الجزء 15
عينكم ما تشوف الا النور ، ام عثمان جواا غرفتي ، و لقيتا مرفعه اللحلفات و الملاية ،و لمن انا وصلتا هي خلاص كانت بترجعهم محلهم !
قلت ليها ! دا شنوووو؟
قالت لي شششش شش ش شنووو ،شنوو مالك انتي ، دا بيتي انا حرة اخش محل دايرة واسوي الانا دايراهوووو زاتو ما دخلك انتي و بعدين مش كنتي طايرة اهلك الرجعك شنو ؟ والله بقيت مخلوعه فيها وبس منططه عيوني فيهاا ، ليه ياخ بتتحول كدا ،و كله مجرد سوال صغير ، م ممكن الرد دا !
قلت ليها عارفه انه بيتك بس دي غرفتي خاصه شويه بس يكون عندي علم انك داخله عشان اعمل حسابي ،، قالت لي ي بت هوووي قلة ادب معاك ما دايرة،وكويس انك جيتي ، يلا رجعي الحاجات دي في محلها ،و طلعت ، حاسه اني حأجن ، التصرفات غريبه شديد المرة دي ما بتخاف الله !
المهم رفعتا الحاجات وفرشت الملايه ، و شلت تلفوني و نزلتا ...
وانا نازله عثمان كان طالع ، قالي اتاخرتي ، قلت ليهو فعلاا و اسي جيت ،، نزل و انا نزلتا
.. ركبنا العربيه تاني ، و اتصلت علي ياسمين ..
_ العروس الكعبه صحي البتعرس بتفتري ، الله يفك بورتي يا وهاد عشان اقطعو معاكي ..
* ههههه يا بت روقي سلمي اول ..
_ ما بسلم ياخ انتي كلبة
* شكراااا يا عسل انتي ، يمكن تغيري رايك من كلامك داااا
_ اممممم نشوف طيب الظاهر كدا في شمار ّ
* عشان كدا مشتاقه لكباية شاي معاكي
_ والله يا وهاد عندي امتحان بعد بكرة و اموري جايطه ، عشان كدا الليله جيت اكل قراصة خالتو ثريا ( امي ) ، عشان اروق كداا
* قولي والله ياسمين انتي في بيتنا ؟
_ اي والله ليه في شنووو ؟
* ياخ نفسي اشوفك انتي عارفه
_ و انا كمان بس خلاص راجلك تاني ما بفكك لينا ، مسكينه امك والله من قبيل في سيرتك
* بالجد ؟
_ اي و الله
* سمح اقفلي عندي شغلة في المطبخ اخلصا وارجع ليكي . ّ.
_ طيب يلااا لبعدين
... عثمان قالي شغله في المطبخ !!
عاينت ليهو بقرف كدا والله اصلي ما قادرة اهضموو ، قام قالي اهااا فهمتا ،ماشه ليهم مفاججاه صح !
بيحاول يحاورني و يفتح معاي موضوع بأي طريقه .. قلت ليهوو ما شاءالله بتفهم ،، قالي انا حأقيف هنا لحظات ،، وقف و نزل ..
و فجأة بقيت سامعة صوت حاجة بتزن ، و الزنة ماشة في زيادة .. عاينت قدام لفيتو تلفونو عاملو هزاز و مكالمة ، م اديتو اهتمام ، تاني جات مكالمة زي المتصل مصمم انه عثمان يرد عليهوو ،،
مشيت لقدام لقيت مكتوب ، اتصال من # تووتة .❤ . اجي !!
سكت ساي ، لمن جا راجع ، شايل علبة باسطه وحلويات شرقيه ، ختاها جمبي ،و ركب دور العربيه ،، قالي ما تكتر منها بعدين عشان السكر ..
م رديت عليهوو ، ولاعبرتوو ،قام قالي العرس الكلمتك عنو دا فيهو ناس الشغل ، و ناس مخطط اشتغل معاهم في الايام الجاية ، عايزك تساعديني ، نعزمهم في يوم البيت ، يعني العرس دا فرصه كويسه للتعارف ،و انتي ماشاءالله ... ّ
قلت ليهوو ما شاءالله بالنسبه ؟
قالي لالالا ولا حاجة ، بس يعني قصدي انه اااااا ، انتي عارفه يا توته انه
قلت ليهو انا اسمي وهاد ، توته دي بتاعت السرير .......