الفصل الثالث

ما تنسوا التصويت

خالي التاج قال ليهو بقولو م بنبح في فراشو الا الكلب ونحن اخلاقنا م بتسمح لينا نعمل كدة لكن حررررم كان ابلعك لسانك دة ي الفاقد التربوي وشال عكاز جدي وضربو بيهو وقال ليهو يلا اطلع من هنا، يلا من هنا قلته ليك عشان الشغله م تقلب دم، ابوي بقى ماسك خالي التاج وجدي بقول ليهو التاج اهدأ التاج اسمع كلامي انا بتكلم معاك

، وبقو جايطين عماتي جو ومعاهم اخواتي، بعدها حبوبه جات جاريهه قالت في شنو ي اخوانا؟ومسكت خالي التاج...

قال ليها يمه دة واحد اخلاق بتعريفه م عندو

بقو كلهم يسالو في شنو؟

جدي قال ليهم بي نهرة"امشو بهناك كلكم م القى واحدة هنا يلا، "

في كسسر من الثانيه كلهم جرو حبوبه ساقتني معاها، وبقت تسالني من الحاصل قعدته حكي ليها وابكي، قالت لي لا إله الا الله محمد رسول الله وانت صبرتي كل الوقت دة؟سكتتي كل الوقت دة؟ الله لا جاب عقابو بركه الصباح دة إن شاءالله الولادتهن زي ولادتو كلهن يعقرن بركه المولى عز وجل، وإنفعلت قالت لي الليله م بخليهو ود الكلب المانافع خلتني ببكي وطلعت،

شويه كدة جات راجعه مع خالي التاج وتتكلم معاهو، قالت ليهو انا من البدايه عندي فيهو راي العامل زي المرفعين دة، عزبها المسكينه الله يعزب كبدتو لكن تاني والله كان بقى قبله م تصلي عليها...

قال ليها ي امي انا كلمتك من البدايه الراجل دة فيهو شي م تمام تصرفاتو وملامح وشو واي شي بيوحي بي كدة م صدقتوني خلعوكم بي انو دكتور، عليك الله انا كان داير اموت بخت روحي تحت يدين خلقتو دي؟لكن خلوهو لي انا امانه م بمرمطو ليكم اوريهو الجن الألله خلقو على اصولو، حبوبه قالت ليهو م تتهور ي ولد، ، ، قال ليها ي امي انا من البدايه إتكلمته قولته ليكم الراجل دة لا شكلو ولا تصرفاتو طبيعيه انا كنت حاسي انو في شي غلط وإستعجال اهلو دة م كان طبيعي واتكلمته مع ابوي وعبدالله بس ياتو يوم سمعو كلامي؟م دايما ابوي شايف كلامنا غلط والحصل معانا في الفترة الأخيرة دي كلو بسببو هو دة وعدم سمعان كلامنا وولدك الحيوان التاني داك نفس الشي غطس نفسو وغطس حجرنا معاهو..

حبوبه قالت ليهو خلاص كفى انت كمان م تفتح لينا موضوع تاني وتعمل مشكله م صدقنا الموضوع إتقفل،

قال ليها م اتقفل ولا اي شي دة خلى الناس تحلف قسم ي امي واسي هو وينو؟هرب دة البقدر عليهو هو يسرق وينهب ويكتل ونحن نشيل الليله

حبوبه قالت ليهو قلنا خلاص اسكت م تعمل لينا موضوع تاني اها نعمل ليهو شنو يعني نرميهو في النار بي يدنا؟حقكك دة كان كعب زاتو بتقول كعب؟

قال ليها اصلا دي نهايه دلعكم ووقفتكم معاهو في الغلط وفي النهايه انتو بتتحملو المسؤليه ...

ي التاااج"فجأهه جدي نده عليهو"

حبوبه قالت ليهو امشي ابوك بنادي،

مشى، قولته ليها حبوبه في شنوو؟وخالي ياسر وين؟

قالت لي خالك ياسر قاعد كان عمل ليهو مشكله صغيرة كدة وناس جدك حلوها الحمدلله

قولته ليها اهااا الحمدلله طيب،

اليوم التاني انا قاعدة في بيت ناس حبوبه جو نسوان الحله يسلمو علي ويشيلو لي الفاتحه والبيت اتملى بكى وكواريك لمن اغمى علي من كترة البكى وانا يوم بعد يوم وضعي ببقى اسوأ محبوسه في البيت لا بطلع ولا شي اخواتي بجو بقعدو معي وبجيبو لي اولادهم عشان يلهوني شويه بس انا صورة امي م قادرة تفارق مخيلتي، م قادرة اتجاوز فكرة انو هي في اخر ايامها م كنت معاها ولا مارضتها و شلتها وختيتها ولا قادرة اصدق فكرة انها ماتت اساسا واي شي في بيتنا حقها قفلوهو في غرفتها فتحتها وبقيت اقفل نفسي عليها وابكي واقول"يمه وينك يمه مشيتي خليتيني ليه، خليتيني لمنو في الدنيا دي انااا امشي وين تاني واقول ي منو تاني..

"فقدتها بكل تفاصيلها شكلها لي لما م امسح شعري زيت، ولما اكون غبشه تمسكني تمسحني، ورقادي في رجولها، وشغلي الكلو بتشتغلو هي عشان ابوي م يشاكلني، وملامح وشها لما ابوي يجوط فيها، وونستها وضحكها معي ورشوتها البتديني ليها عشان اعمل ليها حاجه وغنيتها البتقولها لي لما اعمل حاجه كويسه كل شي م قادر يفارق مخيلتي

عدة اسبوع وانا على نفس الحال بعدها حبوبه بقت تتكلم معي وتقول لي ي بتي الموت علينا حق وكلنا مروحين منها بس امك سبقتنا وانا البتكلم معاك اسي دي محروقه الحشى كانت هديه ورضيه م بتقول لي زول لا وبشوشه ماتت وانا رضيانهه عليها دنيا واخرة عمرها م زعلتني ولا رفضت لي طلب الله يجمعنا بيها في الفردوس الأعلى إن شاءالله ي رب الحي ابغى من الميت ي بتي و...اثناء م هي بتتكلم معي سمعنا صوت ناس بتسلم، جات فاطمه اختي قالت لي اهل راجلك جو، حبوبه قالت ليها تجيهم المرسله من الله بركه اليوم دة جاين لشنو؟فاطمه قالت ليها حبوبه روقي م كدي، بعدها قالت لي شهد تعالي سلمي عليهم في مكان الضيوف، قولته ليها سمح، حبوبه قالت لي اصلا م بتطلعي تسلمي عليهم اخوات الخايب دة، قولته ليها حبوبه م صح م اطلع بسلم عليهم وبرجع انتي زاتك ارح معي، قمنا طلعنا مشينا سلمنا عليهم وعزوني بعدها قعدنا، شويه كدة واحدة منهم اسمها نجوى فتحت موضوع اخوها وم اخوها قالت لي التصرف السيئ م حبابو انتو ناس عندكم إسمكم ومكانتكم م كان تتصرفو مع اخونا كدة نحن حسب ونسب و...شوق اختي قالت ليها دقيقه ي بتاعه الحسب والنسب انتي، اخوك حكى ليك هو عمل في اختنا شنووو؟

قالت ليها اي كان العملو اكيد عندو اسبابو، ،

حبوبه قالت ليها اسمعي ي بت هووي الله كم؟قال ليها واحد!!

قالت ليها نحن كلامنا معاكم انتهى وم عندنا بت بنرجعها ليكم والسلام عليكم،

قالت ليها دة كلامكم؟

قالت ليها واخر كلام عندنا كمان،

قالت ليها سمح إتحملو مسؤليه كلامكم دة...

حبوبه قالت ليها جدااا نحن م بنخاف الا من الخالقنا ...

بعد م طلعو، عماتي الاتنين هويدة ورحمه قالو ليها احييييييي ي عمتي عاد تب م قصرتي منها وإختصرتي معاهم الكلام، شوق اختي قالت ليها لو كترو كنت وريتهم الطفى النور منو لكن حبوبه ادتهم في المليان

بالليل صحيت وحاسه بي جسمو دة كلو بياكلني وشايفه حجات كدة م طبيعيه ضبوب وصراصير وحشرات كتيرة ماشه في الأرض وجايه علي بقيت اصرخ صرختي الواحدة دي م سكتته للصباح وناس حبوبه قاعدين معي وانا اهبش في جسمي كلو من شعري لي نهايه جسمي واقول ليهم في حشرات ماشه في جسمي في حشرات، حبوبه بقت تهدي فيني قالت لي ماف اي حشرات ي بتي، وكانو كلهم واقفين فيني حتى جدي وابوي وخالي،

ابوي بقى يتكلم معي ي بت شهد ماف شي قلنا ليك، قولته ليهو لالا في م شايفنهم انتو حتوهم مني

حبوبه قالت ليهم بسم الله البت دي الجاها شنو؟

جدي قال ليهم دخلوها الحمام يمكن ترتاح، ساقوني الحمام دخلته اول م قلعته ودخلته يدي في جردل الحمام عيني وقعت على ضبوب كتيرة واحد في جردل الحمام والبقيه ماشه في حيط الحمام ولا واحد ولا إتنين كميهه، جيت طالعه من الحمام من غير اي شي وبقيت اصرخ في نص الحوش واتنفض واقول ليهم واااي في حشرات اللحقوني وجاريه كلهم طلعو وانا جاريه عليهم بالمنظر دة وبصرخ حبوبه إتلقتني ولفحتني بالتوب ودخلتني وانا لسسه بقول ليها ي حبوبه نفضيهم مني، حبوبه في ضبوب رقبتي فيها مسكتو بي يدي في جردل الحمام

شوق اختي جات قالت ليهم ماف شي في الحمام اسي انا شوفتو

بقيت اهبش جسمي كلو زي المجنونه وارجف

حبوبه قالت خلاص اقرو ليها قرءان يمكن ترتاح شويه

جدي قال ليها لبسيها انا بجي بقرا ليها قرءان اسي، لبسوني وجا اول قرا الفاتحه وبدا في سورة البقرة انا خلاص بقيت اتململ زيادة وجسمي بدأ يحكني اكتر وإتضايقته بقيت اقول ليها انا طالعه من هنا، طلعوني من هنا سرعه نطيت من السرير مسكوني لزيت عمتي الماسكاني وطلعته جريت من الغرفه وبقيت مغطيه إضنيني بي يدي وجريت بجلبابي داك للشارع وطلعته بشكلي داك وانا جاريه، طلع وراي ابوي وخالي التاج جارين وراي عشان يمسكوني والحله كلها بقت تتفرج وانا بصرخ لمن فجأهه احس بزول ماسكني وانا بقيت اتصارع معاهو وهو ماسكني بكل قوتو وبقول في شنو ي التاج؟خالي التاج قال ليهو م تفكها ي سعد بعدها لحقوني وشالوني ومشو وانا بتصارع معاهم وهم يتصارعو لغايه م دخلوني وبعدها الحله كلها كسرت البت مالها والحاصل عليها شنو و...

بالنسبه للحله بقيت في عداد المجانين وبقت سيرتهم كلها شهد والحاصل ليها وطلعو فيني إشاعه قالو راجلها رجعها عشان لقاها راسها م تمام ..

وانا حالتي إستمرت بتحسن يوم وبترجع لي الحاله دي باقي الأيام اهلي م خلو لي شي م عملوهو ودوني لشيوخ وتلو لي قرءان بس م نفع كل يوم حالتي ماشه للأسوا لدرجه انو قفلوني في البيت حكايه بتاعه شهر الشيخ كل يوم بجي قال ليهم داخلها جن هو البخيل ليها الحجات دي عشان كدة كان كل يوم بجي وبستخدم الصوت بتاع العنج بضربني في جسمي وبجرحني بالموس في رجولي وفي يديني عشان بقول انو ممكن يطلع بالدم بس م نفع

المشكله م هنا المشكله انو انا م كنت بحس بي اي شي من الهو بعملو دة كنت بشوف بس العلامات والأثار حقت السوط والجروح، الحاجه دي إستمرت شهر،

بعدها حبوبه وقفت ليهم في الباب قالت ليهم شهر عذاب م جاب نتيجه البت دي بعد كدة بتموت صفيت دمها ونشفتها بالدق شوفها بقت كيف؟بالفعل انا تقريبا بقيت زي العندي سؤ تغذيه، جنازة بس ومتحركه واسوا حتى،

اهلي وصلو لمرحله انهم رابطني وبقفلو علي الباب زي م كان بعمل عباس عشان انا م اجرح جسمي بي ظفوري او اطلع بس م عارفين انو انا حالتي كانت بتبقى اسوأ لما يربطوني لانو انا بشوف الحشرات كلها حوالي وماشه في جسمي وجايه بإتجاهي وم بقدر حتى احرك يدي والحاجه دي كانت بتفقدني عقلي زيادة

حبوبه قالت لي جدي وصفو لي شيخ شاااطر في القرى الورانا ديل لكن قالو م بجي البيوت الا تمشي ليهو انت براك،

جدي قال ليها المشايخ ديل كلامي فاضي سااي امها دي م خلينا حته م وديناها ليها لحدي م ماتت

قالت ليهو اسكت م قلنا الموضوع دة م يتفتح؟وبعدين البت دي شكلها ادوها عين اظنو لكن نعمل شنو اها نخليها بحالتها دي كدة لمتين؟نحرسها تجن مرة واحدة؟

قال ليها اها انا في يدي شنو اعملو؟الفيني دي كملت عديييل من اولادكك

قالت ليهو طول بالك ي حاج خلاص انا بجرب اسوقها بسوق معي التاج وإن شاءالله م يحصل الا كل خير

قال ليها خلاص كويس امشو،

اليوم التاني لبستني وربطو لي يدي ورجولي عشان م اجري واخواتي وعماتي ديل يبكو بدموعهم حد الصراخ، ركبوني في العربيه وإتحركنا مشيناااا...

لما وصلنا كانت المحله كبييييييييرة واظن اليوم داك كان الشيخ عندو ندوة ولا حاجه الناس كلها كانت قاعدة في الأرض وهو واقف في النص وبتلي قرءان والناس دي تشيل وتقع في الأرض وتتمردغ وهو مواصل تلاوة شويه انا كدة انا بقيت اتململ واحك في راسي وباقي اجزاء جسمي وبعدها بقيت اصرخ بأعلى صوت اصرخ واقول ليهو اسكت سكتوهو خلاص م تقرا قرءان انا بكرهو، بكره القرءان دة خلاص اسكت...

م كنت براي ناس كتيرة كانت بنفس الوضعيه والبكى والصراخ مالي المحل وكان برشهم بالمويه وانا واحدة من الناس الكان برشهم بالمويه، حبوبه مسكتني قال ليها خليها، في واحد جلدو جلد بطريقه غريبه وكان بقول ليهو اخرج، الولد بتكلم معاهو بصوت غريب وبقول ليهو م طالع م طالع انا م طاااالع قولته ليك...

بعد م خلص تلاوة وزع مويه ونحن على طول دخلنا ليهو في غرفتو حبوبه بقت تحكي ليهو قال ليها إسمها منو؟ادتو اسمي واسم امي ...

قال ليها ارجعو تعالوني بكرة،

اليوم التاني مشينا وانا على نفس الوضعيه السيئه قرا لي قرءان إتجننت وعايزة اقوم جاريه ووش الشيخ دة كنت شايفاهو وهو بتلي كلو ضبوب ماشه في وشو ...

خالي التاج قال ليها يمه انا بسوقها العربيه دة كلام فارغ سااي

ساقني وطلع قدر م نادتو م ردة ليها

بعد م نحن طلعنا الشيخ قال ليها "بتكم دي عاملين ليها سحر وم سحر عادي سحر عاملنو بي نجاسه ورابطنو ليها في بطن ضب عشان كدة بتشوفو في اي مكان دايرين يجننوها كدة،

حبوبه قالت ليهو لا إله الا الله محمد الرسول الله دة كلام شنو ي شيخنا كيف الكلام دة؟بتنا دي م عندها عداوة مع اي زول هديه ورضيه وشافعه زاتها لسه م قفلت ال 15 سنه!! قال ليها والله ي اختي شوفو منو العندو مصلحه يعمل كدة وكان م لحقتوها بتجن اكتر، قالت ليهو اها نعمل شنو نحن؟

قال ليها الضب الرابطين فيهو السحر دة الا يتلقي ويتكتل وتطلعو منو السحر دة اصلا هو قاعد في بيتكم ولافي ودة المجننها كل م يحوم هي بتجيها الحاله دي والسحر المعمول بالنجاسه حلو الوحيد تتلقي الحاجه العاملنها بالنجاسه دي ولما تتلقي تتغسل بمويه الملح وبعدها كترو ليها من سورة البقرة، قالت ليهو ي شيخنا نحن نعرف الضب دة كيف لكن ونفتشو وين؟قال ليها في مكانها الهي بتقعد فيهو هو بكون قاعد اصلا م بعيد منها حايم حواليها المهم اي ضب لقيتوهو حايم اقتلوهو ووقت م رجعت ليها الحاله وبقت تصرخ فتشو المكان الهي فيهو دة ابدا م تعتبرو كلامها دة جن منها الهي شايفاهو صح م بتخيل ليها ابدا، انا بعالج بالقرءان والرقيه الشرعيه العين والمس والجن لكن بتكم دي م لابسها جن ولا طاقاها عين ولا مس شيطاني مشكلتها عاملين ليها سحر اسود والسحر دة علاجو الا تلقو الشي الرابطين عليهو السحر دة وركزي غسلوهو بالملح واحرقوهو بعدين ممكن انا اعمل ليها رقيه شرعيه

قالت ليهو سمح ي ابوي إن شاءالله ربنا يقدرنا ونلقاهو وادعي ليها عليك الله والله بتنا دي تعبت عديل جننوها الله لا بارك فيهم سمح ي شيخنا فتك بعافيه وم تنسى تدعي ليها عن ظهر قلب ربنا يقويها ويكتب شفاءها عاجلا ي رب،

رجعنا البيت مشيت على طول غرفه امي ورقدته فيها وانا م حاسه بنفسي كل الحاساهو إني مرهقه وتعبانه شديد جسمي كلو واجعني سرحانه وم عارفه بالي وين ولا بفكر في شنو حتى..

حبوبه بتتكلم مع عماتي حكت ليهم الحاصل كلوو، عمتي رحمه قالت لي لا حول ولا قوة الا بالله كيف يعني معمولها سحر؟ودة منو العملو ليها دة؟عمتو هويدا قالت ليها كرر علي المسكينه شافعه م عرفت للدنيا دي شي جننوها بالسحر الله لا بارك فيهم اكيييد ديل اهل راجلها الما بشبهو خلق الله ديل قلوبهم زي وشوشهم دي، حبوبه قالت ليها انا زاتي فكرته في كدة م بخلوها ساي دايرين يجننوها لكن والله بس خليني اعالجها كان م كحلتهم بالشطه ابوي يقوم من التراب،

عمتي رحمه قالت ليها اها الشيخ قال ليك شنو؟بعالجها كيف اداك ليها محايه وحجبات وبخرات ولا تمشي تعملهم عندو هناك؟

قالت ليها قال م بتتعالج كدة الا الضب العاملين ليها فيهو السحر دة يتلقي ويتكتل والسحر يتشال منو،

اجي والضب دة يتلقي وين؟"عمتي رحمه وهويدا الاتنين في نفس الوقت"

حبوبه قالت ليهم قال قريب منها م بعيد في مكانها البتقعد فيهو دة هو قاعد ولما تقوم تتجنن وتصرخ وتكورك معناها هو حايم وبتحرك نحن نفتش الضب دة لما تجيها الحاله دي واي ضب لاقاكم في البيت دة اقتلوهو لغايه م يتلقي ..

عمتي رحمه قالت ليها حسبي الله فيهم الناس ديل معقوله شافعه يعملو فيها كدة؟

عمتي هويدا قالت ليها واكعب من كدة م بتعرفي خلق الله انتي والله قلوبهم اسود من سواد شعرك دة الله لا بارك فيهم،

اليوم التاني فتحته عيوني على حس حاجه بتتحرك في رجولي رفعته راسي بس اشوف ليك الضب في رجلي وكبيير ولونو اسود بقيت اصرخ ورغم صراخي دة ولا حركه م اتحركها نطيت من السرير وبقيت اصرخ واتحت واقول ي حبوبه الحقيني ي حبوبه الضب جا تاني ي حبوبه الحقيني كلهم جو جارين دخلو الغرفه قالو لي وينو؟قولته ليهم هناك حبوبه شايله عكاز جدي وبقت تضرب في السرير بعصاها، وعماتي بقولو لي وين؟قولته ليهم هنا وانا بصرخ وبرجف وحبوبه تضرب بكل قوتها لغايه م فجاهه عمتي رحمه بقت تصرخ وتقول ليها ياهو ي عمتي ياهو، وضربتو بي نعالها لكن م لحقتو ومشى..

عمتي هويدا قالت ليهم لا إله الا الله دة ضب ولا تمساح شوفتو كبرتو؟

حبوبه بقت تستغفر مسكتني من يدي وطلعتني من الغرفه قالت ليهم شيلو العصى ونفضو البيت دة ابدا م تخلوهو ..

عديت اسبوعين وانا كل يوم اصحى مخلوعه والقاهو في وشي واشوف معاهو حشرات واصرخ يجو اهلي يشوفوهو بس م بقدرو يلمو فيهو، وانا خلاص بقيت شبه مجنونه لمن بقيت اتكلم براي وكلامي كلو الضب جا، الضب بجي اسي وكدة حالتي بقت تحنن الكافر،

ااخر حاجه جدي قال ليهم خلو مويه تكون مغليه 24 ساعه متى م سمعتوهو تصرخ زول يشيل المويه الحارة دي والبشوف الضب يرشو بيها،

وبالفعل بقو يعملو كدة والحال إستمر شهر والشهر التاني لدرجه انو انا خلاص إتعرفته بالمجنونه في الحله كلهم بقو يقولو جات من راجلها عروس وجنت و...كلام م ليهو اول ولا اخر، لغايه م في يوم انا قاعدة في غرفتي زاتها بطبق في ملابسي وناس حبوبه برة بشربو في القهوة مع جدة، فجأهه اشوف الضب جوة الدولاب وفي اول رف كمان وبقى اضخم من اول ولونو اسوووووود شدييد وعيونو كعبه وبقيت اصرخ، عايزة اجري حبوبه جات داخله بقت تقول لي وينو؟قولته ليها جوة الدولاب، بقت تنادي ي احمد تعال ي احمد تعال جدي جا داخل وشايل جردل مويه كشحو في الدولاب، اول م كشحو الضب جا واقع من الرف في الأرض وبقى يتنفض في الأرض وانا مع حركتو دي بقت ارجف واصرخ حاسه كانو المويه دي مكشوحه فيني انا م فيهو هو، كنت بصرخ بأعلي صوتي، والضب دة نهائي م مات بس كان بفرفر عماتي جو جارين وابوي وخالي التاج كلهم ورا بعض دخلو الغرفه خالي التاج ضربو بي شبشبو، ابوي قال لي عماتي طلعوها برة سرعه، ساقوني، بعدها بقو يضربو في الضب لغاايه م مات وسبحان الله تقول الضب دة بي 7 ارواح نهائي م مات بسهوله، وانا ببكي مع كل ضربه كانو بضربوها ليهو كانت بتنزل على جسمي دة كأنو انا الماخداها،

جدي جاب السكين قال ليهم زحو حبوبه قالت ليهو هاك اكياس ي احمد هاك شال الأكياس لبسهم وفتح بطن الضب بسكينتو، حبوبه بتتشهد وعمتي رحمه بتصرخ وانا ماسكاني عمتي هويدا وتهدي فيني وانا اصرخ واتمردغ في الارض زي الخروف،

بعدها جدي قال ليهم لا إلا الا الله؟شوفو الناس دي شوفو عمايل البشير ديل عليك الله؟طلع كيس مخيط في بطن الضب فكه الكيس لقاهو عضم ملفوف عليهو شعر وقطعه قماش، حبوبه قالت ليهو دقيقه جابت مويه ملح رمت العمل في الطشت وكبت فيهو مويه الملح بعدها قالت ليهم خلو كدة لمن بكرة نشيلو نودي للشيخ...

بعدها انا م وقفته بكى والعرق كان طالع من جسمي زي السيل و طول اليوم ببكي لغاايه م شالتني نومه نومته م صحيت الا اليوم التاني ودوني الشيخ شال العمل قال ليها لا إله إلا الله محمد رسول الله شوفي شايلين قطعه من ملابسها وجزؤ من شعرها والعضم دة عضم كلب اظنو، غايتو ي بتي كان جنك دة مؤكد حسبي الله فيهم وقت م الله اداك قدرة اتحسبني عليهم،

قال لي حبوبه غسلتيهم بالملح؟قالت ليهو اي، قال ليها كويس، شالهم وطلع برة نده على ولدو قال ليهو جيب الكانون ومعاهو باقه البنزين ديك ي ولد، جابهم ليهو قال ليهو جيب كبريت، حرقهم اشختها هنا،

بعدها جا داخل وقفل الباب قال لي حبوبه بعد كدة انا بعمل ليها رقيه شرعيه وانتو خلوها تواظب على قرايه سورة البقرة سمح ي اختي؟

قالت ليهو كويس ي اخوي

وبالفعل بدا يرقي وانا اصلا م حصل لي زي م كان بحصل معي كل مرة بالعكس الموضوع كان عادي وكنت هاديه،

بعد خلص رجعنا البيت، حبوبه جابت لي الإبريق قالت لي ي بتي إتوضي وصلي الظهر واقري ليك شويه قرءان، صليت وفتحته الكتاب قريت كم ايه من البقرة واصلا م حسيت بي انو انا متضايقه او كدة إستمريت فيها لغايه م وصلته 50 بعدها قالت لي كفى ارح الغداء

إستمرة الوضع دة اسبوع وانا شبه بقيت احسن من الفترة المضت، اي في خوف في هلع في تهيئات بس م زي زمان،

في يوم قاعدين خالي التاج جا داخل قال لي رفعنا قضيه طلاق في راجلك،

عمتي قالت كيفن الكلام دة ي التاج؟

قال ليها فتحنا فيهو قضيه عدييل بالحسنه قال م بطلق

حبوبه قالت ليهو دخلوهو المحكمه يدخل في نار جهنم بركه الله هو واهلو الخيابه،

قال ليها رفعنا قضيتنا والأسبوع الجاي يوم التلات اول جلسه في المحكمه...

قلبي بقى يضرب، انا هشوف الراجل داك تاني

وبالفعل عدت الأيام وجا يوم المحكمه مشينا انا وابوي وحبوبتي وخالي التاج وإتلاقينا مع المحامي في المحكمه، واول م دخلنا لقيناهم قاعدين انا لما شوفتو لمن رجفته، قاعد هو واخواتو وبقى يحمر لي بطريقه م طبيعيه، قعدنا، المحامي قال لي اصلا م تتوتري اي سؤال سالك ليهو القاضي احكي ليهو تفاصيل القصه دي زي م هي فهمتي ي بتي؟قولته ليهو طيب

القاضي جا وبدت المحكمه شالو اسماءنا واوراقنا الثبوتيه بعدها بدا يسال وكدة، اختو قالت للقاضي ي مولانا الناس دي ناس م بتعاشرو وم بعرفو درب الله كان بعرفو درب الله الزي اخوي دة بدخلو المحكمه؟ناس بتاعين مشا..القاضي قال ليها انتي منو؟قالت ليهو انا اختو

قال ليها ي اختو المرة الجايه لو إتكلمتي بدون إذن بطلعكك برة قاعه المحكمه دي، قالت ليهو ي مولانا

قال ليها قلنا اقعدي"بي نهرة"قعدت وسكتت

قال ليهم وينها شهد؟قمت على حيلي قولته ليهو نعم!!

قال لي إنتي شهد؟؟

قولته ليهو ايوة

قعد يعاين لي مساااافه وملامح وشو بتوحي بي إنو مستغرب هزة راسو وقال لي اقعدي

قعدته، بعدها اشر عليهو قال ليهو انت عباس؟قال ليهو ايوة،

قال لي قومي ي بتي احكي لي مالك طالبه الطلاق من الزول دة عشان الموضوع لو صغير نحلو وترجعو بيتكم انتي صغيرة على الطلاق ي بتي دايرة بالطلاق شنووو؟

المحامي عاين لي وقال لي اتكلمي م تسكتي ابدا،

القاضي قال ليهو هدؤ

بديت احكي ليهو من بدايه القصه لغاايه م وصلته موضوع موت امي، قولته ليهو انا امي ميته 40 يوم انا م عارفه بسبب انو حابسني ومربطني بالجنازير ومانعني من التواصل مع اهلي وبعدها بقيت ابكي،

اختو وقفت قالت ليهوكذابه ومنافقه ي مولانا والكلام دة كلو م حاصل، انتي كان دايرة تمشي لي اهلك كان وداك لكن الراجل لو م قولتي ليهو وديني يوديك براهو؟قولي لقيتي العزز عند اخوي وخلعك ونساك اهلك ي الجعانه،

خالي التاج قال ليها ي مرة هوي اعدلي لسانك وإحترمي نفسك

القاضي قال ليها اتفضلي اطلعي برة يلا،

قالت ليهو بعتذر ي مولانا،

قال ليها برة قلتة ليك يلا، قامت طلعت،

القاضي قال لي عندك اي إضافات ي بتي؟قولته ليهو لا، قال لي إتفضلي..

قال لي عباس الكلام القالتو مرتك دة عندك إعتراض عليهو؟عباس قال ليهو كلو كذب وملفق من اهلها

قال ليهو يعني انت بتنفي كلامها دة؟

قال ليهو ايوة بنفيهو

القاضي قال ليهو المحكمه إتاجلت لي يوم 15/4 طلعنا، ونحن قدام باب المحكنه اخت عباس بقت تنبذ وخالي التاج إشتبك معاها وبقى يقولو ليها احمدي ربك إنك بقيتي مرة والا كان شرحتك ي ام وش زي الركبهه، واخوك الخايب دة بعد حجمو تابعك زي الخروف الله لا بارك فيهو،

ابوي وجدي مسكوهو، حبوبه قالت ليها توووف عليكم وعلى تربيتكم ي العواليق الله لا كسبكم خير محل م قبلتو،

رجعنا البيت، اول م نزلنا إتلاقينا مع جارتنا خالدة سلمنا عليها بعدها جا ولدها طالع سلم علينا، خالي التاج قال ليهو سعد متين الجيه ي زول مختفي ليك كم شهر، سعد قال ليهو تقول شنو ي التاج ياخ مشيت مشاريع ابوي الفوق في الخلا شوفته القمح وجيت راجع

قال ليهو اها الزراعه ناجحه بس؟

دخلنا وخليناهم بتونسو

عدت الايام والمحكمه كل يوم تتأجل وانا كل مرة القاضي يسالني بقول ليهو م عايزاهو ابدا، طلب شهود مشو نسوان ابوي الإتنين، قال شهادتهم م معتمدة، قال لي برجعك بيت الطاعه 6 شهور لو م نفع نطلقكك

قعدته ابكي في نص المحكمه بكيت كداا بعدها قولته ليهو انا متنازله ليهو عن اي حقوق ممكن اخدها م عايزة نفقه م عايزة اي شي الراجل دة انا لو رجعته معاهو يوم واحد بس ممكن يكتلني وم حتكون في محكمه تانيه ي مولانا حتكون في جنازة م عايزة ارجع ليهو انا انت م عارف العذاب العذبني ليهو في ال 5 شهور دي العلامات الفي جسمي للأن م راحت بكيت وإتنهدته زي الطفله، القاضي تاني اجل المحكمه قال بعد شهر،

في يوم قاعدين نتونس انا وحبوبه وعماتي، قولته ليها حبوبه انتي خالي ياسر وين؟سكتو،

حبوبه قالت لي خالك ياسر دة في السعوديه وقاطع خبرو والله ي بتي،

قولته ليها انا فاكراهو في الزراعه الفترة دي كلها،

قالت لي لا والله م في الزراعه، ، ،

ونحن قاعدين كدة نسمع كواريك قمنا مخلوعين، والصراخ زايد جرينا بإتجاه الباب اول م طلعنا نتفاجأ ليك بالحله كلها كاسرة قدام بيتنا وفجأه نشوف خالي التاج قاعد في الأرض ويبكي وملابسو ملانه دم وفجاهه عيني وقعت على بوكسي وفيهو جنازة وملفوفه بقماش ملان دم، بقيت اصرخ وحبوبه بقت تصرخ معاي وتقول ليهو المات منو ي التاج المات منو ي التاج، عمتي جرت على الجنازة وقالت الليله وووووب دي جلابيه عبدالله...

...