الفصل السابع عشر

ان شاءالله حيتحل كل شي بالصبر ي شهد، زحيتو مني وقلته ليهو انت كيف توافق على حاجه زي دي اساساً ي حسام؟كيف توافق تتزوجني بالطريقهه دي؟لييييهه م رفضتهه؟لييييييييهه عملته كدة ي حُسام، ياخي بقولو المجنون في زمه الواعي كان ابوي م واعي انت كمان م واعي؟قال لي انا عملته كدة عشانك ي شهد م شوفتي شكل ابوك لما جانا البيت ولا شوفتي العملو كل خوفي انو لو م وافقته ممكن يعمل فيك حاجه، قلته ليهو وانا ببكي خليه يعمل حتى لو موتني احسن م حيكون اسوأ من العملو اسي دة ابداً

...فضلته في مكاني ببكي طول الليل وحسام يتكلم معي وانا بقول ليهو رجعني بيتنا ي حُسام، كل م يقرب مني بزح منو وبقول ليهو بس م تقرب مني، فضلنا للصباح قاعدين على الأر ض، الشمس طلعت علينا وحسام شبه نايم وهو قاعد وساند راسو في الحيطهه، الصباح كان سيء وكئيب شديد م قادرة ارفع عيني اعاين بيها على شي او م مستوعبه شي غير اني في بيت صغير والوساخهه مالياه في كل مكان، حاولته اقوم حسيت بكتفي عايز يتقلع من محلو قلتهه اتنهدتهه وقلتهه اخ، مع حركتي دي حُسام فتح عيونو، هو زاتو كان وشو كلو مورم شكلو م سلم من يد بابا، قام قرب علي وقال لي قومي ي شهد ندخل جوة، قلته ليهو انا ماشه بيتنا، قال لي شهد رجعتك للبيت بتزيد المواضيع سؤ، قلته ليهو م عندي مشكله رجعني بيتنا ي حسام وبقيت ابكي

قعد جمبي ومسكني من كتفي قال لي فكرك انا هاين علي الوضع الانتي فيهو دة؟هاين علي اعرسك بالطريقهه دي؟بدون رضا اهلك ي شهد؟وبالسؤ دة؟زدتهه في البكىقال لي م تبكي ي شهد والله العظيم بس خلي الجو يهدأ شويه انا حاسوقك ليهم بس اسي انا م ضامن يعملو فيك شنووو انتي فاهماني؟قلته ليهو انا عملته شنو بس لمن يعملو فيني كدة عملته شنو بس

قومني قال لي تعالي ي شهد، ساقني دخلني مكان كدة في البيت عباره عن صاله فاضيهه قال لي شويهه كدة جيجيبو لينا سراير وحجات، فضلتهه ساكتهه وم مركزة ابدا...مً بقدر احكي الأيام الاولى من الحصل دة عدت كيف او بمعنى اصح م بقدر اتزكر هي عدت كيف كل البعرفو انو جات ام حسام وبكت فيني كأني جنازة وقعدت تتحسبن م عارفه هي بتتحسبن في شنو بس كانت بتتحسبن، ، بتزكر جابو سراير او بالأصح سريرين وفرشين وتربيزة وشويه عدة جات مرت اخوهو نضفت لي وفرشت دة كلو وانا قاعدة وبعاين ليهم م بين مستوعبه انو دة واقع ولا خيال، الأيام الاولى كانت الأسوأ على الاطلاق للدرجه اللي حسام كان بيغصبني على الأكل والشراب واحياناً هو بشربني وبأكلني بنفسو..أهلي

املي كان كبير في انو لما يعدي اليوم الاول اليوم التاني ماما م حتخليني وحتجي تفتشني او منذر، بس يوم بعد يوم كنت بتصاب بخيبه امل كبيرة، عدة الاسبوع الأول والتاني وانا كل يوم وضعي ببقى اسوأ بشيل الليل بكى والنهار بكى وحسام ملازمني م كان بفارقني لحظهه تقريباً دي الغلطه الوحيدة الفي حياتي اتفرض علي اتحمل نتيجتها غصباً عني

م كنت راضيهه ابداً بس استسلمت علشان م عندي حل غير كدة، علشان دة غلطي، علشان استوعبته اني اتسببتهه في موت قلب اهلي علي للدرجه اللي ماف واحد منهم سأل علي لمدة اسبوعين رغم انهم م كانو بستحملو اني اكون برة البيت، المسافه بين البيت الانا فيهو وبيتنا م اعتقد بعيدة لاننا جيناها بي ركشه پس هل هم حاولو يفتشوني عشان يعرفو مكاني؟

حُسام تعب معي شديد الفترة الاولى دي للدرجه اللي كنت بنفعل وبقوم نص بيتنا بقول عايزة افتح الباب ماشه بيتنا بمسكني برجعني وبقعد بهدي فيني، في نهايه الاسبوع الرابع في يوم حُسام جا داخل البيت وهو م قادر يمشي ملابسو كلها دم وراسو مربوط بشاش، قلته ليهو بخلعه حسام؟!وقع في السرير وقال لي وهو بلهث جيبي لي مويهه ي شهد، قلته ليهو حسام مالك؟قال لي مويهه؟جبته ليه مويه قلته ليهو مالك؟ العمل فيك كدة منوو ي حسام؟بابا؟سكتت، قلته ليهو مشيت ليهو؟الوداك ليهو شنو ي حسام؟؟قال لي م ابوك ي شهد قلع ملابسو وطلع دخل الحمام استحم وجا راجع فتح دولابو لبس ليهو ملابس، قلته ليهو قول لي مالك؟ قال لي ماف شي ي شهد مشكله بسيطه بس، قلته ليهو مع منووو؟قال لي مجتبى ومنذر اخوانك، قلته ليهو مجتبى ومنذر؟مجتبى اخوي جا؟؟مجتبى اخوي دة اصعب واحد في اخواني اكتر بني ادم قلبو حار في بيتنا، يعني العملو في حُسام هو قليل من كتير هو بقدر يعملو، بقيت خايفه عليهو شديد عادي ممكن يرتكب جريمه في حسام ويلحقني لييييهه وانا واثقه انو خلى شغلو وكل شي وراهو وجا علشان الموضوع دة

قلته ليهو حسام تاني م تمشي الله يخليك م تمشي هناك قريب الفترة دي بس حلفتك بالله م تمشي كفايه علي شديد العملتو في اهلي لغااايه هنا وانا راضيهه بالعملو فيني وهتعايش معاه ف م عايزة اتسبب في اي ضرر تاني ليهم

في نفس اليوم دة بعد المغرب مباشرة باب البيت دق، حُسام قام فتح الباب كان اخوهو عدنان، جا داخل سلم علي قال لي اللبسي تعالي معي ي شهد، قلته ليهو وين؟قال لي بس كدة قومي تعالي، حسام قال ليهو في شنووو؟تمشي معاك وين؟عدناني قال ليهو انت خليك م تطلع من البيت، حسام مسكني قال ليهو شنو م تطلع من البيت انت مجنون ولا شنو سايقها وين؟عدناني جراني قال ليهو اخوها واقف برة دايرها انت م تدخل كفايه الحصل اليوم دة، قلبي طار من محلو لما قال كدة، حسام جراني عليه وقال ليهو انت مجنون؟دايرو يكتلها يعني ولا شنو؟م بتمشي ليه ولا شي وكمان سايقو جايبو هنا م بتفكر انت ي عدنا م بتفكر؟قال ليهو انت م احق ليها من اخوها ولا بتخاف عليها اكتر من اخوها انا جبتو وانا ضامنو زول داير يشوف اختو لو خليتو يجيك براهو صدقني البحصل م طيب وانا عارف كدة، حسام قال ليهو اسي البحصل م طيب وشهد م بتطلع ليهو، قلته ليهو حسام فكني انا ماشه اشوف اخوي، قال لي شهد، قلته ليهو انا بطلع ليهو واليحصل يحصل اتفكيت من حسام وطلعته عايز يطلع وراي عدنان مسكو دخلو جوة وقفل عليهو الباب ولحقني، كانو جاين بي عربيه، كنت ملهوفه حتى ولو شوفتي لي مجتبى دي كانت حتتسبب في موتي كنت عايزة اشوفو، اخيراً زول من ناس بيتنا جا وراي وسأل علي وفتشني، قبل م اصلو عدناني سبقني ووقف في النص بيناتنا، مجتبى كان بعاين لي بي غضب وكسرة وقرف احساس انو شويه ووشو دة حيقع منو، م بتتخيلو احساس انو اخوي واقف قدامي وبعاين لي بالطريقهه دي لا وكمان واقف في نصنا زول غريب علشان يحميني منو

دموعي جات جاريه عشرة عشرة قلته ليهو مجتبى

قال لي بي غضب ولا كلمه ي شهد ولا كلمه، دي اخرة تعبنا ي شهد؟دي اخرة خوفنا عليك؟دي اخرة تعاملنا معاك كأنو اصحابك؟دي اخرة ثقتنا فيك ي شهد؟راضيهه على نفسك انتي؟راضيهه على الحاله الانتي فيها دي؟ولا الخرابه العايشه فيها دي راضيهه عنها؟نحن قصرنا منك في شنو؟امي قصرت في شنو؟ابوي قصر في شنو ي شهد؟جاي احاسبك؟ايوة جاي احاسبك على كل معامله عاملناها ليك جاي احاسبك على الف حساب عملناهو ليك عشان انتي اختنا الوحيدة، قادرة تقيفي قدامي كيف انتي؟خليك مننا نحن م فكرتي في امك؟م فكرتي في ابوك؟دي اخرة دلعهم ليك ي شهد؟انا لو بيدي اموتك اليوم قبل بكرة واصلاً دة الجاي عشانو بس احمدي ربك انو ابوك وامك لسسسهه بقولو م عافين ليك لو عملته ليها كدة، خزلتينا ي شهد وكسرتينا وشرطتي عينا، الماعملناهو نحن الاولاد في امي وابوي انتي قدرتي تعمليهو ي شهد، القولتي عليهو راجل دة وهو م تامي ضفر راجل اساساً خلي يبقى ليك ام وابو واخوان ويبقى ليك اهل، ، اتخطيت عدناني ومسكته مجتبى حضنتو وقعدته ابكي قلته ليهو مجتبى م تقول كدة الله يخليك انا غلطته اي ومن حقكم تعاقبوني لكن م للدرجه دي ابوي وامي زعلانين مني م تبقى علي انت كمان عليك الله ي مجتبى عايز يتفك مني مسكتو وبقيت ابكي بأعلى صوتي زي الشافعهه وحاضناهو، بعد مسااافهه عدناني حاول يمسكني مسكته في مجتبى اكتر وانا ببكي، بعد اكتر من ربع ساعه حتى عدناني قدر يمسكني يدخلني البيت وخلا مجتبى واقف في محلو...حاله مجتبى وكلامو خلوني استوعب حجم الكارثه الأنا عملتها في لحظه جهل، رغم دة كلو جا فتشني، انا واثقه انو م جا علشان يسمعني الكلام القالو دة لا هو جا يشوف حالتي، واثقه انو امي طلبت منو كدة، انا ماف احن علي من اهلي ابداً

اول م دخلته البيت قلته لي حسام اديني تلفونك، قال لي ليييييهه؟قلته ليهو بس جيبو، قال لي لشنو؟!قلته ليهو حتديني ليه ولا لأ؟ناولني ليييه دخلته رقم مناسك واتصلته عليها اول م ردت قلته ليها مناسك كيفك؟قالت لي منو معي؟قعدتهه ابكي، بقت اقول الوووو؟قلته ليها معاك شهد، قالت لي بإستغراب شهههد؟؟كيفك ي بت ووينك؟جيتي متين ي حيوانه وبتسافري وم بتكلميني؟؟بقيت مستغربه طبعاً سفر شنو بتتكلم عنو؟قلته ليها مناسك عايني بكرة عايزاك تجيني ضروري، قالت لي اصلاٌ حأجيك ي حيوانه من غير م تقولي، قلته ليها لكن م تجيني في بيتنا، قالت لي اللاقيك برة يعني؟قلته ليها لا بتصل عليك بكرة وبفهمك تجيني وين، قالت لي ي بت مالك؟ قلاه ليها لي بكرة ي مناسك تمام؟قالت لي طيب، قفلته منها وقعدته في السرير وبقيت ابكي، حسام جا قعد جمبي وبقى يطبطب علي، قلته ليهو قلقانهه على ماما وبابا شديد ي حسام والله بموت لو حصل ليهم شي بسببي

قال لي استغفري ي شهد ان شاءالله م بحصل ليهم شي

اليوم التاني اتصلته على مناسك وخليتها تركب ركششهه وخليت حسام يوضف لبتاع الركشه لغااايه م وصلو طلعته ليهم برة، اول م نزلت من الركشه بقت بتعاين لي بذهول واستغراب وصدمه كدة وبتتلفت، قالت لي شهد؟؟؟اترميت فيها وبقيت ابكي، قالت لي دة شنو المكان دة والجابك هنا شنووو ي بت بقيت تباري بيوت الشيوخ ولا شنوووو؟بتاع الركشه مشى قلته ليها تعالي، قالت لي ماشه بي وين؟قلته ليها تعالي بس، دخلتها البيت قالت لي دة بيت ناس منو ي شهد؟صاحبتي ناس جداد غيري؟قالت السلام عليكم، قلته ليها ادخلي، قالت السلام عليكم، دخلنا الصاله اللي هي في شكل هول ومعاهت غرفه، قالت لي شكلو البيت فاضي ي شهد اهلو ماف ولا شنو؟قلته ليها اقعدي، قعدتها جبته ليها مويه، طبعاً هي بتعاين لي بإستغراب كدة وهلع، بعد م شربت قعدته في السرير التاني قصادها وفضلته ساكته، قالت لي شهههد؟رفعته عيني عاينته ليها، قالت لي في شنو ي شهد؟بعد مسااافه دمعتي جرت قلته ليها دة بيتي ي مناسك، ضحكت وقالت لي هااا حلوة حلوة دي مقلب حزين منك بس م بمشي معي

قعدته ابكي وقلته ليها انا جادة ي مناسك دة بيتي، انا وحسام اتزوجنا

بقت تقلد صوتي بي سخريه قالت لي واااو عروس بدون حنه وبدون دخان وبالشكل دة وبدون علم صحبتها وعروس في الخرابه دي شهد انتي رجعتي من الإمارات ولقيتي نفسك فاضيهه قلتي تتموضعي بي صح؟زدته في البكى وقلته ليها بصوت عالي لا م بهظر انا جادة ي مناسك انا م سافرته الإمارات ولا شي ولو ناس بيتنا قالو ليك كدة كذبو عليك انا عندي شهر كامل في البيت دة اتزوجته حُسام بي طريقه م تخطر على بال زول حتى ويمكن تكون اخر التوقعات وبقيت احكي ليها وابكي، حكيت ليها كل الحصل بالتفصيل فجأة لقيتها تتنهد وتبكي قالت لي كذب ي شهد كذب قولي الكلام دة كذب

قلته ليها ي ريت لو كنت بكذب ي مناسك ي ريت مسكتني وبقت تبكي بصوت عالي قالت لي بس ماف زول بعاقبوه كدة حتى ولو افعالو كانت عظيمه عمي عبدالله ليه اتهور كدة ي شهد وبعدين م يرميك.الا لحسام النسونجي الباطل دة وانتي ليهه عملتي كدة؟ م اكتفيتي من حسام وافعالو؟م جادة انتي ي شهد م عندك عقل؟

تاني خليتيه يرجع يلعب ليك بعقلك؟اقتنعتي ليهو كيف ي شهد؟؟؟جاوبيني؟لييييييهه م رجعتي لي؟لييييه م حكيتي لي ي شهد انتي جنيتي؟انتي فاهمه عملتي في نفسك شنو ورميتي نفسك اي رميهه؟فضلته ساكته وببكي قلته ليها حصل الحصل ي مناسك ودة خلاص بقى الواقع بتاعي، قالت لي م واقع ولا زفت م مجبورة تعيشي عيشهه زي دي ي شهد انا حامشي اتكلم معاهم دة م شي يتسكت عليه

قلته ليها لا ي مناسك انا م جايباك هنا علشان تمشي تتكلمي معاهم، قالت لي شهد انتي جنيتي؟قلته ليها انا بس عايزاك تخلي بالك منهم تمشي ليهم كل فترة وفترة وتطمنيني عليهم، قالت لي شهد، فجأة باب الشارع فتح حُسام جا داخل، غمضت عيونها واخدت نفس عميق، قال السلام عليكم، بعد مسافه قالت ليهو وعليكم السلام، كان شايل حجات قال لي شهد هاك، قمته شلته منو الحجات وطلع على طول، قالت لي اخخخخخخخ ي شهد اخخخخخخخخ م عارفه اقول ليك شنو بجد م عارفه انتي مجنونه ي شهد مجنونه والله العظيم تلاته ماف عاقل بعمل كدة

فضلته ساكته وبعاين ليها، قالت لي انتي اسي راضيه عن نفسك؟قلته ليها رضاي عن نفسي م مهم انا بهمني رضى بابا وماما عني وبهمني يكونوو بخير واتطمن عليهم، قالت لي كنتي تفكري قبل م تتصرفي بغباء كدة بس انا بجد مصدومه في عمو عبدالله

...بعد اسبوعين من الكلام دة في يوم جات ام حُسام من الصباح شايله اكياس في يدها، قالت لي مشيت السوق جبته ليك ملابس وشويه حجات بتحتاجيها ريحه وحجات بسيطه بسيطه كدة، بقيت اعاين ليها، قالت لي انتي ساكنه وسط ناس وجيران يعني كان جاك زول لقاك كدة تقولي ليهو شنو؟م بتقدري تقولي ليهو متزوجه لأنو شكلك م بقول كدة ي بتي وكلام الناس بدأ يطلع، الحوالينا ديل كلهم اهلنا وجيرانا طبعاً دة بيتنا القديم كان مأجر بس فضى، اها انا الليله جايه احننك ي بتي وبحفر ليك حقرة الدخان من بكرة ببدأ معاك الدخان، بقيت اعاين ليها بي حيرة، قالت لي عاد م ينفع نقول عرسنا لي ولدنا ومرتو جابوها ليهو كدة، متخيلين؟اي بس طعنه قلب بالبارد، حُسام كان ماف، قعدتهه ليها حننتني

وبعد خلصت لي من الحنه مشت حفرت الحفرة في الحوش برة، وجات راجعه طلعت لي الحنه وطبقتها لي مرة تانيه وبعدها عملت لي فيها النشادر، قالت لي كدة خلاص، فضلت قاعدة معي لغايه المغرب، حسام جا داخل قال السلام عليكم كان شايل تلج واكياس في يدو، قالت لي قومي على راجلك، بقيت اعاين ليها، قالت لي شيلي منو الحجات، حُسام بقى يعاين لي من فوق لتحت، قالت ليهو عروس جديدة لسسسه م عارفه شي هههههه اها الليله بقيناها ليك مرة مع النسوان وحنناها رايك شنووو؟طبعاً انا متضايقهه بس ساكتهه

شلته الاكياس واتحركته تاني كررت ليهو السؤال وقالت ليهو اها م قلته لي رايك شنو بقت مرة ولا م بقت؟بعد مسااافه قال ليها هي م محتاجه حنه عشان تبقيها مره، قالت ليهو كلام لكن، تصرفاتها كانت غريبهه وم طبيعيهه ابداً

لما قامت طالعه قالت لي القمصان الجبتهم ديك اللبسي ليك منهم قميص سمح كدة كويس؟بعد م طلعت دخلته جوة حسام جا شال الفرشات فرشها برة في الحوش وقال لي في حجات مفروض اجيبها بس لسه م جهزت تلاجه وتلفزيون وغرفه وعايز اجيب ناس يصينو البيت دة لكن يومين كدة، فضلته ساكته، فجأة حسيتو وراي مسكني ولفاني عليهو وبقى يعاين لي، بعد مساافه قال لي شهد انتي مرتاحهه بغض النظر عن الحاصل معانا انتي بجد مرتاحهه معي؟اتكلمي ي شهد بعد مساااافهه قلته ليهو م بقدر اغض نظر عن الحاصل معانا لانو الحصل م هين

قال لي حنعديهو إن شاءالله ي شهد وربنا اكيد حيصلح الحال، هزيت ليهو راسي وبقيت اعاين في الأرض، قرب مني وبقى شبه ضاميني وباسني في راسي مسااااافهه وقال لي "الحنه حلوهه شديد فيكك ي ريت لو عرسنا تم في ظروف احسن من كدة

فضلته واقفه وساكته، مسك يدي وقال لي اوعدك م حيحصل اي تقصير مني تجاهك، نزل وباسني في خدي وقال لي رغم الظرف الغريب الجمعنا م قادر اصدق انو انتي مرتي ومعي ي شهد عشتهه عمري كلو وانا متمني اللحظه دي، اتحركته منو شويهه جراني عليييهه اكتر وحاوطني بيديه، قربو مني بالطريقهه دي كان محسسني بكتمة نفسس زي الكأنو دة م الزول الانا حبيتو داك ولا كأنو هو م الزول الانا عشته ايام وليالي وانا بتخيل يوم ابقى حلالو ونكون مع بعض، احساسي معاه كان غريب شديد واتحول 180 درجه، في نفس ذات اللحظه دي فجأة باب البيت دق، دقه الباب دي كانت منقذهه بالنسبه لي، فكاني وطلع على الباب بعد مساااافه سمعته صوت رجال في الباب وصوت زول بقول حرم تدخل يا ولدي ياخ عيب ياخ عيب اسمع كلامي انا الكبير دة بحلفك بالله، سمعته صوت ناس داخله البيت وصوت بقول السلام عليكم، اتفضلو ي اولادي اقعدو، حسام جاني داخل قال لي شهد، قلته ليهو منووو؟قال لي اخوانك، قلته ليهو اخواني؟لفحته التوب بسرعهه وطلعتهه ملهوفهه، حُسام اخوي الكبير ومجتبى الاتنين مع بعض قاعدين برة، بعد م شوفتهم بقيت م قادرة اتحرك حسام اخوي قاعد قدامي بجد، اول م شافني وقف على حيلو اي ملامح وشو كانت ملانهه عتاب وزعل وحتى الإرهاق مشيت عليهو بسرعه قلته ليهو حسام اتخطيتهم كلهم واترميت في حضنو وبقيت ابكي، مسكني وهو زاتو بقى يبكي معي، كملنا البكى الفي الدنيا ونحن واقفين بعدها عمو حسن ابو حسام قال لي لينا لستهدو بالله ي اولادي حُسام ي ولدي كفايهه، فضلته واقفه وبتنهد عمو حسن قال لي اقعدي ي بتي م تقيفي، مجتى اخوي قال ليهو لا م عندنا قعدة ي عم حسن معليش اعذرونا على مشيهه وعجلهه نحن شهد يلا اطلعي ارح، بقيت اعاين ليهو، قال لي يلا اطلعي قدامي، بقيت اعاين ليهم كلهم، حُسام قال لي لييييهه م اتصلتي علي وحكيتي لي بالحصل دة ي شهد؟؟؟مجتبى قال ليهو حُسام دة م وقتو اعتقد دة م السبب الجايبنا هنا، كمل كلامو وقال لي يلا ي شهد م بتسمعي انتي؟حُسام راجلي قال ليهو دقيقهه دقيقهه ي ابو الشباب فاكر نفسك وين انت في زريبه؟شنو ارح؟ سايقها وين انت اساسا؟مجتبىً قال ليهو ي شاب م تدخل عم حسن ي ريت تمسك ولدك من غير نقاش، عمو حسن قال ليهم اهدو ي اولادي

حسام قال ليهو م اتدخل؟انت فاكر نفسك جاي وين لمن بتقول لي م اتدخل؟لو ناسي اذكرك دة بيتي والجاي تسوقها من غير اذني دي مرتي بي قسيمه م جايبها من الشارع انا، مجتبى عايز يضربو عمو حسن دخل في النص قال ليهو بي نهرة حُسام، حسام اخوي مسك مجتى وقال ليهو مجتبى اسكت وصيتك بشنو انا؟مجتبى اتفك من حسام قال ليهو تمام تمام م سائلو انا يلا ي شهد اطلعي قدامي، حُسام جراني وراهو وقال ليهو خليني اشوفها حتطلعها قدامك كيف رجالهه هي؟مجتبى قال ليهو رجالهه ي حيوان رجالهه ودقيقهه اوريك الرجالهه دي كيف جا عليهو ضربو بنيه عمو حسن وحسام اخوي فكوهم من بعض وطلعو مجتبى برة البيت وانا واقفه ببكي، بعد مسافه حسام اخوي جا داخل قال لي شهد، عم حسن جا داخل وراهو، حسام قال لي يلا ي شهد، فضلته واقفهه ومترددة م عارفه اقول ليهو شنو الموقف كان صعب شديد والقرار اصعب هم جاين ومقررين سلفاً انهم يسوقوني حتى راي حسام راجلي م في اعتبارهم اخواني وانا بعرفهم لو ختو شي في راسهم حيعملوه يمكن ربنا بختبرني ومديني فرصه تانيه علشان اتصرف فيها بحكمه بس انا انا انا م م بقدر كل مرة اتصرف بأنانيهه م ممكن اعمل كل دة وادخل حسام في كل المتاهات دي وفي الاخير اخليهو بالبساطهه دي، م ممكن كل مرة اجوط حياة زول واخربها واهرب اخليها والمرة دي بالذات الموضوع ابداً م لعبهه ولا بكيفي زي كل مرهه، حُسام اخوي قال لي شههد بتكلم معاك انا يلا، إترددتهه مسااافه حتى قلته ليهو حُسام انا م بقدر امشي معاكم ي اخوي ...

إقتباسههالحياة لاتنتهى مره واحده، انما تنتهي حياة لتبدااخرى، تبتدا قصه لتنتهى اخرى؛ايضا لا تقف عليحال انما علي الالف الاحوال حلوها بالف نهكه ومرها بالف شكل، قد لا يعني للحياة اسمائنا لا يعنيللحياة الا ان تسير بقوتها وجبروتها وهيبتها التي لايهزها ولا يغيرها احد، احيانا تضعنا علي مفرق الخيارات ان نختار النهايه رغما عنا وان تكون بداياتلا تليق بالنهايات تجعلنا نختار الاشخاص رغما عناختيارات قلوبنا Shiraz Osman

...