكته في مخدتو شديد وبقيت ابكي قولته ليهو سعد انت قبل لحظات كنت معي هنا، قبل لحظات كنت راقد في السرير دة احييييي ي قلبي احي

بقيت سرحانه وانا دموعي جاريه وبفكر فيهو وفي كلامو قبل م يطلع وفي كل فترة نحن عشناها مع بعض، معقوله في لمح البصر كدة اللقاهو ماف؟طيب وانا؟خلاني لمنو وهو الكان بقول ليك انا باقي ليك لمن يشوفني سرحانه ومتضايقه من المصايب البتحصل لي دي، كان بحب يطمني دايما وبقول لي انا عوجهه بتجيني ماف، كان عارف انو العوجه البتجيهو هو دة بتعوجني انا قبليهو

سعد بالنسبه لي م اخد مكانه الزوج بس جواي لا هو اخد مكان ابوي وامي الإتوفو، وفقدي ليهو كأني فقدتهه اضعاااف الفقد الفقدتو لي اهلي، كأني خسرته اهلي مرتين وعشتهه نفس الوجعهه وعلى اسوأ كمان، زواجي منو م كان فترة، قعادي معاهو م كان ايام وبتتحسب في الصباح وخلاص انا حياتي حسيتها ابتدت وانا معاهو بس حتى هو في نص الطريق خلاني زي امي وزي ابوي وجدي حتى، كل حاجه في الحياة دي انا اتعلق بيها ربنا بستعجل في اخدها مني ي ربي م بستحقها؟

اسوأ ايام حياتي عشتها في الأيام الأولى من وفاتو كل حاجه جواي م كانت مستعدة تتقبل فكرة انو سعد دة اتوفى، م كنت بنوم ليل ولا نهار، ايامي كلها شايلاها بكى، بصحى نص الليل بصرخ، وللحظه كدة لما اكون هاديه كنت بكون عايشه في محيط حياتنا انا وسعد وبكون بتزكر في عيشتنا الكنا عايشنها مع بعض وتعاملو معي وكل شي في اللحظه دي انا بكون عايشاهو في مخيلتي كأني بعيد في الأحداث وبعيشها مرة تانيه في عقلي، م كنت باكل ولا بشرب خالص واي شي دخل بطني بستفرغو، وبقيت زي المجنونه حتى احيانا بتكلم براي واتحولته لي حاجه كدة مبالغه في الصغر، وحالتي كل شويه بتزيد سؤ لدرجه انو انا بقيت م بقدر اتحرك حتى الحمام بسندوني ليهو سند، حبوبه قالت لي عمي الطيب البت دي انا بطلعها من بيت الحبس بوديها المستشفى بحالتها دي بتموت شهر كامل البت دي بتضيع والله، قال ليها كويس سوقيها، لما كلموني قولته ليها انا م ماشهه، قالت لي لو عندي ذرة مكانه عندك قومي ارح ي بتي انا والله قلبي دة اتأكل من جوة خلاص اموت ارتاح انا كمان من العذاب دة؟عشان م تزعل وافقته ودوني المستشفى مع خالي التاج كانو شايلني شيل،

الدكتور قال ليهم ي اخوانا البت دي كانت وين؟سرعه جيبو لي الدربات دي من الصيدليه وتعالو، خالي التاج مشى جابهم وجا ركبوهم لي، الدكتور من الزعل قال ليهم انتو حييين بتخلو زولكم يبقى كدة؟حبوبه قالت ليهو كانت في بيت الحبس، قال ليها لنفترض انو راجلها مات تلحقوها ليهو بالطريقهه دي؟م ممكن ياخي ي اخوانا البت دي من شدة م فاقدة قربت تموت اطرافها من البرود تحسها جافه والدم م واصلها اساسا

وقال للممرضه خليها تعمل الفحوصات دي بعد م الدربات دي تخلص، بعد م اخدته الدرب الاول حسيت بنعاس شديد نمتهه، صحيت بعد فترة لقيتهم مركبين لي قزازة دم، حبوبه قالت لي حاسه نفسك احسن؟قولته ليها اي، بعد م قزازة الدم خلصت، مشيت عملته الفحص ورجعته رقدتهه في سريري، الزمن إتأخر كان ماشي لي 1 صباحا، الدكتور جا، خالي التاج قال ليهو اها ي دكتور بعد كدة نمشي؟الدكتور قال ليهو تمشي وين؟صحة بتكم دي م بتتحمل اي شي على الأقل محتاجه تقعد معانا اسبوعين هنا عشان نتابع حالتها، حبوبه قالت ليهو ليييه في شنو ي ولدي مالها هي كويسه؟قال ليها كويسه اي لكن حملها م مستقر وبحالتها دي ممكن تحت اي لحظهه تجهض خصوصا انو هي في الشهر التالت دة اكتر شهر الحامل معرضه فيهو للإجهاض لانو الجنين بكون في مرحله التكوين لسسسه ف عشان كدة نحن هنا حنحاول على قدر م نقدر نثبت الجنين ونهتم بوضعها الصحي،

هو بتكلم طبعا وانا بحاول لستوعب الكلام، انا حامل، دموعي جات جاريه، انا حامل، دة الشي الكان دايرو وراجيهو سعد، دة الخبر الكان نفسو يسمعو بس جا بعد شنو؟بعد وجودو إتعدم في الحياة؟شن فايدة جيتو بعد كدة؟البفرحني بيهو شنو والكان سبب في جيتو مافي؟

خالي التاج قال ليهو خلاص تمام ماف اي مشكله، طلع مع الدكتور، حبوبه بقت تبكي معي وتقول لي م تبكي ي بتي م تبكي، شايفه الله دة لطيف بعبادو كيف؟شايفهه عوض الله سمح كيف؟بشيل شي وبديني مقابلو شي تاني،

قولته ليها اعمل بيهو شنو انا ي حبوبه وسعد مافي؟لييييه ي حبوبه انا بس في الدنيا دي محل م اتجه ربنا بقفل ابوابو في وشي؟م عارفه انا في الدنيا دي عملته شنو في الدنيا دي مخلي ربنا دة غضبان علي كدة، قالت لي دة م غضب ي بتي دي إبتلاءات إنتي لسسسه جاهله وصغيرة م عملتي شي تغضبي بيهو ربنا،

قولته ليها ابتاءات؟م بتتليني الا في امي وابوي وجدي وراجلي كلهم ورا بعض ي حبوبهه؟طيب فضل لي شنو انا تاني؟

قالت لي انا باقيه ليك ي بتي، بعد م قالت كدة سكته ورقدته ودموعي حالفه م تقيف، م عارفه اتبسط ولا ازعل بالسمعتو دة، عدت الأيام وانا مرقدة في المستشفى وعماتي واخواتي وهبه شغالين معي بالتناوب، وناس الحله كل يوم معي في المستشفى بالذات لما عرفو قصه اني حامل،

خالي التاج يوم بتكلم معي قال لي رفعنا قضيه في الشركه والمزارعيه كلهم احتجو وطلبو يرجعو ليهم اراضيهم وانا دة متكفل بي اي مبلغ للمحامين اصلا حق سعد م بنخلي يروح ساي ي بتي نحن دمنا دة م رخيص، سكتته وانا دموعي جاريه وقولته ليهو حتى لو حاكموهم محاكمتهم بترجع سعد؟قال لي ي بتي يتحاكمو عشان الماتو دة م خروف خصوصا انو ميتو كان اسوأ من السؤ وهردت كبدنا كلنا،

يوم المخرجني من المستشفى كان بعد العصر كدة، كان معي فاطمه وممريم وجانا خالي التاج، حبوبه رجعت البيت كانت تعبانه شويه، ، رجعنا اول م وصلنا نشوف تلاته عربات من النوع الفخم داك واقفه قدام بيت ناس عمتي، قولته ليهم ديل شنوو؟خالي التاج قال علمي علمك، فاطمه قالت عربات زي العربات، نزلنا ونحن محتارين، دخلنا فجأة نشوف ناس لابسين بدل وجلاليب مفرين ليهم في نص الحوش وقاعدين، خالي التاج قال لي مريم سوقوها بيتها، مشينا وهو مشى عليهم، فجأهه سمعنا صوت بقول اووووووو ود حاج احمد ياخي إزيك كيفك إن شاءالله بخير يااخ و...فاطمه قالت لي بدور اتاوق بدور اتشمشر، جات هبه لقتها واقفه بتعاين، قالت لي اها ي شهد بقيتي احسن؟الليله م قدرته اجيك شان المستشفى بعيدة وسامي كان عندو شغل وانا براي م بقدر، لكن نضفته ليك البيت ورتبتو، قولته ليها م بتقصري، فاطمه قالت ليها ديل منو ي هبه جوكم من وين الناس ديل؟هبه قالت ليها ديل المسؤلين من الشركهه المشتريه اراضينا حقت الزراعهه المدقاقه الكتلت سعد الله يرحمو كانت تابعه للشركه وم صانوها وهم عارفين انو فراملها م شغاله كويس، اها اسي لما الحصل الحصل والمزارعيه احتجو وناس التاج وسامي رفعو عليهم قضيه وعرفوهم جادين جا سيد الشركه زاتومن الخرطوم عشان يتناقش مع عمي ويحل المشكله بينهم قال جرجرة المحاكم م حبابها، وعارفنو قال شنو؟قال ليهم التعويض الانتو دايرنو انا بديكم ليهو ومتكفلين بي اي تطلبوهو، مريم قالت ليها اجي؟كان تقولو ليهو جيب لينا روح ولدنا طيب، بقدر يعوضنا عن وجعنا العشناهو لما شوفنا ولدنا راسو مهروس زي القزاز وجسمو لحمو مقطعو حتت حتت؟انا على طول مشيت عليهم ووقفته ليهم في نص الحوش قولته ليهم دايرين تعوضونا مش؟طيب عوضونا ورجعو لي راجلي بتقدري؟سايقين عرباتكم وجاين بكل بساطه تضحكو وتشربو شاي في الكبابي الهو في يوم من الأيام شرب بيها وانتو الكاتلنو؟انتو فاكرين قروشكم دي بتشتري روووح؟سعد لو اتلميتو انتو وقروشكم كلها م بتساو ضفرو، كلهم بقو يعاينو لي بخلعهه وصدمهه، خالي التاج جا مسكني قال لي شههد، قولته ليهو خالي التاج فكني ديل يتمو ولدي قبل م يجي على الدنيا دي، شالو مني ابو ولدي ي خالي التاج وانتو قاعدين وبتشربو معاهم الشاي وفي نص بيتو حتى حسبي الله فيكم ...

...