الفصل الثالث والثلاثون
ي ولد
اي ي ابوي
وين انت؟بتصل عليك من قبيل م بترد تلفونك دة جادعو وين؟؟
كنت نايم ي ابوي
النوم الما بتفتر منو دة، دايرك تجي عندي في شقه ال 60 ضروري،
ليه في شنو؟
انا م كلمتك قبل يومين اني دايرك تساعدني في الحسابات بعد الجرد؟
انتو جردتو؟
خلصنا من امس اها يلا دايرك في موضوع الحسابات دة نخلصها عشان نشيل القروش دي نوديها البنك، عشان انا زول علي سفر م عندي قعدة لو خلصنا اليوم لي بكرة المساء بسافر،
ي ابوي اليوم م عندي ااااي طريقهه والله نحن الليله لاعبين وانا قائد الفريق م بقدر اتخلف عن الشباب لكن بكرة بجيك بدري،
ي ولد انت الكورة دي م بتفتر منها؟وقتك كلو كورة ياخ معقوله انسانا منها ياخي
ي ابوي لو تمرين عادي كنت اتخلفته لكن لاعبين مع فريق والله لكن بكره من اصبحت بجي عليك
بكره انت فاضي لي من النوم لغايه الساعه 3؟هه 8 ه لالا بصحى بدري م بموسرك ي حاج
والله غايتو الواحد جناهو يلداهو ويتعب فيهو م بريحو لمن يحتاجو اسي قلت الليله تجي عشان تبيت معي ونساهر نحسب القروش دي عشان نرفعها البنك طوالي لكن خلاص خير فيما أختاره الله بكره بدري سمعته م اتصل عليك تقول لي نايم وبتاع من 7 اللقاك في وشي تمام؟
كويس ي ابوي
❖
ماهر، حبيبي، ماهر افتح عيونك، ماهر،
ماهر انت كويس؟
عاين انا شهد
ونحن نايمين فجأة صحيت على صوت ماهر وبعدين فتحته عيوني لقيتو كأنو مربط وبرجف في السرير والعرق مالي جسمو وهو كأنو بتصارع،
فتح عيونو وهو مفزوع "ماهر قول بسم "
بسم الله،
انت كويس اجيب ليك مويه؟
هزة لي راسو ب ايوة، مشيت جبته ليه كبايه مويه وجيت، ماهر انت كويس؟في شنو؟
ماف شي ي شهد
ماهر،
نزل من السرير دخل الحمام غسل وشو وجا طالع، كان معرق رغم برودة المكيف،
بقيت اعاين ليه وهو متوتر ومرهق من الحلم وحتى لون عيونو متغير وفي صوت طالع من صدرو كأنو بياخد نفس بالعافيه
قلته ليهو ماهر انت كويس بجد؟
كويس ي شهد كويس انا متضايق شويه بس حأقيف في البلكونه بره،
طلع وقف في البلكونه وهو ساكت، تقريباً حتى جسمو كان برجف وهو واقف حيلو م شايلو
❖
ي عمي كيفك،
اهلين ي إبني ان شاءالله طيب
تمام والله الحمدلله انت كيفك والأولاد وعمتي كلهم ان شاءالله كويسين؟
كلهم كويسين الحمدلله وسايلين منك يومي في سيرتك عمتك زاتها قالت لي خلي يجي ويجيب معاهو العروس يقضو ليهم كم يوم معانا هنا بعد يجو من شهر العسل اها لسه م سافرتو؟
والله م سافرنا ي عمي نسبه لي انو شهد دي مرضت ليها يومين كدة ورفضت السفر
ياخي لا مالها م تكون حاجه كبيرة كمان؟
لا والله صداع وطعنه خفيفه كدة لكن هي متجرسه
ان شاءالله السلام وديتها الدكتور؟
اي فحوصاتها نضيفه الحمدلله طلعت بس زي م قلته ليك هي جرسه حبتين هههه
لا تمام الف الحمدلله على سلامتها لو جمبك اديني اسلم عليها،
انا برة البيت لكن لو مشيت بديك ليها،
خلاص تمام وصل ليها سلامي
إن شاءالله، كنت عايز اسألك من موضوع كدة ي عمي
إتفضل ي ولدي خير إن شاءالله؟
عندي كم يوم كدة م تمام وبفكر يعني قضيه ابوي الحصل فيها شنوو؟والقاتل ليه م اتلقى؟وهي القضيه ليه م استمرت ووقفت على مجهول وبس؟
إحم والله ي ولدي ما باليد الحيله يعني نحن بذلنا قصاري جهدنا عشان نعرف القاتل بس م كان في اي ادله تقدر توصل الشرطه للقاتل، اتجرجرنا اتجرنا في الأخير قيدنا البلاغ ضد مجهول لأنو ماف اصابع اتهام بتشير لأي زول بصورة مباشرة للأ مالك خير إن شاءالله؟
لا خير ماف شي،
ربنا يرحمه ان شاءالله، اها الشغل ماشي معاك كيف واحوال البلد والحاصل فيها؟
تمام الحمدلله
"م عندك فضول تعرف القتل ابوك منو؟"
دايماً الحلم بتاع اخر محادثه بيني وبين ابوي دة ملازمني، يمكن احساسي بالذنب تجاهو هو سبب في كدة
في الفترة الأخيرة دي بقت تحصل معي حجات غريبه جداً بس "الرساله دي كانت اغربها"واتكررت كذا مرة بأرقام مختلفه والرقم كأنو بيستخدم عشان تترسل بيه المسج بس بعدين م بيبقى ليه اثر، دة السبب الخلاني ارفع التلفون واتصل اسأل عمي
❖
شهد
لجين اهلين مشتاقه ليك ي بت
لو مشتاقه لي حتتصلي، من عرستي اتغيرتي
اناااااااا كيف كيف؟
يعني لا بتتصلي لا بتسألي وحتى لو رسلنا ليك بتردي علينا بعد فترة بقيتي كعبه ي شهد
لجين انتي هبله؟من متين وانتي بفرق معاك لو رديت ليك او سفهتك؟م دايماً بتجي تلطشيني وتشتميني مالك الاتغير شنووو؟
دقيقة اضرب ليك ي منفسنهه
After2sc
ي منفسنهه، شهد الكعبهه
بتضحكي؟
لو م عملنا ليك كدة م بتتصلي ي سجم
قطعتي قلبي والله حيرتيني، مشتاقه ليك بس والله علشان كدة
حبيبي وانا اكتر عاينو تعالويني انتي وطيف بكره يخخخ،
م جادة؟نجي كيف وماهر؟
ماهر اصلاً اليومين دي بقى يمشي الشغل ومعظم الوقت بيخليني انا براي تعالو م حيكون في
طيب ظابط اصلاً محتاجه اتكلم معاك في حجات كتيرة يخ مالك في شنوو؟لما نجي بحكي ليك
تمام
حبيبي
ايوة ي شهد
امممممممم بكرة طالع؟تقريباً ايوة عندي موضوع كدة ان شاءالله يتم واتوفق فيهو مالك خير عايزة حاجه؟
لا ماف شي بس بكرة لجين وطيف جاين عندي ف بس يعني، طيب تمام اخد لي نومة واصحى نطلع نمشي نجيب حجات للبيت ولو عايزة اي شي اعملي حسابو م تنسيهو
حتنوم وانا من قبيل منتظراك تجي تقعد معي؟
تعالي حبيبي رقدني جمبو واخدني في حضنو وقال لي انا كمان مشتاق ليك على فكرة قولي النفسك فيهو سامعك انا حاخد وادي معاك فيهو بس لو نمت م تلوميني قلته ليهو اممممم شغل شنو الشاغلك الفترة دي؟واحكي لي عن اخوانك كلهم موجودين داخل الخرطوم؟بتتواصل معاهم كيف م حصل قلته لي ماشي ليهم
قال لي خالد بدرس محاسبه جامعه السودان دي السنه التانيه ليهو، إيليڤ ي دوب اول سنه امها اصرت على إنو تقرأ طب خاص وطبعاً لازم نقول سمعاً وطاعه، أزاد في تانيه ثانوي، وراكان دة صغير ي دوب ماشي سابع اساس
أما جمانة وجيان هم توأم امهم هيلين حالياً هي في دبي عايشه وشغاله هناك وبناتها هنا في السودان مع أمها، فاطمة مع امها في مصر وبس
قلته ليهم إممممم وانت متحمل مسؤليتهم كلهم؟
قال لي عشان دي مسؤليه لازم اتعامل معاها بمسؤليه، شهد انا بحس بالذنب تجاهم انتي فاهمة والحاجه دي تقيله علي شديد، دايماً لما اقصر من واحد فيهم بحس انو غضب ربنا حينزل علي،
قلته ليهو يعني اسي بتصرف عليهم كلهم؟
قال لي بالتساوي عشان دة الصح حتى الأمهم شغاله شهرياً مصروفهم بصلهم، مافي فرق بالنسبه لي بين دة صغير م بحتاج ودة كبير لغايه اللحظه البنزل في حساب خالد حينزل ل فاطمة الصغيرة م عشان هي م محتاجه ليه لا عشان دة حقها
حبيبي الموضوع دة متعب و صعب شديد خصوصاً في الزمن دة الواحد م قادر يتحمل مسؤليه نفسو واولادو حتى خليك من انو يتحمل مسؤليه زي دي ليه م تقسم الورثه دي وتدي كل زول حقه وتريح نفسك
وين الورثه دي هي؟شهد والله العظيم تلاته ي شهد انا ورثه ابوي دي م عارف ليها إتجاه ابداً ولا شفته ليه ورثه بعد وفاتو ولا اي شي واصلاً م كنت مركز في الموضوع دة بس برضو م بقدر اتجاوز حته انو ديل اخواني انتي فاهمة ي شهد؟ديل مسؤليتي حتى لو كانت صعبه في الاخير هي مسؤليه ودة واجب غصب عني
بقى مغمض عيونو وساكت وانا خاته يدي في خدو وبعاين ليه يعني م ممكن إنسان يكون كدة بجد؟انا زعلانه عليه شديد لأنو لا عاش طفوله زي الناس ولا قادر يعيش شبابه زي الناس بحسه بعاني بس م ببين كل مرة ببهرني بشخصيتو دي ولسه حأكتشف فيك شنو ي ماهر؟
❖
ما تستهون بالموضوع طالما هو سأل معناها م ساي نهائي والولد دة من بقى يسأل معناها في شي عشان م تجيب اخرتك واخرتنا شوف ليك شي تغطس بيهو حجرو قبل م يغطس حجرنا وانت عارف براك الممكن يحصل
قلته ليك م تخافي ماف شي ممكن يحصل وهو زاتو كان سأل حيلقى شنو يعني؟م غيرو سألو وجرو وم لقو شي اها في النهايه القضيه اتحولت لي ملف واتقفل
اسمع كلامي وم تستخف بالموضوع نحن م ناقصين كفايه الفينا مكفينا شوف ليك صرفه تحلنا،
اها اعمل ليهو شنو يعني؟
اسمع كلامي دة كويس وافهمو اتصرف
انتي خايفه على نفسك،
اي خايفه على نفسي بس م خايفه على نفسي براي انت فاهم وانا فاهمة الكلام دة كويس وانت ادرى
"محادثه بين مجهولين"
❖
صحيت من الصباح بدري عشان انضف البيت واجهز لي زيارة لجين وطيف،
حبيبي
ايوة،
دقيقة دقيقة جيبي الحجات دي كدة ثواني قبل نصبح على بعض،
شال مني جردل المسح ختاهو على جنب، في مرة بتنضف حتجي شويه كدة حتنضف كل شي انا كلمتها من امس واتفقته معاها ف شنو انتي م تتعبي روحك، انا حأساعدك في شغل المطبخ لغااايه م مواعيد طلعتي تجي بعدها حأبيعك
قلته ليهو امممممم حتبيعني وحتخليني براي حتى لو م خلصته؟
قرب مني وعاين لي بخباثه كدة وقال لي حسب المغريات ممكن اقعد، ضربتو قلته ليهو سجم قربني عليه وباسني وقال لي ي دوبها كدة اصبحت عندي بالضحكه دي
قلته ليهو بحبك يلا على المطبخ طيب
قال لي على طول كدة؟طيب يلا
قلته ليه م سمعته كلمة بحبك دي؟
ضحك قال لي وانا كمان هههههههه تعالي وشالني
فضلنا شغالين ونتهابل لغايه م مواعيد طلعتو جات جهز نفسو وجاني راجع في المطبخ قال لي طالع عايزة حاجه؟
هزيت ليهو راسي بمعنى لا وانا كنت مشغوله،
قال لي ولا اي حاجه؟
قلته ليهو لأ
قال لي ي شيخهه؟
رفعته عيني عاينته ليه واتهبلته وانا بعاين ليه يخ وهو بضحك وطالع مشيت وراه لغايه م وصل الباب قلته ليه دقيقه، بقيت اصلح ليه في قميصو، قال لي احساس فاصله عشريه واقفه جمبي والله القصهدر دة محنه تحبي اديك كم متر كدة يعدلو طولك ضربتو قلته ليه حيوان محنه في عينك زاد في الضحك، قال لي طيب يلا عشان الفي المطبخ م يحرق، قلته ليهو م تتأخر حبيبي طيب الله يرضى عليك وخلي بالك من نفسك وم تتأخر وم تعاين جاي وجاي خلي عيونك مغمضه في الطريق
قربني ليه وقال لي هو انا بعدك بشوف يعني مسك يدي وختاها في قلبو وقال لي يشهد الله دة معمي بيك، في اللحظه دي سكتت قلته ليهو طيب انا فصلتهه خلاص باسني وقال لي عايزة حاجه بجد؟عشان لو عايزة اجيبها ليك قبل اطلع، قلت عايزاك انت تعال راجع بدري طيب
❖
السلام عليكم؟
وعليكم السلام
ماهر؟
ايوة إتفضل
عندنا امر قبض بإسمك معليش حناخدك معانا قسم الشرطه إتفضل،
معليش ي سعادتك امر قبض شنو وقسم شرطه شنوووو م فهمته؟
اكيد نحن هنا م حنجاوبك وحنعزمك جبنه عشان نحكي ليك التفاصيل،
ي باشا دقيقة م تبقى نفسك حار انا بستفسر مش انت جاي منتظرني تحت بيتي وجايب امر قبض بإسمي يبقى تفهمني ومنو الشاكي اساساً نحن كمان لينا في القانون وبنعرف فيهو م ترفع صوتك ابداً علي لأنو دة من حقي وبالذوق؟
يعقوب براحه م دايرين مشاكل وجوطه نحن اسمع ي حبيب عندك امر قبض بإسم وليد خليل عرفته الاسم تقدر تتفضل معانا؟
طيب ممكن امشي بي عربيتي؟
ليه انت عازمنا طلعه لمن نمشي بعربيتك؟
انت جاي تقبض علي بي أمجاد ي حبيب واكيد مأجرها م تتخلع فيني عليك الله اها ي باشا قلته شنوو؟
طيب تمام ارح في النهايه نحن ماشين القسم يعني م فرقت
وانا طالع من البيت اتفاجأته ب 2 بتاعين مباحث بيوقفوني على اساس انو عندهم امر قبض جايبنو لي، م مصدوم ابداً انو في امر قبض تجاهي الصادمني الاسم العامل لي امر القبض دة
وصلنا القسم، الساعه كانت 1 ظهر، م كان في غير الضباط، ماف وكيل نيابه ولا في غيرو، بعرف اتعامل مع الأمور دي كويس، بس هنا الموضوع كان غير كانو كل م اسألهم عن وكيل النيابه بقولو لي حيجي شويه كدة و...الخ
❖
اتصلت علي لجين علشان اوصف ليها وبالفعل وصفته ليها لغايه م وصلو، تقريباً نحن العمارة كلها سمعت بصوت صريخنا كأنو عندنا سنه م شفنا بعض
والله إحلويتي وبقيتي مرة ي شهد هو العرس بخلي الواحدة تنور كدة عرسو لي عايزة انور
لجين انتي وسخهه بطلي
احكي لي اها كيف وماهر كيف حنين طيبان بعاملك كيف هل هو حلو خلقه واخلاق ولا اكتشفتي انو م كدة
طيف: ي بت م تبطلي قله ادب ها
عايزة اعرف عشان اغربل العرسان العندي يختي واختار زي الناس
اي عرسان ي لجين م تكذبي
خلاص بطلو المهم هو طلع احلا مما تتخيلو والله يجماعهه م بقدر احكي اكتر من كدة
طيف: وبعلي لا لازم تحكي كان كدي عايزين نعرف
اقول ليكم شنو يعني؟
حنين طيبان، عكس الشخصيه الانتو شايفنها تماما، بشاركنيً تفاهتي م بيمل من انو يقول لي ي بابا، نعم ي بابا حاضر ي بابا اوامرك ي بابا هو عارف تماماً كيف يحتويني وبس
دقيقيه نفهم ي بابا؟مش دي الكلمه الكنا متفقين على انها اوڤر ووهميه؟
م هو انتي م سمعتيهو هو كيف بنطقها ببحة صوتو الحلوة ديك ولكل قاعدة شواذ ي ستي
بقو يعاينو لبعض ويعاينو لي، قلته ليهم بطبو قله ادب ي وسخات
عايني انا جعانه،
طيب دقيقة اجهز ليكم الأكل
انا م عايزة غايتو ختي لي لجين الطفسه دي بس
ارح بمشي معاك المطبخ انا زاتي خليها هي عايزة تمسك تلفونها دة وتتكلم مع عولاقها
ونحن في المطبخ...
احكي لي الحاصل معاك شنووو ي زوله،
والله ي شوشتي منفسنه واخلاقي في مناخري الفترة دي
هرمونات؟
لا والله م هرمونات ابداً عندي اسبابي
مالك احكي؟
قبل كدة حكيت ليك بالزول داك صح؟
الزول الما عارفه اسمو؟
ايوان
انتي لسه معاها اها مالو معاك تاني؟
لسه في حركاتو وعدم وضوحو ي شهد ومحيرني شديد م عايز يبعد زي الناس ولا عايز يقرب زي الناس ولما يحس انا ابتديت ابعد واتجاوزو بجي راجع يعمل حركات انا جد تعبته منو والله راسي جايط ومشكلتي م قادرة اخد قرار ابداً
ي بتي دة باطل مالك مالو عامله لنفسك وجع راس بيه
لا هو م كدة ي شهد هو زول كويس ومحترم انا بس عتبانه عليه يعني لما يشوفني ببعد وانا ماخدة قرار اتجنبو برجع
م هي دي البطاله والحيونه والكلببه هنا النوع دة حيوان وبطلع عينك وحيخليك معلقه في الهايه كدة
قبل كم يوم كنت بتكلم معاه ي شهد انا من شدة م لمحته ليه م فضل لي الا اقول اسمو وبرضو مثل انو غبي وم فاهم
دة حيوان ي بتي اردحي ليهو وافصليها منو لاقيك وين هو واااي منو غايظني كيف ي بت اكسبي زمنك احسن وافصليهو لو جاك راجع طنشيهو واتعاملي معاهو ببرود لمن راسو يجي ويعرف هو عايز شنو م تعلقي نفسك ساي طالما بالتلميحات الواضحه م جا يبقى هو م عايز اساساً بس بلعب بأعصابك والنوع دة سجم
يعني ارسل ليه واقول ليه لازم نبعد واخليه ع كدة؟م ترسلي ليه افصليه بس ولما يرسل ليك اتعاملي معاه ببرود م تسفهيه اتباردي معاه بس
طيب حاضر
ي بت والله م بستاهلك صدقيني بكرة يجيك سيد سيدو
والله هو سيدسيدو ي شهد انتي م عارفه نفسك بتتكلمي على منوو
على واحد بتحيون عليك وانتي سجم المهم اها الشغل كيف ان شاءالله امورك مظبطه؟
شغل شنووو ي بت الشغل الواحد دة يعني حيكون شغل شنوو؟
خليتو ي بت من عرفت انو ماهر خلا الشركه انا ومنذر خليناها
طبعاً م استوعبته كلامها في البدايه
قلته ليها ماهر خلا الشركه؟
قالت لي م عارفه؟
بقيت اعاين ليها" مستنكرة الموضوع"
ولا حكى ليك هو؟
لا ابداً
قالت لي خلاها والله، قالوحاصله ليهو فيها مشاكل كتيرة يخخخ وبقت مصدر خساير وديون على حسب كلام منذر، عمو الاسمو معتصم الكان ماسك الماليه ولا شنو م عارفه المهم غرق الشركه واتلاعب بالحسابات شديد لدرجه انو في قروش وفواتير م معروفه هي مشت وين وفي قروض م معروفه هي اتأخدت لشنووو بإسم الشركهة
انا عارفه انو عندو فيها مشاكل بس م لدرجه انو يخليها
❖
فضلت قاعد ومنتظر لغايه م الشمس غابت قالو حيدخلوني الخراسه بحكم انو اليوم الخميس ووكيل النيابه م حيجي عشان يصدق لي كفاله الا الأحد، جوطته فيهم في الأخير اتصلته على زياد رغم اني كنت م عايز زول يعرف اساساً كنت قادر احلها براي
الوو؟
ي ماهر
ي زياد كيفك
تمام الحمدلله، انت كيفك ياخ
الحمدلله، اسمعني عايزك في موضوع كدة،
موضوع شنووو؟
انا في القسم عمكعمك وليد خليل دة اظنو فاتح فيني بلاغ وعامل لي امر قبض،
ي زول متين الكلام دة وليه م كلمتني؟
اسي كلمتك المهم الشي العايزو منك تمشي شقتي تاخد شهد توصلها بيت اهلها قول ليها ماهر جاتو سفرة فجأة وخليها على كدة تمام؟
ي ماهر
ي زياد الله يرضى عليك اعمل البقول ليك عليهو
طيب انت وين؟ في اي قسم؟
انا في قسم ال...
❖
لجين وطيف طلعو مني قريب للمغرب، صليت المغرب وانا مقلقه لأنو ماهر اتأخر حتى تلفونو مقفول، وانا على الحال دة فجأة الجرس ضرب، م حصل ضرب الجرس ف استغربته بس استعجلته وفتحته الباب واتفاجأته بي منذر في وشي،
بعد سرحه قلته ليهو منذذر، ضماني عليه قال لي مشتاقين ي هبله قلته ليهو لو مشتاق لي كنت حترد على مسجاتي وم بتسفهني ضحك قال لي وين الكلام دة؟ضربتو وقلته ليه راجع تلفونك،
والله ي اختي مشتاقين ياخ
م اختك ي دوب اتزكرته انو عندك اخت؟؟
انتي حتى العرس م عقلك وقص لسانك دة ي زوله
اتفضل
والله بقيتي زول وبتعرفي تفضلي تعالي م عايز حاجه
جايه عشان اقص لسانك دة انا من زمان زول هاااااااا عندك راي
جيت شايله عصير ومويه وقعدته اتونس معاه،
❖
والله انت ي زياد م عارف اقول ليك شنو يعني انا لو داير احكي لي اخوها كان ضربته ليك انت؟عميان انا؟
ي ماهر انا قلته اخليه يمشي عليه وانا اللحقكك
حتلحقني تعمل لي شنو ي زياد حتجيب لي وكيل نيابه من وين باقي الليل دة؟انا م عايز الموضوع يكبر وم عايز شهد تعرف واسي اخوها حيحكي ليها
لا م بحكي ليها انا وضحته ليهو
والله انت غايتو ي زيااااد خليني انا بتصل عليهو طيب
❖
اثناء م نحن قاعدين وبناخد وبندي في الكلام فجأة منذر جاتو مكالمة، لما شاف المكالمه شال التلفون وطلع برة، بعد مسافه جا راجع ورجعنا نتونس
بعد فترة 10 دقايق كدة تاني جاتو مكالمه، قلته ليهو مستنياك وين بتتصل كدة
فتح الخط وقال ابو النسب ي حبيب ايوة وصلته البيت اسي قاعد معاها طيب هاك ليها، ناولني التلفون وقال لي ماهر
اخدته التلفون وانا مستغربه، قال لي حبيبي، قلته ليهو ماهر؟؟؟
قال لي كيفك تمام؟
قلته ليهو الحمدلله وين انت؟
قال لي بتصل عليك من قبيل تلفونك م بدخل معي عارفك حتكوني قلقتي شديد
قلته ليه ايوة بس وين انت؟
قال لي انا ي ستي جاتني شغله فجأة ومستعجله شديييد واتجبرته اني اسافر على بورتسودان كدة عشان اتمها بكرة بعد بكرة يوم الأحد بالكتير بكون معاك طيب حبيبي؟
قلته ليهو كيف يعني؟شغله شنو دي م حكيت لي بيها؟طبعاً م عارفه اخد راحتي في الكلام قدام منذر قمت مشيت غرفتي وقفلتها علي،
قلته ليهو ماهر م تكذب علي انت وين والحاصل عليك شنووو؟عملته حادث؟انت في اي مستشفى؟
قال لي حبيبي هدي والله العظيم انا تمام م عملته اي حادث زي م قلته ليك شغله مستعجله ماشي اتمها وجاي راجع
شغله شنووو فهمني؟وليه 3 يوم؟وليه م كلمتني؟
حبيبي
ما حبيبي فهمني
ي بابا
م تقول لي ي بابا عايزة افهم انا
طيب لما اجي حابقى افهمك لأنو انتي كدة م حتفهمي المهم خلي بالك من نفسك لغايه م ارجع ونتفاهم تمام
م عايزة معاك تفاهم ابداً ي ماهر ابداً فهمته
قفل الخط دموعي جات جاريه، بعد مساااافه نص ساعه سمعت باب الغرفه بدق
شهد خلصتي؟
قلته ليهو بصوت مبحوح ايوة فتح الباب لقاني قاعدة في السرير وماسكه التلفون وببكي بقى يعاين لي بعدها بمسافه قال لي غايتو جنس هبل اسي بتبكي مالك؟
انتي عروس كلو عندك شهر ي زوله، تاني التلفون رجع اتصل وهو في يدي برضو كان ماهر، اديتو التلفون
فتح الخط وقال اي ي ابوالنسب، لا اتطمن حأسوقها معي م محتاج توصيه اختي قبل مرتك ي زول انت نسيت ولا شنوو ابشر اابشر ترجع بالسلامه ي حبيب، اي ياها دموعها في عيونها حنستحمل نكدها كم يوم لغاايه م تجي تحلنا منها ومن نفسنتها، طيب يلا سلام ي حبيب
ي زوله زي م قال ليك كلها يومين يقضي شغلتو يوم التالت بتلقيه معاك ارح لمي حجاتك عشان نمشي معذورين حنستحملك اليومين دي غايتو م صدقنا اتحلينا منك منتظرك برة
❖
زعلان شديد م على نفسي على شهد لأنها استحملت حجات كتيرة في وقت وجيز من عرسنا ولسه م عارف حتستحمل شنو كمان معي، م بقدر اكون صريح معاها ابداً لأني عارف قدر شنو هي حتخاف وحتقوم الدنيا وم تقعدها، محتاج لوقفتها معي شديد حتى ولو بالكلام بس بالنسبه لي إطمئناني بوجودها معي في حياتي في حد زاته كافي جداً بعيداً عن البمر بيهو انا ...
❖
بالفعل مشيت بيتنا، كنت زعلانه ومتضايقهه جداً وحقيقةً اي واحدة في مكاني حتعمل كدة واكتر، رغم اني بحاول ابين قدام ماما وحبوبه وجدو انو انا تمام بس اول م ادخل الغرفه ببكي وبترمي في السرير وبمسك تلفوني الثانيه والتانيه علشان اشوفو اتصل ولا لأ بلاقيه م اتصل وعلى حسب زعلي وضيقي م رضيت اتصل ابدا، والليلً دة بكم ليلة كملته دموعي في البكى قادرة اتجاوز كل تصرفاتو الا التصرف دة غاظني وزعلني شديد، م عارفه الجمعه والسبت ديل عدو علي كيف لغايه م جا الأحد كنت ماسكه تلفوني ومنتظرة مكالمتو ومنذر مختفي اليوم دة كلو
❖
في القسم...
ي وليد انت عارف انا لما قالو لي امر القبض بإسم م صدقته لأنو نحن اللمانا اكتر من شغل لكن معليش بتحصل بتحصل عاذرك في النهايه الحق حق وانا عشان كدة قبل شهر من هنا اتصلته عليك وقلته ليك ي وليد الشهر الجاي م بقدر اسدد ليك عندي امور شويه معرقله واعتذرته ليك ي باشا وانت بذات نفسك قلته لي ابشر م عندك مشكله يعني لو قلته لا كنت اتصرفته ليك فيها من غير م تتعب نفسك وتفتح بلاغ
عارف انو اللمانا اكتر من شغل ي زيني وانت عارف معزتك عندي براك، واسي انا شطبته البلاغ واعفي لي ي اخوي البينا عامرة،
لالا م تشطبو دة م حقك والحق حق زي م قلته ليك انا بس مستغرب فيك انت تحديداً ولو م كدة م بلومك ابداً
معليش ي اخوي امسحها في وشي وي سعادتك الزول دة زي اخوي الكبير والله انا بس انفعلته شويه لحظه شيطان وكدة الله يجازي الكان السبب
عموماً ي وليد عندي معاك قعدة وبيناتنا تلفونات لكن اسي انا مستعجل بتصل عليك تمام؟
تمام ي اخوي في انتظارك والبينا عامرة، ابشر عامرة اكيد لمن نقعد يلا في امان الله
الزول دة غريب؟
م غريب ي ماهر الزول دة الزول دة محرش،
كيف الكلام دة؟
مشينا قعدنا معاهو انا ومنذر جرجرناهو في الكلام واتلايقنا فيه لغايه م عرفنا انو عمك معتصم هو المحرشو عليك اظن اقنعو بيىقصه انك خليت الشركه وافلسته وبقيت مطلوب و...الخ لغايه م خلاهو يجي يفتح فيك بلاغ وانت عارفو زول شفقان كيف م كان عايز يعترف ويفضحو لكن طلع زيتنا حتى اعترف والله ي ماهر عمك دة انا م عارف مشكلتو شنو لكن انسان مريض م عارف مصلحتو شنو من انو يعمل كدة انا ي دوب اتأكدته انو متعمد يعمل كل اللخبطه في الحسابات دي في الشركه
عمي معتصم قلته لي؟ايوااا تمام طيب، م تتهور وتسألو ي زول براحه عارفك انا، ي زول انا متعود على عمايلو م سائلو ولا شي انا ماشي اشوف مكان مرتي بي وين واللحقها الشغله اولويات ولا شنو
اولويات لكن احيا
جبته لي الملابس؟
اي تعال في العربيه
❖
كنت في المطبخ بعمل لحبوبه وجدو شاي المغرب وانا في قمة ضيقي من الدنيا وخلاص اعصابي تلفت بالي بقى كلو مع ماهر بقيت خايفه عليه اكتر من زعلي منو
فجأة الجرس ضرب، م ركزته علشان ماما وجدو وحبوبه كلهم جمب الباب واكيد حيكون منذر يعني ركبته سماعاتي وعليت صوت الاغاني للأخر، بعد كم دقيقة شايفه ماما قدامي بتتكلم بس م سامعاها بتقول في شنو، طلعته السماعات قلته ليها شنووو؟
قالت لي راجلك قاعد برة امشي سلمي عليهو ها
طبعاً م مستوعبه بقيت واقفه وبعاين ليها
قالت لي ي بت
امشي هاك دة التوب
احساس انتي زعلانه بس مشتاقه ليهو واللخبطه الفي النص ديك مع الصراع بتاع تمشي م تمشي بس دة كان احساسي، ماما طلعت وصلت المويه وجات راجعه وانا حالفه م اطلع قالت لي والله انادي جدك يديك كم عكاز في راسك دة م تطلعي ي بت تشوفي راجلك وتسلمي عليه حتى لو زعلانه منو عشرة الواجب تطلعي وتسلمي عليه اجي يخواني؟؟ لبسته التوب وطلعته والله م عاينته ليه في وشو اساساً اول م شافني وقف قلته ليه السلام عليكم
قال لي وعليكم السلام مسك يدي جريتها ودخلته غرفتي
كنت مغيوظه شديييد وم طايقه اشوف وشو، بعد حكايه نص ساعه كدة باب الغرفه دق،
م فتحته الباب علشان عارفه انو دي لو امي حتدخل ساي،
فجأة الباب فتح وقفل وسمعته صوت خطواتو جايه علي وهو بقول لي شهههد،
حبيبي الحلو حتى وهو زعلان
قعد جمبي زحيت منو، قرب مني تاني ومسك يدي بالغصب وشبك صوابعو بصوابعي وقال لي"عارفك زعلانه مني وعندك حق صراحه بس ي حبيبي والله العظيم الموضوع م كان في يدي ابداً اسف يلا الله يخليك م تبقي قلبك اسود
انا قلبي اسود؟يعني اسي انا بقيت قلبي اسود؟؟جريت منو يدي
مسكها وقال لي ابيض واحن قلب عرفتو، انا مشتاق ليك شديد قدر م احكي ليك عن صعوبه اليومين المضو ديل عدو كيف بلاك م بقدر اوصفهم ابداً يلا ي شهد خلينا نمشي بيتنا ونتفاهم اوعدك م يحصل كدة تاني، انتي عارفه انو انا ممكن تهون علي نفسي ولا تهوني انتي؟
لو م بهون عليك م حتعمل كدة وم حتخليني كدة ماهر انا يومين م نمت بسببك ابداً
تعالي، اخدني في حضنو وهو ساكت مسافه حتى قال لي وانا كمان مشتاق ليك مشتاق ليك شديد اسف طيب؟فاهمك انا وفاهم خوفك وقلقك علي واياً كان التصرف الحيطلع منك في اللحظه دي م عليك عتب عليهو و زي م قلته ليك لو كان الموضوع في إيدي الدنيا كلها تهون الا إنتي ي شهد، مسك يدي وهو بعاين لي خته يدو في خدو وبقى يمسح دموعي وقال لي "إنتي م شايفه اللهفه الانا جيت ليك بيها زي الطفل كدة؟والله م مشيت اي مكان واول م وصلنا قلته ليهم عندي مرة راجياني لازم اللحقها،
فضلته ساكته، باسني في خدي وقال لي"طيب انتي عارف انو انتي سمحه في كل حالاتك بس برضو م ينفع تبكي وتزعلي كدة ي نكديه انتي؟
طيب حصل انا قلته ليك إنو انتي الوحيدة في الدنيا اللي ليك قلبي وما لي قلبي إلا انتي ؟؟ ...
إقتباس
ببساطه الامر انني احببتك اولا؛ فجعلت لك من حياتي ملجى يحتويك في كل تقلباتك لم يلق لي من البشر
سواك لم يذيدني ثقل المسافات التي بيننا الا حبآ
كنت اول من تخطر علي بالي في كل شعور وكل منحنى وكل ثانيه، الطريق الذي مشيت فيه لأجلك و وصلت
"بلا مبالغه كنت الروح والملامح لكل شي حولي"
شيراز عثمان
...