الجزء 24

"وقد سمحت ل ضحكتك ان تكون اول شيء يفتح قلبي..فلا تتوقف عن الضحك لانه سيتوقف معها🚶‍♀️💙..!"..

لينا وقفت متحيرة قدام الشباك..

الساعة 10 بليل و لسا م صحت البت..

لينا و وابل و نون عاينو ل بعض..

-البت دي ماتت والله ماتت..

وابل عاينت ليها كويس..

=صحت..

كلهم عاينو للاوضة و لقاها لسا نايمة و رجعو عاينو ل وابل

=م قصدي حسي..يعني صحت ف فترة ما و نامت تاني..

-ريفان بحد زاتها؟؟

وابل اشرت عليها

=قلعت الفنيلة حقت الجامعة..عاينو ليها لانها قاعدة ب الفنيلة الجوا بس..

رجعو عاينو ليها ب تركيز..

رغم انو المكان مضلم لكن كلامها صح..فنيلة الجامعة كانت واقعة ف الارض و و ماسكاها ريفان ب طرف اصبعها..

الناس لسا كانو ببكو..

-برضو..البت نايمة ليها اكتر من 24 ساعة لازم تقوم..

=القزاز دا الا يتكسر لو عاوزين تصلو ليها..

مروان كان واقف برا المخزن..

عاين ليهم و طوالي اتكلم

مروان:محمد قال حيفلس الباب اساسا..

لينا عاينت ليه

-محمد خالكم؟

مروان هزا راسو و قال امم..

-هو جا؟

مروان:امم قبيل الساعة 4 تقريبا..

لينا عاينت ل ناس وابل..

-حازم دا قاعد برا ف عربيتو من م جابنا..

=م دخل؟

-يدخل ل منو؟ريفان و نايمة..

وابل سكتت..

-لكن بما انو محمد جا..اكيد ممكن يقعد معاه..

مروان طلع نفس طويل:مرق بعد م جا طوالي لكن لسا م جا راجع..ف تقريبا حيفلسو نص الليل اوا م يجي..

-دفنتوها؟

مروان عاين ليها:اكييدد..من صلاة العصر امبارح..

لينا هزت راسها..

رجعت عاينت ل ريفان اللسا نايمة جوا..

لينا جدجد كانت خاسفة الحيحصل شنو ليها اول م تفتح تاني و هي مستوعبة انو سوسي م حتكون موجودة..

♤°♤°°♤°°♤°♤°°♤°°°♤°°°♤°°°♤°°♤°°♤°

حازم نزل من عربيتو و لمن لمح محمد مارق من قدام البيت بالمراية..

مشي عليه و لقاه واقف بسلم ع كم راجل..

محمد لمحو و عاين ليه مسافة و تاني كمل كلامو و مشي ع حازم..

حازم عاين ليه..

محمد وقف قدامو و طلع نفس طويل

-حابسة روحها ف الاوضة و لسا م مرقت..

حازم هزا راسو

_اممم..قالو لي..

محمد تني راسو بالجمبة..

-م حصلتها انت صح؟

حازم خزل راسو بمعني لا..

-اممم..انا ماشي المغلق اجيب لي كم حديدة لانو هي بالغت و جاي افلس الباب..

حازم عاين ليه

_طيب تعال اوصلك..

محمد هزا راسو..

ركبو مشو المغلق..

و اشترو حاجاتهم بسرعة و ركبو راجعين تاني..

حازم عاين ل محمد..

ع حسب كلام ريفان..

محمد بحب امو شديد شديد..

دا غير انو اخر العنقود..

طيب..

حواجبين حازم اتلاقو..

هادي و طبيعي يعني شديد شديد..

هو الكتمان و الحجب للمشاعر حقتهم دي حاجة طبيعية ف اهلهم يعني؟

محمد انتبه انو حازم مركز معاه..

-you seem lost..

حازم ابتسم..

_just thinking..

-في؟

_كيف انت و ريفان بتتشابهو..

-ف الشكل؟؟

محمد صحك..

حازم هزا راسو ب معني لا..

_ف بعض التصرفات..

محمد عاين ليه..

-للدرجة دي؟

حازم هزا راسو

_ماخدة منك كتير..انتبهت للحاجة دي و انا هناك معاكم و حسي برضو..

-حسي؟

حازم عاين ليه

_الكتمان..

حواجبين محمد اتلاقو

_كنت قايلها صفة اكتسبتها هي و هي بتكبر..بس شكلها حاجة وراثة فيكم..

-زي م هي وراثة فيكم؟

حازم ابتسم شوي

_شوية زينا..

بلل شفايفو و عاين لبه

_بس نوع الكتمان حقنا و حقكم مختلفين ب طريقة كدا م طبيعية..

محمد استغرب..

-كيف م فهمت..

حازم قبل منو و رجع عاين للشارع .

_زي الفرق بيني و بين ريفان..

محمد ضحك..

م قدر يرد ليه لانو مثال ممتاز..

حقيقة و مقنع..

_فهمت؟

-امم..

الفرف بينهم زي الفرق بين السما و الارض..

هو واقعي شديد و بارد .

و هي دايما بتلجأ للخيال و بتنفعل ف اي شيء..

هو نادرا م يبتسم..

وخي من كترة م بتضحك لحدي م بقت م بتقدر تبكي زاتو..

هو م بشتغل ب زول..

وهي دايما بتخت اعتبار للناس..

هو بعمل الفي عقلو و ب حياتو..

وهي بتفكر الف مرة..

تكاد تنعدم المشاعر ف وشو..

وهي حرفيا ممكن تتقري بس من وشها ل بعض الناس..

-بس اعتقد دا لاني كنت اكتر واحد بقضي معاها زمن..

حازم عاين ليه

-من و هي صغيرة..م كانت داخلة ف اختها شديد..ولا حتي امها..كان دايما امي..

محمد بلل شفايفو شوي لمن قال امي..

اعتقد اصعب حاجة عليه انو يقول الجملة المفروض يقولها بعد اسمها كدا ساي..

اخد نفس..

-الله يرحمها..كانت دايما بتمسكها عليها..بتعاملها و كأنها بتها م بت بتها..

محمد ضحك شوي

-و انا كنت بعاملها و كأنها اختي م بت اختي..ف ف البداية كنت بحقر بيها..احساس دي امي انا..و هي حبوبتك..ليه تعاملك و كأنك بتها..

محمد استعدل ف قعدتو شوية

-ف مرة حاولت اغرقها..

حازم عاين ليه

_عمرك كان كم؟

-اممم..انا اكبر منها ب 8 سنين بس..امم 13 تقريبا؟؟..و هي كانت 5 بس..

حازم رفع حواجبينو و رجع عاين للشاؤع تاني

-ف سقتها للبرميل الورا..و رميتها فيه..و انا ماسك قميصها ب ورا..

محمد قعد يضحك..

اعتقد م حصل مرة ف حياتو م اتزكر او حكي الموقف دا و قعد يضحك كدا..

-ففااا..كنت مثبتها من ب ورا..و يلا بتكلم معاها..كنت بتغاظ لانها بتقول ل امها ماما و ل امي..الله

يرحمها امي..كيف تقول ليهم الاتنين كدا..

حازم ابتسم..

-ففاا بس بقيت بدخلها جوا الموية و هي بتصرخ و بمرقها و تطلع تكح..و بقول ليها ''اسممها حبوبةةة..حااابوووببباااا فاهمة؟؟؟..اوعا تقولي لبها امي..انا بس بقول ليها امي.."

محمد ضحك تاني

-وهي تبكي و انا ادخل..و امرق.."ياا بت فااهمة ولا لا؟؟؟.."..هزت راسها..و اقول ليها تاني.."اسسسمهااا منوو؟؟..".. ترد لي ب بكي و صواريخ "حااابوووباااا.."..اهز راسي و اقول ليها "اانا بس اقول ليها اميي..اوعا تقولي ليها كدا تاني.."..وهي بس تبكي..

حازم ضحك شوية ع المتظر لمن اتخيلو..

حرام عليه يعمل كدا ف شافعة؟؟..

محمد زاتو ضحك..

-كنا ب ورا ف الزقاق قبل م يحولوه مخزن..

_و ما ف زول سمع صواريخها؟

-كان ف ضيوف جوا..

حازم ضحك

-ف لمن مرقت..كانت مبلولة كللياا..و امي لقتها و سألتها مالك اتبليتي و شاكلتها و هي اصلو ابت توريها الحصل..

حازم ضحك..

شبها اصلا..

-ف غيرت ليها و كلو..و مشت قعدت معاها ب مزاج..اصلو م كوركت ليها..لو عاوزاها بتمشي ليها ل عندها..

حازم و محمد ضحكو..

-كان معانا ناس خالي الله يرحمو..ف لمن جا خالي يمرق..هو خالي الكبير و بقول ليها سوسي..بس ودعها و قال ليها سوسي..

حازم رفع حواجبينو..

-ف لقطت منو الاسم و تاني امي اصلو م قالتها..

ضحك شوي

-قدر م حاولو يخلوها ترجع ل امي ابت..بس سوووسيي..طيب قولي ليها حبوبة؟؟..تقبل تعاين لي كيف كيف و تقول ابيت م بقول ليها حبوبة..

حازم ضحك

_قوة راس..

-ااي قوة راس موبالغة..اصلو ابت تقول ليها حبوبة..غتاتة لي بس..و م بتقول امي خوفا مني..

حازم ضحك

_يعني مشت ب طريقتك لكن ليه الزول بحس انو هي فازت م انت..

محمد ضحك

-ايوااا..بالزبط كدا..مشت ب طريقتي لكن هي الفازت..

حازم ضحك..

ياهو شبه ريفان..

نزلو من العربية..

محمد جا يدخل و قال ل حازم الا يدخل..

ف النهاية دخل معاه..

جا ماري ف الناس سااي..

م عرف زاتو هم منو..

لمن وصلو ل جمب قدام الباب حق اوضتها ف نهاية البيت..

لقو لينا و وابل و نون و مروان قاعدين ف الكراسي القدامها..

لينا عاينت ل حازم

-حازم..

حازم عاين ليها و ابتسم..

مروان عاين ليهم..

محمد:انا حافلس الباب دا..

مروان قام عشان يساعدو..

حازم كان واقف بعيد شوية..

حاولو مع الباب شديد و كتير..

حازم كان بس بتعاين ليهم..

شوية كدا و سمعو صوت مرا تقول

"لسا م فتح؟

محمد عاين ليها و رجع للباب:لسا والله..

حواجبين حازم اتلاقو اول م شافها..

عاين ل لينا..

و لينا عاينت ليه..

عرفت انو استغرب من الشبه البينها و بين ريفان و هزت راسها عشان تأكد ليه الافكار الفي عقلو..

حازم قبل رجع عاين ليها تاني..

دي امها..

ام ريفان..

م كان بسمع عنها كتير..

لكن بتشبهها شبه م طبيعي والله..

كان وشها واقع و احمر من البكي لكن تحس بيها وقفت بكي ليها فترة..

عاينت ل ناي لينا:وابل و لينا و نون..كيفكم؟

قامو سلمو عليها و عاينت ل حازم..

حازم مشي وقف و سلم عليها..

امها كانت بتعاين ليه ب استغراب..

احساس دا منو..

و حازم طبعا البرود و الهدوء الفي وشو اصلو اصلو اصلو م بسااعدو والله..

محمد عابن ليهم:دا حازم ولد عمة ابوبكر الشغال معاي هناك..

امها عاينت ل محمد:ابوبكر صحبك؟

محمد:اممم..زميلها شديد ف الجامعة..

امها عاينت بيه و ابتسمت:و انا اقول الشبه الفيك دا شنو..

حازم ابتسم ليها..

امها ضحكت:خليك مبتسم..انت احلي و انت مبتسم..

حازم بس عاين ليها..

شوية كدا و سمعو ليه صوت فتحة الباب..

كلهم عاينو للباب..

و مروان و حازم بس واقفين..

حرفياا البقية كللهم دخلو جوا الاوضة..

لينا ع وابل ع نون ع محمد ع امها..

دخلو و لقوها نايمة ب فنيلة كات و بنطلون البتلبسو تحت الاسكريت..

لينا استغربت:صحت تاني و قلعت الاسكيرت..

محمد ضحك:حتقعد تصحي كل فترة و تقلع و ترقد تنوم تاني؟

امها مشت عليها و هزتها:ي بت..ريفانن..

بعد كم محاولة و ثانية ريفان كرفست وشها و ون م تفتح عيونها ردت ليها

_امم..

امها:ي بت قومي..

_اممم..

امها:انت نايمة ليك يووم و حاجة قوومي ي بت..

ريفان اتقلبت للجهة التانية

_اها و يعني؟

امها:ي بت قومي..

ريفان طلعت نفس طويل:طيب..بعد شوية..

محمد عاين ليها..

محمد:خليها خليها..

امها عاينت ليه

محمد:بتقوم بعد شوية المهم هي كويسة..

امها قامت ع حيلها و مرقو خلوها كلهم..

♤°♤°♤°♤°♤°♤°♤°♤°♤°♤°♤°♤°♤°

ريفان فتحت عيونها تاني..

عاينت حوليها..

المكان كان مضلم..

اتقلبت ف السرير و حاولت تنوم تاني..

لكن اصلو م قدرت..

بس قعدت تتقلب ف السرير يمين شمال

شمال يمين والله والله والله قريب الساعتين.

ف النهاية لمن زهجت و غلبها..

اضافة ل انو العطش كان منشف حلقها..

و الجوع عاصر بطنها ب شكل..

ف النهاية قامت ع حيلها..

حست ب جسممها تقيل شديييد..

عادة لمن الزول ينوم زيادة عن اللزوم..

موش بقوم وهو حاسي انو جسمو تقيل و مكسر؟

يلا دي التقول جسمها عمارة و التقول رموها تحت اربعة دفارات مشو و جو راجعين فيها..

قدر م احاول اوصف ليكم م حتفهمو..

ياخ ل درجة انها رجعت ختت راسها ف السرير تاني..

راسها كمان كان واجعها بطريقة كدا لا تتحمل..

اعتقد من البكى خلال النوم البتبكيه مرات دا..

ريفان رجعت رقدت تاني و اتقلبت ف السرير..

م كانت قادرة تتحرك اصلو.

لقت شنطتها قدامها.

مدت يدها و شالت التلفون.

كان شاحنو قرب يقطع.

فتحتو..

لقت مليون مكالمة من لينا و نون وابل..

عاينت لقت حازم برضو متصل عليها كتير..

فتحت الواتس و لقت ديك بتكلمو..

رفعت عينها و عاينت للساعة..

كانت 2 صباحا..

ريفان طلعت نفس طويل..

قرت جزء من الرسايل و معظمهم م عاينت ليهم زاتو..

بس فهمت انهم شايلين همها و بس عاوزنها ترسل اي شيء..

كتبت ليهم انا كويسة ي جماعة و بس قفلت التلفون طوالي..

اتقلبت بعد فترة و بقت بتحنس روحها تقوم..

اعتقد من الجوع و العطشة م حتقدر تواصل رغم انها نعسانة..

نعسانة..

واااو..

اعتقد دا شعوور م بواصل فيها ليه فترة..

ريفان رفعت راسها و واتكلت ع رجل السرير..

والله اول م وقفت بس التقول ف شيء جرا ليها جسمها للارض والله..

رببببب وقعت ف السرير تاني..

طلعت نفس طويل..

اعتقد انها عيانة..

النوم بمرض؟

لفت عيونها ع الفكرة الغبية دي و حاولت تقيف تاني..

اساسا م نامت كتير..

8 ساعات بس نوم كتير كيف يعني؟

دا استهبال منها ساي..

حاولت تقوم تاني و قوت نفسها..

و بعد م يقارب ال4 دقايق قدرت تقيف زي الناس..

قامت و وصلت للباب بعد جرجرة و تعب..

فتحت الباب..

حواجبينها اتلاقو ع الانوار المنورة..

لناس مجدعين و نايمين لكن حرفيا نص البيت منور..

ريفان طلعت نفس طويل و مشت ع المطبخ و هي بتزح ف الشعر من وشها..

اخخخ مرات بكون نفسها تمسك الحلاقة و تنتهي منو مرة واحدة..

دخلت المطبخ و لقت قدامها كوز موية..

شربت من الحفاظة الجمبها دي طوالي..

و من العطش م انتبهت انو كملت الكوز الضخم دا كلو..

و كمان م انتبهت انو الموية مع بطن فاضية م بتنفع..

بالله بس نزلتو من وشها و ختتو ف المصطبة..

مسكتها ليك بطنها..

التقول بس سكينة بتدور..

والله لامن م قعدت ف الارض من الوجع..

بقت ماسكة علي نفسها بطنها و قاعدة بالله ف الارض مدية الباب ضهرها..

بطنها قعدت توجعها مسااافة..

و بعد م فكت بالله بقت بس قاعدة ف ارضها..

البقومها شنو حسي ب جسمها الواجعها دا؟

تكلت راسها ف الثلاجة الجمبها..

اعتقد لو نامت هنا الناس حيكونو قايلنها جنازة ي منظرها دا..

عادة هي بتجوع نص الليل؟

هه اكيد بتجوع..

طيب..

اااا..

صح صح..

سوسي كانت بتجيب ليها الاكل كل مرة و تقعد تتونس معاها..

طيب ليه م جاتها حسي؟

جد جد ل كسر من الثانية ريفان كانت ناسية انها اتوفت..

و اول م عقلها الباطني صرخ ليها

'هي ماتت'..

ريفان دي طق طق طق الماسورة اشتغلت من عيونها..

دنقرت و قشتهم..

المشكلة كل م تقش كل م بنزلو زيادة و بتقش تاني و بنزلو تاني..

زحت شعرها من عينوها لمن لقت انو جزء من دخل جواها..

قشت نخرتها و تاني قشت عيونها..

شوية كدا و تحس ليك ب يدين يدخلو جوا شعرها و يلموه..

ريفان دي اتلفتت مخلوعة بالله عاوزة تصرخ..

لمن لقتو محمد الخلعة م زحت..

ابدا..

بس اتحولت ل حيرة..

حواجبينها اتلاقو اول م عاينت ليه..

محمد عاين ليها

-قبلي كدي المو ليك..

ريفان طوالي قبلت و قعدت تقش ف وشها..

بتحلم هي؟

دا جا من وين فجأة؟

وايت سمعت صوتو كيف بتحلم؟

رجعت قبلت عاينت ليه تاني بسرعة..

وهو ب لفتتها يدو فكت جزء من شعرها..

طلع نفس طويل

-خربتيها..ياخ قبلي..

ريفان تاني قبلت قدامها..

اهو تاني سمعت صوتو..

بسم الله..

بسم الله الرحمن الرحيم..

بسم الله بسم الله..

لسا بتحلم؟

كيف و هي سامعة صوتو..

طيب ماتت ي ربي و هو جاها ف الحلم؟

دي شنو السخافة البقول فيها دي؟

طيب جا كيف فجأة من النص التاني من العالم؟

ريفان كانت متأكدة انو اوقت الطيارة من هنا و هناك للساعة 2 كدا م بتوصلو..

طيب بسم الله؟؟

لمن انتهي من ربط الكعكة ليها بعد محاولات جاهدة وقف ع حيلو و جا قدامها..

رفعت راسها عاينت ليه

-قومي من ارضك

ريفان هزت راسها

_م قادرة حاسة ب جسمي اكياس اسمنت من التقل..

-نايمة الوقت دا كلو و م يبقي كدا كيف؟؟

محمد دنقر و مسكها رفعها من الارض لحدي م بقت قادرة تقيف ع رجليها..

-ي بت انتي بتضعفي كدا كيف؟م بتاكلي؟

ريفان م ردت ليه..

_حسي عاوزة اكل لكن م في شيء ياكلوه..

محمد طلع نفس طويل

-اقعدي بعمل ليك شيء تاكليه..

ريفان مشت ع الكرسي الفي الطرف و قعدت فيه بعد تعب..

لا جدجد لازم تكشف والله بالتعب دا..

محمد مشي ع التلاجة مرق خضار و بيض و جبنة و المهم ساط ليها اكلة و ختاها ليها ف الصحن و مشي ختاها ف التربيزة القدامها و جاب ليها العيش..

ريفان ابتسمت من الفرحة لانو دا اكل قدامها و هي اعتقد ع حافة الموت ب سببو و طوالي قعدت تاكل..

محمد شال الكباية و مشي جاب ليها لبن و دفاه ليها و عمل ليها فيه كاكاو و ختاه ليها..

ريفان انبسطتت شديد و قعدت تاكل..

محمد قعد قصادها و بعاين ليها و هي بتأكل..

تحس بيها فرحانة لكن طريقة اكلها توضح ليك انو نفسها مقفولة من كل شيء و بتاكل لانها مجبورة..

ريفان رفعت راسها عاينت ليه

_انت جيت هنا كيف؟

-كيف يعني كيف؟

_جيت من المطار حسي ولا شنو؟

-جيت من الساعة 4 قبيييلل..

حواجبين ريفان اتلاقو

_كيف يعني جيت الساعة 4 ؟

محمد بس عاين ليها

_جيت و انا ف الجامعة؟

-هو انتي قبيل مشيتي الجلمعة؟

_انا جيت من الجامعة؟

حواجبين محمد اتلاقو

-انت نايمة ليك كم؟

_من 6 مساء من م جيت و حسي 2 صباحا..8 ساعات..

محمد رفع حواجبينو..

-يوم شنو؟

_الاحد..كيف يعني يوم شنو؟..حسي صبحية الاتنين..

محمد بلل شفايفو

-ريفان..حسي صبحية التلاتاء..

حواجبينها اتلاقو..

اا؟؟

كيف يعني؟..

-انتي نايمة ليك اكتر من 24 ساعة..بالتحديد 32 ساعة..

ريفان رفعت حواجبينها

-انا جيت يوم الاتنين الساعة 4 صباحا..

ريفان كانت بس بتعاين ليه

-و انتي نمتي من يوم الاحد الساعة 6 مسا..

النظرة عدم التصديق كانت مرسومة ب جدارة ف وشها..

-جسمك دا واجعك كدا لانك م اتحركتي من السرير المدة دي..و انتي جعانة للدرجة دي لانك م اكلتي للمدة دي كلها. و راسك واجعك كدا لانك كنت نايمة المدة دي كلها..

ريفان بللت شفايفها

-الحاصل ليك دا كلو لانك نايمة المدة دي..

رجعت عاينت للصحن تاني..

هه..

السيدة ريفان نامت المدة دي كلها؟

و لسا نعسانة مستعدة تواصلها؟

دي منو دي؟

جات من وين؟

دا شنو دا الحاصل؟

من متين بتقدر تنوم 4 ساعات؟

خلي ضعفها 8 مرات؟؟

حررفيياااا..!!

-و نفسي اعرف انتي العندك اضطراب نوم..قدرتي تواصليها كدا كيف؟

ريفان رفعت حواجبينها اول م اتزكرت هي سوت شنو قبل م تنوم..

بللعت حبوب امها حقات العملية..

2 منهم م واحدة بس..

عضت شفتيها مع بعض و تكلت وشها ف يدها..

دا شنو التصرف الما بشبهها دا..

محمد عاين ليها

-عملتي شنو عشان تنومي قدر كدا؟

ريفان طلعت نفس طويل و هي بتعاين ليه..

-بلعتي شنو؟

ريفان عابنت ل محمد..

مرات بكون نفسها تكفت روحها لانو هو بقدر يقراها كدا..

_كيف عرفت اني بلعت حاجة؟

-لانك م حتقدري تنومي ب تواصل كدا لو م بلعتي شيء..بزات ف حالتك دي..

ريفان طلعت نفس طويل وهي بتشرب من اللبن حقها..

-اها؟

_حبوب منومة كدا ادوها ل امي ل عمليتها..

محمد عاين ليها

-كم واحدة؟

_واحدة..

محمد لفي عيونو

-واحدة تاثيرها م قوي كدا..ريفان انتي كان و كأنك مخدرة ف ب بنج عديلك كدا..

ريفان طلعت نفس طويل

_اعتقد اتنين او تلاتة..

-تعتقدي؟

ريفان م ردت

-ريفان انتي لو كان بلعتي اكتر كان ممكن تموتي..

ريفان رفعت رلسها عاينت ليه

-بلعتي من الدوا الكان ف الشباك الجمبك صح؟

هزت راسها براحة..

-الشيء دا ل عمرك كان ممكن يقتلك..

ريفان رفعت حواحبينها

-ربنا سترك بس..كيف يعني تعملي شيء وي دا؟؟..

اول مرة محمد يوبخهها بالطريقة دي..

اعتقد لانو دي اول مرة تغلط غلطة زي دي..

-بلعتيها ليه؟..كنتي عاوزة تموتي؟؟

حواحبينها اتلاقو

_انت متخلف؟..كنت بس عاوزة انوم و م اصحي قريب..

الشدة ظهرت ف وشو

-الاتنين نفس الفهم..

ريفان عاينت ليه..

محمد كان جادي اتم الجدية..

و الشيء دا خلاها تحس بالذنب زيادة..

-لو كان بلعتي اكتر كان متي..بتموتي م قاصدة ع انك تموتي لكن كان بتموتي ف النهاية..

ريفان حست ب الذنب اكتر كمان ع جملتو دي..

قصدو كانت محاولة بدون قصد للانتحار؟

محمد انتبه ليها و ل ملامحها..

طلع نفس طويل و قشي وشو

-م تعملي كدا تاني فاهمة..

الدمعة نزلت من عينها و هي بتهز ف راسها..

محمد دا حسي ب قلبو يتقطع لمن لقاها بتدمع..

ريفان قشت وشها كم مرة و حاولت م تبكي..

لكن ف النهاية ختت يدينها ف وشها و الدموع ديل بس بقو ماسورة..

محمد ختي يدينو ف وشو وهو حسي م عارف يسوي شنو..

عارفها م بتبكي ب سببو بس برضو حسي بالذنب..

امكن لانو هو السبب ف انها فكت تماسكها لانها انتبهت انو كان ممكن برضها تموت..

♤°♤°♤°♤°♤°♤°♤°♤°♤°♤°♤°♤°♤°♤°

حيدر مرق من الكافتيريا و اتجه ع الكلية..

كان شايل بارد ف يدو لسا م فتحو..

دخل الكلية و مشي ع المكتبة حقت الدراسات العلية..

اخد قعدتو و قرايتو و مرق بعد فتررة طويلة..

لمح نشوة قاعدة هناك..

مشي عليها و قعدت جمبها..

نشوة عاينت ليه و لفت عيونها..

-عاوز شنو؟

حيدر عاين ليها

=اعتزرت ليك الف مرة..مالك لسا زعلانة

نشوة عاينت ليه

-و يعني سنورلو اعتذرت؟..مجبورة اقبلو بعني؟

=ع الاقل ختي ليها اعتبار؟

-هه..لو م خاتة ليها اعتبار م بنكون حاليا بنتناقش..

حيدر ضحك

-انت الجابك شنو اساساا .تخريج و اتخرجتو..

=بحضر ف كم حاجة..

حواجبين نشوة اتلاقو..

-انت احد الطلاب الحيبقو يدرسو؟

حيدر هزا راسو

-واااو..

حيدر ابتسم

=انت كنتي مقتنعة تماما اني بليد صح؟

نشوة شحكت ضحكة استهتار

-انت م كنت اساسا حتقدر تدخل معمار و تواصل بدون م تربت و كمان تتخرج كدا بسرعة لو كنت بليد..

حيدر هزا راسو..

وجهة نظر مهمة..

-لكن برضو..

حيدر ضحك..

نشوة رجعت ل تلفونها تاني..

حيدر عاين ليها

=ريفان..

نشوة رفعت راسها عاينت ليه..

=وينا؟..لؤ فترة م شفتها..

حواجبين نشوة اتلاقو

-دا لانك م قاعد تجي ف اوقات مناسبة..

=مرات بقعد كتير لكن برضو م بتظهر..

-مرات شنو؟هي بس امبارح م جات و قبيلها مرقت بدري..

=ليه م جات؟

-حبوبتها اتوفت الله يرحمها

..

حيدر استغرب..

=حبوبتها؟

نشوة هزت راسها..

-امم..

=طيب الليلة جات؟

-م بعرف..اعتقد؟..

=شوفتي طيب صحباتها ف مكان؟

-قبيل لمحتهم يدخلو المحاضرة..لكن تقريبا لسا م مرقو..

حيدر هزا راسو..

♤°♤°♤°♤°♤°♤°♤°°♤°♤°♤°♤°°♤°♤°♤°

حازم دخل كلية معمار بعد م جا من الكافتيريا..

كان شايل باقة موية ف يدو..

دخل و طوالي ع السلالم ركب للقاعات الفوق..

اخد فترة وهو بفتش ف قاعدة معينة..

ولمن لقاها دخل..

بلل شفايفو لمن لقاها فاضية..

ف النهاية نزل تحت و بقي و كأنو رايح..

شوية كدا و مشي ع الكنب القاعد هناك..

جا مارق ف نشوة و م انتبه ليها الا لمن لفتتو..

نشوة ضحكت و عاينت ليه

-مالك عامل زي الرايح كدا؟

_بفتش ف ريفان..

-هي جات؟

_اممم..

-وينا م شفتها..

_انا بفتش فيها حسي..

حازم طلع نفس طويل

_م تكون رجعت البيت..

نشوة عاينت ليه..

تحس بيه متحير م عارف يسوي شنو..

اول مرة نشوة تحس بالاحساس دا منو..

-حازم..

حازم عاين ليها و رفع حواجبينو

-انت حبوبتها الاتوفت دي..قريبة؟

ابستم وهو بقول ليها

_شديد..ربنا يرحمها..

-ربنا يرحمها..

_باعتبار انها هي الربتها..

الزعل ظهر ف وشها

-عاوزة امشي اعزيها بس خايفاها تقعد تبكي ف نص الجامعة..الا امشي ليها ف بيتهم تاني..

حواجبين حازم اتلاقو

_مشيتي ليها انتي؟

نشوة هزت راسها

-امبارح..مع بنات دفعتها باليل كدا..لكن لقيناها نايمة ف رجعنا..

حازم هزا راسو..

-خلاص م امسكك امشي شوفها وين..

حازم ابتيم ليها و طوالي اتحرك ع الكنب العادة بتقعد فيه و ترقد مع صحباتها..

اخد فترة لحدي م لمح لينا قاعدة..

مشة وقف جمبها و لينا عاينت ليه اول م حست ب زول وقف قدامها..

-حازم..

حازم كان بعاين ل ريقان..

كانت راقدة ف الكنبة ع يدينها و تحس بيها جدجد نايمة؟

حازم عاين ل لينا

_نايمة؟

لينا هزت راسها

-اممم..دقست حسي..

حازم رجع عاين ليها تاني..

نومها الكتير الظهر فجأة دا بقي مقلقو..

_عارفاها صحت كم امبارح؟

-تقريبا 2 صباحا..لانها رسلت لبنا بالوقت دا..

_ونامت تاني من الوقت داك؟

-م بعرف..اعتقد..

حازم عاين ل لينا..

لينا وقفت ع حيلها..

-ممكن تقعد معاها؟..محتاجة امشي الكافتيريا و اجي..

حازم ابستم ليها و هزا راسو..

لينا قامت ع حيلها..

-م بتأخر..

حازم هزا راسو و لينا طوالي اتحركت..

حازم قعد قصادها طوالي و هي نايمة..

عاين ليها مسافة..

نتفسها كان ب انتظام..

م اتحركت ولا حركة من رقدتها..

راقدة ع يدينها الاتنين..

حازم عاين ل اطراف اصابعينها..

كانت لابسة ليها زي تلاتة خواتم..

مدا يدو و هبشهم براحة..

م بعرف ليه..

بس بالجد البت دي زعلها مزعلو شديد شديد شديد..

زيادى عن اللزوم..

لدرجة انو شايل همها شديد..

مركز معاها و بس بفكر لو هي حاليا بتبكي او لا..

طلع نفس شوية و حواجبينو اتلاقو..

ي ربي دا لانها ادخلت ف حياتو؟

ليه فترة بفكر..

رغم انو ريفان كانت موجودة ف حياتو ف كل الاحوال..

قبل مشيتو الظهرت فيها فجأة ف لندن دي او لا..

قبل م يتعرف عليها شخصيا او لا..

هي كانت موجودة..

بس لمن دخل هو حياتها..

حاجات كتيرة اتغيرت..

بقي بضحك اكتر شوية..

ببتسم للناس اكتر..

بتعامل مع الناس اكتر..

انفتح اكتر شوية..

و قدر يفهمها و يفهم نقطة انك تكون بتعرف الزول من بعيد..بس حاجة مختلفة تماما لمن تتعرف عليه شخصيا..

و كأنك بتتعرف ع زول من اول جدجد انت الريدي حافظو حفظ..

حياتها و بعض مبادئها..

ضحكتها و طريقة كلامها..

صوتها و طريقة تعملها مع اي شيء ف حياتها..

غيرت فيه حاجات بسيطة جدا جدا جدا..

اولها انو بقي بتعامل مع لينا..

و اخرها انو بقي بخت احتمالية انو غلطان..

اعتقد انها علمتو الحاجة دي..

و فجأة بطريقة ضحكتها بتقت بتسعدوا..

صوتها بقي بجذب اتنباهو اكتر..

طريقة كلامها بقت هدف تنبأؤ..

افعالها بقت اكتر شيء جاذب انتباهو..

حواجبين حازم اتلاقو وهو بلاحظ ل حاجة..

ليه بقي حاسي ب نفس المشاعر المديها ل نيفين مكبوبة فيها هي..

حاسي انو حبو ل نيفين استنسخ روحو و جا اتلصق ف ريفان..

بس بطريقة مختلفة شوية..

سواء زمان او حسي..

البت لسا محيراه والله..

حازم رفع حواحبينو ع حركة اصابعينها الاتحركت فجأة ديل..

اعتقد هو بهبش ب اطراف اصبعو يدينها من قبيل بدون م ينتبه ليه فترة لدرجة انو صحاها..

ريفان ضربت اصبعها ب يدو..

تحس بيها عاوزة تعرف دا شنو؟..

رفعت راسها براحة من يدينها و عين فاتحة و عين مغمضة..

عاينت ل حازم ب عين واحدة..

وشوية كدا و فتحتهم الاتنين..

لمن استوعبت انو دا حازم عاينت ليه..

-هيي..

حازم ابتسم ليها

_كيفك؟..

-م كويسة..

و رجعت طوالي ختت راسها ف يدينها تاني..