الفصل الثامن والعشرون
بقيت مرتو ي جماعهه مرتو انا بقيت مرتو والله العظيم مرتو، مرت ماهر اناااااااااااا...كنت ببكي لدرجه انو بعد العقد م قدرته اتكلم معاه في التلفون وهو كان بحاول يهديني وبقول لي"حتخليني اتهور واكسر حنك بقيهه العرس واجي عليك واسوقك اصلاً كدة كدة خلاص نحن في عداد المتزوجين وانا بزيد في البكى مع كلامو وهو يضحكك مبسوط الغياظ، في الاخير لجين شالت مني التلفون وقالت ليهو الزيني باشا اوكيهه فهمنا انها بقت مرتك باي لأنو طول م انت بتتكلم معاها كدة م حتسكت
...مع الجوطه حقتنا ديك اشتغلو زغاريد وغنى ودلاليك وهيصه، بدو يجهزو فيني قلته ليهم انا جعانهه، قالو لي الغداء جاهز بس خلينا نشتغل شغلنا، قعدتهه ليهم في نص السرير وقلته ليهم هئهه انا جعانهه لو م اكلته م حعمل شي، لجين قالت لي شهد حبيبي الله يرضى عليك الزمن ضايق
قلته ليها حتودوني من غير اكل؟قالت لي اممممم علشان الزيني حيأكلك، قلته ليها نوووووو عايزة اكل هنا، قالت لي العروسات في يوم زي دة م بكون عندهم نفس للاكل لهفتهم كلها بتكون لي رحالهم ومتين اليوم يعدي انتي جايبنك من وين؟قلته ليها راجلي لو مهتم كان اتصل علي وسالني اكلته ولا لأ انتو عايزين تموتوني ي جماعه بطني اهم من العرس نفسو؟طيف قالت لي يعني بطنك اهم من الزيني؟بقيت اعاين ليها وانا بضحك، لجين قالت لي اي جاوبي اهم من الزيني؟قلته ليهم يلا ي كلبوبات من وشي جيبو لي اكل انا عروس ي جماعه م داخله عمليه لمن تجوعوني كدة جعاناو
جات نورسين شايله صينيه الأكل قالت لي خلاص فضحتينا وشلتي حالنا عروسه السجم هاك اكلي م شافعه مرقه نهائي ساعهه ورا ساعه اليوم عدة والمغرب دخل والخوف والتوتر ماشي في زيادة والتشغيلات كترت من السجم المعي والتخويف والتهويل وحركات البنات الما بتخلص، لغاايه م في لحظه ماهر اتصل علي قال لي نحن في الطريق انتو جاهزين؟قلته ليهو بخلعه طريق وين؟ضحك قال لي شهد في شنو مالك حبيبي؟
قلته ليهو يخخخ ماف شي، قال لي جاين عليكم نحن طيبقلته ليهو ماشي فصلته منو قلته ليهم ماهر قال جاين علينا، قالو لي كذابه والله؟كلهم بقو يتجارو داخلين ومارقين الا انا واقفه وبعاين لي روحي ومستغربه او بحاول استوعب هل الحاصل معي دة حقيقة؟يعني ي سبحان الله الحياة دي على قدر م بتوريك انها م عادله نهائي على قدر م بيجي وقت وبتنصفك، بعدين اتزكرته بابا يعني بس لو كان عايش ومعي في يوم زي دة والهو كان عايزو لفه ورجع حصل زي م هو عايز بس الفرق الوحيد انو حصل كدة وهو تحت التراب
دخلتهوفي كومه حزن للحظه وبقيت سرحانه وبتزكر في تفاصيل كل حاجه سيية حصلت معي لغايه م في لحظه سمعنا اصوات بوري بتاع عربات كميه، لمياء اخت لجين قالت ليهم وصلو ي جماعه وصلو، هنا الجوطه والمكابسه ي دوبها بدت كويس اي واحدة فيهم بقت جاريه بإتجاه وبقو يتشاكلو قدام المرايهه وانا خلاص صراحه ي جماعه اتصلبته حاسه بي انو الدم م بجري في جسمي نهائي، واصوات العربات برة والجوطه تجيب الرايح، بعد حكايه بتاعه ربع ساعه كدة لجين قالت لمياء الدلوكه ي لمياء سرعه جمب المكيف برة، نورسين قالت ليها سخنتيها؟قالت ليها ودة كلامك
قلته ليهم دلوكه شنو ي مجانين؟طيف قالت لي اكيد م حنخليهو يسوقك ساي كدة ي بت انتي هبله لازم نسيرو فاطمه قالت ليهم انا بدق ليكم وبغني بس انتن شيلن وراي حركات الحنكشه والخجل دي اوعى تعملنها معي خلوني قاعدة وطلعو برة يدقو في الدلوكه ويزغردو بعد شويهه كدة كان اسمع ليك يقولو "اااابشر ي عريس ااااابشر والزغاريد ملت البيت وفاطمه بقت تغني غنيهه" عريسنا يا مطر الرشاش العرس يااا كدهه يااا بلااش العمات ديييل... كدهه ياا بلاش الخالات دييل... كدههه يااا بلاشالنساااابه... كدهه يااا بلااش العذاابه... كدهه يا بلاش ود العمهه... كدهه يااا بلااش
ود الخاله... كدههه يااا بلااش ود العز دهه... كدهه يااا بلااش ايويويوويويو كنت في الغرفه وقلبي حيطير من محلو كل م الاصوات تقرب علي
لغايه م في لحظه حسيتهم جمب الباب غطيت وشي بي يدي وانا بضحكك وهم يجوطو، "لغااايه م في لحظه كدة حسيت بزول بقرب مني لغايه م وصلني وقف قصادي ومسك يدي نزلهم من وشي، بقيت اعاين ليه كدة بي هبل اصلاً هي لحظه لخبطه م بتعرف لحظتها تتصرف كيفكان لابس بدلهه لونها م بين رمادي ورصاصي مخططهه بالأسود خطوط رفيعهه م واضحهه والساعهه سوداء والإسورة طقم الساعه والجزمه سوداء وكذالك الكرفته والهيبه والطول وملامح الوش يخوانا وهو بعاين لي من فوق كدة ومبتسم انا لحظتها الفي راسي كلو طار بقيت واقفه وبعاين ليه وم بين ملامحي مبتسمه وملامح جادة بعد مسااافهه عمل حركتو الغياظه ديك ومسكني من مناخري باطراف صوابتو، ضربتو في يدو ضحك، هو م كان قادر يتصرف اي تصرف لأنو حضرة سيادة كاميرات المُراقبه كلها واقفه ومنتظرة منو اي حركه علشان يصور، هو لما نكون مع بعض بكون مجنون بس لما يكونو حوالينا ناس بتغير 180 درجه ببقى العاقل الرزين داك
الحاجه الوحيدة العملها انو باسني في راسي مساااأفهه وبعدها قال لي" بسم الله الذي لا يضر مع اسمه شيء في الأرض ولا في السماء وهو السميع العليم... عن جمال بحهه صوتو وهو بقول كدهه وملامحهه وهو بعاين لي في عيوني وم عايز يشيلها مني ثانيه الا بعد م لجين قالت "احم احم شباب الحفله والعشاء حيفوتونا والله م ممكن كدة لكن انتو قايلين نحن متوسطين ليكم و معرسين ليكم لشنوو عشان العشاء والحفلهه طبعاً ف شنو ارح ارح ارح
قعدو يضحكو، خجل وضحك وبقى م عارف يتلفت على وين، مسكني من يدي وضغط عليها شديد وهو ساكت وطلعنا بي سيرة ودلوكه وجوطه، م كان جاي براو طبعاً جاي معاهو اصحابو بعرباتهم عايزين يعملو شغب في الشارع طبعاً وفعلاً دة الحصل كانو بتسابقو في الشوارع عديل لما وصلنا شارع النيل وبقو يفحطو انا خلاص قلته اكيد واحدة من العربات دي حتتقلب بقيت اقول ليهو ماهر خليهم يبطلو البعملو فيهو دة، لا الظريفه انا فاكرة نفسي بكلم عاقل هو كان بصفر وببشر ليهم السجم
م صدقته اننا وصلنا الصاله والله، استقبلنا حُسام اخوي اللي كان لابس جلابيه ولافي العمه طبعاً حسام اخوي دة نسخه مصغرة من بابا احساس بابا جمبي اللحظه ديك كان طاغي بوجود حسام بالشكل دة، كل واحد فيهم كان ماسكني بإتجاه والهدؤ كان مخيم على الصاله م كان في زول حايم غيى المصور وماهر الواقف في نص الصاله وبعاين بإتجاهنا وبتبسم والغنيه المشغلنها وماشين خطوة خطوة لغاااايه م وصلوني ليه وحسام قبل م يسلمني ليه قرب منو واتكلم معاه في اضانو مسافه ماهر ضحك ومسكو من كتفو وضغط عليهو مسافه حتى مجتى مسك يد ماهر وخته يدي فيها وقال ليهو امانه في رقبتك ي حبيب، ماهر قال ليهو ابشر امانتكم في الحفظ والصون، بعدها الأنوار طفت كلها بقى ماف شي الدنيا كلها ضلام فجأة بقت في اضاءة دائريه بس مكان م نحن واقفين وبعدين اشتغلت غنيه سلو ماهر ماهر مسكني وبقينا نرقص عليها كنت خجلانه شديد من موضوع الرقيص قدام اخواني والناس وكدة البركه في الضلمه غايتو، شويه كدة مع الضلمه والرقصه ديك بقت في اضاءة بتاعه فلاشات تقريباً الصاله كلها شغلت فلاشاتها بإتجاهنا وفي اصوات صفافير، قلته ليهو اممم السيناريو دة كأنو مكرر صح؟قال لي بس المرة دي هو اعظم
قلته ليهو بجد؟قال لي اعترف ليك بحاجه؟قلته ليهو اها!؟ قال لي في الف ابتسامه بتطلع من الواحد لمجرد انو انتي مريتي بمخيلتو وقربني عليه اكتر فجأة الغنيه وقفت وبدت غنيه سيرة ضحكتهه فييهو ضحك اللحظه دي ياخي الناس دي هججت ورقصت رقيص التقول عندهم خشلميه سنه م حضرو حفله الصاله كلها كانت واقفه برجل واحدة، ، والعجب لحظه الجرتق ولما عيني وقعت على ماهر وهو لابس طقم الجرتق وشايل السعفه وببشر وبرقص مع اصحابو وعمو انا نسيت نفسي ونسيت انو في ناس حوالي ونسيت انو في تصوير وبقيت متنحه فيهو بس
إيييييييك ياخ اليوم دة كان م بتوصف ابداً تقريباً ماف زول م رقص ماف زول م غنو ليهو الغنيه البحبها ماف زول م حينوم بوجع جسم بعد كل التعب العشناهو اليوم او الساعات البسيطه دي اثلجت صدورنا بكميه الفرحه الدخلتها فينا بعد م الجرتق انا على بالي انو حنرجع البيت بس ااااا وييييين يااااا قالو من الصاله ومع ماهر على طول وهنا جات لحظه الوداع والبكى
على قدر م انبسطنا على قدر م في لحظه الصاله كلها اتحولت لي بكى وحززن، ماما، اخواني حسام مؤيد مجتبى منذر، منذر طبعاً كان عامل فيها صنديد وم عايز يبكي معي بتكلم معي قال لي ي بت انتي عبله ماف شي يخليك تبكي ودموعو جات جاريه بعداك ماما دي من البكى الا مسكوها خالاتي، بعداك جدو هرشهم قال ليهم م اشوف زول يبكي يلا ادو المرة راجلها وكملو بكاكم بعدين براكم، ماهر قرب مني قال لي "صمت دهراً ونطق كُفراً اخيراً جدك قال الانا عايزو
لما طلعنا برة حسام كان ماسكني، عمو الزيني جا مسكني من يدي وقال لي ماهر بتي وبت اخوي قبل م تكون مرتك م داير اوصيك عليها ابداً ولا داير اسمع منها عنك الا كل خير ماهر قال ليهو ابشر ي عمي ماما مسكتني وبقت تبكي لجين مسكتها وقالت ليها ي خالتو كفى حلفتك بالله كفى، منذر قال ليهو ي حبيبنا خلاص استلم مرتك واتخارج عشان نحن كمان عايزين نتخارج ولا شنو ضربتو في كتفو، لجين قالت لي انا م بحب الفتنه بس ي شهد منذر مستعجل شديد علشان يخارجك والله يقدرني على فعل الخير
ركبته العربيه ماهر جا ركب وبقى يضرب ليهم في البوري مسافهه وبرة الصفافير م تديك الدرب واتحرك، بعد م مشى مسااافهه قال لي شهد عبدالله، لما قال كدة اتجمدت قالها بنبرتو الجادة والمعروفه ديكلما شافني ساكته ضحكك ضحكهه غياظه كدة ومستفزة، قلته ليهو مالك؟قال لي مالي؟قلته ليهو بتضحكك قال لي مبسوط في زول مبسوط م بضحكك؟سكتت وم فتحته خشمي معاه بحرف تاني، كل م نجي مارين بي استوب يضرب البوري كتير يقعدو يبشرو ليهو انا م عارفه هو معي ببقى مجنون وقدام الناس ببقى عاقل كدة كيف
وصلنا مكان كدة وقف العربيه وبركنها ونزل جا فتح لي الباب قال لي يلا ي ستي ومدة لي يدو، مسكته فيهو ونزلته قلته ليهو اممممممممممم وين نحن؟قال لي تعالي، دخلنا في عمارة كدة وركبنا الاصانصير نزلنا في طابق كدة وقف قدام باب كدة طلع مفتاح فتح الباب ومسكني من يدي قال لي تعالي، دخلنا، ولع الأنوار وهو ماسكني قال لي اسف م اتوفقته اظبط موضوع السفرة لي شهر العسل ي شهد لكن ان شاءالله بعد اسبوعين بالكتير حتتظبط وحنسافر و...قبل م يتم كلامو اترميت في حضنو وقلته ليهو ماهر انا بقيت مرتك ودة شي بكفيني والله العظيم سفرة شنو وشهر عسل شنو كفايه علي وجودي جمبك وكفى انا بحبك شديد، بحبك شديد ي ماهر
فضلته ساكته وببكي وهو ضاميني عليه وهو زاتو شبه بقى يبكي معي، بعد مسافه رفع راسي وبقى يمسح لي دموعي وقال لي بصوت مبحوح كفى شهد بطلي هبل، خلاص قلنا ها، خته يديهو في خدودي وبقى يعاين لي بعدها قال لي "لييييهه م اختصرتي علينا كل المشوار دة ي شهد وجيتي قلتي الكلام دة من زمان؟ليييييييهه عشتي كل العشتيهو دة ي شهد بس علشان تكابري؟لييييهه حملتي نفسك فوق طاقتها كدة ي شهد؟لييييهه ي شهد ليييهه بس؟قلته ليهو انت قلت لي بذات نفسك اوعااااك يجي يوم وتحبيني و...قاطعني وقال لي ياخي قولي انا قلته ليك كدة من متين انتي كتتي بتسمعي كلامي؟كان بتكلم ودموعو جاريه، قلتهه ليهو ياخ خلاص اسي انت جاي تحاسبني على حاجه انت منعتني منها وانا سمعته كلامك فيها؟
قال لي لو سماع كلامي حيجوط حياتنا كدة تاني م تسمعي كلامي ابداً انا اصلاً بحب عنادك وبحبك وانتي راسك ناشف وم بتعملي الا العكس في نص البكى داك ضحكتهه قلته ليهو ع فكرة نحن م جبنا معانا شي لا شنط لا غيرو؟مسك يدك قال لي تعالي، قلته ليهو وين؟قال لي هم م بعملو كدة صح؟قلته ليهو شنوو م فهمت؟قال لي م بمسكو اليد، بقيت اعايليهوهو شالني بدون مقدمات لما وصلنا غرفه كدة قال لي تقريباً هم بعملو كدة لكن عارفه الحمدلله انو وزنك خفيف يعني لانو لو م كنتي كدة م كنت ححاول حتى
ضربتو قلته ليهو غياظ اول م نزلني التوب اتفك وبقى يتعاور واصلاً فستان الجرتق قصير، وانا بقيت احاول الم الموضوع يعني م ممكن كدة، وهو يعاين لي سااااي وساكت فجأة مسكني وشال التوب رماهو على جنب وقال لي م محتاج كل البتعملي فيهو من قبيل دة فضلته ساكته وماف مكان اتلفت عليهو وهو يعاين لي من فوق لي تحت و يضحك الغياظ السجم قال لي تعالي عموماً عشان شويه كدة حاسي بيك حتقعي بطولك دي الشنط وصلت قبل م نحن نصل قلته ليهو شوكران بالنون
قال لي عفوان بالنون، مشيت على شنطتي بسرعه فتحتها شلته لي لبسه قمته على حيلي لقيتو واقف ومربع يديهو و بعاين لي ومبتسم، حيوان بجد قبل م ابدي اي تفاعل اشر لي على اتجاه باب كدة نظام داك باب الحمام، انا متلخبطه ورجولي بتضرب في بعض وماشه قدامو كدة لما وصلته جمب الباب قال لي استعجلي بالله، لما وصلتع الباب اتلفته عليه وانا ساكته، قال لي قصدي علشان نعسانين وعايزين ننوم ياخي حيوان وبعرف يلعب بالأعصاب بشكل
عديت اكتر من نص ساعه في الحمام حتى طلعتههلما جيت طالعه كنت لابسه بجامه ماها طويله وماها قصيرة هو كان ماافي في الغرفه، وقفوه قدام المرايه اسرح شعري جا داخل شايل صينيه في يدو فيها عصير ومويه واكل وكدة اول بقى يعاين لي من فوق لتحت تاني بخباثه كدة،
نزل الصينيه وم نزل عينو مني، قال لي انا حأدخل الحمام، قلته ليهو طيب، فتح الشنطه شال ليهو ملابس ودخل الحمام، لما طالع لابس شورت قصيرة وفنيله لقاني لفيت شعراتي كعكتين مرفوعات لفوق حك راسو مسافه وهو مبتسم وبعاين لي، قلته ليهو مالك؟قال لي قال لي محتار في الشافعه الحاربيها دي لكن والله شكلها هي الحتربيني قلته ليهو انا شافعهه؟قال لي والله ي شهد لو تميتي 100 سنه حتفضلي شافعه وم حتعقلي ابداً
كشرته ليهو وشي وقفته قدام المرايه ورجعته لفيت شعري كويس جا مسكني وقال لي حلوات وحلوات شديد كمان وظابطات لمن غلط خليك منهم انا جعان تعالي ناكل، قلته ليهو طيب، قعدنا اتعشينا كنا جعانين بجد ف اكلناأااااا غايتو تقريباً هو اليوم كلو م اكل شي، بعد م خلصنا اكل قلته ليهو اليوم كان مرهق شديد ياخ، مسكني من يدي واتجه بي على السرير قال لي الساعه ماشه ل 2 صباحاً على فكرة، قلته ليهو وانا اقول مالي نعسته كدة الزمن اتأخر
قال لي طيب حاولي نومي، قلته ليهو وانت؟قال لي حأنوم طبعاً بس طالع برةدقايق وراجع، قلته ليهو بصوت هزيل لشنووو؟قال لي دقايق وراجع، قلته ليهو حتمشي تشرب سيجارة صح؟ضحك قال لي سيجارة زي الزمن دة؟ قلته ليهو انت قلته لي انو لما نكون في بيتنا حتخليني اشرب معاك واحدة اسي عايز تمشي تشربها من غيري؟ضحك قال لي شهد سجاير في عينك م غلطان لما بقول ليك ي شافعه تصدقي اي كلام يتقال ليك وخلاص قلته ليهو بصوت طفولي يعني كذبته علي وم حتخليني اجربها؟
قال لي لا طبعاً من غير نقاش و عموماً الطلعه لي برة زاتها خليتها سواء كانت عشان سيجارة او غيرها رقد جمبي في وجراني في حضنو ولفه يديهو حوالي، فاهمين الاحساس دة اقصد واصلكم احساسي دة في اللحظه دي؟زي احساس الانتصار في حصولك على حاجه ارهقتك وهدت حيلك وانت وراها وهي كانها كانت سراب وبعدين اتحولت ل حقيقة، احساس الانجاز م لمجرد انو انا عرسته وخلاص الانجاز في انو انا عرسته منو؟لانو العرس دة شي طبيعي والطبيعي انو لو طال الزمن او قصر هعرس بس عرس لعرس بفرق عرس فرحتو كامله م زي عرس مكتمل من جانب وناقص من جانب تاني وهكذ...
وسكتت مسااافهه وقال لي اخخخخ ي شهد تصدقي وتأمني بالله؟عدلته رقدتي في حضنو ولفيت يدي فيهو بعدها قلته ليهو"ونعمة بالله"قال لي انا واحد من الناس بخاف من نفسي ومن قراراتي جداً، بعرف اتخلى عن اي زول مهما كان قريب مني بشكل بيرعبني ي شهد، اول م بحس اني م مرتاح او بستنزفني ببعد فوراً بس انتي الشعور دة معاك كان مختلف جداً عارفه ليه؟لاني عمري م كان عندي غالي يعني ببعد وم بفرق معي زول ابداً، انتي لا كنتي بتفرقي معي جداً وبحس انو متضايق والدنيا مطربقهه في راسي ...
م حصل اتعلقتهه بزول زي م اتعلقتهه بيك من قبل ابداً حتى اقرب الاقربين لي، احساس انو عقلي خلى كل الدنيا وحصر نفسو في حياتك انتي بس، ما عارف كيف لكن كنتي بتفرقي معي شديد والاحساس دة عمرو م حسيتو مع زول قبل وبشتاق ليك وروحي بتتشحتف رغم انو انا في الطبيعي بتاعي ماف زول بفرق معي، ما تساليني ليييهه وكيف انا نفسي م كنت عارف بس كل م كنت احاول انساك او اتخطاك بغمضه عين واحدة بلقى نفسي مبتسم لاني اتذكرتك، مرت فترة طويله من احساسي بالحجات دي تجاهك بس لما اقعد مع نفسي لغايه اللحظه بتخيل اني عايش الشعور المتناقض داك اسي، عارف انو م حصل بينا شي غير الصحبه لكن عقلي هو الخلاك تكوني شخص مهم شديد في حياتي من كترة التفكير فيك وقلبي اتعلق بيك تلقائياً عرفتي لييييهه كنت بقول ليك عايز العرس يتم اليوم قبل بكرة؟لأني تعبت من التفكير فيك بمخيلتي بس كنت عايزك تكوني معي كدة زي م نحن اسي مع بعض ودة شي بكفيني، م بين صاحيه ونايمه بصوت طفولي قلته ليهو وفعلاً دة الحصل، قربني مني وباسني وقال لي ودة الكان لازم ومفروض يحصل علشان دة الصح، سكت مساافه اظنو كان بعاين لي بعدين قال لي انتي نمتي؟قلته ليهو اي، ضحك وباسني في خدي ورجع ضماني عليه وقال لي طيب تصبحي على خير
...صباح اليوم التاني صحيت لقيتو مافي جمبي في السرير م هو ي اما هو صاحي بدري ي اما انا صاحيه متأخرة نزلته دخلته الحمام استحميت وغيرته ملابسي وطلعته من الغرفه بقيت اتلفت في الشقه بس م شايفاه، فجاة سمعته صوت مشيت بإتجاهو بقيت شامه ريحه اكل فايحه هو كان في المطبخ دخلته لقيتو عامل سِفرة في منتهى الرهابه مستحيل ياكلوها 2 بس، لا وظريفه جايب بوكيه ورد احمر بي ابيض كمان قبل كل شي اول حاجه عملتها شلته البوكيه قلته ليهو الله دة بتاعي احلف بس
اتلفت مخلوع وهو ماسك سكين في يدو قال لي بصبحو كدة؟قلته ليهو حبيتو حبيتو شديييد ياخي صباح الخير، جا علي بسكينتو وكان ماسك طماطمه في يدو التانيه قرب مني وباسني مسااافه وقال لي صباح الخير باللليل الساعه ماشه لي 4 مساء ي شافعه م قلته ليك انتي الحتربيني قلته ليهو كذاااااب والله؟الساعه 4 جد؟يعني العصر اذن انا كنت نايمه دة كلووو؟بقى يعاين لي وهو ساكت ومبتسم وبعاين لي بي خباثه كدة بعدين انتبهته لجلبابي القصير ولي انو هو عمل شنو ختيت يدي في خشمي، ضحك ورجع مكانو وكمل تقطيع، كان خاتي مكعبات شوكلاته في صحن اخدتها منها قلته ليهو ي سلام بحبها
قال لي في حجات كتيرة بتحبيها هنا حاولي افتحي كل حاجه مغطيه، فتحته سرويس كدة لقيتو ملان اقاشي بي اسلاكو وريحتو وشكلو مبالغه قلته ليهو ي سلاااااااااااااااااااااام العشق تاني في كرتونه كدة شبه حقه الباسطه والبيتزا فتحتها قلته ليهو فطاير الشاورما التي اُحب، قول لي في بيبسي؟قال لي يوم متين انا بنسى حاجه بتحبيها انتي؟قلته ليهو اسمع انت حقيقي؟ ضحك وبقى يعاين لي، قلته ليهو طيب صباح العنبر ممكن النمبر؟
زاد في الضحك وقال لي لا معليش مرتبط وبحب مرتي شديد، قلته ليهو طيب وكدة وكدة، اتلفت علي وعاين لي بي خباثهه وقال لي وكدة وكدة كيف؟ قلته ليهو انت فهمته شنووو؟ ياخي انت ليه مخك بمشي شمال كدة ي سجم قال لي تعالي قربي كدة، قلته ليهو نو، قال لي تعالي ياخي هزيت ليهو راسي جا مسكني وقفني قداومو وحاوطني بي يديه وقعد يقطع قال لي شايفه التلفون دة؟قلته ليهو اي قال لي افتحيهو، فتحتو قال لي ادخلي واتسب وافتحي الشات بتاع لجين، فتحتو، قال لي شغلي الڤيديو دة، شغلتو وهنا كانت الصدمهه
لجين السجم مصوراني وانا داقه جرس في موضوع الغداء قبل م يجهزوني واهم مقطع"هو راجلي لو مهتم كان عرفني اكلته ولا لأ"لما جا المقطع دة ماهر رجع عادو لي كم مرة، اتلفته عليه واديتو وشي وقعدتهه اضحك قلته ليهو قصدك شنو يعني هااا قال لي انا المفروض اسال السؤال دة على فكرة لانو دة شيل حال قعدتهه اضحك قلته ليهو الجوع كافر يخخخخ وبعدين بالجد انت لو مهتم كان سألتهه قال لي اهاااااا اهااااااا خلاص الدراما كوين الجواك صحت؟
قلته ليهو انت ليييه دايماً شايفني دراما كوين؟خلاص افصلها يلا عايزة اتحرك من جمبو جراني ورجعني لحضنو وقال لي دراما كوين قلبي واحلى ملكات الدراما كمان هاااااا كيف ليك قلته ليهو م تتكلم معي، قال لي طيب ممكن اعترف بحاجه، قلته ليهو م عايزة اسمع، قال لي طيب غطي عيونك علشان م تشوفي الحأقولو قعدتهه اضحك ياخ غياظ وحلو الاتنين مع بعض
لفه يديهو حوالين خصري وقال ليفي الفترة الاخيرة كنت دايماً بسال نفسي السؤال دهه"ماذا فعلتِ ب قلبي، لأتمناك إلي هذا الحد؟بعدين لقيت انو رغبتي فيك كانت حقيقيه جداً، وعشان كل الكان حاصل بينا داك اوقات كتيرة كنت بفكر انو الطريق ليك كان مسدود وصعب شديد، فاهمه احساس متناقض كدة وبعد معافرة ومكابرة وصراع مع نفسي وتدخلات من زياد اللي هو كان ليهو الفضل في انو افهم حقيقه مشاعري تجاهك اخترت إنو م امشى على اي أي طريق تاني ممكن م يوصلني ليك، والطريق ده لو م نهايتو الحاجه اللي انا ساعي علشانها اللي هي"انتي" م كان حيبقي فيني حيل امشي ف طريق تاني ابداً والله"، حتى لو كنت رفضتيني كنت حأكتفي بك حلما لعمري المتبقي، بس الحمدلله انو هرمون العناد وكُبر الراس م اشتغل عندك الفترة دي...
ابتسمته ابتسامه خفيفه وقلته ليه في مقوله بتقول" غالبا ً، الإعتراف بحبك لشخص ما، يعد نوعاً من أنواع الانتحار، لن تستوعب ما أعنيه الآن، الذين جربوا الأمر، جثثهم مقتنعة بذلك جيداً ..!كنت مقتنعه بيها شديد فكرة اني اجي واصارحك دي كانت مستحيله ومن سابع المستحيلات كمان وحتى لو الموضوع دة كلفني اني اجي على نفسي شديد م كنت هجي واعترف ليك ي ماهر بسسس كنت مقتنعهه اني أنا حبيّتك وحبيت بجد مرّة وحدة، و المرّة دي كانَت كفيلة إنها تخليني استناك عُمر بحالو...
، قرب مني وباسني وقال لي وانا ي ستي في صُحبتك عرفته انو الصُحاب لا بالكترة ولا بالعدد ولما حبيتك حسيت بالاكتفاء اديتيني درس واحد في شعوريت قلته ليهو امممممم كنت الطف اختياراتي الخاطئة واشدهم قسوهه قال لي بس انا م كدهه ابدا، قلتهً ليهو كنت بس اسي لا قال لي تعليقاً على كلامك الاخير دة "ادعي دايماً انو م يتضارب شعورين متناقضين جواك في وقت واحد"علشان مافي اسوا من كدة ابداً بقيت اعاين ليهو وانا ساكته، بعدها رجع يقطع بقيه السلطه، قلته ليهو امممم ماهر ممكن سؤال؟قال لي عيوني
قلته ليهو امممممممممم انت الموضوع بدأ عندك من متين؟قال لي م فهمت؟قلته ليهو احساس التضارب واللخبطه دي وانك بتحبني وكذاااا يعني...سكتتت مسافهه وهو مركز في تقطيع السلطهقلته ليهو امممممممم لو م عايز تحكي اوكيههقال لي قبل العرس بيوم لما جيت اخد البدلهه يمكن لو م حصل الموقف داك م كُنا حنكون هنا اليوم ف الف الحمدلله على الموقف، قلته ليهو قصدك على الشيطان الكان تالتنا مش استغفر الله العظيم ي رب
قعد يضحك قال لي سبحان الله شوفي حكمه ربنا ابتدت بي "شهد اوعاك تحبيني"مروراً بموقفك داك وانتهت بينا هنا"قربته منو وطلعته بأطراف صوابعي في رجولو ولفيت يدي حولين رقبتو وقلته ليهو شفت ربنا لما يحب يسبب الاسباب قال لي وفي مقولهه اخرى" لا يُفرق اللّه بين اثنين لهما نفس النية، القُلوب على نواياها تلتقي ...
إقتباسههحان الوقت الذي ستكون اكبر مسافه تبعدنا هي حدود نظري، سنتشارك الزمن بساعاته و دقائقه وكلالحياة، ساشاركك اغراضك المفضله، سأعبث في تفاصيلها، سأكون معك في اول دقائق استيغاظك من غفوتك سأحفظ تفاصيل وجهك الذي طالما كنت اسرق لحظات عدم انتباهك لأنظر اليه واحفظ تفاصيله، سأيغظك كل يوم بطريقه اقرب الي الجنون سأشارككملابسك سأرتب لك اشيائك علي زوقي ستعتاد عصبيتي وعنادي وتقلبات مزاجي ستعتاد طفوليتي، ستكون بقربي دائما اغار عليك من الوقت لن انتظر حتى يأتي دوري فيك بل سأجعل الوقت هو الذي ينتظر دوره فيك، ستكون اول من اقدم له فنجان قهوه مخلوط بأغنيتي المفضله سألحق بك كل يوم حتي الباب، ستكون امامي في كل صلاه"منك ابتدا الحياة وبك تنتهي وبك ومنك كان اكتمالها ابديآ "Shiraz Osman شيراز عثمان
نهايهه الجزء الاول...
حيكون فيها بقيه حلقات ي بنات لأنو لسه فيها احداث وفيها ثغرات وحجات م اتوضحت ولا خلصت بس صعبه تتكتب بعد كدة والله الا بعد رمضان ولو الجامعه فتحت ححاول اكتبها اذا ربنا حيانا من الموت بس اسي صعبه زي م عارفين داخل علينا رمضان انا زاتي في نفسي تعبته شديد من الكتابه وإرهاقها م عندي ااااي طريقه ليها والله ف عموماً "للخربشهه بقيهه"ابقو عافيه واعفو لي اذا بدر مني اي غلط م مقصود او غيرو+ ورمضان كريم اعادة الله علينا وعليكم بالخير واليمن والبركات وم تنسونا من صالح الدعوات+الله يسعدكم ي رب على التفاعل دة
وبرجع وبقول الخرشه الهدف منها مسك الزمن بس م اكتر في الفراغ النحن فيهو دة وهي م روايه ولا منسوبه للروايات ولا انا بنسب نفسي للفئة دي من الناس بكتفي بالخربشه والمشاركه في القروب دة بس والنتيجه في كل الاحوال واحدة اننا نمسك زمن وننبسط بس م اكتر
ابقو عافيه وربنا يرفع عننا الوباء ان شاءالله