الفصل الثامن عشر

جمال طلع طوالي ولاشاف دموع عمو .. وكان منزعج من حكاية بيع الواطة .. لانو عارف انها دي راس

مال عمو الوحيد .. وهي مصدر عزتو بين الناس .. لو باعها الوطة .. وبقى عديم .. الناس ذاتها تاني

مابتحترمو ولابتخت ليهو قيمة ..

وللاسف نحن في مجتمع يقيم الناس بالمادة .. الزول الجاهل المغفل .. كان عندو قروش .. الناس

تحترمو وتسمع رايو .. والزول المفلس .. كان بقى علامة. وعبقري في الذكاء .. الناس يقولو ليك

ياخي بالله هه .. انسانا منو المقطع ده ..

باكر صبحت واطات الله .. وجمال جاء بدري شرب الشاي مع ناس عمو ..

وبعد الفطور بشوية جاء جعفر ومعاهو ود اب قرن. راكب بوكسي موديل السنة .. يلمع زي صحن

الصيني .. ولابس جلابيه جناح ام جكو .. الكم بتاعها يلبس ليهو شافع في سنة سادس .. ولابس ليهو

عمة كدا منفوشة فوق راسو .. وقصير وليهو كريشة. جمال عاين ليهو كدا من جوة البيت .. ومرق

ليهم برة .. رحب بيهم .. وياسين معاهو .. والعبيد راقد جوة في الديوان ..

سلام مرحب وكدا ..

جمال قال لي ياسين. ياسين اتناول الفطور .. ود اب قرن قال والله سبقناكم .. نحن فطرنا في

شندي .. كنا جيعانين وضربنا سمك جد .. انا وجعفر وركبنا جينا ..

العبيد قال لي ياسين امشي يا ياسين معاهو .. وريهو الواطة وتعالو ..

وطلعو التلاتة معاهم جعفر .. وجمال قاعد مع عمو .. شوية كدا شافوها وجو.

ود اب قرن .. قال ليهو يا حاج العبيد الواطة دي في ست مليون .. ما أكتر من كدي ..

جمال قال ليهو لو سمحت ياعمي خليني اتكلم .. اسمع يا ود اب قرن .. نحن عشان نبقى ناس

عمليين .. الواطة دي بي تسعة .. وما بتنقص قرش لو نقصت ما دايرين نبيع .. والله يا ود العم

ماعندنا وكت لي حكاية جرجرة ونقيص وزيادة بس ده السعر ..

جفعر قال لي جمال. عمك البارح قال تمانية ونص ..

جمال قال ليهو انا دفعت 9 .. وهو لو دفع 9 بتنازل ليهو ..

ود اب قرن قال يفتح الله .. انا مابتنفع معاي بي .. 9

جمال قال لي عمو انا ياعمي اشتريت بي 9 ..

عمك قال ليهو مبروك .. ود اب قرن قال. يلا سلام عليكم فتكم بي عافية .. وحلفو عليهو يشرب

الشاي شرب الشاي ومرق.

جمال اتبسط بسط عجيب .. وحتى اسارير الفرحة ظهرت فوق وشو .. لانو كان متوقع اب قرن يقوم

يزايد .. جمال قال لي جعفر ياجعفر سألتك بالله .. مادايرين زول من ناس الحلة يعرف الواطة عمي

باعها.

قال ليهو والله خشمي وعندي ..

طوالي عمك العبيد دخل جوة جاب ورق الواطة من جوة .. وسلمو لي جمال .. قال ليهو امشو

المحامي انت وياسين .. وجيبو لي الورقة بعدين امضي فوقها ..

جمال من ضمن الاملاك عندو بيتين جم بعض في ال 14 باعن الاتنين بي خراب القروش .. وجاب

القروش والاوراق لي عمو. وعمو مضى والواطة بقت حقت جمال وانتهينا ..

تاني يوم جمال سافر الدامر .. وسلم المحكمة القروش على داير المليم و جاب يونس وجا ... وعملو

الكرامة والفرحة عمت البلد .. ويونس لاهسع ماعارف انو القروش قروش الواطة .. والواطة اشتراها

جمال ..

لانو وكت جمال كان في الدامر .. ويونس سألو من وين القروش .. قال ليهو من ابوك ... امشي

أسالو جابها من وين .. نحن مرسلين بس ..

اها طبعا الخبر اتسرب وتقريبا من جعفر .. انو العبيد باع واطاتو لي جمال عشان يحل ولدو ..

والناس كلها عرفت .. بس يونس لسع. وبالتاكيد الخبر وصل امنة بت خالد ..

يوم نادت جمال وقعدتو .. قالت ليهو .. وقالت ليهو خلاص بالك ارتاح .. وكت مرقت ود عمك من

السجن .. وشايفاك فرحان .. بس انت ماجايب خبر بي فرحتي انا .. كان تكلمني بي عمايلك دي ..

عشان انا افرح معاك ..

قال ليها والله يا امي خايفك ماترضي .. قالت ليهو بعد رجعت حقك انا تاني بطني مافيها وجعة ..

سبحان الله .. مابضيع حق زول .. انت ماعارف عمك ده عمل شنو .. وظلمكم وظلم ابوكم قدر كيف ..

وانا طول عمري ماكلمتك .. ما دايراك تشيل حقد جواك .. وابزك ذاتو اخد مني عهد ما أكلمك ..

لكن ربنا عادل .. والحمد لله مابضيع حق زول .. طوالي جمال اتذكر كلام حاج الطاهر ..

قال ليها خلاص يمة .. انسي المواضيع دي انتي هسي صحتك كيف؟ ..

هو قاعد يتكلم معاها كدي .. وماجدة ونجوى جوة يتناقرن في المطبخ.

الباب دقه. جمال مشى يفتح الباب .. لقاها دي عاتكة .. طبعا هي بقت تجي كتير لكن هو اول مرة

يصادفها ..

وكت شافتو في وشها اتخلعت لامن كانت دايرة تقع على قفاها .. هو طوالي زحا ليها من الدرب ..

وقال ليها حباب عاتكة خالة الرسول ..

قالت ليهو هوي هه .. عمة الرسول. انت مطوفش ساي .. ماسمعت بي عاتكة بنت عبدالمطلب؟

قال ليها خير خير منكم نستفيد .. لابسة ليها طرحة .. غطت بيها خشمها وقعدت تضحك .. وهي داخلة

بي سرعة ..

اول من قابلت امنة .. امنة قالت ليها حبابك ياعتوكة. ده مالو قال لك شنو؟ قالت ليها ده مسطول

ساي .. هههه .. امنة قالت لها .. امشي امشي من الصباح ماجدة تسأل منك ..

غايتو انا شايف عاتكة ماشة كويس في تقوية العلاقات .. ومامعروف الحكاية دي تنجح ولالا ..

بالنسبة لي يونس الخبر هبش اضانو .. انو القروش قروش الواطة واشتراها جمال كلمتو امو ..

يونس قال ليها جمال ما اشترى الواطة بس .. جمال اشترى ابوي معاها .. ابوي بقى ماعندو كلام

غير جمال .. كرهنا ذاتو .. جمال جا. ز جمال راح .. جمال وينو؟ جمال طلع نور .. ياخي والله قدا

اضانا ذاتو ..

قالت ليهو جمال ود عمك وقلبو عليكم ياولدي .. دي شنو الكراهية دي .. نحن هسي راجين لامتين تجي

وتطلب يد بت عمك .. وتبقو نسابة .. والله انا جمال ده شدة مابريدو التقول جنا حشاي ..

ام يونس .. التاية بت حاج عمر .. مراة فاضلة واخلاقها عالية جدا وحنينة .. التقول بالله العبيد مو

راجلها ..

اها يونس قال ليها كدي النشوف ريدتكم لي جمال دي حدها وين؟

انتظر يومين .. يلاقي جمال عندو معاهو كلام مهم قال ...

طبعا جمال كل يومين تلاتة الصباح .. بجي غاشي عمو .. يصبح عليهو .. و يشوف صحتو حتى يمشي

شندي .. لكن ماحصل يوم لاقى يونس امكن قريب اسبوع من يوم الكرامة ..

اها جمال يوم جا الصباح كالمعتاد .. لقاهم الاتنين قاعدين مع ابوهم يونس وياسين. قام سأل ياسين

قال ليهو ليه مامشيت الزراعة؟ .. قال ليهو والله ابوي ماقال لي ... قال ليهو اسمع ياسين واسمع

ياعمي .. الحواشة دي حقتكم .. امشي اشتغل بي راحتك .. وتابع الزراعة .. واكسب عادي واحصد

وجيب .. انا هسي مامحتاج ليها في حاجة .. ولافاضي ليها .. يعني تتصرف زي كانها حواشتك ... بي

كامل راحتك وحريتك .. يعني شنو لو مسجلة في اسمي ولا في اسم عمي .. ياناس ما تبقو واعين

شوية .. ياناس نحن لحم ودم .. وفجأة كدا عاين لي عمو وسكت ودنقر ..

تاني انتبه .. عشان الاولاد مايلاحظو حاجة .. قال ليهو اسمع ياسين .. امشي هسي جيب قش للبهايم

ديل ..

وتاني ماداير اشوفك بدون شغل .. وانا بره من المواضيع دي ..

والعبيد ساكت ساي يعاين بي عيونو ..

ويونس مدنقر في الواطة .. قرب يدخل تحت العنقريب .. من الخجلة ..

وقام طلع طوالي ..

جمال ودع عمو ولحق يونس .. قال ليهو يونس تعال اركب معاي .. ارح معاي شندي .. محتاج ليك

شديد ..

في الشارع يتونس معاهو .. قال ليهو ياجمال انا طالب منك خدمة ..

انا طبعا زمان كنت داير ماجدة .. لكن ابوي قال لي السما قريب .. وفي الفترة الفاتت دي اتعرفت

لي بي جماعة من الدامر .. وطلبت بنتهم .. واديتهم وعد وكلمة .. اول ما مشاكلي تتحل بجيهم. حتي

لو ابوي وافق ولا ماوافق انا الموضوع ده تاني مابتراجع منو .. وانا شايف ابوي بقى يعمل ليك الف

حساب .. وبسمع كلامك .. دايرك تكلمو لي .. رايك شنو؟ ..

قال ليهو .. ماتشيل هم ده موضوع بسيط .. أنا بكلمو بس قول ان شاء الله ما يعصلج .. قال ليهو

بس انت ياجمال كلمو .. لو عصلج وحات الله تاني البلد دي الا يشوفوني في الحلم ..

جمال بقى يتكلم في سرو .. قال سبحان الله .. فعلا .. " لو صبر القاتل لمات المقتول .. المواضيع

براها بدت تتحلحل .. يعني انا قلت بس املاها صبر .. وربنا بحلها .. وأهو بدت الامور تفرج على

ماجدة وابوحميد .. ربنا كريم ..

لكن برضو جمال شايل هم من المشكلة الممكن تحصل من العبيد ..

لانو العبيد المكاجرة دي. محضر فيها دكتوراة .. وبجيبها ليك زط في محلها ..

اها يازول وصلو شندي هناك .. وخلا يونس قاعد في دكان الاسبيرات الفي المنطقة. ومشى يتابع في

الاعمال المتفرقة .. غايتو جمال ده انا قلت التسعة مليون دي .. تكون فلست بيهو .. وعملت ليهو

شلل اقتصادي .. لكن ماشاء الله .. ولا كأنو اثرت عليهو في حاجة .. ياخي ده قالو الشهر

الفات .. اشترى عمارة من كم طابق .. في شارع المعونة قصاد شمبات. وفي كلام تحت تحت .. قالو

جمال ده شريك في شركة مواد عذائية معروفة .. يعني الزول ده في سنتين ونص .. بقى حكاية. ليها

راس وقعر .. غايتو الزول يقول الله قادر على كل شي ..

المهم يازول .. وكت جمال جا راجع المنطقة زي الساعة 2 كدا. يونس قاعد في ضل .. وخاتي قدامو

جبنة .. قال ليهو اسمع ياجمال .. والله جات واحدة هنا تسأل منك .. اللهم صلى على النبي .. ياخي

دي خلت الحتة دي كلها مقهية .. قالت دايرة جمال. اسمها على ما اعتقد نهاد .. لابسة لبس

الثانوي. قال ليهو ايوة بعرفها .. جات زي الساعة كم؟ قال ليها قبل ساعة تقريبا ..

جمال قال ليهو بس هسي بتكون مشت البيت .. بكرة بمشي ليها عديل في المدرسة .. دي بت

صاحبي وامانة في رقبتي .. اوعك تفوت حدودك .. برجعك السجن تاني ههههه ..

قال ليهو لالا يا جمال حاجة تبعك انت .. نحن مابنطولها ..

جمال قال ليهو ابدا والله .. مافي اي شي من الفي راسك .. دي زاتها جمال مابفكر فيها ..

ولاقدرها .. ولاحصل فكرت مجرد تفكير ..

يونس قال ليه. والله انت تجيب اربعة زيها .. يا خينا الزمن ده زمن الكاش وما ادراكا ما الكاش ..

المهم جمال شال نفسو ختاهو .. وقال ليهو قوم ارح على الحلة .. خليني اشوف ليك موضوعك مع

الحاج ..