الجزء 18

قاعده اميره جمب ياسر و شايله كاس و تضحك و تتونس

في اللحظه ديك يجو داخلين مراد و مصطفي...

اميره تشوفهم من بعيد و تتخلع.. و تقوم سرعه من جمب ياسر و تجري علي باب النجيله ورا تعاين ليهم من بعيد و تسمع ترحيب الباشا بيهم..

وليد:(اهوووو حبايبنا .. اخيرا شرفتونا)

و يسلم عليهم.. اميره خافت شديد انو مراد يكون لمحها ..

طلعت جرت العربيه..قعدت و اعصابها بايظه..

تفكر و تقول في نفسها:( الباشا بعرف مراد و اصحابو معناها اكيد بعرف جمانه.. ي الله.. اعمل شنو...كنت مستنيه الباشا يخدميني.. ي الله اعمل شنو اعمل شنو)

فجاه تجيها فكره تبتسم...

تشيل التلفون و تضرب..

اميره:( الو.. ايوا ي جيجي.... زحي من الجوطه دي و اسمعيني..يلا سرعه.... )

جيجي تطلع البلكونه..

جيجي:( ايوا سامعاك)

اميره:( انا مشيت.. عايني.. في واحد اسمو مراد قاعد جمب الباشا.. لابس قميص كحلي و بنطلون اسود.. اسي جا داخل هو و صحبو .. المهم...دايراك تتعرفي عليهو و تشيلي رقمو و تتفقي معاهو تلاقيهو.. ااي ضروري...لاازم.. بحكي ليك.. بعدين...لمن تعملي كده وريني...تمام)

و تقفل...

طلعنا انا و يارا و ماريا نشتري فساتين للخطوبه مع اني م كان عندي مزاج للطلعه بس م قدرتا اقول لا.. مشينا لفينا كتير حتي لقينا فساتين كويسه..و ماريا اشترت توب... و رجعنا..

دخلنا البيت لقينا اميره قاعده تتونس مع ناس ماما.. وريناهم الفساتين الجبناها.. اميره عجبها حق يارا و لمن شافت حقي.. كشرت وشها و قالت لي:( يعع م حلو.. ذوقك كعب)

اتخلعتا من كلامها.. بس قلتاليها:( انا عاجبني)

يارا:( بلعكس حق ميمي حلو انا كنت دايره ذيو بس م لقيت مقاسي)

اميره:( معناها م عندكم ذوق)

سكتا منها... امي و ماما ليلي كانو مشغولين بتوب ماريا و م ركزو لكلامها...

اميره تلفونها دقي.. شالتو و طلعت غرفتها..

قلتا ل يارا:( دي مالا بقت كده?)

يارا:( م بعرفا)

يارا كانت حاسه بالكلام السمعتو من اميره انو اميره عندها حاجه مع مراد.. بس م قدرت تتاكد او تفهم نوع العلاقه شنو..

اميره قعدت في غرفتها بتتكلم في التلفون و عيالا كانو نايمين..

اميره:( ايوا ي جيجي.. اها حصل شنو?? )

جيجي:( كلو تمام اخدتا رقمو و حالاقيهو)

اميره:( تمااام...اها متين?)

جيجي:( م عارفه والله م حدد.. بس بكرا الصباح بضرب ليهو و بحدد معاهو)

اميره:( لازم بكرا)

جيجي:( طيب.. المهم قولي لي ده منو?? الباشا كان مهتمي بيهو شديد هو و صحبو)

اميره:( ده ولد عمي.. و بحبو و دايراهو بس هو بحب غيري)

جيجي تتخلع:( ولد عمك?)

اميره:( ااي.. حاحكي ليك عشان محتاجه ليك تساعديني)

قاعدين احلام و سوسن في بيت سوسن...سوسن قاعده في المكنه بتخيط..

احلام:( اها البيت كيف?)

سوسن:( الحمدلله كلو نعمه من ربنا)

احلام:( العيال مرتاحين?)

سوسن:( احمد م بقول حاجه بس ايه م مرتاحه.. و بليل بتخاف الا تجي تنوم جمبي)

احلام:( شويه و بتتعود)

سوسن:( ايوا ان شاءالله)

احلام:( محتاجه حاجه ي سوسن?)

سوسن:( لالا الحمدلله)

احلام:( لو محتاجه ااي شي اطلبي مني احنا اخوات)

سوسن:( عارفاك والله ي احلام م بتقصري)

احلام:( ده واجب والله... انتي طوالي شغاله كده? كل م اجي بلقاك شغاله)

سوسن:( ايوا طوالي شغاله والله.. اعمل شنو في شغل كتير مفروض اخلصو)

احلام:( بس القعده الطويله دي م كويسه.. ظهرك بوجعك)

سوسن:( الله كريم)

اميره مشت لمراد في غرفتو دقت ليهو الباب.. جا فتح الباب لقاها..

مراد مكشر:( نعم?)

اميره بصوت زعلان:( مراد انا اسفه.. م كنت مفروض اتعامل معاك كده.. م كنت اهددك.. مراد صح انا بحبك بس كلامك صح.. احنا م بننفع لبعض.. انا بعتزر ليك علي الاسلوب البايخ الاتعاملتا بيهو معاك و الكلام البايخ السمعتو مني..م تزعل مني.. انت مهما كان حبيبي و ود عمي)

مراد مستغرب فيها...

اميره دموعها نزلت:( انا حاطلع من حياتك و ربنا يسعدك انت و جمانه)

مراد:( الكلام ده من قلبك?)

اميره:( مراد صح انا زعلتا و جوطتا معاك بس كانت لحظات شيطان و راحت.. و اسي اانا اقتنعتا ب انو حياتنا مستحيله مع بعض.. و انت تستاهل وحده ذي جمانه.. ربنا يسعدكم ي رب)

مراد يبتسم:( ٱمين)

اميره تسمح دموعها:( يلا تصبح علي خير)

مراد:( و انتي بخير)

و تمشي علي غرفتها تدخل و تقفل الباب و تضحك ضحك خبيثه و تقول في نفسها:( والله طلعتا غبي بشكل ي مراد)

يوم الخطوبه الصباح صحيت متضايقه قمتا صليت و قريت قران..عشان ابقي احسن.. و الحمدلله بقيت احسن اشتغلتا في البيت مع امي كتير عشان اشغل روحي.. ماما ليلي كل شويه تضرب ل امي تسالا من حاجه..

اميره م اتكلمت مع مراد تاني بس حاولت كتير انو تخلي جيجي تقنعو انو يلاقيها بس مراد كان مشغول شديد م قدر يلاقيها.. اميره زعلت شديد انو م لاقي جيجي.. بس قالت في نفسها:( م مشكله مصيرك تلاقيها بس اصبري لي ي مراد) قامت مشت الكوفير اتحننت و عملت شعرها و جهزت للخطوبه...

في بيت ناس جمانه.. قاعدين النسوان في جهه و الرجال في جهه..

جمانه ق

اعده مبسوطه و الفستان و الميكب طالعه قمر.. و اهلها ظريفين شديد و اخر ضيافه و كرم و ونسه معانا..

جا ابو جمانه قال حيلبسو الدبل...امي و ماما ليلي و ام جمانه بقو يزغرتو.. انا بقيت مبتسمه بس قلبي من جوه بتقطع.. انا صح بحب مراد من زمان...بس من وقت قال داير يخطب..حبيتو اكتر و حبو ليهو بقي كل يوم بيذيد..

جا مراد لبس جمانه الدبله و سلسل و اسويره.. و هي لبستو دبلتو.. و الزغاريت ملت البيت...كانو مبسوطين شديد..

حاولتا افرح ليهم بس م قدرتا.. بس الحمدلله قدرتا امسك دموعي.. يارا و ماريا و امجد قامو بتصورو معاهم انا م قمتا.. مراد عاين لي و ناداني.. قمتا مبتسمه مسكني من يدي و قال ل جمانه..

مراد:( متذكره السكره دي ي جمانه?)

جمانه:( ميناس طبعا متذكراها.. بقت حلوه ذياده)

مراد:( طبعا احلا وحده في الدنيا بت خالتي دي)

مراد حاول يرفع من معنوياتي.. ابتسمتا ليهم و حسستهم اني مبسوطه و وقفتا اتصورتا معاهم... اميره اتونست مع الناس كلهم و دخلت فيهم شديد لدرجه شالت ارقام تلفوناتهم كلهم.. حتي جمانه.. اميره اصلا كلامها حلو و تدخل القلب بسرعه و الحاجه الدايره تصل بتعرف تمثل لحدي م تصل ليها.. طبعا هي اصلا ممثله كبيره شديد..

الخطوبه م حصل فيها حاجه جديده و علي كده رجعنا البيت.. انا طول السكه ساكته لمن عمو هشام سالني قلتا ليهو صدعتا من صوت الاغاني.. عمو هشام و ماما كانو طوول السكه بحكو بالخطوبه و اهل جمانه الراقين ناس امريكا.. و انا كنت في عالم تاني بعيييد منهم.. دخلتا البيت قلتا ليهم تصبحو علي خير و دخلتا غرفتي قفلتا الباب علي و بقيت ببكي.. حسيت مراد خلاص راح مني.. اصعب احساس تشوفي الزول البتحبيهو مع وحده تانيه.. يبني حياتو و مستقبلو معاها .. و انا م قادره اعمل شي.. صوره مراد و جمانه مع بعض بقت قدامي طول الليل.. م قدرتا انساهم

نفسياتي الايام البعد الخطوبه كانت كعبه و م كنت دايره ارجع البيت هناك بس طبعا يارا م بتخليني تضرب لي كل ساعه تعالي تعالي.. في الاخر مشيت..

دخلتا البيت حسيت بالم كبيير.. اتضايقتا جدددا.. بس ابتسمتا لمن لقيت يارا جايه جاريه علي.. حضنتني و هي بتكورك...( ميمي...ميمي جات ي ماما.. ميمي جات)

بقتي بضحك قلتا ليها:( والله ي يارا انتي م طبيعيه ليه محسسناني كنت مسافره?)

جات ماما ليلي و ماريا سلمو علي..

ليلي:( البيت بدونك مظلم والله)

ماريا:( جد افتقدناك)

المسا۽ لاقيت مراد في الصاله كنا قاعـدين انا و ماريا بنحضر في التليفزيون.. و يارا كانت بتتكلم بالتلفون..

مراد من شافني ابتسم و بفرح قال لي:( ميمي.. اشتقنا ليك والله)

جا سلم علي..

مراد:( كيفك?)

قلتا ليهو:( الحمدلله)

عاينتا للدبله في يدو و سرحتا فيها حتي هو ركز لي و عاين لدبلتو..

مراد:( خلاص الاجازه خلصت?)

قلتا ليهو:( ااي)

مراد:( تمام.. يلا)

و طلع مشي..م قدر يقيف قدامي بسبب نظرات العتاب ليهو..

قعدتا سرحانه ماريا ركزت لي..

ماريا:( م تحسسيهو انك زعلانه قدر ده)

عاينتا ليها باستغراب..

ماريا:( عارفه ااي شي.. نظراتك ليهو فيها لوم ليهو.. و الم.. م تحسسيهو بشي)

سكتا م رديت عليها..

جات يارا مبسووطه قعدت جمبي..قربت مني و قالت لي..

يارا:(عارفه كنت بتكلم مع منو?)

قلتا ليها:( منو?)

يارا:( اسعد)

قلتا ليها:( اسعد منو?)

يارا:( الاستاد بتاعنا.. متذكره ايام الامتحانات جا شرح لي)

قلتا ليها:( ااهاا ااي اتذكرتو..و بتتكلمي معاهو ليه?)

يارا:( ايام االامتحانات شلنا ارقام بعض عشان الشرح و لمن اجزنا بقي بضرب لي كل كم يوم.. بسالني الاجازه كيف و كده بس)

قلتا ليها:( كويس.. بس م تتعمقي معاهو.. الاولاد ديل بتاعين حركات)

يارا:( ماف شي.. بس هو عاجبني)

عاينتا ليها..

قلتا ليها:( ماف شي? و عاجبك? شنو التناقض ده)

يارا ضحكت..

قلتا ليها:( خلي علاقتكم محدوده بس)

يارا:( ان شا۽الله)

نتلاقي❤