الفصل الرابع عشر

جمال قال ليهو تعال ياياسين بره هناك. طلعو برة البيت. قال ليهو الحاصل شنو؟. احكي سريع ..

ياسين قال ليهو طبعا انت زي ماعارف يونس. في الايام الاخيرة دي سوا ليهو تجارة كدي .. قاطعا

من راسو. وداير يغني سريع سريع.

خلاس شافك انت نجحت واتوفقت. وابوي طوالي بتكلم عنك .. ومعجب بي انجازاتك. اها اظنو شالتو

الغيرة. وبقى يشيل طاقية دا يختها فوق راس ده.

وكت يضايق في دين .. بشتري حاجة بالاجل .. ويكسرها (يكسرها يعني يبيعها باقل من سعرها

بكتير. عشان الكاش)

ويسدد بي قروشها .. وشوية شوية بقت فوقو ديون لاتحصى ولاتعد ..

طبعا وكت حكا لي المبالغ المطلوبة منو. انا لامن ختيت ايدي فوق راسي. بس انا ما بكلم ابوي

يقوم يصدم ويموت ..

اها هسع طبعا قفلوه في سجن الدامر. وطللع بي ضمانة يومين عشان يسدد للناس الفاتحين فيهو

بلاغ. بس في غيرهم كتير .. اها وكت جا لقى ابوي سافر. راسو انقطع وبقى محتار. وهو في

حيرتو ديك جا عثمان. وسلمو قروش البقرات الباعن. وقال ليهو سريع تحصل بيهن ابوك في

الخرطوم.

هو قال لي انا مابقدر امشي لابوي .. لانو في زول ضامني يومين.

مادام ابوي معاهو جمال .. مافي مشكلة .. ياهو ود اخوهو ومابقصر .. انا بمشي افك مني الناس

ديل .. وتاني الله كريم ..

والله ياجمال امي بقت تبكي الليل والنهار .. بي هنا ابوي عيان وسفروهو .. وبي هنا يونس في

السجن مطالب ..

وانا ذاتي ماعارف اتصرف كيف ..

جمال بسمع في حكاية ياسين .. ومتفاجئ بي تصرفات يونس .. الما كان بتوقعها كلو كلو ..

قال ليهو ياسين ماتشيل هم .. نحن ان شاء الله بنسدد ليهم. بس هسع الننتهي من عملية عمي.

ويقوم بالسلامة. ومافي عوجة تب .. انا دايرك انت تطمن امك قول ليها. جمال قال ليك انا برضو

ولدك وماتشيلي هم .. انت هسع تسافر طوالي وتبقى في العقاب. وتمشي لي ناس بيتنا. تشوف

احتياجاتهم .. انت تسدها هناك .. وانا بسدها هنا ..

ياسين قال ليهو لالا انا لازم انا احضر العملية حقة ابوي مابقدر امشي كدي ..

المهم يازول في الوكت ده حصلت قصة عجيبة وغريبة .. من عجائب القدر ..

طبعا بتتذكرو احمد صاحب جمال المن السيال ..

ليهو كم يوم مالاقي جمال في شندي. وجمال خلا شندي مشلولة عديل. محلو الرئيسي. بتاع

الخدمات التجارية داك مقفول. هومحل تجاري بيع وشراء قطع اراضي بيوت وعربات وغيرو .. ودكانو

بتاع الاسبيرات الفي المنطقة مقفول. بس دكانو بتاع الاجمالي الفي غرب السوق لقاهو فاتح .. دي

كلها حوامه حايمها احمد .. كايس لي جمال .. المهم الولد الماسك الدكان الاجمالي .. قال ليهو والله

جمال ده جا هنا شال قروش. وقال عمو عيان .. بس تاني ما اداني خبر.

قام احمد دور عربيتو وطوالي مشى الحلة .. حقة ناس جمال

وعلى طول على بيت ناس جمال .. طبعا بعرفو جاهو مرتين تقريبا ..

اها لمن دق الباب فتحت ليهو الباب ست الاسم الاسمها ماجدة اخت جمال. جاتو لابسة توب امها ..

عليكم السلام انت منو؟

قال ليها انا احمد .. انتي ماجدة؟

قالت ليهو ايوة نعم ماجدة .. بس احمد انا ماعرفتك ..

قال ليها انا احمد .. صاحب جمال من السيال .. جيتكم مرتين هنا ..

قال ليهو .. ايوة ايوة .. احمد كيفك بعرفك شديد .. بس ما اتشاوفنا .. الله يديك العافية اتفضل ..

قال ليها جمال وين؟ قالت ليهو جمال سافرمع عمي عيان .. مشى الخرطوم عمي تعبان شوية

سفروهو ..

هي بتتكلم واحمد بعاين ليها مقهي فيها. ومندهش. وهي طبعا بتتكلم بي كل براءة .. وبتتلفت جاي

وجاي .. يعني ما مركزو فيهو حتى ..

قال ليها .. طيب ماتقولي لي خش اتفضل .. قالت ليهو البيت بيتك والله .. قبيل قلت ليك

اتفضل. اصلا جمال قال انت اخوه الوحيد .. في الدنيا دي ..

قال ليها ياريت الواحد يقدر يرتبط مع جمال طول العمر .. والله انا جمال ده مابقدر افارقو .. متمني

اناسبو ..

ولسع بتكلم وواقف برة .. وكت قاليها متمني اناسبو يادوب انتبهت وطيرت عيونها .. وطوالي دنقرت

خجلانة ..

قالت ليهو خش جوة على الديوان ده .. النكلم امي بيك .. قال ليها وكمان كباية شاية من ايدك ..

قالت ليهو حاضر ..

احمد دخل جوة .. وقعد في كرسي. حيلو كلو منهار .. وشكلو انخلع من البت. وما كان بتخيل انو

جمال عندو اخت زي دي.

واكتر حاجة خايف انو البت دي تكون مخطوبة .. لود عمها يونس لانو بعرفو كويس .. ولاقاهو كم مرة

في شندي. وعارفو مو متزوج.

بعد شوية امنة بت خالد جاتو .. وهو طبعا بعرفها وشافها المرة الفاتت.. سلمت عليهو حبابو ولدي

الغالي .. مالك طولت مننا كدي؟ .. والله انا كم مرة بسأل منك. جمال بس بقول لي مشغول.

وجمال ذاتو بقى مشغول زيك ..

قال ليها ياخالتي ماشاء الله .. جمال زول شغل .. وامين ومعاملتو مع الناس كويسة. ونيتو طيبة.

على قدر نيتو ربنا اداهو. ماشاء الله جمال هسي البلزو مابرميهو .. وده كلو بفضل الله ودعواتك

ورضاك عليهو ..

اها هسي قالو لي سافر الخرطوم مع عمو. مش كدي؟

قعدت في الكرسي بتتكلم معاهو. قالت ليهو والله عمك قالو تعبان شديد .. البجي من الخرطوم كلو

يقول (العبيد مو ماشي في خيار) ..

قال ليها: يونس معاهم هناك؟

قالت له: لالا معاهو جمال وهسي ياسين لحقو ..

قال ليها طيب يونس وين يعني ..؟

قالت ليهو شن خبرني قالو طافش .. (طبعا " ماجابت ليهو سيرة مسجون وكدا نهائي (ماعارف ليه)

قال ليها معقول ياخالتي .. يونس ده لازم تسألو منو .. لانو احتمال مستقبلو يرتبط بيكم .. وبضحك ..

قالت ليهو .. الله لاقدر ياولدي .. تف من خشمك .. قال ليها ليه ياخالتي؟

قالت ليهو عمهم ده صعب ونفسو حار .. مابتعاشر تب. بعدين بنوتي ذاتهن ماهن دايراتنهم ..

طبعا احمد شكلو ارتاح للموضوع ده شديد .. قال ليها والله طبعا " الرغبة اهم حاجة .. ماتبقو زي

الناس الجاهلين البجبرو البنات ضد رغباتهن ..

قالت ليهو منو دي؟؟ .. انا والله بتي مابديها زول مي دايراهو. كان البلد انقلبت على وشيها .. بعدين

جمال اخوك ذاتو مابقبل كدي ..

في الوكت ده ماجدة جابت الشاي وجات .. مدنقرة وخجلانة خجلة قربت تخش في الواطه .. قالت لي

امها كبي الشاي يا امي. وطلعت طوالي .. وهو بعاين ليها من دخلت لامن مرقت .. وامنة بت خالد

مراقبة الوضع .. والخجلة حقة بتها شككتها اكتر ..

بقت ساكتة .. وماحركت ساكن .. وعملت رايحة .. وغيرت الموضوع .. اها يا احمد شغلكم ماشي

كيف؟

قال ليها والله نحمد الله يا ام جمال .. اليومين ديل السوق نايم لكن مستورة والحمد لله ..

قالت ليهو مادام بتحمد في ربك مابتجيك عوجة تب .. المهم اخد ونستو وشرب كبايتو وقام طلع .. وفي

قلبو في امنية انو يشوف ماجدة تاني وهو طالع مرة واحدة بس. لكن ماحصل ..

ومن ساعتو ديك بقى يفكر في السفر للخرطوم .. اساسا المفروض يمشي يشوف عم جمال .. بعد

سمع بيهو وجاهو في البيت ..

والمفروض يمشي يفاتح صاحبو الوحيد في الموضوع الجديد ده. قبل مايفوت الفرصة ..

وفعلا باكر من الصباح ملا عربيتو بنزين .. وشال الوصف بتاع بيت ناس التوم من السوق وسافر ..

وفي الشارع كلو ابوحميد البت ماراحت من راسو .. وجواهو احاسيس عجيبة وغريبة .. واكتر حاجة

مفرحاهو انو في امل يناسب جمال صاحبو العزيز ..

اها يازول وكت وصل الخرطوم .. لقا الجماعة متجهزين تب والعملية باكر الساعة 9 صباحا .. " وجمال

ده فرح بي جية احمد شديد. وحسا بيهو عزاهو معزة كبيرة .. بس جمال مقلق على عمو .. وخايف

من العملية .. لانو قالو ليهو العملية الزي دي .. خطرة شديد ..

وهو شغال يمرق ويدخل .. زي الزول العندو مرتو في عنبر الولادة ..

لامن عمو ذاتو حسا بي قلقو .. قال ليهو جمال ياولدي اهدا شوية. ان شاء الله مافي عوجة.

اها يازول باكر كلهم مشو المستشفى .. امكن حكاية بتاعة 9 رجال. وخمسة حريم .. وزوجة العبيد ام

يونس ذاتها جات من البلد .. معاها كم نفر للعملية دي ..

مع انها العملية عملية صغرى .. يعني بسموها القسطرة .. تقريبا مافيها خطورة شديدة يعني ..

المهم ..

عمك دخل العملية والناس ديل قاعدين برة متوترين ..

في واحد من الجماعة القاعدين برة من ناس الحلة صاحب العبيد شديد. اسمو حاج الطاهر. وصاحب

اسرار العبيد الكبيرة وصغيرة ..

نادى جمال براهو .. وقال ليهو دايرك في كلمتين ياجمال ..

جمال طوال قام من الفرشة ونفض جلابيتو ومشى معاهو بعيد الكلام ده داخل المستشفى ..

عمك حاج الطاهر اتحكر في الواطة .. شايل ليهو عصاية بقى يشخت في الواطة ومدنقر وبتكلم .. قال

ليهو ياجمال ياولدي. عندي منك طلب واحد بس اول مرة اطلب لي منك ..

قال ليهو اتفضل ياعمي الطاهر .. والله دمي يهون ليك .. قول بس وماتشيل هم.

قال ليهو انا دايرك تعفى من عمك ده .. لانو الموت والحياة مي معروفة

والعملية دي نادر الزول يمرق منها ...

والله انا وقفتك معاهو دي .. مأثراني لامن قلبي نازف دم ..

قال ليهو في شنو يا عمي الطاهر؟ .. قال ليهو ده ما وكت كلام بس قول لي عافي منو؟

جمال قال ليهو انا عافي منو دنيا واخرى .. مع انو عمي وماحصل ظلمني ..