الفصل الخامس والعشرون

سكتت مسافهه ومسح وشو بي يديهو وضغط على عيونو بي صوابعو وقال لي"إضطراب ثنائي القطب" قلته ليهو ودة شنووو كمان؟قال لي نوع من انواع الإكتئاب بخليك متقلب يعني اسي ممكن تكون معي مبسوط شويه تدخل في نوبه اكتئاب وهكذا، دقيقههاخد اللابتوب لفترة دقيقتين ورجعو لي قال لي دة شرح مفصل عن المرض، فضلته ساكته مسااافه وانا بعاين للابتوب بعدها ودموعي جاريهه عيني وقعت على كلمه"انتحار"قلته ليهو بصوت عالي ماهر م حيكون انتحر صح؟مستحيل يكون انتحر؟!عاين لي وهو ساكت من غير م يبدي اي ردة فعل بتوحي بالنفي

قال لي الأكيد في الموضوع انو م طلع برة البلد ي شهد لأنو جوازو واوراقو الثبوتيه كلها موجودة في البيت، انا م خايف من قصه انو اختفى لانو عادي هو مرات بيختلي مع نفسو فترة وبجي راجع انا خايف من الحاله الهو اختفى بيها لانو وضعو حرج شديد المرة دي، قلته ليهو طيب م سالته يعني اصحابكم واهلو وكدة، قال لي ماهر م عندو اهل متواصل معاهم شديييد على الصعيد الشخصي هنا في البلد دي في حاجه بعملها انو كل فترة وفترة بلف على جزء او فئات محددة من اهلو وبياخد ليها مستلزمات بيت من مواد تموينيه لي غيرو احساس انو بعمل الحجات الكان زمان بعملها ابوهو وكدة، اما اصحابنا كلنا واقفين على رجل واحدة وبنفتش حتى بلاغات في الاقسام رفعناها وبقينا في حاله ترغب بس، قلته ليهو لييييه م كلمتني من لحظه م اختفى؟قال لي انتي اخر واحدة خطرتي على بالي م اكذب عليك اضافه لي انو انا م كنت لاقي اي طريقهه تلمني بيك تلفونك دة لميت فيه بعد طلوع روح، قلته ليهو كنت تجي بيتنا انت عارفو وين؛!!!قال لي المهم ي شهد انا لجاتهه ليك نسبه لي انو انا متوقع تحت اي لحظه ماهر يرجع انا احتياجي ليك بعد رجعه ماهر لاني حاولته بكل الطرق اني اقنعو بي انو يرجع يتواصل مع الدكتور ورفض، سكتت مسافهه وقال لي واحدة من اسباب طفشتو دي يمكن تكون ضغوطاتي عليهو في موضوع العلاج انتي يمكن يستجيب لكلامك ف احتماليه انو يرجع اكيدة عشان كدة انا مُستبق الاحداث وجاي طالب مساعدتك

قلته ليهو نحن حننتظر لمن يظهر براه؟يمكن م يظهر، يمكن يعمل حاجه في روحو انت شايف المرض قال اخر مراحلو الانتحار وانت بتقول انو هو طلع في اسوأ حالاتو يعني كل التوقعات واردة قال لي طيب اهدي ي شهد م كدة نحن كدة م حنحل مشكلهه فضلته ساكته وببكي، قال لي بعد كدة ما عندي شي اقولو ممكن نطلع عشان اوصلك؟!قلته ليهو طيب، طلعنا وصلني الجامعه وانا الدنيا دي ضاقت بي خلاص راسي بقى لافي م عارفه اعمل شنو ولا اقول شنو ولا فكرة في راسي مافي

وصلني الجامعه قال لي زي م قلته ليك البكى م حل نحن نتفائل بي انو يكون بخير ويرجع بعدها كلو بهون، م فتحته خشمي بكلمه، قال لي حأكون على تواصل دايم معاك واوريك التفاصيل اول بأول تمام؟هزيت ليهو راسي بمعنى تمام، نزلته من العربيه وانا م مستوعبه كل الاتقال دة معقوله؟ماهر؟ حاصل معاه كل دة وانا اخر من يعلم؟ قدر شنو الحياة دي تافهه ي جماعهه

شويه كدة حسيت بنفسي مهبطه لدرجه انو رجولي م شايلاني مشيت على عربيتي فتحتها وركبته وطلعته تلفوني اول رقم خطر على بالي لُجين اتصلتهه عليها اول م فتحت الخط قلاه ليها لجين انتي وين؟قالت لي في البيت بسم الله مالو صوتك؟قلته ليها تعالي لي في الجامعه اسي، قالت لي بسم الله ي شهد مالك في شنو بتبكي؟قلته ليها لجين انا محتاجاك ضروري م بقدر اسوق العربيه تعالي بسرعه

قالت لي طيب طيب مسافه السكه يااااا شهد جايه عليك، قفلته منها ورميت تلفوني وبقيت ابكي، فضلتهه منتظراها اكتر من ساعه حتى جات ولما جات وشافتني بالحاله الانا فيها بقت تقول لي مخلوعه شهد، شهد بسم الله مالك في شنوو؟احكي ي شهد!؟وانا زايدة في البكا ضمتني عليها وبقت تهدي فيني وتتكلم معي في شنو ي شهد فهميني؟ قلته ليها ماهر ي لجين قالت لي ماهر؟ماهر مالو؟سكتت وانا زايدة في البكىقالت لي شهد م تجنيني مالو ماهر الحاصل عليهو شنوو؟قلته ليها عيان ومختفي ي لجين

قالت لي كيف يعني عيان ومختفي؟مالو عندو شنو ومختفي مع مرتو ولا كيف؟فضلت ساكته ومنزله راسيي تحت وزايدة في البكىقالت لي شههههد احكي م توتريني الله يرضى عليكقلته ليها اتصل علي زياد صحبو اللي وصلنا البيت يوم حنه ماهر وطلب يشوفني و...الخقالت لي بي خلعه لا حول ولا قوة الا بالله لا مستحيل مستحيل يكون جادي ي شهد مستحيل قلته ليها تخيلي بس تخيلي ماهر يكون حاصل معاه كل دة وانا اخر من يعلم اخر من يعلم ي لجين

قالت لي طيب واهلو اهلو م عارفين بي وضعو دة؟قلته ليها المفروض انا اكون اهلو، قبل كدة قالها لي بي صريح العبارة في المستشفى قال لي انا م عندي غيرك ي شهد والله العظيم لو حصل معاه كدة بسببي حموت ي لجين حموت وربي

قالت لي شهد اهدي علشان نعرف نتصرف م عايزين نتوقع اسوأ الفروض ابدا، ً شالت مني مفتاح العربيهه واتحركت، ونحن في الطريق عدة علي شريط كل موقف لي مع ماهر من اول م جا داخل علينا في الفصل لما كنت ممتحنه بعديها تريقتي عليه وكميه التنمر والاستفزاز اللاقاهو مني في المدرسه وشماتي فيهو قدام الطلبه وتشغيلتي ليهو في كل كبيرة وصغيرة وكل م اللقاهو في مكان، كنت بحس بالقرف من نفسي مع كل موقف اتمنيت الدنيا دي تنشق وتبلعني يعني انا كنت واحد من الاسباب في حالتو دي، ياخي مافي اسوأ من كدة مافي ابداً

لجين فجاة شالت تلفونها وبعدها قالت"الووو منذر وين انت؟طيب ممكن تجي البيت؟لا بيتكم انا ماشه عليكم م وصلت معي شهد، لما نصل هناك بتعرف كل حاجه، ياخي لما نصل بحكي ليك المهم م تتأخر، تمام يلا سلام، وصلنا البيت لجين سندتني لغاايه م وصلنا الشقه، فتح لينا منذر لما شافني قال لينا في شنووو؟لجين قالت ليهو ساعدني خلينا ندخلها غرفتها، قال ليها بصوت عالي مالها فيها شنووو؟على صوتو جات ماما قالت شههههد؟مالها؟مسكتني بقيت ابكي، ماما قالت لي بسم الله ي بتي مالك؟مالها ي لجين فيها شنووو؟لجين قالت ليها خالتو اهدي بحكي ليكم بس خلونا ندخل جوة، عايزين يدخلوني غرفتي قلته ليهم لا م.داخله، رقدوني في الكنبه وماما لسسه بتسأل مشت جابت لي مويه وجات، لجين قالت ليها مهبطه محلول ملح بسكر بسيط ي خالتو، ماما مشت وجات راجعه شربوني جزء قليل منو، ماما قالت ليها ي بتي م توقفو قلبي قولي لي مالها البت دي؟قالت ليها اقعدي ي خالتو، قعدت قالت ليهم كل الحاصل انو...الخماما بقت خاته يدها في راسها وبتقول لا حول ولا قوة الا بالله!؟انتو جادين؟ووين اسي هو؟ وانا اقول انقطع مننا فترة كدة مالو؟وانت ي منذر م متواصل معاهو؟قال ليها والله ي امي كان في فترة متواصل معاهو حتى اتلاقينا كذا مرة وشربنا جبنه بس بعدين انقطع مني رسمي حتى تلفونو اغلب الوقت بكون مقفول وهو مرة كان قال لي انو ناوي يسافر مع مرتو كم شهر تركيا تاني قلت خلاص بكون سافر عشان كدة انقطع

قالت ليهو هي ي ولدي لكن معقوله؟زول ولد بيت زي دة م بتسألو منو؟العشرة دي كيف هي كيف؟ماما بقت تبكي، لجين قالت ليها ي خالتو م تبكي، قالت ليها والله لو عارفاهم م متواصلين معاه انا كنت بتصل وبسأل منو هو م هين ابداً وم عندو زول اهلو بعيدين شوفي زمن مرضتو ديك 3 اسابيع مرقد في المستشفى اسي ي ربي يكون وين والحاصل معاه شنو؟ اتزكرته كلمه انتحار دي وزدته في البكىمنذر كان متضايق شديد وبهززز في رجلو قلته ليهو منذر مافي مكان كنتو بتمشوهو مع بعض او كذااا ممكن يكون فيهو اسي؟هو م سافر لانو جوازو واوراقو الثبوتيه كلها موجودة يعني بس زول وطفش

ماما قالت لي اها الطفشي دة اخير منو السفر بالمطار على الاقل معروف سافر وين منذر قال لي اديني رقم صحبو زياد دة، قلته لي لجين تلفوني، قالت لي م معي، قلته ليهو في العربيه معناها، قال لي جيبي المفتاح، لجين قالت ليهو هاك اخدو وطلع، ماما بقت تتحسبن وتقول عليك الله في اهل بخلو ولدهم كدة؟ديل اهل ديل؟؟؟حسبي الله ونعم الوكيل حسبي الله ونعم الوكيل في دي ام منذر جا راجع شايل التلفون اداني ليه طلعته ليهو الرقم شالو وطلع، فضلنا قاعدين وساكتين وكل زول في .راسو الف فكرة م قادر يواجه بيها التاني

قمته من محلي دخلته الحمام وانا بغسل في وشي فجأة طلعته بسرعه قلته ليهم بكون في المزرعهه، بقو يعاينو لي كلهم، قلته ليهم ماهر بكون في المزرعه حقتهم، لجين قالت لي والمزرعه حقتهم دي وين؟قلته ليها اديني تلفوني شلتو بسرعه اتصلته على زياد اول م فتح الخط قلته ليهو زياد انت شوفتو اذا في المزرعه او لا؟قال لي اول مكان مشينا ليه مافي هناك للأسف ي شهد قفلته الخط ودموعي جاريه اليوم دة كان صعب علينا كُلنا بس انا كنت ماخدة النصيب الأعظم يعني احساسي بالذنب تجاهو كان كبير شديد كبير للدرجه اللي مخليني م طايقهه نفسي

م نمت ابداً عدة يوم واتنين وتلاته وعشرة ونحن م عارفين الأيام دي بتمر علينا كيف ابداً انا كنت لا اكل لا شراب لا غيرو ف ماما كانت بتأكلني بالغصب، احساس انو يكون انتحر بقى بالنسبه لي هوس بقيت حاسه نفسي بتأكل من جوة من كترة التفكير والتوقعات، اخر الحلول كانت اني انشر صورتو في الميديا واقول عليه مختفي، زياد م حبذ الفكرة في البدايه ومنذر كمان رفض قلته ليهم ماف حل غير كدة انا هنشر صورو في كل وسائل التواصل الاجتماعي فيس تويتر انستقرام على غيرو واليحصل يحصل، بالفعل نشرته صورو في كل مكان ونزلته ارقامنا كلنا انا منذر زياد اشرف لجين، ماما والموضوع لقى تفاعل او شبه بقى ترند معارفو طلعت كتيرة شديد فجاة لقيت كميه ناس بتقول دة الزيني اليوتيوبر داك وبتشير صورتو و...الخ في البدايهه م فهمت الناس دي قاصدة شنو ابداً وم ركزته مع الموضوع

عمو الزيني نزل السودان وام ماهر ومعظم اهلو اتقمصو دور المهتمين ومتفاعلين مع الموضوع، ماما شدة م كانت متضايقهه منهم لدرجه انها قالت لي انا امو دي شدة م مزعلاني لدرجه اني نفسي اكفتها لمن اجيب اخرتها عديمه المسؤليهه والقلب دي بقينا في دوامه انتظار والموضوع اخد وقت اسبوع بعد نشر الصورة م جاتنا ولا مكالمه بس اهي مجرد تنظيرات فتشو المستشفيات والمشارح على غيرو في يوم جاتني مكالمه رديت بسرعه بقيت اقول الووو؟الووو؟بعد مسافه حتى سمعت كلمه شهد؟قلت اهلين منو معي؟كانت بت قالت لي معاك تولينتولين؟متصله يمكن ماهر معاها

قلته ليها بي لهفه تولين اهلين كيفكك، قالت لي الحمدلله، فضلته ساكته وفي انتظار انها تقول كلمه بسقالت لي بصوت خافض ومبحوح ماهر لسسسه م ظهر ولا في منو خبر؟سكتت مسافه حتى قلته ليها ابداً، تولين لو عارفه عنو حاجه الله يخليك احكي لي، بقت تبكي فقدتهه الأمل من نبرتها قالت لي انا م عرفته بالموضوع الا بعد م شوفت صورو في الميديا م كان عندي علم والله ي شهد قلته ليها م مشكلهقالت لي طمنيني لو حصلت معاكم اي حاجه بلييييز ي شهد ممكن؟قلته ليها طيب تولين دي اخر أمل وفقدتو خلاص وبقيت متجرسه لأخر حد م عارفه اليوم بعدي كيف اساساً

في يوم حوالي الساعه 12 ضهر م بين نايمه وصاحيه فجأة تلفوني ضرب شلته التلفون بي لهفه وفتحته الخط زياد قال لي ي شهد لقيناه، لقيناه ي شهد، نطيت من السرير وانا بقول ليهو احلف ي زياد؟وين انتو؟قال لي في امدرمان، قلته ليهو وين في امدرمان جايه عليكم انا، قال لي لا ي شهد م تتعبي تجي نحن ماشين عليه انا ومنذر واشرف حنجيبو وحنتصل عليك، قلته ليهو ماشين عليه وين م بقدر انتظر انا بجي عليكم، قال لي خليك ي شههد م تجي، طلعته من الغرفه جريت غرفه ماما لقيتها بتصلي فتحته الدولاب شلته اقرب توب وانا جاريه وطلعته شلته مفتاح عربيتي وعلى الشارع، بعد م اتحركته رجعته اتصلته عليه م رد اتصلته على منذر م رد، اشرف م رد بقيت اتصل عليهم كتير لغاايهوم منذر رد قلته ليهو منذر وين انتو؟قال لي في امدرمان، قلته ليهو وين في امدرمان ي منذر؟سكتت، قلته ليهو منذر انا بسأل وين في امدرمان؟ماهر كويس اتكلم ي منذر، قال لي في التجاني الماحي ي شهد، سكتت مسافهه قلته ليهو ال ال ال م فهمت بتعملو شنو في التجاني الماحي؟قال لي ماهر هناك

وقفته العربيه وفضلته ساكته بعدها قلته ليهو ماهر هناك؟طيب هو كويس؟كويس ي منذر صح؟سكتتقلته ليهو منذر رد عليقال لي بي صوت مبحوح كويس ايوةقلته ليهو انت بتكذب علي صح؟من صوتك واضح انو م كدة قال لي كويس ي شهد اسي نحن جايبنو، قلته ليهو انا جايه عليكم، قال لي لا ي شهد نحن جاين م تجي

قلته ليهو حتمشو بيهو وين؟قال لي بيتهم، قلته ليهو منذر انت متأكد انو كويس؟الله يخليك طمني؟قال لي كويس ي شهد قلته ليك وقفل على كدة، جات مكالمه من ماما فتحته الخط قالت لي شهد وين انتي وفي شنوووو؟قلته ليها لقو ماهر ي ماماقالت لي الف الحمدلله وشكر ليك ي رب الف الحمدلله لقوه وين؟وكيف؟هو كويس؟قلته ليها م عارفه ي امي منذر م فهمني شي قالت لي يارب يكون بخير وين انتي اسي؟قلته ليها حمشي على بيت ناس ماهر لغايه م يجيبوه، قالت لي ارجعي سوقيني معاك، قلته ليها لا م بقدر ارجع تاني ي امي

قالت لي خلاص انا لاحقاكم اعملي حسابك وانتي سايقه ي شهد سامعاني ي بت؟قلته ليها طيب، قفلته منها م تميت 10 دقايق اتصلت علي لجين قالت لي شهد وين انتي؟قلته ليها لقوهو ي لجين لقوهو قالت لي عارفه ي شهد عارفه وين انتي؟؟؟قلته ليها في الطريق ماشه على بيت ناس ماهر، قالت لي طيب نتلاقى هناك، قلته ليها ماشي، لما وصلته بيتهم م نزلته من عربيتي ابداً لأنو ناس منذر لسسسه م وصلو ولجين م وصلت برضو فضلته قاعدة في عربيتي وبتصل على منذر م برد كلهم م كانو بردو

لجين وصلت قالت لي مالك واقفه برة؟قلته ليها م قدرت ادخل هدخل اعمل شنوو؟قالت لي يلا ندخل وقفتنا برة م حبابها، دخلنا ضربنا الجرس فتحت لينا الباب امو اظنهم كلهم كانو قاعدين مترقبين ومنتظرين جيتهم، كانت في مرت عمو الزيني وامو و 6 وتلاته نسوان غيرهم وبنات كتار في منهم الكبير ومنهم الصغير و 3 اولاد 2 كبار وواحد صغير، و 4 رجال ومرة كبيرة في العمر، يعني بس كان نفسي اسالهم وين انتو كنتو لما هو وصل للحاله دي؟اول م قعدنا قبل م يجيبو لينا مويه امو تشيل وتبكي والحواليها احساس بهدو فيها وكدة وشغاله تقول"انا الاولاد ديل نجضوني في دنيتي دي، انا الاولاد ديل اعمل ليهم شنو بس عليكم الله بس كدة قولو لي؟منقصين منهم شنو؟منقصين منهم شنو عشان يعملو كدة؟الواحد يمشي للجنون بي يدو؟البخليهم يتعاطو شنو؟لكن انا انا م عرفته اربي، انا م عرفته اربي ابدا، اناً ولجين بقينا نعاين لي بعض، جابو لينا مويه شربنا واحدة من البنات قالت ليها خلاص ي ماما م تبكي كفى، قالت انا لو عرفته اربي م كان الليله عيال بطني بقو لي وجع والربيتهم بس احن علي منهم، م كفايه علي اخوهو يجيني هو كمان؟عملته شنو انا في دنيتي دي؟قلته ليها بإنفعال معليش ي خالتو بس هو مريض والهو فيهو دة مرض فاهمه يعني شنو مرض؟يعني الشي دة م بيدو ابداً وهو اليوم وصل للمرحله دي علشان م لقى اهتمام بي حالتو في حاله زي دي بدل م انتي تتحسري على تربيتك المفروض انك تتحسري على وضع ولدك انت م عارفه المرة بيهو هو شنو ولا العاشو شنو مع احترامي ليك بس الامومه دي كيف هي؟انتي لو مصاحباه ولو قريبه منو زي م انتي قريبه من الما جبتيهم من بطنك ديل كنتي عرفتي البيهو والعليهو

سكتت وكلهم بقو يعاينو لي، قمته على حيلي وقلته ليها لجين انا هنتظرهم برة لمن يجو عن اذنكم ي جماعه، قمته وم عاينته وراي لجين لحقتني قالت لي المرة دي دايرة دق الباطله دي وااااااااي منها واي، قلته ليها دي تندفن حيه لانها م ام عن كميه القساوة الفي القلبها حسبي الله فيها قالت لي والله اليُتم ولا ام زي دي اعوذُ بالله، قلته ليها م قدرته اتجاوزها واتمالك اعصابي قدامها ابداً فضلنا قاعدين في جلسه الحديقه، كررنا اتصالاتنا على منذر م برد وكذلك زياد واشرف

بقينا قاعدين على اعصابنا لغااايه م في لحظه سمعنا اصوات ابواب عربات بتتقفل، وقفنا على حيلنا وعيونا على اتجاه المدخل دقيقة ودقيقتين وخمسه حتى شايفين عمو الزيني جاي داخل وانا خلاص من اللهفه شبه حاسه نفسي حأجري على الباب وكانو رجولي مسمرة في الارض، فجاة لمحت منذر وبعدها بقيت واقفه مصدومه من الشايفاه لأ مستحيل مستحيل بجد مسكته في الكرسي لاني م قادرة اسند نفسي وسامعه لجين بتقول"لا حول ولا قوة الا بالله لأ لأ مستحي"ماهر كان في شكل يبكي اليهودي احساس حاجه ضخمه بس م شديد وحالقين ليه نمرة واحد لو م اتمعنته في وشو مرة واتنين وعشرة حتكذب عيونك م حتقول انو دة هو ابداً، عمو الزيني وشو م.كان بتفسر عاين لينا وعيونو لونها زي الشرار ومنذر واشرف وزياد نفسي الشي كانو ماشين معاه وكل واحد م قادر يعاين للتاني، انا كنت حاسه بي انو دموعي شلال م فاهمه اي شي لغايه م عبرو ماهر م رفع عينو عاين لينا ابداً، منذر م دخل معاهم وقف وهو مدينا ضهرو وخاتي يديهو في راسو، بقيت اقول ليها لجين دة دة دة ماهر؟المرة قدامنا دة ماهر؟لجين م كانت قادرة تفتح خشمها بحرفمشيت على منذر مسكتو قلوه ليهو منذر ماهر مالو؟دة ماهر؟منذر دموعو جات جاريه، قلته ليهو منذر بتكلم معاك انا دة ماهر؟مالو؟هو كويس صح كويس ي منذر؟الوداهو التجاني الماحي شنووو؟فجاة سمعنا اصوات بكى جايه من جوة البيت بكى بصوت عاليمنذر بعد مسافه ضماني وهو ساكت وانا ببكي بأعلى صوتي، جات لجين مسكتني وقعدتني في الكرسي قالت لي شهد اذا نحن قلنا نقابلو بالحاله دي تاكدي انو م حنساعد في عافيتو ابداً اهدي ي شهد واستغفري الله يرضى عليك عشانو

بعد اكتر من ربع ساعه دخلنا البيت رجولي تتطاقش، اتلاقينا مع زياد قال لينا اطلعو ليهو فوق، بقيت اعاين ليهو ياخي من الحزن والكأبه تفاصيل وشو كانت م بتتفسر، قال لي م تبكو قدامو او كدة تمام؟منذر تعال عايزك، طلعنا انا ولجين وصلنا شايفه عمو الزيني جا طالع من غرفه كدة، لما شافنا وقف، وصلناهو قال لينا حتدخلو عليهو؟هزيت ليهو راسي، قال لينا الله يرضى عليكم ي بناتي

فتح لينا الباب لجين دخلت وانا فضلته واقفه ومترددة او بمعنى ادق خايفه م حاسي نفسي حأتمالك اعصابي قدامو، انا اصلاً حيلي م شايلني م حأقدر امسك دموعي ابدا، لجينً قالت لي شهد، عاينته ليها، دخلنا الغرفه كانت كبيرة وفاضيه بقينا نتلفت، شويه كدة في باب اتفتح الشخصيه الضخمه اللي هي م ماهر الانا بعرفو ابداً جات طالعه عاين لينا الصدمه كانت انو جا سلم علينا، سلم علينا عادي عادي شديد لما مدة لي يدو وقال لي شهد كيفك انا اتسمرته في مكاني يعني متزكر اسمي وبقول لي شهد، مديت ليه يدي قلته ليهو بصوت مبحوح تمام الحمدلله، لجين بقت تعاين لي قالت ليهو كيفك ان شاءالله انت تمام؟قال ليها تمام الحمدلله انتو اخباركم والحاصل معاكم شنو طولنا ياخ، العبرة خنقتني حسيتو كانو بعاتبني بالجمله دي

لجين قالت ليهو الحمدلله، م عارفه اتمالكته نفسي كيف لمن طلعته من الغرفه هو واعي وبتصرف بشكل طبيعي طيب مالو مالو كدة فضلنا قاعدين معاهم لغايه الساعه 12 ماف اي زول عندو شي يقولو بس ناس قاعدة وساكته ووشوشها حتقع منها

بعد الساعه 12 طلعنا على البيت خلينا معاه زياد واشرف، لما وصلنا البيت منذر قعد يحكي لينا قال لينا "في واحدة اتصلت على زياد قالت ليهو انا لقيت اعلان عن مفقود مكتوب عليهو رقمك الزول البتفتشو عنو دة هو بيشن عندنا في مستشفى التجاني الماحي، على الاساس دة اتحركنا مشينا عليهو لاقتنا الزوله الاتصلت نفسها قالت لينا هو جاهم بذات نفسو وضعو كان صعب شديد جاب معاهو قروش اداها ليهم وقال ليهم عالجوني قال ليهم انا بدفع ليكم اي شي بس عالجوني وم تطلعوني من المستشفى انا م عندي مكان امشي ليهو، قالت لينا على قدر م رفضنا نستلمو على قدر م اصر علينا وكان بقول لينا انا بس عايز اتعالج عايز اتعالج

م لقينا في يدنا شي الا انو نخليه معانا رغم انو زول عاقل وهادي شديد م زي الحالات البتجينا ابداً كلنا كنا مستغربين كيف شاب زي دة يصل للحاله دي؟بغدين عرفنا انو بتعاطى اصلاً دة اول شي خمناهو منذر كان بيحكي ونحن كل زول ببكي بإتجاه هو زاتو كان دموعو بتجي جاريه بمسحها قال لينا نحن جبناه بي وضع كويس شديد نحن لقينا بشكل سيء لدرجه انو انا قلته ليهم دة م ماهر ابداً الناس دي مطلسانا ماما قالت لينا م عندي قلب امشي اشوفو، م بقدر امشي اشوفو نهائي

دخلته غرفتي وانا م قادرة اتنفس من البكى تخيلو مشى قال ليهم انا م عندي اهل يعني زول بفضل انو يمشي يحبس نفسو براه ولا يستنجد بأهلو؟ولا حتى بي انا؟انا واثقهه انو حصل فيه كدة بسببي بسببي والله العظيم شلته تلفوني وعملته مكالمه الساعه تقريباً كانت قريب 12 ونص، م لقيت رد على مكالمتي، صحيت الصباح بدري رجعته اتصلته على نفس الرقم كم مكالمه م رجع لي الا الساعه 8 ونص، اول م فتحته الخط قلته ليهو مستر عيسى كيفك؟قال لي شهد ي بتي وعليكم السلام مالك ي بتي ان شاءالله عافيه مكالماتك قلقت بي كنت نايم والله

قلته ليهو محتاجه ليك شديد ي مستر ضروري اشوفك اليوم وي ريت لو اسي

قال لي خير اللهم اجعله خير تمام اجيك وين ولا تجيني انتي في العيادة؟قلته ليهو حاجيك انا انت بتكون هناك متين؟قال لي اسي بطلع عليها لو الموضوت مستعجل، قلته ليهو ي ريت ي مستر، قال لي مسافه السكه بس، قفلته منو جهزته نفسي وطلعته مشيت، عليهو لما وصلته لقيتو وصل قبلي ومنتظرني في العيادة، مستر عيسى هو الدكتور النفسي بتاعي اللي بابا كان مخليني اتابع معاه هو شاااااطر شديد، استقبلني بي لهفه وبقى يسالني مالك انتي كويسه؟ قلته ليهو انا كويسه ي مستر، قال لي طيف في شنو ي بتي؟قلته ليهو كل الحاصل ي مستر انو...الخكنت بحكي وببكي وهو ساكت وبقول لي كملي كملي، بعد م خلصته قال لي قبل كل شي حاسه بنفسك ارتحتي بعد م حكيتي؟هزيت ليهو راسي بمعنى ايوةقال لي عارفه انو الموضوع دة مؤثر عليك انتي كمان؟يعني احساسك بالذنب تجاهو وتحملك لمسؤليه حالتو دي في حد زاتها حاجه ممكن تتسبب في انو انتي م تقدري تساعديهو لانو كل م تقيفي قدامو حتقيفي منكسرة وحتبكي وحتكتفي بكدة م حتلقي حلول

قلته ليهو علشان كدة انا لجأتهه ليك ي مستر قال لي المرض دة تقريباً نحن بصنفو من اسوأ الامراض النفسيهه لكن في نقطه مهمة انتي قلتيها انو هو متصالح مع فكرة انو مريض وبفتش على علاج لنفسو لدرجه انو مشى التجاني الماحي وطالب انو يعالجوه ف دة انسان علاجو اسهل من علاج الزول الما متقبل فكرة انو مريض، الحاجه الانا عايز اقولها ليك انو زول زي دة محتاج للإستقرار النفسي والحاصل معاه اسي دة نتيجه صدمات متواليه حصلت معاه ف كونو م فكر في الانتحار دي بشارة خير معنااها هو م في المراحل الأخيرة للمرض، قلته ليهو ي مستر يعني هو حيبقى كويس؟

قال لي حيتحسن هو بس المرض دة شبه واحد من الامراض المزمنه بس زي م قلته هو محتاج للإستقرار النفسي بس م اكتر م تخافي عليه ابداً هو حيتحسن اكيد وي ستي انا حأتابع معاه وحاقدم ليهو كل اللازم من ادويه لي غيرو وم حأقصر منو ابداً بس اهم شي ي شهد استمرارو في اخد الأدويه وفي مواعيدها، قلته ليهو طيب، قال لي م تظهري ليهو ابداً انهيارك دة عشان هو بدل م يستفيد من وقفتك جمبو ممكن يتراجع قلته ليهو حاضر، قال لي حددي لي حتجو متين عشان اكون حاسب حساب كل شي

طلعته من المستشفى ونصايح مستر عيسى ماشه جايه في راسي م مشيت بيتنا مشيت على طول بيت ناس ماهر، لقيت عمو الزيني ومرتو استقبلوني وضيفوني قلته ليهم معليش ازعجتكم بس كنت حابه اتطمن على ماهر اليوم اصبح كيف؟عمو الزيني قال لي ي بتي عيب البيت بيتكم تجي تحت اي لحظه ياخي هو لو م انتو م كان مرة علينا الصباح دة والله الله يرحمو عبدالله اخوي عرف يلدي ويربي

قلته ليهو تسلم ي عمو ممكن اشوفو؟مرتو قالت لي اي على طول بدون استئذان كمان، طلعت معي لغااايه م وصلتني الغرفه وفتحت لي الباب، ماهر كان صاحي وقاعد قدام لابتوبو وجمبو كبايه قهوة، قلته ليهو صباح الخير، قال لي شهد عبدالله اهلين صباح النور، قلته ليهو كيفك؟قال لي الحمدلله لسسسه م خليتي إزعاجك دة انتي؟قلته ليهو كيف؟قال لي جايانا من الصباح كدة مالكك؟قلتهه ليهو امممممم طالعه على الجامعه قلت امر عليك وكدةعاين لي مسااافه قال لي كيف الجامعه معاك؟قلته ليهو تمام الحمدلله خريجهه وكدة

قال لي سبحان الله بالجد السنين بتجري امس امس دة كنتي بتبكي علشان م عايزة تدخلي الجامعه براك قلته ليهو واااي م تزكرني ضحك ضحكهه خفيفهه وسكت، قعدتهه وانا ساكته وبعاين ليه عمل روحو مركز في اللابتوب، قلته ليهو اممممممممممم انا اشتقتهه ليك على فكرهه

بعد مسااااافهه قال بالله؟قلته ليهو والله، قال لي بكل برود طيببقيت اعاين ليهو ماهر بكل برود بقول لي طيب!؟؟قلته ليهو اممممممممممم عارف انو انا زعلانه منك؟قاال لي دة الطبيعي بتاعكككل مرة بصدمني بي ردو وبرودوقلته ليهو لييييهه م اتصلته علي الفترة دي؟سكتتقلته ليهو ممكن م تطنشني؟قال لي ممكن تقولي من الاخر عايزة شنو بدون م تلفي وتدوري وتبطلي امورك دي؟فضلتهه ساكته مسااافه بس كانت دي احسن لحظه اقول فيها السبب الجيت بيهو عشانو، قبل م افتح خشمي امو جات داخله، سلمت علي وقعدت تسال فيه اصبحتهةكيف و...طلعته خليتهم م قدرته اتكلم معاه قدام امو، عدت كم يوم نحن بنمشي ونجي على بيتهم، بس م كنت قادرة اكلمو بموضوع الدكتور دة نهاااائي حكيت لي عمو الزيني قال لي ابشري اديني رقمو انا بتواصل معاه، اديتو رقمو، منذر رحل معاه عديل وبقى يطلع يلف بيهو هو واشرف وزياد وهكذا، كان اغلب الوقت هادي وم متفاعل مع الناس على قدر كدة ابداً بتعامل معانا كأنو شايفنا نحن بنتنافق معاه وهو متماشي معانا على حسب نفاقنا دة بس، عمو الزيني اتصل علي في يوم قال لي ي بتي انا اتواصلته مع الدكتور والحمدلله اخدته معاهو مواعيد واي شي لكن لما جيت فاتحتو في الموضوع شبكني ليك"انا الحمدلله بقيت كويس وم محتاج دكتور م تخافو علي و...الخ خليت اصحابو يتكلمو معاه بس لا صوت لمن تنادي كدة شوفيهو انتي يمكن يسمع ليك لانو نحن والله كاننا بننفخ في قدرة مقدودة

قلته ليهو طيب ي عمو حاضر اليوم التاني مشيت الجامعهه نهايه اليوم مشيت ليهم في البيت قعدته معاه برة في جلسه الحديقه بتاعتهم وجابو لينا قهوة، قلته ليهو القهوة ظريفه، هزة لي راسو وابتسمسكتت مسافهه وقلته ليهو عارف النجيلهه دي عايزة يظبطوها بالألةبرضو هزة لي راسو وهو ساكت وبعاين ليقلته ليهو اوكيييهه حأقول الجايه اقولو قال لي انا برضو شايف كدة احسنقلته ليهو انت حتمشي تراجع الدكتور وحتمشي الجلسات في مواعيدها وانا بقول ليك كدة م عشان اخيرك لا انا بس عشان اخليك تكون على علم وم بقبل اي نقاش ابداً

وم تقول لي بأي حق بتفرضي علي كدة بكل الحقوق الفي الدنيه وم تناقشني ابداقالً لي بالله؟قلته ليهو م تتبارد معي ي ماهر، قال لي انا م كدة قلته ليهو حتمشي الدكتورقال لي انتي شايفة كدة احسن؟قلته ليهو م نحن بس انت لازم تمشيقال لي طيب حاضر ابشري بقيت اعاين ليهو بي صدمهقال لي اي اوامر تانيهه؟قلته ليهو حأجي بكرة اسوقكقال لي حاضر الساعه كم؟انا بقيت كدة قلته ليهو بعد ارجع البيت بديك المواعيد قال لي ابشري فضلته ساكته م عندي شي اقولو طبعاً م اتوقعته منو التجاوب دة منو

لما قمته ماشه قلتهوليهو رقمك شغال؟قال لي ايوة، قلته ليهو طيب بتصل عليكقال لي تمام...اول م طلعته منو اتصلته على مستر عيسى حكيت ليه بالحصل كلو قلته ليهو انا خايفه من برودو دة حاسه تصرفاتو م طبيعيه انا اتوقعتو يكون عنفواني او كدة بس هو لا قال لي هو ابداً م حيكون عنيف لو دة فهمك ليهو

قلته ليهو بس ي دكتور هو لما عمو واصحابو طلبو منو يراجعك رفض قال م محتاج بس انا لما جيت فاتحتو م رفض واتقبل الموضوع بكل برود، قال لي الموضوع متعلق بي منو طلب منو كدة ودة الاستقرار النفسي الانا قلته ليك عليهو، قلته ليهو طيب ي دكتور يعني ينفع بكرة نزورك؟قال لي على طول، بالفعل اليوم التاني اتصلته على ماهر الصباح رد علي قلته ليهو حأجي اسوقك خليك جاهز، قال لي طيب تمام، جيت لقيتو منتظرني جاهز، وصلتو العيادة خليتو يدخل وانا انتظرتو برة، جا طالع منو وشايل كيس في يدو فيهو ادويه، بعد م وصلتو اتصلته على مستر عيسى قال م تخافي عليهو ابدا، قلتهً ليهو بالجد يعني تصرفاتو دي طبيعيهه؟قال لي تصرفاتو تصرفات زول متصالح مع واقع انو مريض ولازم يتعالح بس م اكتر

...م كنت متمني انو يحصل اي تواصل بيني وبين شهد بعد كل الفترة دي من عدم تواصلي معاها وكميه من الاحداث والتخبطات الحصلت معي مفروض انو اكون رافض لأي تواصل بينا وم مفروض يكون في اي تجاوب من ناحيتي تجاها لانو هي الاختارت كدة حتى بصورة م منطقيهه ابداً بس السبب الوحيد الكان واقف عائق في طريقي انو انا حاسب حساب انو هي خريجه السنه، م عايز ادخل معاها في مهاترات وم عايز اتعامل معاها بي طريقه تدخلها في ضغوطات و وانا زول عشته الحاجه دي وعارف حجم الكارثه الممكن تحصل ليها بسببي وشهد انا بعرفها انسانه انفعاليه في ابسط شي ممكن عادي تخرب الدنيا زي مثلاً انها م امتحنت سمستر كامل لمجرد اني مرقد في المستشفى، عشان اضمن انو هي حتعدي السنه دي على خير لازم اتجاوب معاها بكل الطرق، وعلى الاساس دة كان تصرفي معاها بس م معناها انو ناسي لا بس متناسي وكل شي واكيد ليهو وقتو، اضافه لي انو فكرة العلاج انا م كنت ضدها ابداً لأني محتاجها بدون جدال...

...عدت الايام م بقدر اقول انو عانيت من اي عناد او رفض من ماهر في شي بالعكس كان كل شي اقولو ليهو بقول لي طيب، حاضر، ابشري الكلمات دي م كانت بتفارق لسانو، الادويه بياخدها في مواعيدها وحتى الجلسات بيمشيها براه، ورجع يشتغل في الشركه حتى منذر نزل اشتغل معاهم مسكوهو الماليه ولجين نزلت ترينق معاهم، وانا استفدته منهم شدييييد في موضوع المشروع بتاعي بالذات ماهر كنت بلجأ لييهو كتير، في حجات حتى لو هو م عارفها كان ببحث لي عنها، دة غير انو نزل النادي بقى يعمل رياضه وصحتو بقت في نزول، تعاملي معاه رجع عادي كان شيئاً لم يكن لا انا سالتو عن الحصل معاه لا هو جاب لي خبر، في يوم اتصلته عليه بالليل قلته ليهو ماهر انا متضايقهه شديد

قال لي حاولي نومي قلته ليهو م هو لو قادرة انوم م كان اتصلته عليك ابداً قال لي طيب نعمل شنو نطلعك من الزهج دة؟قلته ليهو لو طلبته منك طلب حتنفذو لي؟قال لي احكيقلته ليهو احكي لي قصه سيدنا يوسف ممكن؟قال لي طيب م ممكن تقريها من النت؟قلته ليهو هئهه عايزة اسمعها بصوتكك قال لي طيب حأسجلها ليك ريكورد طيب؟قلته ليهو هئهه عايزه اسمعها مكالمهه كدة قال لي ياااااا شهدسكتتقال لي طيب حاضر بس اديني 5 دقايق وارجع ليك تمام؟قلته ليهو حاضر بالفعل اتصل علي قال لي اسمعي ي ستي...كل مرة قُربي منو كان بزيد خطوة م عارفه هل دي حاجه كانت صح او غلط

حُسام فاجانا بي انو نازل يتم عرسو قال انو جاهز وم عايز يأجل العرس ابداٌ، قدر م اتحايلته علييييه علشان يخليني اتخرج حتة رفض قال لي لأ ماف طريقه انا عندي اجازة وم عايز اضيع فرصتها و...الخختانا اما الأمر الواقع وبدينا تجهيزات العرس رجعنا فتحنا بيتنا داك وبدينا نصين فيهو علشان حنعمل فيهو العرس زي م قال حسام، يوم الحنه بتاعه حسام، يوم هو ومنذر كانو في البيت مع العمال الشغالين، وانا وماما في الشقه بنجهز ليهم في الأكل اتصلته عليييهو علشان ماما قالت لي شوفيهم لو عايزين حاجه اضافيه نجهزها ليهم لأنهم تعبانين في الوقفه مع العمال والشركه، اتصلته عليه كتير م برد رجعته اتصلته على منذر والغريبه على طول رد قلته ليهو بتصل عليكم مالكم م بتردو؟قال لي ي زوله متين؟قلته ليهو من قبيل بتصل ماهر تلفونو مشغول وانت م داخل، قال لي ماهر بتكلم مع مرتو اما انا والله م جاتني منك مكالمه ابداً

الحاجه الوحيدة البتزكرها من كلامو كلمه مرتو*بعدها م سمعته شي، الكلمه دي جاطت اموري كلها ورجعتني كم شهر ورا، اذا منذر قال ماعر بتكلم مع مرتو معناها ماهر رجع تولين ومنذر معاه معظم الوقت يعني الحاجه دي م بتفوت عليه يعني اصلاً دة الطبيعي المتوقع انا ليييه قلبي واجعني اساسا؟اصلاًً انا انفعلته شديد في تعاملي معاه وبقيت اندفاعيه م مفروض كان اعمل كدة، مفروض حتى لو رجعته اتعامل معاه ف يكون بس علشان مصلحتو وفي حدود

من يومها بقيت اتعامل معاه على الاساس دة وهو اساساً م مركز شديد اتصلته او لا م بسأل وم فارقه معاه كتير، بس دة م معناه انو انعدم التواصل بينا بس بقى محدود، يوم العرس كان المفروض منذر يجي يسوقنا بي عربيتو انا ولجين وطيف اصلاً كنا مع العروس، بس للأسف منذر اتاخر وحسام جا ساق مرتو واتحرك ونحن اتسيكنا، اتصلته على ماهر وحكيت ليه انو مفروض منذر يجينا وم جا وبقيت احنس فيه يجي يسوقنا م عندنا خيار غيرو

قال لينا طيب خليكم مكانكم جاي عليكم، فضلنا واقفين اكتر من ساعه حتى جا كان لابس ملابس كورة شكلو جاي من التمرين هو اصلاٌ روحو ونفسو حاجه اسمها كورة واصلاً هو شبه وزنو رجع يعني بقى متوسط لا سمين لا ضعيف، وم احساس زول ماشي الحفله ابداً سلم علينا لجين قالت ليهو شنو يااا وين البدل والحركات والكشخات ي زيني، ضحك وقال ليها م انتو عوارض م خليتوني ارجع البيت اغير، قالت ليهو انا قلته ل شهد ناخد ترحال بس رفضت

قال ليها عارض الحياة دي كمان، قلته ليهو شكرا، قالً لي عفوا، بقوً هم بتونسو وانا ساكته فجأة تلفوني ضرب عايزة افتح الخط قفل علشان شحنو خلص، قلته ليهم دة منذر شكلو ماشي علينا اتصلو عليهو قبل م يصل، طيف قالت لي م معي رصيد، لجين قالت لي انا تلفونو قامت عليه الحاله وطاشي شبكه من قبيييل لو م كدة كان هو زاتو رجع في تلفوني رفعتو وقالت لي عايني ها لسسسه عامل علامه ال

قلته ليهو ماهر ممكن تلفونك ثواني علشان بس اتصل عليهو واشوفو لو ماشي علينا يرجع؟قال لي طيب هاك فتحو واداني ليهو، دخلته رقم منذر واتصلته عليهو فتح الخط وقال ي حبيبنا، قلته ليهو في عينك وين انت بتموسرنا كدة ليييييييهه؟دة بالحاله قلت حتجي مع العريس؟قال لي انتو الوين بتصل الهطله ديك تلفونها م بدخل وانتي كان داخل بعدين قفل وصلته المحل م لاقيكم، قلته ليهو نحن طلعنا اتصلنا على ماهر جانا ماهر واسي مودينا، قال لي اقطعي وشك يلا طيب، قفل الخط في وشي قبل م اديهو التلفون عاينته لي سجل المكالمات عيني وقعت على اسم تولين و كان في اول القائمه بعد مكالمه منذر

يعني كان بتكلم معاها قبل ساعه او اقل، رجعته ليهو التلفون وانا مزاجي اتعكر خلاص واتضايقتهه ونفسي اتقفلت من كل شي وهم مواصلين ياخدو ويدو في الكلام عادي لغايه م وصلنا الصاله نزلنا قال لينا يلا سلام، قلته ليهو م حتدخل؟قال لي لا والله بي شكلي دة مستحيل طبعاً ه، قلته ليهو يعني حتمشي تغير وحتجي؟قال لي اصلاً الحفله دي انا م شديد عليها كدة ف علشان كدة م اظن والله، سكتت وم خطر على بالي الا حكايه انو بالفعل رجع تولين واكيد ماشي بيتو ويمكن هي منعتو من انو يحضر الحفله و...الخ كلها كانت افكار شيطانيه وسوداويهه، لمن اتحركته من جمبو مع ناس لجين تاني وقفته وي ريتني م وقفته قلته ليهم انتو ادخلو انا بلحقكم، قالو لي مالك؟قلته ليهم بلحقكم امشو، رجعته بسرعه قبل م يتحرك دقيت ليهو قزاز العربيه، نزل القزاز قلته ليهو ممكن اتكلم معاك في موضوع؟قال لي موضوع شنو؟فتحته الباب وركبته، قال لي خير؟ستتقال لي في شنو ي زوله م نفسك تلحقي حفله اخوك؟قلته ليهو ماهر انت رجعته تولين؟انا م عارفه اصلاً كنت حاسه بشنو لما سالته السؤال دة صدق القال انو الغيرة بتعمي

قال لي كيف؟قلته ليهو رجعتها ولا لأ؟قال لي م فاهم المغزى من السؤال شنو وبعدين يعني اذا رجعتها او لا مشكلتك شنو انتي؟قلته ليهو عندي مشكله ايوة، انت نسيت هي اتخلت عنك ووصلتك لأي مرحله؟اذا هي انانيهه انت م تبقى غبي، ضحكك قال لي انتي بتقولي كدة؟انتي بتقولي عن تولين كدة؟طيب بالنسبه لنفسك بتقولي عنها شنووو؟سكتت بعدها قلته ليهو انا مالي؟على الأقل م زيها وعلى الأقل هي كانت تتصرف بمسؤليه شويه، قال لي انتي اخر من يتكلم عن المسؤليه ي شهد، انتي يعني شايفه نفسك م عملتي حاجه خالص؟اهاا نسيت اصلاً دة الطبيعي بتاعك بتقومي الدنيا وم بتقعديها وبتجوطي اي شي وبعدين بتجي تتصرفي عادي كان شيئاً لم يكن، حتبطلي انانيه متين؟حتفكري في غيرك زي م بتفكري في نفسك متين؟تولين دي ي ستي ايوة متواصل معاها بتتصل علي بتطمن علي على مدار الساعه عشان خوفها علي من الوضع الانا دخلته فيهو بسببك

م كدة وبس لأ ي شهد هي نفسها انا انفصلته منها بسببك اكذب عليك؟

رغم انها م عملت اي شي يخليني اطلقها بس انا لقيت نفسي م قادر اقدم ليها شي ولا قادر اعيشها بطريقه صح زي م هي بتستحق ودة كلو بسبب العملتيهو انتي قبل العرس بيوم انتي فاهمة انو انا ظلمتها والفضل في كدة برجع ليك انتي؟فاهمه انو انا م عيشتها ولا لحظه صح علشان العملتيهو انتي قبل العرس بيوم بقى معشعش في عقلي دة مع كل ثانيهه بتمر علي؟وفوق دة كلو عايزة كل الناس تجي على مزاجك تبعدي وقت م عايزة وترجعي وقت م عايزة من غير م تراعي انو البتتعاملي معاهم ديل بشر م حيوانات.سذاجتك وطفولتك مارسيها بعيد عن حياة الناس وم تتكلمي عن الأنانيه ابداً ي شهد عشان لما قسموها انتي اخدتي الجزء الاعظم منها...

...