الفصل الثالث

بعد ضربتو لي بعلبه الهندسه الدم بقى جاري من راسي، وانا خلعهه بس بقيت اصرخ وتقريباً المدرسه كلها اتلمت حوالي، وانا م شايفه قدامي من كميه الدم الجاري في وشي...

غبتهه اسبوع من المدرسه ورفضتهه رفض تام اني امشي وم كدة وبس وكمان م خليت ماما وبابا يمشو يدامو في شغلهم، كنت كل م واحد فيهم يتحرك من جمبي بقوم الدنيا وم بقعدها وبقعد اتبكى، ف كانو بتناوبو علي بابا خلى شغلو ومرضاهو وعملياتو اجلهم واخد اسبوع إجازة عشاني، بابا مهما اتكلم عنو م بقدر انصفو، الحب والحنيهه اللقيتهم من بابا حتى من امي م لقيتهم، ماما كانت دايماً بتعقب عليه وبتقول ليه ي عبدالله البت دي بتخرب طبعها ي عبدالله م تعودها على كدة ي عبدالله لا...الخ بس هو كان دايماً بقول ليها واحدة ربنا رزقني بيها كان على الطبع خلي يخرب ساي، عودني على انو كل طلباتي مُجابه، على انو انا صح حتى لو كنت غلط، اوقات كتيرة كان بشاكل اخواني كلهم لمجرد انو واحد منهم زعلني، حتى وانا كبيرة م كنت اعرف انوم بعيد من حضنو ابداً

المهم بعد الاسبوع خلص يوم الأحد مشينا المدرسه وطبعاً من جمب امي م اتحركته فضلته قاعدة معاها في المكتب وهي بتخلص شغلها وم عايزة اشوف اي زول، ونحن قاعدين فجأة باب المكتب دق، قالت اتفضل، جات السكرتيرة قالت ليها عندك ضيوف ي استاذة سوسن، قالت ليها طيب خليهم يتفضلو، شويه كدة سمعنا صوت بقول السلام عليكم، امي قالت وعليكم السلام، جا راجل داخل كان لابس جلابيهه ولافي العمهه امي وقفت سلمت عليهو قالت ليهو اتفضل، قعد وقال ليها انا ولي امر الطالب ماهر، امي قالت ليهو اهلين حبابك، على طول قال "تعال ي ولد ماهر، الولد جا داخل، في اللحظه دي جفلته ومشيت وقفته ورا كرسي امي

الراجل قال ليها والله استاذة م عارفين نقول شنو بس جينا نعتذر على الحصل اسفين جداً انا زاتي م كنت عارف او كنت في سفر، وهو امو زاتها م كلمها عرفنا بمكالمه من المشرف انو هو اتفصل من المدرسه استفسرنا حتى عرفنا الحاصل، قلته لي امي وانا ببكي "امي قولي ليهو يطلع من هنا سرعهه" الراجل قال لي ي بتي كيفك انتي كويسه؟طبعاً كانو لافين لي شاش في راسي، قال لي دة الزول دة عمل فيك كدة؟تعالي كدة عايني لي تعالي انا عمك م بعمل ليك شي انا جاي اعاقبو ليك، قلته ليهو "لا"

امي قالت لي شههد عييييب اسمعي الكلام اتكلمي مع عمك، جرتني من جمب الكرسي ووقفتني قصادهم وقالت ليهو م مشكله ي استاذ بس التصرف في حد زاتو غلط شهد انا عارفاها م هينهه بس التصرف الاتصرفو م بليق بي طالب والمدرسه م فصلتو عشان هو الانضربت بتي لا والله لو كان الحصل دة حصل مع اي طالب داخل حرم المدرسه كنا حنفصلو، قال ليها حقكم ي استاذة والله انا زاتي زعلت جداً يعني زول كبير كدة وممتحن شهادة بدل م يركز في قرايتو يقعد يباري في الشفع ويتصرف تصرفات زي دي؟ قالت ليهو معليش حصل خير، وهو ك تقيم اكاديمي رغم انو جاي متأخر لكن تحصيلو في الامتحانات ممتازة جداً بس نحن كمان عندنا اهم شي حفاظنا على الطلبه داخل الحرم يعني المرة دي جات سليمه المرة الجايه م معروف اليحصل شنو، قال ليها لو اديتيهو فرصه ان شاءالله اوعدك انو م يحصل منو الا خير هو ممتحن فكرة انو ننقلو لي مدرسه تانيه دي صعبه شديد لانو الدنيا نهايه سنه حتى اسماء الممتحنين حتكون اترفعت للوزارة دة غير انو صعب يتأقلم مع بيئه جديدة مرة تانيهه، انا مستعد اكتب ليك تعهد انو م يحصل منو اي شي بعد كدة، قلته ليها امي لا م ترجعيهو تاني

الراجل قال لي ي بتي كدة تعالي، تعالي بس قام على حيلو وجا علي، مسكني من يدي وقال لي قولي لي اي عقاب ليهو يرضيك اعملو ليك قدامك اسي، فضلته ساكته، قال لي انتي بس قولي لي اضربو ليك؟سكتته، قال لي اضربو؟ولا تضرببهو انتي؟قام على حيلو ومسكني من يدي وقف قدام الولد وهو ماسكني بي يد قال لي اضربيهو، امي قالت ليهو ي استاذ م كدة، الراجل قال لي طيب عشان هو طويل وانتي م بتحصليهو بضربو ليك انا وبالفعل في لحظه كدة اداهو كف طاخ، طبعاً امي اتصدمت وانا بقيت عايزة اتفك منو وم قادرة، قال لي اضربو ليك تاني؟وقبل م ابدي ليهو اي تفاعل رفع يدو وضربو طاخ، الضرب م كان واضح عليهو ضرب ترضيه لا كان ضرب جادي وضرب غضب، امي وقفت على حيلها بسرعه وقالت ليهو ي استاذ ي استاذ وجات مسكت الولد قالت ليهو م صح كدة عييييب عييييب حتى ولو كان ولدك غلط دة زول كبير م بتعاملو معاه كدة، وسبحان الله الولد رمشه م اتهزت فيهو، امي قالت للراجل معليش بس اتفضل اطلع برة لو سمحته، لو سمحته اتفضل، الراجل طلع امي مسكت الولد قالت ليهو انت م تطلع خليك شالت كُبايه مويه ادتها ليهو، قال ليها م عايز، قالت ليهو اسمع انا زي امك امسك الكبايه دي واشرب، شال الكبايه قلته ليها امي، قالت لي انتي قفلي صوتك م اسمعو نهائي، الولد شرب مويه بسيطه قالت ليهو معليش ي ولدي م عارفه انو والدك حيتصرف كدة بجديه اسفه جدا، الولدً فضل ساكت بس عيونو اتحولت لي شرار، عايز يطلع قالت ليهو من اليوم ارجع داوم في المدرسه عادي تمام؟هزة ليها راسو وطلع، بعد م طلع امي طلعت نظارتها، وكانت متضايقهه شدييييد من الحصل، طبعاً قاعدة ثابته امي لما تكون متضايقه ماف زول يجي بجمبها او يتكلم معاها بناء على كدة انا على طول طلعتهه من المكتب بتاعها، فضلت على الحاله دي لغاايهه م رجعنا البيت...وسط كُل الانا عشتو ولسسه عايشو ضرب عمي لي قدام المديرة وبتها كان من اسوأ الحجات الحصلت معي، رغم انو جسمي اتعود على الضرب في البيت، قدام امي، قدام اهلي بس انضرب بالطريقهه دي بس عشان يرضي غرورو قدام الناس الحاجه دي زادت حقدي تجاه كل المجتمع الحوالي اي شاب مكاني حصل ليهو موقف زي دة كان ممكن ياخد موقف متهور شديد بس انا غير، كان ممكن اعمل كدة لو م عندي هدف في راسي ولو م عندي حاجه عايز اخسرها م قدرت ابدي اي ردة فعل لأنو انا مستضعف جداً وعلى الأساس دة انا صابر بس ابداً م راضي مع مرور الوقت حأشرح ليكم اكتر للزمن داك ابقو عافيهه...

عدت الأيام وانا امي اتعاملت معي بي حدة بعد موقف عم الولد داك وحزرتني من انو اتعرض ليه او لي لي طالب في مدرسه بس رغم دة كلو م سمعت الكلام ابداً ونشرته خبر انو عمو كفتو قدامي في المكتب و...المهم مع مرور الأيام خفيت عليه او بقيت مركزة على قرايتي اكتر، وامي بقت تعامل الولد دة معامله خاصه شايله رقمو بتتصل عليه لما يغيب من المدرسه وموصيه عليهو الاساتذة يشرحو ليهو المواد الما فاهمها وكدة تقريباً كان موقفها تجاهو انساني او بدافع الشفقه وزعلها عليه من الحصل، في فترة امي عملت حادث ضربها بتاع ركشه وعلى الأساس دة جوها المدرسين والمشرفين والطلبه، هو زاتو كان من ضمن جا مع الطلبه وكدة، عدت الايام ونحن امتحنا شهادة اساس وبعد فترة ناس الشهادة امتحنو، كانت معموله لينا رحله خاصه بالناس الامتحنو شهادة اساس وشهادة سودانيه عاملاها لينا المدرسه، مشينا الرحله كانت ظابطهه شديد، ونحن راجعين في البص كل الناس بقت تودع بعض على اساس انو تاني م حتتلاقى وكدة وجزء كان بياخدو ارقام بعض، وانا قاعدة فجأة في ولد قال لي من اولاد تالتهه قال لي اكتب لي رقمك ومرر لي ورقه وقلم، في اللحظه دي انا قومته الدنيا وم قعدتها وشبكتو ليك انا تقول لي عايز رقمك واديك رقمي لشنو؟طبعاً الزمن داك م كنت شافعه مرقهه نهائي وفهمي محدود يعني ولد يقول ليك عايز رقمك دي م ساي، المهم البص كلو بقى مركز معاي والمشرفين يهدو فيني وانا ببكي وبقول ليهم كيف يعني يقول لي عايز رقمك؟شايفني شنو لمن يقول لي عايز رقمك؟المشرفه قالت لي ي شهد عادي زملاء وكدة، قلته ليها لا انا م زميلتو دة وسخ وقليل ادب كمان قايلني م بعرف الحركات دي؟

المشرفين بعد ضحكو واحدة منهم قالت ليهو بي نهرة لييييهه تاخد رقمها؟قال ليها ي استاذة ماهر قال لي جيب لي رقمها م انا، بس لما قال ماهر انا زدته زيادة وشبكتو ليك عايز رقمي لشنو اسي دي توريني قدام الناس دي كلها، ماهر قال ليهو ي زول انا م بعرفك اساساً متين قلته ليك عايز رقم انا؟م تكذب ي زول، الولد بقى يضحك المهم بقى في نقاش هدوهو المشرفين، وصلنا المدرسه الساعه 7 مساء ومن هناك كان اي زول اهلو او ترحيلو مستنيهو، كل الناس اهلهم جو ساقوهم الا انا منتظرة بابا وماهر الزفت وبتاع البص واقف دخل المدرسه علشان يتوضأ يصلي، فضلته واقفه وخايفه شديد طبعاً م متعودة على انو اكون برة البيت بعد المغرب، فجأة جا عمو طالع قال لينا اهلكم م جو؟قلته ليهو لا وبقيت اكل في ضفوري، قال لينا اتصلو عليهم م عندكم تلفونات؟قلته ليهو انا تلفوني مقفول

وم حافظه الرقم، قال لي دي مشكله والله ي بتي وانت ي ولد، ماهر قال ليهو ناس بيتنا جاين علي، عمو صلى وقال لينا انا م عندي جاز لو عندي كان وصلتكم لكن انتظرو اهلكم مش عارفين؟قلته ليهو اي، قال لي خلاص بمعاهم ومشى خلانا والدنيا بقت ضلام بس انوار المدرسه عاكسه شويه في الشارع، بعد م اتحرك ب 15 دقيقهه جات عربيه وقفت ماهر مشى عليها فتح الباب وركب، قبل م تتحرك نزل قال لي قالو ليك تعالي اركبي، عاينته ليه بي طرف عيوني وربعته يدي، نزل راسو اتكلم مع الزول السايق فجأة نزل قال لي ي بتي م صح تقيفي براك كدة هنا الدنيا ليل تعالي نوصلك، طبعاً انا مستحيل امي محزراني نهائي م اركب مع زول م بعرفو، قلته ليهو لا ابوي اسي بجي، قال لي اي هو بجي بس وقفتك هنا براك م صح عندك رقم زول من بيتكم؟سكت، قال لي اتكلمي ي بتي نحن دايرين نساعدك، قلته ليهو اي عندي رقم امي، قال لي جيبي جا قرب مني وولع نور تلفونو لما شافني قال لي اوووو انتي بت المديرة صح ي امهر؟ماهر بعد مسافه قال ليهو اي، قال لي اديني الرقم طيب، مليتو الرقم اتصل عليها اول م اتصل ردت، سلم عليها بي حرارة وقال ليها انا عم الطالب ماهر والبت دي اسي معانا وماف زول معاها جمب المدرسه و...المهم اداني اتكلمته معاها كانت خايفه شديد قالت لي ابوك ومنذر الما مسؤلين الليله لما يجوني، قالت لي اركبي معاهم يوصلوك، ركبته معاهم وكل شويه كانو بتصلو على امي توصف ليهم لغايه م وصلنا البيت لقيناها منتظرانا برة، استقبلتنا واصرت عليهم الا يدخلو البيت تضيفهم، وبالفعل دة الحصل قعدو واتونسو معاها مسافه وامي سألت ماهر اشتغل كيف و..وهكذا، شويه كدة بابا جا داخل سلم عليهم وامي عاتبتو قدامهم طبعاً قال ليها انا قلته لي منذر عندي مقابلات م بلحق اخلصها في زمنها وكلتو عشان يمشي يجيبها لكن منذر ولدك يوم متين كان مسؤل، المهم قعد واتونس معاهم مسافه حتى استأذنونا وطلعو، بعد م طلعو بابا قال ليها الراجل دة شكلو مألوف عندي بس م قادر اتزكر شوفتو وين بالضبط...في فترة الاجازة دي سافرنا الإمارات لي اهل امي طبعاً امي اهلها معظمهم هناك جدي وحبوبه وخيلاني عندي خالتي واحدة بس عايشه في السودان، المهم مشينا قضينا الاجازة وانا شبه بقيت بت بحيث انو بقيت متهتمه بنفسي شديد وعندي اهم شي لبسي وتساريحي ومنكيري وهكذا، ونسبتي طلعت وجبت 270 طق اصلاً كان متوقع اكتر بس يلا كان نصيبي من النسبه دي ايفون وطلعات واحتفالات وعزومات كدة كميهه

بعد م رجعنا السودان كنت بمشي بجيب احتياجاتنا من البقاله الجمبنا وكدة بشكل يومي، اصلاً البقاله كانت حقت عمو حسن بقى قاعد فيها ولدو الكبير م عارفه اسمو منو بس كان عامل فيها ظريف، وبستلطفني وكدة، وانا كنت طبعاً عامله البت التقيله المفتريه الما بتتحنك ابداً بس حالي حال اي بت مراهقه بتحب فكرة انو زول يستلطفها او يحاول يتقرب منها وكذا، استمرة على الحال دة لغااايه م نزلته اولى ثانوي وهو صاحب منذر اخوي ف كنت لما اغيب فترة م امشي البقاله وارجع امشي تاني بسألني ليييه م قاعدة تجي وانا قاعد افقدك وكذا، هو شكلياً سمح شديييد بدليل انو بنات مدرسه الثانوي الجمبنا كلهم الصباح ونهايه اليوم بيكونو في البقاله احساس انو عاجبهم وكدة وهو زاتو واضح عليهو شكلو عاجبو وبتاع بنات بس عامل تقيل، مرة عملته منشن لي منذر في صورة طلعه لينا م بعض، وبقيت مشغلاها ليهو وكدة، اليوم التاني لقيت ادد من حساب بس اسم حسام، دققته في صورة البروفايل كان اتفاجأ ليك بيهو انو دة حسام ود صاحب البقاله الجمبنا عملته رايحه م قبلته الادد، بعد اسبوع حذفهه تاني رجع رسل لي، ضحكته مع نفسي وقلته دهه اهبل؟وبعدها لقيتو مرسل لي مسجات Pc المهم على حسب اصرارو وكدة وافقته المساء رسل لي سلام عليكم، رديت عليه، المهم بقينا نتراسل مرة مرة لغاايه م في يوم بالليل جرس بيتنا دق وبصورة عشوائيه صحينا كلنا مخلوعين، بابا طلع مستعجل فتح الباب وانا وماما ومنذر كلنا وراهو كان نسمع صوت مرة بتقول"اللحق حسن ي عبدالله حسن بيموت اللحقنا، بابا قال ليها بسم الله في شنو؟كدة براحه، قالت ليهو فجأة وقع وبشخر لا بحرك يد ولا رجل، بابا قال ليها دقيقه دخل غرفتو بسرعه وجا طالع مشى معاها ونحن وراهم، وصلنا بيتهم بابا عمل ليهو البقدر عليه وطلب الاسعاف جا ساقو ومشى معاهو، عدت فترة اسبوعين رجعوه البيت، امي قالت لي نمشي نزورهم، لبسته وظبطتهه نفسي تمام وطلعنا اول م وصلنا دقينا الباب لقيناه فاتح دخلنا بنقول سلام ماف رد بعد م عايزين نطلع في الباب اتلاقينا مع حُسام جاي داخل وشايل جزمه كورة في يدو، سلم على امي ولما جا يسلم علي مسك يدي مسافه وانا بعاين ليهو، يعني اول مرة اركز فيهو هو سمح سمح شديييد او انا شايفاه سمح م عارفه غايتو، امي قالت ليهو جينا نسلم على الوالد بس شكلو ماف زول في البيت، قال ليها لا ياخي قاعدين بكونو بعيدين بس تعالو اتفضلو اتفضلو، دخلنا غرفه الضيافه وجاب لينا مويه ومشى خلانا شويه كدة جات امو سلمت علينا وقالت لي امي البركه في وقعه حسن الدخلتك لينا وبقت تشكر في ابوي و...المهم ولدها حسام جا قعد وانا بعاين في ضفوري وكل شويه بفتحو موضوع وانا ساكته ساي، فجأة امو قالت لي البنيه مالك ساكته، امي قالت ليها انا زاتي مستغربه م من عوايدها، المرة قالت ليك خجلانهه من حسام دة شكلها ه، حسام قال لي اقوم اطلع يعني؟رفعته راسي وقلته ليهو لا م كدة والله، قال لي الدراسه كيف؟قلته ليهو تمام الحمدلله، قال لي في كم؟قلته ليهو اولى ثانوي، امو قالت لي ماشاءالله ي بتي ربنا يحفظك، كنت لابسهه حجل في رجلي فجأة لقيت حسام.بعاين لي فيهو على طول لميت رجلي وهو عمل نفسو بعاين في الارض، بعد م رجعنا البيت لقيتو مرسل لي مسج وكاتب لي فيها "الحجل يحردوهو ليك صراحهه"ومن هنا بدت محادثاتنا المتواصله وبقى عامل صحبي بتكلم معي يومي وكدة لغايه م امتحنا اولى بعد النتيجه بيوم رسل لي وقال لي شهد انا بكرة عازمك، قلته ليهو وين؟قال لي انتي مالك بس عازمك، قلته ليهو م بقدر اقول لناس بيتنا شنو؟ بقى يتحايل علي ويديني مقترحات وافكار اقولها ليهم وقال لي الموضوع ضروري وانا لو م شفتك م حأرتاح، قلته ليهو طيب نتلاقى في شارع بيتنا رفض، قلته ليهو طيب بشوف وبديك خبر، تقريباً كانت اول مرة الشيطان يلعب بي عقلي ويخليني اكذب على ناس بيتنا

قلته لي امي انو انا طالعه اكل ايسكريم وماشه السينما مع صحباتي بمناسبه الاجازة وتاني م حنتلاقى وكذااا وبعد تحانيس وواسطه بي بابا حتى وافقت وبشروط، طلعته بعد الفطور اتلاقينا في شارع الزلط الرئيسي كان جايب عربيه صحبو ركبنا واتحركنا وكان مبسوط شديد وبقينا نتونس وكدة، مشينا مطعم قعدنا وطلبنا قلته ليهو احكي مالك؟قالت لي ماف شي بس كنت حابي اشوفك واطلع معاك طلعه واهو اكتفيت بشوفتك، انتي م عارفه انا من شدة م مبسوط م مصدق حتى، انتي كنتي بالنسبه لي حاجه زي الحلم البعيييد فهمتي؟بقيت اضحك، بقى يحكي لي عن نفسو وعن مراقبتو لي وعن البنات الفي حياتو"من اللحظه دي مفروض كنت افصلها منو لقدام حأوريكم السبب"وانا كنت مبسوطه يعني هو من ناحيه عاجبني شديد جاي على حسب عقليتي المراهقه، واول كائن يستلطفني ويدخل حياتي ويكون مُصر علي كدة كمان، بعد م رجعنا نزلته في الزلط طبعاً بعيد من البيت قبل م اتحرك طلع كيس هدايا ورا المقعد واداني بيهو، قلته ليهو دة شنو؟قال لي هديه النتيجه، قلته ليهو اوديها وين انت عارف انا كذبته على ناس البيت وكمان ادخل بكيس؟ قال لي اتصرفي انا م برجع بيهو كمان، اصر علي اشيلو شيلتو ومشيت البيت لحسن حظي لقيت بابنا فاتح وخرطوش المويه في الشجر وعربيه بابا ومنذر مافي دخلته بي باب الصالون بتاعةناس منذر وفتحته الباب الداخلي دخلته غرفتي وعلى طول دخلته الهديه الدولاب وقفلتو، بالليل رسل بي وقال لي فتحتي الهديه؟قلته ليهو لا، قال لي طيب افتحيها، قلته ليهو اسي،؟ قال لي ايوة عشان فيها شي مهم، قمتهه فتحته الدولاب وطلعته الهديه كانت شوكلاته ووردة طبيعيه وعلبه فيها خاتم فضه رفيع كدة وورقه مكتوب عليها"انا بحبك شديد ي بت الناس وعايز اسمع إجابه اسي في اللحظه دي"فجاة جاتني منو مكالمه رديت بعد مسااافهه قال لي فتحتيها؟قلته ليهو إحم امممممممم ايوة، قال لي اها، فضلته ساكته، قال لي مستنيك انا، برضو م رديت، قال لي وينك؟، قلته ليهو هنا بس م عارفه اقول ليك شنو، قال لي الحاجه دي م بتجي بالغصب بس انتي متخيله انا عندي اكتر من سنه وراك وشاغل بالي بيك وعيوني ماشه وجايه حوالين بيتكم م قادر م اعبر وم قادر اسكت اكتر من كدة وم قادر انتظر برضو، فضلته ساكته، قال لي انتي قولي لي م عندك اي احساس تجاهي؟قلته ليهو ام، قال لي احكي، قلته ليهو م عارفه والله، قال لي طيب في طريقه اخد فرصه؟قولي ي شهد منتظرك انا انتي م عارفه الدقايق الانتي بتسكتي فيها دي بتعدي علي بصعوبهه كيف

قلته ليهو طيب، قال لي شنو هو الطيب؟قلته ليهو ماشي، قال لي يعني موافقه وحتديني فرصه؟قلته ليهو ايوة، فجاة اسمعو بكورك وبنطط عديل من الفرحه، بعد فترة من علاقتي بيهو خلاني اتيقن بي انو الفرصه الاديتها ليهو دي م كانت غلط ابداً وحبيتو بجد حبيتو شدييييييد لدرجه انو بقيت مكتفيهه بيهو هو بس حتى اهلي بقيت بعيدة منهم طول الوقت بتكلم معاه سواء مكالمه او دردشات وبغير عليهو غيرة فظيعه لدرجه انو طلبته منو يسي شغل البقاله ويشوف حاجه حاجه غيرو، كان بقدر يهديني وبخليني اسمع كلامو رغم انو صحباتي قالو لي بتاع بنات وبتاع حركات كنت كل م اجي اواجهو بقنعني انو هم بكذبو علي وانو هم عايزين يخربو علينا وانو هو عايزني لي قدام وانا اخت صحبو ومستحيل يلعب بي وهكذا...ف انا بصدق كلامو بالجد لدرجه انو خربته علاقتي مع صحبتي مناسك نهائي وبقيت فاصلاها علشان هي دايماً بتنصحني ابعد منو وانو هو بتاع بنات وبعمل حجات م كويسه بس انا م حصل طلب مني طلب م كويس او حتى قال لي شي غلط ابداً بقيت متعلقه بيهو شديد ورابطه حياتي ومصيري كلو معاهو لما يقولو لي حسام معناها الكلام انتهى

في السنه الانا ممتحنه فيها بدأ يتغير شويه شويه يعني بقى م بتكلم معي كتير وبسفهني وم مركز معي وبعاملني ببرود وانا اغلب الوقت بعاتبو وبتكلم معاه كتير بس كاني بأذن في مالطه وم كدة وبس بعاملني بكيفو وبمزاجو يعني وقت م هو عايز بكلمني ووقت م عايز بفصلني، ضمن اني اتعلقته بيه وحبيتو شديد ف بقى يعاملني كدة، شويه شويه إتطور بقى يتصل علي بعد الساعه 1 صباحاً واثناء م بنتكلم بقى يقول كلام كعب ويطلب مني طلبات م كوييه، ولم ارفض بقفل في وشي، مرة فصلني شهر بقيت اتصل عليه واتبكى وارسل ليهو يقرا الرسايل وم يرد وهكذا، لغايه م في يوم اتصل علي بعد المغرب قال لي انا عايز اشوفك اسي، قلته ليهو طيب اطلع ليك الشارع؟قال لي لا تعالي بيتنا عايز اشوفك هناك، قلته ليهو كيف؟قال لي حتجي ولا لأ؟هو اتعود على انو يخيرني ويختني امام الامر الواقع، قلته ليهو طيب، قلبي قبضني بقيت م متطمنهه نهائي رغم اني بثق فيهو شديد بس كلام صحباتي بقى يمر في مخيلتي، قمت اتوضيت وصليت ركعتين استخارة، وبقيت متوترة قدر م صليت م ارتحته رسلته ليهو مسج وقلته ليهو انا م بقدر اجيك في بيتكم ابداً وقفلته تلفوني وقعدته ابكي، بفينا فاصلين بعض شهر بعد شهر رجع اتصل علي وبقى يعتذر ويتحايل علي انو تاني م حيعمل كدة وانو مشتاق لي وانا فارقه معاهو وماف شي بعوض فراغي عندو وكدة، صدقتو ورجعنا نتعامل مع بعض عادي وبما اني ممتحنه بقى اكتر تركيزي على قرايتي حتى كلامي معاهو بقى م كتير وهو زاتو بقى يقول لي انتي ممتحنه وركزي على قرايتك وانا فاضي وموجود ليك دايماً بس اهم شي قرايتك و...

لغايهه م في يوم مشيت بعد اذان العشاء كدة البقاله اجيب حجات لناس البيت وانا على اساس انو قال لي عندي كورة ماشي احضرها افتكرتو ماف، مشيت البقاله كانت شبه قافله يعني باب فاتح وباب قافل دخلته اول م وقفته شفته اقرف منظر حسام معاهو بت في البقاله وبعملو في حجات م كويسه، انا من الخلعه قلته ليهو حُسام؟هو زاتو اتخلع بقى متصمغ في مكانو، طلعته جري رجعته البيت وانا برجف من الصدمه دخلته غرفتي وقفلتها علي واتفقعته بكى، كنت بسمع عنو بس اخر شي اتوقعتو اني اشوفو بعيني وفي البقاله

تلفوني بقى يضرب ويرسل رسايل كتيرة فجأة جات امي وبقت تسأل فيني مالي و...فتحت موال تحقيق طويل عريض قلته ليها مصدعه، ختت يدها في جبهتي قالت لي بسم الله مالك اسي كنتي كويسه م مشيتي الدكان انتي؟سكتته، قالت لي دقيقه مشت جابت لي مويه وحبوب وانا م بين واعيه وم واعيه دخلته الحمام غسلته وشي وجيت طالعه ادتني الحبه بلعتها ورجعته رقدته عديت على الحاله دي اسبوع باب ساقني عمل لي فحوصات طلعت نضيفه دخلته في حاله إكتئاب كدة فظيعه وقفلته تلفوني نهائي ورميتو في الدولاب

عدة شهر وانا بقيت احاول اطلع من الحاله دي واشغل نفسي بالقرايه بابا م كان بخليني نهائي حتى الامل كان بأكلني هو وبرفض ياكل لو انا م اكلته ويومي بطلعني مشوار بالليل وكدة محاولات بابا وتعبو معاي كانت كفيله بي إنها تخليني احاول اطلع من الحاله دي ضغطتهه نفسي وركزته في دراستي شديد كنت بحاول اتجنب فكرة انو يمر بمخيلتي حتى بإتجاه شارع بقالتهم بقيت م بتلفت عليه

بالفعل جات الامتحانات وامتحنتهه الحمدلله م اشتغلته كويس وكنت واثقه اني م حأجيب نسبه كبيرة بس بابا كان مديني دافع وقال لي حتى لو م جبتي نسبه كويسه انا شغال وتعبان وشقيان لشنو مش عشانك؟بس يلا اوعى تفكري، اتغيرته شديد وبعد الامتحانات حالتي اتدهورت بقى يرسل لي صحباتي يتكلمو معي ويوصلو لي كلامو، في يوم فتحته التلفون لقيت كميه رسايل نازله منو م قريتها كلها بس من بينها قريت 2 واحدة كان بقول فيها"انا عايزك لي قدام وم عايز واحدة غيرك وقلبي دة م اخدتو واحدة غيرك احلف ليك بالمصحف لو عايزة"والتانيه بتقول" اللقيتيني معاها دي انا ماسك بيها زمن بس لغايه م انتي تبقي حلالي وم عندي ليها شي "الرسايل رجعت طممت بطني منو قفلته تلفوني مرة تانيه، انا وصلته لمرحله بابا قابل بي طبيب نفسي وبقت عندي معاهو جلسات، شويه شويه بديت ارجع او ارتاح بعد الجلسات والصلاة والقرءان وكذا، في يوم بابا قال لينا عندي عرس بت صحبي بكرة ولازم تمشو معي الصاله، قلته ليهو انا م..قبل م اتم كلامي قال لي حنمشي انا وانتي وامك زي م بنمشي كل المناسبات مع بعض بدون نقاش، قلته ليهو طيب، اليوم التاني اتصل علينا نبهنا علشان نجهز نفسنا، بالفعل جهزنا نفسنا لبستهه اسكيرت مشكل اسود بي رمادي مع البودي ولبست قميص اسود مشكوك ولفيت طرحتي ولبسته هيلز بالرمادي، عملته ميك اب على خفيف ومكيجته ماما، بابا بعد جهز وطلع اول م شافنا صفر صفاره كدة خبيثهه وقال لي حقيقة يعني الواحد يشكر المدام على جودة الانتاج

ضحكتهه ماما قالت ليهو بسم الله كمان قال ليها راسك م يكبر نحن زاتنا السماحهه دي حقتنا قالت ليهو مدام السماحه عندكم فتشتهه برة لييييهه؟قلته ليهو ايواااا ليييييهه ليهه، بقى ينضف في نظارتو قال لينا يلا قدامي، قلته ليهو ي بابا م رديت قال لي قسمه قسمه

اول م طلعنا لقينا ام حسام في وشنا جات سلمت علينا انا بعد م شُفتها مزاجي اتعكر وهي اسإلتها كتيرة ماشين وين ولشنو و...ركبته خليتها واقفه مع امي، بابا قال لي الناس ديل انا م بريدهم.كلو كلو حُشرين وبحبو يتدخلو في خصوصيات الناس، سكتته ساي، امي جات واتحركنا وفضلنا نتونس ونفتح مواضيع لغااايه م وصلنا الصاله، اول م دخلنا لقيناهم بستقبلو في الضيوف ف سلمو على بابا بي حرارة كأنو عندهم فترة م اتلاقو، بابا قال ليهو سنتين وكسر ياخ، الراجل قال ليهو والله البلد دي كرهناها بعد الحصل داك ي اخوي بقى م بجيبنا ليها الا الشديد القوي

بابا قال ليهو فعلاً الحصل م بتجاوز بالساهل لكن الحمدلله ومبروك للولد كمان ياخ ربنا يجعلو باب سعد عليهو إن شاءالله ي رب

قال ليهو تسلم تسلم ي عبدالله عندنا قعدة طويلهه دايرين نقعدها بعد.موال العرس دة، بابا قال ليهو ابشر اصلاً م عندك طريقه تمشي لو م قعدنا، نسيت اعرفك دي شهد بتي الصغيرة ودي المدام، الراجل جا سلم علينا ووقف معانا مسااافه حتى جاتو مكالمه، فجأة قال وين المنظمين لييييهه ماف واحد قريب بقى يتلفت حواليهو فجأة قال ياااا ماهر، ي ماهر، اتلفت عليهو واحد لابس جلابيهه ولافي عمهه، قال ليهو تعال تعال، جا قال ليهو طبعاً ي عبدالله ولد الزيني اخوي المرحوم الكبير، بابا قال ليهو لا ياخي ي سلام ياااخ وسلم عليهو بالأحضان وقال ليهو ماشاءالله ماشاءالله ياخ والله صحي الحي بربا، الراجل اتلفت على الولد و قال ليهو دة عمك عبدالله صاحبنا انا وابوك المرحوم لزم ي ماهر، سلم علينا، رجع قال ليهو عليك الله اقرب تربيزة فاضيه فضلهم فيها وخلي الويترز يقومو بالواجب م شايفهم وين شركه التنظيم؟تاني تلفونو ضرب قال لي بابا بإستعجال عن اذنك ي عبدالله، بابا قال ليهو إتفضل، ماما بقت تعاين للولد مسافه قالت لي الولد دة م غريب علي ي ربي شوفتو وين وشو مألوف عندي، انا زاتي بقيت اعاين فيهو كان لابس جلابيه ولافي العمهه وملتحي كدة وطويل، بعد م سلم علينا قال لينا إتفضلو، مشينا وراه اقرب تربيزة فضلنا فيها، جاتو مكالمه فتح الخط وقال "طيب تمام دقايق بس"اول م قفل الخط ماما قالت ليهو ي ولدي، قال ليها نعم، قالت ليهو انت امتحنته شهادة من مدرسه الدحيح واسمك ماهر محمد الزيني؟...

...