الجزء 32

في الاخر جينا ماشين و قلنا ل مراد حنجيك بدري نلاقيك قبل م تدخل العمليه..

مراد:( ان شاءالله)

سلمو يارا و امجد عليهو و طلعو امجد كان بتكلم مع علي..

مديت يدي قلتا ليهو:( يلا تصبح علي خير.. للصباح)

مراد مسك لي يدي ابا يفكها..

قلتا ليهو:( مالك?)

مراد:( لو حصل لي شي اعفي لي ي ميناس)

قلتا ليهو بخوف:( لالا م تقول كده حتقوم بالسلامه ان شاءالله)

مراد:( ادعي لي كتير)

قلتا ليهو:( حاضر.. اتطمن انت)

مراد:( انتي االوحيده الما مفروض اوصيها علي حاجه ذي دي لاني متاكده انك م بتقصري)

قلتا ليهو:( اكيد.. يلا نوم كويس م تخاف.. طيب?)

مراد:( حاضر)

قلتا ليهو:( تصبح علي خير)

مراد:( و انتي بخير)

طبعا ده كلو و هو ماسك يدي م داير يفكها.. و انا كمان م كان نفسي يفك يدي..

ضحكتا قلتا ليهو:( فك يدي)

فكاها و ابتسم لي...

شفتا في عيونو و ابتسامتو الف كلمه و الف وعد.. وقفتا مسافه بعاين ليهو في عيونو..و تاني طلعتا مشيت.. قلبي كان حيطير من الفرح.. نسيت الخوف ووااي شي...بس ابتسامه مراد و مسكه يدو ..

مراد في نفسو:( ي رب... لو مديت في عمري و اشوف ضحكت ميناس دي...م داير شي تاني.. جد حاسعدها و اشيلا في عيوني...بالجد ابدا معاها صفحه جديده.. ي رب قومني بالسلامه)

انا الليل كلو طبعا م نمتا.. بصلي و بقرا قران ل مراد.. لحدي الصباح.. نزلتا المطبخ لقيت ام ايوب بتعمل في الشاي..

قلتا ليها:( صباح الخير)

ام ايوب:( صباح النور.. مالك صاحيه بدري كده? مقلقه?)

قلتا ليها:( م نمتا اصلا.. دايره اشرب قهوه عشان اصحصح شويه)

ام ايوب :( طيب...اقعدي برا اسي بجيب ليك الشاي و الجبنه)

قلتا ليها:( طيب)

طلعتا لقيت ماما ليلي نازله في السلم..

قلتا ليها:( صباح الخير)

ماما ليلي:( صباح النور.. مقلقه ذيي كده?)

قلتا ليها:( اي والله)

ليلي:( انا م نمتا كويس والله)

قلتا ليها:( ااي والله.. تعالي نقعد اسي ام ايوب بتجيب الشاي)

مشينا قعدنا في الصاله..

بقينا بنوتس...شويه جات امي.. و عمو مختار و يارا.. شويه نزل امجد و ماريا... شربنا الشاي كلنا مع بعض..

سالتا امي:( عمو هشام اتاخر ي امي)

ساميه:( ولدو عيان بعمل ليهو في فحوصات و كده)

ليلي:( عيان عديل وله نفسيات ساي?)

ساميه:( لالا عيان عندو مشكله في صدرو و في التنفس و كده)

ليلي:( ربنا يشفيهو)

قلتا ليها:( ربنا يشفيهو ان شاءالله)

ساميه:( ان شاءالله.. ادعو ليهو بس)

امجد:( هناك العلاج عندهم كويس ماف مشكله.. م ذي هنا)

ساميه:( ااي والله...عشان كده قلتا ليهو تم علاج ولدك و اتطمن عليهو بعدين تعال)

ليلي:( ان شاءالله)

عمو مختار من حوادث اميره بقي م بتكلم كتير .. بسكت ساي بسمع بس...حسيتها كسرت فيهو حاجات كتيره..

مشينا المستشفي كلنا..و لقينا مصطفي هناك.. لقينا مراد بجهز للعمليه.. سلمنا عليهو و احنا مبتسمين.. عشان اتشجع و الخوف يروح بس شكلو كان تعبان و م نايم..

ماما ليلي وقفت جمبو و بقت تقرا ليهو و تدعي ليهو.. و تمسح علي راسو...

جا علي.. صبح علينا و قال الزمن جا...يلا ي مراد... شالو علي الكرسي المتحرك.. ابتسمنا كلنا ليهو و قلتا ليهو:( في امان الله.. ربنا يطلعك بالسلامه.. م تخاف..)

مراد ماشي علي الغرفه و عيونو علينا.. اول من دخل الغرفه.. ماما ليلي بقت تبكي... و امي كمان..

امجد:( اقرو ليهو سوره يس)

كل زول طلع مصحف و بقينا نقرا ليهو..

قاعده اميره في السجن.. مكشره و قاعده في نص سريرها.. تجيها جيجي تقعد جمبها..

جيجي:( اها حتعملي شنو?)

اميره:( في شنو?? )

جيجي:( حنستسلم كده? حنقضي 5 سنه من عمرنا في السجن?)

اميره:( ماف زول حيساعدني...الباشا رفض يساعدنا.. عمي كرهني و رافض يساعدني.. محمود بكون شمت فيني و قال استاهل.. ماف زول حيساعدني.. ماف زول)

جيجي:( لازم نعمل استئناف.. لازم نطلع براءه احنا م لينا دعوه ب المخدرات دي.. كيف نتسجن ظلم كده?)

اميره:( ده زول داير يخلص مننا...بكون الباشا ذاتو)

جيجي:( م بعيده عليهو.. وريتك بغدر بينا في ثانيه لو م كان هو العمل كده كان جا ساعدنا و طلعنا.. ماف شي بغلبو.. بقدر يطلعنا)

اميره:( صح)

جيجي:( خليني افكر.. احتمال القي زول يساعدنا)

بقو ساكتين الاتنين و بفكرو...

مراد طول في العمليه و احنا بدينا نقلق.. امجد ماشي و جاي في الممر و مقلق..

و ماما ليلي بتسال:( ليه اتاخرو كده? حصل شنو? ليه دكتور علي م طلع طمنا?)

انا بقيت خايفه شديد و ماسكه يدين ماريا.. و يارا شايله مصحف و بتقرا.. انا من القلق مم قدرتا اقرا...بقيت بدعي ب قلبي بس.. ماريا بتهدي فيني..

مصطفي:( اتطمنو العمليه م صعبه)

ماريا:( اسي دكتور علي بطلع يطمنا.. م تقلقو)

امجد:( اتاخرو شديد...م معقوله ياخ)

مختار:(اقعد ي امجد وترتني ذياده)

امجد:( اتاخرو شديد ي ابوي)

ماريا:( اقعد ي امجد.. اسي بطلعو يطمنونا)

جات طالعه الممرضه بسرعه..

الممرضه:( محتاجين دم)

امجد:( حصل شنو?نزيف?)

الممرضه:( تعال سرعه الدم الاخدناهو م كفي)

مختار و امجد و مصطفي جرو مع

الممرضه..

ماما ليلي بقت تبكي و انا و يارا... ماريا دموعها نزلت و امي بتدعي..

ساميه:( استر ي رب ... استر ي رب.. لطفك ي رب.. استر ي رب..ربنا يجيب العواقب سليمه)

انا ببكي و بقول:( مراد...مراد...ي رب الطف بيهو.. ي رب الطف ب مراد ي رب)

انا م قدرتا اقعد... بقيت ماشه و جايه في الممر ذي المجنونه..

واقفه سوسن في المطبخ بتطبخ و قدامها خضار و اكل كتير...

يجيها احمد..

احمد:( امي ده شنو الاكل ده كلو?)

سوسن:( شغل ي احمد)

احمد:( بتطبخي للناس ي امي?)

سوسن:( م كل االناس... بس جارتنا دي عندها عزومه للغدا و حاعمل ليها الاكل)

احمد:( بس ي امي كده حتتعبي روحك م كفايا القعاد علي المكنه و الخياطه طول اليوم)

سوسن:( ماف شي بخلص و برتاح.. الليله اصلا م عندي خياطه)

تجي ايه طالعه من الغرفه.. تعاين ل سوسن و احمد...

احمد:( ايه.. تعالي شوفي امك بتطبخ للناس)

ايه:( ليه كده ي امي?)

سوسن:( شغل ي ايه...فيها شنو انتو ليه بتحاسبوني ذي كاني شافعه)

ايه:( بس ي امي احنا خايفين عليك)

سوسن:( انا كويسه )

ايه:( طيب انا حاساعدك)

احمد:( و انا كمان)

يقيفو جنبها...سوسن تبتسم و تمد ليهم الخضار...

سوسن:( احمد قشر االخضار ده و ايه انتي قطعيهو)

احمد و ايه قعدو مبسوطين يشتغلو مع امهم...

جو امجد و مصطفي و عمو مختار قعدو ...

و هم مقلقين لسه..

بعد نص ساعه جا طالع علي..كلنا جرينا عليهو..

و بنسال فيهو:( مراد كيف? العمليه نجحت? الحصل شنو?)

علي:( اتطمنو.. العمليه نجحت و تقريبا الجسم استجاب للكليه بس م مؤكد.. حيقعد في العنايه 48 ساعه.. لو حصل ااي مضاعفات)

امجد:( يعني انتو م متاكدين انو الجسم استجاب للكليه?)

علي:( الجسم اسي استجاب بس بس بحصل رد فعل للجسم اتجاه الكليه.. يعني بحاول يرفضها.. و الحاجه دي محتاجه وقت لحدي م الجسم يتعود.. اسي حاليا ماف خطر بس حيقعد في العنايه عشان لو حصل ااي مضاعفات..اتطمنو و حمدلله علي سلامتو مره تانيه)

و مشي.. عاينا لبعض بفرح..و بقينا نحضن في بعض و نبارك لبعض سلامه مراد... و دموع الخوف و القلق اتقلبت دموع فرح... عمو مختار مشي جاب علب حلاوه كتييير وزع للمستشفي كلها.. حتي الناس الواقفين جمب المستشفي في الشارع ..

علي جا قال لينا:( ماف داعي للتعبكم ده.. ارجعو البيت و لو في ااي شي انا بتصل عليكم) و مشي

امجد:( صح ي امي انتو قاعدين من الصباح بدون اكل بدون ااي شي.. امشو انا بقعد هنا)

مصطفي:( انا بقعد مع امجد انتو امشو)

ماما ليلي:( خلاص طمنا عليهو ي امجد.. و لو في ااي شي كلمنا)

امجد:( حاضر ي امي.. يلا ي ماريا امشي انتي تعبانه)

طلعنا كلنا مشينا.. خلينا مصطفي و امجد بس...

دخلنا البيت جاتنا ام ايوب جاريه..

ام ايوب:( الف الف حمدلله علي سلامه مراد)

ماما ليلي و ساميه:( الله يسلمك..الله يسلمك ي ام ايوب)

يارا:( ام ايوب الاكل...ميتين من الجوع)

ام ايوب:( بعد الشر عليكم.. ثواني و الاكل يجهز)..

بليل ذي الساعه 8 امجد جا البيت قال بغير و برجع.. سالتو :( مراد معاهو منو?)

امجد:( رجعنا انا و مصطفي.. ماف زول)

قلتا ليهو:( كيف تخلوهو براهو?)

امجد:( ماف شي ي ميمي...اتطمني.. لو حصل شي علي بكلمنا)

قلتا ليهو:( طيب)

مشيت قعدتا في غرفتي.. بس قلبي م متطمن...حسيت في شي...م قدرتا اقعد...قمتا لبستا عبايه و طلعتا مشيت المستشفي...

نتلاقي❤