الجزء 2

اول ما امي اتحركت بالعربيه مع هشام انا جريت علي غرفتي كان خلاص فااض بي.. بقيت ببكي باعلي صوتي.. يارا و ماما ليلي و مراد و امجد كلهم جو وراي بقو بهدو فيني.. و انا ببكي بطريقه هستيريا..

ماما ليلي اهتمت بي شديد جات قعدت جمبي و بقت تتكلم معاي و تونسني و جابت ليك الاكل و العصير لحدي عندي.. لمن وقفتا بكي...

ليلي:( ميمي...الموضوع بسيط شديد.. امك عندها حق.. و هي جد محتاجه راجل جمبها.. انتي مصيرك تعرسي و تمشي.. و هي حتبقي براها)

قلتا ليها:( ماما ليلي م تحاولي تبرري ليها.. انا لسه صغيره علي االعرس.. و حتي لو عرستا امي م بتخلي عنها)

ليلي:( عارفاك حبيبتي.. بس الزمن بتغير و انتي حتبقي عندك حياتك.. بيتك و راجلك و عيالك.. و امك حتكبر في السن و محتاجه اهتمام شديد و رعايه و انتي م حتقدري ذاتك توفري ليها اي شي.. جد امك محتاجه لراجل في حياتها.. انتي اسي م حتفهمي الكلام ده.. بس لمن تكبري حتفهمي)

قلتا ليها:( ماما ليلي م تحاولي تبرري ليها)

ليلي:( المهم اسي انتي لازم تبقي قويه.. و تخلي الضعف ده.. انتي اقوي من كده...قومي شوفي مستقبلك و دراستك .. و احنا جمبك و عمرنا م بنتخلي عنك)

ماما ليلي اتكلمت معاي كتييير.. بس م قدرتا افهما..

بليل جاني مراد في غرفتي.. مبتسم و شايل كيس في يدو.. قعد في الكرسي جمبي... انا كنت قاعده في الكنبه و شايله كتاب بس سرحااانه بعييييد...

مراد:( مساء الخير)

قلتا لبهو:( مساء النور)

مدا لي الكيس...

مراد:( شوفي)

شلتا الكيس فتحتو...

لقيت علبه.. فتحتها لقيت ريحه و ساعه..

عاينتا ليهو باستغراب. .

مراد:( دي ليك)

قلتا ليهو:( المناسبه شنو?)

مراد:( بدون مناسبه)

ابتسمتا قلتا ليهو :( شكرا)

مراد:( عفوا.. يلا اقري طيب?)

هزيت راسي ب:( حاضر)

طلع مشي..

انبسطا ب هديه مراد.. بس لو كانت جاتني في وقت احسن من كده...كنت حاطير بيها السماء..

انا من صغيره.. متعلقه ب مراد شديد... او بحبو عدييل.. مش ااي بت لمن تكون صغيره عندها فارس احلامها... انا فارس احلامي كان مراد.. شايفاهو كل الرجال بعد ابوي...و من وفاه ابوي.. بقيت م بشوف غيرو.. بنبسط شديد لمن اتونس معاهو او اتكلم معاهو.. بس كل الحاجات دي جواي م بقدر اقول ليهو ااي شي...

دي الاحداث االمهمه الحصلت.. نرجع للحاضر.. اسي امي ليها اسبوعين من عرست.. بتضرب لي كل يوم تسلم و تطمن علي..

قعدنا اكلنا انا و يارا...و بدينا قرايه.. امتحاناتنا كانت قربت شديد...

بليل جات طالعه لينا ام ايوب..

كنا بنذاكر انا و يارا...

ام ايوب:( ميمي.. ساميه جات تحت.. بتناديكم)

قلبي وجعني.. بس ابتسمتا ..

قلتا ليها:( معاها عمو هشام?)

ام ايوب:( ايوا)

يارا:( حنغير و نجي)

مشت ام ايوب..

يارا عاينت لي...

يارا:( يلا ارح نغير و ننزل)

دموعي نزلت...

يارا:( مالك اسي?)

قلتا ليها:( م قادره اشوف امي مع راجل تاني غير ابوي)

يارا حضنتني..

يارا:( م تبقي حساسه كده.. الموضوع عادي...يلا ارح الناس مستنيننا.. اوعي تبكي قدامهم.. عيب)

قمنا غيرنت و نزلنا..

لقينا ماما و عمو هشام و ماما ليلي و امجد و مراد.. قاعدين يتونسو و يضحكو...

اول من شافونا.. ماما قامت و اتقدمت علي و حضنتي..

ساميه:( ميمي حبيبتي.. اشتقت ليك والله)

قلتا ليها بجفا:( كيفك ي امي?)

ساميه:(انا كويسه.. انتي كيف? و القرايه?)

قلتا ليها:( كويسه )

سلمتا علي عمو هشام و قعدتا جمب يارا...

ساميه:( ميمي حتمشي معانا الليله...حضري حاجاتك)

اتخلعتا..

قلتا ليها:( امشي وين?)

عمو هشام:(البيت.. حتقعدي معانا هناك)

قلتا ليهو:(لالا)

ماما اتخلعت ..

ساميه:(كيف يعني لالا?)

قلتا ليها:( انا طول عمري قاعده هنا...حتي لمن ابوي كان عايش.. كنت بقعد 10 يوم هنا و يوم في بيتنا)

ساميه:(عارفه بس برضو لازم تمشي معانا و تجي هنا خميس و جمعه)

قلتا ليها:( نشوف لحدي بعد الامتحانات)

ليلي:( خلوها تركز في الامتحانات و لمن تخلص تمشي)

ماما كشرت وشها بس م اشتغلتا بيها..

شربنا الشاي و الونسات كانت عاامه...

خلصو مشو بيتهم و طلعنا انا و يارا غرفتي..

يارا:( انتي صحي حتمشي مع خالتو ساميه بعد الامتحانات تخلص?)

قلتا ليها:( لا طبعا.. مستحيل اعيش مع راجل غريب انا.. قلتا كده عشان تخليني اقعد اسي.. و بعد الامتحانات حارفض عدييل...و م بتقدر تجبرني)

يارا:( م حتخليك)

قلتا ليها:( ممكن امشي ليهم خميس و جمعه اكتر من كده لا)

يارا ابتسمت:( انا متعوده عليك والله.. م بقدر اقعد بدونك.. شايفه براك امجد و مراد كل واحد في حالو.. لا بقعدو لا بتونسو)

قلتا ليها:( اتطمني م حامشي من هنا)

يارا فرحت بكلامي...

مراد.. في شقه صحبو اسمو مصطفي... عاملين ذي حفله صغيره كده بنات و اولاد و شراب و رقيص..

مراد و امجد متناقضين كانو م اخوان..

امجد قرت هندسه مدنيه و شغال في شركه كبيره... من صغير كان مجتهد و جادي شديد في قرايتو و كل حياتو... كان دايما بجي للاول و ابوهو مبسوط بيهو و بريدو شديد...

مراد من صغير مستهتر و م بحب

القرايه.. بحب اللعب بس طوالي لعب في الشارع مع العيال و كوره و كده.. و في المدرسه يدوووب كان بنجح و مرات بسقط.. في تالته الا عاد حتي نجح و دخل اداره اعمال.. و امجد من اول سنه نجح و جاب نسبه كبيره دخل هندسه ...

مراد.. ابوهو كان بشاكلو كتير و بجوط فيهو.. و الحزام معلم في ظهرو طوالي.. بسبب قسوه ابوهو بقي عنيد شديد و م بسمع الكلام و بعمل الفي راسو... بقي مصاحب اولاد كعبين و سهر و شراب كل يوم و تاخير برا البيت... و ابوهو كل يوم يستناهو لمن يرجع و يشاكلو و يضربو و برضو تاني يوم يطلع و يساهر...

طلع مراد البلكونه بشرب في سيجاره جاتو جمانه( حبيبتو)

جمانه:( مالك حبيبي?)

مراد:( ماف شي بس طلعتا اشرب سيجاره اسي بجي)

جمانه:( اديني معاك)

طلع السيجاره واداها ليها و ولعا ليها... بقت تشرب..

جماعه:( انا دايره امشي دبي اسبوعين و اجي)

مراد:( لشنو?)

جمانه:( البوتيك محتاج بضاعه)

مراد:( امشي معاك?)

جمانه:( لالا م بحتاج...بنزل مع ساره اختي)

مراد:( ناس امك م جايين اجازه هنا السنه دي?)

جمانه:( بجو.. بس م اسي بجو قريب العيد.. عارف العيد في امريكا م فيهو طعم ذي هنا)

مراد:( ااي صح.. خلاص.. لمن يجو حنعمل خطوبه طوالي)

جمانه فرحت شديد...

جمانه:( ي الله.. ده احلي خبر)

مراد يبتسم :( ربنا يتم علي خير)

جمانه:( ان شاءالله)

جمانه اتولدت في امريكا و عندها الجواز.. و متحرره شويه في لبسها و علاقاتها و سهر و شراب و كده...

مرت الايام عاديه.. امي بتضرب لي كل يوم تسلم و كده حاسه في شي كبير اتكسر بيني و بين امي حاجه م بيرجع تاني .. امي بتعاملني ذي الاول و احسن.. بس انا م قادره اتقبلا لا اتقبل موضوع عرسها ده..

بقيت بنشغل عنها بالقرايه بس.. جات الامتحانات و انا و يارا بنقرا صباح و مساء م بننوم الا كم ساعه بس.. و ماما ليلي مهتميه بينا شديد...و ماما متابعه معانا بالتلفون بس...

خلصت الامتحانات اخير حسيت روحي ارتحتا... انا و يارا يومين نايمين بالتعب...

قاعده في الغرفه.. جات يارا فتحت الباب و شايله علبه نوتيلا في يدها..

يارا:( شوفي عندي شنو?)

عاينتا ليها..

قلتا ليها بفرح:( اديني معاك)

يارا:( ابييت)

و جرت طلعت من الغرفه و انا جريت وراها..

بقول ليها:( يارا استني اديني)

بقت جاريه و انا وراها.. نزلنا تحت...لقينا مراد جاي داخل.. يارا جرت اتدست وراهو و انا وقفتا قدامو..

مراد:( مالكم ي بنات?)

قلتا ليهو:( ابت تديني معاها نوتيلا)

يارا:( ابييت م بديك)

مراد:( يارا ادي ميمي معاك)

يارا:( ابييت مااف...انا بس)

مراد:( كده? ي يارا.. تعالي ي ميمي اسي بجيب ليك وحده امشي البسي عبايه و تعالي)

يارا تعاين لينا سااي..

جريت لبستا عبايتي سرعه و جيت .. ياراا كشرت.. مشيت مع مراد الدكان جاب لي تلاته نوتيلا.. جيت داخله و انا مبسووطه.. يارا جات جاريه علي و بقت دايره تشيل مني النوتيلا.. الاتنين بقينا نضحك.. مراد عاين لينا بفرح و مشي.. انا و يارا عمرنا م اختلفنا او اتشاكلنا متفاهمين شديد مع بعض.. اكتر من الاخوات ذاتو..

كان في طلعه صحباتنا ماشين يتغدو برا.. انا و يارا معاهم.. طلعنا مشينا المطعم..

كنا قريب 20 بت.. قاعدين في طربيزه كبيره نتونس و نضحك و ناكل..كان معانا مي...البت البتكرهني بدون ااي سبب...

بناكل فجاه مي قالت:( ي لمياء? انتي امك م ناويه تعرس بعد اتطلقت من ابوك?)

البنات كلهم اتخلعو من كلامها..

انا طوالي قلبي وجعني..

يارا:( مي.. احترمي نفسك لو سمحتي)

مي:( انا م اتكلمتا معاك ي يارا.. خليك في حالك)

يارا:( فاهمنك كويس.. احترمي نفسك و اسكتي)

مي:( برجع و بقول ليك...م ليك انا م سالتك بتكلم مع لمياء... انتي اسمك لمياء?)

قلتا لي يارا:( يارا اسكتي منها ياخ.. م تعبريها)

يارا:( م بسكت دي وحده قليله ادب و دايره تتربي)

لمياء:( يارا و مي اسكتو لو سمحتو احنا جايين نغير جو و ننبسط م دايرين نتشاكل)

البنات هدوهم و سكتنا..

امي اتصلت علي.. سالتني وين انتي و كده...

قلتا ليها :(في المطعم مع البنات)

قالت لي:( بجيك المساء)

قلتا ليها:( طيب)

احنا و طالعين لاقينا مرا و معاها بت و ولد...

مي سلمت عليهم... البت اصغر مننا ب سنتين... و الولد اصغر منها...

مي:( خالتو سوسن...اذيك?)

سلمت عليهم...احنا وقفنا بعيد مستنينها تخلص..

مي:( ايه ماشاءالله بقت كبيره.. انا طولتا منكم شديد)

سوسن:( ايه السنه الجايه ممتحنه الجامعه)

مي:( ماشاءالله والله)

خلصت كلامها و طلعنا مشينا...

نتلاقي❤