الفصل الحادي والعشرون

طبعا جمال .. انهارت عندو كل الامال .. واتلاشت كل التوقعات بانو يطلع انسان شرعي. ونزل

عليهو الغم في توب جديد .. ومؤكد ..

ولسان حالو يقول ..

عصفور الاماني الكان مؤانس صوتو.

اعلن حظي في نشرة حداشر موتو ..

لو كان تركو طار خلاهو حي في فوتو ..

كان ابقى الامل عايشلي رغم خفوتو ..

شتلة ويابسة من امل القلب متكيه.

شاربه الذله والاوراق عليها اسيه.

ياعمي القلب قولك اذاهو اذيه ..

ياريت لو بقت كل الظروف عكسية.

سكت طويل وعاين للواطة .. وعمو يعاين ليهو متأثر جدا .. من الحاصل .. والندامة كايلاهو .. وبرضو

بقول ليهوفي كلام عشان يخفف عليهو الاحساس العجيب الجواهو ..

لكن جمال في اللحظة دي ماقاعد يسمع .. في زلازل وبراكين اشتغلت في اضنيهو من جديد ..

قال ليهو ياعمي نحن قبل كدا اتفقنا .. على انو عاتكة مابتناسبني .. وانتهينا من الموضوع ده .. بس

هي متمسكة كدا لانها ماعارفة الحاصل .. العارفو انت وعارفو انا ..

قال ليهو تعرف من وين؟ وتعرف ليه؟ .. انا والله فكرت كتير في الموضوع ده .. لامن مخي ده

قرب يطرشق .. في النهاية قلت .. انو جمال مأمون ومضمون على بتي اكتر من ولاد الحلال .. والله

ولاد الحرام مالين البلد .. مافي ود حلال زيك انت كلو كلو ..

انا ماعندي مانع تب .. انت زول مسؤولية .. الباقي نحن مامسؤولين منه ..

جمال قال ليهو .. انا مستحيل اخدعها خدعة قدر دي .. يا اما أصرف النظر عنها .. او نكلمها

بالحاصل .. ونشوف رايها ..

بعدين ياعمي انا عايز اطمنك على حاجة .. انا ما متضايق من الموضوع ده .. ولا محمل امي اي ذنب

فيهو .. اولا " امي اتمردت على عادة سيئة عند اهلها .. اللهي القبلية والجهوية .. مع انها غلطت في

مروقها من البيت .. بس كان ده الحل الوحيد قدامها .. باعتبار عمرها الصغير ..

الشي التاني على حسب كلامك .. هي ماسمحت ليهو يقرب منها .. الابعد اتاكدت من انو الزواج بقى

شرعي صح؟ معناها حتى لو الخدعة كانت من الزول الغائب .. هي من جانبها مافي ذنب ابدا " .. فانا

عشان كدا ماعايز اخليها تعرف اني انا عرفت .. لانها تاني طول عمرها بتعيش منكسة راسها

قدامي .. وكت تحس بي انا عرفت القصة ..

فنحن الاتنين لا أنا ولا امي ماعندها جريمة .. على كدا انابشوف كراهيتك ليها ماصحيحة .. بعدين

كونها تتصرف وتلصقني بي ابو شرعي .. احسن من تقتلني .. او توديني لي دار ايتام .. على الاقل

عشت جزء من حياتي عزيز ومكرم .. مع ابوي الله يرحمو ويحسن اليه ..

جمال بتكلم والعبيد فاتح خشمو يعاين ليهو ..

قال ليهو والله البشوفك كاتل حيلك .. يقول مابتعرف تنضم .. لكن ماشاء الله وكلامك كلو منطقي

والله ..

اها عاتكة بتي انا موافق .. وخليتك احكي ليها براك ... مادام انت مصر على انها تعرف .. لو

بتقدر .. انا مابقدر

لكن برضو بتقابلك مشكلة تانية .. مشكلة امنة بت خالد .. مابتقبل ليك.

قال ليهو نشوف ان شاء الله ..

اها ودع عمو ورجع على البيت ..

والايام مرت ..

اها يوم من ذات الايام .. كان جمال قاعد مع امو بتونسو .. قالت ليهو .. يا جمال .. رايك في عاتكة

شنو؟ .. والله عاتكة دي انا بريدها زي عيوني ديل .. بس المشكلة ابوها الشوم ده .. لكن امها انا

عمري ماسمعت منها الا الخير ..

قال ليها كدي يا امي هسع انا ماجاهز للموضوع ده .. وعندي مشاغل قدر سبيب راسي.

انا الاسبوع الجاي عندي سفرية .. قالت ليهو سجمي مسافر وين؟ .. قال ليها ماشي اشوف ناس

جدي .. جدي ابو امي .. خالد ابو امنة بت خالد ..

امونة كانت وافقة على حيلها قعدت .. قالت ليهو والله ياهو الفضل .. انت معناها داير تجيب لي

مرض قلب تلحقني عمك .. ماشي ليهم داير بيهم شنو؟ شايفهم عمرك ده كلو في زول سأل منك؟

قال ليها يا امي .. نحن نبقى احسن منهم .. قالت ليهو نحن في اسرتنا عندنا عيب المراة تمشي لي

اهلها .. الا اهلها هم البجوها.

عاين ليها كدي .. قال ليها ياتو عادات يا امي؟ .. والله ديل الا مايبقو سودانيين .. وطبعا هو كاشفها

دي كضبة

قال ليها غايتو انا عايز امشي .. بس انتي اديني النية والخاطر ..

قالت ليهو اها ماشي متين؟ والله اتذكرت امي .. ياحليل امي .. في الفترة دي كلها ما لاقيتها ولا

يوم .. قال ليها يعني انتي ولا يوم واحد مافكرتي تمشي تزوري اهلك .. ولا بتحيبي لينا سيرتهم ..

الامرات بسيطة لمن تحكي لينا عن جدي خالد ..

فاطمة بت خالد اتجرست شديد من قرار جمال ده .. وارتبكت جدا .. وماعندها حجة تمنعو يزور ناس

جدو ..

اهااا قبل مايسافر بي يومين كدا .. لقى عاتكة قاعدة في البيت .. معاها نجوى وامنة بت خالد

مافيشة .. قال لي نجوى نادي لي عاتكة دي براها .. عايز اتكلم معاها كلام سري .. واوعك تجي

تتصنطي.

قالت ليهو .. والله يا استاذ .. انا ما مربية على الخساسة .. واللبيد .. قعد يضحك من الزعلة الحصلت

فوق وشي نجوى ..

المهم جاتو البت الاسمها عاتكة ..

قال ليها اقعدي .. طبعا ياعاتكة .. انا عارف انك انتي انسانة بتحفظي الاسرار .. بس انا عايز اقول

ليك سر مافي زول عارفو .. واياك تقول ليهو لي زول لانو ممنوع.

قالت ليهو خشمي ان شاء الله ينعوج .. كان مرقت سرك ..

قال ليها انا يا عاتكة ما ود عمك .. ومحمد عمك .. ما ابوي .. محمد مربيني بس ...

لكن امنة بت خالد امي .. يعني ماجدة ونجوى .. اخواتي من امي .. انا امي جايباني من راجل تاني

انا مابعرفو .. اتزوجها غصبا عن اهلها وغشاها وهرب .. بس انتي تكوني عارفة الحكاية دي .. يعني

انا حتى ما ولد شرعي ..

قالت ليهو والله ما كنت بصدق الكلام ده .. لو قالو لي زول غيرك .. لكن انت عمرك ماكضبت ..

قال ليها ياعاتكة ده ما موضوع بكضبو فيهو .. اها رايك شنو بعد كدا دايراني؟؟ وللا عندك راي ..

يعني بعدين اولادك ذاتهم بكون مشكوك في امرهم ..

قالت ليهو الحقيقة انا اتفاجأت بالكلام ده .. وراسي ضرب ورا وقدام ..

كدي اديني فرصة افكر لغاية باكر الصباح .. وبجيك بالنجيضة ..

قال ليها ياسلام عليك ياعاتكة .. اخدي راحتك تب .. انا اصلي ماني عجلان .. ولافارقة معاي .. كان

وافقتي مرحب .. واكان رفضتي مرحب .. الاتنين واحد عندي. وفعلا ده احساسو بالضبط ..

عاتكة كملت كلامها ومشت لي نجوى بي غادي وشها مخطوف .. وحالتها تحنن .. قالت ليها ياعاتكة

جمال اخوي قال ليك شنو؟

عاتكة قالت ليها .. قال لي انا ماعندي نية عرس .. الا بعد عشرة سنة ..

قالت ليها هه .. ده والله سنة واحدة مايقدر يقعد .. غايتو غشتها .. ومازالت عاتكة سارحة

ومسخية. لي بكرة ..

جات الصباح بدري قبل ما يطلع جمال على شندي .. وقالت ليهو ..

جمال دايراك في كلمة ..

جاها قريب قالت ليهو (انا موافقة) .. وفاتت طوالي ..

جمال طير عيونو واندهش .. وبقى يعاين ليها وهي ماشة كدا .. لانو ما كان متوقع ابدا انها توافق

على الكلام ده ..

لكن بصراحة جواهو فرح فرحة في عمرو كلو ماحصل حس بيها ..

كورك ليها .. قال ليها تعالي ياعاتكة. ؟؟

جاتو راجعة .. قال ليها والله انتي اصيلة .. وفعلا انتي بت العبيد .. وفعلا عمك محمد ..

محمد بالرغم من انو عارفني انا شنو .. قبلني اكون ولدو .. والعبيد قبلني اكون نسيبو .. وعاتكة

قبلتني اكون لها زوج .. والله انتو اعظم ناس في حياتي .. والله انا فرحان شديد ..

بعد كدا ياعتوك .. الدنيا التحرق .. انا والله ما كنت بتمنى انسانة غيرك .. لكن كنت شايفك بعيدة

علي ومابطولك ..

قالت ليهو ياجمال انت جمال وبس .. انا ماعندي شغلة بي الماضي .. وبي قروشك كان غنيان كان

فلسان .. انا بس انت او القبر ..

بعد عاتكة فاتت .. جمال عاين ليها كدا بي اعجاب وقال ..

انتمه المراد .. واتحقق الفي بالي ..

يا جوهر بنات ضهر النقيب العالي ..

مهما الدنيا ضاقت .. وسودت احوالي ..

رب الكون كريم .. منعم على طوالي ..

ماقصر معاي رب العباد في حاجه ..

كاب فوقي النعم. متل المطر سجاجه ..

كان الدنيا بدري اتكفرنت لجاجة ..

هسع ربي برررد قلبي في تلاجه ..

وخلاص .. جمال بدا يجهز في حالو ويوصي في يونس .. على العمل ..

حقيقة يونس ساعد جمال كتير وبقى شغال معاهو .. بي نية واحدة ..

وخفف عليهو كتير من المشغوليات ..

يادوب كدا جمال بدا يفكر يسافر .. والسفرية يوم السبت .. ان شاء الله ..

وفيها حتنقلب الاوضاع راسأ على عقب وتظهر المفاجأت الغريبة

الماكانت بتخطر على بال ..