الفصل الثاني عشر

والعبيد مواصل. يرقي. قاليهو. طبعا بعد داك ياجمال انا اتفاجأت شديد من القصة دي. وشاكلت

محمد اخوي. وقلت ليهو المراة دي غشتك. دي مراة كضابة ومجرمة. ولصقت فيك ود حرام عشان

تبقيهو عندو اهل.

محمد اخوي كان زول اخلاقو ملائكة. ما اشتغل بي كلامي .. بس قال لي لالا يا العبيد اخوي. انا

مصدقها. وانا بي رغبتي عايز الولد. واتزوجتها عن حب. وماندمان .. كدي خلاص ارح البيت .. وانا

طبعا زعلان زعل شيد وهو ولا هماهو يتبسم .. بعد داك مشيت معاهو البيت. وشتمتها ونبذتها لي

تاسع جدها .. باي نبذ يجيك في راسك. وهي طبعا تعجبك في حماقتها استعدت لي تب. بس محمد

قال ليها امنة ده العبيد اخوي الكبير .. اوعك تردي عليهو بي كلمة .. سكتت ساي لكن والله حريق

قلبها ظهر فوق وشيها .. ومن اليوم داك انا لابدورها لابتدورني ..

بعد داك قلت لي محمد نمشي .. البلد وهو ابا قلت ليهو عندك حق في واطات ابوك. قال بيعها

ورسل لي القروش .. وحصل اشتريتها منو براي .. ورسلتليهو القروش ..

بعد سنتين انا حصل لي حادث انقلب بينا لوري بالغرب وهو جا سكن في الحلة نهائي .. والسر بقى

مدسوس في قلوبنا نحن التلاتة ..

اها يا جمال ..

انا حكيت لك القصة دي عشان تعذرني .. وماتمشي تقول لناس الحلة طلبت بت عمي. وعمي ابا

يديني ليها ..

بعدين انت لازم تعرف هويتك. وتعرف نفسك جاي من وين .. ولازم تكون عارف انو امك دي لصقتك

فينا. ونحن ماعارفين اصلك .. ودي الحقيقة ياولدي وعمرو الحق مابنزعل منو ..

جمال .. طبعا سمع الكلام ده كلللو. ولمن اكتشف انو هو الطفل المقصود .. انهار من جواهو انهيار

فوق الحد المعقول ..

لي درجة انو ماعرف يعمل شنو .. بس في النهاية قرر جواهو يتصرف بي طريقة غريبة جدا ..

عاين لي عمو العبيد قووووي كدا في عيونو .. وقال ليهو .. جدا يا عمي يلا اسمعني. وللا تاني ما

اقول ليك عمي؟

قال ليهو لالا عادي قول ..

قال ليهو ياعمي .. انا بتك خليتها .. لانها مابتشبهني .. وانا خلاص عرفت اصلي وفصلي ..

بس لازم نعلن الخبر ده في الحلة .. ونوريهم انو انا مامعروف لي اصل

عشان الناس مايكونو مغشوشين زي انا ..

العبيد قال ليهو .. لالالا. اوعك .. انت عاهدتني من الاول انو الكلام ده يكون سر بينا ..

وانا حكيت لك على العهد والذمة ..

جمال قال ليهو غايتو بحاول امسك السر ان شاء الله ..

لكن انا بقول لك حاجة .. انت كان ممكن تقول لي ماعايز اديك بتي .. وخلاص. بدل تكشف سر ليهو

اكتر من 20 سنة. كان تخليني عايش مع اسرتي في سعادتي المغشوشة. لامن اعمارنا تنتهي

ونلتقي عند الله .. وعند الله تجتمع الخصوم .. انت لو قاصد تحطم نفسياتي .. وتدمر حياتي. انا

بوعدك انا ما ح اتدمر .. ولاحياتي حتتغير .. انا عشت عمري. جمال ود محمد. وبكمل الباقي من

عمري انا جمال ود محمد .. مادام ابوي محمد ارتضاني ولد ليهو لامن مات .. انا ما ممكن انكرو هو

ميت ..

فتك بي عافية ياعمي العبيد .. يا اخوي ابوي ..

جمال ركب عربيتو ومشى الشغل عادي. وكان الوكت اتاخر .. كان عندو قروش عند زول ..

مشى جاب قروشو وجا .. جاء المسا في البيت عادي بتونس مع امو كانه ماحصل حاجة. وبضحك

وبتونس .. بس في اثناء الونسة فجأة بسكت وبسرح .. وتاني ينتبه سريع ويواصل في ونستو ..

طبعا ياجماعة جمال عرف انو عمو العبيد مستحيل يديهو من بناتو .. وبرضو مستحيل يقبل بي اختو

ماجدة. عشان تكون زوجة لي يونس ولده ..

والحكاية دي مدمراهو دمار شديد لانو .. كان نفسو يربط اهله بي بعض لكن خلاص كل امل جواهو

في الفكرة اتلاشى للابد ..

ومرت الايام وهو بحاول ينسى كل القصة المشؤومة. الحكاها ليهو عمو ..

ومصر جواهو مايسأل امو عن اي حاجة. ولايجيب ليها سيرة عن الموضوع ..

بس بعد ايام بدت تساورو شكوك .. ربما تكون امي فعلا كذابة .. وربما تكون مشت للحرام بي محض

اراتها .. وربما كلام عمي العبيدد صاح ..

وربما انو ابوي محمد قبل امي بدون مايسال عن حقيقة قصتها. وصدقها لانو فعلا حباها .. وحبو ليها

حماهو يبحث عن الحقيقة .. خوف على حبو من الضياع ..

والوساوس دي بقت تراود جمال ..

بس في النهاية قال هب انو انا ذاتي اكتشفت انو امي كذابة. وقصتها الحكتها لي ابوي مفبركة ..

موقفي يكون بعدين شنو؟ بعد داك يعني اتخلى عنها وعن اخواتي الاتنين .. ولا اكون مواصل في

حياتي المخدوعة. و كاره امي الولدتني ..

مافي داعي للتفكير اصلا " في الموضوع ده .. ده موضوع المفروض مايهمني كتير .. كان الغلط من

امي .. ولامن يوسف القالوهو ده. في النهاية انا ماغلطت في حاجة ..

وفعلا جمال كان صنديد ومر من الامتحان بي كل رجولة وصلابة ..

والمحنة كانت اكبر من عمره. لكن الرجل كان رجل جد ..

بعد اسبوع من الموضوع ده. مشى زيارة تاني لي ناس عمو العصرية كدا لقاهو راقد في الديوان

القدامي ..

وسلم عليهو .. كيفك ياعمي العبيد .. ان شاء الله طيب ..

والله طولت منك. وقلت بس اجي اسأل عليك. وكيف ناس البيت ..

وبتاع عاااادي كانو ماحكا ليهو حكاية. وقاعد يتونس ويضحك مع ياسين .. وعمك العبيد مطير عيونو

يعاين ليهو .. مستغرب ..

قال لي ياسين قوم جيب ليك كباية شاي سادة لي جمال ...

ياسن وكت دخل جوة .. وقال جمال جا برة .. طوالي عاتكة سألتو وبقت تتراشق. اها جا لي شنو؟

وقال لي ابوي شنو؟ وابوي قال ليهو شنو؟ والونسة عن شنو.؟

ياسين قال ليها .. هوي عليك الله طيري كدي. ما ارشك كف هسي الوي ليك خشمك ده ..

في الوكت ده لامن ياسن كان قاعد جوة .. العبيد قال لي جمال .. شايفك عااادي. زي التكنو

مامصدق كلامي القلتو ليك ..

جمال قال ليهو لالا مصدقو تب ياعمي. لكن عاد انت دايرني اسوي شنو؟

انتحر ولا انكر امي واخواتي ؟؟؟ ده كلو مابسويهو .. والموضوع ده ياعمي لو سمحت تاني ماتفتحو

لي نهائي. لانك لو فتحتو لي مرة تانية. انا بنشرو ليك عند البسوى والمابسوى .. عمك العبيد قال

ليهو لالا .. اها هادي سكتة. والله تاني فوق خشمي ما اجيبو ..

مرت الايام وجمال جواهو جبال من الهم والحطام .. لكن الزول ده ما شغال بي اي شي .. ويضحك

ويتونس .. وتجارتو شغالة على قدم وساق .. وفتح منافذ تانية للتجارة ..

وبقى يجيب بضايع من الخرطوم. و في اليوم الواحد بقلب بيع وشراء .. لي اكتر من خمسة قطع كلها

من حر ماله ..

يوم جاء بالمساء. امو قالت ليهو ياسين جا هنا وقال عمك القشير تعبان .. اتغدى سريع وامش شوف

الحاصل عليهو شنو؟

قال ليها يا امي .. انا تاني مابقبل تقولي لي عمي العبيد. كلمة القشير دي .. في النهاية ده

عمي .. والعم في مقام الوالد ..

قالت لي ليهو العمي اليخليهو يكابس في الحيط .. شحدت ربي عليهو ..

عارف يا جمال عمك ده. لو لقى اي فرصة ينتقم مني مابفوتها ..

وياما حاول وحاول يفرق بيني وبين ابوك .. لكن الله غالب ..

بس هسي الواجب واجب. امش شوف الحاصل عليهو شنو ..

وبقت تطنطن .. هو ماسامعها .. لكن الطنطنة بتقول (ان شاء الله سرطان المخ يارب العالمين ..)

غايتو الناس ديل جنس كراهيتهم دي ما حصلت ..

وطبعا جمال عرف سبب الكراهية. وبقى ما بستغرب من اي كلام تقوله امه ..

اها غير هدومو وماشال لقمة. وطلع طوالي مشى على العم .. لقى عمو نفسو قايم. وعيونو

مورمات .. قال ليهو بسم الله ياعمي مالك فجأة كدي ..

قال ليهو والله يا جمال انا من بدري بجيني ضيق نفس بالليل. وبحس بي صدري تقيل. والهج بفتش

للهواء لامن اقوم افتح الشبابيك ..

لكن هسي الايام دي كتر على تب .. وماعرفتو ده من شنو الليلة قمت من الصباح .. بالحالة دي اخف

شوية وتاني اتضايق ,,

قال ليهو وين يونس ..؟ قال ليهو يونس ده سافر الدامر من امس ..

قال ليهو قوم سريع البس النوديك شندي نشوف الحاصل عليك شنو؟

قال ليهو النصبر ياجمال ننظر يونس يجي يمشي معانا ..

انت عندك مشاغل وتلقاك جاي هسي من شندي. وباكر تقوم بدري. طبعا الكلام ده بقول فيهو عمك

العبيد .. وهو مامقتنع بيهو بس ماداير تكون ايادي جمال سابقة فوقو .. وما داير يقبل جميل منو ..

بس جمال اصر عليهو .. وقال ليهو والله مابخليك بي حالتك دي دقيقة .. لامن يجي ياسين يجي لاحقنا

في شندي ..

ومشو الاتنين شندي بس هو وعمو وطول الطريق عمك العبيد تعبان تعب شديد خلاص. نفسو قايم

وعرقان لامن جلابيتو مبلولة ..

وجمال طاير طيران بالبوكسي يمرق من خور ويقع في خور.