الفصل الثاني والأربعون
رجعته من خالتو نعمة وانا في حاله دهشه وحيرة وسرحان وانا بتكلم مع نفسي واقول معقوله إيليڤ كلامها صح؟معقوله أم ماهر؟¡
فجأة لقيت مهند قدامي طالع من المطبخ شايل كبايه مويه، اول مرة اشوفو حايم في البيت طبعاً
عاينته ليه مسافه وقلته ليه صباح الخير
قال لي صباح النور قام ماشي وقف قال لي سمر م جات؟!
هزيت ليه راسي بمعنى لأ
على طول مشى على غرفتو،
رجعته غرفتي لقيت ماهر لسه نايم، مشيت اشيل السماعه بتاعتي من جمبو حس بحركتي فتح عيونو واتقلب بإتجاهي وبقى يعاين لي
عايزة اقول ليه معلي...
قبل م اتم كلامي مد لي يدو، مسك يدي وقال لي تعالي، رقدني جمبو وحاوطني بيديه، اتلفته على اتجاه وشو لقيتو مغمض عيونو، بقيت اعاين ليه وهو كدة،
قلته ليه حبيبي نايم؟
قال لي وهو مغمض اصحى عشانك
فتح عيونو قال لي عايزة حاجه؟فضلته ساكته وانا بعاين ليه هزيت راسي بمعنى لأ،
قلته ليهو بس مشتاقاك شديد مشتاقه اقعد واتكلم معاك اطول فترة ممكنه وبس من غير م تجيك مكالمة او تكون متضايق ومهموم او غيرو انت فاهمني ؟!
قرب وشو علي اكتر وخت يدو في خدي وباسني وقال لي حاضر اوعدك احاول افضي نفسي على قدر م أقدر عشان اكون معاك
قلته ليهو ماهر انا م عايزاك تفضي نفسك عشاني انا عايزة النحن فيهو دة ينتهي انا بقيت خايفه وم عارفه نفسي خايفه من شنو
سكتت وبقى يعاين لي
قلته ليه بس خليك واثق انو
انا جنبك لو احتجت تتكلم او لو في شي اقدر اقدمو ليك م بتأخر ابدا، ً انت بس ابقى عافيهه عشاني
إبتسم وضماني عليه بكل قوتو وقال لي انا وسط كل التعب دة إنك تكوني هنا بس وجودك بس ي شهد اكبر داعم ومخفف للضغوطات بالنسبه لي عامله لي زي الإسبرين اتضايق والدنيا تجوط في راسي والضغوطات تهلكني تجي انتي تترمي هنا تشيلي كل الحجات دي بحضن وماف اعظم من كدة
سكتت مساااافه وقلته ليه دقيقة انا اسبرين؟يعني في الأخير بقيت حبه؟
ضحك قال لي خلاص ي هبله عايزة تتعاوري؟ تتعاوري؟
يعني قصدك انا عويرة كمان؟
طيب طيب خلينا نرجع ننوم احسن
قلته ليهو بس انا م عايزة انوم
قال لي بصوت متسائب بس انا عايز ونعسان،
قلته ليهو طيب نوم انا نازله م عايزة انوم م عايزة انوم ابيت
ضغط علي وقال لي لأ خليك انا اصلاً عايز انوم عشان انتي هنا وهنا راحتي،
قال كدة وغمض عيونو، قلته ليهو حبيبي!! ختيت يدي في لحيتو وقلته ليهو مش مفروض نخففها؟! وشعر الراس برضو شويه كدة وحتتحول عايز الناس تقول علي شنو؟ شهد م مهتمة براجلها وما مسؤله؟عايز تجيب لي الكلام ي ماهر
ضحك ضحكه خفيفه وفتح عيونو وباسني وقال لي ممكن تسكتي وتخليني انوم ي شافعه؟ولا اقول ليك؟دقيقة جراني وخت راسي في صدرو وحاوطني بي يديه وقال لي حتى لو الناس قالو عليك م مهتمة وما مسؤله بسيطه قولي ليهم ابوي عاجبو عدم اهتمامي وعدم مسؤليتي دة
ضحكككت قلته ليهو الأبو التافه رزق
قال لي قصدك انا تافه؟في واحدة بتقول على ابوها كدة؟
قعدت اضحك قلته ليهو مش انا قُلت؟يبقى في
ضحك مساااافه حتى قال لي طيب طيب نتفاهم في الموضوع دة بعدين اما اسي اسمعي الكلام و خليني اكمل نومي لو سمحتي ي بتي السمحه
❖
شهد حساسهه شديد وبكايه وعاطفيه وبتميل للتفاصيل واقل شي ممكن يأثر عليها وسُكاتها وتماسكها إن دل بدل على إنو هي بتراكم الحاجات جواها والحاجه دي حتى لو هي م حابه تبينها بتظهر في ملامحها، انا بقدر اقرا ملامحها وافهمها اكتر من كلامها، وسط الضغوطات دي كلها انا م بقدر اتخطاها وم عايز ظروف الفترة دي تأثر علي وعليها بشكل سلبي ونطلع منها وعلاقتنا مشوهه
حسيت يدي مربطه، م بقدر احكي لي ماهر لأنو حيقول علي مجنونه وصراحه انا نفسي متناقضه ما بين مُصدقه ولأ، وم عارفه اعمل شنو،
هل مفروض امشي احكي لي أم ماهر؟
ماهر جهز وقبل م يطلع دخل على مهند قعد معاهو فترة حتى جا طالع وقبل م يقفل الباب كان بتونس معاه وبضحك بصوت عالي كنت واقفه وبعاين ليهو وانا مستغربه، بعد م قفل الباب قلته ليهو دي دايمة عليكم ان شاءالله،
قال لي في تحسن ملحوظ في مهند،
قلته ليهو صح حتى انا لاحظته تخيل لقيتو دخل المطبخ وكان حايم في الهول لا وكمان سألني عن سمر اذا جات او لا
قال لي عارفه ي شهد في الإمارات لما كان متابع مع الدكتور بتاعو وكنت متابع معاه وكان ومواظب على بروتوكول العلاج نسبه شفاؤ وصلت 70%وكنا ماشين كويس شدييييد حتى إنو بقى شبه إجتماعي وبطلع براه وقدر يتجاوز حجات كتيرة بس انا للأسف انشغلته بالشغل وحياتي ونسيت فكرة انو هو محتاج لي وقفتي لغايه م يتعافى بشكل تام، خليتو وراي وأهملتو واتعمل فيه الإتعمل وخلا وضعو يتراجع بعد م كنا ماشين كويس لو م كدة اسي كان حيكون واقف معي وساندني ك اخوي الكبير في الأيام الصعبه دي
كان بتكلم بي نبرة ندم وحسرة كأنو محمل نفسو مسؤليه وضع مهند دة، قلته ليهو حبيبي كلو لي خير أكيد واهو اسي الحمدلله رجع يستجيب واكيد حيتعافى وحيبقى احسن واحسن من الأول وانتو ال 2 حستندو بعض وللزمن داك انا حأخد مكان مهند وحأحاول أسِد فراغو وابقى ليك مهند شكلاً زاتو لو عايز ضحك قال لي جد؟
قربته عليه قلته ليهو عندك شك؟
فك لي شعري ونكشو لي قال لي ودة وضعو شنوو؟
ضربتو وبقيت اقول ليهو ياخ ي ماهر ياخ جرا وبقيت جاريه وراه وانا بقول ليهو وربي ي ماهر وربي م اخليك انت قايل التسريح دة هين لمن تفك لي شعري وقت م لقيت فرصه؟قال لي هم كلهم صويفات بتلمو سريع ي زوله م تزعلي قلته ليهو دقيقه افهم انت بتطعمج في شعري؟ي دوب زعلته اكتر وبقيت جاريه وراه وكل م اقرب منو بقول لي عايني عايني انا م قاعد اتشاكل مع ناس قُصار لو سمحتي م تأخريني انا طالع لما خلاص اتغظت منو ومن كلامو قلته ليهو م تتكلم معي، م تتكلم معي يلا
لما جا طالع كنت في المطبخ جا قال لي حبيبي انا طالع يلا،
سكتت
قال لي شاهد، شهد عبدالله
لما م رديت عليه قال لي طيب يلا سلام، لما حسيتو مشى لحقتو جمب الباب قلته ليهو استنى،
وقف وهو بحك في راسو ومبتسم ابتسامه خفيفه،
قلته ليهو هاك،
قال لي دة شنوو؟
قلته ليهو شوفو
فتحو كان كتاب صغير فيه سوره البقرة كامله،
قلته ليه كل م تلقى نفسك فاضي اقرا منها كم ايه
بقى يعاين لي
قلته ليهو ويستحسن اوقات الفروض يعني كل م تجي تصلي فرض اقرا منها 50 ايه م بتاخد منك وقت خلي الكتاب معاك في جيبك والله يخليك م توقف قرايتها ولا حتى ليوم واحد الله يخليك ي ماهر
قال لي حاضر
قلته ليه طيب وبقيت واقفه بعاين ليه
قال لي طيب خير
فضلته ساكته وبعاين ليه،
قال لي تعالي مسك يدي وقربني عليه وباسني في راسي ونزل باسني في خدي وطلع...
❖
م كنت عارفه اعمل شنو بخصوص الكلام القالتو لي إيليڤ ولا عارفه أتصرف كيف وخوفي كل يوم بزيد يعني بقيت بين نارين بين اني مصدقه ولأ عدت ايام وانا بفكر في الموضوع دة والموضوع دة بقى مُرهقني ومؤرقني جدا، اخدتهً بعضي ومشيت لي ماما...
ووووووبعلي لكن دة كلام شنو البتقولي فيهو دة ي بت انتي جااااادة لا حول ولا قوة الا بالله!
قلته ليها زي م بقول ليك كدة ي ماما وانا م عارفه اعمل شنو والكلام دة صح ولا دة كلام ساي لأني الكلام دة م خاشي عقلي وم قادرة اشيلو من راسي
قالت لي لا الكلام دة في وبحصل المرة القدرت تقتل روح بني أدم م بغلبها شي تاني حسبي الله ونعم الوكيل فيها طبعاً النوع دة من السحر اثرو م بكون للزول المعمول ليهو السحر بس لالا حتى الحواليها يعني ممكن يمشي لي اولادها زاتهم ويضرهم هم زاتهم
بقيت اعاين ليها وقلبي بقى مقطوع على ماهر في اللحظه دي
قلته ليها اها ي امي انا في الحاله دي اعمل شنووو؟
قالت لي والله ي بتي لو سكتي بالحاجه دي عذاب ضمير ساي تموتي عشان كدة احسن تكلميها عشان تلحق نفسها وأولادها وتشوف لنفسها طريقه
قلته ليها امي انا لو قادرة اكلمها م كان جيت كلمتك
قالت لي انتي خايفه من شنووو؟السحر دة في زمن الرسول في والرسول اتسحر خليك مننا نحن
بقيت ساكته بعاين ليها
قالت لي كلميها وبرئي زمتك لأنو بت المرة دي جات كلمتك عشان تعملي الحاجه دي م عشان تسكتي بيها، وربنا ينولك ثواب الحاجه دي لأنو المرة دي حتكون اتعذبت عذاب الله اكبر في الدنيا دي بسبب السحر دة
قلته ليها ي امي لكن ماهر...
قاطعتني وقالت لي مالك ومال ماهر؟م عندك شغله بيهو دي حاجه بينك وبين امو هو لو كلمتي م بصدق لكن امي عارفه وضعها والمرت بيهو عشان كدة حتصدق
اعتمدته كلام امي وكلامها صح يعني هي في كل الأحوال لازم تعرف حتى لو م صدقت انا اكون انا برئتهه زمتي من الحاجه دي.
❖
سلام عليكم
شهدووووووووووون ازيك زارتنا البركه والله اهلاً اهلاً كيف عامله وماهر ومهند كيفهم؟
تمام والله ي خالتو مشتهى انتي كيفك والأولاد كيفهم؟
قالت لي الحمدلله والله في نعمة والله الا الشغب الكتير كل يوم ضاربين لي يبكو ي ماما تعالي ي ماما تعالي قلته ليهم م جايه ارتحته منكم ومن جوطتكم
ضحكته قلته ليها حرام عليك
قالت لي ماهر ومهند كيفهم عليك الله؟
قلته ليها والله الحمدلله ماشي الحال
سكتت مسافه حتى قالت لي قلوبنا اتقطعت بالعرفناهو في الفترة الأخيرة دي غايتو م قادرين نقول غير حسبي الله ونعم الوكيل ي بتي اذا في ناس في الدنيا دي كدة م علينا غير نتحسبن وصحي زي م بقولو الدنيا انتهت دامهم الأخوان بهونو على بعض كدة
قلته ليها والله حسبي الله ي خالتو
قالت لي جلسه المحكمة الأولى قربت صح؟
قلته ليها اي يوم 15 في الشهر
قالت لي م بعيدة ربنا يهون ويجيب حقهم ان شاءالله والله الأولاد ديل اتعذبو لو في نصيب من العذاب اخدوهو في الدنيا دي ب ونحن م قدرنا نكون ليهم كفايه الله يغفر لينا من حقهم دمعتها جات جاريه
سكتت مساافه حتى قلته ليها خالتو عبير موجودة؟
قالت لي عندها مُقابله مع الدكتور طلعت قبل شويه لكن م بتتأخر لكن دقيقة اتصل ليك عليها اشوفها وين
قلته ليها لأ لأ م تتصلي عليها خليها على راحتها يمكن تستعجل لو كلمتيها ان شاءالله هي بقت احسن؟
قالت لي والله ي بتي يعني م شديد بتقول بقت احسن لكن م ظاهر
قلته ليها لا ياخي عندها شنو هي تاني؟
قالت لي والله ي بتي م معروف زاتو كل دكتور بقى يقول ليهو مرض براهو الفترة الأخيرة دي ماف شي ثابت حيرونا زاتو والله بس الحمدلله ربنا يديها العافيه
انا اصلاً م كنت مؤهله احكي لي خالتو عبير بصورة مباشرة وبعد كلام خالتو مشتهى دة اُحبطته جداً
سكتت وانا بعاين لضفوري شويه وارجع اعاين ليها وانزل عيوني، ماف موضوع اتكلم معاها فيهو وانا اصلاً جايه وبرمجه على موضوع محدد، قلته خلاص افتح الموضوع مع خالتو مشتهى بس وهي اكيد حتعرف توصلو ليها بطريقتها، عانيت وانا م قادرة انطق حرف وكل م اقول خباص اتكلم لساني بتقل بعد معافرة قلته ليها خالتو ؟!
قالت لي ايوة
سكتت
قالت لي في شنو ي بتي قولي،
قلته ليها اممممم عايزة احكي ليك عن موضوع كدة
قالت لي احكي طيب خير ان شاءالله؟؟
لما شافتني مترددة قالت لي اعتبريني اختك وصحبتك واحكي م تترددي
قلته ليها ي خالتو الموضوع بيتعلق بعمتو عبير انا قبل كم يوم جاتني إيليڤ اخت ماهر بت ابوهو و...الخ
انا بقيت بحكي وهي دموعها جاريه وتتحسبن وخاته يدها في راسها وتستغفر وتقول لا حول ولا قوة الا بالله حسبي الله من الحاصل ليك ي عبير وانا تلقائياً لقيت نفسي ببكي، بعد خلصته قالت لي كل القولتيهو دة حاصل ليها بالحرف وانا م بستبعد لأنو ي شهد لو في زول قروشو بتكمل عبير دي م خلت شي م عملتو عشان تتعالج دكاترة مشت، شيوخ مشت وعملت الرقيه الشرعيه دي عند اكبر المشايخ وبرضو الحال في حالو
كانت بتبكي وبتحكي لي مأساة عمتو عبير بي وجعه كأنها اختها وتتحسبن وتقول منعول ابو الرجال البوصلونا للمرحله دي، مرحله إننا ناذي ناس م عندها ذنب او يد في حاجه ليييه كدة بس ليه؟
قلته ليها المهم ي خالتو انا بس جيت عشان ابريء زمتي من الإتقال لي م كنت عارفه اواجه خالتو عبير كيف او احكي ليها والحمدلله إني لاقيتك انتي
رجعته البيت وانا حاسه إني ارضيت ضميري وشلته حمل تقيل من كتفي رغم اني م عارفه هم حيعملو شنو وحيتصرفو كيف بس على الأقل عرفو وبقو على نور
❖
شهد وهي بتبرئ زمتها رمت على عاتقي حمل تقيل في رقبتي، على قدر م الكلام القالتو لي مهم ومفروض اني اصارح عبير بالحاجه دي بس حبيت اتريس شويه عديت كم يوم وانا م بين اكلمها او لا، لقيت انو بدل م اكلمها ارجع لشهد..
الو شهد؟
اهلين
معاك خالتك مُشتهى
اهلين ي خالتو مُشتهى كيفك؟
تمام الحمدلله انتو كيفكم؟ماهر ومهند؟
قلته ليها تمام الحمدلله،
قالت لي اسمعيني بخصوص الموضوع دة انا لغايه اللحظه م حكيت لعبير لكن عندي طريقه تانيه دايراك تساعديني فيها
قلته ليها اها؟
قالت لي حسب م عرفته انو السحر دة م بقدر يفكو الا الزول العمل السحر دة زاتو عشان دي امور خاصه بيهو اها شوفي إيليڤ اتكلمي معاها خليها تديك اي معلومه عن الراجل دة مكانو ووين ساكن ويصلوهو كيف وبعدها خلي الموضوع دة علي لأنو اسي عبير قول قالو دة م بتصدقو وفترت من كتر م جرت للشيوخ وهي كايسه للعلاج انا قلته اعرف مكان الزول دة واسوقها بس من غير م احكي ليها شي لمن نصل هناك انا بعرف اتصرف كيف
قلته ليها امممم طيب تمام
قالت لي اتكلمي معاها طوالي عليك الله وشوفي هي بتقول ليك شنو وارجعي لي
قلته ليها تمام ان شاءالله
تصرفها كان فيهو شبه نوع من الحِكمة، بالفعل اتصلته على إيليڤ..
والله ي شهد انا م عارفه مكانو بالضبط بس حسب معرفتي انو هو في ... لأنو سمعته خالتي قالت مسافرة المكلن دة وامي كانت بتسافر المكان دة كتير
قلته ليها طيب ي إيليڤ م بتعرفي اسمو او طريقه توصلني بيهو ان شاءالله رقم تلفون؟
قالت لي م عارفه والله ي شهد م عارفه
سكتت وهي سكتت قلته ليها طيب تمام شكراً ي إيليڤ،
❖
خالد!؟
مالك؟!
خالتي بتصل عليها م بترد علي مالها؟!
تسأليني انا قاعد معاها؟
خالد خلاص م تتقاطم بالله رد عادي
بعد دقيقتين
خالد انت الشيخ المشت ليهو خالتي دة اسمو منو وساكن وين؟
م عارف
كيف م عارف،
عاين م تتكلم معي بأطراف مناخرك كدة م كفايه الضيق الفينا؟
انتي عايزاه لشنوو؟م تمعطيني بالله
بري م عايزاه لي شي عايزة اعرف اسمو بس فضول ساي كدة ومتأكدة حيكون اسمو غريب زي خالد مثلاً شيخ خالد ياااا هاك ظبط لي الزول دة وبديك مليار
ولا مثلاً هاك جيب لي راس البت دي وبديك الدايرو
شيخ خالد تمام وماف كلام عاد نوووورا ارح ارح ارح
ضحك قال لي ياخ قِدي في شيخ اسمو خالد؟
قلته ليهو اها اسمو منو؟
قال لي انتي فايقه
قلته ليهو لا بالجد عندي فضول اعرف بس ساي م يكون اسمو خالد جدجد وانت متحسس كُرررررررررررررر علي وبقيت اضحك واطعمج فيهو وبنادي على راكان وازاد علشان نشغلها ليه مع بعض لغايه م زهج وقال لي خالد شنو خلعه تجيب اجلك هو زاتو م عندو اسم لكن لقبو ... ... وساكن في... بلد الفُقرة والسحرة الجد ديل لو دايرة يحولوك صرصور ويعلقوك في الهواء اسبوع بحولوك وبعلقوك حسب كلام امك الما منطقي طبعاً المهم بالله عليك مش خلاص عرفتي قِدي من وشي انا م ناقصك ولا فاضي لفضولك ونِقتك
ه طيب
حبيت اساعد شهد لما سألتني واكيد هي م سألتني من فراغ ف لو معرفتهم بمكان الزول دة ممكن تساعدهم في اي حاجه عايزين يصلوها يبقى لييه لأ؟علشان كدة اتحايلته على خالد لغايه م قال لي العايزاه لأنو خالد ود امو وامي صريحه ومعاهو اكتر من انها صريحه معي وبتحبو شديد عشان بسمع كلامها وومشياه على كيفها وم بتدس منو شي عكسي انا م كنت حاقدر اسحب المعلومه دي غير من خالد، حتى خالتي م كانت حتوريني بتزكر لما يكونو بتكلمو في مواضيع زي دي واجي مارة بجمبهم بسكتو كل الحجات العرفتها دي انا عرفتها بالصدفه وسمعته امي بتتكلم بيها بلسانها بس اكيد م لي انا وامي م بتعرف حاجه اسمها "إذا بليتم فأستترو"نهائي
رجعته غرفتي وشلته التلفون وبعدين..
الووووو شهد؟؟كيفك؟الحمدلله عايني انا سألته خالد وقال...
ٌ...
عدت الأيام وبقى كل زول مشغول بحاجه، انا نسبه لي انو عارفه انو ماهر وضعو كعب بديت اشتغل شغل اضافي بي لابتوبي وبشتغل بي لابتوب ماهر يعني بخلص اشغال بي لابتوبين والحاجه دي خلتني احضر كورسات اونلاين كتيرة واستفيد علشان اكيد انا م بي رهابه ماهر في الشغل بس من خلال اليوتيوب وكدة اجتهدته، وماهر حتى بقى لما يجي يفتح الإيميل بلقاني وافقته على معظم الشغل الجايهو وخلصتو، م كان بحاول يبين انو م معاه قروش لأنو العربيه واقغه بس كان بساهر في شغل اللابتوب،
زياد ومنذر حركو بلاغات تانيه ضد عزو وعم ماهر بتهمة السرقة والإختلاس في الشركه حسب كلام لجين انهم مسكو عليهم بلاوي عاملنها في الشرقه وم حسبو حساب الثغرات الخلوها وراهم ماهر م كان بهتم بأمر الشركه حتى لما زياد اتكلم معاه بخصوص الموضوع دة قال ليهو انا الشركه دي رفعته يدي منها وتاني م راجع ليها نهائي ودة اخر كلام
يوم ورا يوم لغايه م جات مواعيد اول جلسه في المحكمه، كلنا كنا متوترين بطريقه م طبيعيه، ماهر م نام الليل كلو كان بصلي وبقرأ قرءان احساس الزول المهزوم ومظلوم وحاسي انو حتى بعد م وصل لي دة كلو
❖
طه صحبي دايماً بقول لي خلي عندك ثقه في القانون انت على حق، ايوة انا على حق وطول عمري كنت على حق بس المرة بالأنا مريت بيهو حيكون متوقع اي شي في اي لحظه ومن اي زول حتى لو كانت جه قانونيه
مواعيد المحكمة كانت الساعه 9، انا من 7 كنت هناك وم كنت براي لقيت قدامي منذر وزياد وشهد،
ولما جا زمن المحكمة عيني وقعت على امي وعمي ومرتو..
❖
ماهر اول م شاف امو وعمو الزيني وعمتو مشتهى جاين بإتجاهنا دخل يدو في جيوبو وطلع تلفونو واتحرك من جمبنا، لما عمل الحركه دي ملامح امو وعمو كانت حزينه وفيها وجعه بتتكلم، سلمو علينا وقالو لينا ندخل ولا لسه؟
زياد قال ليهم شويه كدة
جا طه وبقى واقف مع ماهر وماسكو من كتفو وبتكلم معاه في اللحظه دي تركيزي بقى على ماهر م عارفه سرحته فيه ليه كان حالق حلاقه شبه نمرة واحد شايل شعرو كلو ومخفف لحيتو ومدخل يديه في جيبو ومكفكف يدين القميص وماخد وضع الجديه ولابس نظارة سوداء بعد سرحه طويله طلعته تلفونو واخدته ليه صورة براحه
عدت الدقايق ونحن واقفين لغايه م نبهونا بي إنو الجلسه بدت ودخلنا المحكمة
❖
في المحكمة
القاضي بدأ يتكلم، بدو يعرفو عن نفسهم المتهم والجاني ورجعو لتاريخ القضيه والقاضي بقى يسأل ليه القضيه اتقفلت ورجعت اتفتحت و...الخ
ماهر قال ليهو م كمت في العمر البخليني اطالب بي انو القضيه تستمر والمتهمين يتحاكمو وكدة وحتى لو كنت طالبته واتكلمته كلمتي م كانت حتكون مسموعه ي مولانا وعاين لي عمو الزيني وامو..
القاضي وقال ليهو يعني كنت عارف المتهمين؟
ماهر قال ليهو لا بس اسي عارف
القاضي عاين بإلإتجاه الخاتين فيهو عم ماهر وعمتو واخوانها
فجأة عمو بقى يكورك وقال ليهو كذاب كذاب
القاضي ضرب الدرج وقال هدؤ ولا كلمة م سألتك انا اي مداخله منك تانيه حترجع السجن
بعدها صلح نظارتو وعاين لي ماهر وقال ليهو كمل ي إبني احكي لينا تفاصيل الواقعه دي
ماهر قال ليهو في مارس سنه... ابوي جا من السفر وحسب م انو زول عندو محلات إسبيرات كان بجرد وبياخد القروش يختها في البنك حسابو في البنك بإسم... رقم الحساب ...
ابوي الله يرحمه جرد بالضبط يوم... وعلى حسب م انو انا بساعدو في الحسابات ...
القاضي قاطعو وقال ليهو بتساعدو في الحسابات وانت صغير كدة؟
ماهر قال ليهو ايوة هو معودني على كدة لأني كنت مستواي كويس في الرياضيات
قال ليهو تمام كمل
ماهر كمل ب"اتصل علي الساعه 12:30 صباحاً وقال لي انو...الخ
الكلام دة في نفس اليوم الإتقتل فيه
وانا عشان كان عندي مباراة قلته ليهو...
ماهر لما جا يحكي النقطه بتاعه انو كان مفروض يمشي لي ابوه كان بحكي وصوتو مبحوح وفي تنهيدة كانت بتطلع من صدرو وبقى م قادر يطلع الكلام وسكتت
القاعه كلها بقت تبكي، انا بقيت اقول ليه ماهر كفى طه خليهم يوقفوه م يحكي...
القاضي قاطعو قال ليه انت كويس ي ابني؟اقعد ارتاح لو م قادر تتكلم
ماهر قال ليهو انا تمام ي مولانا
القاضي قال ليهو كمل طيب ي ابني
كمل كلامو ب صباح يوم القتل عمي القاعد بين الزنازين دة قال لي انو عندو نادي عايز يسجل فيه وقال...الخ
عمو قال ليهو ي زول انت ولد مجنون ساي وداير تشربكني في قصه جايبها من راسك، جايبها من راسك ي كلب
القاضي قال ليهو بي صوت حاد هدؤ ودة يعتبر انذار بالنسبه ليك
كمل ي ابني
ماهر كمل كلامو لغااااايه م وصل للأخير وكيف نحن وصلنا للحقايق دي كلها والشهود و...الخ
القاضي سكت وهو بعاين لي ماهر بعدها قال ليه اتفضل اقعد
بعدها جا راجع لي المتهمين ال 4 وسالهم عن القضيه الموجه ضدكم
عمة ماهر: وقفت بكل ثقه وقالت ليهو انا بريئه سعادتك وانا اصلاً التاريخ البقول عليهو دة م شوفته فيهو الخرطوم دي بعيني
قال ليها كنتِ وين؟
قالت ليهو في بورتسودان
قال ليها يعني انتي بتنفي التهمة الموجه ليك؟
قالت ليهو ايوة بنفيها وبطالب برد شرف وتعويض
القاضي قال ليها كدة اطلعي منها اول بعدين طالبي برد شرف
معتصم... الزيني اتوجهت ضدك تهمة...
قبل م القاضي يتم كلامو وقف وقال ليهو انا بريء سعادتك الولد دة انا عمو قبل م ابقى راجل امو، انا لما اخوي اتقتل قدمته مصلحه اولاد اخوي فوق مصلحتي وعقلته امهم عشان اربيهم وم احسسهم بي نقص اخوي خصوصاً انو هم عندهم شويه مشاكل كدة نفسيه اخوهو الكبير واصل لدرجه انو م بطلعوه من البيت قلت اخفف عليهم عشان امهم براها م بتقدر
ماهر كان بعاين ليه بإنكسار وإبتسامة استحقار كدة
كمل ب اها ي مولانا والله وقفته فيهم وقفه وكملته فيهم دم لحمي دة وقدمتهم على اولادي حتى، الزول دة بقى يكرهني ومقابلني ساي مرة يتهمني بي اني سرقته حق ابوه ومرة يتهمني بي شنو اسأل امو ياها قاعدة قدامك والله قبل فترة اتهجم علي في البيت قدامها وبسببو سوقته اولادي وسفرتهم الإمارات من خوفي عليهم منو لانو انسان م طبيعي بتجيهو نوبات كدة وقبل فترة كان في التجاني الماحي وعندو شهادة منهم اسأل كل الموجودين ديل اصحابو ومرتو وامو والزيني اخوي الكبير دة قول ليهم الزول دة عندو شهادة من التجاني الماحي ولا لأ؟كلهم عارفين انو عندو خلل وما تمام
القاضي عاين بإتجاهنا وكانو بسألنا بعيونو، كلهم سكتو
رجع كمل كلامو وقال شايف ي سعادتك؟كلهم سكتو عشان عارفين كلامي صح وعارفنو مجنون
انا اُستفزيت طبعاً على طول وقفته قلته ليهو لو سمحته لحظه ي مولانا
كلهم سكتو وبقو يعاينو لي،
القاضي قال لي انتِ منو؟
قلته ليهو انا زوجه ماهر الزيني العمو بقول عليهو مجنون دة وعايزة ارد على سؤالو الانت م قادر تسألو لينا بصورة مباشرة
قال لي اتفضلي..
قلته ليهو ماهر م مجنون ابداً ولا متشخص بي انو مجنون ولا حتى في اوراق ثبوتيه بتثبت الكلام دة، ماهر كان مريض بمرض نادر جداً اسمو "ثنائي القطبيه"وهو نوع من انواع الاكتئاب بتحصل لي اي زول لاقى معاناة في حياة وبحصل نتيجه صدمات اتلقاها او غيرو، ودة ابداً م مصنف ك نوع من انواع الجنون، من متين مرضى الإكتئاب كانو بيتصنفو مجانين؟انا بكتئب وانت ي مولانا بتكتئب واي بني ادم في الدنيا دي في فترة ما مُعرض لي انو يتصاب بالإكتئاب هل كل زول مر بمرحله اكتئاب حنصنفو مجنون؟هل في مجنون بقدر يتحمل مسؤليه 8 اخوان؟
في مجنون بقدر يدير شركه بحالها رغم انو م دارس المجال الفاتح بيه الشركه؟
النقطه الحابه اوضحها رداً على كلام المتهم معتصم انو ماهر ابداً م كان مجنون وبالنسبه لكلامك عن التجاني الماحي ف هو اخد نفسو بنفسو ومشى ليهم وقال ليهم عالجوني من الاكتئاب لو كان عندو عم بحتويهو زي م انت بتقول م كان خلاهو يصل للمرحله دي ابداً م كان حيصل لمرحبه انو يستنجد بالمستشفيات علشان يعالجوه في الحقيقة انت م كنت عارف عنو حاجه اساساً م عارف وصل لأي مرحله لانو انت اساساً الفترة ديك م كنت هنا كان مرافقو صحبو زياد اللي هو قاعد هنا معانا، والشهادة الطلعت ليه من مستشفى التجاني الماحي هو انو مريض اكتئاب والمحكمه في يدها انها تطالب ادارة المستشفى بتقرير كامل عن وضع ماهر النفسي وشهادة بكدة
القاضي سكتت وهو ماسك قلمو ومتمحن وهو بعاين لي
قلته ليهو اسفه ي مولانا على المقاطعه بس كان لازم ارد على الكلام دة عشان تكون في الصورة الصح لأنو نحن في بلد م فيها ثقافه زياة الطبيب النفسي وم عندنا ثقافه المرض المرض النفسي وعندنا اي زول زار طبيب نفسي معناها مجنون للأسف
قال لي اتفضلي
قعدته وانا جسمي برجف من الزعل ودموعي جات جاريه
القاضي قال ليهو عندك باقي كلام عايز تقولو؟
قال ليهو انا بريء من التهمة الموجه لي بقتل اخي ماف زول بقتل اخوهو ي مولانا حصل سمعته بزول قتل اخوهو ي مولانا؟
القاضي قال ليهو بنبرة استهتار حصلت منذ الازل قابيل قتل اخوه هابيل
الناس ضحكت
عم ماهر قال ليهو المهم انا بنفي التُهم الموجه لي ي مولانا
القاضي جا للمتهم التالت قال نور الدين...
قال ليهو نعم
قال ليهو اتفضل
نور الدين برضو وقف وقفه كلها ثقه وقال: انا بريء من كل التهم الاتوجهت لي دي وبطالب بالتعويض الكامل لأي خسارة خسرتها انا فقدته وظيفتي في الممكلكه العربيه السعوده واترحلت من هناك لي هنا بواسطه السلطات واتسجنت ظلم بطالب بتعويض كامل واتمنى القانون ياخد مجراه بحق وحقيقه عشان الناس البتلقي تهم باطله من غير حق على الناس تكون عظه وعبرة لغيرها وحسبي الله ونعم الوكيل
القاضي قال المتهم الرابع والأخير عبدالعزيز ال...
قال ليهو نعم
قال ليهو رايك شنو في التهمة الموجه ليك
سكتت
القاضي رجع سالو
قال ليهو بصوت متردد بريء وبنفي التهمة
بعدها قام محامي تابع لي أم إيليڤ وبقى يتكلم...اخر كلام ليه قال للقاضي
مجموعه شباب طايشين لقو نفسهم فاضين قعدو وحللو واستنتجو على هواهم اعذرهم ي مولانا دة جيل "المحقق كونان "ف لازم يكونو على الشاكله دي في المحاكم ماف شي منطقي كلو عبارة عن استنتاجات خياليه وربط لبعض احداث الواقع بالخيال وضحك ضحكه استهتار
القاضي أجل الجلسه ربع ساعه..
❖
لحظه الربع ساعه دي عدت كأنها 15 سنه، أحبطته جدا، للحظهً حسيت انو موقفنا ضعيف شديد وحيطلعوهم لأنو كلام المحامي بتاعهم كان قوي شديد وقوى موقفهم، كنت واقف بي حيل مهدود ووش يائس لما عيني وقعت على الناس وهي مركزه معي طلعته برة المحكمه وبقيت ماشي وجاي وانا بعاين للأرض، فجأة حسيت بي يد في كتفي اتلفته لقيتو طه قال لي م تتوتر، قلته ليهو عندي احساس انهم حيطلعوهم موقفنا ضعيف وكلامنا عبارة استنتاجات زي م قال محاميهم
طه قال لي كل لي اتفاءل خير كل "متوقع ات"وحتى لو طلعوهم اليوم احلف ليك انو حرجعهم قضيتك قضيتي وانت اخوي وانا زول قانون وعارف انك على حق وماف حاجه فوق القانون ي ماهر
الجلسه بدت رجعنا دخلنا المحكمة،
القاضي كان ساكت وبعاين لي ورقو وخاتي نظارتو في صلعتو،
ماف اصعب واطول من اللحظه دي اعصابي اتشنجنت وحاسي الدم اتصلب في جسمي وانا بعاين للقاضي، كنت حاسي انو لو طلعوهم حاكون رجعته لنقطه الصفر من اول وجديد، وفي لحظه عدم تركيز القاضي رفع راسو وقال:
بناءً عن المعطيات والأدله الغير واضحه قررت المحكمه التحفظ على المتهمين ال 4 وعليه ستنعقد جلسه اخرى بتاريخ 21 من الشهر القادم للنظر في القضيه رفعت الجلسه.
في اللحظه دي القاعه اتملت صراخ وبكى ماهر وقف وبقى متصمغ وبعاين ليهم م مستوعب انو القاضي قرر يتحفظ عليهم، واخت مرت ابو ماهر بقت تشتم في ماهر وتنبذ فيهو وتتحسبن عليهو، طلعنا من المحكمه حرفياً ماهر سمع اسوأ الألفاظ الإتقالت ليه برة المحكمه واللفاظ كلها كعبه قدام الناس، ماهر كان واقف وبعاين ليها وهي بتتلفظ، والغريبه خالد كان واقف وبتلفظ معاها،
خالد كان بقول ليه ي مريض، امشي اتعالج ي مريض ي عيان، اصبر بس امي دي بكرة بطلعها لكن الانت بتعمل فيهو دة ابقى قدرو، ي مريض ي مجنون،
وخالتو كانت لسه مكمله في اللفاظها وبتشتم في ماهر،
انا لما شفتها متماديه زعلته جداً في لحظه ما لمن بقيت برجف وبإنفعال
قلته ليها اسي في زمتك انتي اللفاظك.دي اللفاظ بنات نااس؟شايفه انك كدة بتجيبي حق اختك بالطريقه دي؟خليك من اختك الجوة دي اللفاظك دي اسي ممكن تقفلك انتي وتدفعك دم قلبك، م خجلانه من نفسك وانتي بتتلفظي قدام ود اختك كدة خليك من كل الحواليك ديل اخجلي لي ود اختك البتتقاوي بيهو دة شويه، واتلفته على خالد وقلته ليه وانت ي الشافع اسي دي رجالتك مع الرجال؟
ماهر جراني وقال لي بصوت حاد شهد م تتكلمي ابداً م اسمعك تفتحي خشمك تاني فهمتي؟ يلا تعالي
قلته ليه ماهر انت ليه بتسكت ليهم؟ليه بتسكت على الإساءة وم بترد عليهم؟المفروض زي ديل تقفلهم وتتخذ ضدهم اجراءات بدل م تقيف وتعاين ليهم"كنت بتكلم ودموعي جاريه"
قال لي البعملو فيه دة اسمو فرفرة ذبيح ي شهد هم مصدومين ودي ردة فعل طبيعيه، لو كانو صح م كنتي حتلقي منهم ردة الفعل دي فهمتي؟قولي م سكته ورديت بالإساءة بالإساءة اها بعدين الحيحصل شنو حأكون غيرته حاجه؟لأ طبعاً هم كدة ودة طبعهم وأصلهم البمثلهم هل انا مفروض ابقى زيهم؟
وصلنا البيت وانا متضايقه ودمي فاير وزعلانه لمن مصدعه دخلته الغرفه على طول بقيت افك في طرحتي وكان في دبوسه معلقه في الطرحه وم راضيه تتفك،
ماهر جا داخل وراي لما شافني بطلع فيها بعصبيه جا مسكني وطلعها مني وشال الطرحه رماها،
عايزة اتحرك من جمبو مسكني وانا دموعي في طرف عيني جات جاريه،
قال لي شافعتي وضحك
عايزة اتفك منو تاني رجع جراني وقربني عليه ومسح لي دموعي قال لي عايني خليك منهم انتي شايفاني شنو؟
سكتت
قال لي قولي لي انتي شايفاني شنووو؟
قلته ليهو شايفاك ماهر، ماهر الزيني وبس لا اكتر ولا اقل ليه هم يتكلمو عنك كدة؟ليه يقولو عليك كدة بأي حق؟وليه انت بتسكت ليهم وانت م كدة؟
قال لي عايني قلتيها بعضمة لسانك"انت ما كدة" انا بالنسبه لي هم م مهمين يقولو العايزين يقولوه هو في الأخير "قول قالوه" كفايه علي انتي شايفاني شنو وبعدين هل هم صح لمجرد انهم قالو انا كدة؟هم عارفين انو م عندهم شي يعايروني بيه ف بقو يعايروني بإني مجنون وسبحان الله من جهلهم شايفين الجنون حاجه بعايرو بيها رغم انو مرض زيو زي اي مرض، الناس دي فوق م انهم قتله وكمان جهله ي شهد علشان كدة لا مؤاخذين م تركزي معاهم واكرميني بي إنك تتجاوزيهم اتفقنا حبيبي؟
سكتت وانا دموعي لسه جاريه
ضماني عليه وقال لي انا عايز شهد الوقفت اليوم قدام القاضي لأول مرة ونفت حاجه اتقالت عني هي م رضتها، انتي الوتد بتاعي ي شهد م تتهزي عشان م اقع، لو في حاجه بتقدري تقدميها لي أكرميني بثباتك، محتاج عنادك اكتر من كل الأوقات اتفقنا حبيبي؟
حضنتو وختيت راسي في صدرو ولفيت يدي حوليهو زي وبقيت ببكي بحرقه زي الطفله بعد مسافه قلته ليهو ماهر انا بحبك شديد م بحب زول يغلط عليك او يقول في حقك شي م صح او م حلو م بحب
رفع لي راسي ومسح لي دموعي وقال لي م تركزي واتجاوزي عشاني ممكن؟باسني في راسي وفي خدودي ال 2 وقال لي ممكن؟
قلته ليه حاضر طيب
بعدها ضحك وقال لي مرتي الرداحه ام لسان اسي لو خليتك ليها كنتي عملتي فيها شنو بلسانك دة
ضحكته ضحكه خفيفه وقلته ليه غياظ دة رجع باسني وقال لي طيب انا حأطلع على مهند
قلته ليه هي انت نسيت مهند مع سمر في المكتبه
قال لي اخخخخ نسيت طيب انا طالع على طه تمام؟
قلته ليه في شنوو تاني؟
قال لي شويه حجات كدة بس م بتأخر قلته ليه تمام خلي بالك نفسك طيب حبيبي
قال لي حاضر وانتي كمان
عدت الأيام واتوالت الجلسات، – وبإعتبار انها جريمة قتل مطوله اكيد حتاخد زمن ويمكن طويل كمان
ماهر باع عربيتو واستثمر قروشها وأجر واحد من الدكاكين التحت العمارة مباشرة وفتحو محل اسبيرات، علشان كنا محتاجين نوكل محامي وطبعاً المحامي بيطلب شي وشويات نحن م قدرها
دة غير انو وضعنا شويه بقى صعب، وماهر الشغل م مشى معاه عديل يوم في ويوم ماف حالو حال الزول الفتح.جديد ي دوب ماف زول بركز معاه شديد
وانا كنت بحاول على قدر م اقدر اني اساعده، كنت بشتغل شغلي البجيني في اللابتوب حقي وبشتغل شغلو البجيهو في لابتوبو، وبقيت اسوق للمزرعه على قدر م اقدر علشان تتأجر وبخلي زياد ومنذر يمشو يعملو لي فيها جلسات تصوير حتى لجين م قصرت بس طبعاً معروف شغل المزارع دة بكون بالمواسم اغلب الاحيان فعلشان كدة إيجاراتها م كانت على قدر كدة، وماهر احياناً هو بجي بساهر وبشيل الليل في اللابتوب وبشتغل شغل إضافي على قدر م يقدر، الشغل في البدايه من شدة م كان كعب معاه لدرجه انو مرة شال حق إيجار شهرين للمحل من شغل اللابتوب رغم انو كان دافع مقدم، وباع تلفونو وكذب علي قال لي اتسرق رغم اني عارفه انو بكذب بس مشيتو علشان لو ناقشتو حيتحسس وانا م عايزة كدة، م عايزة اشوفو مكسور حتى قدامي ابداً
انا زعلانه فعلاً بس زعلانه عليه ومن المعاناة البعانيها والحمول الشايلها على ضهرو والهموم الما بتخلص ورغم كل دة متماسك وبقاوم، يعني انا قدرته اقيف مع حسام في اسوأ الظروف واتحمله رغم السؤ الكان عليهو هو وم كنت بحبو بس كنت سانداه، طيب ليه حاسه اني م قدمته شي لي ماهر وحاسه بنفسي مربطه وم قادرة اقدم ليهو شي ابداً رغم اجتهادي في اني اثبت العكس
وسبحان الله م وقف المصروف من اخوانو ابداً بس عملنا ميزانيه جديدة وقللنا القروش البنوزعها عليهم لأنو الوضع اختلف، ماهر كان حتى خالد برسل ليهو مصروفو في حسابو وم موقفو منو ابدا، _مرةً قلته ليه بنرفزة وزعل انت بتصرف عليه ليه؟مش عامل نفسو راجل؟خليه يصرف على نفسو ويشتغل م تبقى عليه رجاله خشم ساي الخايب ود امو دة كمان
عاين لي بضيق وهو ساكت م رد علي ابداً
م حسيت بنفسي وانا بقول ليه في الكلام دة والله وهو كان تلقائي في لحظه ضيق بس، م مفروض اتدخل في حاجه زي دي ابداً لأنو دي حاجه خاصه بينو وبين اخوه، بعد فترة اعتذرته ليه عن الحركه دي
مهند بقى في تحسن ملحوظ ومعظم وقتو بقى ينزل يقعد مع ماهر تحت وبمسك بيه زمن وبقى يطلع يقعد براه احياناً واحياناً بطلع مع سمر واحياناً بمشي البقاله الجمبنا براه يجيب لنفسو رصيد او كذا وشويه شويه بقى يقعد معانا لما نجي نشرب نشرب شاي لبن لأنو هو بحبو، واهو الزمن عدة، والمحكمه والجلسات كانت لسه شغاله ومافيها شي ببشر بالخير وطبعاً المتهمين كانو عاملين ليهم 4 محامين كل تركيزهم كان على انهم يثبتو انو ماهر مُدعي مريض وماف صحه لي كلامو البقول فيهو دة وكل الحجات دي عارة عن هلاويس م واقعيه، الناس ديل م خلو شي م عملوه حتى جابو شهود شهدو زور عن انو ام إيليڤ كانت موجودة في بورتسودان الفترة الحصلت فيها الجريمة والفترة دي كلها م طلعت من بورتسودان الا بعد م سمعت بالحصل لراجلها، م خلو ورق م زوروهو حتى عثمان حاولو يرشوهو علشان يغير اقوالو ومشو لي عمو الحاج بتاع العقار عشان يساوموه طردهم من البيت واتصل على ماهر برجف وحكى ليهو،
كنت في كل جلسه بعاين ليهم بقرف وكسرة نفس وهم بلهثو وبجيبو اوراق على اساس انها ادله، كنت بعاين ليهم وانا بقول في نفسي حتى لو ماهر ما اخد حق ابوهو في الدنيا دي حياخدو في الأخرة مضاعف منكم لأنكم اتسببتو في انو هو م ياخدو في الدينا، معقوله في ناس كدة؟ممكن تترافع عن ظالم وهي عارفاه ظالم؟ هم بخافو ربهم وعذابو؟والله مهما اتكلمنا عن صعوبه المهن الحملها تقيل م حيكون في اصعب من مهنة القاضي والمُحاماة، الناس دي بتتنافق والحاجه دي عقابها عظيم
اخر جلسه لينا في المحكمه اللي هي كانت قبل الاخيرة القاضي قال"عليه قررت المحكمه تحديد جلسه النطق بالحكم النهائي بتاريخ ال 30/12..
في اللحظه دي اخت عمة ماهر وقفت وزغردت في نص القاعه ومشت قالت لي اختها مبروك عليك البراءة ي اختي من اسي، وقالت لواحد من المحامين بصوت عالي جهز لينا اوراق رد الشرف من اسي على طول ي مولانا...
كلنا كنا خايفين ومتوترين علشان موقفنا م بالقوة الحتخلي القاضي يحكم لصالحنا رغم وجود الشهود والأدله بس م كانت كافيه برضو خصوصاً انو هم م اعترفو، كان في نوع من الإحباط كدة مُخيم علينا وماف زول بقدر يظهرو للتاني كأننا بنتنافق مع بعض انا وماهر
حتى المحامي بتاعنا م كان بقول لينا كلام بطمن كل كلامو كان بصيغه"نتمنى ذلك"الجمله المحبطه وم بتبشر بالخير وبتخليك مجهجه وبين نارين
بتزكر ماهر وهو بحاول يقويني او يقوي نفسو قال لي"مش نحن على حق؟ووصلناها القانون عشان ناخد حقنا بالقانون بس خلاص معناها ماف شي يخوف وماف شي يخلينا نتنافق او نغش او نجيب شهود مزيفين ونشيل ذنبهم ي شهد زي م هم بعملو، نحن على حق وطالما نحن كدة مفروض م نعمل الا البيرضي ربنا لأنو نحن بنعمل القال عليهو ربنا، انتي عارفه انا بشفق عليهم والله وانا بشوفهم بعملو كل البعملو فيهو دة، نتوكل على ربنا ونحتسب منو الخير واذا م اخدناه هنا اكيد حناخدو عند ربنا صح!؟وبعدين رسولنا الكريم قال شنو؟
قلته ليه شنوو؟
قال لي رسولنا الكريم قال" لو اجتمعت السماوات ومن فيها، والأرض ومن عليها على أن يضروك بشيء، لن يضروك إلا بشيء قد كتبه الله لك، ولو اجتمعت على أن ينفعوك بشيء، لم ينفعوك إلا بشيء قد كتبه الله لك .عشان كدة مهما عملو وعملو في الأخير نحن م بنعمل الا الصح وامرنا بين يدين ربنا سبحانه وتعالى صح؟
بقيت اعاين ليه وهزيت ليه راسي بمعنى ايوة
انا م لاقاني زول بيقين ماهر وصمودو، بيحصل فيه ما يحصل في الحياة دي ورغم المعاناة والانكسارات والخزلان هو م ببين ليك الا برودو ووقفتو بصمود، بني ادم راكز بشكل م طبيعي حتى شعره م ببين ليك انها مهزوزة فيه انا بخاف عليه بخاف عليه شديد من التماسك دة خايفه نتيجتو تكون لحظه انهيار م يقدر يطلع منو
يوم بعد يوم ويوم النطق بالحكم بقى يقرب والخوف والتوتر بزيد والواحد بكون قاعد على اعصابو وبفكر وسرحان كل الوقت انا كل تخيلاتي كانت حولين ردة فعل ماهر وموقفو اذا القاضي م حكم لصالحو والفترة دي ماهر بقى مشغول شديد، مشغول ودايماً وم بفتح المحل بس بطلع مشاوير وبتأخر كل الوقت ولما اسألو بقول لي مشغول، مشغول، مشغول...
لغايه م جا يوم المحاكمه، ، رغم اني كنت محبطه ويائسه وشايفه انو نسبه طلوعنا من المحكمه كسبانين 1c/o لأنو رغم الشهود والأدله حاسه موقفنا ضعيف شديد بس م بينته لي ماهر الحاجه دي بالعكس ونحن طالعين كنت بصلح ليه في ملابسو وبرتب فيهو قلته ليه اكيد ربنا حينصف الحق قال لي نتمنى ذلك
قلته ليه حتى انت بقيت تتكلم زي المحامي الثغيل دة
قال لي اي" نتمنى" م لينا غير نقول نتمنى ربنا ينصف الحق ه
في المحكمه..
كنت واقف في المحكمة وعيوني بتقع على كل الحوالي،
شهد، إيليڤ، خالد، ازاد، راكان، امي، عمي الزيني، المحامين، زياد، منذر، لجين، هيلين
كنت واقف وبعاين ليهم وانا بقرا تعابير وشوشهم واحد ورا التاني وبالتدرج، م عارف كنت بفتش في شنو بس كنت بحاول اخمن الحكم حيكون شنو من خلال تعابيرهم
لغايه م لحظه وعيت على صوت
محكمه
اتلفته ودخلته القاعه
القاضي قبل م يدأ يتلي حيثيات القضيه بقى يطلب من المحامين يقدمو اخر مرافعاتهم عن القضيه، قامو كل المحامين ال 3 واترافعو واحد ورا التاني،
لما جا دور محامينا قال:
لدي بعض الأوراق التي قد تغير مجرى القضيه سيدي القاضي!!
القاضي قال ليهو اتفضل
المحامي اتجه على اتجاه قفص المتهمين وقال:
أميمة، حسب اقوالك واقوال الشهود ذكرتي انك م كنتي في الخرطوم لحظه وقوع الحادثه، وحتى قبل وقوعها بفترة م جيتي الخرطوم ابداً والجيه الوحيدة ليك في الفترة ديك كانت بعد سماعك بالحصل لي زوجك صح؟
قالت ليهو نعم
قال ليها متأكدة من الكلام دة ي اميمة؟كدة راجعي نفسك وارجعي بذاكرتك يمكن هي مضللاك والكبر دخل
المحامي بتاعها قال اعترض سيدي القاضي
القاضي قال ليهو إعتراض مرفوض
المحامي رجع قال ليها اميمة أُكرر السؤال هل انتِ متأكدة؟
قالت ليهو ايوة متأكدة
رجع مكانو وشال ظرف ورجع على اتجاه القاضي وقال ليها انتي بتقولي كدة لكن كشوفات مطار بورتسودان بتقول عكس ذلك،
الحقيقه ي اميمة انتي كنتي في الخرطوم بالطائرة ... يوم ... اقلعت الساعه ... ونزلت بمطار الخرطوم الدولي الساعه... وكنتي برفقه اخويك المتهمين عزالدين ونور الدين...وذلك كان قبل وقوع الحادثه بكم يوم فقط
ودي ورقه بختم المطار المحكمه بتقدر ترجع لكشوفات المطار بالاسامي الثلاث والتاريخ وتستفسر وتتأكد من الكلام دة اتفضل ي سيادة القاضي..
القاضي شال الورقه وبقى يعاين فيها،
بعد مسافه بقى يتناقش مع الجمبو،
رجع قال
عزالدين ..
عزالدين قال ليهو بخلعه نعم
قال ليهو كنت على متن الطائرة القادمه من بورتسودان المتجه نحو مطار الخرطوم بتاريخ ام لا ...؟
عزالدين سكت
المحامي بتاعو قال ليهو سيدي
القاضي اشر ليهو بي يدو نظام يسكت
على طول سكت وقعد
القاضي قال ليهو عزالدين منتظرين اجابتك نحن حصل ولا لأ؟
عزالدين قال ليهو ايوة حصل ي مولانا
وهنا كانت الصدمه بالنسبه ليهم كلهم
القاضي قال ليهو يعني انت بتعترف إنك كنت على متن الطائرة؟وكنت في الخرطوم لحظه حدوث الجريمة؟
عز الدين قال ليهو بصوت متردد أيوة بعترف،
القاضي قال ليهو برفقه من كنت؟؟
سكت مسافه وقال ليهو مع اختي اميمة واخوي نور الدين
القاضي قال ليهو يعني انت بتقر وبتؤكد على تواجدكم انتو الاخوة الثلاثه بولايه الخرطوم في تلك الفترة؟
قال ليهو ايوة
القاضي سكت،
المحامي حقنا قام قال ليهو إذاٌ انت بتعترف بأرتكابكم للجريمة انت وأخوانك صحيح؟؟
واحد من المحامين قام قال بإنفعال اعترض سيادة القاضي الزميل يحاول استغلال الموقف وتضليل موكلي..
المحامي حقنا قال ليهو بصوت حاد وانفعال لا بل انتم من تحاولون تضليل القانون، اتهمتهم ابن المجني عليه بالجنون ف أتت اوراق لتثبت انه ليس بكذلك، فعلتم ما فعلتم لإثبات عكس ماهو صحيح في هذه القضيه ولكن ليس الان، ليس في هذه اللحظه إطلاقاٌ، هذه لحظه صفاء، المتهم يريد ان ينجو بنفسه من حبل المشنقه بإعترافه ولكن انتم تحاولون تضليله
سيدي القاضي اسمح ببعض الوقت لطرح بعض الاسئله للمتهم
القاضي قال ليهو اتفضل..
المحامي مشى على المتهم ووقف قدامو،
قال ليهو أكرر انت بتعترف بإرتكابكم للجريمة وقتل المجني عليه محمد...الزيني في ليله ... أم لا؟؟
هل بتعترف بتخطيطكم للجريمة وسرقه ما بالمنزل ام لا؟
أُكرر ؟!
فجاة عزالدين قال ليهو بنبرة خوف ايوة بعترف ...
هنا عم الصمت والجو اتكهرب كلو والناس بقت تتلفت واخت اميمة صرخت وبقت تقول ليهو عزالدين انت بتقول في شنو؟عزالدين؟لا ي عزو لا بقت تقول كدة بطريقه هستيريه
المحامي قال ليهو بتعترف بشنووو؟؟
عزالدين سكت
المحامي قال ليهو أُكرر السؤال بتعترف بشنوووو؟؟
عزالدين قال ليهو بإنو نحن قتلنا الزول دة وسرقنا قروشو
المحامي اتلفت على القاضي و قال ليهو سيدي القاضي لك التعليق
القاضي قال للعسكري طلعو جيبو المنصه هنا،
طلعوه من القفص جابوه، القاضي قال ليهو انت اعترفته بالجريمة امام الجميع بمحض إرادتك وبدون اي ضغط او كُره صح؟
عزالدين كان واقف وبرجف قال ليهو نعم سعادتك
عزالدين بدأ يتكلم وقال"اختي تمت اتفاقها مع اخو راجلها معتصم
القاضي قال ليهو معتصم دة اللي هو المتهم الرابع صح؟
قال ليهو ايوة،
القاضي قال ليهو كمل
كمل كلامو ب"وبعدين جات واتكلمت معي وقدرت تقنعني وتغريني وحسب كلامها انو نحن حنسرق بس م كان في نيتنا غير سرقه القروش المعاه، وبالفعل جينا الخرطوم في المواعيد المحددة، ومشينا البيت في اليوم المخططين فيهو للسرقه كنا مأجرين شقه بإسم الزول دة وأشر على عثمان، كمل كلامو ب
"كنا مراغبنو وإتناوبنا على مراغبتو لغايه م طلع يصلي الصبح في المسجد بعداك دخلنا الشقه وبدينا نسرق في القروش، القروش كانت كتيرة شديد وم كان معانا الشي البنشيلو فيها كلها حتى ف اتجبرنا ننقلها بيدينا وكان منتظرنا تحت معتصم بعربيتو، نقل القروش هو الأخرنا وصعب علينا المهمة شديد وانا كلمتهم قلته ليهم العربيه اتملت كفايه خلونا نمشي اختي طمعت قالت لا الا نسرقها كُلها وبسبب الحاجه دي الزول دة جا راجع من الصلاة و قبضنا في بيتو بنسرق، قبضنا كُلنا نحن ال 3 مع بعض والمشكله معتصم دة شافو داخل وم حاول ينبهنا وهو لما شافنا عرفنا شكلا، اناً ضربتو مرة واحدة بس عشان هو اتصارع معانا اختي اميمة ونور الدين هم الضربوه، ونورالدين كان شايل معاه ساطور طلعو وضربو بيهو، انا كلمتهم قلته ليهم ارح ننزل نخلي الراجل لو فيهو باقي روح بعيش م سمعو كلامي وانا نزلته خليتهم بضربو فيهو، حتى فيما بعد عرفنا انو مات وعرفته انهم قتلوه بالطريقه الكعبه دي م كنت عارف انهم عملو فيه كدة وقتلوه بالطريقه دي، نحن دة م كان قصدنا ولا كان اتفاقنا مع اختي انا ايدتها في موضوع السرقه بس لكن القتل دة انا م قتلته معاهم انا خليتو عايش ونزلته خليتهم، انا اتكلمته معاهم وهم م سمعو كلامي عشان كدة نزلته خليتهم ي مولانا انا م قتلته معاهم اقسم بالله م قتلتو معاهم...
في الحظه دي الحزن والدموع غرقو قاعه المحكمه، في منهم الببكي على الموجودين خلف الزنازين ومنهم الببكو على الجريمة البشه الإرتكبت، ووسط دة كلو انا قاعد مصدوم وانا بسمع البتقال بس م مستوعب ابدا، حتىً لما بديت استوعب كنت بتخيل الشريط دة وشكل ابوي وهو مصدوم في مرتو وبصارع عشان يقاومهم
❖
القاضي أجل المحاكمه بعد ساعه،
الساعه دي انا م عرفته عدت كيف ولا حصل فيها شنو ولا اتقال لي شنو من الحوالي كل البعرفو انها عدت والمحاكمه رجعت،
القاضي بدأ يتلي حيثيات القضيه من أولها لغايه م وصل أخرها بعدها قال محكمة
الناس وقفت على حيلها
القاضي قال:
إستناداً على المادة 130 من قانون القتل العمد مع سبق الإصرار والترصد ومحاوله تضليل القانون والتستر حكمت المحكمه حضورياً على المتهمين
اميمة...
نورالدين...
معتصم...
بالإعدام شنقاً حتى الموت
هنا جات صرخه من اتجاه الزنزانه الفيها اميمة وعم ماهر دة في نفس اللحظه وبنفس الصدى بس هو صوتو على اضخم وبقى يتحسبن ويقول انا م قتلته انا قتلته بيدي ي ناس انا م قتلته
دخل في حاله هايبر أكتيڤ كدة وهو بصرخ زي الطفل منظرو وهو في الحاله ديك يخليك تستعيذ من الشيطان الف مرة وتقول حسبي الله من الظُلم، حسبي الله
القاضي كمل كلامو ب وعلى المتهم عزالدين... بالسجن المؤبد مدى الحياة.
❖
لغايه اللحظه م قادرة انسى صعوبه تفاصيل اليوم دة، م قادرة اتجاوزو، اللحظه القاضي أصدر فيها الحكم القاعه كانت عبارة عن اصوات صريخ م بتعرف تحدد دة صوت منو من الناس الجمبك، والله كان يوم تاريخي شديد لأنو الاتحكم عليهم ديل كانو بصرخو زي الأطفال في القف الهم موجودين فيه
بعدها القاضي لسه كان عندو باقي كلام ف بقى يضرب بالمطرقه بتاعتو ويقول هدوء او اطلعو كلكم بره وخلوني مع اهل المجني عليه فقط
حصلت لحظه صمت الناس كلها بقت تعاين للقاضي
القاضي قال ماهر الزيني إبن المجني عليه
ماهر وقف وقال ليهو نعم
القاضي قال ليهو حأسألك سؤال صعب انا واثق إنك ولد بار وبشهامتك دي م حتغلبك الإجابه بس قبل م اسألك عايز اعترف ليك إعتراف صغير، انا من لحظه م وقفته قدامي في اول جلسه محكمة عرفته إنك على حق عشان من كترة مزاولتنا للمهنه وش الزول العلى حق دة بقى م بيخفى علينا على عكس اللابسين أقنعه، نحن م بندرس قانون بس بندرس معاه علم نفس كل حركه بتحصل منك نحن بندرسها تماماً وبنفهم من خلالها انت شنو عشان كدة رغم عدم وجود الأدله الكافيه اتحفظته عليهم ال 4 وكنت واثق إننا حنصل للنهايه دي رغم طول المدة وكنت حازعل جداً لو وصلنا لنتيجه غير كدة، انا مبسوط جداً انو حتى التأثر بالمحقق كونان وأفلام الإنيمي م كان على فراغ طالما بطلع لينا جيل بيكتشفو لينا عُقد قضايا زي دي وبكتشفو لينا النقاط السوداء ومخفيه ولا شنو ي سعادة المحامي؟؟ وعاين للمحامي القال على ناس ماهر انهم متأثرين بالمحقق كونان ومستنتجين ليس الا
المهم ي إبني نرجع للنقطه المهمة والأهم في كل القضايا
ماهر قال ليهو إتفضل
القاضي سكت مسافه وهو بعاين ليهو وماسك القلم بعدها قال ليهو القصاص أم العفووو؟
زياد هنا قال القصاص ي زول طبعا، منذرً قال القصاص، كل الكانو بإتجاهنا كانو بقولو القصاص، القصاص،
القاضي ضرب المطرقه وقال ليهم هدوء هدوء هدوء...
ماهر كان واقف وساكت..
القاضي قال ليهو الخيارين في يدك وعندك الحق في اي واحد فيهم اخد راحتك نحن منتظرين إجابتك
❖
كل الناس الحوالي كانت بتهمس القصاص القصاص القصاص، صداها بقى يتردد في مسمعي وبقيت حاسي بنفسي كأني في قاع مظلم وحوالي اصوات كتيرة م قادر اركز م قادر اقول شي فجأة بقيت اتخيل صورة ابوي، ، ملامحو، صوتو، ضحكو وتعاملو مع الناس، وبشاشتو بقيت متخيلو كأنو حقيقه قدامي وفجأة سمعته القاضي بقول ي إبني، ي إبني..؟!
قلته ليهو نعم
قال لي القصاص أم العفو؟
غمضته عيوني وفتحتها وضغطته على يدي واحكمته قبضتها وقلته ليه بنبرة مبحوحه وحادة
العفوو...
إقتباس
الحب هو ذلك الاتزان..
العداله الالهيه التي الغت الفروقات التي خلقتها الحياة
هو الذي كسر وتعدى كل العادات والتقاليد، الحب آتى ليكمل انصافنا ليكسر حواجزنا، هو السلام الذي يهدى ضجيج دواخلنا
شيراز عثمان
...