الجزء 9

موحي جا طيران البيت وسلم نيروز القروش وقال ليها ظبطي الوضع .. واتصل علي علا وكلمو بالموضوع ..

ناريز طبعا بقت تلاقي منسوور الشياكة .. وجاب ليها تلفون كدة خطييير النوع الرهييييف وفيهو قلم ... واداها مليون جنيه عربون محبه وكدة اي اي امكن ...

اها ناريز دي ماداخلة في الموضوع كلو كلو لا خطوبه لا الحاصل في البيت بس تدخل الغرفه وتتغطي وتنقنق تحت البطانيه ونسه وخلط ومن تسمع زول دخل الغرفه تقحقح نظام انزعجت وكدة وترفع البطانيه براااحه تشوف الجا منو ...

اها نيروز اتصلت بنانا وقالت ليها بنجيكي انا ونسرين عشان نمشي لزولك القلتيهو .. طبعا مفكرة انها تطلع ببلصه بلصتين كدة ورا قروش مووحيي ..

طلعت نيروز ونسرين ومشو لنانا ودخلو لقوها بتسرح في شعر امها ...

نانا دي حنيييينه كدة لدرجه بتهش حولين امها وقت تكون امها نايمه ... بتمسح رجول امها وايديها لما تجي تنوم .. ظابطه منبه تلفونا علي ميعاد كل علاج بتاخدو امها ... لو حست امها دي فيها حمي بتجري بيها جري للمستوصف ..

نانا : اهلييين اتفضلو

نيروز : اذيك خالتو محاسن ان شاءالله كويسه ..

نسرين : طبيعي ماخدة وضع الصامت تتفرج ساي وكانو نيروز مندوبه عنها ..

اها نانا دخلت جابت ليهم عصير ليمون اخضررر بنعناع .. عملتو كيف العسل دي لاصوت خلاط ولاصوت كشلن كشلن صواطه ..

نيروز لبست عبايتا السودة وطرحتا وكحلت عيونا بكحل مخطط جميل .. وعمل لبشاين مائي لامع ... لبست شبشب فيهو وردة كبيرة ومع الفسخنجي قاااادر الله ....

اها طلعو وركبو المواصلات ... وكالعادة نيروز اتصلت بكروما القندوله ... وقالت ماشه السوق ... نظام تضمن حق المشوار في الرجوع ..

اها الكمساري طقطق . .. نيروز نكرت ليك نسرين ونانا واتلفتت علي الشباك ..

نانا عاينت لنسرين ونيروز لقتم مطنشين وساكتين ... فتحت مطبقتا وطلعت عشرة جنيه وادتا الكمساري ... نيروز قعدت تضحك وتغيظ نانا ..

نانا : حرام عليك يانيزو وانا كنت عايزة اشتري بيها موز لامي .. يخس عليك خجلتيني مع الكمساري ...

نيروز : اتحرجت وحست نفسها كريهه كريهه .. وغيرت الموضوع .. انتي يانانا حودة دة مش راجل نسمة

نانا : اي نسمة بتعرفيها ?

نيروز : يعني ماشديد كدة بس بشوفا في قعدة الجبنة والجمعيه وكدة ...

نانا : حودة ده بشتكي منها لكن مابصدقو اصلو هو كضاب ومنافق .. عايز يحنكني يعني ..

نيروز : لكن يانانا هو عايزك وحابيك قبل يعرس نسمة .. ولسه جاري وراك وساكيك .. بحبك شديد

نانا : حب شنو عليك الله كفايه بطلع منو بقرشين ارتب بيها اموري .. اخواتي يانيروز بقيت اكرهم مابدو امي اي حاجه .. اختي نهال زوجها ماشاءالله ومقضياها كلها تياب واكسسوار واقل توب يكون سبعه مليون وخمسه مليون .. واختي نهي قروشا كلها في بطنها من مطعم لمنتجع لسفريه لغيرو .. وحفلات الصالات ...

نيروز : الله يعينك علي امك وتكسبي رضاها ... ماتشيلي هم الله بفرجا عليك ... بس سيبي الصياعه وضربتا في رجلها وضحكو الاتنين ..

ونسرين قاااعدة زي السمبريه تتفرج ساي وتقرا في لافتات المحلات والاعلانات ...

وصلو السوق ومن مدخل السوق المشاغلات اشتغلت زي كمرات الصحفين .. وين يامنقه ... وين ياسكر .. عايني جاي ياام عبايه . .. وين ياانا . ‏( . ده اصدارو قديم شديد ‏)

اها وصلو البوتيك المقصود .. اتقدمت نانا

نانا : علوبي اذيك كيفك

علي : مرحب هلا هلا بي نانا الفنانه ..

نانا : جبت ليك زباين لموضوع ختوبه وكدي فما تخزلني معاهم .. حسي ياعلوبه والله فتنا جم كم بوتيك وفيهو الحاجات الدايرنها بس قلت ليهم علوبه ده بتستر معانا وبمشينا تب ‏( تلج دُراااب ‏) ..

علي : بقي يعدل في طاقيتو .. ابشرو ابشرو اتفضلو .. ياود يا محمد جيب تلاته بارد ..

نانا : بقت تشيل دة ودة ودة ‏( تلاته عطور مختلفة .. وتلاته كريمات جسم .. تلات كريمات شعر ... تلاته مزيلات ... تلاته بجامات .. تلات لبسات .. فستان .. واسكيرت ببلوزتو ... وعبايه راااقيه ... اها تلاته شباشب نااعمه كدي ... وسفنجة ... وتلات طرح ... واتلفتت علي الاكسسوار ماخلت رنق ولا ساعه ولا اسواره .. والمكياج طبعا خمت خم ... ووووو ‏)

نيروز : مخلوعه وكل مرة تمسك يد نانا عشان توقفا من دة او دة نانا تغمز ليها وتلزها ..

علوبه جاهو تلفون بقي يتكلم . النوع البتكلم بصوت عالي داك ..

نيروز انتهزت الفرصه وجرت يد نانا : هي هي دة شنو انا بالعافيه شلت القروش دي من موحي وماحتكفي ..

نانا : ياخ انتي مالك ومال دة حسي امرقي منها واتفرجي بس ...

جا علوبه ونانا خلصت وختمتا بورق هدايا واكياس هدايا ..

نانا : اها ياعلوبه دي قروشك علي حسب حساباتي للحاجات ... وكمان بنجيك للشيله وللريحة والعريس التاني كمان عندو خطوبه قريب بجي من السعوديه ..

علي : مسك القروش عداها وابتسم كده وقال ليها : علي بركة الله تشرفي يانانا اي وقت ماببخل عليك اصلك زبونه قديييمه ..

نيروز متفاجئه ومقلعه عيونا وتشرب في البارد .. طبعا بقت في يدها ربع القروش .. فرحانه فرح لامن عايزة تطير ..

طلعو برة البوتيك والصحافه تاااني كميراتا اشتغلت ...

نانا : اها كيف يانيزو

نيروز : عاد تاني مابفوتك يختي وحسي لازم ندخل المطعم نضرب طلب سمك جااامد ..

دخلو المطعم وقعدو تماااام سمك حاف ساااي بدون عيش ...

نانا شالت ليها كم قطعه كدة ولفت السمك في الورقه ودخلتا في الكيس في شنتطا دي لامي عن اذنكم ياجماعه ..

اها لما عايزين يمشو جاهم كروما القندوله مشغل الاستريو ده عاااالي .. نانا ونسرين ركبو جرت نيروز علي بتاع الفاكهه واشترت موز وبرتقال ومنقه وتفاح وسلطه ورمت جوة كيس الفاكهه خمسين جنيه ..

جات ركبت الركشه وطول السكة نانا تضحكم .. تأشر علي كروما وتحاكيهو لنيروز .. ونيروز تتضاحك وتصفق يديها ...

ومرت الركشه بشارع العواطليه شلة ‏( بني أُمّيه ‏)

والخله الشله العاطله تنتبه للجوة الركشة صوت الاستريو ...

اها نانا وصلت بيتم قبل بيت نيروز لما نزلت من الركشه ماشه ... نزلت وراها نيروز وجرت نيروز ومسكتا حضنتا باستا جاي وجاي وختت الكيس في الارض وجرت ركبت الركشه .. والركشه اتحركت نيروز طلعت راسا من الركشه ولوحت لنانا باااي بااااي ورسلت ليها بوسه هوائيه كدة ..

نانا ضحكت وعاينت الجوة الكيس لقت الموز وباقي الحاجات والخمسينايه ابتسمت ودخلت لامها ..

اها تاني يوم نيروز اتصلت لنانا وتوسل وسلمي ونسرين انو يجو يساعدوها في الخطوبه .. المسا حيمشو يخطبو سلوان ..

اتلمت الشله في البيت وسعديه طلعت تعزم جاراتا القراب ..

اها نسمي شلة البنات دي ب ‏( هوّوّس باند ‏)

قعدت نانا وتوسل يرتبو هدايا الخطوبه بورق الهداييا والاكياس بطريقة رووووعه 🎁

ونيروز وسلمي يرصو الخبايز الناعمه في طباقه ويغلفوها ومشغلين التلفون علي اغاني طه سليمان وشي زغاريد وشي رقيص وشي ونسه ...

جات ناريز من الجامعه داخله وكأنها ليس من هذا العالم .. دخلت غيرت هدوما وجات حشت حشوة وقعدت قصادم تتكلم تلفون بصوت براااحه ...

نيروز : هي انتي ياعولاقه انتي ديل خداماتك كان ولا شنو ... وبعدين محي الدين مشي يجيب بارد وعلب شوكلاته فما تنداحي كدة وتاخدي راحتك قومي اعملي لينا قهوة ..

ناريز : سدي خشمك ده لو سمحتي مايخصك اعمل ولا لا .. انا جايه تعبانة من الجامعه ماتزهجيني واسكتي ..

نيروز : ياخ انتي دمك دة شنو .. وريني خام دمك ده شنو ... ااااااييييييع منك قومي غوري من قدامي ..

ناريز نطت الحاجات القداما في الارض ودخلت الغرفه وواصلت تلفونا ... تبعاً دة منسور تلاجتو شغاله تتلج سااااي ...

نيروز : سلمي حبيبتي اخبار الفردة شنو ..

سلمي : ااخ اتشاكلته معاهو امس باليل .. امو عايزة تعرس ليهو بت خالو ..

نيروز : ياخ المرة دي قايله نفسها وداد بابكر ولاشنو .. احيييي انا لو منك كان هريتا تلفونات ومكاواه ..

سلمي : اه بقدر عليها الله بس ..

جهزو والعصر جا ودخلن البنات اتلبسن شي فستان وشي تونكات وشي مكياج وشي عبايه طبعا دي نسرين ...

ياخ ماوصفت ليكم نسرين دي .. نسرين دي النوع البلبس عبايه وطرحة كبيرة كدة بس مجامله برضو وبتحب صحباتا .. بس ضلها ميت شويه .. يعني عندها ضمة خشم كدة ان جرو بزرديه مابتفكا ... يعني مكمله الشله دي ذي العجور الفي كيس السلطه ....

اتلمن جارات سعديه .. وسعديه جوة لبست وقشرت وجات مارقه تزغرد للحروم فرحانه ..

ناريز شالت حاجاتا ومشت الصالون واتلبست براها وجات قعدت في برندة الزنك وموووااصله تلفون ...

اها موحي جاب الحافله وركبن الحريم والبنوت والغنا ده شاااقي الحله باصوات ناااعمه ‏( الجيناكم ارح ارح ارح جبنا موحي وشرفناكم ارح ارح ارح ‏) ومرة ‏( سلوان دي زينة مجيهة غير موحي مين يستاهلا اهآآا اهآآا ‏)

ونيروز دي تدق في جوانب الحافله زي طار قسوم ... وناريز لابدة في اخر كرسي وعايشة دور العقبه لينا وكدة .... واما نانا ياسلللام الغنا دة مارق منها كدة زي عصفور في شجرة عنبة ... وسلمي دي تصفق وتضحك .. ونسرين وضع الطيران ... اها توسل زغاريدا كده تشق الاضان والحروم في كراسيهم متلفتين جيهة البنات الشمار حارقن وعاجباااهن الشله اللذيذة دي ..

وصلو بيت سلوان المابعيد اصلا .. بس عملوها سيرة خطيرة كدة .. وقامت الشله ‏( ياام العروس جينا ليكي جبنا العريس جبنا نباركو ليكي ‏) .. بلابل بس كانو ماتلاته .. كانو ضعفهم كانو سته ... طلعو اهل سلوان يستقبلو ...

نزلت سعديه وجاراتا والبنات نزلو كل وحدة في يدها طبق وهديه .. والغنا والزغاريد سواااا السلم الموسيقي احتار زاتو ... وسعديه تبشر .. والحروم يزغردن ..

موحي وابوهو كانو في عربية صاحب موحي ومعاهو كم صاحب كدة ..

اها دخلو الرجال بجهة الرجال . والحريم دخلو جيهة الحريم ...

جات العروس سلوان .. يااااالطيف شي كدة خيالي .. يعني البساطه في الاناقه .. لابسه ليها قفطان مغربي والشعر دة عاملاهو فير مرول كدة ونازل ع كتافا زييي الشلال النازل من الجبل . .. ومكياجا ده انيييق ...

قعدت والغنا والدلوكه ترزع جوة القلب ..

نيروز اتصلت علي موحي وقالت لازم يجي عشان يلبسا الدبله ..

جا موحي وشايل الدبله الهو اشتراها بزوقو .. وقعد في فرح لايوصف ولبسو الدبل . وغنو كدة لامن المغرب اذن ..

كل واحد اتجه يصلي .. ورجعو تاااني جروها غنا ورقيص لحد الساعه تسعه كدة .. واتفقو العرس بعد فترة قصيرة وانو حيجهز في الشيله قريب والمسكن ...

رجعو للحافله وطلبت نيروز من السواق يطلع بالظلط طويييل مايمشي البيت طوالي .. عشان يتفسحو ويغنو ..

السواق عايز قروش طبعا .. مشي بيهن وهم يرزعو ويغنو ويصفرو ويصفقو ويكوركوّ ..

محي وابوهو وصلو البيت لقو البيت فاضي .. رجع موحي يتصل بنيروز . معتقد انو ناريز مامعاها تلفون ... ونيروز ابت ترد ...

اها بعد زمن لما رجعو السواق طلب من محي مبلغ ضعف الاتفقو عليهو وكلمو انو مشي بيهم لحد الموردة ..

موحي دة الكهربه دخلت جسمو .. حاسب السواق وطلب ينزل كل وحدة جم بيتا ..

ودخل قفل نيروز وناريز واداهم علقه لامن ابوهو بقي يحجزو ...

يقال من

يضحك كثيرا يبكي كثيرا ... ياها بس نيروز الشلاقه دي ..