الفصل الأربعون
وفي وسط الأنا دي كلها فجأة انا عيني وقعت على وشها وإتفاجأته بالشامه على خدها اليمين..
تقريباً انا بقيت واقف في مكاني وفي حاله صدمه من غير اي حركه ولا حتى قادر ابدي اي ردة فعل كأنو الدنيا كلها وقفت عند اللحظه دي، هل انا الشايفو دة حقيقه؟
صوت عثمان وهو بقول طويله وم ضعيفه وم سمينه عندها شامه في خدها اليمين، في خدها اليمين، في خدها اليمين...
❖
كيف يعني م عارفين مشى وين؟مش كان قاعد معاكم؟
زياد: اي قاعد معانا فجأة جاتو مكالمة شال مفتاح العربيه وطلع
م برد علي ي جماعه، يربي مالو والحاصل شنو ماهر م بطلع الطلعه دي ساي انا متأكدة في شي،
خلاص روقي ي شهد م تتوتري كدة ان شاءالله خير
م عارفه ي سمر بس م قادرة اروق يعني على الاقل يفهم الناس هو ماشي وين والحاصل شنو م يخليهم على اعصابهم كدة
زياد: كدة اتصلي على امو شوفي يمكن هي م كويسه واتصلت عليه عشان طلعت دي طلعه فزعه م ساي
م عندي رقمها ي زياد المشكله
زياد قال لي ولا انا،
منذر: طيب ي زياد ارح عليها في البيت بدل قاعدين كدة
زياد: خلاص ارح نمشي،
قلته ليهم انتظروني امشي معاكم،
منذر قال لي لا خليك انتي هنا يمكن يجي ماشه وين؟؟،
قلته ليهو لا م بقعد لو جا سمر اتصلي علينا طيب؟
قالت لي خلاص اوكييه تمام..
❖
انا م عارف طلعته من المستشفى كيف وليه م واجهته الموضوع دة في نفس اللحظه، يعني انا تعبته شديييد عشان االموضوع دة لغايه م وصلته للنقطه الانا عايز اصلها وهي قدامي بخطوة بس من من من الصدمه حسيت نفسي مكتف وحسيت رجولي كانت جاراني غصب عني وطلعتني من المكان دة، سوقته العربيه وانا م مستوعب وبسأل نفسي يعني لييييهه عملت كدة؟ وعشان شنو؟
امي قد تكون عندها الاسباب الكافيه لكدة ولو قالو لي قتلتو ممكن اصدق وانا مغمض بس دي مستحيل، ابوي كان علاقتو معاها غير يعني لسه بتزكر كلامو عنها حتى لما جا حكى لي عن موضوع عرسو والموالات دي بتزكر كان بوريني في صورهم لما جات صورتها هي وكانو مع بعض في مطعم قال لي شوفته دي الراحه البفتش ليها مع امك م لقيتها الا عندها يعني والله امك بس لو بقت زيها كنا حنعيش في نعيم وم حتكون لا في تانيه ولا تالته
حتى ضحكته فيه وقلته ليه طيب ي ابوي لييه عرسته بعدها 2 تاني؟
قال لي ساي ظروف الشغل بس الواحد بمشي هنا وبمشي هنا بقول م يطلع ساي ودة شرع ربنا لكن طبعاً الراجل بفتش مكان راحتو دايماً ومهما عرس نسوان بلقاها عند واااحدة بس والراحه البفتش عليها انا م لقيتها الا عند عمتك رحاب دي، والله يغفر لي من حق امك والبقيه وامك بالذات لأنها زوله وقفت معي وقت الحارة ووقت انتكسته طلعت لي دهبها من جسمها وسندتني لغايه م ربنا فتحها علي ووقفته على حيلي وعشنا عيشه سمحه خلاص لكن في حاجات ما بيدنا ي ولدي اسي انت يمكن تشوف كلامي دة ظُلم لي امك لكن بكرة لما تكبر وتعرس وتعيش العشتو مع امك حتعرف انا قصدي شنو بالراحه البفتش عليها اي راجل، الحياة ارزاقها مختلفه ومرات الرزق ي ولدي بجيك في شكل زول يديك راحه البال الانت م لاقيها حتى بقروشك
كان بتكلم عنها دون غيرها من النسوان وكأنها حاجه عظيمه شديد في حياتو لدرجه انو م اتكلم لي عن نسوانو التانيات لا الحبشيه ولا المصريه على قدر م اتكلم لي عنها هي، وحتى معظم الوقت كان بسافر بورتسودان وبقعد فيها كتير وحبو للقعدة هناك مُبرر عشان هي هناك، يعني معقوله؟وليه؟
فجاة اتزكرته الصورة الفيها ابوي وهي وعمي الزيني، الصورة كان عليها تاريخ 1983 والتاريخ ده قبل زواج امي وابوي، يعني ابوي كان بعرفها قبل زواجو من امي، طيب ليه م اتزوجها اذا بعرفها قبل م يعرف امي؟
وقفته العربيه وانا بقول ليه؟اكيد في قصه يعني م ساي الزوله دي معرفه، بعد 15 دقيقه وانا قاعد مع نفسي وفي دوامه تفيكر حتشق راسي فجاة اتزكرته انو عمو الزيني كان موجود في الصورة معناها ماف زول حيقول لي الزوله دي علاقتها بيهم كانت شنو بالضبط غير عمي،
الصورة في البيت لازم ارجع البيت...
❖
وصلنا بيت اهل ماهر كنت مستعجله للدرجه اللي م حاسه بيها برجولي اساساً،
منذر: شهد دقيقه براحه عشان لو ماهر م معاها م تخلعي المرة ساااي وتقطعي قلبها بالليل دة،
زياد اضرب الجرس انت احسن
زياد ضرب الجرس انتظرنا مسافه حتى الباب فتح،
السلام عليكم؟
اهلين وعليكم السلام
كيفك تمام؟
الحمدلله اتفضلو
قدام والله عمتو عبير موجودة؟
ايوة موجودة اتفضلو،
كانت البت الشغاله تقريباً
دخلنا قالت لينا دقيقه اصحيها ليكم،
قلته ليها لو نايمه خليها م تصحيها اساساً الزمن متأخر وكدة
قالت لينا طلعت قبل شويه م بتكون نامت انا بس كانت بتحضر معي في التلفزيون اتفضلو،
مشت جابت لينا مويه حتى مشت عليها، ونحن قاعدين على اعصابنا وبنعاين لبعض وانا بهز في رجولي
منذر قال لي معناها ماهر م هنا
ام ماهر جات قالت لينا السلام عليكم...
طبعاً وقفته للحظه بعاين لينا يعني شكلها كلمه متغير عليها بسيطه بقت ضعيفه وهالات سوداء زي السكن حوالين عيونها دة غير وشها الهزيل احساس العيان والمرض متمكن منو دة بس حالها، اول حاجه حضنتني وقالت لي"شهد بتي ازيك ان شاءالله طيبه وكيف عامله والحاصل معاك ليه م بتجيني...الخ
طبعاً انا م كان عندي اي رد ولا اي مبرر لعتابها دة
بعد م خلصت سلام على منذر وزياد رجعت قعدت جمبي وبقت تسالني عن احوالنا وماهر كيف ومهند بتسأل بي لهفه كدة وقالت لي مهند ان شاءالله م عزبكم و...الخ
من سؤالها عن ماهر عرفته انو م معاها ف م حبيت اسألها منو لأنو حسيتها مبسوووطه بجيتنا دي شدييييد،
زياد قال ليها كيف ي خالتي ان شاءالله انتي طيبه؟
قالت ليهو تمام الحمدلله انقطعته مني قطعه ماهر ولدي
ضحك قال ليها مشاغل الدنيا بس
قالت ليهو لالا م عليك عتب كان صحبك اللي هو ولدي هنته عليهو انت حق الله حق م عليك عتب نهائي ي ولدي
بقينا ساكتين،
قالت للشغاله" سكينه اعملي عصير ولا شاي لبن ولا اي حاجه حبيبتي،
قلته ليها لا والله على مشيه جينا مارين بجاي بس وقلنا نغشاك
قالت لينا يعني م ماهر قال ليكم امشو شوفو البيت فيهو منو؟
سكتنا مسافه حتى قلته ليها ابداً والله ي عمتو فعلاً كنا ماشين مشوار والبيت في شارعنا قلنا نغشاك نطمن عليك رغم انو الزمن اتأخر وكدة ازعجناكم اعفي لينا
قالت لي لا والله العفو ي بتي العفو ياخي معقوله البيت بيتكم وقت م عايزين تجو بس راجلك قوة الراس يخليها لمنوو؟اصلاً البيت فاضي م فيهو زول غير انا وبتي دي ماليه علي البيت غايتو م عندي غيرها وماف زول بجيني، البيت زي المهجور الحمدلله بس ه
كلامها ونبرة صوتها فيهو كميه ألم م بتوصف بالحروف ابداً
اجبرتنا نقعد نشرب العصير، حتى استأذنا منها وهي بتوصيني بشكل كأنها بتترجاني وبتقول"عليك الله م تنقطعي ي بتي وتعالي اليوم والتاني اصلاً البيت فاضي بي كبرتو دي وسلمي على مهند وقولي ليهو امك بتسلم عليك وفاقداك وليه م بتتصل عليها، سلمي على ماهر اب رويس قوي ...
، لما جات تودعنا حضنتني مسااافه وقالت لي عارفاك م بتجي لكن برضو مستنياك
قلته ليها حأجي والله إن شاءالله...
بعد ركبنا العربيه قالت لي رقمي عندك مش؟
م قدرته اقول ليها م عندي واكسر خاطرها، قلته ليها ايوة
قالت لي طيب اتصلي علي سمح؟
مليني رقمك كدة، اديتها رقمي قالت لي بتصل عليك خلاص،
تلقائياً انا لقيت دموعي جاريه، يعني المرة حالتها تكسر الخاطر والله العظيم معقوله ماهر دة يكون ظالم امو؟
معقوله هي تكون عكس م هو شايفها؟
زياد: كدة اتصل على الزول دة شوفو وين ي منذر يمكن يرد..
دقيقه طيب..
ياهو رقمو داخل بس ماف رد،
الوو؟وين انت ي زول؟الحاصل شنو ان شاءالله خير؟اي فهمني الحاصل شنو طلعته فجأة كدة وخليتنا قاعدين على الاقل فهمنا مالك وطالع ماشي وين، نحن طلعنا وراك كايسين دربك زول طلع الطلعه دي اكيد في شي يعني م ساي، طيب فهمني مالك ان شاءالله خير ووين انت؟يعني قريب من البيت؟طيب تمام تمام نحن زاتنا جاين على البيت
تمام...
قلته ليه بي لهفه قال ليك وين ومالو؟
قال لي قال بفهمني كل شي لما يصل البيت هو قريب،
زياد قال ليهو م قال ليك مشى وين ولا مالو؟
منذر قال لي زياد: زياد اللحن ليك ردي لي شهد دة؟الزول دة قال لي لما اصل البيت بحكي ليكم كل شي ..
❖
من الاستعجال وصلته البيت في غضون 15 دقيقه اول م فتحته الباب لاقتني سمر وهي قاعدة في الهول..
السلام عليكم
قالت لي وعليكم السلام ووقفت على حيلها
قلته ليها اتفضلي خليك قاعدة،
قالت لي شهد والشباب لاقوك؟
قلته ليها اي جاين في الشارع، م وقفته على طول دخلته الغرفه وقفلته الباب، مشيت على طول وقفته قدام الصورة الملصقه في الحيطه وصورتها، ومشيت طلعته باقي الصور وصورتهم بتلفوني، قبل كل شي رسلته الصورة لي عمي الزيني بالواتساب،
بعداك اتصلته عليه مكالمه مكالمتين بعد المكالمه التالته بدقيقتين رجع لي فتحته الخط..
ي ولدي كيفك ان شاءالله طيب؟
الحمدلله في نعمة ي عمي انت كيفك؟
انا تمام الحمدلله مرتك ونسابتك والبلد كلها ان شاءالله طيبين وم عليكم عوجه؟
الحمدلله كلو تمام
اعفي لي ي ولدي واللن مقصر معاك بس انت عارف مع الجري ومشغوليات الدنيا الما بتخلص الدنيا اخدتنا
فعلاً والله العفو ي عمي كلنا جارين
كنت بتكلم والكلمه بتاخد مني مجهود حتى بتطلع م كنت قادر اقيف كنت برجف وساند نفسي في طرف السرير وم قادر اقعد وحاسي نفسي واقف في هاويه ومن فوق علي شلال مويه نازل
في نص كلامو بقيت م قادر اصبر او استحمل قاطعتو وقلته ليهو ي عمي في صورة رسلتها ليك في الواتساب وصلتك؟
قال لي صورة شنو م شوفتها لكن انا زاتي والله طولته من شوفتك ياخ كويس انك رسلتها
قلته ليهو كدة افتح الواتساب شوفها عشان داير اسألك منها،
قال لي خير ان شاءالله كدة دقيقه،
فصل مني عدة خمسه دقايق حتى رجع قال لي ياااازول لقيت الصورة دي وين انت؟ي سلام ياخ الزمن الجميل مع ابوك ربنا يرحمو وعمتك اميمه زمن الشارلستون والله صورة بمليون صورة ههههه
قلته ليهو لقيتها بالصدفه والله ي عمي وقلته ارسلها ليك اذكرك هههه لكن انت عارف استغربته شويه يعني انت وابوي بتعرفو عمتي اميمة من بدري شكلكم يعني قبل م ابوي يتزوج امي زاتها لأنو حسب تاريخ الصورة قديم شديد
قال لي اي الصورة دي قديمة شديد ياخ من قبل م ابوك يغترب في العراق، كانت اميمة دي خطيبتو زوله معرفه م قريبه وم بعيدة لاقاها في عرس من اعراس الاهل ديل وعلى حسب امور الشباب وكدة دخل معاها في علاقه لكن نحن زمان م كنا زيكم في زمنكم دة تغشو وتلعبو بالبنات وتمسكو بيهم زمن، نحن كنا ناس امسك لي واقطع ليك يعني الواحد لو دار ليهو واحدة بعرسها بعرسها، ابوك الله يرحمه كان زول جادي لكن ماف ليهو طريقه عرس لأنو كان زول ما مؤسس ولا جاهز، البت انشلقت فيهو الا تعرسني الا تعرسني اها على كدة قرر يغترب عشان يجهز حالو ويبقى زولاً عديل وزول عرس وهو من زمان بدور السمح ابوي قال ليهو بعرس ليك قال لأ الا اغترب واجهز حالي كافي ووافي حتى ابقى على العرس لأنو العرس دة مسؤليه م زواج بنتم بي اخوي واخوك ابداً، اها هنا كمان قالت ليهو طريقه اغتراب ليك ماف لو م جيت اهلي بالباب كدة، عشان انا م بحرسك ساي من غير م تصل ناس بيتنا وهم اظن يجي اي زول يتقدم لي ويوافقو عليه، على هوى الكلام دة جهزنا حالنا ومشينا خطبناها وحجزناها ليهو، ابوك اغترب سنه سنتين تلاته حالو اتصلح م عارف الحصل شنو بينهم والله لكن بتزكر كل القالو لينا الزوله دي انا خليتها وابوك كان زول اتجاهو واحد م بقبل نقاش خليتها يعني خليتها ماف زول يناقشني رغم انو علاقتو بيها كانت طيبه وم حصل رسل لينا شي وخلاها هي او فرزها مننا انا دة كنت بوصل ليها الحجات البجيبهم ليها بيدي دي وكنا منتظرنو ينزل السودان عشان يتم العرس بس لكن اراد الله والقسمه بقت قسمة امكم وقسمتكم انتو كمان ه، وشوف حكمة ربنا سبحان الله هي م عرست نهااائي وصبرت ولِف ي زمن ودور وابوك رجع عرسها هي زاتها والله القسمه دي م بتديك غير للكاتبو ليك ربنا ولو بعد الف سنه، صبرت ونالت قسمتها مع ابوك ...
❖
اسكتي قلته ليك ي بت بقوم بخنقك وبسل روحك باقي اليوم دة
م بسكت، اسكت ليه؟عشان بقول ليك في الحقيقه اسكت؟م كفايه علينا السكات البسببو نحن كل مرة راجعين لورا؟
بغلبك تسمعي الحقيقه ليييه؟الضلال دة عاميك كفايه
انا م عملته العملتو في نفسي دة عشان ماهر ضربني ابداً وانتي عارفه كدة، بالعكس انا لو في زول بعمل فيني العملو فيني ماهر دة م كنت وصلته للأنا وصلته ليهو دة
اسكتي قلته ليك قفلي خشمك دة ي بت ال..."طاخ طاخ"
م بسكت اضربي يلا، اضربي قدرتك حتعملي لي شنو يعني اكتر من العملتيهو فيني ووصلتيني ليهو.دة؟
امورك البتعملي فيها دي م امور ام واعيه، الأم البتأيد اولادها على الغلط عمرها م كانت ام واعيه، انتي مجنونه ي امي مجنونه رسمي امشي شوفي ليك علاج عالجي روحك احسن بدل قروشك المضيعاها في أذيه الناس ساي دي
اسكتي قلته ليك والله اخد روحك وارتاح منك ي الما نافعه..
واااااي زحي مني واااااي زحي مني ي مجنونه ي مجنونه كح كح "لحظه مصارعه ومحاوله خنق"
تاني بس اسمعك تفتحي خشمك دة قفلي
بفتحو عشان دي الحقيقه واقتليني لو دايرة تقتليني اصلاً انا كدة كدة ميته، انتي لو طبيعيه م بتربينا على الكذب والنفاق والاحتيال، لو طبيعيه م بتربينا على الإجرام، لو طبيعيه م بتربينا على كراهيه الناس والحقد عليهم، لو طبيعيه م بتمشينا في الغلط، انتي ام انتي انتي ام؟حياتك كلها بس جاريه ورا الشيوخ والفُقرة عشان تأذي غيرك وسبحان الله حقدك دة لمن بقى ظاهر في وشك، في منو سلم منك انتي في الدنيا دي كدة قولي لي؟ياخ نحن اولادك م سلمنا منك بقيتي ممشيانا على مزاجك كاننا الالات عندك، خالد محيتي شخصيتو من كتر م كتبتيهو عشان يسمع كلامك وصلتيهو لدرجه انو يبقى حاقد وم راجل حيوان ساي ماشي ويسمع البتقوليه زي المرا، لا و م اكتفيتي لما خليتيه يشيل من ماهر عربيتو عربيتو رجاله وبس حتى بعد م عرفتي انو ماهر بقى م عندو غير عربيتو دي بس هي الشغال بيها وبقت مصدر رزقو خليتيهو يمشي يأجر ناس يكسرو ليهو العربيه ويسرقو لساتكها دي عمايل انسان طبيعي؟بتستفيدي شنو لما تخليهو يعمل كدة؟انتي مريضه ي امي مريضه انا شايفه تشوفي ليك علاج احسن بدل الانتي بتسوي فيهو دة اعمالك الشينه بقت ظاهرة في وشك وبقت تظهر فينا نحن الما عندنا ذنب اساساً
اسكتي ي بت اقلتلك انا اقتلك في المستشفى دي والله صحي ربي الغايبه للجايبه اسي ماهر بقى ليك سمح وانا بقيت الكعبه؟انا الربيتك ي بت الكلب انا العيشتك العيشه البتحلم بيها اي بت في الدنيا دي والا كان اسي زي الزمن دة لافه زي الكلبه في الشوارع، وبعد العملتيهو دة والله بقيتي كلبه صحي ي بتاعه الرجال ي اللافه ي الما نافعه بعد تعبي فيك دة كلو وتربيتي وعدم تقصيري منك دة طلعتي واحدة لافه وم منك رجى، انا لو زي م بتقولي كان رميتك رميه الكلاب وم غطيت عليك، كان خليت خيلانك واخوك ياكلوك بأسنانهم واسي دة بضرب لي خالك نور الدين عشان يقطع تزكرة باقي اليوم دة ويجي يوريك الما بتعرفي ليهو دة ي كلبه اتفووو عليك وعلى تربيتك..
هههههههه تعب؟تربيه؟خيلان؟اخوو؟غطيتي علي؟
عن اي تعب وتربيه انتي بتتكلمي ي امي؟انتي تعبتيي فيني؟ انتي انتي ربيتيني؟قصدك انك صرفتي علي بس عمرك م ربيتيني، عمرك م قعدتي قلتي لي دة صح ودة غلط ولا التربيه دي كيف هي؟ التربيه الفي نظرك عبارة عن قروش تتصرف على الطفل صح؟كونك وفرتي لي احتياجاتي كدة معناها خلاص انتي ربيتيني؟انتي م حصل قعدتي في البيت يومين ورا بعض عن اي تربيه انتي بتتكلمي؟ولا قصدك انو انتي كنتي بتدفعي لي عشان اربي روحي؟
خيلاني؟خالي نور الدين؟ولا اهااااا قصدك انك لما كنتي بتسافري وبتخلي معانا خالي نور الدين في البيت كنتي فاكراه بربينا؟
م تتكلمي ولا تزيدي حرف ي ناكرة الجميل ي الما نافعه، تفو عليك والله صحي م ربيت بس كنت فاكرة نفسي ربيت وخالك نور الدين اريتو ي يمه خال البنيات لي حدهن لكن بقى خال واحدة ناكرة جميل زيك كدة وقف في راسكم العمر دة كلو بدل م يشوف حياتو وحالو، كان في المستشفى وقف، لبس واكل وشرب وحرسكم لكن انتو شن الفايدة الفيكم؟ والله الزمن الضيعو معاكم دة لو كان عرس وجاب ليهو اولاد كان نفعوهو..
اي تربيه دي؟وعن اي خال انتي ببتكلمي؟الخال العاطل وانتي بتصرفي عليهو؟ ه
خااااالي؟وين كنتي انتي لما خالي نورالدين البتتكلمي عنو دة واسي حتتصلي عليهو دة كان بتحرش بي؟وين كنتي لما خالي الأكل وشرب وعالج دة كان بستغل فترة عدم وجودك في البيت عشان انتي لافه وم فاضيه وبعمل معي حجات كعبه؟
وين كانت امومتك لما شكيت ليك وقلتي لي دة خالك وبريدك شديد بس م اكتر وم فكرتي مجرد تفكير انك تستفسري مني وتعرفي وتفهمي انا كنت بقول في شنو رغم اني كنت بستنجد بيك في كلامي عديل وانتي م فهمتي ولا حرف ولا حسيتي بالرجفه الكانت في نبرة صوتي، بالعكس طنشتي واتجاهلتي حاجه زي دي وانا كنت في امس الحوجه لي وقفتك وموقفك ك أم، وحتى م فكرتي تفتشيني كأي ام بتعمل كدة لما بتها تشكي ليها من حاجه زي دي، م فكرتي تراجعي نفسك وتعملي لي حساب عشان انا بت وطفله وماشه على مرحله مراهقه ومستحيل اقول حاجه زي دي من فراغ بالعكس نهرتيني وسكتيني بي جمله"دة خالك وزي ابوك "
وين كنتي لما خالي القلتي عليهو زي ابوي دة اغتصبني في نص بيتنا؟ورجع عمل معي علاقه كامله تحت التهديد والتخويف والضرب مرة واتنين وتلاته وعشرة وم لاحظتي حتى التغيرات العلى جسمي بعد اول يوم إغتصاب ولا بعد تكرار الحاجه دي كذا مرة، م لاحظتي ابدا؟اقولً ليك كنتي وين ؟؟؟
كنتي لافه ي السموك امي م كنتي فاضيه ابداً، والبتقولي عليهو خالي دة مكافأتو كانت شنو بعد كل العملو دة؟ظبطتي ليهو شغل وإقامة وسفرتيهو السعوديه علشان هو م قصر ووقف وساعدك وساندك في تربيتنا ههههههه،
قلتِ لي خالي؟قلتِ لي تربيه؟قلتِ لي زعلانه علشان ماهر ضربني كف؟انا لو في زول ضربني كم كف من الاداني ليهم ماهر ديل م كنت لفيت مع راجل وانا شافعه كدة، لو عندي ام بتخاف علي وقعدت لي في ارض الله دي وعرفت تربيني وتقول لي دة صح ودة غلط زي بقيه البنات م كان لقيت زول استغلاني، لو عندي ام بتربي على القناعه قبل الوفرة م كانت نظرتي حتكون ماديه ولا كان في زول استغباني، م كنت حأكون بقيت ضحيه جمبات وصحبه بايظه وتعاطي وإدمان وأمور فارغه وانا في العمر دة، وعلى سيرة الإدمان انا م بديت اتعاطى من برة انا كنت باخد الحبوب والحاجات دي من دولاب ولدك خالد الكان بشتريها بالهبل وكل الوقت ببلع فيها مع اصحابو، واخوك برضو م كان مقصر لأنو كان ببلع وبتاجر فيها يعني لو م لقيتها في دولاب خالد بلقاها في شنطه اخوك وهو طبعاً غدوة لي خالد وخالد زاتو ضحيه اخوك لأنو هو م اتعاطى الا لما شاف اخوك الزي ابونا دة بتعاطى وانتي كنتي عارفه انو خالد بتعاطى وعارفه لغايه اللحظه انو بتعاطى وم خلاهو وبكل بساطه لما يقفلوه في قسم عشان متزفت شارب سجارة بتقولي لي عزو امشي طلعو وبس من غير م تحاولي تتكلمي معاهو حتى لا وكمان بتشجعيهو على الغلط بدل م تبطلي تصرفي عليهو قروش بتشجعيهو وبتوفري ليهو قروش وبتحرشيهو علشان يتحرمن على ماهر وياخد منو قروش على قدر م يقدر رغم انك عارفه القروش دي بتمشي وين وهو بعمل بيها شنو بالضبط، بالمختصر ي السموك امي في رحله الندم دي كلها والتحسر ب "ما كنت"انا م كنت حأكون إيليڤ الموجودة حالياً في الغرفه دي وعمرها 18 سنه الا كم شهر وإتعملت ليها عمليه إجهاض وقدامها واحدة سموها امها بتهددها و بتقول ليها انا بغطي على عمايلك، ولا كنت حأكون مريضه اكتئاب الانتحار م ظبط معاها و بتناقش النقاش العقيم دة في اللحظه دي، ايوة انا ضحيه بس انا ضحيه من بيتك ي السموك امي الموضوع الاسي انتي بتغطي عليهو وبتضربيني وبتعايريني بيهو دة بدأ من نص بيتك كان الادمان والتعاطي بدأ من ولدك، وكان التحرش والإغتصاب بدأ من اخوك لغايه م بقى علاقه كامله، انا م مشيت فتشته الحاجات دي برة من البدايه ابدا، ً بس انتِ م كنتِ فاضيه وم كنتِ ام كفايه عشان تفهمي معنى كلمه تربيه، وحقيقةً م كل واحدة ولدت مفروض تتسمى أُم ...
❖
شيراز لسه مختفيه دعواتكم ليها
...