الفصل التاسع عشر

يونس ركب مع جمال وماشين الحلة. وبتكلمو. قال ليهو يا يونس يا اخوي نهاد دي طالبة هنا.

ووالدها صديق عزيز علي. وخلاها لي امانة. ومن اليوم الشفتها فيهو مع ابوها .. تاني مالاقيتها ..

بعدين يا اخوي ايوه هي جميلة واي حاجة .. لكن الجمال ده ماكل شي .. يعني انا مابعرف عنها اي

حاجة .. انا مابقع في واحدة الا اكون بعرف عنها من هي طفلة .. قول ربنا يقسم لنا الخير .. قال

ليهو اها يا استاذ اوع يكون غيرت رايك من عتوك عود الشوك ؟؟ يونس يقصد عاتكة اخته ..

جمال قال ليهو هوي .. دي عمة الرسول .. على الاقل احترم الاسم .. يونس. اكبر من جمال بي

شوية. وياسين اصغر.

قال ليهو نهاد دي زولة جميلة. يايونس. في الصورة .. وده شي متفق عليهو .. بس ياربي روحها تكون

كيف .. ده الموضوع الاساسي .. انا غايتو ده فهمي في بنات حواء .. يونس قال ليهو كلامك صاح.

بتتذكر عبدالمنعم ياجمال؟ جمال قاليهو .. عبدالمنعم الجقر؟ ولامنو؟

قال ليهو بس ياهو .. عارف يا جمال عبدالمنعم ده اتزوج ليهو مراة اية في الجمال .. ماقدر يعيش

معاها شهرين .. طلقها. انا لاقيتو سألته مالك يازول بطلق المراة الزي القمرة دي؟

قال لي اعوذ بالله منها دي ياح .. ماتذكرني ليها. دي اسوء بشر على وجه الارض. ندمت على اني

سألته .. والله الزول ده انفعل انفعال وفتح كلو كلو ابا يسكت ..

جمال قال ليهو. عشان كدا انا مستحيل انحشر لي في علاقة مع واحدة مالم اعرف عن تربيتها

واخلاقها .. وانا حاسي انو نهاد دي وراها سر كبير .. كدي صباحات الله بي خيرا .. وباكر بمشي

المدرسة اشوف الحاصل ..

المهم وصلو الحلة. وجمال وعد يونس .. قال ليهو بعدين بالليل انا بجي لي عمي واتكلم معاهو في

موضوعك .. بس انت خارج لي ياسين .. وخلونا برانا .. انا بعرف اتكلم معاهو بي ياتو طريقة ..

اها وكت جا جمال بالليل لي عمو .. لقاهو ماكويس .. محموم ولاشنو ماعارف .. ومما شاف جمال

بقى يشكي .. انا والله ياجمال ماكويس .. انا خلاص اظني ايامي في الدنيا بقت معدودة.

جمال جا قعد جمبو فوق العنقريب .. ولمس جسمو كدا لقاهو مسخن. قال ليهو خفيفة ياحاج. اشرب

لك ليمون .. واتمسح .. وان شاء الله باكر تكون كويس .. اذا ما بقيت أخير .. انا بوديك شندي طوالي

نفحص ..

العبيد قال ليهو اها. انت خبرك شنو؟ شايف يونس الصباح طلع معاك؟

قال ليهو ياعمي انا طالب منك طلب .. وماتردني .. طبعا يونس بقى راجل رافع راسو. واتعرف على

جماعة كرماء .. واهل بلد من الدامر .. وطلب بتهم وادوها ليهو .. وهو بس منتظر موافقتك.

وكان عندك لي خاطر .. ماتقيف في طريقو .. والشي العرفتو انو هو وماجدة ماهم متفقين ..

العبيد بي كل سهوله قال ليهو خير يازول البتشوفوهو .. انا ذاتي تاني ماني قاعد ليكم .. احسن

ارحل بي صمة خشمي ..

قال ليهو يا عمي الله يبارك في ايامك .. ماتقول كدي .. نحن دايرنك تفرح بي اولادك ..

قال ليهو كويس ياجمال .. انا قلت ليك ماعندي مانع .. لكن انا داير اسالك سؤال .. يونس دا داير

يعرس بي قملو؟

قال ليهو مالو يونس ..؟ محتاج ليهو لي راجل؟. نحمد الله بي حقنا .. انا يونس كان قبل بشغلو

معاي .. عندي ليهو كم حاجة .. وحقي حقو .. بس انا خايفو يرفض ..

العبيد قال ليهو خلاص ياخوي .. انا بوافق بي شرطي ده .. كان وافق يقيف معاك ويساعدك انا

معاهو .. وان رفض انا رافض ..

جمال قال ليهو لالا ياعمي .. ماتضيقها كدي الله يرضى عليك .. نحن نقول وافقتا وخلاص ..

عمك العبيد قال ليهو .. وتلقى ماجدة ذاتها ابتو عشان مصايبو وجرايمو دي .. والله مابستاهلها

الكلب ..

المهم جمال طلع من عمو .. بعد اخد منو الموافقة ..

طلع لقى يونس قاعد برة بتصنط في الكلام .. يونس قال ليهو ابوي طول عمرو حقار ومستكبر ..

شايفو بتكلم عني كيف؟

جمال قال ليهو ده كبيرنا يايونس .. ويتكلم زي مو داير .. نحن بس علينا نرضيهو باي طريقة .. دي

الاصول يامعلم ..

المهم انت موضوعك سلك .. بعد كدي انا محتاج لك تشتغل معاي .. وتكسب ليك قرشين تلاتة بي

شغلك .. تأسس بيهن بيتك .. وخلي ياسين في الحواشة. اصلو بعرف ليها اكتر مننا ..

يونس قال ليهو فيها خير ان شاء الله .. حتى ولو فترة مؤقتة بشتغل معاك .. خير .. خير ان شاء الله

واتفرقو ..

جمال مشى البيت .. وهو مبسوط من الانجاز القام بيهو .. لكن جواهو في نقطة سودا .. كل ما

يتذكرها قلبو يفر من مكانو ..

عيوني من الدموع شالن قدر ما احتملن

ليالي الكون سواد بي الهم جميع اشتملن.

كل ما اعصابي بي سلك الهواجس رملن.

معزة نفسي ما بنساها مهما عملن ..

وتاني برضو يشل نفسو ويقول .. وانا مالي؟ انا ماعملت حاجة غلط ..

الساعة كانت تسعة مساء .. قام من برة جا كايس لي اختو ماجدة .. ةقعد جمبها براهم الاتنين ..

قاليها ياماجدة تاني اصلك ماسألتيني من ابوحميد .. قالت ليهو والله كل ما ادور اسألك بخجل .. انت

براك المفروض تعرف ..

قال ليها كل حاجة ماشة تمام .. وان شاء الله عما قريب تكوني عروس وانا اكون خال كمان ..

باكر من الصباح جمال مشى شندي .. واول مشوار اخدو .. لي مدرسة نهاد ..

ومشى قابل الاساتذة. وسلم .. وقال ليهم انا خال الطالبة نهاد عبد الماجد .. طوالي رسلو ليها

جات ... وسلمت عليهو .. وساقها كدا على حوش المدرسة .. قال ليها البارح قالو جيتيني هناك ..

قالت ليهو ايوة .. طبعا ياجمال انت المرة الفاتت ما ٍسألت ابوي انا مشكلتي شنو؟

وهسي مشكلتي شكلها اتطورت شديد .. وماعايزة ابوي يعرف حاجة من الموضوع ده .. لانو الدور

الفات مرقت منها بي اعجوبة لكن المرة دي شكلي خلاص حاروح فيها ..

قال ليها اهدي يا نهاد .. احكي لي برواقة .. وانا بساعدك ان شاء الله ..

قالت ليهو تعال دقيقة هنا مافي زول يسمعنا .. وقعدت تحكي ليهو بيديها وعيونها .. ماعارفها بتقول

ليهو في شنو .. المهم الكلام كتير شديد ..

بعد شوية هو صرا وشيهو .. وبقى يعاين ليها من راسها لي كرعيها ..

وبدا يتكلم معاها كلام شكلو حار .. لانو منفعل .. وبتكلم معاها بي كل اعصابو .. وفي النهاية فات

مشى على المزيرة .. واتكل بيديهو كدا على الحمالة .. بتاعة الازيار وبهز في راسو .. وشال الكوز

شرب جغمة موية .. وفات خلاها واقفة في محلها ..

جات محصلاهو .. قالت ليهو والله ياجمال انا بريئة .. والله بريئة .. قال ليها انا ساسا " ما متهمك ..

لكن انتي براك بيجيبي الكلام لي روحك .. انتي مرسلنك تقري ولا لي الحال ده ..

قالت ليهو عليك الله .. تعمل حاجة ..

قال ليها اول حاجة تعاهديني ... قالت ليهو والله بعاهدك ..

طوالي فات من جمبها .. ومشى على المكتب اتكلم مع المدير كلام كتير .. وفي استاذتين جن

واتناقشن معاهو بانفعاليه .. وهو كان هادي وشكلو زي البعتذر عن حاجة عاملاها نهاد ..

في النهاية غايتو قدر امتص الموقف بعد تعب .. ومشى .. وشكلها المشكلة اتحلت ..

بس ياترى الحاصل شنو؟ ..

المهم جمال ماحاول يعيد الفكرة كتير في راسو .. ولا اهتم بالقصة اكتر من انفعالو بيها في وقتها ..

ومرت الايام ..

وابوحميد لاقى جمال كم مرة في الفترة دي .. واتفقوعلى يوم يجو يخطبو رسمي ..

وقبل مايجو ديل اهل احمد هنا .. جمال سافر ومعاهو كم نفر والتاية وكم مرة برضو .. مشو الدامر

طلبو لي يونس ..

بس يونس قال بتأخر في العرس .. لامن يوهط كرعيهو في الواطة دي .. وبعد داك يخطو .. يعني

الخطوبة كانت حجز وكدا ..

وابوحميد بعدو بي اسبوع جاب اهلو وجا .. خطب ماجدة .. والعبيد باركها ليهم .. واصلا بعرفهم كلهم

الناس ديل ..

بعد شهر ...

اها في غضون الشهرده جمال جهز كل مايلزم لي زوج اختو .. لي احمد ود السيال .. وماجدة

اتزوجت الانسان الراغب فيها .. وراغبة فيهو .. وبي مباركة عادية من العبيد .. والعبيد من يومو

الباع الواطة .. خاشي في حالة نفسية .. وحالتو اصلا مابتعجب ..

ماجدة طبعا " رحلت السيال .. والكلام ده كان في .. شهر تمانية 93. ومن الوكت ..

وطبعا زي ماحكيت ليكم .. كلام العبيد وقصتو عن جمال .. كانت مسببة لي جمال. هاجس كبير في

حياتو .. بالرغم من انو مافي زول عارف عنو اي حاجة .. والعبيد مستحيل يتكلم بيهو .. وجمال

طبعا " مصدق عمو في اي كلمة قالها ليهو ..

بس في حاجة حايصة لي جمال في راسو .. مشككاهو في كلام العبيد .. و القصة القالها ليهو ..

طبعا العبيد كان قال ليهو ابوك جا من مدني عشان انا حصل لي حادث. وانقلب بينا لوري في

الغرب ..

وحاج الطاهر قال ليهو ابوك جاء عشان عمك العبيد ضربتو الكوليرا .. فالاختلاف في القصتين ..

مسبب لي جمال دوشة غريبة.