الفصل الثاني
صباح اليوم التاني:
رونق صباح الخير ها شهاب جهز؟
شهاب طلع قبيل جهز لشنو م فهمتك؟
طلع الشغل؟
ايوة ساق الاولادو يوصلهم المدرسة عشان م يتأخرو ليه مالك؟
لالا بتصل عليه اشوفو دقيقة
قالت لي طيب وخلتني واقفه،
إتصلت عليه م برد، تاني إتصلت، رد علي، قلت ليه شهاب صباح الخير، نحن جهزنا ماشين على الدكتور
قال لي طيب تمام امشو
قلت ليه م حتجي معانا؟
يا شهد والله مضغوط شديد ماشي اودي الاولاد المدرسة وعندي شغل ماشي لاحقو
ايوة بس ي شهاب نحن متفقين صح؟ قبل بشهر، وكمان نبهتك قبل إسبوع وقبل يومين برضو وامبارح رسلت ليكم في قروب الواتساب عشان م تنسو
قال لي بنهرة: اها اسوي شنو ي شهد اتقطع انا؟ما شفت الرساله، امشي إنتِ او انا م فرقت يعني انا ماشي اسوي ليهو شنو كان مشيت معاكم ولا لا الحيتغير شنو بالضبط؟
سكتت مسافة وقبل م ارد لقيت الخط قفل
قلت لنفسي م مشكله اتصل على امجد اشوفو وين يجي علينا..
إتصلت على أمجد دة اللي هو اخوي الصغير بس م ساكن معانا عايش براه، هو ضابط في القوات المسلحة، أمجد م برد، إتصلت عليه مرة وإتنين وتلاتة م رد..
فتحت قروب الواتساب بتاعنا، شفت كلهم إستلمو رسالة تنبيهي ليهم على إنه ماشين نقابل ب ابوي الدكتور ومهم جداً إنهم يكونو موجودين اليوم.
حزنت على اللحظة دي، كل فكرتي كانت إنو كلنا نكون متلفين حوالين ابوي، حتى لو وجودهم زائف ومجبرين على كدة كان يهمني جداً يوصلو إحساس إنه نحن موجودين حواليهو وواقفين معاه وحنعمل كل البطلع بيدنا عشان يتعافى ويرجع لينا زي اول، دة اقل شي ممكن نعمله في حالة اليأس الهو فيها
طلعت وركبت العربية وفي غصة في حلقي، دموعي جات جارية، قفلت الباب علي وقعدت مسافة لغاية م حسيت إني بقيت كويسة مسحت دموعي و نزلت ومشيت لي ابوي، قلت ليه ابوي يلا
عمتو سميرة لقيتها جاهزة هي كمان وبتصلح ليه في جلابيتو وبتلبسو في الشال ونزلت مسحت ليه جزمتو بالمنديل
دة عشان هي عارفه قدر شنو ابوي بهمو شكلو وهندامو، سرحت فيها مسافة وقلت لنفسي لو كنت انا مكان ابوي هل واحد من اخواني حيعمل ربع البتعملو عمتو لأبوي دة؟
حنيتها ولهفتها عليهو غير، مستعدة تقعد اليوم كله قصاده هو بس وم تمل ولا تزهج منه ابداً رغم إنه فاقد قدرته على الكلام لكن هي المونساه طول الوقت وسادة لينا فراغ كبير
قالت لي اها شهاب وينو؟
قلت ليها شهاب طلع يودي اولادو المدرسة والعربية عطلت في الشارع لسة م صلحها قال لكن حيجي، حنتقدم نخليه،
عاينت لي مسافة وشكلها فهمت إنو كلامي م مقنع،
مسكت ابوي وقلت ليه يلا ي ابوي تعال، فتحت ليه باب العربية وركبتو
قالت لي وامجد؟
قلت ليها لسه م رد علي ف م عارفاه وين بس اكيد حيجي نحن نتقدم بس نخليهم عشان زمنا المواعيد م تفوت علينا حاجزين عندو لينا كم شهر
إتحركنا لاحظت إنه كل م ارفع عيني الالاقي ابوي يعاين لي في المرايا
قد يكون وصلو إحساس إني م صادقة، وإنه اولاده لا مبالين بوضعو، كانت نظرتو على قدر م هي حزينه على قدر م كان ببتسم لما اعاين ليه
ونحن في الطريق إتصل علي طارق مكالمة فيديو
قال لي طلعتو؟
قلت ليه ايوة
قال لي م قلت ليك م تردي وإنتِ سايقة؟
عمتو سميرة ضحكت قالت ليهو ي ولدي كيفك
قال ليها تمام وإنتِ كيفك ي صباح الخير،
قالت ليهو صباح العافية، تمام الحمدلله بي طلتك علينا دي
قال ليها الله يعافيك ي رب، خالي كيف، ابوي رفع ليه يدو، قال ليهو م مشتاقين ياخ ي خالي، يومين م شايفك داخل الواتساب رسلت ليك سافهني شايفك
ابوي ضحك
عمتو سميرة قالت ليهو التلفون زاتو م شغال بيهو شديد كدة، وفضل يتونس معانا وياخد ويدي وحقيقي قدر م اوصف شعوري اللحظة دي وانا بشوف مزاج ابوي الإتعدل في لحظه م بقدر اديه حقه، قلت ليه طارق انا حأقفل منك عشان اتصل على المستشفى و أأكد على مواعيدنا مع الدكتور عشان لو إتأخرنا حجزنا م يتلغي انا نسيت اتصل
قال لي انا إتصلت عليهم من قبيل واكدتة الحجز وكل شي م عليكم إلا تصلو وتدخلو تقابلو على طول
إتذكرت إنه هو اساساً الجاب لي رقم الدكتور وعرف إنه عندو زيارة السودان وإقترح علي نتابع معاه
عمتو سميرة قالت ليه يا يابا إنت الله يديك العافية ويطول في عمرك ويبارك في رزقك ي رب والله م عارفة اقول ليك شنو
قال ليها العفو ي عمتي تقولي شنو بس، دة واجبي ودة ابوي في زول محتاج قول قصاد حاجه عملها لأبوه؟والله لو في يدي أنزل السودان واتابع معاكم خطوة بخطوة دة اقل شي ممكن اعمله صحتو تهمنا كلنا وكلنا اولاده ولا فارزني من شهاب وامجد وشادي ي عمي؟
ابوي ورفع ليه يدو بالنفي
عمتو سميرة قالت ليه البتعمل فيه دة براه بالدنيا ي ولدي، الله يحفظك ي رب
قال ليها كتري من الدعوات دي بس ودعوات ربنا يكرمنا وننزل السودان دة قريب، خلاص فترنا
قال ليهو ربنا يكرمك ي ولدي لكن نازل لشنو السودان فيهو شنو بنزلو ليهو بلا الشقى؟
قال ليها نازل أستقر بعد كدة كفاي خلاص كيف نازل لشنو ي عمتي
ضحكت قال ليهو الاستقرار دة بالعرس بقيت زول عرس خلاص؟
قال ليها انا زول عرس من بدري لكن مستني لي زول كدة بس يديني ولو إشارة بسيطة منو وتاني م بقيف في طريقي شي
ضحكت وقالت ليهو دي العروس ولا شنو؟ عاد ي يابا هي لاقياك وين ولد هدي ورضي ومسؤول في الحال البقو عليه الأولاد دة إنت جواز سفر دبلوماسي عديل كدة مفروض تديك إشارات م إشارة واحدة
ضحك وقال ليها الله ياخ ي ريتها بتفهم زيك كدة ي عمتي، ي ريتها تفهم بس
وكرر الكلام دة كم مرة
قلت ليه بناكل فول سوداني نحن ي استاذ ف الفهم دة م عليهو شديد كدة بناتنا ديل، إنت م تلمح لأنو التلميح دة م معتمد بقى عندنا قول ليها عديل كدة
قال لي طيب عدييل كدة
قلت ليه اي ي معلم الموضوع بسيط وساهل، اقول ليك طيب إنت بس قول لينا اوأشر بس وخلي الباقي علينا
عمتي قالت ليه الله يقدم ليك الفيه الخير ي ولدي ويسعدك ويهنيك ي رب
قال ليها اللهم امين ي رب قريب إن شاءالله
وصلنا المستشفى قال لي محتاجه حاجه ي شهد؟
قلت ليهو لا سلامتك بس
قال لي اكيد؟
قلت ليه ايوة اكيد
قال لي تمام وريني حصل معاكم شنو بعدين تمام
قلت ليه ماشي
دخلنا المستشفى، اول م وصلنا الإستقبال م إنتظرنا كتير ف دخلونا
الدكتور سألنا من شويه تفاصيل،
عمتو سميرة اول م بدت تحكي ليه انا طلعت خليتهم،
بعد مسافة رجعت لقيته بيعمل لي ابوي شويه إختبارات وبيطلب منه يمسك يده ويضغط عليها،
قال ليها مرت كم سنة على الحادثة:
قالت ليهو 10 سنوات
بعدها قال ليه حنعمل مجمعة فحوصات للجسم عامة وللراس بعدين حنحدد المفروض يحصل بإذن الله كله خير
عمتو سميرة قالت ليه ي دكتور يعني في امل لو حتتعمل ليه عمليه؟
قال ليها نحن بنعمل العلينا اكيد إذا عمليه والباقي بأمر الله إن شاءالله
وإن شاءالله معافى
اخدنا الفحوصات وحدد لينا موعد الزيارة الجايه متين وطلعنا
م حسيت ولا بكلمة مطمنه منه لكن يكفي جداً إنه ابوي لسة عنده الرغبة في التعافي وم رفض لما قلنا ليه دكتور اردني زي م كان برفض زمان، دة سبب كافي لأني اعمل كل البطلع بيدي عشانه
عملنا الفحوصات الإتطلبت مننا في المستشفى كل ده وكان طارق متابع معاي لغاية م طلعنا،
دموعي كانت في طرف جفني، لأنه ولا واحد في اخواني المفروض إنهم اكبر مني ومسؤولين عني وعن ابوي حاول يسأل،
لا شهاب إتصل ولا امجد ولا حتى شادي،
كل العملتو رسلت ليهم في قروب الواتساب : رجال والله وبترفعو الراس، كتر الف خيركم برضو، م كنا عايزين منكم شي جيتكم بس كانت بتكفي ولو كتير عليكم حق البنزين كنتو تكلموني حأدفع ليكم حقه وزيادة، عموماً الله ما يحوجنا ليكم لا انا ولا ابوي
وصلنا البيت قلت ليها عمتو إنتو ادخلو انا جايه، بركنت العربية ودقيت جرس الباب الجنبنا على طول، وم رفعت يدي من الجرس لغايه م الباب إتفتح، الشغاله قالت لي بي ضيق كدة بسم الله في شنو؟
قلت ليها خالتو كوثر قاعدة؟
خالتو كوثر جات طالعة وبتلبس في توبها وبتقول منو بي خلعة كدة، قالت لي شهد؟
مشيت عليها وحضنتها وبقيت ابكي،
بقت تقول لي بسم الله الرحمن الرحمن، بسم الله ي بتي لا حول ولا قوة إلا بالله في شنو مالك؟
قلت ليها ماف شي احضنيني بس ي خالتو كوثر عايزة ابكي، بعد مسافة
قالت لي تعالي، دخلتني ورقدتني في رجولها وبقت تقرأ لي قرءان لغاية م هديت قلت ليها اليوم ابوي كانت عندو مقابله مع دكتور اردني، وحجزنا عنده قبل بشهر، و...الخ
حكيت ليها بموقف اخواني
قلت ليها انا بس حسيت إننا برانا، رغم وجود عمتو سميرة لكن برضو حسيت إني براي ي عمتو كوثر
قالت لي الله يهديهم وينور بصيرتهم ي رب، لكن نحن مشينا وين ليه م كلمتينا؟ ليه م كلمتي عمك عثمان؟
حسام وحسن ديل مش اخوانك برضو ولا كيف؟يوم متين بنفرزهم منكم نحن؟ م خاتاني في مقام امك؟
قلت ليها لو م خاتاك مقام امي م كان لجأت ليك في اللحظة دي، و من دون الناس دايماً بختارك
خلتني هديت شويه.
جابت لي عصير ليمون قالت لي يلا إشربي وم تضايقي نفسك، شهاب وامجد زي اولادي انا بتكلم معاهم ونحن موجودين على طول مشينا وين؟
ليلى اختك دكتورة وم بتقصر برضو عندها زملاءها مختصين كلنا حنتابع معاه وبهمنا زيكم واكتر
ضمتني عليها وقالت لي م تشيلي هم إن شاءالله كل خير
قلت ليها إن شاءالله،
انا حأمشي عشان..
قاطعتني وقالت لي إشربي العصير اول
قلت ليها م قلت ليهم إني حأتأخر عايزة امشي عشان م يقلقو
قالت لي طيب، لكن زي م قلت ليك م تشيلي هم وإنتِ م براك نهائي تمام؟ نحن اهلك برضو، انا امك م تنسي الحاجه دي
خالتو كوثر، قبل م تكون معالجتي النفسية هي امي التانيه، كدة انا مسمياها، اوقات شدتي م بلقى غيرها، هي دايماً بتقيف فيني حتى لو م قلت ليها إني محتاجه، لو شافتني منزله إستوري حزين ساي بتتصل علي وبتاخد وبتدي معي في الكلام لغاية م احكي ليها مالي ويومي ضروري تطمئن علي، ما بس هي، بيتها كله بالفيه عبارة عن بيتنا التاني، ابوهم هو اقرب صاحب لي ابوي اقرب ليه من اولاده واخوانه واهله حتى، ممكن نقول إننا شبه عايشين مع بعض وبيتهم هو بيتنا، عايشين معانا حياتنا بعد وفاة امي والوضع الكنا فيه وحالة ابوي الكان ميؤوس منها انا وابوي م لقينا غيرهم، حتى اخواني م وقفو الوقفة الوقفوها هم معانا، في منهم الكان طايش وم كان م مسؤول وغيره، م كنا صغار وم كبار برضو،
انا شبه كنت مراهقة، وحتى م بعرف اعمل شنو وم اعمل، شنو، وغير متزنة نفسيا، كناً بنعاني، والضغط علينا من كل النواحي كان كتير،
اخبارنا كانت متصدرة القنوات والصحف، كنا شبه منعزلين عن الحياة، او معزولين بدون إرادتنا
ماف زول إحتوانا في الأوقات ديك غيرهم ف بمعنى ادق انا بشوف امي فيها
وانا داخله على البيت تلفوني رن، المتصل امجد
كنصلت في وشو ودخلت،
وصلت غرفتي عمتي سميرة جات داخلة وراي، قالت لي شهد هاك التلفون
قلت ليها منو؟
قالت لي امجد امسكي
قلت ليها م عايزة اتكلم معاه
فتحت مكبر الصوت
قال لي ي شهد، دة شنو الكلام البتقولي فيه دة؟ياخي إنتِ قايلاه ابوك براك وم يهمنا امرو؟
قلت ليه لو بهمك امرو كنت سالت عليه ي امجد
قال لي ي شهد انا كنت في مأمورية برة الخرطوم جيت اول امس ومن جيت نايم م فاهم اي شي والله، إنتِ عارفه براك انا م بتوصى على ابوي، وانا لو م مكالماتك دي م شفت رسالتك اصلاً
قلت ليه تمام
قال لي اعفي لي وانا هسي قايم جاي عليكم م بتأخر الدكتور قال شنو؟
قلت ليه انا مصدعة ي امجد عمتو سميرة حتحكي ليك تمام؟
اديت عمتو التلفون وطلعت لأنو طارق كان متصل علي في نفس الوقت
قلت ليه ايوة ي طارق
قال لي حصل شنو؟
قلت ليه رجعنا بس
قال لي وتاني؟
قلت ليه ولا شي،
قال لي وبالنسبة لصوتك مالو؟
إتنهدت وقلت ليه ماف شي برضو
قال لي والتنهيدة دي بتقول في شي وشويات،
قلت ليه إتضايقت من عدم وجود اخواني اليوم معانا بس، يمكن تشوفو سبب سخيف وحساسية زايدة مني لك..
قال لي بدون م تكملي السبب م سخيف وم تقولي عليه بس، حاجه كونها إتسببت في إنها تضايقك ولو بسيط ف هي سبب كافي م محتاجه شرح ابداً
قلت ليه البزعل اكتر لا مبالاتهم وعدم إعترافهم بإنه في تقصير منهم تجاه ابوي انا خليني، ابوي حتى لو م بتكلم انا شايفة قدر شنو عدم إهتمامهم دة مأثر عليه من نظراته بس
قال لي انا وجودي م كافي ي شهد؟ي ريت لو بقدر اسد خانتهم وم اخليك تفكري كدة ولا عمي يتضايق
قلت ليه وجودك كافي بالنسبة لي أكيد ي طارق والله،
قال لي وهعمل كل البطلع بيدي عشان م احسس عمي بفرقتهم والله هم م عارفين النعمة العندهم والغيرهم محرومين منها
قلت ليه انسى ي سيدي المهم
وانا بتكلم معاه جا شهاب داخل قال السلام عليكم
م رديت عليه، عمتو قالت ليه وعليكم السلام ي ولدي جاي بدري اليوم
قال ليها مشيت جبت الاولاد من المدرسة لانو ترحيلهم متعطل
عاينته ليه بخيبة امل كدة وضحكت ضحكة خفيفه
قال ليها ابوي وين؟الدكتور قال شنو؟
ودخل لأبوي في غرفته
بعد المغرب جات سندس قالت لي شهد ارح نطلع انا زهجانه
قلت ليها وانا كمان بس فترانه
قالت لي انا ممكن اسوق
قلت ليها طيب ممكن يلا اجهزي، جهزنا وطلعنا قلت ليها اعملي حسابك عشان م ندخل لينا في زول بس
ضحكت قالت لي ي بت انا خبرة والله وداست بنزين شديد لما اتخلعت
ولاحظت إنه سواقتها ممتازة
قالت لي كيف بالله؟
قلت ليها ممتازة بس وين إتعلمتي كل دة؟
شغلت اغاني وبقت ترقص وهي سايقة
عدينا وقت مع بعض إتعشينا برة ورجعنا وخلاص على وشك إننا حننوم قالت لي تعالي امسح ليك وشك كريم مرطب، ومسحت لي وشي برضو قالت لي إنتِ بس خلي لي نفسك حظبطك
إجتهاد البنات دة مسؤوليه انا م قدرها
ضحكت قالت لي تعالي احكي ليك، بتعرفي زمرد صحبتي؟بتحب أستاذ في المدرسة و..
❖
طارق ي ولد بتتكلم براك؟
لالا بتكلم مع شهد ي امي لكن شكلها شبكتهم كعبة
اها، كيف هم كويسين؟
والله ي امي كويسين، امبارح خالي كان عنده مقابله مع دكتور اردني
تاني دكتور؟البت دي راسها قوي خلي بالك، تتعب وتكمل قروشها في الفاضي ساي قالو ليها خلاص بعد كدة م بتعالج م دايرة تفهم
المحاولة م كعبة ي امي الشفاء دة من عند الله
كان بتعالج كان إتعالج من عشرة سنين ي ولدي، لكن كل الدكاترة المشو ليهم قالو ليها خلي الأمر لله بس اها اكتر من كلام الدكاترة تاني في قول؟
اها م قلت لي إنت نازل معي السودان ولا لسة م قررتة؟
إحتمال انزل وإحتمال لأ ي امي لسة م قررتة، حسب إجازتي
خلينا ننزل سوا، وبالمره تشوف ليك كلام مره تتلم عليها بعد دة
ي امي انا قلت ليك م بفكر في الموضوع دة لسه
اها بتفكر فيهو متين؟ ناقصك شنو؟ القروش عندك، ماف شي بقيف في طريقك حارس شنو إنت؟
صاحبة النصيب
اها صاحبة النصيب دي بتجيك من غير م تفتشها؟ وتفتشها كيفن إنت زاتك كان الوقت كلو ماسك تلفونك ومباري في شهد
طيب إحتمال هي صحبة النصيب ي امي
لحظة صمت
مالك سكتي؟
لالا ماف شي
بت اختك ومن لحمك ودمك م عايزاها؟
مالي م بدورها؟ كدة إنت بس ابقى عليها لكن شهد ما زولة عرس النكلمك، شهد عندها ابوها والبت الفي رقبتها دي والحاجات التانية البتسك فيها دي كان حارسها واطاتك اصبحت، وإنت ي ولدي بعد الغربة دي كلها انا دايرة ليك الإستقرار والراحة مش مرة بيتين ومسؤوليتين، والله بت اختي وبتي واي شي لكن إنت ولدي برضو ماف ام بتدور لجناها حياة م مستقرة
إن بقيت باقي عليها ي امي العمر كله فداها م عندي مشكله، الإستقرار والراحة ديل زاتهم مقياسهم شنو؟انا ممكن اعرس واحدة غيرها وم وراها مسؤوليات ولا عندها شي في الحياة دي غيري وم اكون مرتاح معاها برضو صح ولا لأ؟بعدين ي امي انا في وقت ما كنت مكان سندس دي، وخالتي الله يرحمها وعمي عبدالله ديل م قصرو معي في شي، اكل، شراب، قرايه، لبس، انا اليوم هنا بفضلهم بعد ربنا، انا برضو قبل اليوم كنت مسؤولية وهم م إترددو في إنهم يتحملوها
كل م نفتح نقاش تقول لي هم قبل اليوم م قصرو معي وتقعد تحسب لي في جمايلهم عليك، وإنت زاتك م قصرت معاهم، كان الموضوع دة دين في رقبتك إنت سديته بزيادة
جمايلهم علينا*حتى إنتِ برضو م مفروض تنسي، حتى بعد وفاة خالتي م إترفعت يدهم منك صح ولا لأ؟
في ديون م بتتسد ي امي، وم بتتحسب بالمعنى المادي ابداً
عموماً خلينا نقفل الموضوع لغايه م يجي وقتو ارح نتغدأ هسي انا حهزتو قبيل وكنت منتظراك ترجع
في محاوله منها في إنه تطنش كلام طارق بملامح وش متغيره وملانه ضيق
❖
في مقر الشغل داخله وانا مشتبكة حتى مع نفسي، على عكس وضعي اليوم دخلت وبحيل مهدود قلت ليهم صباح الخير
طوالي سمعت صوت بقول لي: شهد عندك إجتماع مع مجلس الإدارة، إتلفت لقيتها مرام
قلت ليها قصدك عندنا؟يعني إجتماع عام للموظفين؟
قالت لي نحن لأ غايتو، إنتِ في الإجتماع ي عسل
قلت ليها طيب، على طول مشيت لغرفة الإجتماعات، لقيت ولاء اللي هي ال HR ومعاها المدير بيضحكو
قلت ليهم السلام عليكم
المدير قال لي وعليكم السلام شهد إتفضلي
قلت ليه كيفك ي مستر؟
قال لي الحمدلله
قعدت
قال لي عامله غلبة ي شهد وضحك
قلت ليه انا؟
قال لي الشكاوي منك كترت لا مرة ولا إتنين
قلت ليه العفو يا مستر بس وضح لي شكل الشكاوي دي شنو عشان اقدر اوضح إذا في تقصير مني اعتذر عنه او ادافع
قال لي ما مهم اوضح شكل الشكاوي بس مهم جداً عندي تعرفي إنه ي شهد هنا نحن م قاعدين نستثني زول ابدا، يعنيً الموظفين هنا متساوين في الحقوق والواجبات ماف افضلية بين موظف والتاني، هنا مكان شغل وماف ربط بين العلاقات الخارجية وصلة القرابة والشغل وإنتِ زولة شاطرة وواعية وادرى بالنقاط دي
قلت ليه ي مستر انا كان إتعينت في الشركة دي بواسطة م إتثبته فيها بواسطة انا إتثبته فيها بمقدراتي وإجتهادي وإلتزامي التام تجاه المهام المكلفة بيها
قال لي ودة السبب المخليني اتغاضى عن الشكاوي والأخطاء الموجه ضدك
قلت ليه لا ي مستر المفروض يكون السبب إني م عندي اخطاء اتحاسب عليها
المرتب نزل قبل يومين، مدير المالية مطلع لي مرتب حق اسبوع، والسبب إنه حسب كلامه إني باقي الأيام غياب لأنه م كنت مكتفيه بجهاز البصمة وم بوقع في شيت
الحضور، لو الموضوع ليه علاقة ب صلة القرابة والعلاقات الخلرجية م كنت إتحاسبت وم مفروض اتحاسب اصلاً لأنو لو في مشكله في سيستم الشركة وال HR م قادر يشرف على حلها م مفروض يتحاسب عليها موظف، جهاز البصمة بالنسبة لي هو الوسيلة الوحيدة البتحدد حضوري وغيابي وتأخيري، استاذة ولاء بتقول نبصم وننتظرها لغايه م تجي الساعة 9 عشان نوقع ليها في الشيت وانا ببساطة قلت ليها م اطفال نحن، وم قدمت شكوى على مرتبي الإتخصم كلهورغم حضوري الشهر كله إجتماعات عملتها وغيره وغيره لكن لاني عارفه إنو الموضوع مقصود م عايزة اتجادل فيه
ولاء قالت لي قصدك شنو ب مقصود؟
سكتت
المدير قال لي طيب ي شهد من هنا حتطلعي قبل نهاية اليوم مرتبك حيكون نزل في حسابك، وحنحل مشكله جهاز البصمة اليوم برضو إن شاءالله وي ولاء اللغي موضوع الشيت دة من اليوم، نحن في غنى عن إنه نخسر موظفينا اكيد تمام ي ولاء؟
قالت ليه حاضر
قال لي إتفضلي و إنتِ بت الشركة ي شهد واكيد حريصة عليها اكتر مننا ولا شنو؟
قلت ليه شكراً ي مستر وفي جواي بقول بت الشركة دي شنو كمان؟
طلعت من غرفة الإجتماع وانا متضايقة اكتر، يعني ايوة نعم هو إسلوبو كان كويس معي لكن برضو م بفوت فرصة يذكرني بيها إنه انا متعينه هنا بواسطة وعشان شهاب اخوي طالب منه كدة
رجعت البيت وانا بتكلم مع طارق وبحكي ليه ضحك قال لي كلامه عباره عن هبوط ناعم لأنه عرف إنه موقفك سليم وم ملامه على عدم توقيعك في الشيت،
قلت ليه لو مجبورة م حكمل مع زول شايف إستمرار وجودي معاه في الشغل عشان علاقته مع اخوي م عشان انا بستحق دة
قال لي هو ببتز فيك عشان تشتغلي اكتر واكتر بس رغم إنه هو شايف شغلك وعدم تقصيرك
قلت ليه عشان كدة م بحب التقيد دة، لو خليتوني اشتغل في منظمتي الكنت فيها وفي منصبي داك مش كان افضل؟
قال لي رجعنا تاني للموضوع دة ي شهد؟
قلت ليه طيب سكتت
جات سندس قاطعة فيني وهي شبه ممكيجة كدة، طلعت عملته شاي قلت لعمتو سميرة سندس وين؟
قالت لي قبيل شالت كتبها وتلفونها وطلعت فوق اظنها ماشة تقرأ
قلت ليها طيب حأشيل ليها الشاي دة، شلته وكنت بنادي عليها من السلم، لغايه م وصلت السطوح م كانت بترد، كنت سامعة صوت ضحكها بس وبعدها سمعتها بتقول: اكتر من كدة عايز تشوف شنو بطل قلة ادب، مشيت عليها لقيتها هي لابسه توب عادي بدون تشيرت وفاكة شعرها وصدرها شبه ظاهر وبتتكلم مكالمة فيديو، قلت ليها سندس؟
إتلفتت علي مخلوعة
قلت ليها اديني التلفون دة
وهي متوترة وخايفة بس عندها ثبات إنفعالي في نفس الوقت قالت لي بسم الله مالك قاعدة اتصور فيديو
قلت ليها اديني التلفون ي سندس
ادتني ليه،
فتحت الشات بتاع الواتساب، قلت ليها دة شنو؟وبتكذبي كمان؟دة منو دة اصلا؟ومنً متين بتعملي كدة؟م خايفة على روحك؟كيف تتكلمي مع ولد بالشكل دة؟إنتِ بت متين اساسا؟ً
قالت لي بسم الله ي شهد حنستشرف على بعض، هسي إنتِ الوقت كلو بتتكلمي مع طارق مكالمات فيديو في زول سألك؟ جات علي انا بقيتي حارسة فضيلة؟
في اللحظة دي انا بقيت مصدومة وانا بسمع في كلامها البتقول فيه دة، قلت ليها انا بعمل الإنتِ بتعملي فيه دة هسي؟بعدين طارق اخوي ودي صله قرابة، قال لي لأ م اخوك و م فرقت، الدنيا كلها بتعمل م وقفت علي انا يعني وشالت كتبها ونزلت وخلت التلفون في يدي
الموضوع اكبر من إنها بتتكلم مع ولد، المشكله في نبرة صوتها الإتكلمت بيها في اللحظة دي وعدم إعترافها إنها غلط او خجلها حتى، انا بشوفها صغيرة بس لأ، م لاحظت قدر شنو هي كبرت خلاص، حتى إني مفروض اعمل شنو وكيف اتعامل مع الموضوع دة والموقف المفروض اخده شنو كله م عارفه
سندس هي بت خالي، ابوها متوفي امي متبنياها لأنه امها خلتها صغيرة وإتزوجت وسافرت، لما امي إتوفت خلتها عمرها 7 سنة، يعني انا مربياها على إيدي كأنها بتي بالضبط، هي الحاجه الوحيدة الهونت علي مصاعب كتيرة كان ممكن اعيشها وإتخطيتها بإنشغالي بيها وبتربيتها، إتخليت عن حاجات كتيرة عشانها هي، تاني يوم صحيت لقيتها مشت المدرسة والطبيعي انا بوصلها، وحتى مصروف مني م اخدتهة، يعني زي م بقولو ضربني وبكى سبقني وإشتكى...
كالعادة انا المفروض اراضي رغم إنه هي الغلط، والسبب إني براعي لحاجات كتيرة سبب في شخصيتها النرجسية دي
اليوم التاني ما مشيت الشغل بسببها، ومشيت إنتظرتها في المدرسة لغاية م خلصت وجات طالعة، نظراتها نظرات زعل قلت ليها مستنياك عندي اكتر من ساعتين يلا نمشي
قالت لي والترحيل؟
قلت ليها اركبي، ركبت في المقعد الورا
قلت ليها حندخل كافيه نشرب حاجه ونتفاهم افضل
قالت لي بلبس المدرسة دة م ماشة مكان
قلت ليها عملت حساب كلام دة وجبت ليك عبايه وطرحه
دخلنا في كافيه كدة وطلبت ليها اكل وعصير، نزلت نظارتي قلت ليها شايفة عيوني؟انا من امس م نايمة لأننا زعلانين من بعض
قالت لي انا م شافعة دي النقطة الإنتِ م عايزة تفهميها
قلت ليها فهمتها، وانا م ضد إنه تعيشي مراهقتك بس م بالطريقة دي، مافي ولد بيطلب من بت تظهر ليه نفسها بالشكل دة وبكون باقي عليها ما ندر، هو نفسه حيكون مراهق وبقضي زمن، طالما إنتِ م شافعة وم صغيرة م مفروض تصرف زي دة يطلع منك ابداً
كانت مستندة على الكرسي وراخيه جسمها و بتشرب العصير ببرود وبتعاين لي
قلت ليها الزول البطلع لسانو مترين وبقول انا ما شافع دة مفروض يكون مسؤول من نفسه ومن تصرفاته وحريص عليهم صح؟
بتقدري تضمني البتتكلمي معاه دة إنه م يسجل مكالمتكم فيديو ويستخدمه إستخدام غلط؟
انا م عايزة اتسلط عليك ولا عايزة احرمك واعيشك في تقييد لكن انا كمان بخاف عليك
قالت لي تمام
قلت ليها شنو هو التمام ي سندس؟
انا مأجله شغلي، ومنتظراك ساعات قدام المدرسة عشان نتناقش ك ناس كبار وعاقلين بعيد حتى عن محيط البيت
قالت لي انا غلطانه واسفة تاني م هعمل كدة
قلت ليها م الفكره إنه تقولي لي غلطانه وتتأسفي لي عشان نقفل الموضوع، الفكرة إنه توعي لأنه دة شي اول شي حرام، تاني شي ما في مصلحتك النوع دة من العلاقات ولا دة يتسمى حب، انا شفت المحادثة وشفت شكل الصور البترسليها ليه وغيره، وشفت إعتراضك على الحاجه دي والطريقة الكان بقنعك بيها، انا بس عايزاك تفهمي إنه م مفروض ولا بأي شكل كان تكملي مع زول بالعقليه دي، هو اقنعك ب إنه كلهم بعملو كدة بس هل إنتِ شفتي كل الناس بتعمل كدة؟دة الشي الرسمو ليك هو ودة م معناه إنه حقيقة،
قلت ليها إنتِ بتي قبل م تكوني اختي و بت خالتي وانا م عندي غيرك إنتِ وابوي في الدنيا دي ي سندس، ولو إسلوبي غلط ف دة من خوفي عليك بس فهمتي؟
إنتهى كلامي معاها لغايه هنا، لما رجعنا البيت قبل م ننزل رجعت ليها تلفونها، قلت ليها بغض النظر عن كل شي انا واثقة فيك عشان كدة م حأخلي التلفون معي، وإنتِ كبيرة على العقاب، في حاجه بتقدري تساعديني بيها في الحياة دي اتمنى تكوني مسؤولة من نفسك وتصرفاتك السنة الجايه لو ربنا سهل حتكوني في الجامعة، انا م حكون ملازماك دايما، في المجتمع داك إنتِ البتحددي عايزة تكوني شنو، دخلتو ليها في شنطتها ونزلت
بالليل كدة فجأة جات رقدت جنبي، قالت لي حظرتو ومسحت رقمو، فتحت لي الشات حق الواتساب بتاعها، قالت لي شوفي
قلت ليها طالما قلتِ حظرتيه ومسحتي رقمو يبقى م محتاج اشوف حتى، مصدقاك، قالت لي تاني م حيحصل مني كدة إن شاءالله، فعلاً تصرفي كان غلط وم مفروض ادي ولد فرصة يصل معي الحدود دي، م ماخدة في خاطرك مني عشان كلامي القلتو ليك صح؟ م كنت قاصدة بس ديك لحظة خوفه مني كانت، وانا لما بخاف بتوتر و بنفعل وم بعرف اتصرف او اتكلم وإنتِ شفتي انا كنت برفض صح؟
قلت ليها المهم الموضوع إنتهى، نحن عباد م ملائكة
الموقف دة رجعني بذاكرتي لأمي مرة لقت في شنطتي جواب كاتبه لي واحد، كنت خايفه وقلبي حيقيف من الخوف من رد فعلها، وقتها صدمني رد فعلها لأنها إحتوتني وشالت الخوف الجواي منها اول حاجه بعدها ناقشتني في الموضوع، على قدر م كنت مستغربة على قدر م استوعبت إنه المواقف دي سلاح ذو حدين، نحن بنحدد او بنشارك في تكوين شخصية المراهق القدامنا بيها
❖
اها طارق م نازل معاك ي عمتي؟
والله يا رونق ي بتس طارق دة ي بتي قال إن نزل داير ينزل زول عرس عديل كدة وحسب إجازتو بعدين
كويس والله، افضل ليه خليه ينزل يعرس الغربة حارة
اي إن شاءالله، انا كنت مُصرة ينزل معي لكن اسوي شنو عاد
قولي ليه كان م لاقي ليك بت نحن بنفتش ليك إنت بس انزل البنات م اكترن في السودان بس قول ي عروس كان دي مشكلتو محلولة
انا زاتي محني، ودة كلامي ليهو، إنه كان واقفه في طريقك العروس مالو نحن بنفتش، لكن قال لأ
معناها عنده البت، اها تاني راجي شنو؟انزلي إنتِ واخطي خطوة اولى اصلي اهلها وافتحي اضانهم والفيه الخير ربنا يقدمه م وراك ليه؟ اوعى تكون من البنات البسفن المغتربين ديل يقعد يصرف عليها وتاكل قروشو خليه يعمل حسابو
لالا هو زول واعي، وزاتو م اظن يطلع بره البيت، بت البيت هي
رونق: اجي من بنات البيت؟ دي منو عااااد سعيدة الحظ دي، بت منو الأهل
هو م اكد لي وم تكلمي زول لكن لمح لي زي الباقي على شهد كدة غايتو "بنبرة عدم رضى كدة"
رونق: بصوت عالي اجي شهد؟ عليك الرسول قال كدة؟
م اكد لي لكن لمح بكدة غايتو
رونق: وانا اقول الوقت كلو تتكلم معاه ومتلصقة فيه اتاري الموضوع فيه إن وم إتكلمت عاد لكن جنس دسديس مبالغة، اها وإنتِ رايك شنو؟كان كدي الموضوع هين
والله ي بتي هو كان قال انا ن عندي قول تاني وشهد بت اختي انا م بأباها م ناقصها شي والكمال لله، لكن براك ادرى بالعليها
رونق دخلت غرفتها وقفلت الباب عليها وقالت ليها إنتِ عمتي وانا م بدس منك بصراحة يعني طارق ود متين هو؟ شهد اليوم عمرها 27 سنه طارق عمره كم؟
قالت ليها 28 سنه ي داب
اها ي عمتي م يشوف ليهو واحدة اصغر منه على الأقل ب 10 سنه، البنات الصغار صغار ديل مالهن م راقدات ماشاءالله وحلات الدنيا عليهن، شهد م فيها قول واي شي لكن برضو نعاين لفارق العمر بينهم قدر بعض عديل والبشوفها يقول اكبر عليهو، دة غير عمي الما دايرة تفارقو دة، اها طارق يبقو عليهو غربة وعدم إستقرار؟عمره كلو يقضيه شغل وينزل إجازات زي الضيف؟ اصلاً هي مستحيل تفارق ابوها، الحق دة حق ي عمتي مالو ومال البشتنة، كان عرس بالطريقة دي دة برضو إستقرار، يعرس ليه واحدة صغير حليوة كدة يسوقها في طرفو وإنتِ معاهم، كان م عايزة تقعدي معاهم تسافري ليهم من فترة لفترة او ينزلو ليك إجازات ولا كلامي دة شنو ي عمتي؟والله شهد اخت وصحبة واي شي م فيها كلام لكن الله دة شافو بالعين ولا بالعقل؟الولد مغترب وتعبان وشقيان لشنو كان حيعرس ويعيش برضو في تعب وشقى؟
والله ي بتي دة رأي انا زاتي، وكلامك عين العقل، لكن اها عاد اسوي شنو؟
سوي الفي مصلحتو، بعد كم سنة يشكرك على الشي العملتيه دة، ابداً م تشتغلي بيه وطالما لمح ليك بس م قال ليك عديل انا دايرها م تديه فرصة يقول نهائي، قولي ليه دايرة ليك بت فلانه، رايك شنو في بنات فلان وهكذا، اعزلي ليهو البنات الصغار السمحات ديل لسة لا عندهم هموم ولا مشاكل ولا شافن شي في الدنيا دي، وبيني وبينك للأن بتمشي لدكتورة كوثر مرت اللواء عثمان طوالي، اظنها لسة بتديها علاجات للنفسيات وبتعالحها من الحاله الكانت بتجيها من وفاة امها زمان ديك لكن داسين الموضوع الاتنين رغم إني حاولت اسأل كوثر واعرف منها بطريقة غير مباشرة لكن م اكدت لي
والله ي بتي الله يهون بس
زي م قلت ليك ي خالتي م تخليهو، طارق راجل شهم والله ويستاهل كل خبر، والغربة م هينة اها يحصد حصاد غربتو ويجي يتعب ويتشاقى تاني؟ هسي والله كان قال داير سندس ساي م عليها إعتراض، صغيرة، وسمحة ماشاءالله وتعجب الما بعجب والله تطلع الشارع دة الناس كلها تعاين ليها
سندس؟ سندس بت متين؟ ما صغيرة على طارق؟
اي سندس بري م صغيرة 17 سنه اظنها لكن ماشاءالله فارعة، م شفتيها قريب إنتِ ولا شنو النرسل ليك صورها تشوفيهم، بت ماشاءالله تختيها في الجرح يبرأ، سماحة تلقي، نشاط تلقي، إهتمام بنفسها تلقي، كان مشت في الأرض دي رجلها م بتشيل تراب، والجسم والشعر عاد ماشاءالله تبارك الرحمن
كدة رسلي لي صورها طولت م شفتها انا
رونق: برسلهم ليك بعدين بس اخليها ترسلهم لي، وإنتِ كان قلتِ خير، خلي الموضوع علي انا بس اصلاً ما تفكري و ما تجيبي سيرة إنه طارق قال عايز شهد دي لزول نهائي
"الألم الذي يبدأ من العائلة، لا ينتهي أبدا"ً