الفصل السابع
اول م سعد شافهم فكاني وبقى م عارف يعمل شنو إتصمغ وهو بعاين ليهم، وانا لسسسه في محلي والطوطحانيه ماشه وجايهه بي، خالتو فتحيهه وشها بقى م بتفسر وإتغير 360 درجه وهبه تتبسم وخاته يدها في خشمها وسامي نفس الشي..
سامي قال السلام عليكم ي عرسان سعد بصوت مقروش قال ليهو وعليكم السلام، انا نزلته من الطوطحانيه، سعد سلم على سامي وانا جات هبه تسلم علي قالت لي العروس كيفكك مشتاغين والله وبقت تسلم علي بالأحضان، بعدها سعد قال ليها يمه كيفك وسلم عليها، لما جات تسسسلم علي قالت لي م قالو عيانهه ياااخي نصيحهه وم فيك اااي شي، سكتته سااي، سعد قال ليها الليله بس إتحسنت والله كانت محمومه حمه كعبهه خلاص،
قالت ليهو سمعنا بعياها دة جينا نشوفها ونتطمن عليها لكن م شايفين ليها اااي عياا،
هبه قالت ليها خلاص اااعمتي اصلا الحمه دي بتمشي وبتجي الواحد كان رقد ليها بتزيد زيادة
دخلته لبسته توبي وجبته ليهم مويه وفرشته العناقريب وقعدنا معاهم وبقو يسألونا عن احوالنا والجو وشويه بقو يتكلمو في الزراعه، بعدها سامي قال ليهم ي جماعه نمشي على الحله بعد كدة عشان الزمن،
امو قالت ليهو سمح إنتظرهم يجهزو شنطهم عشان يمشو معانا ولا رايك شنو ي سعد؟
انا سكتته، وسعد سكتت م جاوب
قالت ليهو عشان سامي دة فتر من المشيه والجيه هو زاتو عندو اشغال فوق راصو طلعو شنطكم ارحكم البيت خلاص كفاكم هنا،
هبه قالت ليها عمتي العرسان كان داير يقعدو م تقرعيهم،
قالت ليها لا خلاص يكملو باقي شهر عسلهم في البيت هناك اصلا ماف واحدة من نسوان اولادي ديل كلهم قضت شهر عسلها برة البيت الكبير الا انا م دورته امنعهم بس
سعد قال ليها يمه خلاص سمح جاين معاكم قال لي شهد جهزي الشنط، مشيت الغرفه جهزته الشنط جات هبه قالت لي غايتو جنس تحششششر عند عمتي دي يجيب لوايا، قلته ليها هه لالا نحن زاتنا طولنا، قالت لي طولتو شنو ي بت ها كلها اسبوعين احمدي ربك انك قعدتي الاسبوعين انتي وراجلك براكم عشان لما ترجعي البيت راجلك دة تاني بتشوفيهو زول نوم بس
سكتته م رديت عليها، بعد م فرشنا البيت كويس ولملمنا الحجات طلعنا شايلين الشنط سعد جا شال مني الشنطه، قام ماشي هبه قالت ليهو اجي ي سعد وانا مالي م بشيلوها مني يبقى علي عدم إحساس من اخوك وانت كماان؟ضحكك قال ليها ابشري جيبيها شالها منها وطلع،
طلعنا على العربيه المرة دي سامي كان جاي بوكس عادي بشيل نفرين او تلاته بس قدام والباقي يركبو ورا، سامي قال ليها امي وشهد اركبو قدام هبه وسعد خليكم ورا انتو،
هبه قالت ليهو خلاص خلي شهد التركب معانا ورا، قال ليها شهد عروس نشق بيها الحله وهي في البوكس كداا؟
اثناء م نحن بنركب فجأهه سامي قال لي سعد انا زاتي يدي واجعاني تعال سوق انت ي سعد انا وهبه بنركب ورا، سامي عملها حركه بس علشان سعد يكون معي قدام م اكتر، سعد جا ركب وإتحركنا، اول م وصلنا الحله سعد وقف العربيه قدام بيت ناس جدي، امو قالت ليهو لييييه م وقفتها قدام بيتنا؟قال ليها ننزل شهد في بيت اهلها اول،
قالت ليهو يعني م تمشي معانا البيت؟قال ليها لالا، كلهم نزلو هبه قالت لي اها بجيك بعدين،
خالتو فتحيه قالت لي سمح يلا
سعد شال لي الشنطه ودقهه الباب، قال لي اقعدي يومين مع اهلك وبعدين انا بجي بسوقك كويس؟قلته ليهو طيب
عارفين في ال 15 يوم دي انا إتعودتهه وإتولفتهه عليهو لدرجه انو انا حسيت بضيق لما قال لي حأجي اسوقكك بعد يومين 15 يوم بس قدر يعمل فرق كبييير في حياتي حتى انا م كنت متخيله انو هيحصل معي كدة
جات ايات اختي الصغيرة فتحت لينا الباب اول م شافتنا بقت تكورك شهد جات العروس جات، حبوبه شهد جات...
لغايه م عماتي جو بالباب الفي النص وكانت معاهم فاطمه اختي، جو سلمو علي وعلى سعد، حبوبه كانت بتصلي اول م خلصت جات حضنتني وسلمت علي وعلى سعد بعدها سعد إستأذنهم عشان يمشي حبوبه بقت تحلف فيهو الا يشرب العصير هو بقى يحلف وهي تحلف لغايه م حليفه حبوبه مشت بعدها مشى بيتهم، وانا قاعدة عماتي يعاينو لي ساي وفاطمه تعاين لي وتتبسهم حبيت اخلق موضوع قولته ليهم جدي وين؟حبوبه قالت لي عندو مقابله اسي خالك التاج وداهو، قولته ليها لييييه مالو جدي م شديد؟قالت لي شدييييد ي بتي بس م دايرين نفوت عليهو المقابلات
ي بتي ادخلي غيري ملابسك ديل وإرتاحي لمن اخت ليك اكل قومي ي فاطمه قطعي السلطه سرعه ي بتي،
جابو لي اكل كنت جعانه طبعا اكلت زيييييين وبنفس فااتحهه بعد م خلصته لقيت عماتي برضو بعاينو لي وفاطمه لسسه تتبسم، طبعا الوضع الفيهو انا حاليا ووضعي الجيت بيهو من عرسي الأول بختلف توتلي، ف يمكن هم مستغربين لاني كنت رافضه فكرة الزواج وكل حاجه حصلت سرعه وكدة
بعد م جيت انوم جات فاطمه قعدت جمبي قالت لي دايرة تنومي ولا دايرة تمثلي؟قلته ليها امثل لشنوو؟قالت لي م مشتاقهه لي راجلكك؟قولته ليها فاطمه الله يهديك، قالت لي شابكانا م دايراهو وسعد شنو وكلام فارق بتاع شنو اها م ياكي جايه معاهو بحسن حاله لمن جضومك زادن في الإسبوعين دي وبقيتي سميحهه عاااد ي يمه سعد هو م سعد لكن، قعدتهه اضحكك قولته ليها عويرة دي قالت لي تضحكي ويوم العرس صارة قدومك مترين البشوفك اليوم داك م بشوفك اسي اها احكي لي،
قولته ليها احكي ليك شنو ها؟
قالت لي سعد كويس معاك؟إتعامل معاك كويس؟
قولته ليها اي،
قالت لي اها الحصل شنو؟
قولته ليها فاطمه انتي مش معرسه؟م عارفه البحصل شنو؟قالت لي اي انا معرسه لكن م معرسه سعد عشان كدة قولته ليها فاطمه انا دايرة انوم الله يهديك
قالت لي تنومي وراجلك بهناك براهو اسي يكون بفكر فيك ومشتاق ليك ي حليلو والله انا مني منك م اجي اخليهو بمشي معاهو البيت طوالي، قلته ليها اسي انتي مخليه راجلك وقاعدة هنا لييهه طيب؟قالت لي حمدااااان؟رجلو بالكسسسسسر إن شاءالله ي يمهه يعرف بس للهرش والنبيح فقرها علي في دنيتي دي الله يفقرها عليهو
قلته ليها اها كان فقرها عليهو م بتفقري معاهو ي السمحه دة ابو اولادك ادعي ربنا يهديهو ويلا انا دايرة انوم قالت لي سعد مشتاق ليك النايمالها شنووو؟
قولته ليها سوس يقوم ليك في راسك يلا انقلعي
طبعا فاطمه اختي دي عقلها زي عقل الشفع ولايوقهه لياقهه كدة م طبيعيهه
غمضتهه عيوني فجأهه اتزكرتهه سعد، ف بقيت اتقلب يمين في شمال وانا مغمضهه عيوني، فجأهه اسمع حبوبه بتقول لي ي بت شهد مالك الباعوض معضيك ولا شنو تتقلبي كدة؟قولته ليها لالا، جات غطتني بالتوب قالت لي جلبابك زاتو لونو اسود بلم ليك الباعوض
سعد في البيت بتكلم مع سامي قال ليهو انت م ضربته لي وكلمتني بجيتكم مالك؟سامي قال ليهو ي زول حرررم مليون مكالمه ضربتها شوف التلفون انت كنت جادعو وين؟سعد مشى وجا راجع شايل التلفون، سامي قال ليها اها لقيتهن ولا لأ؟
سعد قال ليهو وانا شن عرفني انو التلفون دة م فيهو صوت، سامي ضحكك قال ليهو والله انت اهبل،
عمو الطيب جا قال ليهو اها ي سعد البهايم كيف احوالهن إن شاءالله الراعي ماخد بالو منهن بس؟
سعد قال ليهو كويسات والتايه ولدت توأ ي ابوي
قال ليهو التايه دي اصلا انا سميتها الإسم دة شان فيها البركه بتحلب لبن تبارك الله فيها وفيهو بس
سعد قال ليهو السنه الحمدلله الزراعه كويسه والبهايم ماشاءالله، قال ليهو الله يزيد ويبارك ان شاءالله ولسسسه ي ولدي خيرنا بيوسع انت بس خليك حريف وواعي انت دخلته في اسرة خيرها ممتد وواااااااسع انت بس خلي بالك كويييييس
سعد سكت بعدها قال ليهو إن شاءالله، بعدها سعد قال ليهو سامي جيب موبالك دة، سامي اداهو التلفون، سعد طلع بقى واقف برة ماشي وجاي وقاعد، فجأة شاف ايات برة بتلعب، الزمن كدة بعد المغرب قريب للعشاء ناداها قال ليها تعالي، قالت ليهو اها؟قال ليها ودي التلفون دة لي شهد اختك قولي ليها اداك ليهو سعد، قالت ليهو خلاث سمح،
ايات اول م دخلت البيت بصوت عالي بقت تناديني شهد سعد جاب ليك تلفون، شهد سعد جاب ليك تلفون، حبوبه نهرته قالت ليها ي بت في شنو اسكتي شهد نايمه، قالت ليها حبوبه كان شوفتي سعد اداني التلفون دة قالي اديهو لي شهد، حبوبه مسكت التلفون قالت ليها خلاص امشي شهد نايمه بعد تصحى بديها ليهو، حبوبه ختت وإتوضت وجهزت لصلاة العشاء الاذان اذن وقفت في المصلايه كدة فجأهه التلفور، حبوبه واصلت لغايه م خلصت ولسه التلفون كان بنور، شالت التلفون وردت، اول م فتحت الخط سعد قال "السمحهه"حبوبه قالت ليهو مرحب سعد اول م سمع صوت حبوبه قفل الخط
على طول حبوبه جات صحتني قالت لي اصحي خلاص كفاك نوم قومي ليك حاجهه، قولته ليها شبعانه انا ي حبوبه، قالت لي خلاص هاك دة راجلك رسلي ليك، اول م سمعته كلمه راجلك رسلو ليك رفعته راسي، شوفته التلفون مسكتو قولته ليها جا متين هنا؟قالت لي م جا هو رسلو مع اختك ايات واظنو ضرب وانا رديت ليهو، قولته ليها اهاا ناس جدي م جو؟قالت لي والله ي بتي اتأخرو م عارفاهم مالهم كمان الله يحيبهم سالمين غانمين إن شاءالله
ادتني التلفون قالت لي انا ماشه اعوس قراصه العشاء بجو اسي جعانين، قولته ليها خليني انا بعوسها ليك، قالت لي بري بعوسها براي انتي ارتاحي
طلعت وخلتني ماسكه التلفون وبعاين ليهو شويه كدة نور، على طول فتحته الخط كان في حاله صمت انا ساكته وهو ساكت، فجأهه قال الوو بصوت خافض، قولته ليهو اهلين، قال لي السمحهه؟قولته ليهو اي قال لي اسي ضربته ردت لي حبوبتك قولته ليها السمحه قالت لي مرحب حبوبتك واثقهه من نفسها ثقهه كدة سمحهه خلاص ضحكتهه مسااافهه قولته ليهو وانت ي السمحهه دي بتقولها لأي زول؟
قال لي حررررم لي غيرك م بسمعها لي زول قولته ليهو رجعنا لي حرم تاني؟قال لي خليك من دة اها م قولتي لي انتي طيبهه؟قولته ليهو ليهو طيبهه م عندي عوجه والله، قال لي اهااا كويس طيب، قولته ليهو وانت كويس؟امك م شاكلتك؟قال لي تشاكلني فوق شنو؟انا راجل ي زوله وانتي مرتي حلالي م عامل شي بشاكلوني عليهو كان سوقتك وهجيت بيك زاتو م حر؟
سكتهه،
قال حر ولا ليك راي تاني؟
قولته ليهو حر ااي اسي انا قلته ليك م حر
قعد يضحكك ضحكتو كانت سمحهه خلاص ه
قال لي اتصلته بس شان اقولك تصبحي على خير، قولته ليهو تلاقي الخير إن شاءالله،
قال لي اسمعي داير اقولك شنوو؟.قولته ليهو اهااا؟قال لي انا بريييدك شدييد يمين،
سكتته، قال لي عارف شكلك اسي بكون كيف وانتي م قادرة تردي خلاص تصبحي على خير خلي التلفون جمبك بكرة الصباح اول م اصحى بتصل عليك، قولته ليهو طيب قال لي يلا مع السلامه
بعد م قفل حسيت كأنو حب الدنيا دة كلو ربنا شالو وختاهو لي في قلبي تجاه سعد وبس، كنت مبسوووطهه بطريقهه كدة م تقدرو تتخيلوها، وانا راقدة وبفكر فيهو وبتبسم فجأهه سمعته صوت خالي التاج طلعته جري، قولته ليهو خالي التاج، قال لي شههد جيتي متين؟جريت سلمته عليهو وسلمته على جدي بالحضن قال لي اهلا اهلا بتي لعلك طيبهه؟متين الجيه ليه م كلمتونا؟قولته ليهو جينا فجأه بس والله، قال لي راجلك كيفو إن شاءالله بس هو كويس وم عندو اي عوجه؟قولته ليهو كويس بسلم عليك دقيقه اجيب ليكم مويه، مشيت جبته المويه وجيت، قلته ليعو جدي إستني قلعته ليهو جزمتو ورفعته ليهو رجولو في السرير قولته ليهو اها الدكتور قال ليكم شنو صحتك اتحسنت وم فيك شي؟قال لي الحمدلله ي بتي، قولته ليهو خالي التاج اها انت كيفك ووين خالي ياسر؟قال لي خالك ياسر زاتو بقى شغال على كيفو مرة يجي ومرة يبيت بره، جدي قال لي اها قولي لي سعد تعاملو معاك كويس؟قولته ليهو كويس والله ي جدي، قال لي ي زوله لو عندو حركات جاي ولا جاي م تسكتي نختو ليك في كراسي ادبو طوالي، قولته ليهو لا والله ي جدي م فيهو كلمه، خالي التاج قال ليهو يابا سعد دة تربيه بلد، ولد ملان شهامه وضكران اصلو م منو خوفهه نحن زاتنا لو م كان مننا وفينا م كان اديناهو، قولته ليهو جدي خلي اعصر ليك رجولك، قعدته اعصر ليهو في رجولو لغايه م جات حبوبه شايله صينيه الغداء قالت ليهو احمد اها الدكتور قال ليك شنو؟قال ليها ماف حاجهه ي مرهه، قالت ليهو سمح قوم اكل امشي اجيب ليكم العصير، الشاي جااهز في السيرمس
اليوم التاني صحيت من النوم متأخرة لاني ساهرته مع جدي، لقيت الشمس طالعه وسامعه صوت حبوبه بتكنس، رفعته راسي قالت لي صباح الخير، قولته ليها صباح النور حبوبه، قالت لي قومي اتسوكي وإستحمي واطلعي سلمي على راجلك من قبيل قاعد مع جدك، قولته ليها سعد جا هنا؟قالت لي جا يسلم على جدك، عاينتع للتلفون لقيت مكالمات كتيييرة منو، طلعته مشيت اتجهزته ولبستهه بإستعجال من غير م احس لقيت نفسي ملهوفهه، مشيت بإتجاه حوش ناس جدي دخلاه الديوان لقيتهم قاعدين قولته ليهو جدي صباح الخير، قال لي صباح النور ي بتي، سعد بقى يعاين لي، قولته ليهو صباح الخير، قال لي صباح النور، جدي قال لينا عن إذنكم مارق على الحمام كدة شويه وجاي، طلع وانا بقيت واقفه، قال لي السمحهه النوامهه، قولته ليهو امس ساهرته مع جدي عشان كدة، قال لي اتصلته عليك كتير لما م رديتي جيت اشوفك، قولته ليهو انا كويسه
قال لي انتي كويسه لكن انا البقنعه عيوني وإضني انك كويسه منو؟م ممكن اصبح لا اصطبح بشوفتك ولا اسمع صوتك عوجه ولا م عوجهه دي؟قعدتهه اضحكك فجأهه اخد وضع الجديه وعمل حركه "إحم إحم"
جدي جا داخل، قال لي اقعدي واقفه مالك؟قولته ليهو لالا انا ماشه يلا، طلعته وانا اتبسم زي نار الغصب ساي ه بعدها رجعته لقيت حبوبه بتعجن في حنه قولته ليها حبوبه بتدوري تتحني؟قالت لي الحنه ليكي انتي ي السمحه انا شنو اها نخليك تمشي بيت راجلك غبششه؟الكلام دة م عيب مننا؟فاطمه جات، حبوبه قالت ليها اها كويس انك جيتي ختي لي اختكك حنهه سميحهه كدة،
فاطمه قالت ليها سمح يمه، قعدته وحننتني جات هبه قضينا اليوم كلو مع بعض، اليوم التاني حبوبه ولعت لي الحفرة من الصباح، بعد العصر برضو قعدتني وملت لي شعري زيت كركار وسرحتو لي ضفيرتين، وادتني كحل قالت لي كحلي عيونك ها كحلته عيوني وانا بكحل فيهم مسحتني بزيت ملخبط بي صندليه جسمي كلو، بقيت اقول ليها حبوبه الزيت بوسخ الجلباب، قالت لي ي بت ها خلي العوارهه نحن عمرنا كلو بنتمسح بيهو وريحتنا دي فايحه ونسوو كدي
المساء سعد إتصل علي قال لي جاهزة اجي اسوقك؟قولته ليهو اي، جا على طول سلم وقعد مع جدي واتونس كداا بعدها قال لي جدي استأزنك جيت اسوق شهد،
جدي قال ليهو ابشر سوقها طوالي ابقى عشرة عليها بس ي ولدي م اوصيك عليها بتي دي م عندي غيرها سعد قال ليهو ابششر ي عمي احمد والله على الراس من فوق م تجيها عوجهه تب، قال ليهو الله يعدلها عليك ي ولدي الثقه في الله وفيك كبيرة قال ليهو يلا امشو الله يحفظكم، قولته ليهو يلا ي جدي بجيكم بكرة الصباح، قال لي بكرة تاني؟ م يقولو بتنا خفيفهه بس سعد قال ليهو لا والله ي عمي الوقت كلو تكون معاكم انا م عندي مشكله نهايه اليوم بجي بسوقها منكم، جدي قال ليهو ي ولدي كان سمعتها الكلام دة تاني م بتتحمل ليك مسؤليه ولا م كدي ي شهد؟قعدو يضحكو
بعد م طلعنا سعد قال لي اها ي شهد اخيييييرا ماشين بيتنا، قلته ليهو اها؟؟
قال لي سمح اسمعي قولي، بيتنا دة انا م داير اكعبو ليك بس بتواجهك فيهو اي شي عشان كدة من اسي دايرك بس تطولي بالك، معي انا بإذن الله م بتلقي مني الا كل طيب لكن اهلي انا م بضمنهم اتفقنا؟قولته ليهو طيب، قال لي خلاص يلا نمشي، دخلنا البيت سلمته على اهل بيتهم وقعدنا، عمي الطيب بقى يسالني عن احوالي وكذا، منى مرت اخوهو لي سعد قالت لي شهد انتي صحي راجلك الأول طلع مجنون رسمي؟انا سكته، عمي الطيب قال ليها لزومو شنو اسي السؤال دة؟مختار راجلها قال ليها قومي سوي لينا شاي اللبن احسن ليك، عمتي فتحيه قالت ليها نهاائي م بتعرفي تتكلمي، سعد قال ليهم حصل خير ي اخوانا، جات هبه قالت لي شهد تعالي، اتحركته معاها ساقتني قالت لي اها دة بيتك، كان اوضه ومعاها راكوبه كبيرة كدة وفي شجرة نيمه كانت واقعه في إتجاهنا، مولعه لمبه جاز البكون فيها شريط قطن ديك وبتوصف لي، دخلتني الأوضه قالت لي العدة دي جزؤ منها ادتك ليها عمتي والجزؤ التاني بتاع الصيني كلو جابتو ليك حبوبتك السراير والحجات ديل جابهم سعد، قولته ليها طيب، قالت لي عجبك؟طبعا انا رتبتو ليك والفضيه دي انا رصيت ليك فيها العدة والدولاب الصغير دة انا رتبته ليك فيهو ملابسكم وبخرتها ليك الا بالكبريت، قولته ليها م بتقصري ي هبه، قالت لي على شنو ي بت ها دة الواجب، واسمعي منى وعمتي ديل كان سألوك من اي شي قولي م عارفه سمح؟قولته ليها طيب، كانت مفرشه لينا سرايرنا في الحوش برة طبعا البيت مقسوم عديل، ونحن قاعدين سامي نده عليها قالت لي داير شنو دة كمان، هي مشت وسعد جا، قعد في السرير قال لي البيت عجبك؟قولته ليهو اي سمح شديد، قال لي بسيط شويه وحجاتو م مكتمله لكن بعد الحصاد إن شاءالله وشويه شويه نبنيهو ونوسعو عشان الأولاد بكونو كتار، قولته ليهو كتااار؟قال لي اي مالك؟لا دايرهم واحد ولا إتنين داير البيت دة يتملى اولاد
قولته ليهو م بتتعب في ترربيتهم انت عشان كدة، قال لي اها البشقى عشانهم منو؟قولته ليهو والبشيلهم في بطنو منو؟والبتوجع منو؟والبغسل وبحمم منو؟ قعد يضحكك قال لي خلاص نقلل العدد نجيبهم 12 بس قولته ليهو عليك الله زيدهم شويه فيك الخير، قال لي خلاص 18 وكان جا اولهم ولد إييييييكك ابشري بس، قولته ليهو والبت مالها؟قال لي م عندها ميل، سكتته،
قال لي مالك؟قولته ليهو ماف شي
قال لي ها كلامي زعلك؟قولته ليهو م زعلانه بس ابوي الله يرحمو تفكيرو كان زيك كدة اي مرة م تجيب ليهو ولد بمشي بعرس البعدها عشان تجيب ليهو الولد وبرضو م جابو،
قعد جمبي ومسك يدي قال وانتي قايله انا برضو بعمل كدة واعرس فيك؟ي بت ها انا م لقيتك بالساهل شان امشي اجيب ليك بديله ولا شايف ولا هشوف البتكون احسن منك، قلته ليهو كلكم في البدايه بتقولو كدة، قال لي الزمن كااافي شان اوريك انو انا م كدة حتى لو الله م اداني منك عيال عديل م بكوس دربهم عند غيرك ابشرك من اسي
اليوم التاني صحيت الصباح بدري ولعته النار وعملته الشاي هو كان في الحمام، جهزته ليهو عراقيهو وسروالو، قال لي بحلب البقرة وبجي بلبس عشان م اتوسخ، قولته ليهو سمح، مشى وجا جاب اللبن، قعدنا شربنا الشاي مع بعض بعدها امو جات داخله شايله السيرمس لقتني بنشرب في الشاي، قالت لينا شربتو؟سعد قال ليها شهد قامت بدري عملتو لي
قالت ليهو اها طيب بتفطر هنا ولا غادي؟قال ليها فاطر غادي طالع اسي، قالت ليهو سمح اطلع مع سامي اخوك، بعدها لبس وقام طالع، قال لي القروش في الفضيه لو دايرة حاجه سمح؟قولته ليهو طيب، قام طالع قال لي برجع بدري انا م بتأخر كويس؟قولته ليهو طيب، باسني في راسي قال لي ابقي طيبهه
فضلته اليوم كلو منتظراهو يجي وبالفعل اول م جا سلم على امو وهو واقف قالت ليهو اشرب مويه، قال ليها لالا تعبان شويه امشي على البيت، جا لقاني مفرشه البيت وقاعدة منتظراهو، قال لي إتأخرته مش؟قولته ليها شديد، قال لي السمحه والله انا في الشغل اليوم كلو بتلي ماشي وجاي معاك، ضحكتهه قولته ليهو المويه جاهزة انا مدفياها ليك استحمه واطلع عشان اخت ليك الغداء، مشى استحمه وجا لقاني جهزته ليهو الغداء، قال لي بشنو؟قلته ليهو كسرة بملاح ام رقيقهه ه
فرح فرح قال لي ي سلام يااااااخ والله قبيل إشتهيتها، قلته ليهو خلاص اكل، قعد قال لي اقعدي اكلي معي، قولته ليهو انا اتغديت، بدأ ياكل قال لي سمحهه زيكك كدة
عدت الأيام ونحن حياتنا متحوله من حلوة لي احلى، وكل خطوة بنتعلق ببعض اكتر لدرجه انو بقينا شاذين في الحله، لما يحس بي زهجانه المساء بطلعني نلف في الحله ونجي، ويوم الجمعه نمشي البحر احيانا، واحيانا الحفيرة والخلا، ولما يقوم طالع انا بقيت اتعلق واقيف معاهو نص ساعه في باب الشارع كأنو م حيقضي ساعات بس وحيرجع، يعني كان في كميه طمأنينه كدة م عاديه في علاقتنا وسعد بالجد هو البني ادم الوحيد العيشني السعادة البتستحقها في واحدة متزوجه ووفر لي راحه بال كدة م بعدها راحه
في يوم وانا بتدخن في بيت ناس ابوي مع عماتي فجأهه جات عمتي هويدا وهي متوترة شديد، قالت ليها م شوفتي ي رحمه الحصل فضيحهه عدوك، رحمه قالت ليها في شنوو؟قالت ليها شي كعب كلو كلو، قالت ليها بسم الله ي هويدة قولي في شنو؟قالت ليها رحاب اخوها الكبير جعفر قبضها مع ياسر،
عمتي رحمه قالت ليها الليله ووووووب الليله ووووب دة كلام شنو ي هويدة؟
قالت ليها كلمتك م صدقتيني، قولته ليك تحت تحت الناس بشوفو ياسر داخل بيتها بالليل وطالع الصباح قولتي لي دة كضب وتخاريف، اسي الخبر جا من حلتهم هناك كلمتني الزينه بت عوض الكريم قالو ليك جنس شي وجنس فضيحه ياسر دة دمو جرى، قمته سرعه من حفرتي ولبسته ملابسي قولته ليهم خالي ياسر؟عمتي هويدة قالت لي في غيرو المفضوح المشرط عيزنا في غيرو؟المرة راجلها من مات م تمت سنه شوفي العملوهو الكلاب ديل، انا كنت عاارفه والله وجاني خبرهم بس رحمه مااا صدقتني وقالت كضب، رحمه قالت ليها كان صدقتك كان عملتي شنو؟
قولته ليها اسي خالي ياسر وين؟م اظن مستحيل خالي يعمل كدة،
عمتي هويدة قالت لي سكاري وبتاع نسوان يعمل اكتر من كدة،
عمتي رحمه قالت لينا ادعو ادعو الخبر دة م يصل لي عمو الليله كان وصلو خلاص اصلا صحتو م بتتحمل والدكتور الاسبوع الفات قال ليهم الضغط بقى طبيعي وماف اي مخاوف عليهو بعد كدة ي جماعه دي مصايب شنو البتقع في روسينا دي؟
فضلنا قاعدين ماف اي خبر، إتفقنا انو م نوري حبوبه جات قعدت شربت قهوتها وسرحت شعرها ضفاير وقالت لينا ماشه اعوس الكسرة احمد دة مشى على السوق بدري وللأن م جا بكون مع اصحابو الكبارات ديل، قولته ليها انا بعوسها خليها، مشيت عوسته الكسرة وهي كنست الحوش نضيف وفرشنا لجدي وخالي التاج سرايرهم وقعدنا منتظرين لغايه م المغرب جا زول فيهم جا ماف وانا خلاص اعصابي تلفت وجواي إتقطع من الخوف، فجأهه الباب دق جريت قولته ديل هم لقيتو سعد، مسا علي وعلى حبوبه، قولته ليهو جدي طلع وللان م جا وم منو خبر كدة اضرب لخالي التاج اسألو، حبوبه قالت لي ي بت ها والله اسي يكون لافي مع جماعاتو ولا بكون عندهم اجتماع ولا ندوة في حتى مشاها عارفه جدك م بقعد، سعد قال لي التاج تلفونو مقفول، قولته ليهو سمح اضرب لي خالي ياسر، ضرب قال لي برضو مقفول،
حبوبه قالت لي بكونو قاطعين كهرباء شان كدة بس م تقلقي ساي بجو دي م اول طلعه ليهم،
قولته ليهو خلاص انا بقعد مع حبوبه لمن...
حبوبه قاطعتني قالت لي ي بت ها انتي عويرة انا صغيرة لمن تحرسيني امشي ساااي مع راجلك شوفي الناقصو شنو مسكين من الصباح في الشغل بكرة الصباح تعالي وكان جو بتسمعي صوت عربيتهم يلا ي ولدي سوقها وامشي، م كنت عايزة امشي بس طلعته مشيت وانا من مشيت مقلقه وم قادرة اقعد وسرحانه، سعد قال لي مالك انتي ي السمحه في شنو الليله ماكي ياكي، قولته ليهو مافي شي، طلع السراير هو وفرش وقعدني قال لي في شي والله اصلا م من عوايدك كدة، قولته ليهو ماف شي بس طلعه جدي وعدم رجعتو دي مخوفاني عليهو لانو م بستحمل، قال لي م تخافي بإذن الله برجع سالم تعالي ورقدني في حضنو وبقى يطبطب علي، ونحن شبه نمنا كدة انا اصلي م نمته بس هو نام، فجأهه اسمع صوت عربات بتقيف ولا واحدة ولا إتنين، قعدته في نص السرير فجأهه اسمع صوت خالي التاج وهو بضرب في باب الشارع شديييييد وبكورك وبقول يمهه، يمهه افتحي الباب يمهه، وفجأهه اصمع اصوات رجال برددو لا إله إلا الله، لا إله إلا الله، وصوت خالي التاج كان مستمر ولسسسه بقول بصوت منتحب اطلعي يمهه تعالي شوفي ابووي يمهه، ولدك كتل ابوهو يمهه افتحي الباب...
...