الجزء 21

صحت عبير الصباح بدري وجهزت الشاي وادت كوكي اللبن ومشت غرفه رزان لقتا صحت بس قاعده في نص السرير وتبكي ..

ودا خلي عبير تجي تقعد جنبها براحه وتقول : مالك حبيبتي خير ؟

رزان : حضنتا وزادت في البكي وبعد كملت بكاها قالت : ولدي يكون عامل شنو ؟ صاحي ولا نايم ؟ جعان ولا شبعان ؟ ببكي ولا ساكت ؟ ضربت تلفون لي آيات ولمياء تلفوناتهم مقفله م عارفه الحاصل شنو ،، كنت عايزه امشي لكن لقيت الجرح وارم وخايفه لو مشيت بيه يلتهب زياده ،،م عارفه اعمل شنو ؟

عبير طبطبت عليها ومسحت دموعا وقالت : ولا يهمك حبيبه بمشي الشغل بس اوقع واجي عشان عندنا مدير جديد فقر خلاص .. من هناك بركب امدرمان طوالي ناس آيات واشوف الولد واجي اوريك عامل كيف ،،

رزان بكت شديد وقالت : انا م بستاهل تعامليني كدا انا تافهة وحقيره م بستحق طيبتك وحنيتك دي ..

عبير : ي بت انتي هبله نحن بينا لحم ودم والدم عمره م ببقي مويه يلا م تأخريني .

طلعت عبير ولقت حاجه مني واقفه تسمع في الكلام وحضنتا وقالت : ربنا يديك لمن يرضيك ي حبيبه عمري ويرفعك اعلي المراتب ان شاء الله قادر ي كريم

امينه بقت تتحسن شويه شويه بعد بقي يجيها شيخ بعالج بالرقيه الشرعيه .. ويوسف فرح شديد بعد فقد الامل في علاج مرتو وكان الشي المخوفهم بعد توعي وتعرف وتسأل من ولدا يقولو ليها مات ترجع تنتكس تاني

آيات مهتميه بالبيبي شديد واهلها لمن سألوها قالت ليهم لقتوو جنب باب البيت الصباح بدري وقالت ح تخليه لحدي م يجي زول يتبناه طبعا دا الكلام القالته للناس ..

عبير وصلت بيت آيات وسلمت ولقت البيبي نايم وسألت من اخبارو جاوبت ليها آيات : كويس والله حبيب قلبي يصحي يرضع البزازه ويرجع ينوم طبعو زي العسل رزان عامله كيف والحصل شنو بينا وبين امجد ؟

عبير : امجد مع صحبو والله م عارفه ح يحصل شنو ؟ ربنا يكون في العون بس،،

آيات : انتي زوله اصيله ي عبير ياريت تقيفي معاها ..

عبير : توصيني علي اختي ي آيات ؟ م تشيلي هم بس ربنا يقدرني اعمل حاجه ،،

رزان بقت تقوم وتقعد وتعاين في الساعه وتراقب الباب لحدي م عبير جات داخله وشايله معاها اكياس كتيره فيها حاجات لي رزان واول م ختتا رزان قالت ليها : اها احكي لي الولد كيف ؟

عبير : اطمني ي ستي كويس جدا وبشرب اللبن وماشاء عسوله وصحه زي الفل انتي بس اوعديني تكملي الحاجات الفي الاكياس دي كلها ،،

رزان العبره مسكتا وبكت ودخلت غرفتا وعبير قعدت حزينه جنب حاجه مني وقالت ليها : اسي البحصل شنو ي امي ؟ امجد متعصب شديد ومستحيل يسامح رزان ،، دليني اعمل شنو انا ؟

حاجه مني : انا ضربت ليه بكون علي وصول بعد يجي نشوف فهمو شنو بعدين نتصرف ي بتي فجأة صوت الباب فتح وكان امجد وجا قعد جنب امه في الهول وحاجه مني اتكلمت : ي ولدي رزان شرفك وعرضك د

قاطعا وهو بقول : شرفي ؟ دي خلت لي شرف ؟ خلاص انا ادمرت وضاع مستقبلي وم عندي وش اقابل بيهو زول تاني ،، طول عمري عايش مستور وماشي جنب الحيط ربنا يدمرا زي م دمرتني 😰

حاجه مني : اذا واحده غريبه مفروض تسترا خليك من بت خالتك وبعدين عشان كوكي عارف انو متعلق بيها ..

امجد : كوكي ؟ لو م عبير كان مات بالهمله هي عارفه ليه شنو ؟؟

سكت وعاين لي امو وقال : اكيد ي امي م منتظره اصالحا واعيش حياتي معاها واسمحي لي لو منتظره دا تكوني م بتعرفيني كويس ..

امجد دخل غرفته يرتاح وحاجه مني وعبير بقو يفتشو في حل لي موضوع رزان وامجد دا ..

◾◾◾◾◾◾◾◾◾◾◾◾

آيات شربت الولد اللبن ونام وجات بطه قعدت جنب امها وقالت : ماما البيبي دا ي حراام م عندو اسم رايك شنو نسميه شادي اسم حلو ..

أيات : هههه ينصر دينك ي بتي اسم جميل ي عزو تعال شوف اسم البيبي الجديد شادي 😍

عزو : شادي حلو .. ي ماما نحن حبينا شادي وياريت تخلي معانا علي طول ..

آيات : ياريت ي ولدي ..

فجأة صوت جرس الباب ضرب مشت الشغاله تفتح وكانت لمياء وبعد سلمت والاولاد مشو التلفزيون قالت وهي خايفه : والله ي آيات من يوم رزان دي ولدت حاسه في زول مراقبني في اي محل ولمن اقيف اشوف دا منو م بلقي حاجه انا قلبي داير يقيف ،،

آيات : ههههههه الله يجازيك ي لمياء بناتك قربن يبقن نسوان وانتي لسه خوافه 😂

مافي حاجه ختي الرحمن في قلبك ...

◾◾◾◾◾◾◾◾◾◾◾◾

امجد صحي من النوم ومشي غرفه امه ودعا ودخل علي كوكي ودعه وعبير مشت معاه لحدي بره البيت وسألتو : يعني سفره مفآجأة وم عرفنا ليك اي حاجه وحتي موضوعك مع رزان م معروف رسي علي شنو

امجد طلع ظرف من جيبه ومداه لي عبير وقال في حزن : خلي بالك من امي وكوكي وكمان من رزان ولمن رزان تصحي اديها الظرف دا ،،