الفصل الثامن والثلاثون
شهد!!
مسك يدي وباس كفتها
قلته ليه ماهر عاين نتفق انا م عايزة شي من الدنيا دي الا انو في الاخير نعدي كل شي ونحن مع بعض وبس
وبعدين تعال هنا انتو جيتو متين ومتين طلعته تربيزة المطبخ والحجات دي وعملته دة كلو؟
يعني اسي عايزة تخربي اللحظه خلاص؟
يب عايزة اخربها علشان بكره حتطلع من الصبح وحتخلي لي الحجات دي انا ارجعها المطبخ
طيب اُكلي وقفلي غلطان انا اكلي اكلي "وشال قطعه شاورما دخلها لي في خشمي"
ماهر خلاص م تنكش لي شعري كدة غياظ ثغيل لتخ بتلمو لي انت؟هل بتلمو لي انت؟ تف اصلاً انا بقيت اكره الشاورما
ودي اخر مرة افكر اعمل ليك شي كرهتيه او لا انتي حره
طيب
شعرك كدة احلى على فكرة
م تتكلم معي
❖
بعد م خلصنا اكل ودخلنا غرفتنا خلاص..
عندي شغل مهم في اللابتوب مفروض اخلصو قبل كم يوم بس م لقيت فرصه حأخلصو حتى انوم،
طيب حبيبي عايزة اتكلم معاك في موضوع مهم ممكن؟
احكي
ام ممكن تعرف سمر على مهند؟سمر قاريه تمريض وانت قلت انو الدكتور على حسب كلامه انو مهند محتاج مرافق يكون قريب منه ومتوفر ليه كل الوقت يلا سمر اصلاً بتجيني يومي وبتقعد معي فترة طويله وم شغاله او شغاله تسويق إلكتروني، حكيت ليها عن مهند بالصدفه قالت لي ممكن اساعدو ودي واتابع حالتو معاكم لو احتجتو ودي حاجه كويسه ممكن نستفيد منها طالما بتجي يومي تقعد معي،
بس ي شهد برضو م منطقي تتكلف بحاجه زي دي مرتب م منطقي ابداً الكلام دة ي شهد بالعقل كدة
حبيبي المهم هي عايزة تستفيد بمتابعه حاله مريض انا م طلبته منها
طيب بس م عارف مهند ممكن يتعامل معاها او لا
قلته ليهو نحاول
طيب م تعرفيهو انتي عليها وين المشكله؟
ماهر لما تعرفو عليها انت م زي لما الحاجه دي تجي مني يمكن يرفضها بس انت لا
سكتت م رد علي
حبيبي بليز
طيب ححاول
❖
خليته في الكنبه وشغلته والتلفزيون وقعدته اشاهد م بتزكر نمته متين بس م صحيت الا بإحساس حركه في شعري لقيتو ماهر، قلته ليه ماهر مالك ياخ؟
قال لي ماف شي بس عايز اصلح ليك رقبتك عشان نايمه غلط...
صباح اليوم التاني صحيت لقيتو ماف جمبي والصدمه كانت لما دخلته الحمام اتخلعته لما لقيت شعري معمول كعكتين والله عاملهم احسن م انا بعملهم لا وكمان ماسكهم لي بي باندات اجتهد غايتو
طلعته برة مشيت على المطبخ لقيتو رجع التربيزة والكراسي محلها وغسل لي العدة واظن نضف المطبخ حتى طلع
❖
اتصلته عليه اول م فتح الخط قلته ليه بحبك
قال لي تمام
قلته ليه دي شنو تمام دي؟دي شنو نبرة الجديه البتتكلم معي بيها دي
قال لي قصدي كويس
ماهر انت شايل مشوار؟
اي!؟
طيب عايزة اقول ليك حاجه مهمة
قولي
قال ليك في زول عايز يمشي شارع ال 60 مشى شارع التلتين مرتين لو ماشي هناك اعمل كدة
ضحك ضحكه خفيفه وقال لي احم عايزة حاجه؟؟
قلته ليهو بحبك شديد
خير يلا مع السلامه وقفل الخط في وشي رميت التلفون جاتني رساله رفعتو فتحته المسج لقيتو هو مرسل لي قلب احمر
❖
ماهر ركز معي انت في زول معين في راسك شاكي انو قتل ابوك؟
ي زياد افهمني انا عايز اصل للحقيقه بس
ماهر انا معاك طيب الحقيقه دي حتصل ليها كيف وماف ادله ممكن يتقال عليها ادله قاطعه وحتى القضيه اتقفلت قبل كم سنه يعني تقرير القتل دة هو في لكن وين الادله؟حتكون ضاعت محل م ابوك مات والعمارة زاتها اظن لي حصلت ليها الف حاله بتاعه ترميم صح ولا لأ؟
انا مقتنع تماماً انو ماف جريمة كامله ي زياد، لا بد من وجود ثغرات
عقلي الباطن"العمارهه"؟؟!
مش العمارة حقتكم الحصلت فيها الجريمة دي اتباعت ولا الحاصل عليها شنو هي كمان؟
زياد انا موضوع العمارة دي ابداً م حصل فكرته فيه م عارف... دقيقة
بتعمل في شنو؟
دقيقه بس ؟!
الو؟ ي عمي كيفك ان شاءالله طيب؟معاك ود الزيني، الحمدلله تمام اعفي لي ي عمي صدعته بس عندي سؤال بسيط كدة بس مهم،
ا يديك العافيه عايز اسألك بس العمارة بعد وفاة ابوي اتباعت ولا لأ؟يعني اسي العمارة مملكه لزول تاني وفاتحه؟
والله ي عمي تصدق وتأمن بالله م عارف عنها شي من وفاة ابوي لغايه اللحظه؟
ه ي عمي اعفي لي انا لو عايز امشي اسأل القراب لي وعندي ثقه فيهم م كنت لجأتهة ليك ابداً
اي هو حقي بس خليها بالنيه،
يعني قالو اتباعت لكن مقفله وم اتفتحت ابداً صح؟
تمام، يديك العافيه ي عمي..
قال ليك شنوو؟
ماهر، ي ماهر، ماهر بتكلم معاك انا ي زول...
❖
السلام عليكم
وعليكم السلام اهلين كيفك؟
تمام الحمدلله وانتي ان شاءالله بخير؟
تمام الحمدلله
ماهر طبعاً سمر خجلانه منك شديد قالت
ه انا زي اخوك الكبير والبيت دة زي بيتكم ماف شي يخليك تخجلي
تسسلم ياخ يديك العافيه،
شهد قالت لي درستي تمريض و...الخ
والله ان شاءالله م يحصل الا كل خير م تخاف عليهو واكيد حنتفق انا وهو وان شاءالله اتوفق واقدر اساعدو ي رب
ان شاءالله طيب انا حأمشي الغرفه اخد معاه كلمتين واجيبو معي
لو بتضايق ممكن تمشي معاك هي صح ي سمر؟
لا احسن يطلعو من الغرفه وجوها ويجيبو يقعد حبتين هنا التخالط المتدرج كويس في حالتو
❖
كنت مقلق من فكرة انو اخلي مهند يتعامل مع زول م بعرفو فجأة كدة، خوفي عليهو كان موازي لخوفي على البت منو م بقدر اضمنو هو ممكن في لحظه ضيق او انفعال ممكن يعمل شنو؟
مهند امس جيت احضر معاك الفيلم لقيتك نايم ماسورتك عينه ودة م كان اتفاقنا ي استاذ
انت إتأخرته وانا استنيتك
دة كلام زعل؟
لا
كدة جيب التلفون دة ياخ انت م بتفتر؟
قوم تعال معي
وين؟
اطلع من الغرفه دي ساي قبل يومين م اتفقنا على كدة ي معلم؟
لا كدة احسن لي
م احسن ولا شي كدة تعال بس اسمع الكلام ياخ انا جاي بدري عشان ناخد لينا قعدة مع بعض ارح
طيب دقيقه عندي حاجه في...
خليك من التلفون ارح
خلاص انا بلحقك
بعد "10 دقايق" بالظبط ماهر جا طالع قال لينا_"جاي"
بقينا كلنا نعاين لبعض
لما اتأخر ماهر نده عليه "مهند، يا مهند"
حتى فجأة جا طالع من الغرفه، وقف لما شافنا كلنا قاعدين، ماهر قال ليه تعال تعال ي باشا
بعد وقفه طويله وتردد في خطواته حتى اتحرك وجا علينا، لما وصل ماهر قال ليهو اعرفك دي سمر صحبه شهد واهلها جيرانا في الطابق، سمر وقفت قالت ليهو اهلين كيفك ومدت ليهو يدها،
الصدمه كانت انو خته يدو في صدرو وقال ليها وعليكم السلام
عن كميه الإحراج الحست بيهو البت في اللحظه دي كلنا أُحرجنا طبعاً وبقينا نعاين لبعض، قعدت وهو قعد جمب ماهر،
ماهر بدأ يفتح مواضيع ونسه وهو ساكت مرة مرة يرد وسمر تشيل وتاخد وتدي مع ماهر وهكذا...
❖
واي ي شهد طبعاً امس على قدر م كنت خايفه على قدر م اتماسكت ولما احرجني م سلم علي كنت حبكي لأني قبل كدة حصل معي نفس الموقف بكيت لانو بايخ
اي الموقف حار والله لما يحصل قدام ناس لكن م تخافي هو خلا العنف بتاعه داك نسبه لي انو...
نسبه لي انو شنو؟
ماف شي خلاص المهم م تخافي ي ستي
لكن اقول ليك حاجه مبالغه قطعه من اخوه ماهر فوله واتقسمت النصين مع اختلاف العمر وماهر لونو اغمق شويه من دة بس وكمان مهند عندو حبه شيب في راسو دي الحجات البقدرو يفرزوهم بيها اظن غير كدة شبه خُرافي مبالغه مبالغه
ه اي بتشابهو والله
عايني انا حأجهز معاك الفطور وحأخدو ليهو تمام؟علشان بس نبدأ على طول وهو يبدأ يتعود
طيب حلو
جايبه معي دفتر علشان كل يوم اكتب ملخص يومياتي معاهو حأسميهو"فيرست بيشن"بديت اكتب من موقف امس طبعاً
ه مجنونه
المهم يلا يلا نجهز الفطور سريع علشان انا زوله عمليه وبحب اقوم بشغلي على اكمل وجه يلا
❖
احم احم هاي اعرفكم انا "سمر"بتعرفوني قبل كدة م محتاجين اعرفكم على نفسي، بس بما اني بقى عندي دور في حياة شهد وماهر يبقى لازم في بعض الحجات احكيها ليكم بلساني، مهند اول مريض يمكن اتعامل معاه بس انا من زمان بحب النوع دة من الشغل بحس فكرتو حلوة ومريحه نوعاً ما واتمنى تجربتي مع مهند تكون فريدة من نوعها واقدر اساعدو،
جهزته الفطور مع شهد ولما جات مواعيد ادويتو ..
شهد انا حأمشي
طيب بس لو عمل ليك اي شي اندهي لي طيب؟
ه ي بت ي هبله م حيحصل شي يلا
شلته الفطور ومشيت على غرفتو دقيت الباب بعد مسافه حتى فتح لي الباب هو اتفاجأ بالوش الواقف قدامو دة وانا دخلتني خوفه من الخلقه الطويله الوشها صارم ومن الضيق حواجبها داخله في بعض الواقفه قدامي دي
بلعته ريقي وقلته ليه ص صباح الخير؟!
فضل واقف وساكت
شهد عيانه حبتين وماهر اخوك في الشغل علشان كدة جهزته ليك الفطور لغايه م شهد تبقى كويسه
دخل وهو ساكت
دخلته وراه ختيت ليه الأكل على جنب وقلته ليه اتفضل،
مسك تلفونو وقعد في السرير
مشيت على طول شلته التلفون من يدو وقلته ليه من الإحترام إنو لما الزول يتكلم معانا نسمع ليه هو بيقول في شنو ونرد عليه صح ولا كلامي م غلط؟
بقى يعاين لي من سكات
اتحركته من جمبو خوفه بس ومشيت على ناحيه تربيزه الادويه حقتو وقلته ليه... ام عندنا اها "ريسيبيريدون" بتاخدو كل كم ساعه؟
اتلفته عليه وانا ماسكه الدواء في يدي على امل انو يجاوبني بس فضل ساكت قلته ليه المهم ي سيدي افطر علشان تاخد الدواء...
❖
ي ماهر تخيل مهند اتعامل مع سمر عادي وم اتعانف معاها كذا؟؟
بالله؟طيب دي حاجه كويسه
م كويسه بس كويسه شديد م بتتخيل كنت خايفه كيف خوف م طبيعي ومجهزة تلفوني جمبي قلت لو حصل كذا او كذا اتصل عليك بس الحمدلله، سمر قالت لي الهدؤ الهو فيهو دة من الدواء مضاد الاكتئاب البياخدو يلا قالت لي لو استمر في التجاوب دة العلاج م حيستصعب، واقترحت علي انها تمشي معاه المقابله عشان تتعامل مع الدكتور بشكل مباشر وتعرف التوجيهات الحيقولها ليها..
طيب تمام م عندي مشكله المقابله الجايه نمشي مع بعض،
تمام
❖
كل الاسماء الموجودة في الدفاتر دي البهمني منها ولو اسم واحد ممكن اعرفو
الساعه 12 مساء...
صحيت على صوت المنبه، نزلته من السرير وطلعته على الغرفه القافل عليها كل الأوراق الاخدتها من عمك، غلى حسب انو الورق كتير ف فكرة انو اطلع لي بي اسم مستأجر واحد بس انا بعرفو كانت صعبه شديد، وانا في موال التفتيش دة فجأة باب الغرفه فتح اتلفته لقيتها شهد
حبيبي بتعمل في شنوو؟ودة شنو الورق دة؟
ماف شي
لا في ي ماهر دي المرة التانيه اللقاك في الغرفه دي ومع الورق ده
تعالي طيب احكي ليك
الورق دة...
استمر الموال دة كتير وشهد بقت تساعدني وكل يوم بنساهر مع بعض ونحن بنقلب ونتنتج، وبعد مرور شهر ..
حبيبي؟!
اي شهد
عاين الارتكب الجريمه دة غالباٌ هو أجر شقه في العمارة بس علشان يرتكبها، يبقى هو مستأجر مؤقت واكيد لو هو مخطط وم هجوم حراميه ساي معناها هو حاسب حسابو وضابط مواعيدو مع مواعيد ابوك الله يرحمه بالضبط، المعنى هنا إنو نحن حنغض نظر عن المستأجرين القدام وحنشوف اقرب ناس أجرو في العمارة طيب؟
جيب ورقه، انا كمان كنت بفكر كدة حتى طلعته قائمة بأسماء اخر 5 مستأجرين في العمارة ودي القائمة ملصقها على ورقه في الحيطه،
ام كدة دقيقه اشوفهم، نزلته معاهم تاريخ استئجارهم؟
اي
ام طيب م عرفته اي شي عن المستأجرين ديل كلهم أُسر؟
م عارف ودي حاجه مستحيل تتعرف
❖
طيب ي دكتور ممكن تشرح لي انا ك زوله شبه عايزة اكون مرافق لمريض توحد ومعالج شخصي المفروض اعمل شنو بالذات في حاله مهتد وكدة
طيب ي بتي حاله مهند م بالخطورة الشديدة ديك واسي هو شبه في تحسن ف في علاج التوحد بروتوكولات العلاج فيها كذا نوع يعني مثلاً عندك"علاج السلوك المنطقي، عندك علاج المطق دة في حال انو المريض عندو مشاكل في النطق، عندنا العلاج الوظيفي، واهم شي تحليل السلوك التطبيقي"
كل خطوة مهمة والحاجه دي بتتمرحل نقطه نقطه و...الخ
مهند انت بتحضر شنو في اليوتيوب كل الوقت كدة؟
رفع عينو وعاين لي
م تسفهني حزينه منك على فكره
م تدخلي في حجات م بتخصك
طيب ليه م قلته لي عندك فيسبوك؟
اسفهه خلاص م تعاين لي كدة المهم عملته شاي وعملته ليك معاي معاه فول سوداني ماف اظبط من كدة
على فكرة انا اساساً م بحب اتدخل في خصوصيات غيري بس انا معتبراك فردتي علشان كدة بسألك
يعني شنو فردتك؟
يعني صحبي
لأ
طيب شكراً
❖
بعد اسبوع ..
ام ماهر كدة الدفتر دة ثواني دة مش الفيهو اسماء اخر المستأجرين؟
دة شنو الوقع دة؟؟؟
شنو؟
اها دة رقم وطني جا في نص دفاتر عمك دي بالغلط
يعني تبع المستأجرين؟
والله م عارف ي شهد م ركزته، دقيقه طيب اشوف اسمو
ام، ماهر الزول دة اسمو م غريب علي، زي الشوفتو قبل كدة
ه شوفتيهو وين؟؟
والله م غريب علي دقيقه اتذكر
دقيقه ي ماهر
قمت على حيلي ماهر عاين دهه
زي اسم واحد من الفي القائمة المعلقها انت على الحيطه دي تقريبا، ً
بالجد؟
عاين دة اسمو عثمان العِبيد جادالله
نفس الاسم الفي القائمة عاين،
معناها كان واحد ضمن المستأجرين ي شهد
طيب اذا اتفقنا انو كان واحد ضمن المستأجرين ي ماهر السبب شنو البخليه يخلي الرقم الوطني بتاعو!؟ الشي المعروف انو الزول العايز يأجر بجيب رقمو الوطني لبتاع العقار وقتي ك إثبات وبياخدو، ودة الرقم الوطني بتاعه قنعان منو يعني ولا شنو؟؟
ماهر فضل ساكت وبعاين لي
❖
ي طه، حبيبي والله مساء الخير، اي رسلته ليك الصورة في الواتسب، تمام عز اخوك عليك الله وتكون م قصرته وخدمتني، ابشر عارفك م بتقصر حبيبي والله يديك العافيه
❖
عمي سلامات ياخ
اهلاً اهلاً ي ولدي
معليش كترنا عليك الطله اعفي لينا
ي ولدي عيب حبابك الف الحوش دة ان م شالك الراس دة بشيلك
تسلم تسلم ي عمي حكيت ليك بخصوص الرقم الوطني اللقيناه مع الدفاتر الاخدناها
اي صح ي ولدي كدة وينو ان شاءالله جبتو معاك؟طبعاً ي ولدي نحن بنتعامل مع الف مؤجر والف عمارة عشان كدة الواحد زاكرتو ما على قدر كدة لكن كدة اشوفو لو جبتو
اي ياهو معي اتفضل
اخد مني الرقم الوطني وبقى يعاين فيه وانا مراغب ملامحو وتركيزي كلو معاهوومنتظرو يفتح خشمو ...
اي اي ياخ بتزكرو الزول دة جاني أجر وقال لي هو متزوج قلته ليه جيب قسيمه عشان دي قوانين ابوك الله يرحمه، بتزكر الزول دة جاب الرقم الوطني لما رفضته وقلته ليه الا بي قسيمه قال لي انا مستعجل لأنو جايب مرتي عندها سرطان حمانا الله وكان مصر ومحتاج للشقه شدييد زول مسكين كدة قال م عندهم اهل هنا جاي من البلد بتزكرو بتزكرو ياخ لأنو موقفو كان مؤثر شديد حتى واداني الرقم الوطني ك امنيه
واجرته ليه ي عمي؟
أي اجرته ليه،
وشقتو كانت واقعه وين ي عمي؟
في الطابق التاني عشان قال يشوفو ليه اقرب واحدة عشان مرتو م بتقدر تطلع السلالم وكدة
وابوي؟
ابوك مالو؟
كان في اي طابق؟؟
ابوك برضو شقتو على ما اظن كانت في نفس الطابق
طيب ي عمي الزول دة رحل يعني وجاب مرتو واثاثو وكدة؟شوفتو؟
والله ي ولدي م بتزكر لكن هو أجر وسلمتو المفتاح واي شي بس اها بعداك حصل الحصل لي ابوك ومنها وتاني العمارة اتقفلت،
❖
الو ي طه اسمعنى سيد الرقم الوطني دة بأي طريقه كانت اعرفو لي هو منو وساكن وين، عليك الله اجتهد لي في المفوضوع دة شديد شديد بأي طريقه ي طه، بأي طريقه،
❖
اي ي زياد، تمام الحمدلله، جبت الحجات القلته ليك عليهم؟
م تكتر ياخ جبتهم ولا لأ؟
خلاص تمام ايوة حأفتح العمارة ي زياد وحادخل شقه ابوي م بنتظر قانون انا ولا محتاج إذن قانون لحاجه زي دي ركوب راس ساي انا فضولي بقى اكبر ف م تناقشني ...
...