الجزء 12

ناريز دي راااقدة لامن الحمة تلسع من بعيد ... الضرب ماأثر فيها بقدر الاغتصاب الاتعرضت ليهوو .. ماحنقول انها مشت ليهو برجولا وتستاهل وكدةة .. ايوة نلوما انها اتغشت للنوع الزي دة باسرع وقت ومن مرة وحدة مشت معاهو ...

ناريز اكيد لو عارفه البيت فاضي ماكان حتمشي .. بس لازم الزول يوعي للحتي الزي دي .. من يقول ليك امشي معاي .. زحي بعيد واشخطي شخيط واقطعيها معاهو .. يا بالحلال ياتروح بعيد ..

مايغرك امي واخواتي وماادراك النوع دة ممكن يمهد ليك الف طريق وينظم الكذب سلسل في رقبتك وانتي جهاز راسك ده بستجيب بسرعه ......

نيروز قعدت جم اختها وتبكي بهدوء ..

جا محي داخل لقي ناريز مستويه علي نار الحمي ... اتهجم وبكي يبكي معا نيروز ..

محي : قومي ياناريز نمشي المستشفي اعفي لي ياناريز .. انا خفت عليك .. وانا عصبيتي مابقدر اوقفا ..

ناريز : قلبها وجعا علي اخوها شديد وقامت علي حيلا . .. عارفه الغلطه مامن أيد محي اخوها ... الغلطة من رجليها الساقتا لدرب الضياع ...

قامت ناريز وطمنت اخوها انها مرهقه بس ..

اتحركت ناريز تجاه مظلة الزيار وجسمها كلو كدمات .. ضرب موحي عصلج خطواتا ...

جرت عليها نيروز ودخلتا الحمام وفتحت ليها الدش عشان تخفف منها الحمي .. قعدتا في كرسي ووقفت نيروز تغسل شعر ناريز بالشامبو وتغني ليها ‏( لانك عندي كل الخير وجيهك فرحة الدنيا ودواخلك زي شعاع النووووور ‏) بتغني ليها بصوت باكي مقطع حزين هااادئ وتخلخل ايديها في شعرا عشان تسكن الصداع من راس ناريز شويه ...

دخلتا الغرفه وغطتا ومشت تعمل ليها فطور ...

الله لايحرمك من طعم الاخوة ... الاخت مهما تناقدك وتناقشك مابترضي فيكي طعنة شوكه ... بتبكي لبكاك وتفرح لفرحك .. ومابتستحمل بعادك يوم واحد ...

ناريز جابت تلفونا وفتحتو ونزلت ليها قريب مية رسالة اتصال من منصور .. قلبها ده عمل ششششححححح ...

اتصلت علي منصور الكلب ...

واول مافتح الخط قال الو وتم ونستو مع الشباب الجمبو وضحكات عاليه وقهقهة ..

وناريز : الو الو الو الو

منصور : هلا بالجميل يادوب تشتاقي لي ولاشنو ..

ناريز : منصور حتتزوجني بتين

منصور : عايزة بتين انتي ..

ناريز : اسرع وقت

منصور : طيب كدة نتلاقي ونتفاهم يلا باي البلياردو ساااخن وقيمي جا ... وتوووت توت قفل ..

ناريز بقت تلطم خدودا وتشتم انعل ابو البلياردو العرفني بيك ياوسخ يامجرم ..

نيروز جات داخله .. مالك ودة منو البتشتمي ده ..

ناريز : اتهجمت وقالت لالا التلفون الوسخ ده بقي يعلق لي ... اريتك سالتيني لقيت التلفون دة وين ولا اهتميتي بي شويه يانيروز ‏( في سرها ‏)

ناريز فطرت مع اختها بس عشان تطمنا ..

نمشي لسلمي ....

سلمي ظروف بيتم شويه الحمدلله ... وجيرانم حيطه بحيطه قرايب خطيبا ... ناس هاي كلاس خزان تيقا دة فوق كدي مويتو لامن تكب في حوش ناس سلمي ... والحوش ده من جوة نصو جنينة فواكه .. وللنبك دة مزروع ...

اها قرايب خطيب سلمي ديل ربنا مااداهم اليد السخيه ... يعني المويه دي بتقطع من ناس سلمي يومين وبتجي مابدوهم جردل من الخزان .. وشايفين البيت معيوول ... مابقولو ليهم امسكو ضوقو الملح دة ... والجنينه دي تشيل الفواكه برتقال ومنقه .. بخلوها في شجرا لامن تنشف وتبقي سووووودة مابخلو اخوان سلمي الصغار يجو جمبها ... ربنا اكرم من كل زول ...

اها سلمان خطيب توسل بقي يوم يومين كدة يجي ويحاسب ابو توسل في بيع البهايم ويغمت لام توسل قروش ولتوسل ولابوها ... والبرادو دي من تقف جمب الباب لحد ماسلمان ياخد قعدتو وشايهو وقهوتو .. تكنتك ساااي انوارا الاماميه والخلفيه لحد مايطلع ويسوقا ..

سيد بقي بس منتظر فرصه ويفتح خشمو .. والبجيهو في الدكان من ناس الحله بملا ليهو راسو انو الناس ديل بقو يدخلو كبارات وناس سيئين في بيتم والدلاله العربيه الواقفه تكنتك جوة عيون سيد دي ...

توسل وسلمي سلمان عزمم يطلعم لشارع النيل .. استاذن من ابوهم وساقم وسيد رقبتو لاااافه مع الدركسون لااامن قالت طقرقققق ..

رجع وقعد فانس كدة في طبلون الدكان ويجيب طاقيتو لقدام وتاني يرجعا ورا ... جاتو مرة كدة النوع البتشيل شمار وتفكو في الحله زي البونبان ... اسمها فطينة ..

فطينه : سيد هوي سيد سيد وطاخ ضربت الطبلون ..

سيد دة فنجط لورا زي الحمار البطرد البهايم من قشو ... بسم الله يافطينه الله يضرك قطعتي قلبي ..

فطينه : كر علي يالدعاي المسيخ .. السارح لها شنو اديني ملوة تسالي وفول بكرة .. علي الختمة في بيتي .

الختمه دي قعدة كدة بقرو القران وبختمو اجزء مجزءه .. لكن بختموها كدي شمار واخبار وسواطه ... وهو شنو زاتو الوحدة تقرا في القران وعينا في توب فلانه وحنة فلانه والاية تشقلبا بنطق تاني .. الوحدة تقرا الايه زي القناه اشاراتا ضعيفه ... ‏( شي عجيب ‏)

نرجع ...

سيد : انتي يافطينه ماك شايفه الحاصل دة

فطين : في شنو يا سيد حاصل ... اوع يكون راجلي عرف اني بتدين منك وببيع في الختمه ...

سيد : هوي ها شفتي بيت طه دة بقو داخلين ومارقين منو رجال كدي بعرباتم وحسي قبل شويه توسل وسلمي ركبن مع واحد عجيييز كدة وكسحو جهة الظلط ..

فطين عدلت توبا كدة بحركة شلاقه كدة وبقت زي الجدادة البتحفر مكان للبيض .. اجي اجي اصلن البنات دي حوامات وابوهم رقبتو ميته وامهن غير تلد ماوراها شي ...

اها الذي دي بدل يتأني ويفهم الحاصل ويوقف سيد في حدو .. زااادت الطينه بله وبقت تبهت وتغذف .. اجارنا الله من حق الناس ..

والراجل البدي شمارات لمرة ده زاتو اخير موس لشنبو

سيد هو وفطينه شالو وختو وماخلو جنبه لطه وبناتو ...

رجع سلمان يوصل توسل وسلمي .. سلمي نزلت دخلت البيت .. توسل وقفت جمب شباك العربيه بتتكلم مع سلمان ...

سيد دة عّٓمّر لسانو تمااام وختا وساخة قلبو فوق ذناد المشاكل ووقف ..