الفصل السادس عشر

المهم ياجماعة وكت جمال مالقى الخبر الدايرو من حاج الطاهر .. فات على اهلو .. وكمل رقدتو

الراقدها ديك .. الغريبة انو جمال ما اهتم بي موضوع انو عمو استغلا الوالد .. ليه؟ لانو الهم

الشايلو اكبر من قصة واطة وغيرو .. لكن بصراحة ياجماعة .. جمال كان بدافع الاحساس المر كتير ..

ودايما " بفكر في حياتو الايجابية .. وكل مايجيهو تفكير انو جيتو في الدنيا كانت غلط. وهو غير

راضي بحياتو .. يتذكر الانسان الاحتضنو. وضماهو بي حنانو .. ابوهومحمد. وكيف انو هو بؤدي

ليهو في واجب الوفاء .. تجاه اسرتو. وبناتو .. لانو فعلا جمال عيش امو واخواتو ملكات .. لابسات

احسن لبس .. وماكلات احسن اكل ..

اها الصباح وهو بلبس طالع على الشغل .. جاتو ماجدة وقفت جمب الباب .. قالت ليهو الليلة مالك

طالع بدري كدي؟ ..

انا حالي ده بجهز ليك في فطور صباحي كدي يربط ليك كبدتك ..

قال ليها .. تعالى تعالي انا ساسا " دايرك ..

امي وين؟ قالت ليهو خليتها بتمسح في الدولاب من غبار البارح ده ..

قال ليها تعالي نتكلم قبل ما تجي تكبسنا .. مسكها من يديها الاتنين .. وقعدها في السرير بتاع

غرفتو ..

وجر طربيزة صغيرة .. قعد فوقها قدامها كدا .. قال ليها اسمعي ياماجدة انت طبعا " شفتي صاحبي

احمد.

قالت ليهو ايوة صح ..

قال ليها طيب .. طبعا احمد ده ارجل راجل لاقاني في البلد دي .. لاحدها .. وانا بريدو اكتر من

نفسي .. وطبعا بي سببو هو انا ربنا وفقني .. هو اول زول دلاني على الشغل .. وساعدني وكلم

اصحابو يفتحو لي الشغل .. يعني انا كان عملت شنو وشنو .. مابقدر اجازيهو .. والزول ده بحترمني

وبقدرني .. تتخيلي سافر من هنا مخصوص عشان يشوف عمي العبيد .. اها يا ماجدة الزول

شافك .. وقال معجب بي ادبك واحترامك .. اسمعي موش جمالك فاهمة؟ هههه عشان ماتغتري

فوقنا ..

قالت ليهو (احم احم .. نحن هسي قلنا حاجة؟ براكم الصقط حارقكم ..)

المهم يا فاهمة .. الزول ده قال لي اشوف رايك ..

قالت ليهو ياجمال انا كمان عندي راي معاك .. انت اخوي وابوي وروحي كمان ..

قال ليها .. احيييي انا .. من زمان مابتقولي كدي مالك؟ .. متذكرة كم مرة بتقولي لي امك جمال ده

بتسيطر فيني كدي مالو؟

قالت ليهو بس ده موضوع براهو .. المهم قعد يضحك قال ليها انا بكاوي فيك ماتعملي فيها جادة ..

يلا اقنعي امي بالموضوع .. انا بجي المساء دايرك تخليها لي مدروخة.

قالت ليهو ماتشيل هم دي ساهلة دي ..

المهم بي كل بساطة جمال اخد موافقة اختو .. ومشى السوق هناك في شندي ونص النهار كدي

مخصوص ركب مشى لي ابوحميد ود السيال .. وقال ليهو .. قول واحد يا بوحميد ..

القمرية وقعت .. فضلت الام وفضل العم ..

قال ليهو مابصدق ماجدة اقتنعت يعني .. انا والله خفتها تكون دايرة ود عمها ..

جمال قال ليهو لالا .. من زمان رفضتو براها .. وهسع بعد سوا المصايب دي .. بتكون بطنها طمت

كلو كلو ..

انت بس مالك؟ .. قول يا كريم .. وتقتنع الوالدة ويقتنع عمي العبيد .. مايقوم يدقر لينا في

الموضوع .. اصلو مرات عندو قوة راس كدا من دون سبب .. يعصلج ليك في الموضوع (كج كرج) ..

احمد قال ليهو الله يستر ويكف شر العوارض ..

المهم اهو بشرو وودعو ومشى ..

جمال ماشي في الشارع .. طالع من السوق داير يقطع السكة حديد .. ماشي على مربع 12 عندو

شغل هناك .. لفت نظرو واحد واقف في الشارع. ومعاهو بت. البت صاروخ جوي .. جمال عاين

للراجل كدا .. وقال ياربي الزول ده انا شايفو وين؟

المهم وقف البوكسي .. وجا راجع وقف في طرف الشارع .. ونزل سلم عليهو ..

كيف الحال والاحوال .. وسلم على البنية ..

وقاليهو ياخي انا شايفك قبل كدا ..

داك قال ليهو كيف ياجمال؟ .. ياخي انت ماعرفتني؟ .. انا عبدالماجد. تتذكر القطعة الحصلت فيها

المشكلة .. انا كنت واحد من وسطاء التسوية .. وحتى اتعرفت عليك بعد داك وقلت ليك .. انا متي

ما أجي زيارة لي شندي .. بجي غاشيك اتذكرت؟ ..

قال ليهو ايوة ايوة طبعا اتذكرت .. كيف احوالك .. والله ليك وحشة ..

لكن انت من الوكت داك تاني ماجيت شندي؟ .. موش منطقتكم قريبة بالغرب بي هنا؟ .. قال ليهو

قريبة والله. لكن ربنا مارفع القدم ..

جمال بتكلم مع الراجل .. واصلا ما اتلفت على البت تاني ... لكن بيني وبينكم جمال اتخلع من

القيامة دي .. وعامل فيها عادي .. لكن ماعادي .. وشالو احساسو غادي ..

المهم .. الراجل قال ليهو .. نهاد دي بتي الكبيرة .. بتقرا هنا هسي في السنة الاخيرة في

الثانوية .. بس عندها مشكلة .. وقالو ليها دايرين ولي امرك ..

قال ليهو ان شاء الله خير يازول .. ناس المدارس اصلهم ناس عقد ..

لاحظو ياجماعة .. ماقال ليهو مشكلة شنو؟ ياخي جمال ده والله راجل مهذب ..

لانو المشكلة البنادو فيها ولي الامر دي .. غالبا بتكون متعلقة بي سلوكيات البت .. او عدم الاهتمام

المزعج .. المهم حاجة قد تحرج البت لو ابوها اتكلم بيها ..

لكن في زمنا ده .. في ناس بتحشرو في امور .. انت ذاتك تتحير .. لا تقدر توريهو ولاتقدر تحرجو ..

يسألك ويخليك مزنوق في حتة ضيقة .. ودي دلالة على عدم التهذيب ..

الراجل قال ليهو .. اها ياجمال .. انا بوصلها وبعدين بجي غاشيك في الدكان ..

جمال قال ليهو لالا .. اركبو معاي اوصلكم .. انا ماوراي حاجة ..

وكمان لو بعد نوصل نهاد مشيت معاي اكرمت مثواك .. في البيت تكون ماقصرت .. عبدالماجد قال

ليهو يازول فيها خير .. اصلا المدرسة الليلة بتاخد يومي جت .. ومابقدر احصل عربات الغرب.

الا ابيت معاك واقوم الصباح .. وبعدين المساء عندنا عزاء ليهو مدة في معليش (معليش دي حي في

مدينة شندي) ...

اها انا واجب امشي ليهو .. جمال ليهو والعربية تحت امرك ..

اها يازول بعد وصلهم المدرسة .. عبد الماجد قال ليهو انت امشي ياجمال .. ماتنتظرني .. الجماعة ديل

احتمال يتجرجرو معانا .. انا بجيك بعدين في المحل بي كرعي ساي ..

طبعا جمال حايم في الاسواق .. والمحلات والميادين .. وبمشي بعمل معاينات للبنيان الشغال ..

ومواضيعو ماشة على قدم وساق .. وتجارتو كلها على بعضها .. شابة زي شبب اللهب ..

في اخر اليوم مشى سوق الخدار .. واشترى مسلتزمات الكرم لي عبد الماجد .. وانتظرو لامن جاهو

من المدرسة .. ومشو معليش رفعو الفاتحة .. وفاتو الحلة الراجل بتونس مع جمال .. ونسة تقول

الناس ديل اصحاب ليهم سنين ..

والراجل ظاهر عليهو معجب بي شخصية جمال .. وبي اصالتو وطيبتو وكدا ..

وجمال فعلا اكرمو كرم شديد .. عزم ناس الحلة عشاء .. قال لهم معاي ضيف عزيز. وضبح واكرم

الناس .. وعمك العبيد ذاتو جا .. طبعا " ما أكل من اللحمة هههه .. (خايف يجر شفاطة)

وفي بعض ناس الحلة عرفو عبد الماجد .. وعرفو اهلو .. منطقتو بالغرب. على جيهة سقادي والكمير

كدي ..

المهم الزول بات مع جمال .. والليل كلو يتونسو .. وطلع معاهو الصباح على السوق .. عشان يمشي

خلاص .. في الطريق وصى جمال على نهاد ..

قال ليهو بتي ماعندها زول في البلد دي .. قاعدة مع خالتها .. وخالتها راجلها متوفي .. خلي لي بالك

منها .. امانة في رقبتك .. وانا كلمتها لو احتاجت لاي حاجة تصلك في محلك ..

جمال قال ليهو والله في عيوني ماتشيل هم .. وجمال حسا بي شحة في قلبو وخوف. من الامانة

دي ... سببها شنو؟ .. هو ذاتو ماعارف ..

تاني يوم من الموضوع ده .. وكانت الجمعة .. الصباح جمال نادى امو .. سألها قال ليها .. طبعا

ماجدة بتكون حكت ليك .. موضوع احمد .. قالت ليهو اي بلحيل حكت لي .. احمد ولدي وماعندي

مانع .. على الاقل. يفقل لينا الطريق من ناس عمك ديل .. قال ليها المهم انك موافقة ..

ومشى لي عمو على حسب المواعيد .. عشان يشاورو في الموضوع .. وماكلم امو ماشي وين .. لانو

عارفها مابترضى الموضوع ده بالطريقة دي ..

وصل عمو وسلم عليهو .. بي كل حفاوة .. ابتسامة وطيبة خاطر ..

كيفك الليلة ياعمي .. لكن انا متكيف منك والله .. غايتو في الاكل عامل حسابك تب .. البارح في

الدعوة انا مراقبك .. شايفك شغال سلطة بس ..

قال ليهو والله ياجمال ياولدي دكتورك ده .. حرمني من اي حاجة ..

يازول بقيت اعرمط في الجرجير زي النعجة ..

جمال قال ليهو .. اها شايفك براك خلينا نستقل الفرصة .. واحكي ليك الموضوع ..

طبعا ياعمي انا وكت بديت اشتغل في السوق .. الزول الوحيد الساعدني احمد ودفلان من السيال ..

طبعا انت بتعرفو وتعرف ابوهو .. والله الزول خيرو علي مابقدر اوفيهو .. اها الزول ده طبعا " مع

انو صاحبي .. قال عندو رغبة يناسبنا وطالب أيد ماجدة .. وانا براي شايفو زول مافيهو كلام .. لكن

الشورة طبعا ليك .. انت ياكا في مكان ابوها ..

عمك العبيد بعد ماكان مكوع .. قعد على حيلو .. وقال ليهو هو شاف ماجدة وين احمد؟ ..

قال ليهو وكت سمع بيك عيان.

جانا هنا في الحلة .. ودق باب البيت وفتحت ليهو الباب ماجدة .. وشافها ..

قال ليهو يعني شاف اختك من وراك .. وانت ما حركت ساكن ..

قال ليهو احرك ساكن اسوي شنو يعني؟ .. وشافها من وراي وين؟ موعند اهلها .. وهو زول جا دق

الباب ..

لقاها في شارع؟؟ ولادايحة في حلة ؟؟ انا ماشايف مشكلة في الموضوع ياعمي.

لو عندك اعتراض تاني قولو لي .. والراي رايك ..

قال ليهو ايوة عندي .. انا ماجدة دايرها لي يونس ولدي .. ودي بت اخوي .. ومابفرط فيها ..

قول لي صاحبك ماعندنا ليك مراة