الفصل السابع والعشرون

طبعا عبد الماجد مشى وهو بتكلم براهو .. (نشوف كلامك ده يا جمال حدو وين ؟)

طبعا جمال بالطريقة الانا شايفها دي .. ورط روحو في حاجة هو في غنى عنها .. وكان عندو خيارات

متعددة .. المفروض يختار منها .. ..

ممكن كان يقول ليهو .. انا بعرس ليها اي زول .. او عندي صاحبي .. او اخوي ود عمي .. او اي

انسان ينقذ سمعة البت .. لكن انا ذاتي. ماعارف في راسو في شنو؟

المهم .. الحاجة المحيراني في الموضوع انو .. نهاد مواصلة دراستها

. يعني ابوها مادام شاكي في سلوكياتها .. وما مطمئن عليها .. كان يطلعها من المدرسة ويسوقها

البيت .. ده الشي المنطقى لي تصرف اي زول من البلد ديك ..

المهم .. جمال طلع من محلو داك .. ومشى البقالة وسأل من بيت ناس معز .. وصفوهو ليهو ..

ومشى دق الباب على طول .. وسأل منو قالو ليه مافي.

قال ليهم قولي ليهو .. جمال خال نهاد جاك هنا. وقال ليك تصلو في المحل. لكن لغاية نهاية اليوم

معز ماجاهو .. وقال اديهو فرصة لي بكرة ..

وجمال وكت رجع الحلة ماجاب السيرة دي لاي انسان .. لا أمو ولا أختو .. وطبعا يونس

مافيش .. سافر الخرطوم شهر العسل ..

وجمال ما مهتم بي موضوع نهاد بس فرحان بي ناس جدو وكل يومين تلاتة يضبح .. ويعزم الناس ,,

اها في واحد شغال في المحل الفي المنطقة الصناعية .. اسمو الغيتوني .. الصباح كان قاعد خالف

كراعو ..

جاتو نهاد بتسأل من جمال ..

قال ليها والله جمال ده ماجا .. لكن بمر علي هنا زي الساعة 2 ده حاجة اكيدة ..

قالت ليهو .. كويس انا بجيهو بعدين .. قال ليها والله مابتمشي الا تشربي حاجة .. الغيتوني شكلو

عندو راي .. يعني هو اصلا مازول عزيمة .. الرشاقة ليهو شنو؟

المهم قالت ليهو مافي داعي تحلف .. خلاص جيب اي حاجة انا مستعجلة ..

جاب ليها البارد وقال ليها .. طبعا سمعتي بي جمال عرسو قرب ..

قالت ليهو لا والله ماسمعت بيهو .. قال ليها والله طبعا هو داير بت عمو ..

قالت ليهو عليك الله.؟

والله ربنا يتم ليهو على خير .. وشربت وطلعت طوالي. طبعا الغيتوني قايلها عندها علاقة بي

جمال .. داير يزحلقو وكدا هه

المهم وكت جا جمال. الغيتوني كلمو .. قال ليهو البت الاسمها نهاد جاتك هنا وقالت بتجي الساعة 2

جمال قال ليهو والله انا الليلة المفروض اطلع بدري .. لكن بنتظرها ..

وفعلا جات .. جمال سلم عليها وختا ليها الكرسي .. وقال للغيتوني اقعد بره في الضل داك ..

قال ليها يانهاد .. انتي مش عاهدتيني تاني ماتلاقي معز .. وتخلي بالك في دراستك؟ وووعدتيني

وانا الاهبل صدقت وعودك ..

قالت ليهو والله ياجمال اسفة شديد .. والله غلبني .. انا معز كان تميت اسبوع ماشفتو .. ولابقدر اكل

ولابقدر اشرب. ولابقدر اقرا .. يعني دايرني اعمل شنو ..؟ انت مابشر؟ مابتعرف الاحساس؟ ..

بعدين ده شنو الكلام القلتو لي ابوي ده .. انت عارف اني انا بحب معز .. تجي تقول لي ابوي انا

عايز بتك؟

انت موش خاطب بت عمك؟ وعرسك على وشك؟

قال ليها اولا انا ماقلت لي ابوك كدا .. هو قال لي البت سمعتها بقت على المحك .. بي سبب

الولد .. والولد مو جاهز ولادايرها ...

يعني انا دايراني اقول ليهو شنو؟

قالت ليهو .. منو القال معز مو دايرني؟ .. معز هسي عيان .. بي سبب كلام ابوي .. لانو ابوي قال

ليهو انا بتي مابديها زول مابعرفو ..

بعدين معز جاهز من السنة الفاتت .. وهو ماشاء الله .. بي قروشو وبي املاكه .. بس ابوي شكله مو

دايرو كلو كلو .. في حاجة مغيرة ليهو رايو .. والاربعة وعشرين ساعة بتكلم لي عنك انت ...

يعني انا كنت مفتكرة انك انت غسلت مخو .. وداير تحرمني من معز ..

بس الشي الانا فهمتو .. انو ابوي شايفك انت الراجل الوحيد في الدنيا دي .. انت جيتني من وين

ياجمال؟ ..

كنت بتمنى تقول لي ابوي انا ماعايزها .. لكن براهو رماك في الشرك ..

جمال قال ليها لسع انا مامقتنع من كلامك عن معز .. لازم اسمع منو عشان اتأكد ان دايرك بالجد ..

مايقوم يخليك في بيتك ويطلع تاني مايجي ..

اوعك تخالفي ابوك .. اوعي تتزوجي بغير رضا ابوك .. اوعك تتزوجي ليك زول زعلان من اهلك ..

طبعا بتكلم معاها عن تجربة شخصية حصلت عليهو في حياتو ..

المهم انا بعمل كل الفي وسعي مادام الموضوع كدا .. بوعدك اني اتصرف ..

قالت ليهو عليك الله بي سرعة ياجمال .. انا باقي لي فترة بسيطة .. وخلاص تاني شندي مابشوفا بي

عيني ..

امشي ياجمال هسي طوالي لي معز .. في البيت بتلقاهو قاعد ده وكتو البكون قاعد فيهو .. اتأكد

منو .. وعليك الله تقنع لي ابوي باي طريقة .. ومايعرف اني انا جيتك او لاقيتك ..

انا بالجد مادايرة زول غير معز .. لا انت ولاغيرك .. يا اما معز يا الموت ..

قال ليها خلاص انا من دربي ده وطالع على معز ..

هي فاتت .. جمال عاين ليها كدا وقال براهو .. هو انتي الدايرك منو؟ انتي بتشبهي عاتكة؟؟ والله

خمسين زيك مايساون عاتكة .. عان عليك الفرحانة دي .. هه ..

طوالي طلع مشى على معز .. ودق الباب معز جاهو طالع .. معز

سلم على جمال سلام فاتر جدا .. وصاري وشو كدا ..

قال ليهو يا معز مالك في حاجة مزعلاك مني؟ ..

معز قال ليهو بالمناسبة انت انسان كلك غلط .. وعندك تصرفات غير مدروسة .. اول مشكلة عملتها

لينا لمن قلت لناس المدرسة انك خالها

وهسي قلت انك دايرها .. انت بالضبط قاصد شنو يا استاذ؟

معز. شغال في ادارة الكهربا تقريبا .. الزول ده وضعو كويس شديد وعندو بيت .. بس عبد الماجد

ده شكلو .. جنو بقى جمال .. ودايرو يبقى نسيبو باي طريقة ..

جمال قال ليهو اطمنك بي حاجة .. نهاد لو بقت اخر بت في الدنيا مادام انت متمسك بيها انا

مابتزوجها ..

قال ليهو متمسك بيها؟؟؟ هههه دي روحي وانفاسي .. لو ربنا قسمها لاي زول غيري .. ما حيلقى

فيها غير جسد خالي من الروح .. وانا غيرا ما بتزوج لامن اموت ..

قال ليهو هو انتو شنو الموت الشغالين فيهو ده؟ انت وهي. ماعندكم كلام غير الكلام الشين ده ..

خلاص يامعز .. انت ساعدني. وانا كان ماعرسها ليك يبقى ما اسمي جمال ..

قال ليهو نشوف.

جمال سكت مسافة وقال ليهو بس انت هسي خليك بعيد بعيد .. وشوفني بسوي شنو؟ ..

طبعا هنا جمال اتاكد انو عبد الماجد عايزو .. باي طريقة والبت ماعندها مشكلة سمعة ولاغيرو ..

جمال تاني يوم طوالي رسل لي عبد الماجد .. وعبد الماجد جاهو اتلاقو الاتنين .. في محل

ابوحميد .. وسلم عليهو بي كل حفاوة وطيبة .. وقال ليهو عندي ليك كلام يفرحك شديد ... ارح اركب

معاي عندنا مشوار كدي وجايين ..

عبد الماجد ركب معاهو .. قال ليهو ياعبد الماجد انا على عهدي معاك .. وبتك بالنسبة لي شرف ..

بس في حاجة حاصلة في حياتي انت لازم تعرفها ..

انا الناس العايش معاهم ديل .. الشفتهم ديل ما أهلي .. انا امي ما جعلية وابوي ماجعلي .. والعبيد

ده ماعمي .. ومحمد المنسوب ليهو ده ما ابوي .. انا من البني عامر من جيهة ابوي .. وامي من

القبيلة الفلانية.

والزول الرباني محمد لامن مات قايلني .. (لقيط) .. لانو لقاني لقيط في قهوة في الشارع .. اخيرا

اكتشفت انو ابوي من البني عامر واتوفى .. وامي كانت متزوجاهو .. ولا يومي ويومك ده

ماكلمتني .. وماعارف اهل ابوي وين ... والمعلومات دي لازم بتك تعرفها وامها واعمامها واهلها ..

عبد الماجد طير عيونو وبقى يعاين لي جمال .. قال ليهو كدي وقف العربية دي .. وفهمني الكلام ده

كويس ..

جمال قال ليهو انت صاحبي ومابدس عليك هاك شوف بطاقتي الجديدة .. شالها عاين ليها كدا .. لقى

الاسم جمال يوسف صالح .. .. عبدالماجد بقى يبلع في ريقو. وجمال بدا يحكي ليهو بالتفصيل ..

بعد خلص قال ليهو ..

عبدالماجد بقى ساكت مدنقر ومبهوت ..

جمال بعاين ليهو ومن جواهو مبسوووط. قال ليهو بالمناسبة يا عبد الماجد انا مشيت لي معز ..

وقال لي انا نهاد مابتزوج غيرا .. وقال جاهز من السنة الفاتت .. انت رايك شنو؟ انا من راي

ماتبقى حجر عثرة ليهم ..

عبد الماجد قال ليهو .. خلاص مافي مشكلة .. مادام رايك كدي كلامك يمشي .. انت كان ناسبتني ولا

ماناسبتني .. في النهاية اخوي وصاحبي ..

جمال ابتسم بسمة صفراء خبيثة .. وقال ليهو فعلا " فعلا "

عبد الماجد قال ليهو رجعني ياجمال .. انا وكتي راح .. وكان لاقيت معز ولاسجم ده .. خليهو يبطل

الشرشحة البسوي فيها مع البت دي .. ويجيب اهلو ويجيني .. هع هع ..

جمال مشى نزلو وجا راجع لي معز في البيت .. وبشرو وقال ليهو خلاص اقنعت ليك عبدالماجد ..

ووافق تب وبي مباركة .. جهز نفسك وسوق اهلك وامشي ليه ..

معز ده بقى يعاين لي جمال .. مخلوع لامن دمع .. وقال ليهو عليك الله بالجد ؟؟ قال ليهو والله

مابحكي ليك الا الحاصل .. معز مسك جمال قال ليهو والله انت اصيل .. انا كنت ظالمك والله ..

جمال قال ليهو ربنا يوفقك يامعز وودعو وفات ..

جمال مشى الحلة .. مبسوط بسط ماعادي .. طول الشارع ينوني ..

وكت وصل هناك .. لقى الحلة دي مقلوبة فوق تحت .. وناس ماشة وناس جاية .. يالطيف يالطيف في

شنو؟

الظاهر في حاجة حاصلة في بيتنا .. ولمن دخل شارع البيت .. فعلا عاين للناس داخلين ومارقين

من بيتهم .. ربك يستر