الفصل السابع والثلاثون
وضع ماهر وسط الضغوطات دي كلها كان مخوفني شديد، لأني عارفه وضعو واحتمال انو م يستحمل الحاصل معاه دة كلو، خايفه يرجع يكتئب ويرجع لحالتو ديك تاني، فكرة اني اقيف ضدو دي كانت صعبه شديد لأنو متمسك شديد بالموضوع دة، ف خيار اني اقيف معاهو هو دة الحل واجاريهو لغايه م يصل للعايزو واساعدو بالبقدر اساعدو بيهو علشان م ينتكس
❖
ي بت هووووي م دايرة معاك قله ادب حنيه شنو الشايلاها لي اخوك غير اكل حقكم شوفتي منو شنووو؟بتخافي منو؟اذا من هسي مدة يدو عليك كدة اها كان سكتي ليهو تاني البسويهو هين؟
ي ماما
اسكتي بلا ماما معاك وقومي طيري من وشي يلا
خالد اها صحبك الضابط قال ليك شنووو؟وخالك اداك رقم المحامي الحيمسك القضيه ولا نسى هو كمان التاني لقى القرش والشي دا ونسا الناس بقى م عندو زمن حتى يقعد معاهم دقيقتين ورا بعض
الضابط قال بعزك في الموضوع دة هو بالحيل واسطاتو قويه، اي خالي رسل لي رقم المحامي حكيت ليه التفاصيل كلها حنمشي ليهو يوم الأحد قال لي ي زول حتطلع ليكم ورثه جد اصبر بس والله تغنو غنى لمن تقولو غنينا، وخالي ده زاتو اصبري لي عليهو حبتين بس اسي انا مشغلني معاه بس شغل اي كلام بس لما اخش معاه في الشغل الغريق حق الشركه الجدجد بعداك نتحاسب هو زاتو الأكل الأكلك ليهو هين؟الهو فيهو اسي دة كلو من حقك وتعبك ي امي قال لي داير امسك الحسابات في الشركه اسي انا مبارياهو ومرازيهو وعامل صحبو لغايه م يمسكني ليها الصبر ي امي الصبر بس حقنا الشالو اخوانا واتسافهو بيهو وكملوهو وحق ابوي كلو برجع
انت كان جنا بطني جدجد و بتسمع كلامي وبتعمل البقولو ليك وبتشرب المحايا وبتتبخر بالبخرات دي ساي زي الزمن دة كان بقيت زول ودخلته مع خالك الشركه لكن عدم سماع الكلام وقوة الراس تخلوها لمنو انتو ي عيال بطني؟؟؟اسي جبته ليك معي حجات واسمع كلامي واعمل الحجات دي
ي امي عليك الله يااااخ..
ي ولد اسمع الكلام والله الحجات دي انت لو عارف انا دافعه فيها دم قلبي لكن شغل م اي شغل شغل بإتقان اسمع كلامي والله بكرة تلقى نفسك جوة الشركه والناس دي حتمشي معاك زي المسطرينه عشان كدة من بكره تبدأ تشرب المحايه دي على الريق والبخرات دي صباح ومساء وفي حجات جايباها ليك للحمام وعندك حجاب تربطو في ضراعك
اها شوفتي ي امي انا معاك في شي بس اللبس دة لا
تلبس ي ولد الحجاب دة اهم شي لازم تلبسو والله اي شي ماشي معاك اعوج بتعدل انت بس اسمع كلامي وم تتجنن ياما سكته ناس بالزول دة وخليتهم يشوفو العجب لمن اخدته الدايراهو انت قايل الحياة دي ماشه معانا عديل ساااي؟؟؟
❖
الدكتور قال إنو مهند وضعو احسن وفي تجاوب واضح منو صرفنا لينا مضادات إكتئاب وحولنا لدكتور نطق علشان يتدرب على المخاطبه والكلام دة، ..."ماهر"
طيب الحمدلله يعني في تحسن؟
كل الكان بحصل معاه داك ي شهد بسبب المنشاطات الكانو بدوها ليهو على اساس إنها علاج، فاهمة ي شهد؟مهند لو بتلقى العلاج بصورة صح زي الزمن دة مفروض يكون بأفضل حال زينا كدة بس
واسي عايز عايز متابعه، عايز زول يكون واقف في راسو كل الوقت وياخد ويدي معاه في الكلام ويحاول يتعاطى معاه الدكتور قال قعدتو براه م في مصلحتو وم حيكون في تقدم ملحوظ لحالتو يعني على الاقل محتاج ليه مُعالج شخصي يكون ملازمو عشان العلاج يكون مُتدرج، انا ممكن اغطي الحاجه دي بس عارفه انو انا م كل الوقت بكون متوفر، بحاول اني اشيل اكبر كميه مشاوير ممكنه عشان منها اقدر اغطي قروش إيجار الشقه دي وإيجار شقه خالد، اما شغل اللابتوب دة للحجات الكبيرة والمصاريف وغيرها م عايز تركيزي مع خالد وإيليڤ يخليني اظلم البقيه واقصر في حقهم واسي علاج مهند برضو محتاج ميزانيه خاصه لأنو عندو دواء لازم ياخدو على الدوام وهو غالي شديد واحتمال م اللقاه في السودان اساساً لأني فتشته وم لقيتو وصيت عليه واحد صحبي يرسلو لي من الامارات بس اكيد م كل مرة حأقدر اوصيهو
حبيبي صدقني اسي مهند حيكون بأفضل حال، وحيبقى كويس إن شاءالله، وربنا حيهونها ويسهلها علينا ان شاءالله بتضيق عشان تفرج بأوسع ابوابه لأنو ربنا عالم بحالك ونواياك
إن شاءالله ي شهد إن شاءالله اقدر اللحق لي دة كلو
امممممم حبيبي بالمناسبه جاتنا تلاته حجوزات جديدة للمزرعه اتواصلو معي ومع زياد أكدته حجز 2 وخليتهم يحولو لي العربون في الحساب بعد م زياد اتواصل معاهم بصورة مباشرة وقعد.معاهم وكذااا نسيت اكلمك
الحمدلله طيب دي حاجه كويسه
زياد مجتهد م قصر عمل جلسه تصوير ظابطه في المزرعه مع منذر ولجين بتعرض فيها معاهم
م عارف اخدهم كيف والله ي شهد، وم عارف كنت هعمل شنو لولا وجودك انتي بعد ربنا في حياتي
حبيبي م قلته ليك فترة وحنعديها مع بعض؟
اتمنى انها تكون فترة ي شهد اتمنى
حتكون حبيبي اكيد وبإذن الله حتعديها
❖
شهد ازيووو
اهلين رتاج كيفك؟
تمام الحمدلله جيت هنا بيت ناس سمر ماف زول بفتح الباب اظنهم مافي قلت سمر تكون معاك
لا والله م معي اتفضلي
ماشه مستعجله والله كنت عايزة سمر ضروري بس
اها تمام ي ستي
يلا مع السلام
بعد دقيقتين من قفله الباب تاني الجرس ضرب
فتحته الباب لقيتها رتاج
رتاج؟
عايني عندي ضيوف ممكن اجيبهم عندك هنا؟
ضيوف؟
صحباتي جايني كنت عايزة استضيفهم في بيت ناس سمر بس هم مافي وم عارفه اعمل شنو م بقدر اوديهم بيتنا حمودي اخوي ضارب سجارة بنقو وخايفاهو يجي يعمل لي موضوع وخايفه ابوي يجي سكران ويفضحني معاهم
طبعاً انا م كان عندي اعتراض ابداً بس مهند وضعو م بستحمل الجوطه والإزعاج والكلام دة وخايفه يتوتر
م عرفته اقول ليها شنو ولا قدرت ارفض، قلته ليها طيب ابشري م عندك مشكله جيبيهم على طول
م فيها ازعاج صح؟حأجيب معي سكر وعصير وكل حجات الجبنه
ي بت انتي هبله ولا شنووو؟تعالي ساي ضيافتهم علي
خلاص عايني انا حأقول ليهم انك بت خالتي طيب؟معليش كترتها
ههههه طيب تمام م طلبتي حاجه
م عارفه اليوم عدة كيف لغايه م جو وطلعو م كنت مركزة معاهم كنت شايله قلبي في يدي وشايله هم مهند كل شويه بدخل عليه في الغرفه بشوفو محتاج شي ولا لأ وطبعاً هو م حصل اتكلم معي ابداً بعاين لي بس وكل الوقت ساكت وماسك التلفون في يدو رغم اني بحاول حتى لو اتجاوب معي بالإشارات بس
❖
رتاج قالت لي جات شربت معاك الجبنه هي وصحباتها
اي والله جو كانت جاياك لما م لقتك جاتني
ههههه متعودة طبعاً حركاتها دي م بتخليها م حصل جابت ليها صحبه في بيتهم دايماً بتجيبهم في بيوت الناس وبتختهم امام الامر الواقع م بتحسب حساب لظرف الزول الجايبه ليهو صحباتها دة، عارفه ي شهد اكعب شي الزول الما بكون راضي بي واقعو دة حتلقيه مستهلك نفسو والحواليه شديد لأنو بكون مصلحجي ورتاج دي النوع دة يعني النوع الما عايز يتقبل وضعو ووضع اهلو وعايز يظهر انو عكس كدة المشكله انو لو طال الزمن او قصر حقيقتها دي حتتعرف حتتعرف وانا م بقول ليك الكلام دة قطيعه فيها لاني قبل كدة قلته ليها ي رزان كل م اتقبلته وضعك وحياتك وواقع اهلك يكون احسن بس المزعلني انو انا عارفه انو انتي معاك مريض ت حد وم بتحمل اي شي غريب ممكن يكونوفي البيت ما بالك بي لمه وجبنه وصحبات عادي ممكن وضعو يتضطرب على فكرة ودة زاتو تطفل منها عرفه متين معاك هي؟متعودة تفرض نفسها الثغيله دي
ههههههه عادي والله م حصل شي واليوم عدة م تنفعلي وتزعلي نفسك ساي حصل خير
لا والله ي شهد جد الموضوع بضايق اها قولي في يوم لا لاقتني ولا لاقتك اها حتستضيفهم وين حتفرش ليهم جبتهتا وجلحاتها؟؟جد الموضوع دة مزعلني يعني ليه الواحد م يتصالح مع نفسو وواقعو؟ليييه التصنع وعلشان شنو؟وهي زوله صغيرة اذا من اسي كدة بعدين حتعمل شنووو؟احساس النقص دة اكعب شي
في دي معاك حق وبعدين يعني اياً كان شكل وضعك او اسرتك او غيرو دي حاجه م اختياريه دة واقع ماف زول ماشي محاسبك عليهو وماف زول مفروض يقلل منك لمجرد الحجات دي لأنها ابداً م خيار متاح في اليد
بالظبط كدة يعني ليه م تتعامل معي ككيان وتحكم علي؟ليييه تصنفني من خلال وضعي او شكل اسرتي او غيرو وتعاملني على الاساس دة؟هل الحجات دي انا فيها مُخير؟
في الاخير شخصيه الزول هي البتحدد هو عايز يتعاملو معاه كيف يعني عدم ثقتها في نفسها وتقبلها لواقعها دة اكبر كارثه ممكن تواجها خصوصاً في مجتمعنا دة ربنا يعقلها ويهديها، المهم م علينا انتي امس مشيتي وين ي زوله طول اليوم غايبه
اخخخخخ ي شهد م تزكريني مشيت زفت المستشفى اتصلو علي قالو لي قبلناك لما مشيت اتخيلي لقيتهم شغلو محلي واحدة قالو لي اتأخرتي ومكانك كان شاغر ولقينا الأحوج منك؟
وااااي م جادة
جادة ي شهد حسبي الله بس قال لقينا الاحوج منك قال م عارفني انا محتاجه للشغل دة قدر شنو والله فايته الشحاد بدرجه م زعلانه الا على قروشي حقت المواصلات والمرمطه الاتمرمطتها عشان اصلهم بس م علينا خيرها في غيرها حأشتغل شغل تسويقي دة لمن ربنا يفتحها علي اصلاً ماف شي في البلد دي بمشي مع الزول عديل انا مصيري اطلع منها ان شاءالله حفيانه
حبيبي ي سمر والله زعلته ليك ياخ ربنا يعوضك بالأحسن
إن شاءالله ي شهد يخخخ يسمع منك ربنا
بعد خمسه دقايق وانا باخد وبدي معاها في الكلام ومرة بتجاوب معاها ومرة بسرح لقيت نفسي بقول ليها
سمر؟
احكي
اسمعيني انتي مش قاريه تمريض؟يعني ممكن تلازمي مريض بشكل خاص؟
بقت تعاين لي
عايني ماهر في مقابله اخوهو الدكتور قال ليهو...الخ وبما انو الشغل م ظبط معاك ليييه م تراعي معي مهند اصلاً انتي قاريه المجال دة حتى لو م عندك خبرة م إشكال
امممممم
والله فكرة تبقي وبالمرة تملي علي البيت وقولي لي حتاخدي كم مرتب وان شاءالله م حأقصر معاك
شهد نحن م بينا القروش
لا بينا وغير كدة م حأرضى ابداً لو وافقتي من بكرة تنزلي واعتبريهو دوام عديل متأكدة انك م حتقصري وحيتحسن على يدك
طيب تمام م عندي مشكله انك حظي والله
والله انا الحظي ها قولي لي حتاخدي كم؟
م اشكال ي زوله المناسب بس
المناسي كم؟
اي شي ي شهد انتي وزوقك
لا لا م تقولي كدة عشان انا م عايزة اظلمك
عايني انتي وزوقك ولو ظلمتيني عافيه ليك وم تناقشي في الموضوع دة كتير طيب؟
❖
زياااد انا اخدته كل دفاتر إيجارات الشقق من عمك المهم جيب لي كل الحجات العندك وتعال النيل منتظرك انا، تمام؟
❖
لجين
اوووو منذر باشا زارتنا البركه والله
كيفك؟
تمام الحمدلله وانت؟
انا تمام وين مختفيه؟
اناااا مختفيه؟موجودة والله هههه!!
عارفك موجودة بس قصدي اختفيتي مني فجأة وقللتي طلتك وشبه فاصلاني؟
اناااااا؟هههه لا ابداً والله وافصلك ليييه؟عملته حاجه غلط انت؟؟
م عارف يمكن في زول قال ليك افصلي كل الفي حياتك وهباله البنات البتعملوها دي
هههههه لا معليش ابداً انا م كدة بس والله ساي
ساي ساي؟
ايوان ساي ساي
يعني م فيها لو مهتم كان عرفته؟
ههههههه فعلاً لو مهتم كان عرفته
المهم انا مشتاق ليك ي زوله وفصلتك لي دي حارة عديل
ههههه بس انا م فاصلاك يخخخخ
طيب م تختفي من حياتي ممكن؟
هههههه حاضر طيب
❖
ماهر اليوم دة جا بدري كنت مصدعه شديد بس م بينته ليهو، بعد م اتغدينا دخل الغرفه الفاضيه وفضل قاعد فيها فترة ساعه، لحقتو اول م دخلته الغرفه لقيتو فارش كميه من الورق قدامو، قلته ليه ماهر؟؟دة شنو بتعمل في شنو انت؟وقف على حيلو قال لي دة ورق حسابات كدة عايزة حاجه؟
لا بس قلت اشوفك قرب مني وباسني في راسي مساافه وقال لي مشتاق ليك على فكرة بسس طالع مع مهند مشوار عشان م يزهج من قعدة البيت ممكن؟؟
قلته ليه مش قلنا حاجه بتخص اهلنا م فيها ممكن؟؟قال لي بس حتكوني براك قلته ليهو م إشكال المهم تغير ليهو جو لأنو قعدتو في البيت كدة م في صالحو طيب حبيبي ححاول منتأخر، بالفعل ساقو وطلع رغم انو كان واضح انو مرهق شديد لأنو بطلع بدري واحياناً من صلاة الفجر والله وبجي راجع متأخر، م عارفه هو قادر يقسم نفسو ويكون كل الحجات دي كيف حنين طيبان ومسؤل والله ف م عايزة ازيدها عليه الفيه مكفيه
❖
انتظرتهم كتير بس لما اتأخرو جهزته العشاء ورسلته ليهو مسج ونمت، صحيت على صوتو وهو بصحيني، فتحته عيوني لقيتو بقول لي..
حبيبي صح النوم
ماهر جيتو؟
ايوان جينا عارفك تعبانه ومرهقه وم مفروض اصحيك بس برضو م مفروض تنومي جعانه او بدون عشاء يلا قومي اتعشي
اجهز ليكم العشاء؟
لأ بس تعالي عايزك،
في شنووو؟؟
تعالي بس انزلي، نزلته معاه وهو ماسكني من يدي، طلعنا من الغرفه مشى بي بإتجاه البلكونه، لما وصلنا فجأة حضني من ورا وقال لي وسط الدوامات دي كلها الواحد م مفروض يقصر من حاجه عدم وجودها في حياتو ممكن يقصر عمرو
فجأة ولع إضاءة البلكونه لقيتو خاتي تربيزة المطبخ ومعاها كرسين ومجهز عشاء كمان والمنظر مع البلكونه وإضاءات الشارع والظلط والمباني الحواليها والسماء والنجوم المهم لكم ان تتخيلو كان رهيب كيف في الضلمه دي، اتلفته عليهو وحضنتو قلته ليهو متين حتفهم انو مافي اي تقصير حاصل منك تجاهي ولا عمري حسيت كدة؟ انا بحب احس بتقصيري تجاهك ي شهد الحاجه دي بتحببني فيك شديد وبتخليني راغب في اني اعمل قام بالضلام من الدنيا دي كلها واقضي اطول وقت معاك،
طيب بحبك انت متين حتبطل تبقى حلو كدة؟
حلو؟؟؟ "بنبرة حادة"
طيب اسفه اسفهه
ولع النور وقال لي"طيب خلينا نتعشى
الله جايب لي شاورما واقاشي وبيتزا؟كدة كتيييير حبيبي ليييه جايب دة كلو م جااادي طبعا؟"كانً عامل سُفره عشاء حلوة شديد وسط الحجات دي كلها صحن خاتي جبنه مُضفرة وزيتون والبيبسي البحبو وعلى جنب خاتي وردة حمراء السفرهه كلها م كان فيها غير الحجات الأنا بحبها بس ناقصها الشموع "يمكن ماهر علشان حس انو حركه انو يسوق مهند يطلعو ويخليني انا في البيت حاجه ممكن تزعلني او تضايقني رغم اني م ركزت ابداً ومستحيل اركز واتحسس من حاجه زي دي
حبيبي اعيش واجيب ليك البتحبيه والحتحبيه دايماً وللأبد إن شاءالله وراي شنو غيرك انا؟ شهد في نص الأنا فيهو دة كلو انا بحب شي نفسي بتقول لي اعملو لي شهد
حبيبي انا كفايه علي حُبك دة والله انت فاهم؟
وانا كفايه على انو انتي الماخدة قلبي ف بالتالي م تلوميني على شي حتلقيني بعملو دة م انا دة قلبي الانتي موجودة فيهو دة هو البيعمل م قلته ليك قادر يكون بخيل مع الناس كلها الا إنت؟عارف إنو انا ممكن تكون فيني كل العبر وعيوب الدنيا بسسس..
قبل م يتم كلامو قاطعتو وقلته ليه زيني!؟حتبطل متين تعاملني بحساسيه زايدة وتحس انك مقصر في حقي؟
اقولها ليك على بلاطه علشان نحسم الجدل دة؟عيوبك لو عابها الكُل انا حأحِبها ليك خلصنا؟؟ ...
إقتباس
قيل له"
لما هي؟!
يا صديقي ليس هناك سبب لأن لو رحل السبب لرحلت هي، هي فقط لانها هي...
...