الفصل الثالث
اسمي شهد، شهد فقط لا أنتمي لقبيلة ؛ لطائفة أو لأوراق حكومية معينة .. سيدة في منتصف العشرين و بعقل الستين / أنتمي الى عائلة تهذب الروح اسمها: الأدب، لا أملك سوى القليلُ من الفنِ و الكثير من الأبجدية .. أكتب لأنني لا أبكي كثيراً!
ملاحظة: أمي أولاً و دائماً و أبداً - رحمها الله
"إقتبست هذه الأسطر من إحدى المدونات وجعلتها بمثابة سيرتي الذاتية على حساب الشخصي
إتسميت شهد على إسم اختي الكبيرة رحمة الله عليها إتوفت في سن ال 16 سنة وبمعنى اصح قُتلت * ولأسباب ماف زول بعلمها غير امي وابوي إلى الان وقفت أمي امام القاضي في جلسة النطق بالحكم وقالت للمتهم:
انا عفيت عنك
وسط إندهاش كبير من الحواليها..
رددت ليه إن كنت ظالم او مظلوم نحن اولياء الدم عافين عنك والله المستعان
من وقتها امي إتعرفت بالمحامية العفت عن قاتل بتها..
وبعد مرور ما يقارب ال 10 سنة وفي عز محاولاتها لتخطي وتناسي وفاة اختي حملت بي، رغم رفضها التام للحمل بسبب تقدمها في السن، وعلى حد قولها إنه رفضها لولادتي كان سببه عدم رغبتها في تقيد وتعقيد حياتها بوجود طفل جديد خصوصاً إنه وقتها كان كل تركيزها موجه لحياتها المهنية، وكانت لاقية كل الدعم من ابوي حتى في قراراها في إنها م عايزة تنجب
عندي تلاته اخوان شهاب وشادي "توأم"، واحمد
ابوي كان طبيب بيطري، في وقت ما كان رئيس نقابة الاطباء البيطرين في السودان
اما امي فكانت محامية وناشطة في حقوق الإنسان
رحيل والدتي كان وانا في سن ال 17 سنة، ودة كان سبب كافي في إنه طيشي يرحل معاها، وسبب كافي يخليني احسب خطواتي وافهم نظرات ونبرات الحوالي، وسبب كافي يخليني اتفرغ لفهم المواقف الحقيقية والتصدي لها، موتها خلاني انضج وابعد عن كل تفاهات الحياة، وانهمر...أنهمر في العمل للنسيان او التناسي من اجل العيش*
دي نبذة بأحداث مختصرة فيما يخص اسرتي.
❖
طارق
جنبك قولي لي
عايزة احول ليك قروش تلفون سندس انا إستلمت المرتب خلاص
كلمت طارق وانا مبسوطة شديد
قال لي يا زولة؟ مش إتناقشنا في الموضوع دة؟
قلت ليه ومش في النقاش قلت حتشوف طريقة تحويل؟
طارق: م لقيت
قلت ليه بي نرفزة طيب خليهو ي طارق
قال لي إنتِ ي زولة مجنونة في راسك دة ولا شنو دي شنو الأمور البتسوي فيها دي؟
قلت ليه إنت بتعمل كدة عشان م تشيل القروش وانا كلمتك إنه م حوافق استلمه لو م شلت القروش
قال لي طيب ي شهد دام دة الشي البريحك امي كدة كدة نازلة السودان بعد يومين حأديها التلفون وإنت هناك اديها القروش تمام كدة؟
قلت مالك بتتكلم معي بنرفزة كدة؟
طارق: لأنو تصرفاتك بتنرفز ي شهد دايماً عايزة تحسسيني إنه في حاجز بينا، انا غيرك إنتِ وأمي عندي منو؟
قلت ليه عندك مستقبلك المفروض تأمنه
قال لي مستقبلي إنتِ جزء منه ليه بتتكلمي كأنه انا زول بتعرفيه من الشارع؟
قلت ليه طيب ي طارق انا اسفة إنت براك بتتحسس بس، لما تهيج كدة بتخوف
قال لي عموماً الطرد حق الحاجات انا شحنته حيتصل عليك زول شان يسلمك ليه تمام؟
قلت ليه طيب
طارق: انا ماشي انوم
قلت ليه ليه حتنوم بدري؟
طارق: تعبان بس
قلت ليه تعبان ولا متضايق مني؟
طارق: بفرق معاك؟ جد ي شهد انا ضمن الحاجات البتفرق معاك؟شايفاني مثلا؟ً
طارق !؟
قال لي تصبحي على خير ي شهد
قفل على كدة
اول مرة احسه ما على طبيعته، على غير عادته في الكلام معي حتى زعله كان بخليه على جنب وبيوصيني على نفسي حتى في عز زعله مني م بخليني احس بزعله
صباح اليوم التاني صحيت م لقيت منه مكالمه ولا رساله، رسلت صبحته عليه، إتصلت عليه م رد
يومي كله مر سيء وانا بفكر فيه، او ممكن اقول إنه م مر اصلاً ولا بدا لأنه م كان جزء منه
طارق ولد خالتي اخت امي، ابوه إتوفى وهو صغير، وخالتي وقتها كانت صغيره ف إتزوجت وزوجها م كان راضي بفكرة وجود طارق معاها ف طلب منها ترجعه لأهل ابوه، وفعلاً دة الحصل ساقوه ودوه لاهل ابوه لكن امي لما عرفت رفضت ومشت اخدته منهم وربته هي معانا، انا فتحت عيني لقيت طارق دة جنبي، من بين اخواني كلهم كان احن واحد على امي وكان دايماً المفضل عند امي وابوي لأنه كان لطيف ومطيع على عكس اخواني، م بقدر احدد تعلقي بيه واصل لأي درجة بس لولا لطف الله ووجود طارق حاجات كتيرة م بتذكر إني كنت حأعديها، دايماً كان هو في خط الدفاع والحماية الأول لي ولحياتي، بيعمل عشاني الما ممكن واحد من اخواني يعملوه
المساء رسلت ليه إنه انا م كويسة، واليوم م كان كويس خالص لأنه هو م كان جزء منه، وإنه انا اسفة وإنه هو م بهون علي زعله اكيد وانا مستنياه يكلمني م كان فاتح الشبكة
لما قلقت وطال إنتظاري
إتصلت على خالتي اللي هي امه، اول م ردت كانت بتقول: اعمل ليك شاي بالنعناع ولا جنزبيل يا ولد؟
قلت ليها ي خالتو كيفك
قالت لي شهودة، تمام الحمدلله مشتاقين بس
قلت ليها انا اكتر والله
قالت لي كم يوم واكون معاكم خلاص زهجت من القفله دي دايرة الحوامه بعد كدة...الخ
طالت مكالمتي معاها ونحن بناخد وبندي مع بعض في ألكلام،
قلت ليها طارق قاعد؟
قالت لي اي قاعد عايزاه؟
قلت ليها اي كدة اديني ليه لأنه م شايفاه داخل النت
ضحكت وقالت لي اها بكره كان بقى راجل مره ولقيتيه م داخل النت تقومي تضربي ليه في تلفون مرتو كدة تجيبي ليه الخراب
ضحكت قلت ليها لالا الله لا جاب الخراب يا خالتو ياخ، هو عامل زعلان مني عشان كدة عايزاه
قالت لي بهظر معاك، اخوك عادي تتصلي عليه في اي وقت، زعلان منك مالو، قالت ليه هاك دي شهد
شال التلفون قال لي الو؟
قلت ليه إشتقته ليك ي سجم
سمعت صوت خالتي بتقول لي وانا مالي م بتقولي لي إشتقتة ليك انا ام السجم
خجلت ودخلت في ضفوري شكلها كانت فاتحة المكبر
قال لي كيفك؟
قلت ليه ما كويسة، افتح الشبكة، عارفاك م طايقني بس افتحها انا كاتبة ليك كلام عايزاك تقراه
قال لي م عايز افتحها ي شهد
طارق عليك الله م تتهابل
دة ما هبل ي شهد، طيب قولي لي الكتبتيه ده
سكتت
قال لي م حتقدري تقوليه بس عايزاني اقراه؟
قلت ليه ايوة
قال لي طيب انا عايز اسمعه منك م عايز اقراه
قلت ليه انا م شاطرة في التعبير وإنت عارف كدة
قال لي قوليه بأي صيغة انا حأسمعة وافهمة م عليك
قلت ليه هو طلب بس مهما حصل مني م تبعد عني ولا يوم ممكن؟ ما تخلي الزعل يدخل م بينا إنت عارف إنه إنت اقرب لي من كل الناس الحوالي هسي دي
قال لي حاضر ي ستي اوعدك م حيحصل
قلت ليه حتفتح الشبكة؟
قال لي ثواني بس وارجع ليك بتلفوني
هو هين ولين جدا، ماً عندو التعقيد الفي الناس دة، ممكن هو اليكون زعلان ويرضى بكلمه عادي
❖
شهد مالها معاك زعلان منها؟
ماف شي يتقال عليه، التلفون دة خليه معاك لما توصلي اديه لشهد
كدي ي يمة طوالي جبت ليها تلفون جديد؟ دة حق التراضي ولا شنو؟
ما حقها ي امي، حق سندس جايبو من فترة، شهد طلبت مني اشتريهو ليها لأنه هنا التلفونات جودتهم كويسة
اها كويس والله
❖
صباح الجمعة:
سندس ارح الطابق الفوق ننضف ونرتب لخالتي بيتها لأنها جايه بعد بكره
ما بقدر والله ي شهد تعبانه وفترانه من جري المدرسة ما صدقت الجمعة جات
قلت ليها ي بت م حناخد وقت، اصلاً إتصلت على البت الشغالة تجي تساعدنا في النضافة، ومعانا عمتو يلا
هي خالتك اصلاً الجايبها شنو جاية لشقانا، كلامها كتير وم بنتهي وجنها تنظير إن شاءالله نازلة فترة قصيرة بس وحترجع
ضحكت قلت ليها م اظن فترة قصيرة وم اقل من 6 شهور
قالت لي واي 6 شهور دي ام المعطة، حتقرفنا عيشتنا ياخ نحن ذنبنا شنو ولدها مجبور عليها نحن مالنا؟
قلت ليها عيب على فكرة دي خالتك، وقومي يلا ارح إن شاءالله ونسيني ساي وانا بنضف وبرتب بطلي كسل
قالت لي خالتي وم بطيقها م بتنطاق اكذب؟اتنافق مع إحساسي ومشاعري؟
قلت ليها لا بس يكفي إنه م تكوني وقحة وتصرحي بيه او توضحيه مفروض تحتفظي بيه لنفسك
إنتهى النقاش دة ونحن فوق بدينا نضافة وترتيب وغسيل، ، السطوح بالشقة الفيه امي وابوي كانو مدينو لخالتي دي بعد م إنفصلت عن راجلها، بعد م طارق سافر وساقها معاه خليناه مقفول بكل حاجاتها فيه وم حاولنا نستغله ابداً، لأنها بتنزل إجازات بنفتحه ليها *
❖
سندس وهي راقدة في الغرفة سمعت صوت رونق وهي بتنادي من اخر الزقاق
قالت ليها ايوة ي رونق
قالت ليها صوتي راح وانا بنادي إنتو وين؟
قالت ليها شهد وعمتو سميرة فوق بنضفو في شقة خالتي
رونق: نسيبتك جاية متين معاها ضحكة
سندس: نسيبتي دي شنو؟
رونق: بطلي خساسة يعني م عارفة؟
سندس: م عارفة شنو وخساسة شنو بتقولي في شنو إنتِ اجي؟
أم طارق، حبيب القلب
سندس: رونق إنتِ شاربة شنو؟
رونق: عصير ليمون تركيزو عالي
سندس: شهد وعمتو فوق لو عايزاهم اطلعي ليهم
رونق حست بنرفزة سندس منها وعدم تجاوبها معاها، قالت ليها بكرة تندم ي جميل
خلصنا نضافة وعدينا الليل كله نطبخ ونجهز في الاكل،
اليوم التاني خالتي إتحركت فعلا، واناً بجهز عشان امشي المطار استقبلها قلت ل سندس اجهزي امشي معي نجيبها، قالت لي منو؟ انا؟ بتهظري إنتِ
قلت ليها ي بت مالك إنتِ مع خالتك على فكرة عيب كدة
قالت لي هي بس تحترم نفسها وتاني م حيكون عندي معاها ميل، م صدقت إني حاظراها من الواتساب، والفيسبوك لأنها حشرية تنط لينا هنا كمان؟
مشيت المطار إنتظرتها لغاية م طيارتها وصلت، طارق كان مافي في الدوام ف م كان متابع معي خالص، وصلنا البيت، إستقبلوها كلهم، واليوم دة صادف امجد معانا برضو،
كنت متحمسة لجيتها ما عشانها هي تحديداً لكن عشان التلفون، جيتها كانت مصادفة عيد ميلاد سندس، حتى الطرد الطلبتو ليها وشحنو لي طارق م وريتها ليه كنت خاتاه في كبود العربيه ورا ومستنية استلم التلفون عشان اغلف ليها الحاجات كلهم مع بعض واديهم ليها، وحتى إتفقت مع البت البتغلف وحددتة ليها اليوم الحأجيها فيه
صباح يوم الأحد صحيت لقيتهم بشربو في الشاي كلهم مع بعض رونق واولادها وشهاب وبابا وعمتو وامجد، وخالتي كانت بتوزع في هدايا
لما جيت قالت لي شهد هاك ي بتي جبت ليك العبايات والعطور دي، عارفاك زولة عبايات ساي
قلت ليها الله ي خالتي م قصرتي والله ياخ
جات سندس قالت ليهم صباح الخير
خالتي قالت ليها الحبيبة صباح النور حبيبتي
دقيقة
قامت طلعت فوق بعد مسافة جات نازلة، ادتها كيس كبير كدة قالت ليها دي حاجاتي انا جبتهم ليك، كبرتي عاد من اخر مرة شفتك فيها فيس تو فيس إن شاءالله يكونو مقاسك
رونق قالت ليها كبرت وبقت سمحة بي غمزة كدة
خالتي ضحكت وقالت ليها من يومها سمحة م عندنا زول شين نحن قايمة زي امها وحضنتها وباستها
انا كنت بعاين ليدها التانيه ومنتظرة تنتطق إسمي
لقيتها بتقول ليها هي نسيت، التلفون دة جابو ليك طارق قال يدوك ليه..
هنا انا إتصدمت، كيف يعني؟
بقيت اعاين ليها واعاين لسندس
قالت ليها امسكي هاك، سندس قالت ليها بي لهفة كدة وصدمة طارق جابو لي انا؟
قالت ليها والله قال لي بالحرف التلفون دة جايبو لسندس
رونق ضحكت وقالت ليها عاد لكن شي عجيب، طارق لكن قلتِ لي ي سندس
انا كل تفكيري كان متمحور حوالين إنه هو ليه عمل كدة وانا مورياه إني عايزة اقدمه ليها في عيد ميلادها مع حاجاتها، وهو عارف إني منتظرة شهر كامل عشان اصرف واحول ليه حقه عشان يشتريه، وماف زول غيره عارف إنه التلفون دة حق سندس يعني خالتي م عندها علم اساساً بيه ومفروض كان تسلمو لي انا على اساس إنه جايني انا م سندس.
سندس قالت لي وهي مبسووطة شايفة ي شهد كل تأخيرة بخيرها ربنا ريحك م حتجيبي لي تلفون جديد لكن بشيل منك حقه
طلعت مشيت البنك سحبت القروش ومشيت الدوام، بعد م رجعت طلعت القروش لخالتي قلت ليها القروش دي طارق طلب مني اديك ليها
قالت لي كدة تعالي اقعدي هنا
قعدت.
قالت لي إنتِ ناوية تقعدي كدة لمتين؟ العمر جاري م ماشي بس، اليوم عمرك 27 سنة اكتر من كدة قاعدة لشنو ي بتي م تشوفي ليك ود حلال تتلمي عليه بعد كده؟
قلت ليها خالتي انا م بفكر في العرس هسي والله
قالت لي اها وحتفكري فيه متين؟
قلت ليها كل شي في وقتو حلو
قالت لي ودة وقتو، ماف وقت تاني لازم تلحقي تجيبي ليك وليدات ينفعوك، دايرة تعرسي متين تاني بعد ال 30 سنة؟
قلت ليها ماف زول قسمتو بتفوتو كان 30 سنه ولا اقل
قالت لي اسمعي كلامي بعد كدة فكري في نفسك، ماف راجل داير ليهو مرة كبيرة كلهم دايرين البنيات الصغار ديل، بعد ال 30 سنة دي إلا كان يعرسك بقروشك عشان فلسان ولا طمعان فيك
ضحكت قلت ليها طيب
قالت لي والله جد م تضحكي
عمتو سميرة كانت قاعدة قالت ليها ولا شنو ي سميرة كلامي دة م صحي؟البت دي دايرة تقعد زي قعدتك دي
انا متعودة على اسلوبها ايوة وم يفرق معي بس في اللحظة دي إسلوبها كان جارح ل عمتي
قلت ليها بي ضيق خالتي العرس قسمة وي ريت نقفل الموضوع دة لغاية هنا،
عمتي سميرة وشها م كان بتفسر اللحظة دي وانا م كان عندي شي اقولو بس كسر خاطري الموقف دة
قالت لي هسي طارق دة قاعدين نفتش ليه لي بت صغيرونة وحلاتها كدة نلمو عليها قال بقى زول عرس وعايز يستقر
قلت ليها بي ضيق إن شاءالله تتسهل وتلقيها ليه ي رب
عملت العيد ميلاد ل سندس، وم وضحت ليها إنه التلفون جبتو انا بس خليت طارق يشتريه، وم سألت طارق عن الموضوع وقفلته على كدة وم قدرت اخد موقف منه
❖
سندس في مطبخ رونق بتسخن الأكل عشان غازنا قطع وماسكة تلفونها...
رونق جات داخله وقالت ليها دة التلفون الجديد؟
سندس قالت ليها ايوة
قالت ليها ماشاءالله رهيب ايفون كم؟
سندس قالت ليها م عارفة والله
قالت ليها لكن العريس عزاك والله بحب الراجل البعبر عن مشاعره بالمادة دة
سندس قالت ليها بإستغراب: طارق عريس؟
قالت ليها عليك الله ي سندس بطلي خساسة، يعني م عارفة؟
سندس: م عارفة شنو؟
قالت ليها إنه طرق عايزك
سندس: بخلعة انا؟طارق؟ وبملامح وش غريبة كدة
رونق قالت ليها يعني م عارفة؟
قالت ليها ماف كلام زي دة، جبتيه من وين؟
قالت ليها خالتك كلمتني، ونازلة مخصوش عشان الموضوع دة، شنو عامله روحك م عارفة يعني؟ وشهد م عندها علم معقولة؟
سندس قالت ليها والله ماف شي من دة، مستحيل اصلا، لوً في شي شهد كانت حتكون اول العارفين اكيد، بعدين لا انا بطيقة لا هو بطيقني
رونق: ي بت مكلم امه عديل بقول ليك سمعت من عظمة لسان عمتي، ولو م قال م كانت قالت، ومستحيل يكون م مكلم شهد هو بتكلم معاها ٢٤ ساعه واي شي بحكي ليها، لكن السؤوال هنا كان إنتِ م عارفة يبقى شهد م حكت ليك ليه؟مستحيل يكون م فاتحها في الموضوع دة وهو منزل امو مخصوص عشان الموضوع دة، وبعدين شنو م بنطيق بعض، ي بت طارق ي يمة ادب، ي يمة إحترام، مسكين لا بودي لا بجيب، وحيعيشك ملكة م عندو غير امه دي يطلعك من السودان والعولاق الفيه دة وم يحوجك لي شي قروشو كلها ليك إنتِ بس وامه يعني لا عنده اخت ولا عنده مسؤوليات ولا وراه غيرك تتدلعي كدة ي يمه لما تقولي بس، ودة كلو كوم ووجاهتو كوم تاني خالص عاد تبارك الرحمن، وياهو فرق العمر المناسب المطلوب من كل البنات بطلي العوارة دي وم توهمي نفسك بإنه هو م بطيقك ي بت عاجباهو والله قاطعة قلبو عديل كدة، شوفي شهد البتنضم معاه ليل نهار ومتلصقة فيه م رسل ليها شي لكن رسل ليك إنتِ تلفون مع امه اها ده معناه شنو؟
سندس رصت الحلل فوق بعض وطلعت خلتها،
بالليل جاتها رسايل من رونق، فتحتها لقتها مرسلة ليها صور طارق، قالت ليها عايني صورو جبتها ليك من الفيس، هسي دة بترفض، ي بت البنات الفي عمرك كلهم يتمنوه، الواحدة عايزة شنو اكتر من إنه تلقى راجل يكون حقها براه لا اهل لا غيره؟ اسأليني انا من معاناة اهل الراجل إنتِ صغيرة م عارفة شي ساي وانا عايزة مصلحتك فكري في الموضوع
شهاب بيدخل عليها وهي بتسجل في الريكورد ل سندس
قالت ليه حبيبي
قال ليها اي
قالت ليهوكدة تعال
قال ليها في شنو ؟.قالت ليه تعال بس
قعد وقعدت جنبو، قالت ليه شكلو حيكون عندنا عرس قريب في البيت
قال ليها بالله؟ والعروس منو؟
قالت ليه خالتك نازلة مخصوص عشان تعرس لولدها
قال ليها طارق عريس؟
كويس والله والعروس منو إن شاءالله؟
قالت ليه خمن؟
قال ليها اخمن من وين؟
قالت ليه تتوقع منو؟
قال ليها منو؟
قالت ليه سندس
سكت مسافة قال ليها سندس؟؟؟
قالت ليه تخيل بس
قال ليها خالتي قالت ليك كدة؟
قالت ليه ايوة
قال ليها والله ياخ ربنا يقدم الفيه الخير
قالت ليه يعني م عندك مشكلة؟
قال ليها ويكون عندي مشكلة لشنو، طارق ولدنا وسندس بتنا زيتنا في بيتنا، كان فتح الموضوع بنعقد ليه طوالي
قالت ليه بس دة الصح، عقد طوالي بدون م تتلفت
❖
سندس من لحظة م رونق رسلت ليها الصور وقالت ليها كلامها داك وهي م طلعت من الشات وبتقلب في صور طارق وسرحانه
جيت داخلة قلت ليها بت تعالي اللف ليك شعرك
قالت لي طيب
قعدته امشط ليها في شعرها قالت لي شهد إنتِ داسة مني حاجه؟
قلت ليها زي شنو مثلاً؟
قالت لي موضوع، او كلام إتقال، او خبر ما
قلت ليها ابداً مالك؟
قالت لي لا ماف شي سؤال بس
قلت ليها يلا ي استاذة على مذاكرتك بعد كدة انا خلصت
قبل م تطلع طارق إتصل علي، قلت ليه مساء الخير
قال لي مساء النور
قلت ليه مالك نبرة صوتك كدة؟
قال لي كيف مالها؟
قلت ليه م طبيعية كويس إنت؟
قال لي زهجان بس ي شهد ومتضايق
قلت ليه من؟
قال لي كل شي، زهجت من الغربة دي، عايز انزل السودان،
قلت ليه اخد إجازة وانزل ي طارق على الأقل ترتاح شوية وتغير جو
قال لي انا ممكن اخد إجازة قصيرة وانزل لكن انا م عايز انزل كدة، انا عايز لما انزل السودان دة ي شهد م ارجع فاضي ابداً
قلت ليه طيب ي سيدي م حأخليك ترجع فاضي انا بمشي معاك اصلاً زهجت من السودان دة
قال لي انا اصلاً م محتاج غيرك، يعني لو إنتِ معي كأني ملكت الدنيا دي وم فيها والله ي شهد م عايز شي تاني
قلت ليه طيب خلاص م تزهج انزل نتفاهم بعدين، انا مفكرة اطلع رحلة بورسودان او نمشي دولة ما انا واعدة سندس لما تخلص إمتحانات شهادة نمشي، انزل نمشي سوا
قال لي هو الأكيد حنمشي سوا
قلت ليه بس خلاص ي زول إتفقنا نرتب للموضوع دة
قال لي حأرتب كل شي من هنا بس انزل اخدك ونتخارج
❖
السلام عليكم حاج معتصم كيفك إن شاءالله بخير؟
الحمدلله تمام منو معي؟
معاك سلوى م عرفتني ولا شنو ي حاج معتصم،
سلوى كيف م عرفتك ياخ، تمام والله الحمدلله إنت كيف والأهل كلهم بخير؟
الحمدلله في نعمة من الكريم،
ولدك كيف وعبدالله واولاده كلهم كويسين؟
ولدي كويس والله م عنده عوجه،
من متين هنا في البلد دي؟
قالت ليه قريب عندي كم يوم بس فتشت رقمك واخدته من ناس الوسيلة، إتصلت عليك عشان موضوع كدة قاصداك فيه اخوي
قال ليها خير اللهم اجعله خير
لالا خير إن شاءالله، طبعاً طارق ولدي مغترب من كم سنة الحمدلله انا زاتي كنت معاه بمشي وبجي لكن م مستقرة، وخلاص بقى زول جاهز عايزين نعرس ليه، وبتنا ماشاءالله عليها كبرت وبقت بت عرس، بتنا دي طبعاً قاصدة بيها سندس بتكم، وإنتو في الأول والأخير كبارها ووليانها زي م بقولو، اها ي اخوي نحن م غراب عن بعض وكلنا بيت واحد واسرة واحدة، وولدي دة م داير يطلع من بنات البيت، ف دايرين نناسبكم ونطلب يد بتكم سندس على ولدي احمد، إنت عمها الكبير والشورة شورتك اكيد رايك قبل كل شي وإن كانت مربية معانا في البيت رايكم إنتو وليانها
قال ليها والله ي سلوى ي اختي طبعاً زي م بقولو إنتو ليكم اللحم ونحن لينا العضم، الرأي زي م هو راينا هو رايكم والله يكتب الفيه الخير م عندنا اي مشكله ويشرفنا والله نسبكم اكيد
قالت ليه اللهم امين ي اخوي، الله يكتب الفيه الخير إن شاءالله، قلت قبل اي شي نفتح اضانكم بعدين لما الولد ينزل السودان يتصل عليك هو بنفسه وإن شاءالله نصلكم ونعمل الواجب زي م بقولو، ونحن زاتنا م عندنا تأجيل للموضوع اول م الولد ينزل بتم العرس على طول
قال ليها ابشري م عندك مشكله، حبابكم الف والله
اول م قفلت سمعت صوت زغروته بصوت خافض صوت رونق بتقول ليها م قلت ليك ي خالتي سلوى دة الصح ودي اهم خطوة إنو الموضوع يصل اعمامها، حتى شهاب كلمته وقال لي عقد على طول طالما طارق قال عايزها، يلا بعد كدة بس عليك بي طارق،
خالتو سلوى قالت ليها دقيقة اتصل عليه هسي دي
رونق قالت ليها انا ماشة عندي حلة في النار إتكلمي معاه براحتك طيب
خالتو سلوى اول م طارق رد عليها قالت ليه لو م اتصلت عليك ولا بتسأل امك دي حية ولا ميتة صح
طارق قال ليها معقولة ي امي العفو ياخ مضغوط والله
قالت ليه كيفك كويس؟
قال ليها الحمدلله دعواتك بالتساهيل بس
قالت ليه بدعي ليك طوالي ي ولدي، مالك فيك شنو خليتك كويس؟
قال ليها ماف شي محدد بس دعواتك إلا يكون في شي حتى اقول ليك ادعي لي؟
قالت ليه دايرة اقول ليك شنو؟
قال ليها اها؟
قالت ليه إنت باقي على العرس ولا كلام ساي؟
ضحك وقال ليها والله ي امي باقي عليه الليله قبل بكره كمان
قالت ليه خلاص اها انا خطبتة ليك
قال ليها بي عدم جدية بالله؟ ودي منو دي الخطبتيها لي دي، متين مشيتي لما لحقتي تفتشي لي في النسوان
قالت ليه بري م تعبت فتشت مما مشيت لقيتها جاهزة قدامي
قال ليها ودي منو كمان والله ي امي إنتِ غايتو م بتفتري نهائي دي البت الكم هسي خطبتيها لي محل م تتلفتي خاطبة ليك بت إن شاءالله م تكوني لقيتيها في الطيارة بس المرة دي
قالت ليه كان م شفتك في بيتك وفرحت بيك م برتاح نهائي كان داير رضاي ي ولدي وراحتي عرس وإنستر، انا خلاص لقيتها ليك جادة المرة دي، بت سمحة، وصغيرة، وحلات الدنيا عليها ومننا وفينا لا لقيتها في شارع لا في طيارة عشان م تاخد الموضوع هزل زي كل مرة، حتى كلمته اهلها عديل وخطبتها ليك رسمي خلاص
قال ليها جد كدة منو ي امي؟
قالت ليه سندس بت خالتك المرحومة
❖
حينما كانت الحياة لا تُعطيني السلام، قلبُك فعل