الفصل الرابع والثلاثون
بكرهك،
فضل ساكت وهو بعاين لي
م تعاين لي وتسكت وبكرهك لما تسفهني؟
جد؟
لأ م بكرهك اساساً م بقدر اكرهك،
نتفاهم في بيتنا طيب علشان شكلنا م حلو ونحن مطولين في الغرفه دي كدة حتحكي لي عملته كدة لييه؟ومشيت وين وعملته شنوو؟
حاضر حاحكي ليك كل شي ابشري ابشري مشينا؟
طيب بس عندي حجات عايزة اخدها
طيب منتظرك برة اسرعي لأني مُرهق شديد وم عايز غير انوم
طيب ماشي
❖
على فكرة كان ممكن تستخدمي اللابتوب بتاعي عادي متى م احتجتي!!
لا خلاص جبته معي لابتوبي علشان سلفاً انا حافظه فيه حجات كتيرة محتاجاها
طيب
بعد م رجعنا بيتنا ..
اممممم حبيبي،
ايوة
م نفسك تحكي لي قصه السفرة المفاجأة دي شنوو؟
شغل حبيبي"قال الكلام دة وهو عدل رقدتو وغمض عيونو
امممممم ختيت يدي في لحيتو وقلته ليه "شغل تبع الشركه يعني؟؟
سكتت
ماهر؟؟
انا مشتاق ليك كفايه مقضي يومين بعيد منك تعالي اخدني في حضنو ونام
بقدر يتهرب بأي شكل من الاشكال بس عمرو م كذب علي في حاجه
❖
في يوم صحيت على صوتو وهو بقول"خلاص تمام بجي عليك المساء كدة، بيناتنا الشبكة،
بالنهار ونحن قاعدين مع بعض قلته ليه زيني؟
رفع عينو عاين لي مسااافه حتى قال لي ايوة "مستغرب في كلمة زيني دي طبعا"ً
قلته ليه عايزة اتكلم معاك ممكن؟
قال لي من غير ممكن
قلته ليه طيب بس عايزاك تاخدني على محمل الجد طيب؟
حاضر يلا قولي
ي زيني انت ليه م بتشاركني الحاصل معاك؟ليه م بتحكي لي وبتتهرب لما اجي اسألك؟
انا شنو في حياتك؟انا شنو بالنسبه ليك؟اذا م شايفني الزوله الممكن تقيف معاك اخترتني اكون معاك ليه؟
حبيبي
ما حبيبي دي الحقيقة ي زيني انت بتعاملني كأنك مستخف بي، انا م عايزاك تسمعني كلام حلو ولا عايزاك تعاملني معامله لطيفه ولا عايزاك تظهر لي الجانب السمح منك دائماً انا راضيه بيك حتى وانت في اسوأ حالاتك وهعيش معاك اسوأ اوضاعك م عايزاك تبهرني انا عايزاك تعاملني زي زي اي اتنين متزوجين زي م بتعدي عليهم الايام الحلوة بتعدي المُرة، ماهر لو ناسي اذكرك انا عندي تجربه سابقه عشته فيها اسوأ ايامي وإتعلمته منها كتير الحاجه العايزاك تفهمها انو اياً كان وضعك المادي م مقياس لعلاقتنا ببعض ولا حيأثر ولا عايزاك توفر لي شي انا بس عايزة نكون مع بعض وبالنا مرتاح مش راحه البال دي في؟يبقى كل شي ببقى
وانا بتكلم معاه كدة فجأة باسني وانا سكتت بعدها وبقيت عاين ليه بعد مسافه قلته ليه دة بالحاله قلته ليك اخدني على محمل الجد؟
قال لي اخدتك على قدر قوة تحمل قلبي لملامحك وانتي قدامي كدة
قلته ليه ي زيني
قال لي طيب طيب بكل جديه مشى يدو في خدي وقال لي انا عارف يعني شنو شهد وواثق تماماً من اختياري للكائن القدامي دة، بس في حجات كدة بتتخت لليوم الأسود وللمصايب العظيمه انتي الحاجه دي زي م ياما لقيتك في اسوأ اوقاتي واثق تماماً انو حتعدي علينا عواصف م حاكون محتاج غيرك فيها اما حالياً انا متقوي بوجودك معي بس
قلته ليه "طيب ليه م قلته لي إنك خليت الشركه؟
عشان كل حاجه حصلت بسرعه حتى القرار كان مفاجىء
يعني م مدروس!!؟
انا م بخطي خطوة من غير م ادرسها ي شهد م داير اغرق واغرق الباقين معي افضل اخليها للقادر يديها بالطريقه الصح احسن
طيب وحتعمل شنووو انت؟
الشغل في الدنيا انتهى ي شهد؟
حتشتغل مع شركه تانيه يعني؟
لا ابداً انا اصلاً الشغل المن النوع دة كرهتو وطلع من نفسي جداً ف م عارف لكن اكيد ربنا حيسهلها حبيع العربيه دي وهعمل بقروشها مشروع كويس كدة
تبيع العربيه؟
❖
ي عزو
احكي
انت رجعته مسكته عمك معتصم دة الشركه ومسكتو الماليه؟
اي مالك في شنوو؟
كيف في شنو عزو انت زول واعي للبتعمل فيهو دة بالمنطق كدة انت عارف الزول دة هو السبب المغرق الشركه في الديون لغاايه اللحظه دي؟
زياد بالمنطق كدة كلنا عارفين انو ماهر براهو ضيع قروشو وضيع شركتو م نتنافق مع نفسنا ونرمي اللوم على غيرو سواء كان عمو او اي زول وبعدين بالعقل كدة دة زول عمو من لحمو ودمو كيف يعني خسارة الشركه دي وخسارة ماهر من خسارتو نبطل وهم الراجل كويس وشغلو كويس وقال لي رجعني اشتغل معاك م شفته منو شي كعب وانا بالنسبه لي محتاج لي اي زول ممكن يكون مكسب للشركه دي
انت شايف كدة ي عزو؟
اي
ايواااا تمام بس برضو م تنسى نحن قبل كدة كنا مجموعه شغالين مع بعض وبنتشاور قبل م تقعد الكرسي العاجبك دة
مالك اسي انت زعلان ي مان؟
ماف زعل يلا سلام
الوووو؟
ي منذر
اي ي زياد
عايزك ضروري وين انت؟
مالك في شنو خير ماهر حاصل معاهو شي تاني ولا شنو؟
لالا ماف شي بس الموضوع بتاع عمك معتصم الأمس الكنا بنتكلم فيهو عايزك فيهو انت عارف عزو رجعو الشركه تاني؟
كيف الكلام دة ي مان دة مجنون ولا شنو؟كدة ي دوب الشركه غرقت كويس
لا انا ي دوب إتأكدته انو في شي غلط الناس دي لاعبه جوة الشركه دي لعبه كدة احسن نتلاقى ونتفاهم ظابط؟
طيب ابشر
❖
السلام عليكم
اهلين وعليكم السلام ي مراحب
كيفك ي بتي ان شاءالله طيبه؟
الحمدلله اتفضلو،
ماشاءالله نحن جيرانكم في الشقه دي طوالي،
اهلين اتفضلو ياخي
يزيد فضلك ان شاءالله م ازعجناكم؟
لا ماف اي إزعاج اتفضلو ياخي حبابكم
كنت قاعدة وماهر طلع فجاة جاتني مرة كبيرة في العمر وبتها، بعد فضلتهم ورحبته بيهم بدينا ناخد وندي مع بعض في الكلام ماشاءالله حلوين وظريفين شديد
قالت لي عروس صح؟قلته ليها ايوة والله
قالت لي ماشاءالله ربنا يهنيكم ان شاءالله ي بتي العرس سمح والله ان شاءالله سعد البنيات كلهن
قلته ليها ان شاءالله وعقبال السمحهه دي
قالت لي السمحه دي اخوانها كلهن عرسن ي بتي ماشاءالله عندي 4 في بيوتهن اسي لكن دي م عارفه مالها قعدتها طالت اظنها عشان سويدة حبه م زي اخواتها ديلك كلهم جو لونهم اصفر مفرهد دي لمت لي وساخه البطن وطلعت زي م بقولو
البت قالت ليها بنبرة حادة "امييي؟؟
قالت ليها اكضب عاد؟ رجال الزمن ديل دايرين ليهن مرة بمقاييس محددة لكن اهم شي عندهم اللون قدر م كلمتها وقلته ليها اعملي البعملنو البنات دة وافتحي لونك البت حالفه كان تسمع الكلام خليتها على كدة والله تقعد زي دة بس
طبعاً انا مصدومه بعاين للبت في اللحظه دي، ايوة الكلام واضح انو هظار وضحك وتشغيله أم بس احساسها شنو وهي سامعه امها بتقول كدة؟احساس نظراتها زكرني نبرة ماهر وهو بقول انو امو كانت دايماً بتناديه ب "ي فيل، ي تور"
... هي قد تكون حجات بسيطه واقرب لي انها هظار م محض تركيز بس اثرها ببقى في النفس وبتخلي الانسان يبقى حساس غصب عنه
والغريبه البت ماشاءالله قوله حلوة عليها بسيطه عيون واسعه وقوام ماشاءالله طول وعرض سمرتها تهبل دة غير كياتتها
قلته ليها بالعكس ي خالتو ياخ السمار دة عمله ماف ليها منافس في العالم اسي انا ماما كانت بتقول لي نفس كلامك دة واهو اتدبسته وشايفه العرس دة تدبيسه بس م اكتر
وبعدين ماما بتقول البطن بطرانه يخخخ وهي مميزة وي بختها بتميزها دة و ماف حاجه اسمها الرجال بحبو كدة المهم هي بتحب شنو اهم شي قناعتها بنفسها ورضاها عليها، معظم الرجال عندنا ودة بقى شي شبه سائد بتلقي الواحد م بتملى عينو حاجه بتلقيه عايز الحلبيه والسمراء والشقرا والخمريه السمينه والضعيفه في نص ديل كلهم بتلقي واحد بس هو راجل جد وشايف انو الحجات دي ابداً م مقياس وبعدين الجمال شي نسبي وم مفروض يكون مقياس لي اي كائن ولا شنووو؟
كلميها يااا...اسمك منو معليش م اتعرفنا؟
شهد
كلميها ي شهد اخيرا ً زول بفهم يخخخ وبعدين م كل البنات طموحها وتفكيرها في الرجال وكيف ترضيهم انا م سلعه معروضه ولا قطعه في ترزي علشان اتفصل زي م هم عايزين عشان يساومو عليها بس مين يفهم
امها قالت ليها اه فلسفهه بنات منكن و فارغهه ساااي ها
عموماً انا سمر السمراويت اسم على مسمى طبعاً ودي ماما اسمها نعمة
قلته ليها اتشرفنا ي السمحة
قالت لي والكيكة دي عملتها انا احم احم بناتها الفي بيوتهم كلهم م بعرفو يعملو كيك م كانو فاضين من علشان كدة
قعدنا نضحك وغيرنا الموضوع بس صراحه حبيتها شديد وحبيت طريقه تفكيرها، بس برضو الموضوع علم على نفسي مستغربه كيف نحن مدين نفسنا الحق في انو نفرض مقايس زي دي ونتعامل معاها على اساس انها واقعيه ونأذي بيها بعض حتى لو بالهظار؟
النوع دة من الحجات دي بقى شبه وباء متفشي في مجتمعنا
❖
بعد اسبوعين...
ماهر،
ايوة ي شهد
حتمشي معي الإنتر ڤيو صح؟
ايوة هو الساعه 10 صح؟
ايوة 10
تمام حبيبي اول م تبدي تجهزي اتصلي علي عشان اجي اوصلك
حوالي الساعه 9 كدة اتصلته عليه وبالفعل جا، قال لي مرتي السمحه
قلته ليه جد
قال لي دايماً انتي كدة ختي في بالك كدة كان اول انترڤيو اعملو وكنت متوترة شديد فضل ماسك يدي وضاغط عليها وبهدي فيني لغايه م وصلنا قال لي حأنتظرك هنا طيب؟قلته ليه تمام
❖
فجأة شهد طلعت لي بموضوع الشغل دة م ناقشتها كتير لأني من عرفتها وانا عارفها انسانه طموحه وبتحب الشغل ف فكرة اني ارفض كانت مستحيله لأنو دة حقها وزي م زمان كنت بدعمها حالياً برضو حأدعمها وم حاكون الزول السبب في تعليق شهادتها في الحيطه ابدا، رغمً انو انا عارف تماماً هي عايزة تشتغل ليه بس م حبيت اوضح ليها شي من الفي نفسي ابداً انتظرتها تقريباً اكتر من ساعه حتى جات كانت مبسوطه لأنها قدمت بطريقه حلوة، م رجعنا البيت عزمتها فطور برة، بعد م رجعنا البيت قلته ليها شهد
قالت لي عيونها
قلته ليها زي م انا احترمته رغبتك في إنو تشتغلي اتمنى انو انتي كمان تحترمي رغبتي في انو م يدخل ولا قرش من مرتبك حق الشغل دة بيتي طيب حبيبي
❖
ماهر فاجأني بكلامو م اتوقعته ابداً انو فهمو يكون كدة، صدمني جد
قلته ليه كيف؟
قال لي زي م انتي سامعه،
قلته ليه ماهر دة موال جديد؟نحن مش المفروض واحد؟مش الحياة شراكه؟والمفروض انا شريكتك
واحد وشراكه في اي شي ي شهد ما عدا القروش انا راجل وقادر اطلع قروش لو دقيت الحجر دة اليوم بطلع منو قروش وقادر اتحمل كل واجباتي ومسؤلياتي تجاهك وقادر اوفر ليك كل احتياجاتك بس برضو شايف الشغل دة من حقك تعملي بقروشو الشي العايزاه انتي بس لنفسك او حتى تختيه على جنب او توزعيه او اي شي بس من غير م تسدي لي بيه فرقه في البيت او حتى فيك انتي، مرتبك اعتبريه حاجه زايدة في حيااتك
انا اساساً هدفي من الشغل اني اساعدة لاني بقيت شايفه قدر شنو هو بعاني وبتعب، دخل عربيتو ترحال وبقى شغال مشاوير كل الوقت علشان يغطي مصاريف لغايه م يبيعها، طول الوقت مساهر ومتوتر وبشرب سجاير وقهوة، شايل هم الف حاجه في راسو وم عايز يتنازل ولو شويه علشان اساعدو، م قدرته اتجادل معاه لأني عارفاه اتجاهو واحد ورافض تماماً يشتغل في اي شركه بحكم انو م بقدر ابداً
من تلقاء نفسو بدأ يحكي لي
"فكرته انو بعد م بيعه العربيه دي تتم افتح محل اسبيرات عربات الحاجه دي فيها شغل حلو شديد وبتجيب قروش وجمبها هعمل ورشه صيانه
طيب حلو والله هي فكرة بس برضو انا م معاك في حكايه بيع العربيه دي ي ماهر
الامور لو اتسهلت العربيه بتجي ي شهد
قلته ليه بس محتاج موقع برضو،
قال لي الموقع وكل شي جاهز بس البيعه تتم
في نفس اليوم دة صحيت نص الليل لقيتو قاعد وماسك اللابت ب حقو، قلته ليه ماهر انت لسه صاحي؟
قال لي عندي شغل بخلص فيه بس
نزلته جيت قعدته جمبو لقيتو شغال تصميم لناس، قال لي الناس بتقول انو الشركات بقت تشتغل التصميم غالي بقو يفتشو للناس البتشتغل ساي وم تابعه للشركات
قلته ليهو دي محمدة صح؟
قال لي محمدة ايوة بس في الأخير م ظابطه لأنك لا بد من انو تشتغل في بيئة عمل على ارض الواقع
سكتت مساااافه حتى قلته ليه ماهر حبيبي انا عندي فكرة قد تكون ظابطه شديد
قال لي اللي هي شنوو؟
قلته ليه "عاين انت ممكن تضرب 3 عصافير بحجر واحد وكلها مكسب، افتح محل الاسبيرات لكن تبيع العربيه شغلها ترحال واشتغل شغل التصميم دة وانت في مكانك،
والفكرة الأظبط المزرعه حقتكم هي مؤهله تماماً لي انو نحن نستخدمها نأجرها للحفلات والمناسبات والرحل وغيرو، بكدة انت عندك كم مصدر حيجيك منو قروش وبكدة حتقدر توفر اولوياتك وحتصرف على اخوانك لأنو القروش الاسي انت خاتيها في حسابك ليهم دي حتخلص وبالحاله دة لسه اختك م جات الخرطوم يعني عندك مصاريف جامعه يومي+شيتات+داخليه+احتياجاتها كامله مكمله+شقه خالد ومصاريفو وعندك بقيه اخوانك و...الخ
انت فاهم لو قدرته تشغل الحجات دي كلها مع بعض حتجيب قروش
هي افكار حلوة حبيبي بس برضو انتي م عارفه انو انا عشان افتح محل الاسبيرات لازم ابيع العربيه، ما لازم ارهنه ياخ وشيل مقابلها قروش واتفق مع زول وسدد على راحتك بس م تبيع
انتي اسي صاحيه من نومك عشان تقولي الأفكار التُحفة دي؟
لأ عشان اساعدك في ترتيب افكارك
خت اللابتوب على جنب واخدني مكانو وقال لي"اصلاً انا حياتي اترتبت من يوم م دخلتيها انتي" اليوم التاني صحينا ونحن وشوشنا في بعض قال لي صباح الورد على الورد
قلته ليهو امممم مزاجك رايق؟
قال في زول بصحى على الوش دة وم.يكون رايق؟
بقيت اعاين ليه، قال لي فكرته في كلامك امس لقيت انو هو منطقي شديد، عشان كدة حأبدأ بالمزرعه حأظبطها وارممها حبتين كدة لأنها مقفوله ومهمله عندها زمن، وحأشتغل ترحال لغايه م اظبط محل الإسبيرات دة
قلته ليه حلو طيب متين حيحصل كدة؟قال لي نمشي المزرعه اليوم نشوف الحاصل فيها شنو ومحتاجه شنوو؟
قلته ليه طيب وراي شنو انا؟
بالفعل مشينا، كانت مقفوله وحالتها بالبلاء ماف زول شغال بيها ولا جايب خبرها اساساً ماهر كانت عندو افكار حلوة تتعمل فيها، لفينا فيها وشوفنا الحجات الحتاجها شنو علشان تترمم وتتظبط، وهو زول علاقاتو واسعه في الميديا طلعنا لفينا سواء مغالق او محلات الأبچورات و غيرها علشان نشوف الحجات بتكلفنا كم وحسب حساباتها من انوار لي نجف لي بوهيات و غيرو، واتفقنا معاهم،
المزرعه فكرة إيجارها كانت حتخفف عنو حمل تقيل علشان كدة هو اتحمس ليها شديد، اليوم التاني مشينا استلمنا الحجات ورجعنا المزرعه،
بدينا بالنضافه فيها على داير م يدور والنجيله والكلام دة، شوفتي لي ماهر وهو مجتهد وشغال كدة كانت م مخلياني أحس بالتعب ابدا ف كنت باخد ليهو صور وهو كمان م قصر رجعنا مرهقين رفعته صورتو استوري جاتني لجين قالت لي مزرعه لكن..
حكيت ليها الموضوع قالت لي خلصتو؟قلته ليها لسه، قالت لي من بكرة معاكم، عدينا اسبوع ونحن ماشين وجاين كانت بتجي لجين ومنذر وزياد،
ظبطناها واي زول عندو فكرة اعتمدناها بقت خرافيه شديد، بعد م خلصنا ماهر قال ليهم بس حأجيب اشجار مثمرة برتقال وليمون ومنقه هزرعها
منذر قال ليهو ليك علي قفص عصافير وكم واحد صغير بمختلف اشكالهم
زياد قال ليهو وانا علي الإعلان في الميديا من بكرة حأجيب الكاميرة ونظبط الجلسات برة وناخد صور ونبدأ نعلن
قال ليهو شكراً ي شباب يخخخ نعزكم في اعراسكم منذر قال ليهو ي ريت والله قربنا غايتو
قلته ليهو قربته وين من وراي؟
لجين قالت ليهو من ورانا؟
قال ليها اي عشان عرس الفجأة اصلاً سمح
المغرب كدة بعد م بدينا نطفي الانوار عشان طالعين ماهر فجأة لقيتو ماسكني قال لي حبيبي
قلته ليه ايوة؟
قال لي خليهم عندي كم حاجه عايز اظبطها حتى نطلع،
قلته ليهو حاجه شنووو؟
قال لي حأفهمك بعد م يمشو
بعد م طلعو قلته ليه مالك؟قال لي دقيقة،
مشى على اتجاه مفاتيح الكهرباء ولع كل الإضاءات الخافضه بعدين جا قرب مني وقال لي م عارف بس حاسي انو دة اظبط مكان لشهر العسل في السودان كلامي م غلط صح؟
قلته ليه فعلاً والله يعني حنأجرها للعرسان اكتر قصدك؟
قال لي لا نحن حنكون اول عرسان
اسألك سؤال؟انتي حتبطلي تبهريني فيك كدة متين؟كل مرة بتاخدي مساحه في قلبي بشكل مخيف شديد بالنسبهه لي، عارفه ي شهد م عارف اقول غير إنو انتي حتى البدايه من الصفر معاك غير، رغم اني بادي من الصفر بس حاسي نفسي في المقدمه بسببك انتي، عشان انتي معي، عانيت ما عانيت في الحياة دي وبقيت مشوه نفسياً بسبب كل شي مريت بيه، انتي جيتي على هيئة مرهم وابتديتي تعالجي كل التشوهات دي، وانا معاك بقيت حاسي بعظمة حياتي لدرجه إني شايفك كتيره علي شديد ي شهد، خايف أحبك شديد واجي اخسرك، خايف اتعامل معاك بإندفاع، لو لاحظتي لساني بتقل لما اجي اقول ليك بحبك ودة من خوفي
بدون مبالغه إنتي عوضتي حتى مكان فقد امي في حياتي وامي دي اكتر شخص أذاني في الحياة دي من حقي اخاف ولا لأ؟؟اعترف ليك بي شي بسيط من سنين انا برددو بيني وبين نفسي وكنت بدعي الصلابه بس برضو عايز احسو مجرد احساس بس؟انا ي شهد عمري م اتمنيت إنو زول يفهمني على قدر م اتمنيت انو يكون عندي زول يحتويني بتناقضي وشوائبي الفيني دي كنت بعاني شديد من الحاجه دي لغايه م ظهرتي انتي وم اكتفيتي بي انو تعوضيني عن المحتاجو وبس لأ انتي جيتي على هيأة طمأنينه قلب الإنسان في بيت مكه، شكل وجودك في حياتي كان كدة ودة كان سبب كافي يخليني اتمسك بيك رغم كل التناقض الكان بينا انتي كنتي الطمأنينه الأنا محتاجها بجد اما اسي ف انتي بيتي وانا كائن بيتوتي جدا...ً